ياترى مين اللى غلطان... أنا ولا هو؟

[محمد عبدالعزيز]

أنا آسف إن ده يكون أول موضوع أكتبه من فترة طويلة, بس أنا فعلاً حزين من الموقف ده ومش عارف أنا اللى غلط ولا أنا اللى صح, ومش عارف ليه أصلاً وصلنا للحال ده.

سامحونى فى ذكرى للتفاصيل بتوسع عشان بس أبقى قلت اللى لى واللى عليا.

نبتدى الحكاية من أول شهر 8 اللى فات, لما حصلت مشكلة فى الأرضية الخشب عندى فى الشقة واضطريت إنى أخلعها كلها وأركب بدالها سيراميك.

ورغبة منى فى تقليل الخسارة والتكاليف اللى اتكلفتها فعرضت الخشب اللى تم خلعه للبيع, وكان فى واحد -وليكن رمزه "س" عشان ما يحصلش لخبطة- متابع الموضوع من أوله

وكانت بدأت علاقتنا ببعض من فترة قصيرة جداً قبل الموقف ده ولكنها كانت بتتطور بسرعة للأحسن, المهم "س" ده أعلن رغبته فى إنه يشترى الخشب ده ولكن محتاجين حد يفصله كالعادة, قلت له هات حد من طرفك يفصله ونشوف رأيه إيه؟

وبعد فترة تكاد تقترب من الأسبوع من تأجيلات من طرفه وبأعذار مختلفة, مرة مش فاضى ومرة مش لاقى النجار و..... إلخ

المهم قال لى طب شوف انت حيتفصلوا بكام ومش حنختلف, قلت له ماشى, ورحت فعلاً لورشة نجارة طلبت من صاحبها إنه يفصلهم, وكان فى واحد صنايعى شغال فى الورشة - وليكن "ص" - حاضر الكلام وطلب منى إنه يشوفهم عشان ممكن يكون لهم شغل عنده, وفعلاً اتفقنا وجه "ص" شافهم وفصلهم ب 500 جنيه, اتفقت معاه إن فى واحد تانى عاوز يشتريهم ولو مجابوش سعر أعلى من كده يبقى حتصل ب "ص" ييجى ياخد الخشب بالمبلغ اللى هو قال عليه, وبعدين شفت ورشة نجارة تانية صاحبها فصلهم بمبلغ 600 جنيه بس هو مش محتاجهم فى شغل عنده فعشان كده ماعرضش إنه يشتريهم.

المهم أنا اخدت الرأيين دول وفكرت إن دلوقتى النجار بياخد الخشب عشان يشغله يبقى أكيد مش بياخده بتمنه إنما بتمن أقل عشان يطلع له منه مكسب أكيد, فقررت إنى أقول ل "س" إنى عاوز فيهم 700 جنيه, ولو فاصل معايا ووصلنا ل 600 جنيه يبقى نتوكل على الله ونتمم البيعة, المهم عرضت عليه المبلغ ده وقال لى طب ادينى فرصة أفكر وأرد عليك, وعنها برضه وأخدنا أسبوع تانى تقريباً أستناه يرد مش بيرد, وطبعاً الفترة دى كلها أنا مخزن الخشب فوق السطوح ومعرض للشمس وكل مالوقت بيمر عليه ممكن يبوظ ويبقى مالوش تمن, وبعد كذا محاولة إنى أقابله وأعرف رده إيه وسبت له أرقام تليفوناتى وسبت له رسالة مع ابنه مرة ومرة إنه يرد عليا مافيش فايدة, المهم عرفت إنه سافر يومين تلاتة وراجع, فأنا كده استنتجت إنه مش عاجبه السعر, فاتصلت ب "ص" واتفقنا إنه ييجى ياخد الخشب على 500 جنيه يوم الجمعة. الكلام ده حصل يوم الأربعاء الظهر تقريباً.

المهم "س" اتصل بيا يوم الأربعاء بالليل وقعد يعتذر ويبرر إنه ماردش عليا وإن ابنه مكانش بيبلغه وإنه كان مشغول فى تجديد رخصة العربية وكده وإنه لسه مازال عاوز يشترى الخشب وموافق على 700 جنيه, قلت والله انا اتفقت مع واحد تانى خلاص وجاى ياخد الخشب يوم الجمعة, فقال على العموم أنا محتاجه وفكر وشوف رأيك إيه والمبلغ كله جاهز معايا, فأنا حسبتها لقيت إن فى فرق 200 جنيه وفى نفس الوقت "س" المعاملة بينى وبينه كويسة ومش عاوز أزعله فى حاجة زى كده, فقلت له أنا دلوقتى اتفقت مع واحد تانى وماقدرش أرجع فى كلامى إلا لو هو سامح ووافق.

وفعلاً رحت ل "ص" وحكيت له اللى حصل والراجل كان متفهم للموضوع جداً بصراحة وقال لى بالحرف "لو فى جنيه واحد أكتر إنت أولى بيه"

قلت له يعنى مسامح؟

قال لى مسامح وربنا يبارك لك ومجيك لحد عندى على راسى من فوق.

قلت له ربنا يكرمك ويبارك لك وسبته ورجعت ل "س" وقلت له خلاص الراجل مسامح وفكنى من الاتفاق اللى بينى وبينه, وشوف حتيجى تاخد الخشب امتى, قال يوم الجمعة أو السبت بالكتير وبما إن الوقت مكانش طويل فماطلبتش منه فلوس وقلت لما ييجى ياخد الخشب كل واحد ياخد حقه وخلاص.

للأسف الاتفاق ده كان بينى وبينه بس ومفيش حد شاهد عليه ولا فى أى ورق مكتوب ولا حاجة, وأعتقد إن المواضيع اللى زى دى مش بتبقى محتاجة احتياطات شديدة قوى كده.

أستنى "س" إنه ييجى الجمعة أو السبت زى ما قال بس ماجاش, وكالعادة أعذار من كل شكل ولون وقعدنا كده لغاية مادخل علينا رمضان, فطلبت منه دفعة من المبلغ ربط كلام يعنى, وبرضه بعد مماطلة يومين أو تلاتة دفع لى 250 جنيه, على إنه برضه نهاية الأسبوع ييجى يشيل الخشب, استمر مسلسل الأعذار طوال شهر رمضان طبعاً وفى خلال الفترة دى طلبت منه إنه يدينى المبلغ كله لأن أنا محتاجه فى مصاريفى والتأخير مش من عندى أنا لأن هو اللى مش عاوز ييجى يشيل ويخلص, بعد مجادلات برضه ونقاشات دفع لى 100 جنيه بس وبكده يبقى ودفع نص المبلغ وباقى النص, والكلمة دى قالها بعضمة لسانه بعد مادفع ال 100 جنيه, وهو على فكرة صاحب سوبر ماركت يعنى راجل تاجر وفى السوق وفاهم وعارف هو بيقول إيه.

أنا بصراحة زهقت من كتر الطلب وبعدين الخشب عدى عليه فترة معرض للشمس وابتدى يتقوس وطبعاً ده يقلل من قيمته جامد, و "س" حاطط إيده فى الميه البارده وأكتر من مرة يقول أنا خلاص اشتريت الخشب ماتقلقش بس إنت عارف رمضان وزحمة رمضان وإنه مش عارف يلتفت وراه, قلت ماشى مفيش مشكلة يبقى أسكت ومافتحش معاه السيرة دى خالص إلا بعد العيد ويارب نخلص من الموضوع ده.

وفعلاً مافتحتش معاه السيرة خالص لغاية اول امبارح وهو برضه مطنش رغم إننا بنتقابل أكتر من مرة فى الأسبوع, قلت مابدهاش بقى وأروح أطالبه بباقى المبلغ عشان نخلص من الموال الممل ده.

رحت له المحل لقيت زوجته هى اللى واقفه وهو بيشترى بضاعة للمحل, قلت يا فرج الله يبقى كده معاه فلوس وحنقبض, المهم أكدت على زوجته إنها تبلغه إنى عاوز باقى المبلغ ضرورى لأنى بعمل شغل فى العربية ومحتاج فلوس, زوجته عندها علم بإنه اشترى منى خشب بس ماعرفش عندها علم بالتفاصيل ولا لأ, المهم سألتنى هو انت ليك كام قلت لها اخدت 350 وباقى 350 قالت لى خلاص لما ييجى حبلغه وأخليه يتصل بيك, أكيد توقعتم طبعاً إنه ماتصلش لغاية آخر اليوم.

المهم رحت له امبارح المحل لقيته موجود وزوجته كمان موجودة, وبدأنا نتكلم فى الموضوع وبعدين رد عليا رد نزل كالصاعقة!!!!

قال أنا استغربت جداً لما قلت للمدام إن لسه ليك 350 جنيه مش احنا اتفقنا على 500 جنيه؟!!!

طبعاً أنا اخدت وقت طويل جداً على مابدأت أستوعب كلامه وإيه اللى هو بيقوله ده, وظهرت على وشى علامات وردود أفعال كتير ومختلفة ,وهو شاف كده وقعد بقى يحلف ويقسم بالله كذا مرة إننا اتفقنا على 500 جنيه وإنه من بداية الموضوع وهو فاهم كده وعامل حسابه على كده, وشوية كلام بقى من كلام السوق, الفلوس مش مهمة وخد اللى انت عاوزه عشان العربية وأنا سداد ورقبتى سدادة واحنا اخوات بغض النظر عن الموضوع ده ولو مش عاوز تبيع لى الخشب مفيش مشكلة وخلى الفلوس معاك كمان لو عاوز... إلخ

قلت له أزاى يعنى بعد الوقت ده كله جاى تقول لى دلوقتى كده, بعد ماخلتنى أرجع فى اتفاقى مع الراجل التانى, وانتظار الوقت ده كله بدون ماخد الفلوس كلها رغم إن التأخير من طرفك إنت, وإزاى أصلاً بعد ماتفقنا ترجع فى اتفاقك مع نفسك كده وبتقول إننا اتفقنا على 500 جنيه؟

بدأ يلعب بيا الكورة هو وزوجته, بيقولها مش أنا قلت لك إننا اتفقنا على 500 جنيه, وهى تقوله اه ده أنا حتى كنت بحسبهم 300 أو 400 جنيه!!!!

وقعد يقسم تانى بالله إننا اتفقنا على 500 جنيه وإن المبلغ ده أنا اللى قلته بنفسى- وأنا والله العظيم ماتفقت معاه على 500 جنيه الاتفاق اللى حصل بينا كان على 700 جنيه- وحتى اتصل بالراجل اللى انت اتفقت معاه فى الأول واسأله انتم كنتم متفقين على كام.

هنا بقى بدأت أشك إنه وصل ل "ص" بطريقة ما أنا ماعرفهاش , أو عرف بأى طريقة إنى كنت متفق مع "ص" على 500 جنيه.

قلت له أنا دلوقتى بتكلم على اتفاقى معاك انت مش مع حد تانى, احنا اتفقنا على 500 جنيه؟ قام جاب المصحف وأقسم عليه إننا اتفقنا على 500 جنيه.

أنا عن نفسى متأكد 1000000% إننا اتفقنا على 700 جنيه, قعدنا بقى اختلفنا كتير وكل واحد مصمم على رأيه, وفى الآخر قال لى عشان نخلص الموضوع ده ونقرب وجهات النظر أنا حدفع 600 جنيه, ويبقى احنا كده كل واحد جه على نفسه شوية عشان العلاقة مابينا تفضل زى ماهى, واحنا اخوات رغم كل شئ والكلام اللى حضراتكم عارفينه ده بتاع تلبيس العمة.

أنا حسبتها مع نفسى لقيت إن 600 جنيه أفضل من إنى أرجع له فلوسه اللى دفعها وأرجع أدور على حد تانى يشترى الخشب بعد الفترة دى كلها وهو معرض للشمس وأكيد مش حلاقى حد تانى ياخده بنفس السعر ولا حتى ب 500 جنيه. خصوصاً إن مفيش أى حاجة معايا تثبت اتفاقنا ولا فى شاهد عليه.

وفعلاً أخدت باقى ال 600 جنيه, إلا 20 جنيه , اتحجج إنه مش معاه غير 230 جنيه بس وإنه حيدينى ال 20 جنيه لما ييجى ياخد الخشب, الصبر من عندك يارب.

آسف إنى طولت عليكم, بس كان لازم أذكر التفاصيل كلها عشان أعرف رأيكم وحكمكم على الموقف ده, بالمرة أفضفض عشان أريح أعصابى شوية.

وشكراً على حسن استماعكم.

[doha]

خلاص كده انت وصلت معاه لحل مناسب .. لو هو متفقش معاك كنت هتبيعه بـ 500 بس فأي جنيه فوق الخمسمية مكتسب ليك .. كونه رجع في كلامه فعديها مش مشكلة مقابل انك اخذت فلوسك في النهاية بس خلي بالك متتعاملش معاه تاني ابدا .. مش هقولك اقطع علاقتك بيه ولكن اياك والتعامل معاه لا في فلوس ولا اي مصلحه .. يعني تبقى علاقة صداقة فقط او معرفة فقط بدون اي تبادلات ..

بقيت مشكلة وحده وهي الخشب الي موجود عندك لان الخوف يجي بعد فترة ويقولك انا مش عاوزه لاي سبب .. اتفق معاه على موعد ثابت يجي ياخذ الخشب فيه ولو ماخذهوش يبقى هو حر .. وبالمناسبة العشرين جنيه الي عنده انساها بقى متوقعش هتاخذها ..

ملحوظة : في قريب لنا كان عنده بيت قديم في البلد والبيت آيل للسقوط.. في واحد من اهل البلد عرض عليه شراء انقاض البيت عرض عليه 500 جنيه وقال متجيبش اكتر من كده خاصه وهي خربانه ومسوسه زي مالمشتري قال .. المهم القريب وافق وتمت البيعه .. القريب بيقول ان سبب موافقته انه شاف فعلا الاخشاب الموجوده في الانقاض من شبابيك وعروق في السقف ومش عارف ايه كل ده شافه انه قديم وتعبان كده وتوقع انها حاجه متجيبش فلوس فقال خمسمية احسن من مفيش ..

بعد ماباع راح سال .. تخيل طلعت الانقاض دي تساوي كام ؟ 4500 جنيه تقريبا ..

خلي بالك ده سعر الشراء ولسه التاجر هيبيع بمكسبه هو الخاص ..

طبعا القريب زعل جدا وراح كلم ناس في البلد انه هيرجع في البيعه .. قالوا له لاه لو هترجع يبقى تشتري منه الانقاض كأنك مشتري جديد يعني بسعرها وهو الاربع الاف وشويه .. تخيل .. عادي جدا

اكتشف القريب بان الشباك لوحده سعره كذا .. وعرق الخشب لوحده بكذا وان الي هو فاكره ملوش قيمه عنده عند الناس التانية بيتباع بمبالغ اكبر ..

الخلاصة .. مفيهاش حاجه ابدا لو الراجل تأخر عليك في شيل الخشب انك تروح تشوف حد تاني يفصله لك بس يشيل في ساعتها وطبعا ترجع الفلوس الي اخذتها لصاحبها لان يبدوا والله اعلم ان الموضوع كله كده على بعضه فيه حاجه غلط من قبل صاحبك ده .. والله اعلم

[لولا]

لاحول ولا قوة الابالله..

انا بستغرب جدا من الناس اللى عايشه حياتها كده، مش عارفه ازاى حد ممكن يعيش مرتاح وهو بيكدب وبياكل حقوق الناس.

فعلا والله "الحق لا يعرف بالرجال ولكن الرجال يُعرفون بالحق ".

فعلا شيء مؤسف وصادم انا اكتر حاجه تصدمنى فى الدنيا ان حد يكدب عينى عينك فى وشك.

ربنا يعوضك .. للأسف هو فعلا درس !!

لولا

[اميره]

فعلاً حاجه ترفع الضغط وخصوصاً لما تبقا عشمان أوى فى الشخص ده

تعرف أنا لو حصل معايا الموقف ده وشفت التصرفات دى من البدايه تأجيل وتعطيل ورجوع فى الكلام والله لو عمل إيه كدا ما أتعامل معاه حتى لو أخر شخص فى الكون .

وتقولى بقا إيه يحرق دمك إن أتفق مع حد على حاجه ويخلف وعده أو أتصل بيه ويتهرب منى بجد موقف سخيف أوى .

وبعدين لازم تشهد حد على الكلام إلى بيحصل بينكم أى إتفاق يكون فى أشخاص حاضرين الموقف عشان لورجع فى كلامو تانى يبقا فى ناس شاهده وتعرف تاخد حقك من النوعيه الغريبه دى.

و إتفق معاه على يوم محدد ويكون فى ناس موجوده ولو مجاش يبقا هو حر ولو فكر يرجع فى كلامه يبقا يخبط راسه بالحيط .

ولازم تعرف إن طالما عنده القدره إنو يمسك المصحف ويحلف بالساهل كدا أعلم ياأخى أنه ممكن يعمل أى شئ تتوقعه أو لا تتوقعه.

وهى الحياه كدا بنتعلم منها دايما ولاتنسى أن المعايير الأخلاقيه للشعب المصرى أنخفضت جدا .

[Folana]

السلام عليكم ورحمة الله....

لو نظرنا الى الموضوع بحياد نجد الاتى...

"ص"...فصل لحضرتك الخشب على سعر 500 جنيه...

مع ملاحظة انه نجار يعنى بيقلل فى السعر لانه حيتاجر فيه او حيطلع من وراه بمكسب...وده حقه...

النجار الثانى حدد سعر 600 جنيه لانه مش حيشترى....لكن لو كان حيشترى كان قال لحضرتك 400 جنيه....وده شىء عادى ومعروف ..

حضرتك حددت السعر لصديقك على اساس 700 جنيه...وهو وافق

وارد جدا انه بعد كده عرف بطريقة ما ان "ص" كان ناوى ياخده على سعر 500 جنيه...

فبدأت المراوغة منه......ولما كان عند حضرتك اصرار انك تكمل البيعة مع "س".....من باب الالتزام وأمانة الاتفاق ......فبدأ يساوره الشك...ومن الجائز ان يكون سأل واستفسر وتوصل الى ان حضرتك بالغت فى السعر ووصلته الى ميلغ 700...وقد يكون فسر هذا التصرف من عدة جوانب ليست فى صالحك...

المهم يعنى....توصلتم فى النهاية الى مبلغ 600 جنيه وده المبلغ اللى كان فى نية حضرتك أن تقبل به ..بعد شوية فصال ...تمام؟

يبقى حضرتك مش خسران........مش خسران ماديا يعنى......بعيدا عن الخسارة المعنوية والفرهدة وتضيع الوقت....انا مقدرة كل هذا...ولكن زى مابيقولوا كده بالبلدى " أخد الحق صنعة"...

وانت اخدت حقك ...لانى بصراحة واثناء قراءتى للموضوع...ضغطى ارتفع من الغيظ وتصورت ان الاستاذ "س" تهرب من البيعة كلها...

لكن كده كويس.....

اما عن العشرين جنيه...فدول حضرتك هو خصمهم تمن للنقل...يعنى حيدفع منهم او حيدفعهم كلهم للعربية اللى حتنقل الخشب من عندك....علشان تتحمل انت النقل وهو مايدفعش مليم زيادة عن المتفق عليه....وبالتأكيد طبعا هو عرف من النجار السعر الاول....

المهم...حضرتك طبعا تهدأ وتريح بالك...لان الدنيا فيها كده كتير جدا....يعنى كويس انه فى النهاية تمم البيعة....بعد تهربه ومراوغته اللى كان واضح منها انه صرف نظر ...لكن بما أنه اتم البيعة حتى ولو احراج....يبقى ده شىء كويس....

وبخصوص العشرين جنيه المعلقة.....اما تسامح فيها...او تاخد بيها بضاعة من السوبر ماركت وكده تبقوا خالصين.... -_-

وماتنساش انك معاك الفلوس وعندك الخشب......يعنى الرجل برضه بيثق فيك...ومش سىء للدرجة دى..

هو بس تاجر فى السوق ...وله وجهة نظر فى البيع والشراء....

هون عليك اخى الفاضل...وربنا يبارك لك فى هذه النقود....ويعوضك خير ان شاء الله

بس انت مش خسران برضه...الا شوية وقت....

تحياتى ومودتى

:)

[ذهبية]

يا استاذ محمد انا شايفة ان كل الى مضايق حضرتك هو تضيع الوقت و المماطلة و حرقة الدم فى التعليقة و انة جعلك فى وضع حيرة لا عارف تبيع و لا تاخد حقك منة

انا شايفة ان البيع بالسعر دة كويس و اكيد لو كنت بعت لحد غريب كان ممكن جدا انك كنت تنزل كمان لمجرد انك تخلص من الخشب قبل ما تبوزة الشمس

هو بس استخدم معاك اسلوب التجار و السوق اسلوبة و تعليقاتة من الاول بتاع تاجر فى السوق و تصرفاتة انة يزهقك و يحارب اعصابك

لحد ما تزهق و دة اللى حصل فعلا

لا تقارن نفسك و تفكيرك و تصرفاتك بية لانة غيرك خااااااااااااااااالص دة تاجر لو اسلوبة فى التعامل و افكارة ودى لغة و تصرفات التجار

لما انت تعرف ان كل التجار تقريبا اللى بيعوزوا يكسبوا من اى صفقة لازم يعملوا كدة يفطسوا فى سعرها و يزهقك و يعلقك ل

حد ما تتعب و تزهق

لما انت تعرف انك غيرة و لما تعرف ان سعر البيع كويس جدااا و لما تتخلص اخيرا من الخشب اللى كان هيبوظ يبقى لازم اعصابك تستريح جدااااا

و اقفل الصفحة دى و نصيحة ما تدخل تعاملات مادية بينك و بين اى حد لة علاقة شخصية بية لانة بيؤدى الى افساد هذة العلاقة فوراااااااااا

[محمد عبدالعزيز]

بشكرك جداً يا مدام "doha" على اهتمامك ومشاركتك, والحقيقة أنا اللى مضايقنى مش الفلوس لأنى كنت من البداية عامل حسابى إنه ممكن يفاصل ونوصل للمبلغ ده, أنا اللى مضايقنى إن الواحد يتخدع فى الناس بالطريقة دى, وإزاى واحد يحلف كل الأيمانات دى ويحلف على المصحف وهو متأكد إنه بيكذب؟!!!

عارف طبعاً إن ده سوق وإن التجار لهم معاملاتهم الخاصة, بس بصراحة مش قادر أستوعب اللى حصل, يعنى ممكن يكون فى مماطلة ماشى, إنما حلفان وعلى المصحف بالكذب, هى دى اللى صعبة قوى عليا وبقيت مش عارف أتصرف فيها إزاى.

رأى حضرتك بخصوص الخشب وإنه ممكن ماييجيش ياخده برضه فى الوقت اللى اتفقنا عليه وجيه جداً وأنا كنت بفكر فعلاً أعمل إيه وقتها لأنى متوقع حاجة زى كده تحصل, وإن شاء الله ناوى أعمل برأيك.

بشكرك مرة تانية

[محمد عبدالعزيز]

درس وأى درس يا مدام "لولا"

درس قاسى جداً... وأهو الواحد مش بيتعلم ببلاش.

المشكلة إن درس زى ده ممكن يخلى الواحد يعامل ناس تانية مالهاش ذنب بطريقة مش كويسة.

زى مابيقول المثل... اللى اتلسع من الشوربة ينفخ فى الزبادى.

المشكلة فعلاً مش فى الفلوس, المشكلة فى عدم الالتزام بالمواعيد ولا الاتفاقات والكذب العلنى كده بدون حياء.

أشكرك على مشاركتك واهتمامك.

[Amr Radwan]

عزيزي .. محمد عبد العزيز ..

فينك من زمان ..

بص يا سيدي هقولك الخلاصة في كلمتين ..

اولا .. انت غلطان من الاول .. ليه ؟؟

لان لو اتفقت اي اتفاق تجاري .. لازم تأكد علي السعر و الاتفاق و بنوده و خاصة ان فيه فلوس و الافضل يكون مكتوب بس ده مش متاح في التعاملات الصغيرة و الشفهية .

ثانيا .. بعض الناس مع الوقت بتنسي الاتفاق و بنوده و اللي بيضيع حقة اللي مش معاه الفلوس ده لو حتي كان مكتوب بيختلفوا في تفسير البنود ما بالك لو اتفاق شفوي ؟

رابعا .. توقع ان الشخصية دي مش كويسه في الفلوس عشان التاخيرات و الاعذار المتكررة

خامسا .. حاول ما تعملش اي اتفاقات تجارية مع حد من اصدقائك المقريببن او اقربائك او اقرباء زوجتك .

سادسا .. الدنيا مدرسة خاصة الواحد ما بيتعلمش فيها ببلاش - مقوله اعتز بيها جدا و بفتكرها في المواقف اللي زي دي

سابعا .. خلص نفسك من الورطة دي و خد منه باقي الفلوس (150 جنية) و سيبه بقا خد الخشب او ما خدوش هو حر ..

ثامنا .. المبلغ اللي ربنا مقدره لك هو (500 جنية) :blink:

تاسعا .. المفروض ان (س) ما يحاولش يقنعك بانك تلغي اتفاقك مع النجار و يطمعك في 200 جنية زيادة و ده اسلوب ابغضه في التجارة و دي بيسموها في السوق (الربط) اي انه ربطك بسعر و سابك عشان تلغي اتفاقق التاني .

عاشرا ... ما تحطش في بالك .. كلنا بنتعرض لمواقف زي دي كتييير قوي و احمد ربنا انك اتعلمت في 200 جنية .. غيرك اتعلم بموقف مشابه بتكلفه لا تتخيلها و بعضها بيكون خسارة معنوية قبل المادية و الحياة تجارب

اراك علي خير و ما تقطعش بينا كده

تم تعديل 13 أكتوبر 2009 بواسطة Amr Radwan

[محمد عبدالعزيز]

عندك حق يا أستاذة أميرة فى إن التأجيلات والأعذار دى كانت تعتبر دليل على إن فى حاجة غلط, بس أنا كنت عاذره عشان رمضان بالنسبة للى زيه كده فاتح سوبر ماركت بيبقى موسم شغل وفعلاً بيفضلوا شغالين 24 ساعة فى اليوم 7 أيام فى الأسبوع.

أما بالنسبة لمستوى الأخلاق فى مصر, فده شئ محزن جداً جداً جداً, وممكن نقول جداً للصبح

حضرتك أنا فى شغلى بتعامل مع ناس أجانب, بتعامل معاهم عن بعد... يعنى لا أعرفهم ولا يعرفونى ولا شفتهم ولا شافونى ولا حتى مرة اتكلمنا فى التليفون... تخيلى!!!

ورغم كده لما بنتفق اتفاق شغل بيلتزم به الطرفين, ولا يمكن يفاصل معايا فى قرش بعد مالشغل يكمل.

تحياتى وأشكرك على مشاركتك

[محمد عبدالعزيز]

إزيك يا مدام "Folana"

بيعجبنى جداً أسلوب حضرتك فى الكتابة

الحمد لله الأمور ماوصلتش لغاية الرجوع فى البيعة, ولكنى مازلت مصمم إن المشكلة مش فى الفلوس والمكسب قد إيه دلوقتى.

المشكلة اللى وجعت قلبى وضايقتنى فعلاً هى التعامل بالأسلوب ده, واللى زود المشكلة أكتر إنى ماكنتش متوقع ده نهائى.

أنا مقتنع إنى مش خسران من ناحية الفلوس زى ماحضرتك بتقولى, وقدر الله وماشاء فعل.

تحياتى

و ألف شكر لاهتمامك ومشاركتك

[محمد عبدالعزيز]

قد إيه يا مدام "ذهبية" السوق ده غير سوى فى تعاملاته.

وهل لما تكون التعاملات بالكذب والخداع بالشكل ده ممكن يكون فيها بركة؟!!!

فيها إيه يعنى لما نلتزم باتفاقاتنا ونكون قد كلمتنا.

أنا بدون أى تردد لو مكانش النجار اللى اتفقت معاه فى الأول سامح وأحلنى من الوعد ماكنتش لغيت الاتفاق معاه رغم إنه مكانش دفع ولا مليم حتى كعربون أو ربط كلام.

كنا زمان بنسمع إن الراجل بيتربط من لسانه, دلوقتى مفيش أى حاجة تلزم التاجر إنه يلتزم باتفاقه إلا ضميره, ودى للأسف قليلة جداً دلوقتى.

أنا فعلاً من التجربة دى بنصح أى حد إنه يكون فى شهود على أى معاملة فيها فلوس والأفضل تكون مكتوبة كمان وياخد كل الاحتياطات اللازمة عشان كل طرف يضمن حقه.

تحياتى وشكراً لاهتمامك.

[محمد عبدالعزيز]

حبيبى يا عمرو

موجود والله بس بتابع من غير مشاركة بسبب مشاغل وشوية حاجات تانية.

نصيحتك غالية جداً وتنم عن خبرة عملية فى التعاملات التجارية, وصدقنى استفدت منها كتير جداً.

أشكرك بشدة على اهتمامك ونصايحك.

وأحب أبشرك وأطمنك إنت وكل اللى اهتموا بالموضوع إن لسه من ساعة واحدة بس مخلص الموضوع ده نهائى وهى فرصة وجات لى لحد عندى.

الراجل اللى اشترى منى الخشب يعتبر جار لى فى المشروع السكنى اللى أنا ساكن فيه, والمشروع السكنى ده عبارة عن مجموعة عمارات لها إدارة واحدة وفى عمال وغفر شغالين تبع المشروع.

المهم العمال المسئولين عن العمارة اللى انا ساكن فيها اشتكوا لى عشان الخشب متخزن فى السطوح وإنهم كده متضررين لأن الإدارة بتاعة المشروع بتخصم من مرتباتهم مقابل إن السطوح مش نظيف عشان فيه خشب.

العمال دول بطبيعة شغلهم يعرفونى ويعرفوا أخينا اللى اشترى الخشب طبعاً, فرحت واخد واحد منهم معايا ورايحين له المحل بتاعه, وقلت له دلوقتى العمال دول متضررين من وجود الخشب فوق السطوح وعاوزين يشيلوه عشان بيتخصم من مرتباتهم طول ماهو موجود فوق, وطبعاً العامل أيد كلامى وأكده ووضحت للعامل قدام أخينا اللى اشترى الخشب إن الخشب مش بتاعى دلوقتى لأنى أخدت كل فلوسى وهو اشتراه, وبكده يكون العامل شاهد على الاتفاق عشان لو حب يعمل أى حركة تانى كده ولا كده يبقى فى شاهد, وبالمرة أخدت العشرين جنيه الباقية كمان.

الحمد لله كده الواحد يريح باله من ناحية الموضوع ده ويعتبره منتهى خلاص.

أشكركم جميعاً لاهتمامكم وآراءكم ونصايحكم الغالية.

وأتمنى إن التجربة دى تفيد أى حد يقرأها ويكون معرض لظروف مشابهة.