من فضلك ... بالراحه .. ممكن تعلمني البجاحه ؟

[se_ Elsyed]

البجاحه مش قلة الأدب والعياذ بالله

لكن البجاحه يعني الجرأة في بعض المواقف

على سبيل المثال لا الحصر .... لما يكون لك فلوس عند حد وواخد موعد للسداد ... ويعدي الموعد وصاحبنا مطنش ... ومتقل ودانه وما فيش إعتذار حتى ... ليه الواحد اللي هو الدائن ... اللي هو صاحب الحق هو اللي بيبقى ملبوخ ومكسوف ومش عارف يبدأ منين أو يقول إيه وكأن هو اللي بينطبق عليه المقولة " الَدين هم بالليل ومذلة بالنهار " يعني كإنه هو اللي مديون ...

نفسي أبقى بجح وأتعلم حتة الجأة في موقف زي ده ؟

-------------------

موقف تاني ... ليه الواحد ما بيعرفش يحرج الضيف التقيل .... يعني ضيف يطب عليك من غير ميعاد .. وده موضوع بيضايقني جداً ... نقول خلاص أهو جه يا ولاد وخلاص ... طب ليه الواحد ما بتجلوش الجرآة إنه يصرفه بسلام وولا يأذينا ولا نأذيه ؟

----------------

ومواقف تانيه كتيره هابقى أحكي عليها

نلتقي بعد الفاصل

[النسر المصري]

شكلك ياس س مبقوق من حد مستلف منك حوكشة ريالات وكان عامل فيها حبيبك

وبعدين بدأ يتملعن معاك ويختفي ومايردش تليفونات

عموما انا مرضني الموضوع ده.....خصوصا مع الاقارب المقربون

واكتر ماببقني....انه تقعد تقوله انا ليا كذا....يقولك لا امتى ده...ماحصلش....هم كذا.....ويعصب كمان ويترفز

وعلى راي واحد صاحبي فلسطيني ضد مبدأ التسليف ولما بيضطر بيقول لصاحب الشأن

موافق بس الاول بوس ايدي

يقوله ليه !!!

يقوله علشان بكره هابوس قعر رجلك ترجعهوملي!!!

[بندق أفندى]

فى الأولى ليس لدى حل ..

لى صديق فى ظروف خاصة اقترض منى عدة مبالغ كبيرة .. وكان يسدد ما تيسر .. وساءت ظروفه .. وكان يتصل بى ويقولى هو انت مكسوف منى عشان على لك فلوس؟

ههههههههههههه

بس فيه غيره انس انهم يسددو أصلا

المهم بدون ما اطلب ولا أتذكرهم حتى بعد 15 سنة رجع المبلغ وجاء فى وقت كنت محتاجه بشدة ..

التانى .. لو جانى حد بدون موعد وانا عايش لوحدى اصلا .. مش بأفتح له .. أو ارد من ورا الباب وأقول انا مش موجود هههههههههههه

واتعود اصحابى ما حدا يجينى الا بموعد والا !!!!!!!! ههههههههههههه

[حسام يوسف]

من كتاباتك يا س س-لانى لم أتشرف بلقائك حتى الآن

بفتكر انك جرئ وتقدر ترد على تباتة الأشكال دي

لكن واضح ان تقديري مش فى مكانه

شوف يا عزيزي س س

انا كنت زمان بتكسف

دلوقتى بطلت بسبب الناس اللى من النوعية دي

وهقولك بعمل ايه

بقول اللى انا عايزه فجأة فى وسط كلام كتير مالوش علاقة بالموقف

يعنى من كام يوم مستني مبلغ ليه من واحد

وهوة مش معانا خالص على كوكب الأرض

ى الطناش يعنى

قعدت أكلمه فى المنتخب

والكورة

ومعرفش ايه

وفجأة

ايه يا عم ؟

مش هتقبضني بقى ؟

واللهجة يها مزيج من الجدية ومغلفة بابتسامة صفرا

نراجع بقى مع بعض

العناصر التلاتة

1-المفاجأة

2-الجدية

3-ابتسامة خفيفة لا تتناسب مع الموضوع (صفراء)

وأى خدمة :sad:

[se_ Elsyed]

لأ يا جماعه إنتو فهمتوني غلط

الموضوع مش فلوس سلف بس

كل اللي أقصده هو الجرآة في إحراج اللي قدامك لو هو ما عندوش دم ....

ههههههههههه فهمتوني ؟

على سبيل المثال

صديق . المفروض إنه صديق

يتصل بيك ويستلم ودانك في التليفون ساعه ويقعد يقرقض فيها في كلام عن اي حاجه .... أو في ميعاد مش مناسب ...

نفسي أبقى جريء وأقول له أرحم دموعي ؟

---------------------------

من كتاباتك يا س س-لانى لم أتشرف بلقائك حتى الآن

بفتكر انك جرئ وتقدر ترد على تباتة الأشكال دي

منين ؟

والنبي يا حسام يا بني أنا في الحقيقة بأتكسف من خيالي وعرقي بيبقى مرقي

[عنبو]

هو بص انا معاك ان الموضوع صعب بس محتاج شوية تجارب

وانا صغير كنت بتكسف جداً وخصوصاً لما والدى الله يرحمه كان يبعتنى علشان الم الفلوس اللى لينا بره وكنا اخدين شيكات على الناس بس كنت بقوله انا مكسوف كان يقولى طالما ليك حق عمرك ما تتكسف روح واطلب منه وخليك جرىء اذا كان هو مش مكسوف يبقى انت ليه هتتكسف

طبعاً مره مع مره بقيت متخصص الموضوع ده وبقيت اروح ويمكن اكون بجح لدرجة ان والدى الله يرحمه مكان بيقولى براحه شويه يامحمد على الناس

ولما كبرت وبقيت اشيل شغل كنت بشترط انى اهم حاجه فلوسى واخدها قبل لما اشطب الشغل عاجبك عاجبك مش عاجبك انا مش لازملى شغل

واما بالنسبه لموضوع زيارة الناس انا مش بتفرق معاياً يمكن لانى عازب بس احياناً لو خارج وجالى واحد بسيبوه يقعد عادى وادخل البس واطلع اقوله يلااا انا رايح لفلان او الحته الفلانيه جاى معايا ؟؟ وخلاص

الموضوع عاوز شوية تتدريب

وانت بتقول الكلمه غمض عينك ... افتكر انت انت اللى عندك حق ... افتكر انه هو المفروض يتكسف مش انت ... افتكر انى انت اولى منه بالفلوس دى

بس طبعاً لازم وانت بتطلب حقك يكون المكان مناسب والوقت مناسب علشان مش تتاخد عليك

لازم لما تسلف حد يبقى فيه ميعاد محدد للسداد ويبقى فيه ناس شاهده على الميعاد ده

مره الشيخ وجدى غينم كان بيحكى على موقف

بيقول كان معدى بالليل كده وشم ريحة طعيمه قال اخد طعميه وعيش واروح اتعشى مع اخويا مصطفى " مصطفى ده صاحبه يعنى ""

ولما وصل خبط على الباب مصطفى فتح له وطبعاً هما اصحاب واخدين على بعض جداً اقله وسع يلا كده خد الطعيمه دى وجهز عشا كده التانى اقله ارجع اقله ازاى والطعميه اقله ارجع اقله انت بتهزر يلا اقله بيقولك ارجع

طبعاً الشيخ وجدى رجع وطول مهو ماشى هو قلى كده ليه ؟؟

على العموم تانى يوم راح له اقلى انت ليه اقولتى امشى

اقله والله انا كنت براجع نفسى مع القرأن حاجه حاجه

الصدق عملته الامانه عملته وجه عند وَإِنْ قِيلَ لَكُمْ ارْجِعُوا فَارْجِعُوا

قال بس مافيش غير اخويا وجدى هو اللى هيستحملنى فى الموضوع ده

[جيمي]

اولا بتسلف فلوس لواحد ...... واتاخر عن موعد سداده ... يبقي انت اسات الاختيار من الاول .... بس والمفروض ماتتحرجش منه خالص .. وفيه ناس ممكن تاخدها على انه كده مابيحترمش الشخص اللى سلفه ...... ولو هوه راجل عند كلمته ,,,,, واتعثر ,,,, لو هيستلف من واحد تاني ويرجع الفلوس للاولاني ,,,,, امال السلف تلف ليه؟ :rolleyes:

بالنسبه لبقيت المواقف زي الضيف الرزل مثلا ... المشكله هنا ان الخجل و الحياء و ضعف الشخصيه اعراضهم واحده رغم انهم مختلفين تماما عن بعض ... وده اللى بيخلي بعض الناس تفسر الخجل على انه ضعف مثلا وانه هيفضل سايق فيها كتير ..... لكن على مين,,,,,,,,,,,,,,,,,,,,,,, بره :closedeyes:

[تامر مصطفى]

انا ليا موقف مع البجاحة وكنت رخم فيه اوي بس طبعا ده بسبب اني معرفش الشخص الي رخمت عليه

كنت معزوم (بالعافية) على مسرحية ملهاش اسم في مسرح نجيب الريحاني وطلبت من بتوع ( الشاي والقهوة ) زجاجة مياه معدنية صغيرة فجابها شاب وسيم

سالته كام قالي 5 جنيه وهي وقتها كانت بتتباع بجنيه واحد في جميع المحلات

قلت له اتفضل 5 جنيه بعد ما خد الفلوس قالي بكل رخامة وكأنه مستغرب من موقفي : التبس لو سمحت!!!!

سألته باستعباط : بتقول ايه؟؟؟؟؟ راح مكرر الكلمة : التبس لو سمحت .... طبعا اتضايقت من قلة الذوق يعني بايعلي الزجاجة ب5 جنيه وعايز بقشيش كمان وبتطلبه بشكل رسمي ؟؟؟؟

رديت وقلت له اخر المسرحية ابقى تعالى ...

وفعلا قبل اخر المسرحة ب10 دقائق لقيته جاي بيقولي معلش ممكن التبس علشان بنقفل الحساب!!!

قلت له من عنيا وقعدت اقلب شوية في جيوبي ورحت مطلع له 10 قروش وقلت له اتفضل مسكها باستنكار ونظرات القرف بدت عليه وجه يمشي رحت ندهت عليه وقلت له خد واديته 5 قروش تاني . :closedeyes:

اللي معايا قالوا لي دا انت رخم رخامة محصلتش

بس خرجت مبسوط اوي يومها وحسيت اني عوضت خنقتي من المسرحية في الموقف ده

[ذهبية]

انتم مش ملاحظين ان الموضوع دة مفيش و لا اى عضوة من العضوات المنتدى دخلت تعلق

انا كل شوية ادخل علشان اشوف اى عضوة عملت اى موقف ما الاقى اى عضوة مشتركة خالص

اية هو البجاحة محصورة على الرجال فقط

هما من يملكوا الجرأة الكافية

ولا البنات مفيش فيهم بجاحة وكلهم رقة و ذوق

[النجم الثاقب]

انتم مش ملاحظين ان الموضوع دة مفيش و لا اى عضوة من العضوات المنتدى دخلت تعلق

انا كل شوية ادخل علشان اشوف اى عضوة عملت اى موقف ما الاقى اى عضوة مشتركة خالص

اية هو البجاحة محصورة على الرجال فقط

هما من يملكوا الجرأة الكافية

ولا البنات مفيش فيهم بجاحة وكلهم رقة و ذوق

بيتهيألى الرقة و الذوق لا يتعارضوا مع البجاحة إذا اعتبرنا البجاحة جرأة مش أكتر .. انا اتعاملت مع بنات ماشاء الله عليهم يملكون جرأة لا يملكها كثير من الرجال .

[mandoo]

والله يا أبو الأسياد إنت بتجيب مواضيع على الجرح فعلا .... من ضمن الحالات الكتيييييير اللى مريت بيها هحكيلك على تلاتة منهم بس ... أصل أخوك مرزق قوى

الحالة الأولى

سنة 2004 جاء الى صديق ... وكاد يبكى ... وطلب عشرة آلاف ريال سلف لتغطية مصاريف إبنه لدخوله الجامعة فى مصر ... وطبعا أنا علشان قلبى رهيف ودمعتى على طرف عينى ... أعطيته المبلغ المطلوب ... وكان دائم الإتصال بى ... لكن بأمانه لم يتطرق لموضوع الفلوس من قريب أو بعيد ... وانا من خجلى كنت لا أطلب منه أن يقوم بسداد ماعليه ... ولما لقيت الموضوع طول قلت ياواد يا ماندو مافيش غير إنك تطلبهم ... المهم إستجمعت شجاعتى وطلبته فى شهر ييناير 2009 .. وشرحت له إحتياجى للمبلغ ... فقال لى هو إنت عاوز منى فلوس ... المهم ذكرته بالموقف .. فقال لى والله كنت ناسى ... ووعدنى بأنه خلال شهر سيقوم بسداد المبلغ ... ومن شهر يناير حتى اليوم قام بتغير رقم جواله أكثر من عشر مرات ... المهم عن طريق صديق آخر حصلت على آخر رقم جوال له ... وأرسلت له الرسالة التالية ( ماكنش العشم ... يعنى لو كنت واقع فى مشكلة ماكنتش عبرتنى ... هو ده جزاء المعروف ...... حسبنا الله ونعم الوكيل ) ... بالله عليك أنا كده غلطان ... يقوم الباشا يبعتلى الرسالة التالية ( صدقنى أنا لا أستاهل رسالتك القوية .. ولو أنا أملك ريال قسمته نصفين ولكن عدم ردى أنى لم أستلم راتبى قبل العيد وهذا أثر عليا جدا وأنا الآن فى غاية الضيق )

الحالة الثانية

سنة 2006 إتصل بى صديق من مصر ... وأخبرنى بأنه خسر بعض أمواله فى بورصة الصين .. ومش قادر يسحب فلوسة من الأسهم علشان الخسارة هتكون كبيرة .. ونصحة الكثيرون بالإنتظار لأن الأسهم ستعاود الإرتفاع .. وطلب عشرة آلاف دولار .... وطبعا كل ما أتصل بيه يقوللى أنا فاكرك ... بس منتظر فرصة الدولار ينزل سعره شوية ... وعليها ياباشا .... نفسى الدولار يتخسف بيه الأرض ويوصل سعره جنيه ... لكن للأسف مش عاوز ينزل .

الحالة الثالثة

لما يتصل بيك قريب لك من الدرجة الأولى ... ويحكيلك عن مشاكل بينه وبين أهل زوجته بسبب عدم مقدرته تأمين مسكن الزوجية ... وكان آخر قرار ... ياتجيب شقة ... يافركش .... وطلب ستين ألف جنيه ... وياباشا من سنة 2008 لحد اليوم مافيش خبر ... طلبت من أختى تفاتحه فى الموضوع ... وطلب مهلة للتفكير فى كيفية السداد .... لكن أبوه إتصل بأختى وقالها يعتبرهم مساهمة ... هو مش برده زى أخوه ... وبعدين إن شاء الله نردهاله فى جواز إبنه ..( إبنى عمره الآن 8 سنوات )

بعد اللى حصل ده حسيت قد إيه أنا بجح .. علشان بطالب بحقى ... عمرك شفت كده.

الحل الوحيد إنى أبيع ديونى ... زى بالظبط لما مصر باعت ديونها .... ألا من مشترى ؟؟؟؟؟؟؟

أما بخصوص الكلام فى التليفون ... أمرها سهل جدا ... خد خبرتى .... إعطيه خمس دقايق .... وبعد كده هات جوال زوجتك .. وإتصل على رقمك ... وقوله معايا تليفون مهم جدا .. أخلص وإن شاء الله .... مش حتصل عليك ...

[تامر مصطفى]

اخويا ماندو

انا مزنوق ومحتاج منك 70 الف ريال لحد اول الشهر

واوعدك اول ما الراتب ينزل ارجعهم

دا انت لقطه

ياريتني اعرفك كان زماني محوشلك كل فلوسك عندي :P

تم تعديل 4 أكتوبر 2009 بواسطة تامر مصطفى

[mama nona]

عارف يا عم ماندو

هم يبكى وهم يضحك

يا اخى دا المثل بيقول

اللى اتلسع من الشوربة .... بينفخ فى الزبادى

والله انت فعلا لقطة

:P :lol:

[ذهبية]

تصدق يا ماندو انا بقرا تعليقك ضغطى عمال يرتفع يرتفع فى القصة الاخيرة بتاعة تسليفك 60 الف ريال ضغطى بقى كان هينفجر

نفسى اسالك سؤال

هو انت بتنام بالليل ازاى ؟؟؟؟؟؟؟؟؟؟؟

[عنبو]

المهندس ماندو

انا اعرف انك جدع لكن بالشكل ده مكنتش اتصور ربنا يقويك ويعوضك خير

[mandoo]

اخويا ماندو

انا مزنوق ومحتاج منك 70 الف ريال لحد اول الشهر

واوعدك اول ما الراتب ينزل ارجعهم :rolleyes: :happy:

دا انت لقطه

ياريتني اعرفك كان زماني محوشلك كل فلوسك عندي :lol:

نعتذر عن تلبية طلبك .. حيث أن الخدمة متاحة فقط لمواطنى المملكة وجمهورية مصر العربية wst::

[mandoo]

عارف يا عم ماندو

هم يبكى وهم يضحك

يا اخى دا المثل بيقول

اللى اتلسع من الشوربة .... بينفخ فى الزبادى

والله انت فعلا لقطة

:rolleyes: :happy: :lol: wst::

هى الحياه كده ياماما نونا .... نخسر علشان نتعلم والحمد لله على كل شئ

[mandoo]

تصدق يا ماندو انا بقرا تعليقك ضغطى عمال يرتفع يرتفع فى القصة الاخيرة بتاعة تسليفك 60 الف ريال ضغطى بقى كان هينفجر

نفسى اسالك سؤال

هو انت بتنام بالليل ازاى ؟؟؟؟؟؟؟؟؟؟؟

الحمد لله إن ربنا انعم علينا بنعمة النسيان ... لكن أنا عندى إيمان قوى إن حقى مش حيضيع ... وإما يرجعلى فى الدنيا ... او آخده فى الآخرة ...المشكلة إن الضربات الموجعة دى بتكون من أقرب الناس لينا ... او من بعض الأصدقاء اللى بنسميهم أصدقاء .. وهم لايعلمون ماهو المعنى الحقيقى للصداقة ... لكن آملى فى الله كبير إنه يرجعلى حقى لأنى بجد تعبت فيه لحد ما جمعته ... وإن شاء الله يكون جزاء الإحسان .... إحسان من عند الله .. لأننى على يقين بأنى لم أضر أى إنسان منهم بل قمت بما يمليه على ضميرى كصديق وقريب ... وأحمد الله على الصحة والزوجة الصالحة والأبناء البرره .... وعلشان كده بنام وانا مرتاح

[mandoo]

المهندس ماندو

انا اعرف انك جدع لكن بالشكل ده مكنتش اتصور ربنا يقويك ويعوضك خير

أشكرك ياعنبو على حسن ظنك بى ... بس تصدق أنا أول مرة ألاحظ توقيعك ... وسبحان الله ... كلام أثلج صدرى وأحتسب عند الله ما قمت به .. إن الله لايضيع أجر من أحسن عملا

( إن من أحب الأعمال إلى الله إدخال السرور على قلب المؤمن, وأن يفرِّج عنه غمًا, أو يقضي عنه دينًا, أو يطعمه من جوع )

[الباشمهندس ياسر]

تصدق يا ماندو انا بقرا تعليقك ضغطى عمال يرتفع يرتفع فى القصة الاخيرة بتاعة تسليفك 60 الف ريال ضغطى بقى كان هينفجر

نفسى اسالك سؤال

هو انت بتنام بالليل ازاى ؟؟؟؟؟؟؟؟؟؟؟

الحمد لله إن ربنا انعم علينا بنعمة النسيان ... لكن أنا عندى إيمان قوى إن حقى مش حيضيع ... وإما يرجعلى فى الدنيا ... او آخده فى الآخرة ...المشكلة إن الضربات الموجعة دى بتكون من أقرب الناس لينا ... او من بعض الأصدقاء اللى بنسميهم أصدقاء .. وهم لايعلمون ماهو المعنى الحقيقى للصداقة ... لكن آملى فى الله كبير إنه يرجعلى حقى لأنى بجد تعبت فيه لحد ما جمعته ... وإن شاء الله يكون جزاء الإحسان .... إحسان من عند الله .. لأننى على يقين بأنى لم أضر أى إنسان منهم بل قمت بما يمليه على ضميرى كصديق وقريب ... وأحمد الله على الصحة والزوجة الصالحة والأبناء البرره .... وعلشان كده بنام وانا مرتاح

استمر على ما انت عليه

انت على الحق كله و نحن على جزء من الحق

بارك الله لك و عليك