كيف اصل لمطار برج العرب من الجيزة

[روح الحياة]

إخوتي وأخواتي المغتربين كلكم تعرفون ان الطيران الإقتصادي تم تحويله الفترة القادمة لمطار برج العرب بعد ان كنا نذهب لمطار النزهة . وسؤالي لكم دام فضلكم أرجووكم لأني مسافرة بعد يومين وانا

من فيصل الهرم وعاوزة أطلع لمطار برج العرب دلوني آخد مواصلات ازاي لأني أخاف آخد تاكسي مخصوص بصراحة . أنا مسافرة على فلاي دبي وكنت باخد ميكروباص مكيف من مشعل لغاية موقف اسكندرية الجديد ومن هناك تاكسي

لمطار اسكندرية على طول لأنه في العمار . لكن طبيعة مكان مطار برج العرب إيه عمار واللا صحراء واركب منين زي ماقلت لكم من مشعل برضه واللا فيه مكان لمواصلات برج العرب مخصوص وهو مكانه فين بالظبط الله يكرمكم

؟؟؟؟؟؟؟؟؟؟؟؟

رجاءا لكل الإخوة والأخوات دلوني على الطريق الصحيح ضروووووري لأني محتاسة بحيث اني ما آخدش تاكسي من هنا لهناك حرصا على نفسي ليس إلا . انتظر ردودكم .

[محمد عبدالعزيز]

الحقيقة طبيعة مطار برج العرب فى منطقة صحراوية ومفيش مواصلات كتير رايحة وجاية عليه.

ومع ذلك أعتقد حتلاقى مواصلات -يا إما أتوبيسات أو تاكسى زى تاكسى العاصمة بتاع القاهرة- من الموقف الجديد.

إذا كنتى لوحدك يبقى أنصحك تروحى موقف اسكندرية وتسألى من هناك, وإذا كان معاكى حد ممكن تاخدوا ميكروباص مخصوص من العامرية أو من قدام ماكدونالدز - اسمه موقف الكافورى - لغاية المطار, ده طبعاً حيكون أوفر وأقل فى الوقت يعنى ممكن من 30 ل 50 جنيه يكون حلو قوى عليه لأن المسافة حوالى 25 كم.

ماعنديش فكرة بصراحة من موقف اسكندرية ممكن تركبى إيه وبكام, بس ممكن أسأل بكره لو رحت هناك وأجاوبك لو عرفت معلومات جديدة.

[روح الحياة]

أشكرك أخي محمد على سرعة الرد والإهتمام بصراحة انا معايا طفلين واخاف اني آخد ميكروباص مخصوص زي ما قلت من موقف الكافوري يعني مش تاكسي العاصمة من موقف اسكندرية أحسن لنا واللا هارجع بيه مسافة كبيرة للمطار تنصحني بايه نصيحة اخيرة .لانك بتقول صحراء

وميكروباص لوحدنا يخوف واللا ايه ؟

[محمد عبدالعزيز]

لا شكر على واجب, ومادام فى أطفال وأكيد شنط كمان يبقى ماينفعش تركبى من العامرية أو من الكافورى لأنك حتنزلى فى الطريق وأكيد حيبقى صعب عليكى تمشى بالأطفال وشنط وممكن تعدى الطريق الصحراوى كمان.

حضرتك كده تتوكلى على الله وتنزلى موقف اسكندرية أحسن وتاخدى تاكسى من هناك أو لو فى أتوبيسات بولمان أو السهم الذهبى كله هناك فى الموقف, بس تعملى حسابك على الوقت.

المسافة من موقف اسكندرية لغاية مطار برج العرب تعمل 45 دقيقة مستريح جداً, يعنى ممكن تبقى أقل من كده بس انتى اعملى حساباتك على إنها 45 دقيقة.

فى معلومة أعرفها من صديق كانت زوجته مسافرة من مطار برج العرب وقال لى إنها اتصلت بالشركة بتاعة التاكسى وحجزت ميعاد والتاكسى جالها لحد البيت ووصلها بسلامة الله وأخد حوالى 70 جنيه, بس هى كانت فى السيوف فى اسكندرية, والموقف يعتبر أقرب من السيوف.

أنا سألت على رقم شركة التاكسيات بتاعة اسكندرية فى الدليل, وهو 19559 ياريت تكلميهم وتتفقى معاهم على معاد وصولك عشان تضمنى توصلى فى الوقت المناسب.

إن شاء الله توصلى بالسلامة.

[روح الحياة]

بجد لساني عجز عن الشكر لك بارك الله فيك ورزقك كل الخير وإذا احتجت اي شئ أأمرنا بس . مرة تانية أشكرك على اهتمامك . وسأتصل برقم الشركة إنشاء الله .

[محمد عبدالعزيز]

يافندم مافيش داعى للشكر, ياريت كنت أقدر أعمل حاجة أكتر من كده, وعلى فكرة أنا سألت النهارده مالقتش فى أتوبيسات بولمان أو ماشابه بتروح المطار, يبقى كده مفيش حل غير التاكسى, وإن شاء الله توصلوا بالسلامة.

دعواتكم وانتم مسافرين.