قتلى وجرحى بالعشرات في حادث تصادم قطارين بالعياط

[newcomer]

جريدة الوفد كتبت ان هناك تعويض 5000 .. نعم خمسة الف جنيه تعويض للمتوفى

وتعويض الجريح هو الف جنيه فقط لاغير

اتمنى ان اشاهد مسؤول كبير أو وزير معروف به كسور هؤلاء الجرحى البسطاء ثم يخبرني كيف سيعالج نفسه بمبلغ الف جنيه !!!

فى جريدة المصرى اليوم ذكر ان التعويض للمتوفى عشرين الف جنيه

و للمصاب حسب الاصابه

http://www.almasry-alyoum.com/article2.aspx?ArticleID=230851

[se_ Elsyed]

الاخت نيو قمر

الاخ أبو أدهم

تحيه طيبه وبعد

اطلعوا لي من ورا الترابيزة

ايها السادة الكرام

اذا لم يكن مبارك مسئول عن تلك الكوارث .. اومال مين المسئول .... الحاجه ام سين سين الست الكبيرة اللي قاعدها في حالها وكافيه خيرها شرهها ؟

اقسم بالله

واتحدى ثم اتحدي

ان لو عندنا اهتمام بالاحصاء والارقام .. فسوف يتضح إن ضحايا عصر مبارك هم أكثر عدداً من ضاحايا الحروب في مصر من ايام الهكسوس يمكن لحد 73

واتحدى

ولا اهول

أذا أضفنا لضحايا الاهمال والقتلى ..

الضحايا المصابين بالملايين بالفيروس الكبدي الوبائي والسرطان والفشل الكلوي نتيجة تعيين مبارك لمجرمين عتيدي الاجرام أمثال يوسف والي وأعوانه

بالمناسبة

خساير الحادث الاخير المادية ... على الريق كده .. 50 مليون جنيه ... بالصلاتو عالنبي ... مين هايشيل الليلة دي ؟

- مين مسئول يا سادة عن تعيين صاحب شركة منصور شيفورلية وزيراً للنقل يعني لا فاضي لنا ولا للي خلفونا ولا لنقل ولا مواصلات ؟

- مين مسئول عن تحدي الرأي العام اليوم وخروج المتحدث بإسم رئيس الوزراء ويعلن إنه لا نيه لإقالة الحكومة ؟

- مين مسئول عن محاسبة هذا الوزير الفاشل اللي صرح بعضم لسانه بعد ما هبش 8 مليار جنيه وقال ... حاسبوني من أول مارس 2009 وهاتشوفوا ؟

- آه خدوا دي .... ههههههههههههههه ده ضحك كالبكاء

أمبارح وعلى الهواء مباشرة ومن خلال برنامج الحياة اليوم وأثناء مناقشة بعض السادة عن مسئولي النقل ومنهم نائب رئيس هيئة السكة الحديد .... اعلنوا خبر عاجل .... هههههههههه حادثة قطار طازه في فرشوط أعتقد تبع محافظة أسيوط .... السيناريو كالتالي

المزلقان مفتوح ... ما فيش عامل مزلقان .... عربية لسه بتعدي .. جه القطر خبطها وطوحها بعيد ... أصابة 5 أصابات خطيره

هههههههههههههههههههههههههههه

نائب رئيس الهيئة وشه جاب ألوان وبيسأل مراسل البرنامج اللي في موقع الحادث.. هو المزلقان كان عليه اشارات ألكترونية وضوئية ... قال له لأ طبعاً ؟

قال له طب - بالنص والله العظيم - المزلقان عليه ( شادوف ) ؟

أنا اعرف ان الشادوف ده زمممممممممممممممممان بتاع الميه اللي بيسقوا بها الارض من الترعه ... قال له ايوه عليه شادوف ..... لكن كان مفتوح

الشادوف هو الدراع الخشب اللي بيقفل المزلقان يا رجاله

8 مليار ... ومزلقان بشادوف

!!!!!!!!!!!!!!!!!!!!!!!!!

سيادتك بس ده مش اي شادوف

ده شادوف مصنوع من البلاتينيوم الخالص والمرصع بالالماظ والزبرجد والعقيق ... تخيلوا ان الشادوف ده ممكن يكلفنا 100 مليون ؟

مين المسئول عن الشواديف دي ؟

من الذي لم يُرسي في الوطن مبدأ المسائلة والثواب والعقاب ؟

عارفين مبارك عمل كده ليه ؟

لإنه أول واحد سيُسائل لو حاسب وزير وأقاله أو أحاله الى الجنايات او سحب الثقة من الحكومة

مين مسئول يا بو أدهم عن تعيين واختيار ممدوح إسماعيل بخط إيده في مجلس الشورى وهو صاحب تاريخ أجرامي ... مش مبارك يا حبيبي ؟

ومين هربه بره البلد .. مش رئيس ديوان مبارك وقال بكل بجاحه إنه صاحبي ؟

ومين مسئول عن رؤية كل تلك الكوارث . مش مبارك ؟

مين مسئول عن تحدي الشعب وأستمرار يوسف والي في عمله عشرات السنين وهو قاتل آثم أصاب الملايين بالسرطان ... مش مبارك ؟

إذا أحضرت نقاش يدهنلك الشقة الجديدة اللي في العبور .. حتلاقيه بيطلصق .. ويكروت .. ولو مش واقف على إيده حيبهدل لك الدنيا

هل ياترى مبارك هو المسئول ؟؟

حاسب بس يابو أدهم

انت دخلت عيشه على ام الخير

لو النقاش شغال مع نفسه يبقى هاحاسبه وهانفخه .. ولو شغال زي ما حاصل تبع مكتب الديكور .. باحاسب انا المكتب

ودي ملكية خاصة خلي بالك

لكن الفشلة من اول الوزير لحد أصغر موظف مين المفروض يحاسبهم ؟

مش مبارك يا ريس ؟

نتحدث عن حالة عامة للبلد .. تجسدت فيها البلادة والتبلدوالاستهتار في أبشع صوره ..

لا أحد يقوم بعمله بشكل متقن على الإطلاق ..

ومين شايف كل ده وساكت ؟

بالتأكيد إنت أكتر واحد يكلمنا في موضوع لبن الاطفال الصيني اللي خلطوه بمسحوق الميلامين .... عرفت عملوا ايه الصين في أيام معدوده ؟

اعدموا كل من تورط في تلك الجريمه

أنت عارف ان الصين

الصن وهي مليار ونص اهي ومساحه مهوله

وصلت لدرجة إن مافيش حوادث قطارات عندهم دلوقت نهائي .. او على رأي صلاح نظمي .. نوهائي

إنتي بقى في بلدك ... شوفت راس كبيرة إتحاكم في مره ولا حد قال له كخ عيب في تلك المآسي المتكررة كل يوم ؟

أم سيتم الزج بالخراف الصغيرة لتكون اكبشة فداء لجرايم يرتكبها الكبار يا عزيزي ؟

و عمال الأمن زوغوا و لا ناموا و لا راحوا يتعشوا ....و الشركة اتسرقت

المفروض احنا لو موظفين فى الشركة دى هنلوم مين الاول؟؟

يا مدام نيو كمر

ده احنا في المصيبة دي كل يوم

كل يوم

كل يوم

هو في ايه يا جدعان ؟؟؟

فالحين بس منافقي الاعلام لو ماسورة مجاري عملوها جديد في نجع أو كفر يقولوا ماسورة مبارك للمجاري الجميلة

اومال في المصايب ما حدش بيجيب سيرته ليه ؟

حتى المدافعين والمتحمسين لجمال مبارك اللي عمال ياخدها كعب داير وبيلف البلد يعرف بنفسه ... في كل مصيبة بنلاقيه بيبلع لسانه ما بيسمعناش حتى الصلاو عالنبي

و

أكررها مره أخرى وأنا مسئول عن كلامي

إذا لم يكن الرئييس مسئولاً عن تلك الكوارث اليومية المتكررة ... فمن المسئول يا سادة ؟

[أسد]

لا أحد هنا يدافع عن أحد ..

ولا أعتقد أن أحديخلي مسئولية الرئيس بشكل كامل عما حدث في مصر في عهده ..

ولكن ..فضل ..

في مصر أشياء أخرى تستحق أن نضعها على أولويات التغيير .. ليس كلها الرئيس وابنه

نعم .. الرئيس عندما يرحل . ستتغير أمور كثيرة .. ونتمنى ونعتقد أنها ستكون للأفضل ,,

نعم .. نعتقد أن الرئيس لم يعد قادراً أو لم يعد بإمكانه التغيير الآت=ن ولا الإصلاح .

فالتغيير والإصلاح يحتاج بالإضافة غلى جهود الدولة .. إلى تفاعل شعبي .. والتفاعل الشعبي مع الوجوه الحالية أمر مستحيل ..

فلا أحد يصدقهم .. ولا أحد يعتقد في حسن نواياهم ..

مهما كان ..

صدقني يا أحمد .. أنا شفت أمور كثيرة تحسنت عما قبل ... وأن هناك بالفعل من الحكومة من يبذل الجهد ..

ولكن الناس عامة لا تشعر بهذا التحسن ..

بالفعل .. الوضع في مصر مأسوي .. وبالفعل ... الرئيس والحكومات المتعاقبة في مصر مسئولون عن هذا الوضع المأسوي .. فما يحدث اليوم ليس إلا نتيجة تراكمات السنوات الماضية..

ولكن ..

أنا أكرر وأقول ..

الرئيس مبارك ليس مسئول عن الحادث.. ولا تقع عليه أي مسئولية سياسية أو أدبية ..

هذا كلام واضح ..

ولكن . هناك أيضاً كلام آخر .. وواضح أيضاً ..

الرئيس سيكون مسئولاً .. إذا مر الحادث مرور الكرام .. أو إذا لم يلقى المصابون الرعاية الكافية .. أو إذا لم يلقى أهل المتوفين الإهتمام الكامل ..

كلامي ليس به خلط للأمور ..

ولكن أحاول أن أكون موضوعي بشكل أكثر.. وأحاول أن أكون متفاعلاً .. ولست منفعلاً...

الأحوال في مصر بحق سيئة جداً .. وتحتاج إلى إصلاح شامل وكبير ..

الأمور لن يمكن أن تتعدل في شهور أو سنوات قليلة ..

ولكن البداية من تطبيق القانون .. ومكافحة الفساد ..

الفساد الإداري والمتمثل في الإهمال والفوضى العارمة ..

في مصر ياسادة .. فوضى عارمة

أبطالها ..

هم المصريين جميعاً.. جميعاً ...

[newcomer]

الاخت نيو قمر

الاخ أبو أدهم

تحيه طيبه وبعد

اطلعوا لي من ورا الترابيزة

ايها السادة الكرام

يا فندم هو مين قال ان المسئولين الكبار ماعليهومش مسئوليه

" كلكم راع و كلكم مسئول عن رعيته"

لكن وجهه نظرى لو احنا كشعب ....ركزنا مع بعض

ان نلوم و نحاسب ( معنويا ...حتى!!) المخطىء الاساسى اللى كان عليه شغل و اهمله

بنفس قدر لومنا للمسئولين الكبار......ده يمكن يعلى شوية الاحساس بالمسئوليه عند الافراد

قناعتى يا فندم ان الاصلاح لازم يجى مننا ، من قاعدة الهرم

لازم كل ترس فى الماكينه الكبيره يشوف شغله صح.....الماكينه كلها هاتشتغل

و هيبقى اسهل انه يتعرف او يتشاف انهى ترس اللى فاسد!!

خلينا نجرب الطريقة دى شويه ....يمكن تنفع

ما احنا بقالنا كام سنه من ساعه ما بقى فيه معارضه و جرايد و فضائيات

بنلوم و نعارض المسئولين و .....و...... و مفيش حاجه حصلت!!

انا عارفة انه صعب انى اقنع حضرتك.....لأننا ببساطه بنمثل مدرستين مختلفين

حضرتك شايف ان الاصلاح يجى من فوق من رأس الهرم و ان لازم يكون فيه قدوة صالحة

و لحد كبير اكيد نظريه صح.....بس مش لوحدها

انا شايفه ان الاصلاح يجى من الخليه الواحده.....كل واجد يشغل نفسه بنفسه

كل واحد يحاول يصلح نفسه الاول و بعدين الدايره هاتوسع من حواليه

ربنا قال لنا: إن الله لا يغيِّر ما بقوم حتى يغيِّروا ما بأنفسهم .....

[مدام رحاب]

بيتهيألي في واحد نحس معانا في البلد ؟

لو عرفت الحل أتصل على زيرو 900 ست ستات ... أو على صندوق بريد ستمية وستين .. قصر العروبة

ي

ذكر أن مصر شهدت في السنوات الأخيرة العديد من حوادث القطارات ، من أبرزها حادثة فبراير 2002 والتي وقعت أيضا في مدينة العياط " 50 كم" جنوب القاهرة وعرفت بحادثة قطار الصعيد واعتبرت الأسوأ من نوعها في تاريخ السكك الحديدية المصرية حيث راح ضحيتها أكثر من ثلاثمائة وخمسين مسافرا بعد أن تابع القطار سيره لمسافة 9 كيلومترات والنيران مشتعلة فيه وهو ما اضطر المسافرين للقفز من النوافذ .

كما شهد 2006 ثلاث حوادث ، ففي شهر فبراير اصطدم قطاران بالقرب من مدينة الإسكندرية مما أدى إلى إصابة نحو 20 شخصا ، وفي شهر مايو من العام نفسه ، اصطدم قطار شحن بآخر بإحدى محطات قرية الشهت بمحافظة الشرقية ، مما أى إلى إصابة 45 شخصا .

وفي أغسطس 2006 ، اصطدم قطاران أحدهما قادم من المنصورة متجها إلى القاهرة والآخر قادم من بنها على نفس الاتجاه ، مما أدى إلى وقوع تصادم عنيف بين القطارين ، مما أدى إلى مقتل 80 شخصا ، بالإضافة إلى أكثر من 163 مصابا .

وفي التسعينيات ، وقعت حوادث قطارات عديدة من أبرزها مقتل 12 وإصابة 60 في تصادم قطارين على بعد 90 كيلومترا شمالي القاهرة في ديسمبر 1993 .

وفي فبراير 1997 ، أدى خلل بشرى وخلل فى الإشارات إلى وقوع تصادم بين قطارين شمال مدينة أسوان مما أدى إلى وقوع 11 قتيلا على الأقل والعديد من الإصابات .

وفي أكتوبر 1998 ، اصطدم قطار بالقرب من الاسكندرية بأحد المصدات الأسمنتية الضخمة ، مما أدى إلى اندفاعها نحو المتواجدين بالقرب من المكان وخروج القطار نحو أحد الأسواق المزدحمة بالبائعين والمتجولين ، مما أدى إلى مقتل 50 شخصا وإصابة أكثر من 80 مصابا ومعظم الضحايا ممن كانوا بالسوق أو اصطدمت بهم المصدة الأسمنتية.

وفي نوفمبر 1999 ، اصطدم قطار متجه من القاهرة إلى الاسكندرية بشاحنة نقل وخرج عن القضبان متجها إلى الأراضى الزراعية ، مما أسفر عن وقوع 10 قتلى .

وتنوعت أسباب الحوادث السابقة بين تهالك القطارات والإهمال وغياب الصيانة وعدم تطبيق معايير الأمان.

وما يضاعف من حجم الكارثة هو الاحصائيات التي جاءت في وسائل الإعلام ، حيث كشفت صحيفة " الوفد " مؤخرا أن أكثر من ستة آلاف مصري قتلتهم القطارات فى مصر خلال العشر السنوات الأخيرة وأصيب أكثر من 21 ألف مصرى ، موضحة أن متوسط عدد حوادث القطارات فى مصر كل عام حوالى 120حادثة قطار سنويا بمتوسط عشر حوادث كل شهر

.

عمو سين سين ... إنت متأكد إنه واحد بس ... طيب راجع نفسك ... طيب أقولك ... شوف الرابط ده وأكيد هتغير رأيك

http://www.youtube.com/watch?v=1hnQba4efow...feature=related

حسبنا الله ونعم الوكيل ... بس على فكرة إحنا نستاهل يجرالنا أكتر من كده ... علشان راضين بالظلم وساكتين

خالص تحياتى

[أبو عمر المصري]

هي إدارة محطات السكك الحديد دي كيميا ؟؟ ولا لوغاريتمات يا ناس ؟؟؟ كل كام شهر قطرين مخيشيين في بعض ؟؟

انا شايف لو احنا المصريين غير قادرين على إدارة السكه الحديد في بلادنا نروح نجيب فريق ياباني ولا حتى بنجلاديشي يدير لنا السكه الحديد

الناس اللى بتموت دي والأسر اللى بتتهد دي والخساير اللى بالملايين والسمعه اللى بأت في الحضيض دي مسؤلية ميين ؟

أرحموووونننناااا

[hanzalah]

أكيد متفقين ان الله لايغير ما بقوم حتى يغيروا ما بأنفسهم

لكن المسؤولية تقاس بحجمها .. يعني الوزير مسؤول أكبر أمام الناس والله من مسؤولية الغفير

سؤال : لماذا يذهب المصريون الى بلاد الدنيا ويساهمون بشكل جاد في بناء نهضتها ..

جواب: لأن هذه الدول بها " نظام " (System) في كل شيء

نسافر دول الخليج فنجد نظام يحاول تسهيل حياة الناس

نسافر دول اوربا وامريكا فنجد نظام وضعه ناس في مكان المسؤولية من أجل رفاهة شعوبهم

اذن الشعب المصري ليس مولوداً ولديه ميول فطريه نحو اللامبالاة والسلبية

يستحيل

هم زرعوها فينا عبر سنوات وسنوات من الحكم الفاسد

أن نبدأ اليوم أفضل من غداً الذي قد يكون متأخر جداً

كل الدول من حولنا تسبقنا في مجالات لاحصر لها ولايتسع المقام لذكرها

هل هو قدر على الأمة المصرية ان تهوي كل يوم درجة نحو الأسوأ

نأكل من مزروعات مياه المجاري منذ سنوات ولا ندري

يصاب ملايين بفيروس الكبد و السرطانات و يفر الجناة من العقاب

حادثة اغتصاب فتاة المعادي كانت مدوية في وقتها .. اليوم من العادي أن نقرأ أن ثمانية اغتصبوا فتاة !!!

لو تخيلت في أسوأ كوابيسي

لو كنت من أتباع نظرية المؤامرة

لو قلت ماذا تريد اسرائيل من هذه الأمة

لما وجدت أفضل مما يحدث الآن يوميا على أرض مصر

[الترجمـان]

هي إدارة محطات السكك الحديد دي كيميا ؟؟ ولا لوغاريتمات يا ناس ؟؟؟ كل كام شهر قطرين مخيشيين في بعض ؟؟

انا شايف لو احنا المصريين غير قادرين على إدارة السكه الحديد في بلادنا نروح نجيب فريق ياباني ولا حتى بنجلاديشي يدير لنا السكه الحديد

الناس اللى بتموت دي والأسر اللى بتتهد دي والخساير اللى بالملايين والسمعه اللى بأت في الحضيض دي مسؤلية ميين ؟

أرحموووونننناااا :sad:

الحفاظ على ارواح المصريين في قطار ماشي على خط مستقيم محدد الإتجاه كل يوم وفي نفس المواعيد مش لوغريتمات يا استاذ ابو عمر ولا حاجه ...اللوغريتمات في عقولنا التي لا تستطيع التصديق أو حتى استيعاب بأن الحكومه هي موجوده لتخدم الشعب " كل الشعب بفقراءه واغنياءه "وتحافظ على حياته وعلى أمنه وعلى المال العام ..

دي تصريحات منصور شيفروليه على المصري اليوم

وقال منصور فى تصريحات أمس إن جميع الجرارات مزودة بجهاز التحكم الأوتوماتيكى «A.T.C» وهو الجهاز المسؤول عن التحكم فى سرعة القطار، طبقاً لإشارات السيمافورات والسرعات المقررة على الشبكة، وكذلك تسجيل هذه السرعات والمعاونة فى تحديد أسباب الحوادث، مشيراً إلى أن جهاز «A.T.C» يتدخل للقيام بما لم يقم به السائق، مثل تخفيض السرعة فى حالة تجاوز السرعات المقررة، كما يقوم أيضاً بتوقيف القطار فى الحالات التى تتطلب ذلك إذا لم يقم السائق بذلك.

وكشف وزير النقل أن الإدارة العليا لهيئة السكة الحديد تلاحظ لها فى الفترة الأخيرة أن هناك بعض السائقين يقومون بإيقاف جهاز التحكم الأوتوماتيكى، ولذا أصدرت الهيئة بتاريخ ١٤/٩/٢٠٠٩ قراراً بفرض جزاءات رادعة على السائقين فى حالة إغلاق هذا الجهاز، وتمثل هذا الجزاء فى خصم ١٥ يوماً من الرواتب، وفى حالة تكرار هذا الخطأ يتم منع السائق من القيادة لمدة ستة أشهر.

إذا نستطيع أن نلاحظ أن عملية الإلتزام بلوائح وآليات تسيير القطارات تعود إلى ضمير سائقي الجرارات ومدى إستعدادهم الذهني للتعامل مع الحالات الطارئه ...

وفي موضوع الضمير ومدى الإستعدادات الذهنيه للتعامل مع تلك الأمور نحتاج إلى صفحات لا تنتهي تبدأ من طريقة إختيار العاملين والسائقين بجهاز السكه الحديديه والإختبارات النظرية والعملية والنفسية التي يمرون بها وتنتهي بالأجور التي تحفظ لهم القدر الأدنى من الإستقرار المعيشي والنفسي التي تحول دون تأثير ضغوط الحياة عليهم أثناء تأدية واجبهم ...

ويظل التساؤل ..

هل وجود شاشه مرتبطه بالقمر الصناعي امام كل سائق جرار تبين له مكان القطارات التي تسير أمامه وخلفه أمر بعيد المنال ولا يزال محل قلق للسادة المسؤولين ..؟؟

[se_ Elsyed]

انا شايف لو احنا المصريين غير قادرين على إدارة السكه الحديد في بلادنا نروح نجيب فريق ياباني ولا حتى بنجلاديشي يدير لنا السكه الحديد

حصل يا فندم

في الأسابيع والشهور الماضية تم شراء أجهزة تحكم ألي في سير القطارات بمبلغ

إمسك نفسك

140 مليون يورو ...................... ههههههههههههههه والسواقين بيعطلوها ......

والسواق اللي لبس في القطر من ورا كان معطل جهازة هو كمان عشان يبرطع براحته

ولما السواق الأولاني بلغ إنه متوقف ... تم إضاءة الإشارات الحمراء ... ومع ذلك الأخ التاني فضل ماشي ولا همه .....

بالإضافة إلى إنه تم التعهاقد مع شركة إيطالية لإرسال خبراء لإعادة هيكلة السكه الحديد ..... بمبلغ 120 ألأف يورو .. وجو 6 خبراء وهيكلوا الهياكل .. وسلم لي علمترو

[Amr Radwan]

قد يكون تناول المسكنات و اخفاء اعراض المرض .. لفترة صغيره قد يكون هو الحل الامثل مؤقتا لتخفيف الالم علي المريض لحين الانتهاء من تحديد نوع المرض و طريقة علاجة .. و علاجة فعلا ..

ما يحدث الان في مصر هو تناول الكثير من المسكنات فقط لاجل غير مسمي ... و لا المرض بيروح و لا المسكنات بتخلص ..

الحل .. هو باختصار يا سادة .. اعادة تنظيم و تطوير السكك الحديدية .. قد نستعين بصديق او حتي بعدو عشان نعمل اصلاح في السكك الحديد ..

دائما كنت ارفض السفر بالسكك الحديدية .. عارفين ليه ..

قمة الفساد بين موظفي حجز التذاكر بتوصل لسوق سوداء و الاسعار بتغلي بدون تقديم خدمات مقابلة و حمامات غير ادمية و كراسي مهلهلة و غير نظيفة و مكيف لا يعمل و نظام حمدلله علي السلامة يا باشا و الباعة الجائلين طوال الطريق حتي في الدرجة الاولي و الازدحام و التاخر في المواعيد و الحوادث الكتيرة اللي كل شوية نسمع عنها .. علي الاقل لو ركبت سيارتي الخاصة و سافرت بيها او ركبت ميكروباص او حتي اتوبيس عشان اسافر من مدينة لمدينة و نفترض حصل حادث .. اللي بيروح في الحادثه عدد صغير جدا .. مش العشرات و المئات زي حوادث العياط الاولي 2002و الثانية 2009!!

فكروا معايا .. ليه ما نبطلش ناخد مسكنات و نعالج المرض مرة واحدة و قديما قالوا .. الوقاية خير من العلاج ..

[مغتربة]

اخر الاخبار

الرئيس مبارك يقبل استقاله وزير النقل

[se_ Elsyed]

اخر الاخبار

الرئيس مبارك يقبل استقاله وزير النقل

كلام فارغ طبعاً

عفواً مش كلام حضرتك يا فندم

لكن ما يفعله هذا العجوز

لا يوجد شيء إسمه إستقاله في مصر

أقسم بالله

وأنا اعلم ما اقول

لو فكر وزير او مسئول في الإستقالة من نفسه ... ليتسحل وتتعلق جثته على باب زويلة لمدة شهر لتأكل الطير من رأسه

هههههههههههههههه كذلك فعلوا من قبل مع الراجل المحترم أبراهيم الدميري اللي تولى وزارة النقل برضوا بعد عشرات السنين من حكم سليمان متولي وعندما حدثت فاجعة قطار الصعيد .... تم قبول إستقالته ولم يمكث في الوزارة سوا سنتين وخمسة أشهر وأُجبر على الأستقالة لتهدئة الرأي العام الثائر ... وكذلك سيتم في هذه الفاجعه التي لن تكون الأخيرة ...

بالمناسبة

هناك مبدأ عفِن وقذر في مصر زرعه هذا الديكتاتور الظالم اللي بين يدي الله الأن ... أقصد عبد الناصر

قال بعد ما ضيع البلد وقتل الألاف وضيع الأرض ... يطلع ويقول أنا متحمل نتائج الكارثة والنكسة وأنا المسئول .....!!!!!!!!!!!!!!!!!!!!!!

لولا أنني أُسيطر على نفسي وأعلم إني في مكان محترم كنت نعتته بأقسى الألفاظ

كسبنا صلاة النبي

طب وبعدين ؟؟؟؟؟؟؟

أصل منصور قال كده النهاردة في أسباب أقالته قصدي أستقالته

وذكرت وكالة أنباء الشرق الأوسط المصرية أن مبارك قبل الاستقالة التي تقدم بها منصور والتى أعرب فيها عن تحمله مسئولية حادث تصادم قطارى العياط الذى أدى إلى مصرع 18 شخصا وإصابة 36 شخصا.

أيوه إنت متحمل البلوى ... برضوا وبعدين ؟

هاترجع اللي مات ؟

ولا هاتشفي العليل ؟

ولا على الأقل هاتطلع 50 مليون جنيه من خزينة منصور شيفرلية وتديهم للدولة بدل القطارات اللي اتدمرت ؟

يا سادة العيب مش في اللعيبة اللي بتتغير كل شوية زي ورق الكوتشنية

العيب في المدرب المخرف الفاشل

ههههههه اقصد طبعاً هنري ميشيل

[أبو محمد]

اخر الاخبار

الرئيس مبارك يقبل استقاله وزير النقل

يااااااااااااااااااااااااه .. أخيرا حصلت ؟

والله عشت وشفت وزير "محترم" يقدم استقالته عندما تتسبب إحدى مؤسسات وزارته فى هذا الكم من الكوارث .. ولو أن الاستقالة فى حد ذاتها لن تحل المشكلة ، إلا أنها رسالة .. على كل من يفشل سواء كان هو سببا مباشرا أو غير مباشر للفشل ، فعليه أن يفسح المجال لغيره .. ومن يقبل تولى المسؤولية بعده عليه أن يعلم أنه سيلقف كرة ملتهبة .. ولن يحصل على كرسى وثير مريح

[nizza la bella]

العيب فينا احنا

استقالة وزير او رائيس مش هيغير كتير

العيب فينا احنا

لازم نبتدى بينا احنا

تم تعديل 27 أكتوبر 2009 بواسطة nizza la bella

[أبو محمد]

يا سادة العيب مش في اللعيبة اللي بتتغير كل شوية زي ورق الكوتشنية

العيب في المدرب المخرف الفاشل

ههههههه اقصد طبعاً هنري ميشيل

:blush2: :D :D

العيب فى منظومة النادى .. يابو الأسيان

هيكل (أبو الأولاد أصحاب مجموعة القلعة اللى بتشترى كل شئ فى مصر برأس مال خليجى) قرر أخيرا أن يهدم الصنم الذى اشترك فى صنعه .. إعترف بضرورة تغيير "العقد الاجتماعى" .. اللى الطرفين فيه اتفقوا عليه برضاء كامل .. الحكومة تعلمك ببلاش ، تسكنك ببلاش ، توكلك ببلاش ، تشغلك (بطالة مقنعة) ببلاش .. وانت عليك تطبيق الحكمة .. لا أرى .. لا أسمع .. لا أتكلم ..

عارف يابو الأسيان النكتة بتاعة اللى بيقول للتانى : "شوف يا أخى .. الدنيا بتمطر والشمس طالعة" .. رد عليه قال له : "أيوه يا أخى .. حكومة بنت ......."

أهو العقد الاجتماعى كده .. الحكومة هى بابا ، وماما ، وأنور وجدى .. واحنا بقى ياسمين و "فل" عالآخر .. المهم "معانا ريال .. معانا ريال .. ده مبلغ عال ومش بطال"

[عاشق]

وزير النقل يقدم استقالته ومبارك يقبلها

مصراوي - خاص - تقدم الوزير محمد لطفي منصور باستقالته الثلاثاء بعد ثلاثة ايام من حادث تصادم قطاري العياط الذي اسفر عن مقتل واصابة العشرات.

وقبل الرئيس حسني مبارك استقالة منصور، على ان يتم تكليف مسئول جديد بتولي الوزارة.

ونقلت وكالة أنباء الشرق الأوسط من مصدر مسئول برئاسة الجمهورية أن منصور أعرب في الاستقالة عن تحمله مسئولية حادث تصادم قطارى العياط الذى أدى إلى مصرع 18 شخصا وإصابة 36 شخصا.

وكان الدكتور زكريا عزمي قد وجه اتهاما صريحا للحكومة ومجلس الشعب وحملها المسئولية الكاملة عن كارثة قطاري العياط وذلك في مواجهة قوية مع وزراء النقل والشئون القانونية والصحة والتنمية المحلية خلال الاجتماع.

وانتقد عزمي بشدة إعلانات السكة الحديد في شهر رمضان الماضي عن التطوير المزعوم خاصة أنها وصفت أفراد الشعب بأنهم "لصوص" ويسرقون محتويات القطارات.

وحيا عزمي د.مفيد شهاب لشجاعته في الاعتراف بالمسئولية السياسية للحكومة عن الحادث.

وحاول محمد لطفي منصور وزير النقل اطلاق المبررات متهما العنصر البشري بالتسبب في الحادث وأكد احالة 34 مسئولا بالسكة الحديد للتحقيق.

ولكن د. مفيد شهاب سارع معترفا بالمسئولية التضامنية للحكومة عن الحادث وأكد ان الجميع مقصرون.

[OReX]

يارب اللى يييجى فعلا يعمل حاجة لاننا مش طالبين كتير طالبين خطوط سكك حديد ادمية مش اكتر ولا قلنا زى مترو دبى ولا زى TGV

[سكر]

انا مش موافق على الاستقاله

دة كلام فارغ دة معنا ان واحد تانى هيجى وهيبدا من نقطة الصفر

وهيطلب فلوس عشان نشترى جرارات جديده وكما نعمل اعلانات فى التليفزيون بحوالى 68 مليون ده تهريج

قطر الصعيد لما ولع بالناس الاستقاله ممنعتش الحادثه بتاعة العياط

لازم يكون فى مسئول ولو منصور فعلا زى ما بيقول

وذكرت وكالة أنباء الشرق الأوسط المصرية أن مبارك قبل الاستقالة التي تقدم بها منصور والتى أعرب فيها عن تحمله مسئولية حادث تصادم قطارى العياط الذى أدى إلى مصرع 18 شخصا وإصابة 36 شخصا.

يبقى فين المسئوليه الجنائيه ولا هو كلام انشاء فقط لو مسئول بجد مش يتقدم له استقاله لا وحتى يترفض

انما يتقدم للمحاكمه

ولو برئ يبقى عايز اعرف نقطة الخلل فين وتتصلح لان الى بعده بردة هيقع فى نفس المشكله

اى وزير لما يجى يمسك الوزارة لازم نعرف هو كان عنده كام مشكله.... وخلص كام مشكله...... وعمل كام مشكله

مش كل واحد يجى ويمشى وكانه موظف ويروح وخلاص من غير مساله قانونيه او حتى شعبيه

ابراهيم سليمان

يوسف والى

وغيرهم وغيرهم كتير بعد ما خربوا البلد قال ايه قدم استقالته او خلاص قال مش عايز العب

حتى لو المدرب قاله انت مينفعش تكمل معانا الموسم الى جاى يا فرحتى

فين المساله بعد الوزارة

مصر مش الزمالك عشان ممدوح عباس :blush2: يجرب فينا المدربين قصدى الوزاراء

[سكر]

وكان الدكتور زكريا عزمي قد وجه اتهاما صريحا للحكومة ومجلس الشعب وحملها المسئولية الكاملة عن كارثة قطاري العياط وذلك في مواجهة قوية مع وزراء النقل والشئون القانونية والصحة والتنمية المحلية خلال الاجتماع

لو الكلام بجد وعلى حق خليك راجل وحول الحكومه كلها ابتداء من رئيس الوزارء حتى الفراش الى التحقيق

ولا هوا كلام شو واستعراض عضلات وامتصاص غضب الناس

[osaimi]

طب واللي مشغل الوزير مااستقالش ليه ؟ واللي جايب اللي مشغل الوزير مااستقالش هو كمان ليه ، العيب والفساد فى الرأس قبل الجسم