المواطن العادي والمحليات والحكومة والحزب..وأنا وانت.. افقعني يا جدع

[Sherief AbdelWahab]

اقروا اللي جاي بأعصاب هادية وبتفكير أكثر هدوءاً لإن الموضوع بيمسنا بطريقة أو بأخرى..

قبل قليل كنت بأشوف حلقة من برنامج "على الهواء" اللي بيقدمه الإعلامي المحترم بحق وحقيق "جمال عنايت".. وكان الضيف هو محافظ القليوبية "عدلي حسين".. وكان الكلام طبعاً حوالين اللي حصل في القليوبية.. تسمع ما تفهمش حاجة!

اللي بيحصل في القليوبية عرضة إنه يحصل في أي حتة تانية ، واللي يقول غير كدة يبقى معلهش غلطان .. ودة مجرد عرض عارض للغز كبير .. مين اللي كلمته تمشي ع التاني؟

المحافظ ممثل رئيس الجمهورية في الإقليم ، والمفروض إن كل وكلاء الوزارات في المحافظات بيتبعهم لأنه رئيسهم المباشر ، بس في الواقع ما تعرفش وكلاء الوزارات دول بياخدوا تعليماتهم من المحافظ ولا من الوزير المختص ولا من أعضاء مجلس الشعب..

أما رؤساء الأحياء والمراكز فهم برضه تبع المحافظ وبياخدوا تعليماتهم منه ، دة طبعاً المفروض ، لكن ما تعرفش دول بياخدوا تعليماتهم منين..

حتى أعضاء المجالس المحلية اللي يفترض إن ليهم دور رقابي وخدمي على دولا ودوكهمة ، أشبه بالموظفين ، وما تعرفش بياخدوا تعليماتهم من المحافظ ولا من الحزب اللي بينتموا ليه؟

فهمتهم حاجة؟

السؤال الرخم اللي عايز أسأله هو : مين اللي على قمة الهرم بالضبط؟ مين اللي بيمشي التانيين؟ لأن الأصل في الأشياء إني أشوف توزيع واضح وطبيعي للواجبات بين المحافظ والحكومة المركزية والحكم المحلي والمجالس المحلية ، ودة اللي مش شايفينه لغاية دلوقت..

الموضوع دة حسبة برما للدرجة دي؟

خلص الكلام

[عادل أبوزيد]

نحن نعيش فى ظل "الدولة الرخوة" التى لا ترى و لا تستطيع أن تفعل و لا تستطيع أن لا تفعل و لا تستطيع أن تسمح أو أن تمنع..

ما سبق كان إستهلالا لابد منه

حاول أن تقرأ خبرا فى الجريدة اليومية و خاصة القومية و حاول ... حاول بكل جدية أن تفهم أو تخرج بخلاصة المكتوب سواء كان فى عمود واحد أو فى نصف صفحة و حتى لو كان أغلب المحتوى تصريحات لأشخاص ذوى مناصب جيدة فى الدولة.

قد نلجأ إلى إتهام المستوى الحرفى للصحفيين - و هذا وارد - و لكن الحقيقة فى ظنى ترجع ل "لدولة الرخوة" حيث لا يوجد مسئول بمعنى كلمة مسئول على أى مستوى.

و للتدليل على صحة "عدم وجود مسئول بمعنى كلمة مسئول" أنظر برأس بارد للتعامل الرسمى قبل مسائل مثل "جمع القمامة" " قتل الخنازير - أكرر قتل وليس ذبح" " أنفلونزا الخنازير" "الزراعة بمياه المجارى" "مشروع توشكى" ...... الأمر كما لو كان الوطن "مقلة لب و صاحبها غايب"

[الترجمـان]

كان فيه مقوله مأثورة للدكتور زكريا عزمي بيقول فيها الفساد بقى للركب ...

بصراحة انا مفهمتش هو كان قصده أيه لما قال العباره دي وهو احد العاملين في المطبخ الرئاسي حين قال تلك العبارة في مجلس الشعب ..؟؟

يا ترى هو قال كدا بصفته رئيس ديوان رئاسة الجمهورية ..؟؟

ياترى هو قال كدا بصفته نائب في الحزب الحاكم واحد ممثليه في مجلس الشعب ..؟؟

ياترى هو قال كدا على طريقة ياعزيزي كلنا لصوص او اللي بيته من زجاج..؟؟

ولا إن قمة الهرم السياسيي فله شمعه منورة وخايف إن الفساد اللي طفح من القاعده يوصلها ويفسدها ..؟؟

ولا دا تقرير واقع على طريقة إن النهارده الخميس وبكره الجمعه ..تصدق ..؟؟

طيب هوه أيه اللي اتغير بعد الجمله دي ..؟؟

إحنا مشفناش أي سيستم إداري او سياسي اتغير..

يعني التحكم الأمني والمركزي بسلطات ونظام إنتخاب الإدارات المحلية زي ما هو ..

والنظام السياسي في تعيين المحافظين اللي بيراقبوا تلك الإدارات المحلية زي ما هو ...

والعمارات لسه بتقع ...

والزباله متكومه في الشارع ..

والناس بتدفع فلوس فشقق في عمارات مبنيه من غير ترخيص فيضطر الحي اللي ساب تلك العمرات انها تتبني انه يهدها ..

ولسه مسلسل المجاري اللي طفحت والبنيه التحتيه اللي هلكت والأرض اللي انهارت وتسرب الصرف الغير صحي بالمره على مياه الشرب في خليط فريد من نوعه والناس بتشرب عادي جدا..

طيب هوه إيه المطلوب منا من الآخر كدا كمواطنين..؟؟

نفسي أعرف أيه المطلوب بجد ..؟؟

هو النظام عايز حاجه منا مثلا وإحنا مش واخدين بالنا منها ...؟؟

نفسي أفهم هو عايزنا نعمل أيه ووالله العظيم ما هنزعل ...!!!