إقالة مدير مستشفي إسنا بعد التهام القطط والفئران لنصف جثة طفلة بالمشرحة

[Ambitious]

القاهرة - قررت وزارة الصحة بمحافظة قنا إعفاء الدكتور رأفت محمد البدري مدير مستشفي إسنا المركزي من منصبه إثر اختفاء النصف السفلي لطفلة متوفاة بمشرحة المستشفي‏.‏

وكان الدكتور أيمن محمد عبدالمنعم وكيل الوزارة قد قرر تشكيل لجنة لمعاينة المشرحة والتحقيق في الواقعة وتبين ان الجثة موضوعة على الأرض أسفل الثلاجة وليست بداخلها وفي حالة من التعفن وغياب النصف السفلي وتم كذلك ايقاف طبيب الاستقبال السيد العربي‏.‏

وقد أشارت أصابع الاتهام الى القطط والفئران بقيامها بالتهام النصف المختفي من الطفلة‏!.‏

المصدر: صحيفة الاهرام، مصراوي

إلى هنا إنتهى الخبر المفزع الذى أصابنى بالذهول .. نعم أعلم ان مستشفيات المحروسة أقرب ما تكون إلى مبنى عديم الجدوى به أناس عديمى المنفعة لكن لم يتجرأ عقلى اطلاقا لتصور انها اصبحت بالفعل (خرابة) ..

لم أتصور يوما ان هناك ماهو اقسى من اللامبالاة بأرواح الناس ومعاناتهم والتلاعب بأدميتهم .. الأن إكتملت المعاناة بعدم الاكتراث حتى بأجسادهم بعدما سكنت من هول ما ذاقت وكأنهم يستكثرون على الناس أجسادهم بعدما انتزعوا منهم كرامتهم .. فلا كرامة فى حياتك ولن تذوقها بعد مماتك فأنت انسان سنكوح طالما وطأت مستشفى حكومى لتستجدى فحصا وتتسول دواء لا يحق لك ان تطالب بكرامة فى حياتك ولا جسدا بعد مماتك غير مأسوفا عليك

وما يزيد الطين بلة والخبر فزعة .. اسلوب صياغته البارد .. قررت وزارة الصحة اعفاء فلان من منصبه .. وكأنه وزير أقيل من منصبه ليجد قسطا من الراحة .. جريمة كهذه تستحق على اقل تقدير تحقيقا جنائيا وليس مجرد إقالة من منصبه !!!

عجبت لك يا وطن ساد فيه غربائه وتغرب فيه أبنائه !!

تم تعديل 2 أكتوبر 2009 بواسطة Ambitious

[doha]

هو المشكلة مش شالوا مين وحطوا مين .. المشكلة هل ( الاجزاء ) الناقصة من الجثة ( فعليا ) راحت فين ..

مرة تشيلها ( عايده ) ومرة تلبسها ( القطة ) .. ربنا يستر ..

[Alrefaey]

وصلت لكدة لا حول ولا قوة الا بالله

برافو وزارة الصحة برافو ياحكومة دى مابقتشى دولة ووطن دى اصبحت خرابة

هذه الجريمة يسأل عنها من اول نظيف مرورا بالجبلى والمحافظ ووكيل وزارة الصحة بالمحافظة ومدير المستشفى حتى اصغر موظف بالمستشفى

هذا ليس خطأ فردى يا أخونا ده إنهيار كامل لمنظومة الدولة متمثلة فى وزارة الصحة

[hazemtara]

حتى إحترام حُرمة الموتى ضاعت فيك يا محروسة زى ما كل حاجة حلوة فيكى أصبحت ذكرى من الماضى.

حسبنا الله ونعم الوكيل

[Rock]

كنت زمان بقول انة البلد دي حلها قنبلة نووية تنضف البلد و بعدين يجيبوا ناس يسكنوها البلد من جديد من اي حتة حتي من المريخ لكن شكله وباء الانفلونزا هايقوم بالدور دة

اشكرك يا رب

[حسام يوسف]

لاحول ولاقوة الا بالله

[se_ Elsyed]

حات الجبلي مستلم تركه .. أقسم بالله لو جبل كان إتهد

المستفشات الحكومية ملف متفجر مستحيل الأقتراب منه

ويقول لك ليه إحنا أعلى نسبة في أصابات الكبد الوبائي والفشل الكلوي .... ؟

روح يا معلم وشوف مستوى النضافه في المستشفيات اللي تجيب إيدز مش ألتهاب كبدئي فقط

ولو أسعدك الحظ أدخل حمام في أي مستشفى حكومي .. واتحدى وننفرد وشوف بنفسك

وشوف التولز اللي بيستخدمها الأطباء عامله إزاي ؟

ده كله وأنا من القاهرة وزرت بعض مستشفيات أسكندرية برضوا ..

اما الأقاليم فبالتأكيد حدث ولا حرج ....

سمعت بوداني .... بوداني أطباء بالذات نسا ولاده ... عادي جداً بيقولوا إنهم بيرموا مخلفات علميات الولاده للقطط ... شغال وعادي .. هي القطط دي مش مخلوق ولازم يتغذا وياكل ؟

وشاهدت بعيني .. مستشفى عريقة وكُبرى في القاهرة وهي مستشفى الدمدراش ... والقطط تلهو وتمرح في عنابر المرضى ... يعني ممكن قطه تدخل تاكل مريض لا حول له ولا قوة وما فيش مشكلة ... مش هانقول تنقل له عدوى مثلاً .. أصلها قطط معقمه وطبيه ومتربية عالغالي ..

ههههههههه أعفاءه من منصبه .. يا حلاوه .. كسبنا صلاة النبي

زي موضوع نقل الموظف المجرم من المكان اللي هو فيه لمكان أخر ليبدأ فيه نشاطه الأجرامي ؟

أستفدنا إيه إحنا كده ؟

طب ما هو هايروح عياداته الخاصة أو مستشفى خاص والجريمة هاتعدي ؟

دي لو بنت وزير الصحة أو بنت الأخ المدير ... كان الموضوع عدا بالساهل ؟

بلاش كده

لو البنت دي جثتها كانت في المشرحه نتيجة جريمة مثلاً والطب الشرعي المفروض هايشوف شغله ... كان يبقى إيه الوضع ؟

بصراحه الوضع مُذري .. والحجة قلة الأمكانيات ...

لكن المشكلة مش في كده ... المشكلة في قلة الضمير

أنا أُفضل يبقى عندي 2 مستشفى نضيفة ومحترمه على أعلى مستوى ...

أفضل ما يكون عندي 100 خرابه

وعندي الناس تشغل مخها وتدور على موارد للمستشفيات أفضل من الشكوى والبكاء

........

بُصوا .. نشب خلاف بيني وبين زوجتي على أثر مشاهدتنا لبرنامج توك شو تقريباً الحياة اليوم ... عن مستشفى الرمد في الجيزة ... وشكوى المسئولين من قلى الموارد والامكانيات بالرغم من إن المستشفى بيخدم قطاع كبير جداً ومحافظة الجيزة كبيرة مش صغيرة وبها أحياء تكاد تكون دويلات زي أمبابة مثلاً .. ناهيك عن قربها من محافظات ومدن صعيد مصر زي العياط وبني سويف وتلك المدن الأخرى وفعلاً منظر المرضى غلابه جداً ...

الخلاف نشب لما عرفت إن قيمة الكشف عبارة عن " جنيه مصري واحد فقط لا غير "

فقلت لمراتي ... طب ما يعملوا الكشف بخمسه جنيه مش هانقول عشرة ولا عشرين ؟

بصت لي حتت دين بصه ... وقالت لي : إسكت يا عم الأرستقراطي .. هما لاقيين ياكلوا ...

لا أتفق مع تلك المقولة ...

أيوه لاقيين ياكلوا .... أنا بأتكلم في 5 جنيها مش كتير يعني

يعني 500 % يعني زيادة في موارد المستشفى

هما الناس دي مش جايين مواصلات ؟

وبياكلوا وبيشربوا ولو اكل بسيط ؟

احنا هانعمل زي مجانية التعليم عشان الغلابة المعدمين ... وتلاقي كل واحد بيدي ولاده دروس خصوصية من فصول الصيف وطول الدراسة وتلاقيه صرف مصاريف ولا كإنه دخله مدرسة لغات مثلاً !!!!!!!!!!!!

شيء عجيب والله

[mama nona]

دى مش اول مرة

من حوالى 3-4 سنوات

كان فيه حادثة مشابهة

قطة اخدت النصف الاسفل لطفل ذكر حى

لا حول ولا قوة الا بالله

هما الاقلية المهملين دول هما ال بيشوهو صورة الاطباء

حسبى الله ونعم الوكيل

انا من رأيى يتم اقالة وزير الصحة عالاهمال ال وصلنا له

[se_ Elsyed]

انا من رأيى يتم اقالة وزير الصحة عالاهمال ال وصلنا له

يا ماما نونا ..

الشهادة لله الراجل عامل أراجوز ومش ملاحق

إشي فساد إداري

على ضعف أمكانيات

على أنفلونزا كتاكيت

على خنازير

وبصراحه كما ذكرت هي تركه ثقيلة جداً جداً على اي حد

والعملية عاوزه حاجه كده ماركة " جرافينا "

إنسف حمامك القديم

يعني تدي صلاحيات لواحد مسئول .. وينفخ بقى المجرمين الفاسدين اللي بيلعبوا بصحة الناس دول ..

والشهادة لله ... الاجازة دي بالذات .. قابلت أطباء محترمين قوي قوي قوي .. وشاطرين قوي قوي قوي ... والله العظيم بيعملوا من الفسيخ شربات ... وبجد بجد عليهم ضغط رهيب ...

الناس كتيره والأمكانيات قليلة ..

وسوري يعني بيغزلوا برجل حمار زي ما بيقولوا ...

عامةً

مقارنةً بالاطباء اللي هنا ... واخص بالذكر المصريين ..

بصراحة ... عن تجربة .... في مصر أشطررررررر بكتيررررررررررررررررر جداً جداً دون الخوض في التفاصيل

لكن الشطارة دي لما تمتزج بالأنضباط ... هايبقى عندنا شيء هايل والله

بُصوا

احنا بنصرف في الأول زي ما أي حد بيصرف

لكن العبرة في الأستمرارية

والعبرة في المحافظة على ما انجزناه

لكن يا فرحتي

أعمل مستشفى كبيييييييير وضخم ومش هاضرب أمثله لإني شوفت كتير امثلة ...

وتيجي بعد 6 شهور تلاقي المكيفات ما بيتعملش لها صيانه وضربت

والحمامات بقت الخرابات أنضف منها

والاجهزة الطبية بقت تشتغل بالمنافله

والعنابر من غير شبابيك زجاج ... آه والله

[أسد]

للأسف الشديد ..

أسطورة العلاج المجاني في مصر أصبحت غير موجودة .. فهي كالعنقاء والخل الوفي .. غائبة تماماً الآن ..

وأعتقد أنها أمر مستحيل ..

الخدمة الطبية في أي مكان في العالم كله أمر مكلف جداً جداً .. وعندما نقرنها بالمجانية .. وبفساد إداري منظم وممنهح ومتفشي ..

وربط تلك الخدمات الهامة بالمحليات التي هي أساساً فاسدة وخربة ..

فهنا لا نتوقع أي خير من وراء ذلك .. بل يجب أن نتوقع الأسوأ ...

الحكومة المصرية ونظام الحكم في مصر ردئ إلى درجة كبيرة .. وأغلب سلسال هذا النظام لا يقوم بعمل واجبه على الوجه المطلوب .. بل قل ولا حتى الحد الأدنى منه ..

ولكني هنا أريد أن أتكلم في ناحية أخرى.. سأخرج بها في إتجاه آخر ..

النظام المصري فاشل ..

والإخوان المسلمون يطرحون أنفسهم كبديل ويرددون دائماً أنهم لديهم حلولاً لكل مشاكل مصر ..

والإخوان المسلمون مسيطرون بشكل شبه تام على نقابة الأطباء ..

وكان بإمكانهم أن يعرضوا لنا نموذجاً حتى يغرونا على إختيارهم إذا كان هناك إختيار .. أو دعمهم حينما يحتاجون دعم ..

ولكن ما نراه في القطاع الصحي في مصر من تدهو الخدمات .. وعدم محاسبة المخطئين من الأطباء والمستهرين منهم .. باعتبار أن النقابة هي من تدافع عنهم ومن تحاكمهم أيضاً ..

وبالتالي فإني كنت ألتمس من الإخوان المسلمون في مصر إن كانوا جادين فيما يقولنه أنهم كان بالأولى أن يساهموا في تحسين هذا القطاع الخدمي الهام والحيوي في مصر بحث أعضاء نقابتهم (الأطباء) بالإلتزام بالواجب والعمل .. مثلما يحثوهم على التظاهر والإعتصام ..

وأهالي القرى المصرية أولى بمجهودات الإستعراضيين منهم أكثر بكثير من الإستعراض على منفذ رفح

هل نستطيع في ظل هذا أن نحدد المسئولون بالكامل ؟؟؟

[Ambitious]

والله يا جماعة الواحد بقى محتار المسؤولية فين ..

بس شهادة حق لوزير الصحة هو أنشط وزير فى الوزارة الحالية و تصريحاته دائما متوازنه مفيهاش لف ودوران ولا كلام رمادى .. الراجل شايف شغله بس الحمل تقيل فعلا زى ما قال سى السيد والامكانيات غير متاحة .. بس حاجة زى دى ملهاش علاقة بالامكانيات .. ليها علاقة أنت شايف شغلك ولا لأ .. ده قمة الإهمال اللى يفوق تصور اى انسان ..

بالنسبة لأستاذ أسد .. مش عارف بصراحة سبب إقحام الإخوان فى الموضوع بدون داعى .. عموما الاخوان بالرغم من تحفظى الشديد عليهم لكن أشهد لهم انهم مخلصين فى دعوتهم سواء اتفقنا معهم ام اختلفنا .. بالنسبة للإلتماسك بتدخل الاخوان لتحسين القطاع الصحى .. تفتكر يا استاذ أسد الحكومة هتسيبهم يتدخلوا ؟؟؟

هحكيلك موقف حكاه واحد صاحبى والده مدير مستشفى .. نائب البلد دى من الاخوان المسلمين وكان جايب جهاز تبرع للمستشفى تمنه 2 مليون جنيه بيقسم بالله ان فى نفس اليوم أمن الدولة استدعى والده وقاله تخفى الجهاز ده بأى وضع ومحدش يعرف عنه حاجة .. ضاربا بعرض الحائط ان الجهاز ده هيفيد الناس .. وادى المصلحة العامة بالشلوط مقابل ان ميبانش للاخوان اى دور ..

[Ambitious]

وادى خبر كمان بتاريخ أول امبارح من المصرى اليوم ..

«قطط وصراصير» تزاحم نزلاء تأمين صحى «الزقازيق» والأطباء ينصحون المرضى بعدم المبيت خوفا من العدوى

غرف المرضى فى مستشفى «المبرة» التابع للهيئة العامة للتأمين الصحى فى الزقازيق تحولت إلى مأوى للقطط والصراصير، وهرب منها المرضى خوفا من نقل العدوى إليهم، وأصبح قسما «الباطنة حريم» و«الأطفال» خاليين تماما من المرضى والأطباء، واقتصر عمل المستشفى على استقبال المرضى يوميا للكشف عليهم وصرف العلاج اللازم.

وفى حين رفض عدد كبير من أطباء المستشفى الرد على استفسارات «المصرى اليوم» أكد طبيب – طلب عدم ذكر اسمه - أن المستشفى أصبح مكانا سهلا لانتقال عدوى فيروس «أنفلونزا الخنازير» مشيرا إلى أنهم كثيرا ما نصحوا المرضى بعدم المبيت فى المستشفى حتى لا يصابوا بأى عدوى.

محمد صابر الحلاج (٤٨ سنة) والد الطفلين التوأم محمد وسعيد (١١ سنة) قال: ابناى مصابان بـ«الهيموفيليا» وهو مرض خطير، وفى ١٩ من الشهر الجارى ذهبت للمستشفى بعد أن أصيب ابنى محمد بقطع فى ساقه، لكننى فوجئت بأن قسم الأطفال ملىء بالقطط والصراصير فخرجت من الغرفة التى كان ابنى يرقد فيها بسرعة وجلست به على السلم إلى أن جاءت إحدى الممرضات بعد نصف ساعة وقالت لى: «إنت قاعد هنا ليه مافيش دكاترة ولا صيدلية.. المستشفى فاتحة وماحدش هنا يعرف يعملك حاجة».

وقف الأب عاجزا لا يعرف ماذا يفعل لابنه الذى ينزف والحقن المفروض حقنه بها ثمنها ٢٠٠٠ جنيه، وغير متوفرة فى الصيدليات، وبعد ٧ ساعات من الجلوس إلى جوار ابنه باكيا تطوعت ممرضة واتصلت بطبيبة الصيدلية واستأذنتها حتى حضرت من المنزل وتم حقن ابنه المصاب.

والدة الطفل محمد هشام عبدالله مجاهد (عامان) قالت: دخلت بابنى المستشفى وهو يعانى من جفاف حاد، وكان ذلك يوم ٢٣ سبتمبر الجارى، وفوجئت بأن الغرفة امتلأت بالقطط والصراصير، الغريب أن الحشرات كانت تخرج بكثرة من المراتب، فخرجت بسرعة وتوجهت إلى غرفة الممرضات فطردتنى إحداهن قائلة: «روحى الحقى ابنك احنا عايشين فى قرف ما فيش أطباء ولا فيه حد بيحاسب حد والمرضى كلهم ضحايا

الواحد مبقاش عارف بصراحة دى مستشفيات ولا -لامؤاخذة- بلاعات !!!

[أسد]

والله يا جماعة الواحد بقى محتار المسؤولية فين ..

بس شهادة حق لوزير الصحة هو أنشط وزير فى الوزارة الحالية و تصريحاته دائما متوازنه مفيهاش لف ودوران ولا كلام رمادى .. الراجل شايف شغله بس الحمل تقيل فعلا زى ما قال سى السيد والامكانيات غير متاحة .. بس حاجة زى دى ملهاش علاقة بالامكانيات .. ليها علاقة أنت شايف شغلك ولا لأ .. ده قمة الإهمال اللى يفوق تصور اى انسان ..

بالنسبة لأستاذ أسد .. مش عارف بصراحة سبب إقحام الإخوان فى الموضوع بدون داعى .. عموما الاخوان بالرغم من تحفظى الشديد عليهم لكن أشهد لهم انهم مخلصين فى دعوتهم سواء اتفقنا معهم ام اختلفنا .. بالنسبة للإلتماسك بتدخل الاخوان لتحسين القطاع الصحى .. تفتكر يا استاذ أسد الحكومة هتسيبهم يتدخلوا ؟؟؟

هحكيلك موقف حكاه واحد صاحبى والده مدير مستشفى .. نائب البلد دى من الاخوان المسلمين وكان جايب جهاز تبرع للمستشفى تمنه 2 مليون جنيه بيقسم بالله ان فى نفس اليوم أمن الدولة استدعى والده وقاله تخفى الجهاز ده بأى وضع ومحدش يعرف عنه حاجة .. ضاربا بعرض الحائط ان الجهاز ده هيفيد الناس .. وادى المصلحة العامة بالشلوط مقابل ان ميبانش للاخوان اى دور ..

بالعكس ..

أنا لا أقحم الإخوان المسلمين في الموضوع بدون داع ..

أننا سبق وتحدثنا في موضوعات عدة عن أن المتنافسين السياسيين يتنافسون فيما بينهم بالشعارات والإستعراض فقط .. وبما فيهم الإخوان المسلمون وكل التيارات السياسية ..

ونقابة الأطباء .. مسيطر عليها تماماً من الإخوان المسلمون ..

هذا هو سبب ذكرهم ..

وكان من الأولى منهم أن يهتموا بتحسين الخدمة والتي لا تكلف شيئاً غير أن يقوم كل بعمله بما يرضي الله .. ولم أدعو لتبرعات أو ماشابه ذلك

أما عن القصة التي ذكرتها حضرتك بأن أحد أصدقاءك قد قصها عليك ..

فهي عليها علامات استفهام ..

فجهاز ثمنه إثنين مليون جنيه .. لا يحمل ولا يقدم هكذا .. جهاز بتلك القيمة .. سيكون حجمه كبير جداً ..

ولا يمكن إخفاؤه .. أو التغطية عليه ..

ثم من أين حصل عليه .. وكيف دخل البلاد .. فتلك الأجهزة لا تتوافر في محلات الأجهزة الطبية حتى يذهب ليشتريه ويحمله ويقدمه للمستشفى ..

ثم يقال له أخفيه فيخفيه ..

أرجو أن نحترم عقول بعضنا البعض ..

فليس كل ما يقال يجب علينا أن نصدقه دون أن نعمل عقلنا حتى ولو بالحد الأدنى ...

وكل ما أريد قوله ..

لو أن كل موظف أو طبيب أو عامل أو ممرضة أو أي شخص قام بعمله المطلوب منه بما يرضي الله لما كانت هناك مشكلة .. ولكانت أمورنا كلها أو أغلبها في خير ..

ولكن .. لا أحد يريد أن يعمل ما هو مطلوب منه

http://www.egyptiantalks.org/invb/?showtopic=905

[الحازم حسن]

أفضل حل مع هؤلاء هو تطبيق قانون العصور الوسطي

مدير مستشفى اسنا يفضل ان يقتلوه ويضعوه اسفل ثلاجة المشرحة لبعض الوقت حتى يتسنى للقطط والكلاب أن تأكل جسده بسلاسة

وممدوح اسماعيل يضعوه في احد قوارب الموت التابعة له ويغرقوها في منتصف البحر ليلاً

ربما يكون هذا رادع لغيرهم

[om marawan]

أما عن القصة التي ذكرتها حضرتك بأن أحد أصدقاءك قد قصها عليك ..

فهي عليها علامات استفهام ..

أرجو أن نحترم عقول بعضنا البعض ..

فليس كل ما يقال يجب علينا أن نصدقه دون أن نعمل عقلنا حتى ولو بالحد الأدنى ...

مش بس القصة دى هى اللى عليها علامات استفهام يا استاذ أسد

مافيش حد عاوز يغطى على الفساد او يقلل من وجوده وحجمه وتأثيره لكن لازم نوضح بعض نقاط مذكورة بشكل مبهم فى اخبار كتيرة

يعنى مثلا قصة الراجل اللى استنى 7 ساعات عشان حقنة ابنه اللى كان مفروض الجريدة المحترمة تنوه ان الحكومة برضه موفراهافى صيدلية التأمين وطبعا مجانا

مش معنى انها مجانى طبعا ان الراجل يتذل لكن ....هو مش من الطبيعى ان الادوية دى تكون فى الصيدلية اللى مقفول عليها بعد انتهاء مواعيد العمل ؟؟

وليه ماحدش فكر قبل السبع ساعات دول يتصل بالصيدلانية

بحكم عملى فترة فى مصر شفت مواقف كتير زى كده بين صيادلة واطباء بينزلوا من بيوتهم فى المستشفيات الحكومية والجامعية عشان ظرف طارىء لاى مريض

مش معقول هنقعد نهاجم ونلعن الظلام وبس طول الوقت

التامين الصحى فى مصر له مساوىء عديدة وله ايضا محاسن لا نقلل منها

بالطبع يجب ان يضرب على الاهمال والمهملين بيد من حديد

دون ان نسخف ونهمش من دور من يراعى الله فى عمله

أؤيد كمان اراء الافاضل اللى تحدثوا عن دكتور الجبلى الذى احترمه واحترم عزيمته ومحاولته فى التغيير

من زمان مشفناش وزير بيشتغل باجتهاد واخلاص زيه وبس ربنا يكفيه شر هجوم البعض من الصحفيين اللى بيكتبوا من غير امانة

الحقيقة الواحد بقا عنده مشكلة فى قراءة اى خبر فى اى جريدة مع احترامى للصحفيين وبقا اسهل حاجة انى اكتب اى خبر

ومعاه كلمتين اتقالوا من اى مكان عشان يبقا الخبر صحيح واهاجم بيه اللى انا عاوز اهاجمه

الاهمال فى بلدنا موجود للاسف حتى فى الصحافة وده امر خطير جدا لانها وسيلة لقلب وكسب الرأى العام

فى النهاية اقتبس عن ما قاله الفاضل أسد

وكل ما أريد قوله ..

لو أن كل موظف أو طبيب أو عامل أو ممرضة أو أي شخص قام بعمله المطلوب منه بما يرضي الله لما كانت هناك مشكلة .. ولكانت أمورنا كلها أو أغلبها في خير ..