لا حيلة في الرزق و لا شفاعه في الموت

[MZohairy]

كثيرا ما فكرت في جملة لا حيلة في الرزق و لا شفاعة في الموت و هي كما اظن حديث شريف (ولا اعلم مدى صحته)

لن اتطرق هنا للشطر الثاني

لكني اريد البحث حول جملة لا حيلة في الرزق

اعلم تماما ان الرزق بيدي الله سبحانه و في السماء رزقكم و ما توعدون

لكني اعلم ايضا ان لكل مجتهد نصيب و ان على قدر العزم تأتي العزائم

و اعلم ان الاجتهاد و السعي و الدراسه و عمل علاقات جيده بالمجتمع المحيط و اللباقه في التعامل معهم و المظهر الجيد و حسن الخلق من الأمور التي ترفع نسبة حصولك على عمل افضل و بالتالي رزق افضل

الا يعد كل ما ورد بالسطرين الأخيرين اعلاه حيله لتعظيم الرزق؟

ارجوكم لن نتكلم عن الحالات الشاذه التي تجد ثروات في الطريق او تربح جوائز من مسابقات و خلافه

نتحدث على الامور و القواعد الطبيعيه فقط

كيف لا يكون هناك حيله في الرزق من منظور ديني دنيوي معا؟

شكرا

[عنبو]

صباح الفل ياعم زوهيرى

على فكره المقصود بالرزق ليس كل المال الذى تكسبه ولكن المقصود بالرزق هو كل ما تأكله وتلبسه وتشربه يعنى الحاجه اللى انت مستفيد منها فقط لا غير اما الباقى ده فده رزق ناس تانين انت مستأمن عليه فقط لا غير

وايضاً ليس كل ما تأكله وتشربه يكون من كسبك وكذلك بالنسبه لغيرك وهكذا

احنا مره كنا بنفطر انا وواحد صاحبى كان قاعد بيجهز فى ساندوتش ويحط فيه من كل نوع شويه ويدوب كان هيقطم منه قطمه رن جرس الباب طلع يفتح جه واحد لقينا بنفطر قعد فطر معانا اول لما مد يده مدها على الساندوتش اللى صاحبى كان بقاله عشر دقايق بيجهز فيه مع انه كان قدامه الاكل كتير قوى اقولت سبحان الله رزقه مكتوب له

اما الاجتهاد فى العمل والسعى فده جهاد فى الدنيا وتعمير فيها وبتاخد عليه ثواب زيه زى الصلاه والعباده بس طبعاً لما يكون بنيه يعنى

وعلى فكره انت ممكن تكون من الناس المجتهدين فى العمل ومن الناس الناجحه كمان بس مرتبك يكون قليل بالنسبه لناس تانيه انت اكفأ منهم

لان المقابل ليس شرط يكون مال بل يكون مباركه فى المال اللى بتاخده دفع الامراض عنك حسانات طبعاً مباركه فى الاولاد

وعلى فكره ده ممكن كمان نعتبره رزق وجاى عن طريق السعى

يعنى ممكن نقسم الرزق الى نوعين مادى ومعنوى

المادى :: هو الاكل والشرب الملبس اللى بتستخدمه فقط لا غير

المعنوى حسانات مباركه فى الاولاد بركه فى العمر والصحه ..... والخ

وكل واحد ربنا بيديله توليفه من ده على قدر اجتهادك يعنى ممكن تتعب وتجد وتجتهد ويكون تقسمك مش فلوس يكون فلوس قليله مع بركه كتيره يعنى ودى بتعوض دى اهم حاجه الرضا وان الواحد يعمل الى عليه وياخد بالاسباب وتسيب التقسيم لربنا هو اكيد هيختار ليك الاصلح

يعنى من الاخر كده ممكن نقول فيه حاجه اسمها كسب وفيه حاجه اسمها رزق

[عنبو]

وعلى فكره ده كلام للشيخ الشعراوى جميل قوى فى موضوع الرزق ده

بسم الله الرحمان الرحيم

عن النبي صلى الله عليه و سام في الحديث القدسي قال,

◄يا ابن ادم لا تخافن من ذي سلطان ما دام سلطاني باقيا و سلطاني لا ينفذ أبدا ""

►"يا ابن ادم .. لا تطلب غيري و أنا لكفان طلبتني و حدتني و إن فتني فتك و فاتك الخير كله"

►يا ابن ادم .. خلقتك للعبادة فلا تلعب و قسمت لك رزقك فلا تلعب, فان أنت رضيت بما قسمت لك أرحت قلبك و بدنك و كنت عندي محمودا, و إن أنت لم ترض بما قسمت لك , فوعزتي و حلالي لأسلطن عليك الدنيا تركض فيها ركض الوحوش في البرية. ثم لا يكون لك منها الا ما قسمت لك و كنت عندي مذموما "

"♠♠ يا ابن ادم .. خلقت السماوات السبع و الأراضين السبع و لم أعي بخلقهن, أيعيني رغيف عيش أسوقه لك بلا تعب ؟"

"يا ابن ادم .. أني لم أنسى من عصياني فكيف من أطاعني و أنا رب رحيم و على كل شيء قدير".

يا ابن ادم.. لا تسألني رزق غد كما أطالبك بعمل غد"

"يا ابن ادم.. أنا لك محب فبحب فبحقي عليك كن لي محبا "

الحديث موضوع

ما هو الرزق ؟

الرزق هو ما ينتفع به الإنسان سواء أكان حلالا أم حراما ’ طيبا, أم خبيثا ’ فكل ما تنتفع به هو الرزق, و كل ما لا تنتفع به- و إن كنت تملكه- ليس رزقا لك بل هو رزق غيرك, و هناك فرق بين الكسب و الرزق, و بين العمل و الرزق . فلا يمكن أن تقول أن ما يكسبه الإنسان يمثل رزقه , و لا أن تقول إن عمله يمثل رزقه, فما يكسبه الإنسان فيه رزقه و رزق زوجته و رزق أولاده, و رزق آخرين لا يعلمهم, و كل واحد منهم يصل إليه رزقه تماما دون أن ينقص شيئا

.و هنا يطرح السؤال .. كيف يصل الرزق إلى الإنسان ؟

لا أحد يعرف مكان الرزق, فقد يذهب بحثا عنه إلى أكثر من مكان فلا يحصل على شيء و لا يصل إلى شيء, و لكن الرزق يعرف مكان صاحبه. ذلك لأنه مقدر من السماء و حتما سيصل إليه . فان كانت لك قوة و حركة في الحياة, فما عليك إلا السعي أخذا بالأسباب, و إن لم تكن لك فسيأتيك الرزق بلا أسباب..

قال تعالى .'و في السماء رزقكم و ما توعدون فورب السماء و الأرض انه لحق مثل ما أنكم تنطقون' (سورة الذريات) .

و قال تعالى ' و يرزقه من حيث لا يحتسب'(سورة الطلاق,الآية 3)

الرزق يمكن أن يكون رزقا حلالا أو رزقا حراما. قال تعالى(كلوا من طيبات ما رزقناكم) (آية 57 البقرة)

إذا كان

الرزق مقدرا و معلوما, و كل إنسان لا يأخذ إلا رزقه, فكيف يندرج الرزق الحرام إلى المقدر المعلوم ؟

إن الله سبحانه و تعالى قدر رزق الإنسان, فإذا امن الإنسان بذلك , فلن تمتد يده إلى الحرام أبدا لأنه ما دام هذا رزقه فلابد يأتيه, و ما عليه إلا أن يصبر , و إذا مرت به شدة أو أية ظروف أخرى تستدعي التحمل فعليه أن يتمسك بالإيمان . لأن من مداخل الشيطان أن يدخل الرعب إلى قلب الإنسان و أسهل طريق يدخل من إلى القلب هو الرزق . انه يأتي و يوسوس للإنسان '... لا تعرض نفسك و أولادك للفقر و الطرد...' فيختلس.

و علينا أن نعلم أن هناك رزق و هناك كسب و هناك عمل, و كل منها يختلف عن الآخر , و إن سبحانه و تعالى أقسم على أن الرزق من السماء و أنه بيده وحده, ذلك حتى لا نخشى إلا الله و لا نطيع عاصيا, أو طاغيا , أو ننصر ظالما خوفا على رزقنا.

قال الرسول صلى الله عليه و سلم .. 'يقول ابن ادم مالي.. مالي... و هل لك من مالك إلا ما أكلت فأفنيت, أو لبست فأبليت, أو تصدقت فأمضيت'. هذه الأوجه الثلاثة التي حددها رسول الله صلى الله عليه و سلم في الحديث الشريف هي أبواب الرزق بالنسبة للإنسان, فالإنسان ليس له من ماله إلا هذه الأوجه الثلاثة ثم بعد ذلك ما يملكه ليس رزقه و لا ماله. و إنما هو مكلف دون أن يدري بمهمة توصيل أقدار الله لبعض خلق الله .

قال صلى الله عليه و سلم ..' لا حيلة في الرزق و لا شفاعة في الموت '

هل الرزق يزيد و ينقص ؟

هناك عوامل جعلها الله سبحانه و تعالى لحفظ الرزق و زيادته و ليس معنى ذلك أنه إذا فعلنا ذلك فلا بد أن يكثر الرزق .. لا..

1) أول هذه العوامل هي الرضا بقضاء الله و الشكر على القضاء و الله سبحانه و تعالى يجازي من رضي بقضائه بأن يزيد من نعمه و رزقه.

قال تعالى .'. لئن شكرتم لأزيدنكم'(آية 7 إبراهيم)

و في المقابل عدم الرضا يبدل الحال إلى أسوأ و أشد قال تعالى في سورة سبأ '. لقد كان لسبأ في مساكنهم آية جنتان عن يمين و شمال كلوا من رزق ربكم. و اشكروا له بلدة طيبة و رب غفور. فأعرضوا فأرسلنا عليهم سيل العرى و بدلناهم بجنتيهم ذواتى أكل خمط وائل و شيء من سدر قليل , ذلك جازيناهم بما كفروا و هل نجزي إلا الكفور '.

(آية 15-16-17, سبأ)

إذا كان ذلك حال سبأ أعطاهم الله رزقا و فيرى جنات عن يمين و جنات عن شمال مملوءة بالخيرات ليأكلوا منها حيث شاءوا. فقابلوا الرزق بالكفر و الجحود و أعرضوا عن نعمة الله و عن شكر المنعم, فالكفر بالنعمة يزيلها و الكفر بالرزق يذهبه.

2) ثم من العوامل أيضا بأذنيه حق الفقير و المسكين, فللزكاة و الصدقة يطهران المال و يمنيانه و لا ينقصانه, بينما أكل الربا و استغلال حاجة الفقير يمحق المال و يذهب به تماما, كما أن أكل حقوق الناس يذهب الرزق.

3) و من العوامل أيضا تقوى الله سبحانه و تعالى و الخوف منه منه و صلة الرحم. قال صلى الله عليه و سلم ' من أحب أن يبسط له في رزقه, و ينسأ له في أثره فليصل رحمه ' (ينسأ> يؤخر في أجله)

’ )4) من دواعي الزيادة في الرزق الاستغفار قال تعالى,,'فقلت استغفروا ربكم انه كان غفارا, يرسل السماء عليكم مدرارا, و يمددكم بأموال و بنين و يجعل لكم جنات و يجعل لكم أنهارا '(اية 10-11-12 نوح)

و في الحديث الشريف قال رسول الله صلى الله عليه و سلم ' يرزق من يشاء بغير حساب'

فهناك من يقول لماذا العمل إذن ؟

غير صحيح لأنه ليس من تعاليم الإسلام , و لأن رسول الله صلى الله عليه و سلم "من أمسى كالا من عمل يده بات مغفورا له " و هذا عمر بن الخطاب رضي الله عنه و هو من أعرف الناس بالإسلام يقول مخاطبا جماعة المسلمين ( لا يقعدن أحدكم عن طاب الرزق و يقول اللهم ارزقني و قد علم أن السماء لا تمطر ذهبا و لا فضة )

فقوله تعالى ' يرزق من يشاء بغير حساب' إنها في الحقيقة لتطمئن خلق الله في كون الله حتى لا يحس إنسان إذا منعت عنه أسباب الرزق, أو أصابته كارثة أنه قد ضاع و انتهى كم يحدث في العالم المادي

إن الله سبحانه و تعالى يريد أن يؤمن كل إنسان أن له ربا , إن توقفت الأسباب سيعطيه و يعطيه بغير حساب, و إلا ماذا يكون موقف ذلك العاجز الذي جاء إلى الدنيا و هو يفتقد أسباب القدرة على الرزق, انه لا يقدر على الحركة و لا السعي من اجل رزقه , ماذا يمكن أن يفعل ؟

الله تبارك و تعالى برحمته بقول له لا تنزعج 'إن الله يرزق من يشاء بغير حساب '

لقد فرضت على القادر على الحركة أن يعمل لما يتسع لحاجته و حاجتك , و امرأته بالزكاة و الصدقة ليعطيك == إذن فهذا القادر سخره الله تبارك و تعالى لرزق غير قادر , و جعله يسعى له و يعمل من أجله 9

تم تعديل 8 أكتوبر 2009 بواسطة محمد العنبى

[قلب ابيض]

صباح الخير يا استاذ زوهيرى 00

من الحاجات اللى تثير الانتباه دايما بالنسبه لى كلمات وامثال وحكم كثيرا ما تتردد امامنا ونتداولها زى ماهى كده ومن غير تفكير او تعمق فى المعنى بس هى بتبقى كده ومضمونها احنا عارفينه

الحديث الشريف اللى حضرتك اشرت اليه من الاحاديث اللى نعرفها كلنا واللى بنستشهد بيها دايما فيما يتعلق بالرزق بالذات واعتقد ان هناك فرق بين الكسب و الرزق, و بين العمل و الرزق . فمثلا مش كل اللى بيكسبه الانسان يمثل رزقه , و لا إن عمله يمثل رزقه, فما يكسبه الإنسان فيه رزقه و رزق زوجته و رزق أولاده, و رزق آخرين لا يعلمهم, و كل واحد منهم يصل إليه رزقه تماما دون أن ينقص شيئا 00قال تعالى .'و في السماء رزقكم و ما توعدون"

سئل الحسن البصري عن سر زهده في الدنيا فقال: أربعة أشياء :

علمت أن عملي لا يقوم به غيري فاشتغلت به .

وعلمت أن رزقي لا يذهب إلى غيري فاطمأن قلبي .

و علمت أن الله مطلع علي فاستحييت أن يراني على معصية .

وعلمت أن الموت ينتظرني فأعددت الزاد للقاء ربي .

للحديث بقيه000

[HDarwish]

علينا السعي وعلى الله الرزق

لو كان في الموت شفاعة...

لكان أولى بسيد المرسلين أن يشفع لأبناءه

القاسم - عبد الله - إبراهيم رضي الله عنهم

[Salwa]

صباح الخير ..

كنت اريد ان احكى لكم حكايات كثيرة عاصرتها بنفسى تثبت فعلا فعلا انه لاحيلة فى الرزق ...

وفى حكاية الأخ /محمد العنبى ...عن الستدوتش الذى كان يحضره صاحبه ..وكان من نصيب شخص آخر ..

نفس الموقف حدث بحذافيره ...بس كان بطريقة تناول طعام عادى بدون سندوتشات .

كان اخى معزوم فى بيت اختى ...واثناء تناولهم لطعام الافطار ....حضر صديق (( لزوج اختى وفى نفس الوقت صديق لأخى ...لم يراه منذ زمن بعيد ...حضر مفاجأة من سفره ))

وبعد السلامات...جلس مكان اخى.......وبدأ يأكل من نفس الطبق الخاص بأخى ...!!!))...

جلس أخى فى مكان آخر وبدأ يتناول طعامه ....فى طبق جديد ...

بعدها.....بدأ الجميع يتأمل ما حدث ...!!!

لم يكن اى منهم يتوقع اى ضيف....

جلس مكانه...تناول طعام ..اعده هو فى طبقه بطريقته...!!...اكل قطعة من الخبز..كان اخى قد اخذها من رغيف ليأكلها ..!!!))

سبحان الله..

كنت قد كتبت موضوعا فى عام 2004...هنا..اسمه...يامسبب الاسباب ....ايضا فى باب هدى الاسلام.

عن واقعة حدثت لى ...وحكيتها .

الرزق ينادى صاحبه...فعلا...

لاحيلة فى الرزق ولاشفاعة فى الموت..

اليكم الموضوع القديم ...

http://www.egyptiantalks.org/invb/?showtopic=10106

[doha]

ولو اني بكره اوي اكرر نفس الكلام مرتين بس عشان الي مش بيتابعوا هناك هحط نفس ردي تاني .. نفس الكلام ده كتبته في موضوع تاني فعذر من الي بيتابعوا في المنتديين للتكرار ...

=============

بتحكي لي ماما عن موقف حضرته لما كانت لسه طالبة في الكلية وكان معاهم واحد بيطلع الاول دائما عليهم ..

الطالب ده جاء في البكالريوس ومش عارفه كان ايه مناسبة الكلام فقال انا ضامن النجاح السنة دي .. فحد من الواقفين قال له ياعم قول ان شاء الله .. رد الطالب بثقة .. شاء مشائش هنجح ...

وتؤكد والدتي بان قبل الامتحان بحاجة بسيطة الطالب ده اصيب بالسل وتدهورت حالته فمقدرش يدخل الامتحان في تلك السنة !!

طبعا كلية الطب زمان ( من يجي مية سنة في الاهرام ومش هقول سنة كام عشان ماما متقتلنيش ) العدد كان محدود والطلبة عارفين بعض كويس ..

الدفعه كلها كانت عارفه مقولته الشهيرة والدفعه كلها بقت عامله كدهوه .

ده مثال بسيط جدا يعرفك بان فعلا لا حيلة في رزق .. يعني انت ممكن تحرث الارض وتضع البذر وتسقيه .. لكن هتنبته ازاي ؟ دي من عند ربنا لو مش عاوزه ينبت مش هينبت ..

وهقولك حكايتين كمان عشان تعرف ان الامر مش بالايد وانما هو رزق لا حيلة لنا فيه .. دول بقى شفتهم بنفسي وحصلوا قدام عيني ..

من سنين طويلة قول من عشرين سنة كده .. كنا في السعوديه وانت عارف ايام زمان لما حد بيكون في الخارج تلاقي العيلة كلها والجيران وجيران الجيران جايبين لك اوراق عشان تشوف له شغل معاك برا ...

واحد قريب والدي اتصل بيه وقاله انه قرا اعلان في الاهرام عن شركة كذا كذا لالحاق العمالة وان الشركه دي شروطها سهله اوي انك تحط السي في بتاعتك وتدفع دولار واحد فقط عليها وهم هيبقوا يدوروا لك على شغل ..

القريب اتصل بيهم واخذ عنوان فرعهم في الرياض وارسله لوالدي عشان يروح يسلم لهم السي في بتاعته ( يدا بيد ) لضمان انها تحصل على فرصة اكبر ..

والدي لقي الفرصة كويسه والمبلغ تافه فقام واخد السي في بتاع قريبه وسي في تاني بتاع قريب لوالدتي وراح وداهم الشركه ودفع اثنين دولار وحطهم ومشي ..

مرت السنين .. وفي خلالها كان والدي ووالدتي لما يلاقوا فرصة بيحاولوا يبحثوا عن عمل لاقربائهم الي موصيينهم يعني كلموا ناس كتير بخصوص الاثنين دول و غيرهم ..

وفي يوم من الايام اتصل واحد بينا في البيت وسال هل ده منزل فلان ( اسم قريب والدتي ) فقلنا له ايوه ايه الحكايه قالوا احنا شركه ومحتاجين محاسب ووقع عليه الاختيار من السي في بتاعته كانت مقدمه عندنا .. طبعا احنا منعرفش هي وصلتهم ازاي الي همنا في الموضوع ان لقينا له شغل ..

المهم عمل تعاقده في مصر وسافر ووصل الرياض وبعد فترة بيسال صاحب الشغل انت عرفت طريقي ازاي .. قاله ابدا كان لي واحد صاحبي فاتح شركه توظيف اسمها كذا كذا ( الشركه الي والدي حط الورق فيها ) جمع فيها سيفيهات بالكوم وفلوس بالكوم اكتر .. ولما جمع مبلغ محترم قرر اغلاق الشركه فكان الي بيحكي ده قاعد معاه في يوم ولقي عنده كوم كبير من السيفيهات فقاله هتعمل بيهم ايه ؟ قاله هرميهم .. قاله طيب اديني عدد من المحاسبين يمكن احتاج منهم حد قدام ..

اخذ الراجل كميه من السيفيهات الي فيها محاسبين ومن ضمنهم سي في قريبنا ده والي رشحه بعد كده لما لقيه بيعرف كمبيوتر ( كانت كوبول الي هو مش حاجه خالص دلوقت ) قالك هو ده واخذه وسبحان الله كان له نصيب ..

يعني اساسا والدي قدم له بالصدفة وقريبنا التاني الي سعى وحرص ان التقديم يكون يدا بيد عشان يضمن مخدش حاجه وده سبحان الله كان الى حد ما واخد بالاسباب وعنده خبرة وكمبيوتر فتم قبوله بس برضه لو ملوش رزق مكانتش اسبابه دي هتنفعه .. وبرضه كمان عشان ليه رزق فكويس انه من البدايه واخد بيها ..

القصة التانيه دي بقى الي الى الآن بتعجب لها ..

برضه من كام سنة ومكانش لسه القوانين اتغيرت وكان مسموح بما يسمى الفيزا الحرة يعني اي حد يجي على كفالة حد ويشتغل عند حد تاني عادي ..

والدتي لها قريب مستهتر وآخر العنقود ومش بتاع مذاكره ولا شغل .. واهله تعبانين معاه .. فوصوها ان تشوف له شغل باي طريقة على اساس ان مش عارفين يعملوا معاه في مصر ايه ..

المهم قامت ماما وصت كل الي تعرفهم ان الي يشوفوا له شغل ولو بمقابل ..

في يوم من الايام اتصل بيها واحد من الي موصياهم وقالها امامي فيزا حرة لمحاسب على 3 الاف ريال ( يابلاش ) .. راح والدي اتفق مع الراجل ودفع له الفلوس على اساس ان هنبقى ناخذها بعد كده لما يبقى يشتغل ويردهم بعدين ..

والله العظيم لا انسى تلك الايام ..

مفيش يومين تلاته على الاتفاق مع الراجل الي اتفقنا معاه قام متصل بينا شخص تاني وقالها ابشري لقيت لقريبك الي كنتي بتدوري له على شغل عقد عمل ( خلي بالكم عقد على شغل مش فيزا حرة ) ومطلوب فيه الفين ريال بس ( حلاوة ) للراجل بتاع شؤون الموظفين الي هينزل مصر يجيب المحاسبين ..

والدتي قالت له الف شكر بس لسه مفيش يومين متفقين على موضوع تاني .. بعدين تذكرت قريب تاني لنا ( ابعد قرابة من الاولاني لان الاولاني قريبها اوي ) فقالت له استنى في محاسب تاني قريبنا ممكن ناخذ له العقد ده ..

وقد كان راحوا دفعوا الفلوس للقريب التاني وبسرعه بسرعه خلصت اوراقه وسافر ..

في الفترة دي كنت انا خلصت ثانوية عامه ونزلت مصر وشفت بعيني الموقف على الجهة الثانية ..

القريب الثاني مستهتر ومش في دماغه وسايب الفيزا شويه كل يوم يقول بكرا .. جه على آخر الايام قال خلاص مفيناش بقى من لعب وشد حيله وقال هسافر وراح بايع عربيته قال ملهاش لزوم بقى وصرف فلوسها كمان على اللعب والتنطيط على اساس ان خلاص هو مسافر بقى ويبقى يجيب جديد من هناك .. راح قدم اوراقه للسفاره لنفاجأ بان الاوراق اترفضت عشان التاشيرة جايه باسم مؤسسة ومكتوبه على ورق مؤسسة تانيه ( اسباب قانونية يعني )

المهم من هنا لهنا وعلى ماتم تعديل الوضع كان وقت التاشيرة خلص وراحت عليه ..

قعدنا بعدها فترة والراجل الي باعها رجع لنا فلوسنا يعني الحمد لله مخسرناش حاجه الهم الا قريبنا ده للآن مطلعش ولا دخل بينما الاولاني ماشاء الله ربنا فتح عليه في شغله وموجود هنا لغايه دلوقت ..

بس تعرف لما بقارن مابين الاثنين بلاقي ان الي سافر ده فعلا ماشاء الله عليه قمه في التدين وامه الله يرحمها كانت دائما بتدعي له ده غير انه لما استلم هنا فعلا كان امين جدا في شغله لدرجه ماصاحب الشغل دلوقت حوله من مجرد محاسب الى مدير مالي ثم حاليا يكاد يكون تارك له المؤسسة كلها يديرها ..

الحته الي دائما افكر فيها ان سبحان الله .. لو لم يكن موضوع الفيزا الحرة الي ظهر فجاه كان المنطق ان العقد ده هيكون من نصيب قريبنا ( المستهتر ) لان هو الي له الاولوية فيشاء ربنا انها تظهر في الوقت ده بالذات عشان تصرف نظرنا عنه لان العقد اساسا كان جاي رزق للقريب التاني ولو مكانتش الفيزا دي كنا طبيعي هنفضل المستهتر عليه لكن سبحان الله هي فعلا ارزاق ومتقسمة ..

القصة دي انا كنت شاهد عليها وسبحان الله لو مكنتش حاضره كل تفاصيلها كنت قلت تم تفضيل طرف عن الثاني بقصد مننا لكن والله وسبحانه هو اختار كده ورتبها عشان فعلا مفيش حيلة في الرزق ..

[miramikhail]

أنا بعتذر أنى بتدخل فى موضوع دينى ما يخصنيش بس الحقيقة أنا شدينى العنوان و بذات الرزق لأنه فعلا موضوع مهم جدا أن الناس تفهم بمعناه الصحيح.

فأنا بحكم أصحابى المسلمين و كمان الأيات اللى كنا بنخدها فى العربى بلاقى أن الدين الأسلامى بيحض الناس على العمل و الأنتاج و فى الأخر حيأخد نتيجة عملة و الأحاديث و الأيات كتيرة .

هى النقطة اللى عايزة أقوله أه طبعا الرزق بتاع ربنا لكن ده بعد مأعمل اللى عليا و أسعى و أجتهد و ده مش معناه أنى زى الطالب اللى ذاكر لكن عي طبعا وارد لكن يمكن ده يكون درس من ربنا للأنسان عشان ما يتكبر ولا يتغر فممكن كطبيب لما يتكبر كده و يتغر يموت واحد مثلا.

أما حكاية الولدين دول طبعا ربنا كفاء من أحسن عملا و التانى أنسان مستهتر فمش معقول خيدى له نعمة ما يستهالهاش

خلاصة الكلام أننا نعمل اللى علينا و الباقى على ربنا و أى حاجة بيديهالنا أو لأ بتكون لمصلحتنا مدام أحنا بنعمل اللى علينا .

[MZohairy]

الا يعد الاجتهاد و تحسين مستوى الدراسه و التحصيل العلمي و تحسين المظهر و حسن الخلق و عمل علاقات اجتماعيه عامه وووووو

الا يعد هذا من الحيل في الرزق؟

الا تعتقدون بشكل عام ان من يفعل ما بعاليه و من لا يفعل ما بعاليه ستختلف نتائج رزقهم؟

[أحمد سيف]

خليني هنا أعرض الموضوع بطريقة رياضية كما أستوعبه

الرزق (وخلينا هنا نقصر حديثنا على الجانب المادي منه: الفلوس) هو داله في حاجات كثير ذكر بعضها الإخوة الأفاضل، منها متغيرات يؤثر فيها الإنسان نفسه مثل العمل والدراسه والعلاقات ومنها أمور تخرج بمجملها عن إرادته ولكن يمكن قياسها والتنبؤ بتأثيرها مثل الوضع الاجتماعي والذكاء والصحة والشكل الخارجي... ويبقى بعد ذلك جزء لا يخضع لأي من هذه العوامل ولا يمكن التنبؤ به وإن كان يخضع لتوزيع احصائي وهو الجانب القدري من الرزق ... الإنسان عليه أن يسعى لتعظيم الجزء اليقيني (أو شبه اليقيني) من رزقه ويترك الجزء الاحتمالي بيد الخالق. وهذا هو التوكل كما افهمه.

من يقولون أن الإنسان لا حيلة له على الإطلاق في ما يكسبه ويضربون أمثلة فردية على ذلك يتجاهلون المتوسطات الإحصائية ويركزون على التباين فيها ... متوسط ما يجنيه المتعلمون يزيد بالتأكيد عن متوسط ما يجنيه الجهلة ... من يعملون يزيد عمن لا يعملون ... واللي بيحسب ويخطط يزيد عمن يتخذ قراراته بأسلوب عشوائي ... الأذكياء بصورة عامة يكسبون أكثر من الأغبياء والأصحاء أكثر من المرضى. وأي استثناء لا يلغي القاعدة بل يؤكدها.

تم تعديل 8 أكتوبر 2009 بواسطة أحمد سيف

[MZohairy]

خليني هنا أعرض الموضوع بطريقة رياضية كما أستوعبه

الرزق (وخلينا هنا نقصر حديثنا على الجانب المادي منه: الفلوس) هو داله في حاجات كثير ذكر بعضها الإخوة الأفاضل، منها متغيرات يؤثر فيها الإنسان نفسه مثل العمل والدراسه والعلاقات ومنها أمور تخرج بمجملها عن إرادته ولكن يمكن قياسها والتنبؤ بتأثيرها مثل الوضع الاجتماعي والذكاء والصحة والشكل الخارجي... ويبقى بعد ذلك جزء لا يخضع لأي من هذه العوامل ولا يمكن التنبؤ به وإن كان يخضع لتوزيع احصائي وهو الجانب القدري من الرزق ... الإنسان عليه أن يسعى لتعظيم الجزء اليقيني (أو شبه اليقيني) من رزقه ويترك الجزء الاحتمالي بيد الخالق. وهذا هو التوكل كما افهمه.

من يقولون أن الإنسان لا حيلة له على الإطلاق في ما يكسبه ويضربون أمثلة فردية على ذلك يتجاهلون المتوسطات الإحصائية ويركزون على التباين فيها ... متوسط ما يجنيه المتعلمون يزيد بالتأكيد عن متوسط ما يجنيه الجهلة ... من يعملون يزيد عمن لا يعملون ... واللي بيحسب ويخطط يزيد عمن يتخذ قراراته بأسلوب عشوائي ... الأذكياء بصورة عامة يكسبون أكثر من الأغبياء والأصحاء أكثر من المرضى. وأي استثناء لا يلغي القاعدة بل يؤكدها.

شكرا يا احمد

وضحت وجهة نظري باختصار و وضوح

[عبير يونس]

تعرفوا يا جماعة ان الموضوع ده ربنا سبحانه و تعالى

رزقني بيه

آه و الله

أنا لما قرأت مداخلاتكم

حسيت اني معرفش حاجة في الدنيا

انا كنت دايما محتارة

و مش فاهمة

بس كنت متأكدة من حاجتين

أنا مش كل اللي في ايدي لي وحدي

و الحاجة التانية

ان مهما الواحد اجتهد و سعى

فده مش شرط انه يجني شيء من وراء السعي ده

بس عارفة و متأكدة ان السعي ما بيروحش عند ربنا

يعني ربنا بيكافئنا على السعي بطرق أخرى

و مش لازم اللي احنا نكون مخططين له

لأنني ببساطة مقتنعة ان الدنيا دي عاملة زي غرفة مليانة من تحت لفوق رفوف

عليها الحاجات اللي احنا بنبص لها

و يمكن نشتهيها

بس احنا طولنا محدود

و ما بنشوفش

فوق راسنا

و منعرفش لو خدنا حاجة من الرف

ممكن ايه اللي يقع علينا

ممكن ناخد حاجة فوقه حاجة تانية تقع علينا

أو ممكن تنهار فوقنا حاجات تانية منعرفش نلمها

اللي اقصد اقوله

انا ده ملك منظمه سيده

المولى سبحانه و تعالى

و هو اللي شايف و مطلع

و عشان كده قال عز وجل:

{كُتِبَ عَلَيْكُمُ الْقِتَالُ وَهُوَ كُرْهٌ لَّكُمْ وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ }البقرة216

يعني مثلا الواحد او الواحدة يقى حيتجنن يتجوز حد معين

و تقعد تستنى فيه

و تدعي ربنا

و ماتتجوزهوش

و تبقى زعلانة و حاسة انها سعادتها انتهت

و هي متعرفش لو ربنا كان اداها الانسان ده كانت حياتها حتبقى عاملة ازاي

و ممكن ربنا يوريها بعد سنين حاجات تخليها تحمد ربنا مليون مرة انه البني

آدم ده ماكانش من نصيبها

و نقيس على كده كل حاجة

الدراسة

الوظيفة

السفر

الانجاب

كل حاجة

ده حتى الأكل سبحان الله

و زي ما الأخوة تفضلوا و قالوا

له مواقف عجيبة

و مش شرط ان حد تاني ياكله

ممكن يندلق على الأرض و يكون من نصيب الزبالة

و ممكن الواحد ياكله و يرجعه

أو يخرب الأكل و مايكلوش

دايما كانت والدتي الله يرحمها بترسخ فيا المواضيع دي

و كنت استغرب منها جدا

لما مثلا يكون في ايدي حاجة باكلها أو بأشربها

و تطلب مني اناولها حاجة زيها

فالطبيعي اديها اللي في ايدي

و أروح أنا أجيب غيرها

كات ترفض بشدة

و تقوللي لا

ماخدش رزقك

اذكر مرة الشيخ الشعراوي الله يرحمه كان قال ان الواحد

لما يتعور و ينزف قطرات من الدم

بيبقى في القطرات دي حاجة كلتها او شربتها و ما كانتش من رزقك

اللي بجد بقى مكنتش واخدة بالي منه

و مش عارفة أفرق بينه

هو ما تفضلتم بيه

من ان العمل غير الكسب غير الرزق

وكانت الأمور مختلطة عندي في الموضوع ده

لدرجة اني كنت بآخدها بشكل اني أكيد عاملة حاجة غلط مع ربنا

لما يحصل لي حاجة

يعني لما تبقى في ايدي فلوس

و قبل ما أفكر حأعمل بيها ايه

الاقي خمسين حاجة اتفحت و خدت الفلوس

كنت بأبص للموضوع

بشكل انه عقاب

و اني اكيد عاملة حاجة

سبحان الله

حتى الكلام

و الأفكار

رزق من الله عز وجل

تحياتي

[MZohairy]

ملحوظه للتوضيح

قصدت بالرزق جزئية الماده فقط و ليس الرزق في الزواج و الاولاد و الصحه و باقي نواحي الحياه

و ارى كما قال أحمد ان هناك عناصر بيد البشر مثل تحسين المظهر و تحسين العلم و الدراسه و تحسين العلاقات الاجتماعيه و تحسين مخارج الانسان اللفظيه و الذكاء الاجتماعي بوجه عام

كل هذا يزيد من فرص حصولك على عمل افضل و رزق اكثر

و هذا ما اقصده بالحيله في الرزق

[wagdi]

والله يا زوهيري أنا مش عارف انت بتتكلم على إيه بالظبط...

المكسب ولا الدخل ولا الرزق ولا القدر...

فالرزق في حد ذاته كلمة صماء لا تصح إلا إذا وضعت في جملة... أنا النهارده ربنا رزقني وتسكت... لازم تحدد... الرزق ده مال ولا طفل ولا زوجة ولا عربية ولا قفطان... وبعدين لازم تقرنه بصفة ... يعنى رزقت طفل معاف... رزقت زوجة نكدية... رزقت قفطان بخرم... كدة... لأن مش معنى إن أنت رزقت بطفل أن دي حاجة حلوة... فممكن الطفل ده يطلع عينك ويخلي حياتك جحيم... والعربية تعمل بيها حادثة وتعيش مشلول... والزوجة تخونك وتفضحك... والقفطان تمسك فيه النار وأنت بتتطبخ وتموت محروق... ومش معنى إن لما حاجة من دول برضه تحصل يبقى ده غضب من ربنا وقلة رزق وحظ ونصيب والكلام النميس ده...

أقولك... أنت عايز حكاية... حاحكيلك حكاية... صيني...po::

بيقولك كان فيه واحد مزارع حكيم (زي الفلاح الفصيح بتاعنا كدة) صحي الصبح مرة لقى قدام باب بيته حصان بري أبيض جميل أوي... أكله وشربه وربطه... شوية وجم جيرانه وقالوله ياااه... ده أنت ربنا رزقك... ده أنت ربنا بيحبك... يا حظك...فضل هو ساكت وقالهم "هانشوف"... تاني يوم الحصان قطع الحبل وهرب تاني على الغابة... جم جيرانه قالوله ياعيني..يا حظك القليل... جت الحزينة تفرح... والكلام ده... فضل هو ساكت وقالهم "هانشوف"... تاني يوم الحصان رجع ومعاه تلات حصنة تانيين بريين جايين وراه... جم جيرانه وقالوله أهو ده الكلام... صبرت ونلت... بختك يابو بخيت... فضل هو ساكت وقالهم "هانشوف"... تاني يوم أبنه حاول يركب حصان منهم راح الحصان عمل بيه شقلبظات في الهوا وراح دلقه...رجلين الولد الأتنين أتكسروا... جم أخوانا قالوله دي عين وصابتك... ده أنت حظك دكر... ده انت بختك قليل... فضل هو ساكت وقالهم "هانشوف"...تاني يوم جم بتوع الجيش يلموا كل الشباب إلى في القرية علشان يروحوا يحاربوا هولاكو... شافوا الولد رجليه الأتنين مكسورين... سابوه... جم الناس قالولوه رزقك يا مرزق... مين كان يصدق... يابركة دعا أمك... والراجل برضه فضل ساكت وقالهم "هانشوف"..... الشاهد من الحكاية يا زهيري إنك مستحيل تعرف إذا كان إلى أنت فيه ده خير ولا شر... مستحيل تبقى متأكد أن المرتب العالي ده حاجة أحسن... ومستحيل تبقى متأكد أن المرض إلى جالك ده حاجة وحشة... وبالتالي... مستحيل تحدد معايير لحاجة هيا أصلاً مش محددة... لو اشتغلت حاتكسب صح... لو أشتغلت أكتر حاتكسب أكتر وأكتر... صح برضه... بس المكسب ده بقى حيعود عليك أنت إزاي يا زوهيري بيه... أهو ده إلى لو وقفت على شعر راسك مستحيل تعرفه...

أرد بقى على سؤالك..." كيف لا يكون هناك حيله في الرزق من منظور ديني دنيوي معا؟"

الدنيا حيلتك فيها تجيب الفلوس مثلا... تذاكر وتدرس وتشتغل وتتعب... كدة... حاجة دنيوية الى هي الفلوس بتجيبها بفعل دنيوي إلى هو الشغل بواسطة وسائل دنيوية "كمبيوتر- ترمومتر- مقطف..."

بس انت كدة بجبتش الرزق... انت جبت فلوس...

لكن الفلوس الي انت جبتها دي بقى حتوديك فين ولا حتعمل فيك ايه دي في ايد ربنا سبحانه وتعالى... يا تبقى رزق... ياتبقى رزء...

فهمت حاجة ولا انا منظري باهفلط في اى كلام...

هو انت كان الموضوع ايه اصلاً سعادتك... :lol:

اتوتالور يا زهيغي بيه

تم تعديل 8 أكتوبر 2009 بواسطة wagdi

[أحمد سيف]

الرزق ... البركه ... النصيب ... الخير ... مفاهيم من ثقافتنا نستخدمها كل يوم كمرادفات للمنفعة المادية الصرفة (وبمعنى أكثر تحديدا: المال)

ولكن حين يأتي دور الحديث عن دور الإنسان في تعظيم هذه المنفعة تظهر الاعتراضات على هذا الربط المباشر بين هذه المفاهيم والمنفعة المادية ... يقول قائل: الرزق ليس المال ولكن الخير الذي يعود عليك من المال ... طالما ليس هناك علاقة واضحة بين المال وبين الخير الذي يعود من وراءه فلماذا يسعى الجميع خلف المال ؟؟؟ وطالما أن الخير سيأتي بالمال أو بدونه لأنه "مقدّر" فلماذا نعمل ونسعى ونكّد في سبيل المال. لماذا لا يجلس كل منا في بيته وينتظر "الرزق"؟

هناك علاقة معقدة جدا في ثقافتنا الغائية بين الإنسان والمال ... الكل يتحاشى الحديث عنه ويرغب في إظهار أنه لا يكترث له ولا يخطط من أجل الحصول عليه ... وفي نفس الوقت الكل يسعى بكل ما يملك لتجميع أكبر قدر منه ... لهذا نرى هذا الاستخدام المكثف لمفاهيم الرزق والبركة والنصيب والخير لنتفادى الحديث عن المال مع أنه هو المقصود في نهاية المطاف

[wagdi]

الرزق ... البركه ... النصيب ... الخير ... مفاهيم من ثقافتنا نستخدمها كل يوم كمرادفات للمنفعة المادية الصرفة (وبمعنى أكثر تحديدا: المال)

ولكن حين يأتي دور الحديث عن دور الإنسان في تعظيم هذه المنفعة تظهر الاعتراضات على هذا الربط المباشر بين هذه المفاهيم والمنفعة المادية ... يقول قائل: الرزق ليس المال ولكن الخير الذي يعود عليك من المال ... طالما ليس هناك علاقة واضحة بين المال وبين الخير الذي يعود من وراءه فلماذا يسعى الجميع خلف المال ؟؟؟ وطالما أن الخير سيأتي بالمال أو بدونه لأنه "مقدّر" فلماذا نعمل ونسعى ونكّد في سبيل المال. لماذا لا يجلس كل منا في بيته وينتظر "الرزق"؟

هناك علاقة معقدة جدا في ثقافتنا الغائية بين الإنسان والمال ... الكل يتحاشى الحديث عنه ويرغب في إظهار أنه لا يكترث له ولا يخطط من أجل الحصول عليه ... وفي نفس الوقت الكل يسعى بكل ما يملك لتجميع أكبر قدر منه ... لهذا نرى هذا الاستخدام المكثف لمفاهيم الرزق والبركة والنصيب والخير لنتفادى الحديث عن المال مع أنه هو المقصود في نهاية المطاف

لأه... لأن حب المال ده غريزة انسانية بحتة... وربنا قالها في القرآن "وتحبون المال حباً جما"... زي الاكل والشرب ... زي ماالرجالة بتحب الستات... زي ما الستات يحبوا الاطفال... كدة... غريزة... كلناعايزين ناكل وكلنا عايزين نشرب كلنا عايزين نتجوز وكلنا عايزين دهب وياقوت واحمدك يارب... بس الى بنتكلم فيه هو ان كترة الاكل مش معناها الصحة بل ممكن تموتك... وكترة الستات مش معناها النعيم بل ممكن يكون النكد بعينه... وكذلك كترة الفلوس...

ماحدش بيقول نبطل نتكلم عن الفلوس او نبطل نسعى للحصول عليها... بنقول نحط في دماغنا ان الفلوس دي لا معنى لها بدون بركة ربنا فيها ورضاه عنها... وبالتالي نراعي ربنا في مجايبها لأن لو فلوس قليلة معاها بركة ربنا احسن من فلوس كتير بدونها... وكدة...

هو احنا بنتكلم لسة في نفس الموضوع... ولا ده موضوع تاني... :lol:

تحياتي

[أحمد سيف]

الفاضل وجدي ... إجابة على سؤال حضرتك ... أعتقد أننا لا زلنا نتحدث في نفس الموضوع ... وحديثنا هو بخصوص المفاهيم والعريفات التي بدونها فإن النقاش عن قدرة الإنسان في التأثير على "رزقه" لن يفضي الى نتيجة مفيدة

ما فهمته من كلام حضرتك أن الرزق ليس هو المال ولكنه الفائدة التي تعود على الإنسان من وراء هذا المال... وربطت بينهما بما يسمى "البركه" ... والعلاقة طردية بين الرزق والبركة وبين الرزق والمال كذلك ... أعتقد أن هناك مفهوم في علم الاقتصاد هو "المنفعة" utility يصف تقريبا نفس الأمر ... ومنفعة النقود utility of money هي العلاقة التي تربط بين كمية النقود والمنفعة التي تعود من وراءها على الإنسان (طبعا أنا هنا أتحدث عن المنفعة الدنيوية) ... وحسب علمي فإن المنفعة التي يجنيها الإنسان من امتلاك واستخدام مبلغ معين من المال تتوقف على عدة عوامل ليس من بينها طريقة حصوله على المال ... على الأقل هذا ما تعلمته في علم الاقتصاد. لذا لكي أكون شاكرا لو تكرمت بتزويدي بأية دراسة جرت لتأكيد أن هناك علاقة معينة (بعيدا عن الأمثلة الفردية) بين طريقة الحصول على المال وبين مقدار انتفاع الإنسان به، وعلاقة "البركة" بهذا الموضوع.

سامحني لكني في المسائل العلمية من هذا النوع أحب أن تكون المفاهيم واضحة ومحددة وقابلة للقياس حتى أستطيع التعامل معها بصورة دقيقة وصولا الى الفهم والاستنتاج الصحيحين.

تحياتي واحترامي

[wagdi]

الفاضل أحمد سيف...

أنا باحجز مكان بس للرد على حضرتك... واعذرني أني سأقوم بالرد عند عودتي لمنزلي...لسببين...

أولاً أنا أكتب من الشغل بواسطة لوحة المفاتيح على الشاشة... وأظنك تعلم مدى الشلل التي تسببه...

والسبب الثاني هو أن حضرتك اخدتني على خوانة... فأنا داخل الموضوع من منظور عام فلسفي وحضرتك دخلت بينا في التعريفات والدراسات... ودي عايزة قعدة...

حاحط الكركديه في التلاجة يسقع وأخطف العشا وأرجعلك...

تحياتي على أسلوبك الراقي... وخالص أحترامي...

[MZohairy]

يا وجدي هو الواد المدردح الشاطر الواعي المفتح اللي مخه شغال مش حظوظه افضل من اللي معندوش الكلام ده في مجال الرزق المادي؟

[عبير يونس]

يا وجدي هو الواد المدردح الشاطر الواعي المفتح اللي مخه شغال مش حظوظه افضل من اللي معندوش الكلام ده في مجال الرزق المادي؟

يا أستاذ زوهيري

اسمح لي اقول لحضرتك

انني أكبر مثال في محيطي على حكاية لا حيلة في الرزق

شوف حضرتك

باحرص جدا على مظهري و شياكتي

عندي لباقة و كاريزما

و الحمد لله محبوبة في الأوساط اللي باتواجد فيها

لغات و كومبيوتر

باترجم و بادي دروس

و مافي حد ترجمت له الا و انذهل من دقة الترجمة و انبهر من حرفية الشغل

كل اللي بادرسهم بتبقى صداقة بعد كده مع امهاتهم

لأني بفضل الله ثم جهودي باعلمهم ازاي يعتمدوا على نفسهم و يبطلوا ياخدو دروس خالص

و الحمد لله كلهم بيدعوا لي

و ناس متعرفنيش بيسمعوا عني

و لما يقابلوني باتفاجأ بكلام حلو كتير سمعينه عني

بالنسبة للغات يشهد لي أصحابها بأنني معجزة لغوية في لغاتهم و انني اتقنها كأصحابها

رغم كل اللي فات ده

مبعمرش في شغلانة

bv:-

اشتغلت في أماكن كتير و مري ما كملت سنة

مرة واحدة في حياتي اشتغلت سنتين و نص بحالهم

و انا اللي سبتهم بارادتي

قدمت سيفيهات و عملت انترفيوهات من كترهم مش فاكرة عددهم

و يقف الموضوع على آخر لحظة بمواقف غريبة

و حتى لو كان أصحاب العمل عايزيني جدا

و تلاقي المواضيع اتقفلت بشكل عجيب

يخليك تضرب كف على كف

بينما سبحان الله

في ناس أقل مني بكتير

لكن بيعمروا و بيستمروا

زمان كانت ماما تقول لي

ذكاء المرء محسوب عليه

وكتير زوجي يقوللي

انتي عيبك ان امكانياتك عالية و مبهرة

overqualified

أحيانا ببتبقى أعلى من المفروض حتبقى رئيستي

:blink:

و الله ما باتغر على حد

و الا باعامل حد بشكل وحش

بدليل ان زملائي و زميلاتي مازالت تربطني بهم علاقات جميلة

و حتى بعد ما بأسيب الشغل

و بيبقوا عايزين يخدموني بأي شكل

و بدون مقابل و لا مصلحة

بالأقيهم دايما يكلموني و يقولولي على فرص عمل

و بيحاولوا يساعدوني بكل قوتهم

هل بعد ده كله في حيلة في الرزق يا أستاذ زوهيري؟؟؟

في ايه اكتر من أن أصحاب العمل يتهبلوا عليك و يبقوا عايزينك

و تحول الأقدار دون ذلك

هل بعد ده كله اقدر اشتكي من قلة الرزق؟؟

و سوء الحظ؟

ده كفاية اوي ان ربنا بيرزقني القبول و بانال محبة معظم الناس اللي باعرفهم

هو ده برضه مش رزق؟؟

الفلوس دي حاجة تافهة جدا قدام كل ده

هي صحيح عصب الحياة

و لازم منها عشان الحياة تمشي

بس عمر ما كان كتر الفلوس هو مقياس الرزق الوفير

انا واحدة من الناس اللي ربنا بيرزقهم من حيث لا يحتسبوا

و بدون أسباب

و دون الخوض في مدخولي المادي أنا وزوجي

يكفي ان كل من حولي يشهد بمعجزة ان احنا ازاي عايشين

يعني بالحساب المادي البحت و الورقة والقلم

مع دخلنا و عدد أطفالنا ماشاء الله و الفواتيرمن ايجار و كهرباء و تيلفونات و غيره

كان زماننا بنشحت في الحرم

:lol:

لكن والله ربنا بيورينا و بيوري الي حوالينا عجائب قدرته

مش عايزة أقول قد اه ناس تانية نعرفهم ولادهم اتين تلاتة

و دخلهم أضعاف دخلنا

و مش عايشين عيشتنا

و لا مبسوطين زينا

شوف التعبير المصري الجميل

"مبسوطين"

جاية من البسط في الرزق

الموضوع كبير اوي يافندم

اكبر من اننا نستوعبه

ربنا سبحانه و تعالى له حسابات تانية خالص

و حساباتنا الدنيوية دي و لا حاجة

و لا لها أي أهمية

و على الجزئية اللي حضرتك مححدها

بأقولها بالفم المليان

الموضوع رزق بحت والله

بدليل تلاقي ناس امكانياتها عادية جدا و بتشتغل و بتكسب أضعاف ناس تانية امكانياتها محصلتش

و طبعا ده مش مقياس

و لكنه موجود

و طبعا في ناس في مكانها الصح

والعادي عادي

و صاحب الامكانيات العالية في مقام عالي

بس برضه رزق

و لا يسعني غير أن أقول

أن البركة أهم من مقدار الرزق

زمان الشيخ الشعراوي الله يرحمه

كان بيدي مثال حلو اوي

يقوللك واحد بيكسب 10000 جنيه و آخر بكسب 100 جنيه

الاتنين ولادهم يعيوا

ابو 100جنية يدي ابنه اسبرينة و كوباية شاي يخف و يروق

والتاني يحتاج كونسلتوا عشان يخف

و ده ما يمنعش برضه أن ممكن ربنا يديك بزيادة و برضه يباركلك

في ناس الصحة ليهم أفضل

وفي ناس المرض ليهم أفضل

و في ناس الفقر ليهم أفضل

و في ناس الغنى لهم أفضل

ربنا أعلم بينا من أنفسنا و يعرف ما الأفضل لنا

كالطبيب (و لله المثل الأعلى)

يعرف الكمية المناسبة لك من الدواء

فإن أنت أخذت أقل منها لم تجني الفائدة المرجوة

و ان انت ازدت الجرعة قتلتك

تحياتي

po::