70 يوم في مصر (من الكويت و إليها)

[MoHaMMeD EgYpT]

بسم الله الرحمن الرحيم

انا شايف ان قصتي دي تنفع في قسمين المواضيع الجادة و المواضيع الشخصية لكن انا شايف انها جادة اكثر من مجرد شخصية لكن هضعها في المواضيع الشخصية الي حين يرها المشرفين لو كانت فعلا تستحق تنقل للمواضيع الجادة

القصة بدات من يوم شراء التذاكر

انا بقول في سري ياه مصر واحشتني واللمة و الاكل اللي فيه بركة ياه نفسي اشرب تاني من نيلها و اشوف الخضروات الطازجة زي زمان

يوم السفر ياه انا مش قادر اصدق اني هروح و اشوف مصر تاني

و تبدا الحكاية

من مطار الكويت الدولي ( الاجرائات فيه ما اخذتش نصف ساعة )

ثم الي الطائرة

ثم الي بلدنا مصر

وصلنا بحمد الله لمصر في احدي مطارات الاسكندرية ( المطار يشبه الي حد كبير المدارس الاميرية من حيث التهكع و الدمار الذي فيه )

غرفة الجوازت متدمرة و اظن ان لو شخص سند عليها ممكن تدمر و هي عبارة عن شئ يشبه الكشك

تم تجميع ركاب طائرتنا و كان فيه ركاب طائرة اخري و بصراحة كان زحام شديد لدرجة اني حاسس ان دي مؤامرة علشان لو حد فينا نده انفلونزا الخنزير يقوم يعدي الكل

المهم تم حشرنا جميعا في صالة صغيرة جدا

و من ثم بدانا نعمل طوابير مثل طوابير الجمعية

بعد الانتظار ساعة اخيرا جاء دوري

بداء اول حوار مع امين الشرطة المصري

امين الشرطة = ا.ش

انا = انا :lol:

ا.ش : لو سمحت الباسبور ؟؟

انا : اتفضل

ا.ش : انت اللي في الصورة

انا في سري امال مين يعني اللمبي مثلا

انا : ايوة

ا.ش : بس الصورة دي مختلفة عن شكلك اللي قدامي

انا : !! انا كنت اصغر لما اتصورت الصورة دي و كمان انا كنت حالق شعري يوم اتصورت الصورة دي

امين الشرطة راح خاتم و ادي الباسبور لشوية امناء تانين ( تقريبا المطار كله امناء شرطة ولا ايه )

راح شايفين الباسبور و بعدين اخدت الباسبور

و بدات رحلتي في جمهورية مصر العربية بعد الختم علي جواز سفري المصري الاخضر :lol:

عربات حمل الشنط مدمرة تماما لكن اهي شغالة بالبركة

تم بحمد الله اخذ الشنط من علي السير بعد 15 ساعة

ثم الجمارك لكن علي مين احنا كنا بليل و تقريبا استاذ الجمارك كان نعسان المهم

استاذ الجمارك : في شئ معاك ممكن يتجمرك

انا : لا

انا في سري : انا اعرف منين اذا كان معايا حاجة تتجمرك ولا لا :lol:

المهم

استاذ الجمارك : خلاص عدي , اللي بعده

انا في سري : الحمد لله

ثم الخروج النهائي من المطار اللي كنت خائف يتهد علينا في اي لحظة

و لحسن الحظ ان كان فيه سائق واحد من قريبنا ضبطلنا معاه كل شئ والا كان زماني اتنهش لحمنا من السائقين الذين يفتروسون لحم المغتربين العائدين للوطن wst::

الفصل الثاني العودة لمنزلنا في الجيزة لالا انا اقصد المحافظة الغير معروفة الملامح التي اسمها 6 اكتوبر

انتظرونا مع الفصل الثاني من القصة و للحقيقة وجوه كثيرة اقصد للقصة فصول كثيرة

[MoHaMMeD EgYpT]

الفصل الثاني

العودة لمنزلنا في 6 اكتوبر ليست الحرب اللي فات عليها سنين بل المحافظة الجديدة اللي فات سنتين فقط علي انشائها

بعد الركوب في السيارة التي كانت تنتظرنا لتوصلنا لشقتنا وليس منزلنا لان المنزل كبير لكن الشقة مجرد كام متر في كام متر

انا بقول في سري الله جو مصر حلو اوي مش حر زي الكويت ان شاء الله تكون اجازة سعيدة و يا خسارة الاجازة مجرد شهرين و نصف يعني كام يوم يتعدوا علي الصوابع

علي طريق اسكندرية الصحراوي

طبعا مش عاوز اقول الطريق اتغير ازاي

مزارع في كل مكان

الصحراء اختفت لدرجة اني حسيت ان ده حاجة من اتنين يا اما السواق غلط و راح الطريق الزراعي يا اما الطريق اتغير بالفعل

الروائح العطرة موجودة في كل مكان علي الطريق

لكن الامر المحير هما ما لقوش منطقة تانية يعمروها غير طريق اسكندرية الصحراوي طب ما كانوا مثلا يعمروا الصحراء الغربية

تم بحمد الله وصولنا لمنزلنا اقصد شقتنا العزيزة

بسم الله ما شاء الله منطقتنا اتغيرت خالص حتي عمارتنا بقا ليها بوابة جديدة مصفحة

بعد الوقوف حوالي نصف ساعة نفكر ازاي نجيب مفتاح البوابة و بعد خبط البوابة حوالي 1000 خبطة

اخيرا جاء الفرج و احد من جيرننا فتحها ( بصراحة اول مرة اشوفه ) :lol:

باب شقتنا مغبر لكن عادي

و فتحنا باب الشقة في امان الله قولنا لو المفتاح مافتحش يبقي عليه العوض و منه العوض يبقي فيه غريب في شقتنا

و لكن الحمد لله اتفتحت

لكن ياليتها ما فتحت فين مصدر حياتنا الاساسي فين الكهرباء :sad:

طب هو مين كان بيستخدم الكهرباء في الشقة علشان يقطعوا الكهرباء

لكن عادي

الساعة كانت 6 صباحا

يالا كلها كام ساعة و المصلحة الحكومية تفتح

الساعة ال 9 صباحا ذهبنا الي مصلحة الكهرباء و الطاقة

انا : السلام عليكم

استاذ ش : و عليكم السلام , اي خدمة ؟؟!!

انا : والله احنا كنا مسافرين و رجعنا لقينا الكهربة مقطوعة

استاذ ش : خير ان شاء الله اصبر كلها ربع ساعة و الموظفين يجو

انا : عادي ده احنا صبرنا 3 ساعات يبقي مش هعرف اصبر ربع ساعة

و تمر نصف ساعة

اخيرا جاء ما يقارب نصف المواظفين

انا : يا استاذ ش يا تري نروح لمين علشان المشكلة دي

استاذ ش : روح للاستاذ ح

انا : الف شكر

روحت للاستاذ ح

انا : السلام عليكم , حضرتك الاستاذ ح

استاذ ح : ايوة , اي خدمة ؟؟

انا : والله احنا رجعنا من السفر لقينا الكهربة مقطوعة

استاذ ح : خير ان شاء الله , روح للاستاذ ع علشان يشوف عليكم كام و ادفع له و خذ الوصولات

انا : الف شكر

و روحت للاستاذ ع

انا : السلام عليكم

الاستاذ ع : وعليكم السلام , اي خدمة

انا : والله الكهربة مقطوعة عندنا و احنا كنا مسافرين و لسا راجعين

الاستاذ ع : خير ان شاء الله , عنوانك ايه

انا : كذا كذا كذا

الاستاذ ع : طب روح للاستاذ ف لانه هو المحصل بتاع منطقكتم

و روحت للاستاذ ف

انا : السلام عليكم

استاذ ف : و عليكم السلام , اي خدمة

انا : والله الكهربة مقطوعة عندنا و احنا كنا مسافرين و لسا راجعين

استاذ ف : طب العنوان ايه و باسم مين

انا : باسم ***** و العنوان كذا كذا كذا

الاستاذ ف : طب ثواني

الاستاذ ف ادني وصلات كهرباء بعدد شهور الغربة مش سنين الغربة :P

اول وصلين بمبلغ و قدره قولت يمكن بيقسم استهلاك الكهرباء علي عدة شهور علشان يساعدوا الغلابة

و عشرات الوصلات بمبلغ 5 قروش مصرية

انا : طب حضرتك كده عاوز كام

استاذ ف : 257.75 جنيها مصريا فقط لا غير و روح ادفعهم في الخزنة

لا حول ولا قوة الا بالله يعني بيحسبونا علي شهور الغربة

انا عارف ان المبلغ تافه لكن مش من حقهم md2:

و روحت الخزنة و اذا بي اري امين شرطة يفطر البطاطس الشيبس و معه موظف الخزنة

طبعا موظف الخزنة رجل عجوز ( تقريبا الحكومة بتخف تمسك الخزنة و الفلوس للشباب smk: )

و طبعا انتظرت ولا يوجد غير الانتظار

اخيرا الاستاذ خلص فطار

انا : السلام عليكم

استاذ الخزينة : وعليكم السلام

انا : لو سمحت عاوز ادفع الوصلات دي و الاستاذ ف قالي عند حضرتك

استاذ الخزينة اخذهم و اخذ الفلوس :cry1: و ختم الوصلات كلها

خلاص اخيرا الكهرباء هترجع :lol:

روحت رايح للاستاذ ف تاني قالي خد الوصلات و روح للاستاذ ك

و حكيت الحكاية للاستاذ ك

قالي والله صعب النهاردة اجي

قولت له والله صعب احنا جايين من السفر و ضروري لازم النهاردة و متخفش هيدك حلوتك

و جاء الاستاذ ك معيا و كل الحكاية كانت انهم شالوا الفيوز :wub: :blink: :blink: و الاستاذ جاب لي فيوز جديد

و اخد حلوته طبعا 10 جنيهات مصرية لا غير

و اخيرا اشتغلت الكهرباء بعد دفع تمن شهور الغربة في الكهرباء و لسا للقصة فصول اخري و مر اليوم الاول

غرامة الرجوع من الغربة للان هي

257.75 يعني 258 جنيه + 200 سائق = 458 جنيه + 150 اكل = 608 جنيها مصريا لا غير في اول يوم

ان شاء الله انتظرونا و الفصل الثالث و هو بعنوان المياه ( 2 يوم في مصر )

تم تعديل 19 أكتوبر 2009 بواسطة MoHaMMeD EgYpT

[Simba]

واضح انها اول اجازة ليك علشان كده مش مستوعب التغيير :wub:

تم تعديل 19 أكتوبر 2009 بواسطة سمبا

[herohero]

اخي العزيز ماترويه شيئ عادي جدا ف مصر من زمن وهو كده والكويت من قبل 1990 وهي كانت كده ومصر برده كده بل بالعكس حقيقة لو روحت المطار بتاع القاهرة الصاله الجديدة ممتازة ونظيفه جدا وده برده كلمة حق تقال يعني ماتنساش الكويت فيها مطار واحد مش زي مصر يعني لو هتتكلم ع ميزانية صرف لكن انا بتكلم ع اسلوب التعامل وده بيختلف طبعا لكن لو عاوز تتعقد من المطارات والرقي ف التعامل روح مطار دبي وشوف المترو بتاع دبي ازاي وانت هتحس بان لا الكويت ولا مصر فيه مجال للمقارنة وكلمة السر هو محاولة الرقي وده للاسف مفتقدينه في مصر

[madamomomar]

طبعا ... انا مصدقاك جدا لان ده هو اللى بيحصل فعلا

مايقدروش يعيشوا حياة طبيعة .. لازم الروتين

فكرتنى باول ما قررنا نركب خط تليفون منزلى فى شقتنا

الطبيعى ان الموضوع بيخلص مثلا فى اسبوع او عشر ايام زى ما ناس كتير ركبت

احنا اخدنا حوالى 3 شهور وكان السبب فى عامل التركيبات عايز حد من البيت يستناه الساعة 8 صباحا ويفطره فطار تمام وبعدين يجيبه على البيت عشان يحلى (ياخد الحلاوة يعنى) وطبعا لازم تتحايل عشان البيه يرضى يجى معاك ولولا الوسطة من داخل السنترال هيه اللى خلته يجى لوحده بس بعد ايه

اه... وطبعا خد الحلاوة 50 جنيه مصرى

[HDarwish]

أنا شايف إن الأمر طبيعي جداً ومفيش ولا نقطة سلبية نقدر نتكلم عليها

[president]

صراحه انا مش شايف فى اللى انت كتبته سلبيه مفجعه بالطريقه اللى انت حاولت توهمنا بيها .

خد ياسيدى عندك . لما جيت الرياض وقدمت على تليفون التليفون اتركب بعدها تقريبا بشهر مع ان الطبيعى يتركب خلال يومين والسبب مافيش مكان فى الكبينه وهنحاول ان احنا نزود العدد وطبعا كل يوم اكلمهم يقولوا كمان 48 ساعه .

ال dsl فصل عندى لمدة 15 يوم . والنت فى مجال شغلى تقريبا 90 % من الشغل فكنت باضطر اقعد فى الشغل لوقت متأخر عشان مافيش نت فى البيت . والسبب صيانه واخبط راسك فى الحيط

وأول يوم بعد اجازة العيد والد نيا كلها شغاله ويوم عمل رسمى فى المملكه كانت فى جهات واخده اجازه عشان بدل العيد الوطنى وانت واخد اجازه تخلص مصالحك وتروح عليك الأجازه .

عادى بنزل مصر اجازه ولما رجعت باشوف فاتورة التليفون ألاقى فيها رسوم اشتراك التليفون وانا فى الأجازه .ماهو دا الطبيعى

عايز اقوللك انا مره كنت مسافر من مدريد الى فرانكفورت الطياره اتأخرت ساعه ونص تقريبا ودا جوه أوروبا .

انا ليا احتكاك ببعض الجهات الحكوميه . فى معاملات عندهم بتتأخر بالشهر والشهرين والمراجعين كل يوم يسالوا عليها .

من الأخر قصدى اقوللك كل مكان فى سلبيات وايجابيات . بس كل واحد فينا عايز يشوف الحاجه اللى على هواه .

واحد شايف سلبيات بس . واحد شايف ايجابيات بس . وواحد شايف الأتنين . صدقنى الموضوع يرجع للشخص نفسه . يعنى واحد شايف ان تجربته فى الخليج سيئه جدا

وناس تانيه شايفاها فيها مميزات وعيوب وناس شايفاها زى الفل . أكيد المكان متغيرش بس ظروف الشخص هيا اللى خلته يبنى انطباعاته .

انا خايف بس وانت بتكمل تقول حبيت تنزل تشترى حاجه من السوبرماركت لقيته قافل :wub:

تحياتى ليك

تم تعديل 19 أكتوبر 2009 بواسطة president

[se_ Elsyed]

محمد يا جماعه شاب صغير السن وهو بطبعه ناقم على الحياة كلها حتى لو كانت جنه ... ومقوقع حياته كلها في الهجرة إلى نيوزلندا ولا مش عارف فين ..

وبالتالي حتى الخُضره والعمار اللي شافه في الطريق الصحراوي .. بص له بقرف وأشمئزاز وكإنه شاف بلوعات مجاري ...

آه بالمناسبة يا محمد ...

وإنت في الكويت .... حاول تبعد عن شقتكم 4 او 5 شهور وشوف هايقطعوا النور ولا لأ عشان ما دفعتوش الفاتورة اللي فيها حاجه إسمها حد ادنى أو خدمة عداد .. بغض النظر إنت مسافر ولا بتصيف ....

جرب وشوف وبعدين إحكي لنا على مصلحة الكهربا في الكويت ..

أما النقطة السلبية فعلاً فهي إن إزاي أمين الشرطة يسألك عن باسبورك او يقارن صورتك الحالية بصورتك بتاعت الباسبور وهو عارف إن إنت محمد باشا حامل جواز السفر الدبلوماسي والكاتب المعروف والعلامه المشهور ...

يا محمد ... اللي إنت بتعمله ده لا هايقدم ولا هايأخر ولا عُمره هايصلح بلدك اللي إنت بتكرهها وده معروف عنك ...

لكن عارف كل ده هايؤدي إلى إيه في النهاية ؟

إلى إننا نصبح في يوم الصبح وهنا في المنتدى ... نلاقيك سايب رسالة إنك شربت سم فيران وأنتحرت ...... زي الكام موضوع اللي كتبتهم قبل كده عن رغبتك في الأنتحار ..

لإن ببساطة إنت مش عارف عاوز إيه في الدنيا دي ومالكش هدف ولا تملك الرغبة إنك تتعب لتحقيق هدفك وعاوزها مقشرة ... لأ مش مقشرة .. ده أنت عاوز خلاصة الحاجات اللي أتقشرت ... إنت لسه هاتطلع البذر وتتعب نفسك ... .

[hazemtara]

الأخ الفاضل محمد/

إتفضل كمل حكايتك وإن شاء الله نسمع لك ونُحاورك فى ما تكتب.

الأخوة الأعزاء الذين علقوا على مُداخلات محمد و على وجة الخصوص س السيد

محمد له حق علينا كأخوة أكبر منة سناً وهو حق التوجية والإرشاد والنُصح لوجة الله ،،لا أن نسخر منة وننعتة بصفات أنة حديث السن وقليل الخبرة بشؤن الحياة،،،و أنة يسير فى طريق الهاوية وراح يشرب سم فران :wub: .

قد يكون محمد لم يأتى بجديد ولم يُضيف شيئ جديد لنا لكنة يحكى عن تجربتة هو من وجة نظرة هو ف إتركوة يحكى بأسلوبة عن تجاربة ،،ثم نُناقشة فيها ونقوم وننصحة بما نستطيع ،،لأنى أرى أن أسلوب الهجوم هذا سيؤدى إلى إحجامة عن الكتابة.

دمتم لى سالمين

[se_ Elsyed]

الأخ الفاضل محمد/

إتفضل كمل حكايتك وإن شاء الله نسمع لك ونُحاورك فى ما تكتب.

الأخوة الأعزاء الذين علقوا على مُداخلات محمد و على وجة الخصوص س السيد

محمد له حق علينا كأخوة أكبر منة سناً وهو حق التوجية والإرشاد والنُصح لوجة الله ،،لا أن نسخر منة وننعتة بصفات أنة حديث السن وقليل الخبرة بشؤن الحياة،،،و أنة يسير فى طريق الهاوية وراح يشرب سم فران :lol: .

قد يكون محمد لم يأتى بجديد ولم يُضيف شيئ جديد لنا لكنة يحكى عن تجربتة هو من وجة نظرة هو ف إتركوة يحكى بأسلوبة عن تجاربة ،،ثم نُناقشة فيها ونقوم وننصحة بما نستطيع ،،لأنى أرى أن أسلوب الهجوم هذا سيؤدى إلى إحجامة عن الكتابة.

دمتم لى سالمين

يبقى أنت ما تعرفوش يا دكتور

محمد كل يوم بينتحر وبيكتب قصص عن إنتحاره

وفي الأول نصحناه كثيرررررررررررررررررررر

لكن اللي في دماغه في دماغه

[MoHaMMeD EgYpT]

واضح انها اول اجازة ليك علشان كده مش مستوعب التغيير hpc:!:

هي فعلا اول اجازة ليا لكن ده مش تغير طبيعي الدول شغالة تتقدم و احنا شغالين نتخلف و صدقني انا رايي مش مبني علي اني مسافر بره مصر والله حتي لو انا جوه مصر كنت هقول نفس الراي

[herohero]

واضح انها اول اجازة ليك علشان كده مش مستوعب التغيير hpc:!:

هي فعلا اول اجازة ليا لكن ده مش تغير طبيعي الدول شغالة تتقدم و احنا شغالين نتخلف و صدقني انا رايي مش مبني علي اني مسافر بره مصر والله حتي لو انا جوه مصر كنت هقول نفس الراي

سيدي الامور كده من زمان فلا تقلق لا مصر هتختفي ولا السلبيات ده هتختفي وكله هيفضل زي ماهو فلاتقلق من زمان والسلبيات ده موجوده

[MoHaMMeD EgYpT]

محمد يا جماعه شاب صغير السن وهو بطبعه ناقم على الحياة كلها حتى لو كانت جنه ... ومقوقع حياته كلها في الهجرة إلى نيوزلندا ولا مش عارف فين ..

انا الحمد لله مش ناقم علي الحياة ولا حاجة و اذا فعلا سني صغير انا معاك في كده بس سؤال انا لو كنت طلعت كذاب و كتبت سني بدل من 17 سنة خليته 27 ولا 37 تفتكر كان كلامك لي هيكون بنفس الطريقة دي angl:: و انا عن نفسي مش شايف ان من حق اي شخص يحكم عليا علشان سني فقط و اذا فعلا انا نفسي اهاجر الي تيوزيلندا فاظن ان مش انا الوحيد في مصر اللي بيفكر في كده فهل يعني اللي بيفكر في الهجرة ليها يبقي مجنون مثلا ؟؟

وبالتالي حتى الخُضره والعمار اللي شافه في الطريق الصحراوي .. بص له بقرف وأشمئزاز وكإنه شاف بلوعات مجاري ...

آه بالمناسبة يا محمد ...

وإنت في الكويت .... حاول تبعد عن شقتكم 4 او 5 شهور وشوف هايقطعوا النور ولا لأ عشان ما دفعتوش الفاتورة اللي فيها حاجه إسمها حد ادنى أو خدمة عداد .. بغض النظر إنت مسافر ولا بتصيف ....

تصدق ان احنا هنا في الكويت مش بندفع غير ايجار الشقة بس wst:: و اظن ان الكويتين مش بيدفعوا شئ

جرب وشوف وبعدين إحكي لنا على مصلحة الكهربا في الكويت ..

أما النقطة السلبية فعلاً فهي إن إزاي أمين الشرطة يسألك عن باسبورك او يقارن صورتك الحالية بصورتك بتاعت الباسبور وهو عارف إن إنت محمد باشا حامل جواز السفر الدبلوماسي والكاتب المعروف والعلامه المشهور ...

يا محمد ... اللي إنت بتعمله ده لا هايقدم ولا هايأخر ولا عُمره هايصلح بلدك اللي إنت بتكرهها وده معروف عنك ...

مصر الحكومة اه بكرها كره العبد لسيده اما بقا مصر البلد و الناس لا و انا شايف ان كل كلامي علي الحكومة ولا انا غلطان و حضرتك حكمت علي كلامي من الغلاف و صدقني انا فعلا نفسي اعرف اصلح حال البلد و لو بنسبة 1 %

لكن عارف كل ده هايؤدي إلى إيه في النهاية ؟

إلى إننا نصبح في يوم الصبح وهنا في المنتدى ... نلاقيك سايب رسالة إنك شربت سم فيران وأنتحرت ...... زي الكام موضوع اللي كتبتهم قبل كده عن رغبتك في الأنتحار ..

لإن ببساطة إنت مش عارف عاوز إيه في الدنيا دي ومالكش هدف ولا تملك الرغبة إنك تتعب لتحقيق هدفك وعاوزها مقشرة ... لأ مش مقشرة .. ده أنت عاوز خلاصة الحاجات اللي أتقشرت ... إنت لسه هاتطلع البذر وتتعب نفسك ... .

بخصوص بقا سم الفئران فاظن انه غالي انا احسن لي اجيب لي كيلو طماطم من مصر اللي هي مزروعة بالمجاري i*: ده كيلو الطماطم ب 0,75 قرش بس اما بقا السم مش اقل من 5 جنيهات

بخصوص بقا موضوع الانتحار فده موضوع واحد مش عدة موضوعات non:: و انا كنت مخنوق و مين فين ماكنش مخنوق في يوم من الايام

اما بقا بخصوص هدفي في الحياة فهو الحمد لله مش الفلوس hpc:!: ولا عمري هتغرب و اديع عمري علشان كام مليون هعملهم في الاخر و ارجع مصر بالفلوس و اكون شيبت و في الاخر اموت قبل ما اتهنئ بيهم ولا اموت و انا عاصي ربي بالفلوس الكتير

و بجد انا هدفي في الحياة لو فكرت احققه هيبقي مستحيل في مصر لان مصر بكل بساطة مابقتش منارة للعلم زي زمان

هو ده هدفي و انا عمري ما عوزتها مقشرة زي ما حضرتك بتقول بس بردك ما عوزتهاش سودة و ظلمة

و صدقني جنيه واحد مع العلم احسن لي من مليون جنيه مع الجهل

و يا ريت حضرتك ما تسبقش الاحداث ما تحكمش علي حد من اول لحظة و بجد انا كنت هتكلم علي اشياء اخري غير السلبيات يمكن تكون في منتصف موضوع لكن برده حضرتك حكمت من الموضوع من اوله و صدقني مش بالسن

و كلامي علي السلبيات الاشياء مش عيب بالعكس انا بتكلم عن السلبيات علشان نفسي اصلحها و لو السلبيات دي كانت فيا انا شخصي و انا اقدر اتكلم علي الايجابيات لكن تفتكر مثلا لو مشيت اقول احنا اللي بنينا الاهرامات هل ده هيغير شئ ؟؟

و في الختام تحياتي لحضرتك

[ssmaly]

عزيزى محمد

انا مثلك اسمى محمد وباعيش فى الكويت ومقدر كل اللى بتقوله لأنى اعيش تقريبا نفس الظروف

وبشوف الاختلافات بين البدلين واتمنى لبلدى انها تكون احسن

واى مشكلة حتى لو صغيرة بتكون كبيرة ليس من كرهى لبلدى ولكن حبا فيها

صغر السن ليس عيب ابدا ولكن كل اللى يهاجمك فى هذه النقطة يتمنى ان يكون فى مثل سنك(وانا منهم )

بالنسبة للكويت فى موضوع الكهرباء والماء

الماء ببلاش (لأنه محسوب من ضمن الايجار)

والكهرباء فهى تدفع كل عدة اشهر او سنه وفيه ناس لم تدفع لعدة سنوات ولم تنقطع عنهم الكهرباء (لازم تدفع لما تغير الشقة او تترك الكويت)

بالنسبة لك اعتقد انك مثلى الكهرباء من ضمن الأيجار(تبقى من سكان سلوى مثلى)

الغريب يا محمد ان كل الناس بتنقد الوضع فى مصر وطبعا معظم الاعضاء بالمحاوارات هما كمان بيتقدوا اوضاع مصر (اللى لا تسر عدو ولا حبيب) ولكن لما يجى واحد مش من جماعتهم بيتقد مصر لازم يهاجموه حتى يستأذن الاول

اخى محمد كمل موضوعك واحكى مشهاداتك

[herohero]

يا جماعة مش حكاية نقد مصر وسلبياتها لكن هل عندكم وطن بديل ع فكرة ف لحظة امور كتير بتتغير انا كنت ف الغزو ومكنتش متصور اننا ممكن ننزل نعيش ف مصر وندخل مدارسها وعيشنا ودخلناها ومشيت الامور يعني يا جماعة وطنا هو مصر بسلبياته وكل اللي مش عاجبنا ع الاقل طالما لسه مش معانا الا جواز سفره الاخضر

فمهما ماهنتتقد زي ما بقول بلدنا ومالناش الا هي ف الاخر ونتمنى كل سلبياتها تتعالج وبعدين مصر دلوقتي احسن من زمان بكتير ف ع الاقل مصر تانيه بتاعت التجمعات ومارينا ممكن تنضم لسكانها انت وفلوسك لكن زمان كانت مصر واحده

[MoHaMMeD EgYpT]

من الواضح ان موضوعي هيسبب مشاكل انا مش عارف ليه لاني فعلا بحكي اللي حصل لي كمتغرب بعيدا عن مصر و بحكي اللي حصل لي فعلا في مصر سواء في الذهاب للمصالح الحكومية

و انا بعتذر يا جماعة عن كتابة الموضوع و يا ريت سي السيد يقفل الموضوع اذا كان ده هيفرحه

و شكرا للجميع شكرا ل : للاستاذ حسن (HDarwish) و الاستاذ سمبا و الاستاذ herohero وللاستاذ madmomomar و للاستاذ president و للاستاذ حازم (hazemtara) و ssmaly و في الختام شكرا للاستاذ سي السيد

[pocy]

الله يسمحك يا محمد

برضه عايز تطلب غلق الموضوع وانا بتابعه انا عايزاك تخلصه خلال الشهر ده وعايزه اعرف مشاهداتك كلها لانى نازله كمان شهر وعايزه اعرف الجديد اللى حصل من خلال عيونك اللى شافت وكلامك

بحملك امانه يا شيخ لا تروح من غير ما تكمل

وليه انت زعلان قوى من سي السيد كده الراجل كان معظم كلامه هزار مش جد يعنى انت مش عارفه ولا ايه

وياعم بالنسبه لحداثه سنك فانت تتحسد عليها وانا اكتر واحده احسدك عليها (بسم الله ما شاء الله ) مع انى يعنى اصغر منك بشويه سنين كده انت عارف الستات بيعدوا العشرين وبعدين بيطرحوا من تانى ههههههههههههههههههه (بمعنى اول ما يكون عندنا 21 سنه =19 سنه )

بجد يا محمد كمل مشاهداتك وسيبك من الخناشير دول خليك معايا انا بجد مشتاقه اعرف باقي الحكايه وحرام تسيبنى اتخيل كمل كمل ياراجل محدش اخد منها حاجه

بس يا محمد بصراحه انا مستغربه شويه حاجات انت قلتهم ليه انت اللى بتدفع فواتير التليفون والكهرباء ليه تنقطع عن الشقه

بمعنى انى مثلا وانا مش موجوده اخواتى او اخوات جوزى بيخلصوا الامور دى بيدفعوا التليفونات اول بأول وكمان بيدفعوا الكهرباء شهر بشهر وكمان لما بننزل بلاقي الشقه ممسوحه ونظيفه وجاهزه والتلاجه مليانه من خيرات الله حتى الانبوبه بتبقي متغيره حتى لو فيها شويه علشان يبقوا متاكدين اننا مش هنحتاج حاجه

فاعتقد انتم تشوفوا حد من اخوالك او اعمامك يخلصوا الحاجات دى افضلكم بدل البهدله لما تيجوا تنزلوا ولا انت ايه رأيك ؟؟؟؟؟؟؟؟؟؟؟؟؟؟؟؟؟؟؟

طب يا سيدى بلاش علشان خاطرى علشان خاطر عمورى ابنى عايزنى اقوله ايه لما يجي ينام وهو بيستنى كل يوم باقي القصه بتاعتك اخليه يزعل يعنى من خاله محمد ولا ايه

تم تعديل 21 أكتوبر 2009 بواسطة pocy

[herohero]

من الواضح ان موضوعي هيسبب مشاكل انا مش عارف ليه لاني فعلا بحكي اللي حصل لي كمتغرب بعيدا عن مصر و بحكي اللي حصل لي فعلا في مصر سواء في الذهاب للمصالح الحكومية

و انا بعتذر يا جماعة عن كتابة الموضوع و يا ريت سي السيد يقفل الموضوع اذا كان ده هيفرحه

و شكرا للجميع شكرا ل : للاستاذ حسن (HDarwish) و الاستاذ سمبا و الاستاذ herohero وللاستاذ madmomomar و للاستاذ president و للاستاذ حازم (hazemtara) و ssmaly و في الختام شكرا للاستاذ سي السيد

يا اخ محمد ماتضايقشي نفسك انت تحمد ربنا امال لو فجأة طول عمرك ف الكويت ويادوب بتنزل مصر اجازة وفجأة لقيت نفسك هتدخل المدارس تخيل بقى مدارس الحكومة بتاعت الكويت وقارنها بمدارسنا ف مصر انا بتكلم ع سنة 90 ماكنش ساعتها ف مدراس الحلوة بتاعت التجمعات يعني لازم يا جميل تبقى مكيف نفسك ع كل شيئ

يعني طالما مالناش الا مصر فلازم تكيف نفسك وانا برده ف سنك لما كنت بنزل مصر بتضايق لكن كنت بضايق لاني مولع بالسيارات فكانت ايامي لسه البيجو 79 والمرسيدس اياها هي التوب فتخيل بقى كنت انزل اتخنق ايه ده البلد مفيهاش عربيات حلوة طبعا دلوقتي غير خالص ممكن تلاقي حاجات مالهاش حصر ياراجل انا كنت بشوف المايباخ ع كوبري الفنجري وما ادراك ما المايباخ ، يعني اللي اقصده زي ما بيقولوا الكوايتة عندكم وسع صدرك

عارف تنتقد مصر ف ايه وتزعل ف التعليم صدقني تعليمنا الجامعي نظري قوي حتى ف كليات العملية من طب وهندسة وصيدلة لما تيجي تقارنه بدول تانيه زي الهند فيه فرق وماليزيا مثلا

يعني ده اللي يهمك ، لان الاحوال بتتغير صدقني اللي قلب مصر من ملكية لجمهورية ف ساعات يقلبها تاني عادي ما بصش لظاهر الامور عندك الاساس التعليم وده اكبر مشكلة لو ف مصر التعليم اتحسن صدقني كل ده هيتغير غير مناهجك وطورها وساعتها اتفرج

وشوية مبادئ وقيم لما تتوجد ف المجتمع المصري هتفرق كتير

وشد حيلك واطلع من الكويت ع دولة زي نيوزلاند او كندا ادرس هناك صدقني اكبر غلطة لو درست ف اي جامعة عربية وفر المشوار

لانك هتقول ادرس ف جامعة عربية ف مصر او غيرها وبعدين لما انشف اطلع بره

وف الاخر بتلاقي نفسك بتعمل اللي كان المفروض تعمله وانت صغير

من دلوقت ركز ف كده بدل ماتقعد تذاكر IELTS ووجع قلب خدها من قصيرها ياريس

وانا من زمان كنت اتناقش مع قرايبي يقولك الخليج ده ايه والفلوس مع التيوس وما شابه ذلك ولما شافوا اتغيرو وانا مازلت بقولك ميزة الخليج الى حد ما انهم مش عارفين فاستعانوا باللي بيعرفوا

احمد ربنا انك ف الكويت انت لو ف دبي كنت هتعاني لما تنزل مصر وتقارن مترو دبي بمترو مصر اللي كان ممكن مترو مصر يبقى قمة ف الرقي اكتر واكتر لان احنا فاهمين اكتر ونقدر نتعاقد لشغل احسن

[president]

من الواضح ان موضوعي هيسبب مشاكل انا مش عارف ليه لاني فعلا بحكي اللي حصل لي كمتغرب بعيدا عن مصر و بحكي اللي حصل لي فعلا في مصر سواء في الذهاب للمصالح الحكومية

العزيز محمد . مش عارف انت ليه أخدت الموضوع بالحساسيه دى . من حقك تحكى وتتكلم مفيش حد منتقد كلامك .

احنا بس حبينا نوضح ان الحاجات اللى انت شايفها سلبيه فى مصر دى حاجات موجوده فى كل مكان فى الدنيا وخاصة فى قطاع الحكومه .

يعنى الموضوع مش قاصر على مصر بس . بس اسمحلى اقولك حاجه انت فعلا لما تكتب وتقول ان الخضره والعماير على الطريق الصحراوى

دى حاجه غريبه ومستغربها ففعلا دى حاجه غريبه جدا انت شايفها حاجه سلبيه طب ليه ؟

فى يامحمد ناس كتير بتحاول تقنع نفسها ان مصر دى ازبل بلد فى الدنيا وان كلها فساد ورشاوى والخ ... وانت أكيد عارف بقيت الكلام .

بس -فى رأى- دول ناس بيبرروا لنفسهم حاجات تانيه زى مثلا انه عارف انه هيفشل فى مصر .

أو الغربه والهجره بالنسبه له أفضل ودا من حقه طبعا بس عايز يريح ضميره ان العيب فى البلد مش فيه .

مع ان عادى جدا أقول انى متغرب والغربه فيها فايده أكتر بس بلدى مش وحشه وانى ناقم عليها.

ولا يبقى الأمريكان والأوروبين اللى بيشتغلوا فى السعوديه عشان يستفيدوا شايفين بلدهم زباله هما كمان .

وارجع تانى أقولك مثال الغربه فى ناس بتشتم فى الخليج والسعوديه بالذات لمجرد انه فشل فبيحاول يثبت ان العيب مش فيه وان العيب فى البلد .

هتسال وطب مش العيب في البلد ازاى والبلاوى اللى احنا بنسمعها ?.

أقوللك عشان الناس دى هى اللى أهانت نفسها وقللت من نفسها سواء من ناحية المرتب او فى شروط العقد او انها تيجى على كفيل مش محترم .

تصدق انا اعرف واحد جاى فيزه حره ب 22 الف جنيه عشان يشتغل عامل فى مخزن ب 1200 ريال طب بالذمه العيب فى مين . ماعلينا مش عايزين نخرج بره الموضوع .

فى ناس كتير يامحمد تقوللك الزحمه والخنقه والرشاوى وينسى ان معاه بكالوريوس هندسه ولا طب ولا حقوق ولا .... والبكالوريوس دا يكون واخده بملاليم

من الجامعات المصريه وعمله قيمه وجابله مرتب كويس . دا على سبيل المثال .

مصر يامحمد ممكن اختك ومراتك تخرج براحتها وانت مش خايف عليها -فى حوادث فرديه آه بس احنا بلد فيها 80 مليون مش بلد عدد سكانها أقل من مليون -

مش زى بلاد تانيه استحاله مراتك تطلع بره البيت لوحدها .

نقطه أخيره فى الموضوع حب البلد أو كرهها حاجه فى البنى آدم عمره ماهيغيرها يعنى مهما ا اللى بيكرهوا البلد وبيكتبوا عن سلبياتها بطريقه توحى بالكره - عشان بس

ما تفهمش كلامى غلط لأن فى ناس بتحب بلدها وبتنتقدها - هيقنعوا الناس كلها انها تكرها ولا الى بيحبوها هيقنعوا اللى بيكرهوها انهم يحبوا البلد .

على العموم كمل يامان وفضفض براحتك دا من حق أى حد .

تحياتى ليك

تم تعديل 21 أكتوبر 2009 بواسطة president

[OReX]

من الواضح ان موضوعي هيسبب مشاكل انا مش عارف ليه لاني فعلا بحكي اللي حصل لي كمتغرب بعيدا عن مصر و بحكي اللي حصل لي فعلا في مصر سواء في الذهاب للمصالح الحكومية

العزيز محمد . مش عارف انت ليه أخدت الموضوع بالحساسيه دى . من حقك تحكى وتتكلم مفيش حد منتقد كلامك . احنا بس حبينا نوضح ان الحاجات اللى انت شايفها

سلبيه فى مصر دى حاجات موجوده فى كل مكان فى الدنيا وخاصة فى قطاع الحكومه . يعنى الموضوع مش قاصر على مصر بس . بس اسمحلى اقولك حاجه انت فعلا لما

تكتب وتقول ان الخضره والعماير على الطريق الصحراوى دى حاجه سلبيه ففعلا دى حاجه غريبه جدا انت شايفها حاجه سلبيه ليه ؟

فى يامحمد ناس كتير بتحاول تقنع نفسها ان مصر دى ازبل بلد فى الدنيا وان كلها فساد ورشاوى والخ ... وانت أكيد عارف بقيت الكلام . بس -فى رأى- دول ناس بيبرروا

لنفسهم حاجات تانيه زى مثلا انه عارف انه هيفشل فى مصر . أو الغربه والهجره بالنسبه له أفضل ودا من حقه طبعا بس عايز يريح ضميره ان العيب فى البلد مش فيه . مع

ان عادى جدا أقول انى متغرب والغربه فيها فايده أكتر بس بلدى مش وحشه وانى ناقم عليها. ولا يبقى الأمريكان والأوروبين اللى بيشتغلوا فى السعوديه عشان يستفيدوا

شايفين بلدهم زباله هما كمان .

وارجع تانى أقولك مثال الغربه فى ناس بتشتم فى الخليج والسعوديه بالذات لمجرد انه فشل فبيحاول يثبت ان العيب مش فيه وان العيب فى البلد . هتسال وطب مش العيب

في البلد ازاى والبلاوى اللى احنا بنسمعها ? أقوللك عشان الناس دى هى اللى أهانت نفسها وقللت من نفسها سواء من ناحية المرتب او فى شروط العقد او انها تيجى

على كفيل مش محترم . تصدق انا اعرف واحد جاى فيزه حره ب 22 الف جنيه عشان يشتغل عامل فى مخزن ب 1200 ريال طب بالذمه العيب فى مين . ماعلينا مش عايزين

نخرج بره الموضوع .

فى ناس كتير يامحمد تقوللك الزحمه والخنقه والرشاوى وينسى ان معاه بكالوريوس هندسه ولا طب ولا حقوق ولا .... والبكالوريوس دا يكون واخده بملاليم من الجامعات

المصريه وعمله قيمه وجابله مرتب كويس . دا على سبيل المثال . مصر يامحمد ممكن اختك ومراتك تخرج براحتها وانت مش خايف عليها -فى حوادث فرديه آه بس احنا بلد

فيها 80 مليون مش بلد عدد سكانها أقل من مليون - مش زى بلاد تانيه وانت عارف قصدى .

نقطه أخيره فى الموضوع حب البلد أو كرهها حاجه فى البنى آدم عمره ماهيغيرها يعنى مهما ا اللى بيكرهوا البلد كتبوا عن سلبياتها بطريقه توحى بالكره - عشان بس ما

تفهمش كلامى غلط لأن فى ناس بتحب بلدها وبتنتقدها - هيقنعوا الناس كلها انها تكرها ولا الى بيحبوها هيقنعوا اللى بيكرهوها انهم يحبوا البلد .

على العموم كمل يامان وفضفض براحتك دا من حق أى حد .

تحياتى ليك

والله كتبت ما لم استطع كتابتة

جزاك الله كل خير

واصل يا اخى متابعين معك ان شاء الله