إحتياطات السلامة المنزلية .. حوادث نادرة و لكنها تحدث

[doha]

موضوع كنت كتبته زمان وحبيت اشارككم معايا فيه النهرده ..

==========

في العاده بنحرص كلنا تقريبا على مباديء السلامه في البيت .. فطبيعي اننا بنبعد الاطفال عن المصادر المشتعله او نمنعهم من اللعب باكباس الكهرباء وغيرها من المباديء الاولية للسلامه .. بس وبرغم حرصنا فاحيانا بيكون الخطر من امور تانيه صغيره اوي مكناش منتبهين ليها او مجاتش على بالنا .. ولان التصرف السريع في الغالب بيفرق كتير فكرت اني اجمع بعض المواقف البسيطه الي بالرغم ان تكرارها قد يكون نادر الا ان حدوثها ممكن .. خلينا نجمعها هنا .. نتشارك فيها ونناقشها .. ممكن تلفت نظرنا لمواطن خطر نكون غافلين عنها وواجب منها الحرص ...

وإليكم بعض من هذه المواقف ..

احدى قريباتي لديها طفل صغير كان يتناول بطاطس ( شيبس ) مع إخوته وفجأة بدأ يقوم بحركات غريبه تدل على أنه غير قادر على التنفس .. هدى الله والده في تلك اللحظه بأن أدخل اصبعه في حلق الطفل واستخرج ماكان يسدها .. ولم يكن بكل بساطه إلا جزء من الغلاف الخارجي لكيس ( الشيبس) قطعه الطفل بأسنانه ليفتح الكيس واستنشقه رغما عنه فسد مجرى التنفس ..

أعتقد للوقايه من مثل هذا يجب الحرص على عدم إعطاء الأكياس مغلقة للأطفال بل فتحها أولا كذلك إلقاء الاكياس التي لاحاجه بها مثل غلاف البسكويت بمجرد فتح العبوة bv:- ..

نفس الشيء بينطبق على غلاف الماصة في العصير .. رقيق جدا وسهل الاستنشاق .. يفضل دائما اننا احنا نفتح العصير للطفل مش نتركه هو يقوم بذلك ..

حادث آخر وقع لي شخصيا .. كنت أقوم بنفخ بالون لأبنتي .. ودائما ما أرى البائعين في الشوارع يبيعون مثل هذه الأنواع الكبيرة منتفخه وبها شيء يشبه الأرز أو الحبوب يجعلها تصدر صوت مثل ( الشخشيخه) عندما يتم هزها .. أحببت أن أقوم بهذا بنفسي .. وبكل بساطة قمت بإحضار قليل من حبات الأرز الجاف وضعتها داخل البالون قبل نفخه وبدأت بالنفخ :wub: .. طبعا كبر البالون .. ولما زدت النفخ إنفجر البالون فجأة .. وتطايرت حبات الارز الموجودة به بقوة شديده لم أتوقعها حتى أنها اصابتني في وجهي .. ولولا عناية الله لكنت :P ..

إحدى قريباتي لديها إبنة شقية جدا :sad: .. غافلت أمها وفتحت باب الفرن ووقفت عليه .. كانت النتيجة هي إنقلاب الفرن بالكامل فوق الطفلة بحيث دخلت بداخله وأغلق عليها mc(: .. ولأن الله رحيم فالحمد لله كان الفرن بارد غير مشتعل بالمرة وإلا لكانت كارثة .. وهنالك ملحوظة مشابهة قرأتها في دليل تشغيل الثلاجة .. يقولون في حالة عدم استخدام الثلاجة لفترة طويلة بمعنى تخزينها يجب ( فك ) باب الثلاجة ووضعه بجوارها بحيث لا تشكل خطرا على الاطفال فيما لو حاولوا استخدامها كلعبة .. يمكن لاقدر الله أن تحتجز طفلاً داخلها ..

قريبة لي استيقظ إبنها الصغير يبكي ولا تدري ماذا به .. وهو يحاول التقيوء لكنه لا يستطيع .. كانت حالة تسمم نتيجة تناول طعام فاسد .. التصرف الصحيح فيما لو لاقدر الله شاهدنا شيء مثل هذه الأعراض هو إعطاء الطفل كوب ماء مضاف له كمية كافية من الملح لحفزه على التقيوء ثم الإسراع به لأقرب مستشفى ..طبعا عامل الوقت في مثل هذه الحالات شديد الأهمية لأن التدهور في الحالة شديد السرعة clp:: . .

صديقة اخرى كانت تقوم بربط ( الطرحة ) على رأسها وبين شفتيها دبوس لتثبتها به .. في نفس الوقت كانت تكلم اختها .. فلم تشعر إلا وقد ابتلعت الدبوس ..

نصيحة لا تتكلمي ابدا وفي فمك اية دبابيس وانتبهي ان لا تقومي بوضع الدبابيس في فمك امام الأطفال لأي سبب .. وفي حالة لا قدر الله ابتلاع دبابيس أو أي ادوات حادة يفضل تناول شيء من القطن الطبي المعقم أو الخبز ومراقبة البراز ـ اكرمكم الله ـ للتأكد من نزوله ومن المفرتض أن ينزل في خلال 24 ساعة من إبتلاعه .. :lol:

هنالك موقف شائع برغم التحذير منه كثيرا إلا انه حدث لي .. كنت ألعب وعدت إلى المنزل وأنا اشعر بالعطش فتناولت أول زجاجة مياه معدنية صادفتني وشربت منها قليلا clp:: .. وفجأة تذكرت فقد كانت أمي منذ قليل قد استخدمت هذه الزجاجة كمعيار لضبط كمية الماء واضافت إليها مقدار من منظف السجاد .. لفظته على الفور وقامت أمي كإجراء إحترازي بإعطائي كوب من الحليب مضاف له بيضة نيئة :wub: .. كنت مجبرة طبعا على تناوله لمعادلة أثر الحامض الموجود في منظف السجاد في حالة أن شيء منه وصل إلى معدتي ..

يفضل دائما عدم وضع اي مساحيق تنظيف وماشابه في زجاجات تستخدم عادة في الشرب حتى لو تم التنبيه على الأطفال بذلك لأنه ربما ينسى كما حدث معي حيث شاركت في وضع المسحوق ثم نسيت بعد ذلك وشربت منه .. كما يتم التصرف في هذه الحالة كما ذكرت بإعطاء أي محلول قلوي مثل الحليب ..

واخيرا قرأت مرة معلومه حلوة اوي ان لاقدرا لله لو سقط الطفل على اسنانه وانكسرت السن يفضل حملها بسرعه ووضعها في كوب به قليل من الحليب او يطلب من الطفل البصاق في الكوب ووضعها محفوظه في اللعاب حتى لو كان مختلط بالدم لا مشكلة.. المهم ان يكون في وسط سائل وايضا سرعه اخذ الطفل لطبيب الاسنان لاعاده تركيب السن المكسور .. لايجب ان توضع السن في منديل او ماشابه وسرعه الذهاب بها للطبيب لانها تتلف بعد بضع ساعات .. قالوا بان اعاده تركيب السن حتى لو كان من الاسنان اللبنية وسيظهر غيره على كل حال هو امر مهم لضمان تكون الاسنان بشكل سليم وعدم خروجها مشوهة نتيجه خلعها في وقت ابكر من اللازم ..

وكفايه كده النهرده ...

والآن ياريت كل واحده تقول لنا عن أمر مفاجئ مثل هذه الأمور حدثت وكيف تم التصرف فيه لتعم الفائدة ..

حفظ الله كل الأطفال وجعل مثل هذه الأمور أشياء نقرأ عنها فقط ولا نراها أبداً ..

[MZohairy]

عند ارتفاع درجة حرارة الطفل او حتى الكبير لدرجة 39 او اكثر

موضوع الكمدات البارده اصبح قديم و غير مجدي

البديل الآن هو وضع الرأس تحت الماء البارد من الحنفيه او أخذ دش بماء غير ساخن

ستنخفض الحراره سريعا الى 37 و نصف او 38

و هي وسيله سريعه حتى يقوم مخفض الحراره (باراسيتامول او اسبرين او اسيتامينوفين) بمفعوله

وسيله ناجحه جدا و مجربه طبيا و شخصيا

[madamomomar]

الطفل الرضيع

وهذا موقف شخصى لطفلتى التى كانت تبلغ من العمر3 شهور

طبعا كلنا عارفين ان الاطفال الرضع كثيروا التقيوء والتجشوء فى هدا السن

كانت ابنتى نائمة وفجأة استيقظت من نومها مع كحة مستمرة وعدم مقدرتها على التنفس وتحول وجهها الى اللون الازرق

حملتها الى المستشفى خلال عشر دقائق (وده من حسن حظى ان المستشفى جنب البيت ) تخيلوا ان الحل كان ايه

الدكتور قلبها على وشها وخبط على ظهرها وبعدين علقها من رجلها مع استمرار الخبط على ظهرها وكل ده كان بسبب نومها فى مستوى افقى

حصل ارتجاع والدكتور ساعتها اكد انها لازم تنام مرفوع راسها بزاويه 30 درجة لان مثل هذه الحالات تسبب الموت المفاجىء للاطفال

اقولكم ايه الحمد لله ربنا سترها ومن ساعتها اتعلمت درس عمرى ما اقدر انساه

موقف تانى .... حصل لطفل اعرفه

كان بيبلعب جنب مامته وهيه بتعمل البسلة ... واخد حبة بسلة وحطها فى انفه ومش عارف يخرجها

طبعا الحل هو ان الطفل يشم اى شىء يثير الجيوب الانفيه عشان يعطس وحبة البسلة تخرج

والحمد لله ربنا سترها وخرجت ................ clp:: طبعا المشكله هنا مش فى اهمال مامته اكيد المشكله فى حبة البسلة :wub:

ربنا يسترها معانا ومع اولادنا واولاد المسلمين اجمعين

[محمد عبدالعزيز]

من ضمن المحاذير اللى قرأت عنها بالنسبة للأطفال-والحمد لله لم تحدث معى حتى الآن- هو عدم ترك الأكياس البلاستيك فى متناول يد الأطفال, لأن ممكن الطفل لا قدر الله يلبس الكيس فى دماغه ومايعرفش يطلعه ويحصل له اختناق.

[MZohairy]

اضافة عسل النحل لغذاء الأطفال اقل من سنه مضر لصحة الأطفال

افادني بذلك اكثر من طبيب اطفال استشاري في اكثر من بلد

[wagdi]

عند ارتفاع درجة حرارة الطفل او حتى الكبير لدرجة 39 او اكثر

موضوع الكمدات البارده اصبح قديم و غير مجدي

البديل الآن هو وضع الرأس تحت الماء البارد من الحنفيه او أخذ دش بماء غير ساخن

ستنخفض الحراره سريعا الى 37 و نصف او 38

و هي وسيله سريعه حتى يقوم مخفض الحراره (باراسيتامول او اسبرين او اسيتامينوفين) بمفعوله

وسيله ناجحه جدا و مجربه طبيا و شخصيا

ماء فاتر... أقل من حرارة الجسم درجتين تلاتة بالكتير... يعني في حدود ال37 درجة... تحطه في حمام أو كمادات... وتشربه مية أو سوائل كتيير.... لأن الحرارة في حد ذاتها مافيهاش أي خطورة... إلا لو زادت عن 42... إحنا بنحاول ننزل الحرارة علشان نريح الطفل... فلما تحطه في مياه باردة مرة واحدة أوعيته الدموية بتنكمش ويبدأ يرتعش... وده من ناحية حيأخر نزول الحرارة ومن ناحية تانية مش بيريح الطفل بل بيتعبه أكتر...

النقطة التانية هي الأسبرين... بلاش منه علشان بيخافوا من حاجة إسمها Reye's syndrome ... وده تقريباً مرض عصبي ممكن الطفل يتعرض له بعد أدوار الأنفلونزا... والأسبرين ممكن يسببه في حالات نادرة مع وجود عدوى فيروسية...

أنا طبعاً مش دكتور ... بس الكلام ده أتقال لنا مليون مرة من كذا دكتور أطفال هنا في كندا...

العواف ...

[om marawan]

موضوع العسل مظبوط خصوصا انه بيسبب عند بعض الاطفال نوع من انواع التسمم اذا اخده قبل سن سنة

وكمان اللبن الحليب لا يفضل قبل سن سنة لانه بيساعد فى ظهور انواع من الحساسية اذا كان عند الطفل استعداد لها

بالنسبة بقا للاطفال اللى ساعات يناموا وهم بياكلوا مثلا

لازم نتاكد ان الطفل مافيش اكل باقى فى بقه حتى لو سنه كبير

لانه أذكر حادثة الله اكبر لطفل سن اربع سنوات او حاجة أخذ بونبوناية وراح فى النوم قبل مايبلعها وماحدش انتبه للموضوع ده غير لما حصلت مشكلة

ربنا يسلم يارب

ويحفظ اولادنا جميعا

[بنت الشاطئ1]

بالنسبة لشرب الماء ..حتى لا يشرب الطفل من سوائل خطر لازم نعود الطفل ان امه او ابيه اللى يعطوه كوب الماء او قبل ما يشرب لازم يسأل امه هل اشرب من هذا الكوب وهل هذا الكوب نظيف ام لا...وحتى لو كان نظيف قوليله لأ انا هجيبلك كوب نظيف ..حتى يتعود انه مش من اى كوب يشرب

كمان لا تترك الطفل يأكل العنب وهو لوحده لأن مرة عنبة وقفت فى زور طفل والحل هو قلب الطفل على ظهره والضغط على صدره و خبط ظهره بقوة

[جيمي]

اسبوسيد اطفال حبوب مضغ ..... طعمه الى حد ما كويس ... ممكن الطفل ياكل العلبه كلها ... ويحصل له تسمم

والعجيب ان والدة الطفل هيه اللى حببته فيه لما قالتله كل يا حبيبي ده طعمه جميل ... علشان تخف وتبقي شاطر .... اهو سمع الكلام وكل العلبه كلها :lol: ..... المفروض نفهم الاطفال حقيقة كل حاجه ومانعتبرهمش كائنات غبيه

[MoHaMMeD EgYpT]

اسبوسيد اطفال حبوب مضغ ..... طعمه الى حد ما كويس ... ممكن الطفل ياكل العلبه كلها ... ويحصل له تسمم

والعجيب ان والدة الطفل هيه اللى حببته فيه لما قالتله كل يا حبيبي ده طعمه جميل ... علشان تخف وتبقي شاطر .... اهو سمع الكلام وكل العلبه كلها :lol: ..... المفروض نفهم الاطفال حقيقة كل حاجه ومانعتبرهمش كائنات غبيه

كلام حضرتك تمام :lol: و الحكاية دي حصلت مع اخواتي الصغار زمان قبل كده بس كان الدواء فاتح للشهية و اسمه ديجستين :lol:

[doudy]

عند ارتفاع درجة حرارة الطفل او حتى الكبير لدرجة 39 او اكثر

موضوع الكمدات البارده اصبح قديم و غير مجدي

البديل الآن هو وضع الرأس تحت الماء البارد من الحنفيه او أخذ دش بماء غير ساخن

ستنخفض الحراره سريعا الى 37 و نصف او 38

و هي وسيله سريعه حتى يقوم مخفض الحراره (باراسيتامول او اسبرين او اسيتامينوفين) بمفعوله

وسيله ناجحه جدا و مجربه طبيا و شخصيا

معلومة صحيحة يا استاذ زوهيرى

او ممكن كمان نضع ارجل الطفل حتى ركبتيه تحت ماء الحنفية البارد

كان دكتور ولادى بيقولى الطريقة دى كمان

لان استخدام ماء بارد من التلاجة لعمل الكمادات

بيكتم الحرارة داخل الراس و ممكن تودى للتاثير على المخ

[doudy]

موقف تانى .... حصل لطفل اعرفه

كان بيبلعب جنب مامته وهيه بتعمل البسلة ... واخد حبة بسلة وحطها فى انفه ومش عارف يخرجها

طبعا الحل هو ان الطفل يشم اى شىء يثير الجيوب الانفيه عشان يعطس وحبة البسلة تخرج

والحمد لله ربنا سترها وخرجت ................ :lol: طبعا المشكله هنا مش فى اهمال مامته اكيد المشكله فى حبة البسلة :lol:

ربنا يسترها معانا ومع اولادنا واولاد المسلمين اجمعين

فعلا يا مدام ام عمر

انا ابنى عبد الرحمن لما كان عنده 4 سنين

حط فى انفه بلية صغيرة

و فعلا شممته فلفل اسود عشان يعطس و الحمد لله عطس و خرجت البلية

[doudy]

موضوع العسل مظبوط خصوصا انه بيسبب عند بعض الاطفال نوع من انواع التسمم اذا اخده قبل سن سنة

وكمان اللبن الحليب لا يفضل قبل سن سنة لانه بيساعد فى ظهور انواع من الحساسية اذا كان عند الطفل استعداد لها

ويحفظ اولادنا جميعا

طيب انا عمر ابنى كان توقف عن الرضاعة الطبيعية فى سن 8 شهور

و كنت بديله لبن حليب فى الببرونة و الدكتور هوة اللى نصحنى بكدة

و كان بياكل الزبادى بالعسل النحل و الحمد لله ما حصلش اى مشكلة

الحمد لله على كل حال و ربنا يسترها معانا جميعا :lol:

[elshafey]

عند ارتفاع درجة حرارة الطفل او حتى الكبير لدرجة 39 او اكثر

موضوع الكمدات البارده اصبح قديم و غير مجدي

البديل الآن هو وضع الرأس تحت الماء البارد من الحنفيه او أخذ دش بماء غير ساخن

ستنخفض الحراره سريعا الى 37 و نصف او 38

و هي وسيله سريعه حتى يقوم مخفض الحراره (باراسيتامول او اسبرين او اسيتامينوفين) بمفعوله

وسيله ناجحه جدا و مجربه طبيا و شخصيا

حذار ثم حذار من الحرارة المرتفعة ......

سأحكي لكم عن موقف حدث مع إبني منذ ما يقرب من عام

ارتفعت حرارته ل 38 فقامت زوجتي بإعطائه خافض للحرارة ثم وضعناه تحت الدش وإنخفضت الحرارة ... ثم أخذناه للطبيب فقد كان موعده مع الطبيب في نفس اليوم

ثم في أثناء ركوبنا السيارة نظرت للخلف لكي أخبره بربط الحزام فوجدته في الوضع التالي حفظ الله أيناءنا من هذا الوضع

عينيه مقلوبة ... متشنج ... وتخرج من فمه رغاوي

فإنطلقت بالسيارة إلي مستشفي بجوار المنزل كالمجنون ولا أعرف كيف قدتها صراحة

المهم

وصلت المستشفي وسبقتني به زوجتي للإستقبال

ودخلت خلفها وأنا متوقع أن اتلقي نبأ وفاته (بعد الشر) وال

والحمد لله طمأنني الطبيب بأن حرارته إرتفعت داخليا

إلي 41 درجة وأعطاه حقنة فولتارين وإنخفضت الحرارة

وبعد أن هدأت أخبرني الطبيب بأن ما حدث يسمي التشنج الحراري والذي يحدث لبعض الأطفال عند وصول درجة الحرارة إلي ال 40

وان المنظر البشع الذي كان عليه كان سينتهي خلال دقائق بدون اي مضاعفات

رجاء عدم الاعتماد علي قياس حرارة الطفل من فمه

رجاء قياسها من تحت الإبط أو من فتحة الشرج وهي الطريقة التي أراها أفضل

ورجاء الاحتفاظ أيضا بلبوس خافض للحرراة كالفولتارين مثلا تحسبا لأي ظرف طارئ

عافانا الله وأطفالنا

[قلب ابيض]

موقف تانى .... حصل لطفل اعرفه

كان بيبلعب جنب مامته وهيه بتعمل البسلة ... واخد حبة بسلة وحطها فى انفه ومش عارف يخرجها

طبعا الحل هو ان الطفل يشم اى شىء يثير الجيوب الانفيه عشان يعطس وحبة البسلة تخرج

والحمد لله ربنا سترها وخرجت ................ B) طبعا المشكله هنا مش فى اهمال مامته اكيد المشكله فى حبة البسلة :hearts:

ربنا يسترها معانا ومع اولادنا واولاد المسلمين اجمعين

الموقف ده حصل مع الفارق ان الولد ما قالش لمامته كان عمره حوالى 4 سنين ومامته ما خدتش بالها من حبه الفول اللى حطها فى فتحة انفه الا لما تقريبا ورمت

الطريف فى الحكايه اللى مش طريفه دى ان حبه الفول لما طلعها له الدكتور كانت مزرعه :Exclam: :ph34r:

[pink rose]

اكتر حاجه بترعبني في الدنيا الحرارة

حصل موقف لمريم الله يحفظها و يراعها

كنت في مصر و راجعين السعودية وخلاص معاد الطيارة الساعه 2 الضهر صحيت الصبح لقيتها حرارتها 39 كده بلا اي مقدمات

طبعا فيفادول معايا على طول اديتها منه الحرارة نزلت شوية و رجعت عليت تاني قعدتها في مايا من الحنفية الجزء السفلي من الجسم لاني ما باحبش حوار احط راسها او جسمها كله و هي سخنة تحت المايا انا نفسي ما اقدرش استحمل كده

المهم الحمدلله الحرارة نزلت و ركبنا الطيارة وفي الطيارة طبعا كنت متابعة و لبوس فولتارين كمان عشان في الطيارة اعمل ايه لو ارتفعت الحرارة فا كنت بامن نفسي لحد ما نوصل

اول ما نزلنا مطار الرياض طلعنا بيها على مستشفى و كشفنا و اخدت دوا و خلاص الحرارة رجعت ل 37 و اطمنا عليها و قولنا نقضي الليلة في الرياض و تاني يوم نطلع على القصيم

بس الحمدلله ربنا الهمنا اننا نبات في اوتيل قريب من المستشفى

و اصحى الفجر كده على صوت غريب جنبي يالهوي دي مريم باحط ايدي عليها اتلسعت انا ما اعرفش احنا نزلنا من الاوتيل ازاي و رحنا المستشفى ازاي المهم قاسوا الحرارة لقيوها 41 و كام شرطة كده

مسكوا مريم قالعوها كل هدومها و مخدات تلج تحت راسها و قطن متلج على جسمها كله و بنتي يا حبيبتي تتنفض كده و انا خلاص كنت حاسة انها راحت مني خلاص و انهيار بقى لدرجة اني وقعت على الارض من صعوبة المنظر

فيييييييييين على ما الحرارة نزلت كانت روحي طلعت

و الحمدلله عدت على خير

من يومها الحرارة دي ما انامش ابدا طول ما مريم سخنة باطبق بالتلات ايام لو عندها حرارة من اللي مش بتنزل دي

و ربنا يستر على ولادنا يا رب و يحفظهم لنا و يبارك فيهم اللهم آمين

تم تعديل 18 أكتوبر 2009 بواسطة remo

[om marawan]

اكتر حاجه بترعبني في الدنيا الحرارة

حصل موقف لمريم الله يحفظها و يراعها

مسكوا مريم قالعوها كل هدومها و مخدات تلج تحت راسها و قطن متلج على جسمها كله و بنتي يا حبيبتي تتنفض كده و انا خلاص كنت حاسة انها راحت مني خلاص و انهيار بقى لدرجة اني وقعت على الارض من صعوبة المنظر

فيييييييييين على ما الحرارة نزلت كانت روحي طلعت

و الحمدلله عدت على خير

من يومها الحرارة دي ما انامش ابدا طول ما مريم سخنة باطبق بالتلات ايام لو عندها حرارة من اللي مش بتنزل دي

و ربنا يستر على ولادنا يا رب و يحفظهم لنا و يبارك فيهم اللهم آمين

اللهم ااااااااااامين

الف سلامة عليها

هاقول لحضرتك على حاجة اهم حاجة فى الحرارة زى ماعملتم كده تتحط تحت المية قبل مانزل للدكتور او اى حاجة

ونجمد قلبنا كده

وينزل الطفل فى حمام مية بالتدريج من ايديه ورجليه وبعدين كل جسمه

مايطلعش من المية غير لما نقيس الحرارة بالترمومتر نلاقيها نزلت بدرجة معقولة بلاش اقول تنزل ل 37 ولا حاجة ولو ان ده طبعا احسن

اول ما يطلع ياخد لبوس حرارة لان اللبوس اسرع ولكنه طبعا بياخد الى حد ما وقت

مهم كمان ان الطفل فى الوقت ده مايلبسش تقيل لان ساعات الحرارة بتحسس الطفل انه بردان نقوم احنا نغطيه بتقيل وده بيقلل سرعة نزول الحرارة

الحاجة الاخيرة اننا نحاول نتابع الحرارة لان فيه حد معين لما الحرارة بتوصل له بتنزل بصعوبة اكبر

يعنى نقدر نتابع بنوعين مختلفين من خافض الحرارة بالتبادل نوع منهم كل اربع ساعات

والف سلامة ربنا يحفظهم يارب من كل سوء

[اغابي]

الله يسترها

[اغابي]

اكتر حاجه بترعبني في الدنيا الحرارة

حصل موقف لمريم الله يحفظها و يراعها

مسكوا مريم قالعوها كل هدومها و مخدات تلج تحت راسها و قطن متلج على جسمها كله و بنتي يا حبيبتي تتنفض كده و انا خلاص كنت حاسة انها راحت مني خلاص و انهيار بقى لدرجة اني وقعت على الارض من صعوبة المنظر

فيييييييييين على ما الحرارة نزلت كانت روحي طلعت

و الحمدلله عدت على خير

من يومها الحرارة دي ما انامش ابدا طول ما مريم سخنة باطبق بالتلات ايام لو عندها حرارة من اللي مش بتنزل دي

و ربنا يستر على ولادنا يا رب و يحفظهم لنا و يبارك فيهم اللهم آمين

الف سلامة وما تشوفين شر ابدا

[الباشمهندس ياسر]

احيانا بتحصل حريقة بسيطة ف المطبخ و خصوصا اثناء القلي

لاختلاط الزيت من المقلاة بنار الشعلة

ممنوع منعا باتا استخدام الماء لاطفاء هذه الحريقة

و لكن ينصح باستخدام غطاء معدن ل كمر النار بحيث يمنع اللهواء الجوي من الانتقال فينطفيء الحريق تلقائيا

و من المفترض الا يخلو اي منزل علي الاطلاق من طفاية حريق زي بتاعت السيارة

***********************************************

كمان موضع المقبس الكهربائ ( البريزة )

احيانا يقوم الاطفال بوضع ابره او مسمار داخ البريزة الكهربائية مما ينتج عنها كوارث و العياذ بالله

لذا ينصح دائما بوضع البريزة الكهربائية علي ارتفاعات من الارضية

و ف حالة وجودها بالقرب من الارض ينصح دائما باغلاقها و لو حتي بشريط لاصق ( شيكرتون )

*******************************************

احيانا تقوم الام باستخدام المكواة الكهربائية و تنسي ان تقوم برفع الكابل الكهربائي

فيقوم الطفل بشد هذا الكابل ... مما ينتج عنه سقوط المكواة ع الارض

و ربما سقطت فوق راس الطفل و العياذ بالله

و ربما سقطت بعيدة فسببت له حالة من الذعر

و هكذا

**********************

انتبهوا

دقائق من التفكير السليم تحميك و اسرتك من الكثيييييييير