قواعد الكتابة في باب الإبتسام

[se_ Elsyed]

بالصلاة عالنبي علشان نبقى على نور وماحدش يقولي يا س س يا مشرف باب الإبتسام إنت ادتني إنذار أو بونيه ليه ... فإليكم قواعد الكتابة عالباب واللي هايخالفها يا ويله :

1- ممنوع منعاً باتاً كتابة اي موضوع فيه نكد في أي باب ، يعني اللي هاقفشوا كاتب مثلاً انا مش لاقي نفسي وأن مفتقدني ونظام الكآبة ده هأياخد إنذار ، واللي هايكتب موضوع ويقول مثلاُ انا مش أنا وان اتغيرت وبقيت إنسان حزين هاياخد إنذار وبونيه ..

2- اللي هايكتب أي حاجة في باب الإبتسام ومش هاتضحكني شخصياً .. هايخد إنذارين .

3- كل عضو من اعضاء المنتدى الـ 1000 اللي موجوين دول لازم يكتب على الأقل موضوع في الشهر في باب الإبتسام - إلا حشيش وشكوربيون الكسول فدول على الأقل الكوتا بتاعتهم 10 مواضيع في الشهر والإ -...

ماهو مش معقول أبقى مشرف باب قد الدنيا وأبقى قاعد لوحدي عالباب زي قرد قطع ومافيش ولا زبون بيهوب هنا ..

4- هاحتاج من كل عضو في منتدى المحاورات على مبلغ وقدره بدولار شهرياً علشان أشتري قفل وكالون للباب وعلشان كمان الصيانة الدورية - تزييت وتلميع وخلافه - وهأبقى أبعتلكوا رقم حسابي في " يونيد بنك أوف سويس " واللي هايدفع أكثر يبقى هنيالك يا فاعل الخير والثواب

( يا نهار أبيض ده انا هالم لم ... 1000 * 12 شهر = 12000 دولار أخضر .. قول مجرمون يغيرهم لي على 7.35 قرش = 88,200 جنية ... اللهم صلي عالنبي دي شغلانه حلوه قوي ........... إبـــــــــــــــــــــعـت )

مع تحيات المعلم شَكَل ...... مشرف باب وشباك .

[فــيــروز]

اخوانى

لا لاستغلال النفوذ

لا لاستغلال المنصب للتربح

لا لكبت الحريات

باب المناقشات العامه يرحب بكم ويتشرف بزيارتكم

اختكم فيروز .. رمز الفنجال

[afiona]

يا نهار مطلعتلوش شمس...

فيروز بتخبط فى س.س. وبتحاول الإستيلاء على زباينه وبتتهمه بالفساد.. كله يوسع يا شباب علشان الجو ملبد بالغيوم وشكل العملية حتكبر...(وش واحد بيصطاد فى الميه العكرة)...

فرصتك يا حشيش......

[Lancelot]

باب دعوة للإبتسام .... باب المناقشات العامة ...... إن شا الله حتي الباب العالي .....

لانسلوت يرحب بكم .....

سي السيد .... برافو شغل كويس لحد دلوقتي .... أي حاجة تتدخل حسابك .... تحولي نسبتي .... و لو ما حققتش التارجت بتاعك ....

[Lighthouse]

ماشاء الله ماشاء الله

وعاملين فيها حركات

وده تكليف مش تشريف

ايوة ايوة

اظهروا على حقيقتكم

طبعا مكلفين بشفط جيوبنا والحركات دي

آه يادنيا

غسيل ومكوى

بلد شهادات صحيح

قال وعايزنا ننشر في بابه وكل مشرف بيشد فينا

ده احنا ح ننشر نشر

ماتشوفونا بقرشين كده بدل مانشغل القرارة ونديكم نق وقر على ودنه

وحسنة قليلة تمنع بلاوي كتيرة