معايا مية الف جنيه اعمل ايه بيهم مشروع ولا اهاجر ؟؟؟؟

[بحار الغربة]

السلام عليكم

باختصار انا صيدلى اشتغلت فى السعودية 3 سنوات وناوى اكملهم 3 سنوات ونصف وامشى ومارجعش هنا الا على شغل محترم ( من وجهة نظرى )

واعتقد انه صعب او ارجع وانا معايا باسبور اجنبى ( ياجماعة دى وجهة نظرى )

انا بعد كام شهر هايكون متوفر معايا فى حدود 100 الف جنيه .... انا للعلم مرتبط باهلى اوى لكن عاوز اعيش فى اسكندرية

واهلى طبعا فى محافظة تانية

ماعنديش شقة فى اسكندرية ولسه ما اتجوزتش .... لكن عادى ممكن ااجل الجواز سنة او اتنين

المهم انى دلوقتى عاوز رايكم بجد وقولوه بامانة كانه رأيكم لأخوكم

انزل مصر واعمل مشروع ( مش لازم صيدلية ) واكافح كفاح الشعب المصرى المغتصب حقه

لغاية ما الاقى بنت الحلال وابنى حياتى واحدة واحدة

ولا اهاجر استراليا واقعد 4 سنين اخد فيهم الجنسية ولو حبيت ارجع الخليج هابقى استرالى ( عندى عقدة من العنصرية اللى هنا ) .

انا بالنسبة لى شايف ان كل حاجة لها ميزتها سواء انى اقعد فى مصر والا اهاجر

بس انا شايف ان الهجرة مشوار ناجح ان شاء الله لانى اساسا رافض انى اكمل حياتى فى بلاد المهجر

( انا بس عاوز اخد جنسية واعمل ماجستير يحترم فى بلاد الخليج وفى مصر ) بس عيب الطريق ده انى

هابعد عن ابويا وامى وياعالم هاشوفهم تانى ولا لا ؟؟؟

بس كل ما افكر كده اقول .... طيب ما انا متنيل هنا ولا بشوفهم ولا بيشوفونى واهى كلها غربة

اعمل ايه ؟؟؟؟؟؟؟؟

قولولى اى حل غير انكم تقولولى استحمل واصبر فى السعودية لانى بجد حاسس انى برتكب ذنب عظيم

*******

تم حذف جزء غير لائق من الموضوع

سي السيد

الادارة

تم تعديل 15 أكتوبر 2009 بواسطة se_ Elsyed
اسلوب غير لائق

[dongol]

حضرتك عندك كام سنة علشان الموضوع ده يفرق كتير في اتخاذ القرار

[mama nona]

ندرس الامرين مع حضرتك

الاول المشروع ال ممكن تعمله وانك هتقعد فى بلدك بجوار الاهل واكيد المشروع هيكبر وان شاء الله هيككون مربح ليك

وهتتجوز وتربى عيالك فى وسط اهلهم وبلدهم

مش كل ده احسن من الغربة والبهدلة والناس ال بتتعامل معاهم ومش طايقهم بس مضطر

التانى بقى وهو الهجرة

هتهاجر كام سنة 4 سنين بس ..........................

اشك طبعا انهم هيكونو كده

طيب واخدت الجنسية وماجستير كويس

وخلاص فكرت تنهى الهجرة هتروح فين بقى بعد كده بالجنسية ؟

اكيد هتدور ترجع الخليج بالجواز الاجنبى الجديد

وهنرجع تانى نتبتى الغربة من جديد

مع ان حضرتك قولت فالمداخلة بلاش حد يقولى اصبر واستحمل شوية

طبعا موضوع الهجرة ده تفكير كويس وطموح

بس انا لا ارجحه

لان هتتغرب مهما تتغرب مسيرك لبلدك تانى فيوم من الايام سواء قربت المدة او بعدت

هل لما هترجع بعد كل الغربة دى هتبدأ مشروع فبلدك ولا هتعمل ايه؟

ولو فكرنا انه النهاية مشروع فبلدك يا ترى شايف الافضل انه المشروع ده يبدأ وات صغير ويكبر معاك ولا انك تعمل مشروع بعد ما كبرت واتغربت

طبعا واضح من كلامى انى اميل الى انك تنهى موضوع الغربة والهجرة وتجلس بجوار والديك واهلك وتبدأ مشروعك وهما كان صغير هيكبر

واهو تكون حطيت رجلك على اول الطريق الصحيح ومتعملش زينا فالغربة عايشين فدوامة ما لها نهاية

معلهش انا حاولت افكر معاك بصوت عالى

بالتوفيق ان شاء الله :blink:

[Amr Radwan]

بصراحة الله يعينك و ييسر لك الاحوال ان شاء الله

اولا .. موضوع انك ترجع السعودية بجواز سفر اجنبي ما تتوقعش فيها انك تاخد مرتب و بدلات الاجنبي ..لانهم لما بيعرفوا ان اصلك مصري و واخد جنسية تانية مرتبك بينزل لمرتب المصري :blink: ودي سمعتها كتير جدا و خاصة في دكاترة الجامعة .

ثانيا .. الازمة الاقتصادية هيجي عليها يوم و تروح .. و اللي عاوز يفتح مشروع (في رايي) يفتح الان لان لما تستقر الامور و الدنيا تمشي اكيد هيكون مشروعه كبر مع انكسار الازمة الاقتصادية و بدل ما ينتظر يتوكل علي الله و يفتح دلوقتي .. لانك لو فتحت مشروع دلوقتي المفروض تستقر بعد مدة تبدأ من السنتين .

ثالثا .. احذر من النصابين اللي منتظرين اثرياء الخليج في نظرهم اللي هما المغتربين المتبهدلين .

رابعا .. خليك جمب والدك و والدتك و اتمتع بالجلوس بجوارهم حتي لو في مدينة تانية بس في نفي الدولة .

ربنا يوفقك

[qenawy]

هاجر اخي واهي مصر قاعدة

لو معجبكش الحال ارحع لها

ولو عجبك المهجر الحق والديك بك كفاميلي سبونسور

مصر الان خيار فاشل

واعتذر لو قلت لك ان المائة الف لا تكفي لعمل مشروع جيد او مربح

امنياتي بالتوفيق

[عبير يونس]

أنا بقى مع الهجرة 1000000%

سافر وأدرس و خد باسبور أجنبي

و ساعتها حتى لو رجعت مصر حتتعامل معاملة تانية

و حيبقى اللي يمسك حتحتمي في سفارة البلد اللي خدت الجواز بتاعها

ساعتها تقعد في بلدك معزز مكرم

و محمي بسفارة بلدك الجديد

و ساعتها لما تفكر في مشروع

الدولة حتساعدك و حتبقى مستثمر أجنبي

و حيبقى ساعتها بس

البيت بيتك

wst::

الأعمار بيد الله

انا ضيعت سفرية على زوجي اول ماتجوزنا عشان ما اسيبش والدتي لوحدها

و لكن مشيئة الله أن أسافر و أن تتوفى دون أن أراها

محدش بيعاند قدره

ربنا يبارك لحضرتك في والديك و يبارك في أعمارهم

شوف حضرتك

ممكن بالفلوس تقدم على فيزا دراسة في كندا

و تاخد المعادلة الكندية في الصيدلة هناك

و ده باب قوي جدا تدخل منه و حضرتك داخل كندا بعد الدراسة إلى ال P Rأو الإقامة الدائمة (اللي هي الهجرة)

لأنهم فاتحين الهجرة للدارسين في كندا

أو اللي عنده فرصة عمل هناك

أنه بعد سنة يقدم للهجرة من داخل كندا

http://www.cic.gc.ca/english/study/index.asp

فرصتك دلوقت و انت لسه لا متجوز و لا ملخوم بأولاد

يللا بسرعة أدخل باب الهجرة لكندا

و شوف اللازم مع الإخوة الأفاضل

بسرعة يا أخي

دي فرصتك

صدقني حتروح مصر دلوقتي و الفلوس حتضيع

المبلغ ده ما يعملش حاجة دلوقت

و حترجع تدور على أي عقد عمل تاني في السعودية

أنا مش باحبطك والله من مصر

بس دي مغامرة كبيرة

خصوصا أنك مش حتلاقي أي مساعدة من الدولة

بل حتلاقي عقبات

و المبلغ اللي معاك ده يدوبك رشاوي عشان تاخد حقك

أما ذهابك للدراسة في كندا - لا أعرف الكثير عن استراليا-

فعلى أقل تقدير ترجع بالمعادلة الكندية و تشتغل بيها في مصر زي الفل

ده على أسوأ الفروض و لو ما استمرتش هناك المدة المطلوبة للحصول على الباسبور الكندي

أو حتى بعد الدراسة ممكن تشتغل في كندا نفسها و تكوّن نفسك و حتقدر لأنك لسه مش متجوز و معندكش مصاريف كتير

100 ألف جنيه ممكن يكفوا دراسة في كندا (طبعا مع العمل اثناء الدراسة)

و حتى لو رجعت مصر بعد كده أكيد مش حتبقى خسران بشهادة و خبرة كندية

اعقد العزم و توكل على الله

و لا تنسى دعاء الاستخارة لتيسير أمرك

أو لإبعاد الأمر عنك إن لم يكن فيه الخير

صادق دعواتي لحضرتك

بالتوفيق

[مغتربة]

و اذا كانت حكومتنا المصونه نفسها هيه الى بتنصح الشباب بالهجره و السفر كحل لمشكله البطاله

ان شايفه ان خيار الهجره افضل خيار

[الباشمهندس ياسر]

سلام عليكم

بص يا دوك .. انا هقولك كلمتين ملهومش اى علاقة واضحة او مباشرة بكلامك

انما اتعب و اقراهم و فكر فيهم براحتك

انا راجل بشتغل شهر و شهر اجازة ... وموجود فى مصر بصورة مستمرة

مفكرتش انى اخد اجازتى و اطلع على اى بلد تانية زى ما معظم زمايلى بيعملوا

و جيت ف الاجازة اللى فاتت .. و تعب الوالد رحمه الله تعبا شديدا و اضطرينا نعمله عملية و فضلت معاه لغاية ما قام بالسلامة

و ابتدأ رحمه الله يتحرك و نخرج سوا و اموره الصحية بقت تمام التمام

لدرجة انى و انا مسافر .. اصر انه يودينى المطار زى العادة

و سافرت و انا مطمئن عليه تماما بفضل الله

بعدها بحوالين 25 يوم بالظبط تعب بابا و دخل المستشفى تانى و بقيت بتابعهم بالتليفون كل يوم

على امل انى نازل مصر بعد 10 ايام بالكتير

توفى والدى يوم الجمعه و عرفت الخبر لحظتها و ملقتش طيران الا فى صباح السبت

يعنى اتحرمت من انى اشوف والدى قبل وفاته

اتحرمت من انى اشارك ف غسله و تكفينه و دفنه

اتحرمت من انى اكون اول واحد ياخد عزاه

مقمتش بالدور المطلوب منى فى ان املى عيون امى بوجودى جنبها فى موقف بالصعوبة دى

مقمتش ب ولا حاجة من ده رغم انى الابن الاكبر

قولى بقى يا دوك

الشهادات و الدولارات و العمارات تساوى موقف زى ده

صدقنى

متساويش

[الباشمهندس ياسر]

و عشان مبقاش غيرت مسار الموضوع او ما شابه

انا مع الراى التانى

المائة الالف تعرف تبدأ بيهم حياة و تعرف تكسب من وراهم كويس بس بشرط

انك تكون شخصية اكتيف و بتعرف تعمل relocate بسهولة

الفكرة كلها انك تلاقى حد ياخد بايدك فى مجال معين و يديك الطريق بتاعه

و صدقنى

من سار على الدرب وصل

[عبير يونس]

قولى بقى يا دوك

الشهادات و الدولارات و العمارات تساوى موقف زى ده

صدقنى

متساويش

أيوة يا باشمهندس

مفيش حاجة تساوي الأب و الأم

بس كمان في حاجة اسمها

اللقا نصيب

يعني عدم وجودك وقت وفاة والدك الله يرحمه ده قدرك

و صدقني حتى لو كنت في مصر كان ده برضه قدرك

أنا كمان فضلت قاعدة جنب والدتي و ضيعت سفر

عشان ما اسيبهاش لوحدها

و هي اللي أصرت تاني مرة أني أسافر إلى زوجي

و ساعدتني في فلوس السفر عشان أروح له بسرعة

و شاء الله انها تتوفى و انا هنا

و ماكانش ينفع أنزل نهائيا لأني كنت على وشك الولادة

و فعلا ولدت بعد وفاتها ب 9 أيام

و كانت ولادة متأخرة

يعني كان قدري فعلا اني حتى ماحضرش غسلها و تكفينها

و لم أتلقى عزاها

رغم اني كنت أحب الأبناء لديها

اوعى تستسلم للأفكار دي

و أكيد أول ناس ما يرضيهمش ان الواحد يضيع فرصة حتفيده في حياته

هم الأب و الأم نفسهم

و حتى لو كان الثمن انهم يتحرموا من ضناهم

المهم ان مستقبله يبقى أحسن

تحياتي

[أحمد سيف]

لو كان اللي معاك نص مليون ولا مليون جنيه كنت قلت لك ارجع مصر واشتري شقة وافتح صيدلية أو سوبرماركت أو أي مشروع وحط بقية الفلوس في البنك لوقت عوزه وعيش زي الناس ماهي عايشه... إنما ال 100 ألف حنيه مش هتعرف تعمل بيهم حاجه من ده كله وهيتصرفوا منك ومش هتعرف هما راحوا فين ... لو مش قادر تفضل في السعودية فالهجرة هي أفضل خيار أمامك حاليا من وجهة نظري ... خصوصا إنك مش مستعجل على الجواز وعايز تبني مستقبلك وعندك استعداد تكمل تعليمك ... روح استراليا أو كندا أو أمريكا واتعلم هناك وخذ شهاده محترمه وجنسية محترمة وارجع الخليج على وضع ثاني ... يمكن ما يكونش زي الخواجات الأصليين من الناحية المادية لكن على الأقل هتكون مطمئن إنهم لو قالولك مع السلامه أو قلّوا أدبهم معاك (وده غالبا مش هيحصل) أمامك خيار ثاني يوفر لك حياة كريمة غير العودة الى مصر والبدء من نقطة الصفر ... ده غير الفوائد الأخرى اللي هتجنيها من السفر الى الخارج زي اللغة والسلوكيات والخبرة العملية والحماية التي يوفرها لك الجواز الأجنبي حتى في بلدك ... للأسف.

[ام حسن]

انا ايضا مع الاخوة الي بيقولوك هاجر

لانو إستثمار المال في تطوير نفسك ومهاراتك افضل من انو تحط المال لشراد عقار او ماشابه

طور نفسك وخد جنسية

ولما ترجع لأي بلد تاني سواد بلدك او الخليج حيكون وضحك افضل مليون مرة من غيرك

دا رأيي وربنا يوفقك وطبعا عليك اولا وآخرا بالاستخارة

تحياتي

[سكر]

فكر فى الامان الاجتماعى لولدك ولولدتك

لو عرفت انك

1- تكفيهم شر الحاجة فى الغربه (مش المال فقط ولكن قضاء المصالح ايضا ) توكل على الله وجرب الهجرة

2- لو هما عندهم استعداد نفسى للهجرتك توكل على الله وهاجر

3- رضا الاهل وخاصة الام بكنوز الدنيا فلو رضيت على الهجرة وقدرت الظروف هتتفتح لك ارزاق كتير (واسال مجرب اصل انا عملت العكس )

4- بس نصيحة الهجرة مستقبلها المادى بعيد شويه مش قريب جدا عشان كدة خدها هجرة علمية عشان تعرف تنجح

5- 100 الف جنيه فى مصر مبلغ قليل جدا بس الشطارة هو مع مين

[بحار الغربة]

بجد يا جماعة انا متشكر جدا على الرد

كلكم كلامكم لمست فيه الاخلاص حتى ولو كانت الردود مختلفة وكل واحد يؤيد اتجاه .... وانا والله فى حيرة .... الباشمندس ياسر ... لما قريت مشاركتك دموعى نزلت لانى مش عارف ليه حاسس انى من كتر ما اتغربت عن اهلى فى الجامعة والعمل والسفر بقى عندى يقين ان لو انا او حد من والدى فارق الحياة مش هانكون جنب بعض وقتها وده شعور فى حد ذاته قاتل لدرجة انى فى نفس اللحظة بتصل اسلم على امى او ابويا حتى لو مكلمهم فى نفس اليوم واعمل حجة اى كلام اقوله .... امى تقولى انت كويس اقولها انا تمام اوى ( اى كلام يطمنها مع انى هنا تعبان نفسيا اوى ) .

الا انى ياجماعة بجد اميل نفسيا للهجرة ... لانى شفت المصريين هنا بيتعاملوا ازاى ... وشوفت المصريين بيتعاملوا برضو فى بلدهم مصر ازاى ( انا احتكيت بالشرطة فى مصر ) .

الاخ اللى سأل عن سنى انا عمرى 27 سنة .

الاخت مغتربة مصرية ... انا اتمنى الاقى برنامج دراسة فى كندا بس للاسف غالبية البرامج بتطلب انى لازم يكون معايا معادلة قبل ما يقبلونى والمعادلة فى كندا للصيادلة صعبة اوى وبتاخد وقت ومصاريف كتير جدا .... ياريت لو عندك خبرة فى موضوع الدراسة ده قوليلى حتى لو هاروح ادرس سياحة وفنادق .... اى حاجة ... ولو عندك فكرة عن برنامج له علاقة بمهنة الصيدلة ياريت تفيدينى بيه .

انا اسف انى مش قادر اشكر كل اخ واخت رد على الرسالة دى باسمه لانى صاحى من النوم وعاوز الحق اصلى واجهز لانى الصيدلية بيبتدى دوامها بعد العشا مباشرة لمدة 12 ساعة ... طبعا معايا نت هناك هارد على حضراتكم باستفاضة

شكرا ليكم

تم تعديل 15 أكتوبر 2009 بواسطة بحار الغربة

[صعيدي من مونتريال]

تاخد بعضك على كندا او استرايا

الصيادلة مستقبلهم حلو هناك

ولو ما ارتحتش هناك وحشك الخليج والمعاملة الانسانية فيه

ياسيدي الخليج قاعد مش هيطير

تم تعديل 15 أكتوبر 2009 بواسطة صعيدي من مونتريال

[Simba]

مشروع ايه اللي حضرتك هتعمله بالمبلغ ده

هتشتري عربية اجرة وتشغلها او هتأجر محل او تفتح مكتبة يا سيدي هاجر لو قدامك الفرصة خصوصا وانك لسه أعذب مش مرتبط باسرة ولا التزامات

[doha]

الصراحة مقدرش اجزم ان كان الصح ليك تهاجر ولا تقعد سواء في مصر او السعوديه .. لكن هقولك كام نقطه ياريت تحطهم في بالك وانت بتاخذ القرار ..

لو سافرت كندا او استراليا او اي من دول العالم ( الاول ) فكون على ثقة انك مستحيل تقدر ترجع تعيش لا في مصر ولا في السعوديه ..اذا تعودت على نمط حضاري معين هناك فمستحيل هتتأقلم على نقيضه هنا وبالتالي فلو تغربت اعمل حسابك ان ده يكون قرار ( نهائي ) مفيش فيه ولا منه رجوع ..

زي ماقالوا لك مفيش حاجه اسمها تجيب شهاده من برا او جنسية اهل برا فتعامل معاملتهم .. ممكن تتميز شويه في الفلوس لو هتمسك منصب يعني تتعين في جهة ما لكن مستحيل هتاخذ نفس مميزات الاجنبي الي جنسيته كده اصلا ده غير انك كصيدلي مش هيفرق مع صاحب الصيدلية جنسيتك .. اذا انت هتحصر نفسك في وظيفة ميكونش لها علاقه بالبيع في صيدلية وانما تبع جهة ما ..

وفي حاجه مهمه اوي لو انت هتسافر على دراسه .. انت مستواك في الدراسة شكله ايه اصلا .. يعني هل انت مخلص كليتك بتقدير عالي جيد جدا فما فوق ولا يادوب بالزق واخدها مقبول وماجاورها ؟ لو الاولى يبقى ممكن فعلا يكون في امل تذاكر وتاخذ شهاده تحسن وضعك لكن لو الاخيره يبقى راجع نفسك الف مرة لان الدراسة مش سهله ولو مكنتش اصلا من الي بيستمتعوا بالدراسة فبلاش تفكر فيها ..

واخيرا اوعى يكون تفكيرك في الهجرة مبعثه بس ( الهروب ) من الوضع الي انت فيه حاليا لان لو كده فهتعمل ايه لو لقيت نفسك في وضع صعب في مهجرك .. هتهرب لفين بقى هناك ؟

وطبعا بالتاكيد استخير والاستخاره هتدلك على الصح الي تعمله ..

[الحازم حسن]

لا تهاجر ولا ترجع مصر

هاتهم أشغلهملك

وتبقى تديني مهيتك كل أول شهر عشان أحوشهالك وش طلعت زكريا في فيلم عوكل

[جيمي]

اقولك على حاجه .... بجد والله مش هزار .... وانت بتفكر كده فى كل الاحتمالات اللى الاخوه طرحوها ليك ... وانت بتفكر فى الهجره ... وانت كمان بتفكر فى الاستقرار فى مصر ..... فكر انك تغير مهنتك كصيدلي ......

[صعيدي من مونتريال]

..... فكر انك تغير مهنتك كصيدلي ......

علي النعمه الراجل ده بيكلم صح wst::