الاقامة

[شريف حمدي]

تحياتي لكم جميعا

هل المسئول عن الاقامة هو الكفيل ام العامل

وفلوس الاقامة من يدفعها الكفيل ام العامل

وفي حالة رفض الكفيل دفع تجديد الاقامة ولم يقم العامل بتجديد الاقامة فهل من ضرر للعامل ام للكفيل؟؟

وشكرا

[أبو اياد المصرى]

اعتقد ان معظم العقود التى تبرم بتهتم بمواعيد الدوام وبدل الإقامة والراتب أما بالنسبة لتجديد رسوم الإقامة فجرت العادة على أن يتحملها العامل ولكن إذا كان هناك اتفاق مسبق على تحمل الكفيل لها ومذكور فى العقد هذا فهو يلتزم قانوناً بها

[doha]

هو قانونا الاقامه بكل تكاليفها على صاحب العمل لكن فعليا هي على العامل ..

لو مقمتش باستخراج الاقامه او بمعنى ادق دفع تكاليف استخراجها الكفيل ممكن ميطلعهاش وهو مش خسران .. هتدخل في فترة الغرامه هو الملزم يدفعها مش انت لكن برضه هو لا هيدفع ولا هيطلع .. في الحاله دي هتلاقي نفسك محبوس في البيت متقدرش تروح يمين ولا شمال بدون اقامه يعني بدون بطاقة اذا ممكن يلقى القبض عليك في اي لحظه ده غير ان مش هتقدر تعمل اي شيء يحتاج اثبات هوية زي فتح حساب في البنك مثلا او تقديم لابناء في المدرسة او حتى تسجيل خط تليفون .. في النهايه مش هتلاقي امامك غير تدفع له فلوس الاقامه والغرامه وممكن فوقهم بوسه كمان عشان يخلص ويخلص ..

على كل حال لو صاحب العمل مش راضي يطلع لك اقامه متتعبش نفسك .. اشتري دماغك وطلعها انت على حسابك .. مش هتقدر تجبره على استخراجها وفي نفس الوقت العرف الدارج انها على العامل مش صاحب العمل ...

[MoHaMMeD EgYpT]

الاقامة علي العامل مش الكفيل

هي ممكن تكون علي الكفيل بس ده بالنسبة مثلا للجاي يشتغل في شركة كبيرة او بيشغل منصب في شركة محترمة اما بالنسبة للكفالة العادية فهي علي العامل الا اذا كان العامل متفق مع الكفيل

و لو العامل ما جددش الاقامة يبقي البلد هتقولك مع السلامة و هتروحك

[raedraed]

قانون العمل السعودي - المادة رقم أربعين

1- يتحمل صاحب العمل رسوم استقدام العامل غير السعوديـ ورسوم الإقامة ورخصة العمل وتجديدهما وما يترتب على تأخير ذلك من غرامات ورسوم تغيير المهنة والخروج والعودة وتذكرة عودة العامل إلى موطنه بعد انتهاء العلاقة بين الطرفين

----

وفي حالة رفضه ، تروح بكل بساطة تشتكيه في مكتب العمل وقبل كل ده تستشير المكتب العمالي بالقنصلية المصرية

تم تعديل 18 أكتوبر 2009 بواسطة raedraed

[se_ Elsyed]

أحد الزملاء باعت سؤال بيقول

أشعر بألام في الجانب الأيمن السُفلي من بطني ... فأرجو من أصحاب الخبرة أن يدلوني عن سبب المشكلة ..

أنا بقى سي السيد العضو العامل في هذا المنتدى المحترم ممكن اقول له لك ثقه وفخار إن ده سببه مشاكل كامنه لديه في قاع العين وبالتالي عليه انه يعمل اشعه على الاذن الوسطى عشان يشوف رُكبته اخبارها ايه بدل ما الامور تتطور وجلده يقع ...

فهمتوني ؟

لو سمحتوا يا جماعه من غير إساءه ...

هو ليه اللي مش عارف ما يسكتش وما يفتيش بغير علم ويودي الناس في داهيه خصوصاً في الامور المحسومة قانونياُ بدل ما نعمل زي الدبه اللي بتقتل صاحبها من كتر الحب مع إنها كانت عاوزه تساعده ..

أصلها شافته نايم تعبان وجت دبانه غلسه وقفت على وشه فجت بهدوء تهشها .. ولانها تقيلة ودبدوبه ... فراحت مطبقه له وشه فموتت الدبانه وموتت صاحبها بالمره

وده امر لاحظته على فكره في مواضيع كتيرة تحتوي على أمور قانونيه كتيرة مش بس الموضوع ده

وإليكم ما قيل من الزملاء اللي كان قصدهم يساعدوا الراجل .. لكنهم كانوا على وشك إنهم يموتوه او يمكن موتوه بالفعل وزمانه ممكن يكون استسلم وعرف غن تكاليف الاقامة على العامل

أما بالنسبة لتجديد رسوم الإقامة فجرت العادة على أن يتحملها العامل ولكن إذا كان هناك اتفاق مسبق على تحمل الكفيل لها ومذكور فى العقد هذا فهو يلتزم قانوناً بها

لا مؤخذه يا ابو إياد ... كلامك مش صحيح يا أخي بالمره

هو قانونا الاقامه بكل تكاليفها على صاحب العمل لكن فعليا هي على العامل

مش هتقدر تجبره على استخراجها وفي نفس الوقت العرف الدارج انها على العامل مش صاحب العمل

لا مؤخذه يا مدام ضُحى

ده كلام يموت الدبه نفسها واللي يتشدد لها

لا في عُرف دارج ولا عُرف ديك بيقول كده حتى

ولإننا في بحبوحه من العيش وكل اللي معدي جنب الموضوع بيفتي

فمحمد اللي عايش في الكويت وعنده 17 سنه وده مش عيب يا محمد على فكره انا باحترمك والله

لكن اشمعنى انت ... إديها يا عم ما ترحمهاش

الاقامة علي العامل مش الكفيل

لا حول ولا قوة الا بالله العلي العظيم

قانون العمل السعودي - المادة رقم أربعين

1- يتحمل صاحب العمل رسوم استقدام العامل غير السعوديـ ورسوم الإقامة ورخصة العمل وتجديدهما وما يترتب على تأخير ذلك من غرامات ورسوم تغيير المهنة والخروج والعودة وتذكرة عودة العامل إلى موطنه بعد انتهاء العلاقة بين الطرفين

----

وفي حالة رفضه ، تروح بكل بساطة تشتكيه في مكتب العمل وقبل كل ده تستشير المكتب العمالي بالقنصلية المصرية

هو ده الكلام

ولو ثُبت على اي كفيل .. او كفولة ... أو كنملة مش فيل إنه بيحمل العامل تكاليف الاقامة او التأمين الطبي ... بيروح في داهيه .. لكن اللي عنده قلب وشجاعه إنه يشتكي ويطالب بحقه

مره أخرى بجديه يا جماعه من فضلكم

من قال لا أعلم فقد أفتى ... أنا شخصياً باعمل كده في الأمور القانونية والدينية بالذات

إنما أتفهلو - جايه من الفهلوه - وامسك البايب وأقول جرت العادة وجرا الماء ... ده اكبر غلط

كلامي ممكن يكون قاسي وصادم

لكن أنا لاحظت فعلاً في مواضيع كتيرة جداً هذا السلوك اللي بيودي في داهيه من البعض ...

إزاي ؟

إزاي موضوع يعدي من تحت إيده من غير ما يزود عدد مداخلاته وتتحسب له بونطه ويُدلي بجردله ويعمل منظر ...

تصبحو على خير

[doha]

الي اعرفه ان والدتي طبيبة متعاقده مع وزارة الصحه .. يعني شغالة في حكومه .. كفيلها الحكوووومة ..

والي اعرفه برضه ان والدتي هي الي بتدفع تكاليف استخراج اقامتها من الالف للياء ..

تفتكر ان مكانش العرف ان الطبيب هو الي يدفع يبقى والدتي بتدفع ليه ؟ غاوية بعزقة ولا بتبقشش على الحكومة ؟

بعدين حارق دمك ومعصب ليه ياحج سين سين ..وعمال تتريق وتقول قلنا وبنفتي وعمالين نشارك لمجرد المشاركه .. على ايه ده كله ؟ قال على راي المثل .. قالوا الجمل طلع النخله .. قال آدي الجمل وآدي النخله ..

دلوقت صاحب السؤال بعد فترة باذن الله لما ربنا يكرمه والكفيل يطلع له الاقامة يقولنا .. ياترى صاحب العمل تحمل تكاليفها هو من نفسه كده ولا صحيح عرف يلوي دراعه ويجبره يطلعهاله؟.. يقولنا .. مين فيهم غصب التاني يدفع .. واهو ساعتها ابقى اتنورت وعرفت معلومه جديده ومش بعيد انصح والدتي تروح مكتب العمل تبلغ على كفيلها هي كمان بالمرة ..

قلتها وهقولها للمرة المليون بعد الالف .. ان مكانش كفيلك يطلع لك اقامتك على حسابه طواعية وبمزاجه فمفيش قوة تقدر تجبره على انه يدفع شيء وان كنت عاوز تشتكيه في مكتب العمل روح اشتكيه بس معليش مش هقولك ابقى قابلني عشان انا مشغولة اليومين دول بلم فلوس المشاركات الي بحصلها من المنتدى بالهبل انتم عارفين بيحسبوا لنا الحته بجنيه .. على كل حال ممكن الحج سين سين يقوم عني بالواجب دي ويبقى يستقبل المهنئين الحاصلين على حقوقهم واقاماتهم كاملة على بريد البرنامج ..

ها مقلتليش ياحج .. ليه الحاجة والدتي بتدفع تكاليف اقامتها ؟ وتنصحها بايه عشان تجبر الكفيل هو يدفع لها الاقامة ؟

[se_ Elsyed]

ها مقلتليش ياحج .. ليه الحاجة والدتي بتدفع تكاليف اقامتها ؟ وتنصحها بايه عشان تجبر الكفيل هو يدفع لها الاقامة ؟

الحاجه والدتك إنضحك عليها وقبلت بذلك ........ أنصحها إن شاء الله وبالله التوفيق إنها تُثبت ذلك وتشتكي في مكتب العمل ووزارة الصحة .. والفيصل بين الجميع هو قانون العمل مش قانون ساكسونيا ..

ان مكانش كفيلك يطلع لك اقامتك على حسابه طواعية وبمزاجه فمفيش قوة تقدر تجبره على انه يدفع شيء

برضوا ده نوع من انواع الكبر في الحق وتأكيد على شيء لا محل له من الأعراب ...... وكإن العملية سايبة ومافيش حاجه إسمها قانون هنا .....

لأ في قوه تجبره يا ضُحى وهي قوة قانون العمل اللي يسري على الجميع

وخدي المفاجآة اللي يمكن ما تعرفيهاش ...

حتى لو أتفق الطرفان على ما يخالف قانون العمل .. فلا يعتد بهذا الأتفاق ... تخيلي ؟ يعني ما فيش هنا ابوها راضي وأنا راضي .... ده في حالات كثيرة اللهم إلا لو كان موضوع يتعلق بعمولات أو نسب مبيعات فللطرفان مطلق الحرية يتفقوا على ما يشاءون ... أما مثلاً طرفين يتفقوا على إن الموظف يتحمل تكاليف إقامته وتكاليف التأمين الطبي .. أو إن الموظف يشتغل عند الكفيل لله وللوطن من غير مرتب ولا نهاية خدمه ...

او

خُدي برضوا المفاجآة ...

الكفلاء اللي بيتنصحوا .. وبيدفعوا للموظفين نهاية الخدمة شهرياً طازه بطازه عشان الموظف ما يكملش 5 سنين ويدخل في الشريحة التانية الأعلى ....حتى لو الموظف قام بالتوقيع على ذلك شهرياً ... وجه زي الشاطر أشتكى في نهاية خدمته ... هاياخدها تاني كاملةً غصب عن عين الكفيل اللي خالف القانون لإن نهاية الخدمة من إسمها لا تُدفع إلا غي نهاية الخدمة ..

كل دي إتفاقات باطلة ويبلها الكفيل ويشرب ميتها ..

أي خدمة ...

أقول لك على حاجات تاني ولا كفاية كده النهاردة ؟

واهو ساعتها ابقى اتنورت وعرفت معلومه جديده ومش بعيد انصح والدتي تروح مكتب العمل تبلغ على كفيلها هي كمان بالمرة ..

أقسم بالله العلي العظيم ...

أعرف ممرضة فلبينية لا حول لها ولا قوة ..... على كفالة أمير سمو ملكي وذو منصب مش عاوز أقول لك في وزارة الداخلية عشان ما تتخضيش .... وهو من الدرجة الأولى على فكره ....... خرجوا لها نهائي بدون مستحقات وذهبت واشتكت الأمير بمكتب العمل .. وما هي إلا أيام واخدت حقها تالت ومتلت .... والله على ما اقول شهيد ...

وغيرها من الحالات كثيرة ومنهم أخويا شقيقي إبن أمي وأبويا اللي خد حقه ونقل كفالة غصب عن عين الكفيل لإننا إتبعنا الطريق السليم والقانوني اللي ممكن يكون طويل .. لكن .. ما ضاع حق وراءه مطالب . بس يكون اللي ورا الحق فاهم مش بيفتي بغير علم . ....

وإذا كنا هاننتظر الجمل يطلع النخلة من نفسه وإحنا واقفين نتفرج ... يبقى ... موووت يا ..... جمل

وبعدين هانروح بعيد ليه ....

اللي عايز يفتي بغير عِلم ... يتفضل شاي .. قصدي يتفضل يفتي .. بس يتحمل وزر الناس اللي هايوديهم في داهيه من غير علم ومن غير ما تكون تلك الفتاوى مجال تخصصه .. وبيفتي لمجرد إنه سمع أو قيل وقال او إنه شاف حاله معديه في الشارع حصل لها كده فبقى ده عُرف وقانون وناموس ... وبرضوا سيظل للنهاية " من أفتى بغير علم .. فليتبوء مكانه في النار " مش شرط بالمناسبة إفتى دينيه ...

بالمناسبة ...

أنا لي أكتر من 10 سنوات هنا ولم أرى أو أسمع عن ناس بتتحمل تكاليف إقامتها إلا العمالة السائبة اللي بيسموا أنفسهم فيزا حُره .. أو اللي بيعرف إن ده غلط وبيبقبل وغاوي بعزقه .. فهو حر وفلوسه كتيره ...

[حسين امبابي]

بسم الله الرحمن الرحيم

جاء بنصوص نظام العمل السعودي الصادر بالمرسوم الملكي رقم ( م/51 ) وتاريخ 23/8/1426 هـ

المادة الثامنة : يبطل كل شرط يخالف احكام هذا النظام ويبطل كل أبراء أو مصالحة عن الحقوق الناشئة للعامل بموجب هذا النظام اثناء سريان عقد العمل مالم يكن اكثر فائدة للعامل .

الشرح : تعتبر تلك المادة هي دستور العامل في مواجهة سلطات صاحب العمل حال اساءة استخدامها لأنها قررت وبما لا يدع مجالا للشك أو الأجتهاد بطلان اي تصرف ينتقص من حقوق العامل المقررة بموجب نظام العمل

المادة العشرون : لا يجوز لصاحب العمل او العامل أن يقوم بعمل من شأنه اساءة استعمال احكام هذا النظام او القرارات او اللوائح الصادرة تنفيذا لأحكامه كما لا يجوز لأي منهما القيام بعمل من شأنه الضغط علي حرية الاخر .... لتحقيق مصلحة أو .......مما يتنافي مع حرية العمل وأختصاص الجهة المختصة بتسوية الخلافات .

الشرح : هذا المادة يندرج تحتها عدد لا حصر له من التصرفات التي تجبر العامل علي الانتقاص من حقوقه بفعل صاحب العمل تحديدا

المادة الاربعون : يتحمل صاحب العمل رسوم استقدام العامل غير السعودي ورسوم الاقامة ورخصة العمل وتجديدهما وما يترتب علي تأخير ذلك من غرامات وريوم تغيير المهنة ....

الشرح : للاسف لا يحتاج لشرح :wub:

وفي أسء الحالات التي قد يتعرض لها العامل وهي تحايل صاحب العمل وعدم اعطائه عقد فيجوز للعامل اثبات العقد بكافة طرق الاثبات ومنها

أي مكاتبات أو اوراق رسمية او عرفية تثبت علاقة العمل وكذلك شهادة الشهود

أرجو أن أكون قد وفيت الأجابة بقدر السؤال ويسعدني أن اتلقي استشارتكم العمالية بالمنتدي ودمتم بخير

أخوكم / حسين امبابي مسشتار قانوني بالرياض

[se_ Elsyed]

شكراً يا أستاذ حسين على مداخلتك اللي فيها الزبدة

وإذا حضر الماء .. بطل التيمم

[doha]

انا مش عاوزه اقاوح واقلك ان الحالات الي حضرتك ذكرتها كلها ياواحد مخرج نهائي ( الممرضه ) او واحد عاوز يترك الكفيل اساسا وبايعها ( اخو حضرتك ) لكن هات لي واحد باقي على شغله ويقدر يفتح بقه مع كفيله ويقوله غصب عنك تجدد لي .. مفش الكلام ده

من اول مداخله وانا قايله ان قانونا هي على صاحب العمل يعني عارفه وقارية قانون العمل وقرأت من بدري البند الي بيقول التكاليف على مين .. لكن برضه قلت عرفا مش هتقدر تجبره ولا يمكن هيعمل الكفاله ان لم يكن هو عاوز يعملها ..

على كل حال انا هوجع دماغك ودماغي ليه .. احنا مش قلنا الجمل طلع النخله ؟ نستنى ونشوف ..

[dongol]

في الامارات رسوم الاقامة علي الكفيل و دي مفيهاش مناقشه يعني الكفيل بيدفعها زي ورقة البوسطة

و كفاية ان اي حد يبلغ عنه في العمل و العمال انه اجبر العامل علي دفع الاقامه علشان يبهدله الكفيل و اللي جاب الكفيل

وبصراحة مش عارف ايه الوضع في السعودية علشان ما كونش بفتي بدون علم :lol:

[حسين امبابي]

يشرفني أخي / سي السيد ان نكون أصدقاء وشكراً لأطرائك المحترم

وبالفعل انا كنت من اشد المعجبين بحماسك وحميتك علي حقوق بني وطنا مصر في الغربة

تقبل أسمي أيات الأحترام لشخصك الموقر

وبصفتك المشرف العام فأكرر عرض خدماتي بتقديم الأستشارة القانونية مجانا لأعضاء المنتدي

ودمتم بخير

[OMmariem]

السلام عليكم ورحمة الله وبركاته

طب لو الشركة فى العقد بتقول انها بتدى الاقامةللزوج وزوجته واول طفلين ..هل معنى كده انها بتتكفل بكل مصاريف الاقامة وتجديدها

وهل مدة الاقامة بتكون بمدة العقد الزمنيه ؟؟ طب لو العقد مفتوح اقصد يجدد تلقائيا يقى الاقامة تندفع سنويا من قبل الشركة

شكرا

[شريف حمدي]

هو قانونا الاقامه بكل تكاليفها على صاحب العمل لكن فعليا هي على العامل ..

لو مقمتش باستخراج الاقامه او بمعنى ادق دفع تكاليف استخراجها الكفيل ممكن ميطلعهاش وهو مش خسران .. هتدخل في فترة الغرامه هو الملزم يدفعها مش انت لكن برضه هو لا هيدفع ولا هيطلع .. في الحاله دي هتلاقي نفسك محبوس في البيت متقدرش تروح يمين ولا شمال بدون اقامه يعني بدون بطاقة اذا ممكن يلقى القبض عليك في اي لحظه ده غير ان مش هتقدر تعمل اي شيء يحتاج اثبات هوية زي فتح حساب في البنك مثلا او تقديم لابناء في المدرسة او حتى تسجيل خط تليفون .. في النهايه مش هتلاقي امامك غير تدفع له فلوس الاقامه والغرامه وممكن فوقهم بوسه كمان عشان يخلص ويخلص ..

على كل حال لو صاحب العمل مش راضي يطلع لك اقامه متتعبش نفسك .. اشتري دماغك وطلعها انت على حسابك .. مش هتقدر تجبره على استخراجها وفي نفس الوقت العرف الدارج انها على العامل مش صاحب العمل ...

شكرا يا أخت ضحي علي الرد وأحب اوضح بعض الأشياء الهامة

أولا

في أول مرة أطلع الإقامة فيها طلبني الكفيل وقال لي انت هتدفع فلوس الإقامة قلت له لا انا اسف مش هدفع ولا مليم قال لي اسال زمايلك كلهم بيطلع لهم الاقامة علي حسابهم الشخصي فقط لا غير قلت له ولو بس انا مش دافع ولا هيتخصم مني هللة واحده ورحت واخد نفسي وماشي رايح السكن وقلت له همشي مش فارق معايا الشغل قال لي هطلع الاقامة وانت تدفع النص وانا النص قلت له ربنا يسهل

المهم دفع الاقامة السنة اللي فاتت كاملة علي حسابة

المرة القادمة بالطبع هطلب منه تجديد الاقامة

هيقول لي علي حسابك طبعا وانا يستحيل هدفعها اصلا علي حسابي

ولكن ماذا لو قال لا

كان هذا هو سؤالي

ثانيا في هذه الحالة هل ممكن يعطيني خروج نهائي ؟؟؟؟

السؤال الهام لاصحاب الخبرة

لما اقبض الراتب امضي علي ارقام مثلا الراتب 3000 ريال يكتب هو 3000 بالحساب وانا اوقع بالخانة الأخيرة

فهل من الممكن مثلا ان يكتب اي ارقام تانية في هذه الخانه

[شريف حمدي]

يشرفني أخي / سي السيد ان نكون أصدقاء وشكراً لأطرائك المحترم

وبالفعل انا كنت من اشد المعجبين بحماسك وحميتك علي حقوق بني وطنا مصر في الغربة

تقبل أسمي أيات الأحترام لشخصك الموقر

وبصفتك المشرف العام فأكرر عرض خدماتي بتقديم الأستشارة القانونية مجانا لأعضاء المنتدي

ودمتم بخير

أشكرك علي كرمك أخي الكريم

وهذه هي أخلاق المصريون جميعا

ولكن هل ممكن ترسل لي رقم تليفونك علي الخاص للاتصال بك في حالة وجود اي مشكلة (لو لم يكن لديك مانع بالطبع)

[حسين امبابي]

السلام عليكم ورحمة الله وبركاته

طب لو الشركة فى العقد بتقول انها بتدى الاقامةللزوج وزوجته واول طفلين ..هل معنى كده انها بتتكفل بكل مصاريف الاقامة وتجديدها

وهل مدة الاقامة بتكون بمدة العقد الزمنيه ؟؟ طب لو العقد مفتوح اقصد يجدد تلقائيا يقى الاقامة تندفع سنويا من قبل الشركة

شكرا

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

نعم تتكفل الشركة بكل مصاريف الاقامة وتجديدها وتتحمل غرامات التأخير حال عدم التجديد .

مدة الاقامة قد تكون سنة وقد تكون سنتين لا غير وهي تختلف عن مدة العقد

لو العقد يجدد تلقائياً تلتزم الشركة بتجديد الاقامة المنتهية للعامل او الموظف الي أن تنتهي مدة العقد

تم تعديل 20 أكتوبر 2009 بواسطة حسين امبابي

[حسين امبابي]

في أول مرة أطلع الإقامة فيها طلبني الكفيل وقال لي انت هتدفع فلوس الإقامة قلت له لا انا اسف مش هدفع ولا مليم قال لي اسال زمايلك كلهم بيطلع لهم الاقامة علي حسابهم الشخصي فقط لا غير قلت له ولو بس انا مش دافع ولا هيتخصم مني هللة واحده ورحت واخد نفسي وماشي رايح السكن وقلت له همشي مش فارق معايا الشغل قال لي هطلع الاقامة وانت تدفع النص وانا النص قلت له ربنا يسهل

المهم دفع الاقامة السنة اللي فاتت كاملة علي حسابة

المرة القادمة بالطبع هطلب منه تجديد الاقامة

هيقول لي علي حسابك طبعا وانا يستحيل هدفعها اصلا علي حسابي

ولكن ماذا لو قال لا

كان هذا هو سؤالي

ثانيا في هذه الحالة هل ممكن يعطيني خروج نهائي ؟؟؟؟

السؤال الهام لاصحاب الخبرة

لما اقبض الراتب امضي علي ارقام مثلا الراتب 3000 ريال يكتب هو 3000 بالحساب وانا اوقع بالخانة الأخيرة

فهل من الممكن مثلا ان يكتب اي ارقام تانية في هذه الخانه

................................................................................

................................................................................

.

...............

اخي العزيز / شريف حمدي

أحييك علي موقفك لأنه نظامي وأتمني من كل مصري أن يعرف ما له وما عليه وان يحذو حذوك .

بالنسبة لأجابة سؤالك لو قالك هعطيك خروج نهائي هتواجهه حضرتك بلستة من الحقوق التي أقرها لك قانون العمل وأولها تعويضك عن الفصل التعسفي ........................................

ثانياً : تقدر تنقل كفالة وتلزمة بنقل خدماتك لصاحب عمل اخر في حالة أن تثبت أطالة أمد التقاضي من ناحيته في لجان العمل

................................................................................

................................................................................

.

..............................

نعم من الممكن أن كان لا يتقي الله عزوجل ويفضل أن تكتب كلمة (ثلاثة ) بعد الرقم كتابة لتحاشي أي لبس أو ابهام أو ادعاء من ناحيته

تم تعديل 20 أكتوبر 2009 بواسطة حسين امبابي

[se_ Elsyed]

.

..............................

نعم من الممكن أن كان لا يتقي الله عزوجل ويفضل أن تكتب كلمة (ثلاثة ) بعد الرقم كتابة لتحاشي أي لبس أو ابهام أو ادعاء من ناحيته

طب ياريت الشيطان يوزه ويعمل كده ويكتبها 30 ألف

ساعتها تطالبه بحقوقك سواء بدل سكن أو نهاية خدمه أو بدل اجازة بناء على هذا الرقم اللي زوده ...

------------

طب لو الشركة فى العقد بتقول انها بتدى الاقامةللزوج وزوجته واول طفلين

برضوا ده غير قانوني

قانون العمل الجديد الذي تم تطبيقه على الجميع من أول 2006 ينص على أن الكفيل يتحمل كل ما يترتب على إستقدام عائلة المكفول بدون عدد محدد حتى لو زي أخواتنا الفلسطينيين اللي بيخلفوا 10 ....

سواء إقامه ... تذاكر .. تأمين ....

[أبو اياد المصرى]

اعتقد ان معظم العقود التى تبرم بتهتم بمواعيد الدوام وبدل الإقامة والراتب أما بالنسبة لتجديد رسوم الإقامة فجرت العادة على أن يتحملها العامل ولكن إذا كان هناك اتفاق مسبق على تحمل الكفيل لها ومذكور فى العقد هذا فهو يلتزم قانوناً بها

أعتقد واخدة بالك يا استاذ سى السيد من أول كلمة قلتها أنى اعتقد ولا أجزم !!!!!!!!!!!!!

دى حاجة وبعدين يعنى يا ريت يكون الرد مش قاسى كده لأنه كلامى فى الحقيقة هو اللى بيحصل وده العملى والواقعى تقولى تجبر الكفيل ما تجبروش دى فوارق شخصية بين الناس بس حقيقى جرت العادة فعلا على تحمل العامل لرسوم تجديد الإقامة وده بناءاً على تجارب ناس كتير مسافرة السعودية وبغض النظر عن القانون

ولهذا فأرجو من حضرتك عدم التهكم اللاذع على رأيى والذى أؤكد لك بغض النظر عن القانون انه يحدث عملياً وفعلياً ، وعموماً أرجع وأقول أنا قلت أعتقد ولم أقل أكيد وتقريباً فى فرق فى معنى الكلمتين !!!!!!!!!!!!