على بابا والعصابه .. ودولة الغلابه

[التونسى]

صحصح كده.. وركز يابا

من غير لا طبله ولا ربابه

ح اروى أنا.. قصه حزينه

عن دوله أغلبها غــلابــه

إختارها ربنا...... وبلاها

بحكــومه أشبه لعصابه

جــارت ونشرت طغيانها

وطبقت شـــرع الغــابــه

والدوله ديه..... المنكوبه

ريسها إسمـه عـلى بـابـا

إللى بحديدُه...... وبنارُه

وبجهلُه..... حولها خرابه

صحصح كده وركز يابا

على بابا دا للى ما يتسمى

الحاكم اللى ملوش لازمه

من يوم ما هـلت أيـامــه

والغُمـــه حلــت عالأٌمـــه

وبـلاده تطلــع من كارثه

وتخش فى مصيبه وأزمه

بفضل شـــلة حرامـــيـه

هَلَّيبه.... معدومى الذمه

ملقوش لا مانع ولا رادع

الفَجَّره..... أولاد الهِرمَه

وكل ده.. وسى على بابا

ضاربها ميت مليون صرمه

صحصح كده وركز يابا

على بابا دا ..حاكم سَكَّا

يشبه كـده لحــاكم عـكا

باع للعِدا ثـــروات وطنه

والقبض كــان حبِّة فكه

وحَـط من قيــمة شعبه

وضيع الخـــير والبــركه

والناس وبالأفواج هجُّوا

كندا... أوروبا….وأميركا

وبعــد ما اتنهبــت بلــده

واتقسمت.. وكما الكعكه

عــــايز يورثـــها لإبــنه

ما أصلها.... صبحت تِركه

صحصح كده وركز يابا

شعب الغلابه دا راس ماله

صبر...وخـلاص دايبه حباله

أصل الضنى.... سمم بدنه

والظــلــم مــزع أوصـــاله

ومعــدش بيحــس الفرحه

من كتر حزنه على عــياله

وكل يــوم..... زى العــاده

على ضهره …بتزيد أحماله

عشان كده... لازم يصــحى

من نومه.... يتحدى مُحَـالُه

يا إما ...يستسلم..... يرضى

بــ..ذُلُّه ….ومـــرارة حالُه

صحصح كده.. وركز يابا

من غير لا طبله ولا ربابه

رويت أنا.. قصه حزينه

عن دوله أغلبها غــلابــه

مع خالص عزائى wst::

التونسى wst::

تم تعديل 26 أكتوبر 2009 بواسطة التونسى

[pink rose]

جميلة جدا يا استاذ تونسي

بس فعلا الحكاية حزينة جدا جدا جدا بس هو دا فعلا الواقع

ربنا يزيح الغمة بقى

[أشرف حسين]

صحصح كده.. وركز يابا

من غير لا طبله ولا ربابه

حادي يا بادي و ضايعه بلادي

احنا فراااااااخ و لا ديابه

حادي يا بادي ف مالطه نهاتي

من غير حكومه و نيابه

خليني اقولها على بلاطه

هما أصحاب المعالي و الدماغ

و احنا افراد العصابه

احنا شركا ب الموارب ف السريقه

بس خلطين الجهاله ب العباطه

اللي فاتح جيب و غارف

و اللي م الخالق ما خايف

احنا اولاد الشويش المستكين

اللي بـ الشلوط بياخد

و يمشي يتباهى ب ئلاطه

احنا اولا اللي شايف

بس عامل فيها نايم

أعمى سايب إيد و سايق

لـجل م يوصل بسرعه لـ الولاه ولاد الذينا

او أكيد ب العند فينا

يطبخولنا (السوس مفوّل)

و هما يتعشو ف مارينا

م احنا اولاد الغلابه المعجونين

عم عبد الله و امينه

و هما اولاد الذوات(متظبطين)

أوعي عقلك يوم يهفك يا مواطن

و تحط راسك ب ولاد شيرين :lol:

خبي وشك جوه رملك كُل ف طين

خلّي م الشبشب شعارك

اعمل عايشه و ألزم دارك

خيّط خشمك

حضر كفنك .. أدفن صوتك

ربي صغارك

قبل م ولد العالمه يشوفك

راح يلعب بك حادي يا بادي

حتي محمد البغدادي

راح يبعتلك فاكس يوماتي

فط ب جلدك

قبل م ليلك يبقى الأغطس منه نهارك

............

حمد لله ع السلامه يا تونسي

وحشني و الله يا نجم

.

.

.

كفاااره :)

[هشام الجنيدى]

حادى بادى ....وحدرجة بدرجة

وهقولها بالكلمة الدارجه

اصل الحقيقة مهاش غايبة

واضحة كما الشمس السارجه.................(سارجه.....يعنى منورة بس عندنا فى دمياط)

اهبش كما تحب وعبى

ربى الارانب يا مربى

كرشك يا ابو اللغد البمبى

متخافش من حد دى بوظه

خليك مع ابن المحظوظة

وانتا القرب هتخر عليك

مية دهب لما لاذنيك

دية بلدنا المحفوظه

بقرة وكانت لظلوظه

من موقعت جوة البير

صبحت عظام صبحت عارجة

حادى بادى ...وحدارجة بدارجة

مسرح بتدخل فيه ببلاش

تدفع هناك بعد الخارجة

رائع جدا يا استاذ تونسى ......ويا استاذ اشرف وربنا يفك ضيقتنا

[التونسى]

جميلة جدا يا استاذ تونسي

بس فعلا الحكاية حزينة جدا جدا جدا بس هو دا فعلا الواقع

ربنا يزيح الغمة بقى

الله يكرمك ويعز مقدارك اختى الفاضله :lol:

القصه فانتازيه .. من الخيال ..واى تشابه بينها وبين الواقع لهو من قبيل الصدفه .. ولست مسئول عن هذا التشابه ((كلمتين من زمان كان نفسى اقولهم :sad: ))

مع خالص تحيتى لمرورك وتعليقك المشجع

التونسى

[Cinnamon lover]

اكتر من رائع ممتاز يا تونسي تسلم ايدك

[raouf]

الموضوع ده لازم يتثبت بجد كلام جميل

[maruoma]

حلو اوي بجد

أ/هشام و أ/ اشرف و أ/ تونسي

فعلا اكثر من رائع

[التونسى]

شاعرا العاميه المتميزان الاستاذاشرف حسين والدكتور هشام الجنيدى .. اشكركما عميق الشكر ((وإن جاء شكرى متاخرا بشكل مخجل)) على إثراء قصيدتى بما هو اروع وأعمق من فيض إبداعكما وتفاعلكما الايجابى مع ما نظمت

وربنا يعين دولة الغلابه على التخلص من العصابه

[التونسى]

الاخوه والاخوات الافاضل Cinnamon lover و raouf و maruoma

أشكركم على التواجد والمتابعه والتعليق على ما نظمت من اشعار زجليه .. وعذرا أتمناه مقبول منكم على تأخرى فى الرد ..مع خالص تقديرى

[زهرة الجبل]

الأخ الفاضل التونسي

كما عهدناك دوماً .. أكثر من رائع

جميل جداً ما قرأته لك هنا

دام قلمك و دمتَ بخير

و أدام الله عليكَ رضاه

أم كريم

[التونسى]

الأخ الفاضل التونسي

كما عهدناك دوماً .. أكثر من رائع

جميل جداً ما قرأته لك هنا

دام قلمك و دمتَ بخير

و أدام الله عليكَ رضاه

أم كريم

بارك الله فيكى شاعرتناالمتميزه ((أم كريم)) على تواجدك ومن ثم تعليقك الذى أسعدنى واثلج صدرى

و,,,,

و,,,,

و... للاسف .. مازالت العصابة جاثمة على أنفاس الغلابه ..بمسرحيتهم الانتخابيه السخيفه ..ورائحة تزويرهم الكريهه ..والتى زكمت الانوف .. ولكن حقا وصدقا ويقينا ((يمهل .. ولا يهمل)):closedeyes:

تم تعديل 29 نوفمبر 2010 بواسطة التونسى

[التونسى]

و... للاسف .. مازالت العصابة جاثمة على أنفاس الغلابه ..بمسرحيتهم الانتخابيه السخيفه ..ورائحة تزويرهم الكريهه ..والتى زكمت الانوف .. ولكن حقا وصدقا ويقينا ((يمهل .. ولا يهمل)):closedeyes:

إن وعد الله حق .. ((يمهل.. ولا يهمل))..ولاقى مبارك مصير فرعون

[ابو محمود]

و... للاسف .. مازالت العصابة جاثمة على أنفاس الغلابه ..بمسرحيتهم الانتخابيه السخيفه ..ورائحة تزويرهم الكريهه ..والتى زكمت الانوف .. ولكن حقا وصدقا ويقينا ((يمهل .. ولا يهمل)):closedeyes:

إن وعد الله حق .. ((يمهل.. ولا يهمل))..ولاقى مبارك مصير فرعون

يعنى يا آبية يغرق زي فرعون ؟؟؟؟؟

هو فية فى المستشفى بسين هههههههههههههههههههههههههه

تحياتى على القصيدة جامدة يا محمود باشا