احترت ما بين قلبي وعقلي .. والحيرة مرار

[se_ Elsyed]

مع الاعتذار لست الكل ... ليلى مراد اللي مطلعينها عروسه كاوتش في المسلسل الأخير الفقير فنياً

------------

قصدي من موضوعي هذا إن كثيراً ما يُجد الانسان نفسه في حيرة في اتخاذ قرار ... هذه الحيرة نابعه من الصراع العاطفي والعقلاني داخله

وخصوصاً اذا كانت قرارات تتعلق بالعمل

لا أنكر إننا شعوب عاطفيه ...

وده في احيان كتير كويس

أوقات كتير بأكره قسوة وتحجر قلب الغربيين ..

يعني لما يكون مريض عنده مرض خطير ... بدل ما ينقلوا له الخبر بطريقه أدميه .. لأ .. تلاقيه راح مديها له زي الدبشه في وشه

ومما لا شك فيه إن الجانب النفسي المتعلق بالقلب والعاطفه مهم في حياتنا ..

بل بالعكس .. ده ممكن يساعد على تقوية المناعه ....وأشياء أخرى

يعني بتوصل لحالات الحمل عند النساء ... هذه حقيقة

لي زملاء هنا قعدوا سنوات طويلة .. كانوا متغربين عن زوجاتهم ويادوب بينزل أجازات سنويه ولا يحدث حمل نتيجة ان الغربة مأثرة على الرجل وزوجته وبالتالي ما بيحصلش نصيب في الحمل إلا لما يستقروا نفسياً

نرجع لموضوع قرارات العقل والقلب

لما تكون في موقع مسئولية يتحتم عليك اتخاذ قرار يتعلق بمصير أشخاص معينين

بالبلدي وببساطه كده

كلنا عارفين الأزمة الأقتصادية .. وتأثيرها على الجميع ... ومحاولة علاجها بتخفيض اعداد الموظفين أو تخفيض رواتبهم وأمتيازاتهم ....

هنا بقى ييجي الصراع اللي ممكن يخلي بعض أصحاب القرار ما يعرفوش يناموا بالليل

وتسمع كلام من عينة ....

يا عم حرام عليك ده عنده عيال

( استغفر الله العظيم ) خلي بالك ... كلامك ده هايتسبب في قطع رزق ناس - وانا لا اتفق مع الرأي إن في حاجه اسمها قطع رزق لإن الرزاق هو ربنا وقد يكون ترك العمل لشخص ما سبب في إن تتفتح له أبواب اخرى أفضل وأرقى

مثال أخر

وده بقى بالذات بيجنني وبامشي أكلم نفسي

على سبيل المثال

تلاقي باعه جائلين فجأة أحتلوا شارر من الشوارع او ميدان من الميادين بحجة اكل العيش ... وبالتالي على المُشاة أو السيارات إنها تعمل أكروبات عشان تعرف تمشي .... وبالتالي رويداً رويداً يتحول الشارع إلى سوق رسمي ولا عزاء لأصحاب البيوت ولا عزاء للجميع ولا للنضافه والضوضاء و و و

وتيجي تفتح بؤك

يقول لك

يعني هي جت على دول ؟؟؟؟

يا عم دول غلابه سيبهم ياكلوا عيش ...

و

و

و

العام الماضي

إتنصب علينا في موسم الحج

مش نصب كامل ..

لكن البيه جمع من الناس 380 الف ريال على سكن ومواصلات ومستوى معين ...

وطبعاً لان ما فيش ضمير ... فحب يخنصر ويوفر وكربس الناس وبهدلهم .. لكي يحقق اكبر ربح

لما رجع ... وأستحلفت له .. وقلت هاعلقه من رجله وادبه بالقانون ..

كانت اول المعترضات والدتي .... حرام عليك ده عنده عيال .... وخلاص إحنا حجينا واللي كان كان ....

طب يا ستي ما هو هايعمل كده مره واتنين وعشره عشان ما حدش بيقف له ....

خلاص بقى والنبي وسماح المره دي

لكن عشان سماح ماتت .... قلت ما بدهاش .... وعشان ما يعملش كده تاني ... عقلي تغلب على عاطفتي ... وخليته من مطاريد الجبل دلوقت وهرب من كفيله ومن سكنه ومن الرياض كلها لإن إتعمل له قضية رسمي وإسمه نزل على قوائم الممنوعين من السفر إلا لما يخلص قضية النصب اللي عليه دي ..

مثال أخر

حوادث العربيات

تبقى ماشي بعربيتك لا بيك ولا عليك وييجي واحد متهور وارعن ويقوم رازعك

تيجي تطالب بحقك تسمع بقى

إنت هاتاخد العوض ؟

يا عم إحمد ربنا إنها جت في الحديد

خلاص بقى المسامح كريم وده غلبان وعنده عيال

يا سلام ؟؟؟؟

وهو لما كان ماشي بتهور .. كان عنده اكلان مش عيال ؟

وهو لما طنش ووفر الملاليم فلوس التأمين على العربية وتحايل على القانون ... كان عنده جرب ؟

مثال اخر وهو كلكيعه في حياتي

ربنا رزقني بحارس عماره في مصر ... يقول للكسل قوم وأنا أقعد مطرحك

مش بس كده ..

ده بيعطل المراكب السايرة

طول النهار نايم ... ومش شايف شغله ...

مثلاً

جه عمل للعمال شاي راح اندلق منه على رخام السلم ... مش يمسحه بقى في لحظتها .. لأ غزاي وينام أمتى ؟

فنبهته .. وقلت له خلي بالك الشاي بالذات هايبقع لو ما اتمسحش بسرعه وهايعلم على السلم

اقسم بالله ييجي اسبوعين والمنظر كما هو ... وفين وفين لما مسحه لحد دلوقت في عاهه مستديمة على السلم

ماشي

ييجي عينه بجحه في المطالبه بالفلوس

لكن يساعد او يحسسك انه موجود .. لأ

زوجتي قالت في البداية كويس أهو بدل ما نجيب شغاله .. لأ أهي زوجته تساعدني على قد ما تقدر وهي أولى ...

زوجته طلعت شاربه من نفس الكاس ... ولا بتقولها إنتي فين يا ست ..

قلت لها هي حره سيبيها على راحتها ونتصرف إحنا

كل ده والله وبنتقي الله فيه .. وهو عنده ييجي 4 بنات منهم النبت الكبيره سنها ييجي 30 سنة معوقه حركياً وبنقول أهو كله بثوابه

لكن ما يسيباكش في حالك ... لأ يضرك ويبهدلك

كنت بأسيب له فلوس وأقول له العمال لو احتاجوا حاجه روح أشتريها عشان ما يتعطلوش ويتحججوا .. يتحمس ويقول من عيني

اجي بعدها بيومين الاقي الدنيا واقفه ..

ايه يا عم ؟

اصلي نسيت

اصلي روحت مالقتش عمال يطلعوا أسمنت مثلاً أو رمله

مع إن العبور مرشوقه ناس من دي وملطوعين في الشوارع ليل نهار

ماشي يا عم واللهم طولك يا روح

اخويا أول أمبارح حكي لي قصة خلاني خرجت عن شعوري

البيه البواب طالع يعسس في الشقة وعمال يدور على حاجه إحنا مش عارفينها

أخويا بيسأله : في حاجه يا حج ؟

يقول له : أبداً يابوي ... مافيش ... إنما إيه الكبل اللي هناك داهو ؟

أخويا قال له : سلامة الشوف ... ده خرطوم ميه أسود يا عم .... كبل إيه ؟؟؟؟

اتاري المصيبة حصلت في وجوده

فجأة الأسانسير عطل من إسبوع ...

جت شركة الصيانه ..

لقوا إيه ؟

لقوا الكبل اللي بيغذي الأسانسير ونازل من غرفة السحب اللي فوق ... مسروق ومفكوك بحرفنه

يا نهار أسود

جه البيه يقول لأخويا : انا عاوز أحذرك من العمال اللي عندكم ( اللي هما تبع المكتب الهندسي ) لانهم حرامية يا باشمهندس

قال له : ليه خير سرقوا من حضرتك أيه ؟

قال له : سرقوا كبل الأسانسير

قال له : والله لو هما حراميه ... يبقى انت راجل مالكش لازمه ووجودك زي عدمك ومش هالوم أي حد يسرق حاجه هنا لإن للأسف ما عندناش بواب زي مخاليق الله

الكبل ده يا ساده لو اتجمع واتحط في كرتونه لن يقل طولها عن اتنين متر وأرتفاعها متر .. يعني كإنك شايل جُثه بني ادم ونازل بيها على السلم

جه صاحب العمارة وهو بالصدفه مهندس كهرباء ... أعتذر لاخويا وقال له ده إنسان كسول وعديم الدم وأستبعد تماماً الصنايعيه يكونوا هما اللي عملوها .. لإن هايستفيدوا إيه .. وأنا قلت للبواب تطلع تنزل تجيب الكبل وإلا هاحبسك

العجيب بقى إن الكهربائي مخلص شغله من حوالي شهرين ..... واللي شغال دلوقت بتاع الجبس ولسه مخلص وبتاع السيراميك هيبدأ خلاص أهو

ويعلم الله

إن الكهربائي لما خلص وكنت أنا في مصر

أتصل بي ولقيته حاطط الأسلاك اللي باقيه منه حتى لو سلك طوله متر ... كلها في كرتونه .. وفي بكر ولفات لسه ببرشامها زي ما هي .. وسلمها لي رسمي وقال لي تمم عليها يا بيه ...

ييجي بقى صاحب العمارة كل شويه يزنقني ويزنق أخويا ويطلب مننا إننا نطالبه بطرد البواب ده ويجيب لنا واحد تاني نشيط وعاوز يعني يرمي الكوره في ملعبنا

بأمانة .. انا مش قادر اقول له جو اهيد ... او أتكلم عنه بسوء أمامه لإن صاحب العمارة مجنون خلقه وعصبي لأقصى حد مع العمال اللي شغالين عنده وله ييجي 10 عماير في العبور ويادوب لو نطقت وقولت أيوه هايروح طارده هو وبناته وزوجته في الشارع

وبالتالي علي تحمُل البلوى دي وأمري لله ... وده تحكيماً للعاطفة ..

وخد من ده كتير في أمور الحياة والواحد ما بيبقاش عارف ... هو صح ولا غلط ؟

[الباشمهندس ياسر]

فيه فرق شاسع اوى بين الشغل و الصدقة

دلوقتى لو هنتكلم فى صدقات .. يبقى تشوفله غرفة يسكنها هو و بناته و اعملهم شهرية يعيشوا منها و يبقى بارك الله فيك و فى ميزان حسناتك

انما لو هنتكلم فى شغل ... فالبواب بتاعكم بيعانى من قلة الضمير و مش بيشوف شغله و كمان حرامى بناءا على كلامك

يبقى المسألة محسومة و مش عاوزة كتر كلام ولا تأنيب ضمير ولا الجو ده خالص

تحياتى و تمنياتى بقرار صائب

[ذهبية]

بين القلب والعقل بين العاطفة و الواقع دايما فية حيرة

بس انا افضل دايما افرق بينهم العاطفة عاطفة و العقل عقل

فية مواضيع لا تسمح للعاطفة لو فيها ضرر للناس زى موقف البواب و موقف نصاب الحج لان دول بجدمش هيضروك انت بس مش

هاتقف عليك دة غيرك وغيرك و بالتالى انت بتشارك فى الغلط انة سيبتة يستمر و بايدك كنت توقفة

ابسط شىء ان حضرتك تهددة انة يشوف شغلة او هيمشى و بعد كدة لو ما نفذ يبقى هو اللى عمل كدة فى نفسة لانة مسئول عن

ممتلكات ناس تعبانة فيها و شقى السنين

يعنى اية انى ممكن اسيب الشقة و مطمنة انة فيها بواب بيحرسها و ارجع مثلا لا قدر الله الاقيها اتسرقت لان البية نايم و مش شايف شغلة

طالما حضرتك من الاول شايف انة مقصر يبقى يتحاسب على التقصير لان دة شغلة و بيتحاسب علية قدام ربنا

مواقف القلب و العاطفة تظل للقلب والعاطفة طالما مفيش فيها ضرر للاخرين

ومواقف العقل لا دخل للعاطفة فيها خد قرارك بدون تردد بعقلك و تاكد انة صحيح

[مصري أصيل]

كان ليه واحد صاحبي قالي مره مثل عجبني أوي و في الحقيقه أيامها كنت أول مره أسمعه و بحاول من بعدها أني دايماً أطبقه علي قد ما أقدر و المثل هوه ( جمد وشك ساعه و لا تعكر دمك العمر )

فدايماً فيه قرارات بتحتاج مننا أن نجمد وشنا فيها و الا هنندم علي اللحظه دي طول عمرنا ده رأيي .

أما بخصوص البواب فأنا هحكيلك علي موقف هيحسسك أد أيه البواب بتاع العماره دي نايم علي ودانه بشكل كبير جداً

أنا أول ما إتجوزت و كنا سهرانين أنا و زوجتي بنتكلم و بعدين جات سيرت سطوح العماره و لقيتها بتقولي أنا نفسي أشوف سطوح العماره دي شكله أيه ... و حيث أن أي عريس جديد ما بيأخرش أي طلب علي عروسته في الأيام الأولي للجواز و انت سيد العارفين فقلتلها يلا بينا نطلع و أهو بالمره نعد النجوم و نشوفهم وصلوا لفين .

و كان الدور السادس و الأخير للعماره لسه ما سكنش و العماره كلها سكنت . و أنا ساكن في التالت و العماره ست أدوار . المهم خلصنا الدور الخامس و لسه بنخطي أول سلمه في السادس و لقيت اللي جاي جري علي السلم من الدور الأرضي اللي ساكن فيه و في ثانيه كان بقي عندي و لقيته بيقولي هو أنت يا بيه ؟ طيب مش تقول أنك طالع السطوح ؟...طيب حصل خير ... و نزل و أنا بصراحه المفاجئة عقدت لساني و من يومها و أنا نفسي أعرف الراجل ده حس إذاي أن فيه حد في الدور السادس و علي فكره إحنا كنا الساعه إتنين بعد نص الليل . و من يومها و أنا بسافر و حاطط في بطني شادر بطيخ و عمري و لله الحمد ما خفت علي الشقه .

تم تعديل 24 أكتوبر 2009 بواسطة مصري أصيل

[emano]

بص هو مينفعش الواحد يسكت على الغلط الى يقدر يغيره

لان ممكن تيجى للواحد مصيبه من تحت راس واحد كسلان زى البواب بتاعك

انا ححكيلك على بواب سابق للعماره فى يوم بالليل شمينا انا وزوجى رائحه شياط

طلعنا خارج الشقه لقينا الريحه قويه واحنا ساكنين فى الدور ال12المهم جاء زوجى يركب الاسانسير قلتله لقه انزل على رجلك اضمن

المهم نزل واتارى فى واحد مستهتر القى بالسجاره فى بير الاسانسير

وكان فيه ورق فولع وحرق الكبل بتاع الاسانسير وطبعا البواب كان واقف فى السطح بيشم هواء فى الصيف فطبعا محسش بحاجه غير لما انطفه الحريق من سكان العماره

وطبعا اطرد وتكلفنا مبلغ محترم علشان التصليح