تعمل ايه لما تلاقى ابنك بقى اكثر ثقافه منك ؟؟

[عنبو]

اولاً السلام عليكم ورحمة الله وبركاته

حالياً مع الانفتاح وجود المدارس الانترناشيونال ووجود المستوى العالى من التعليم ده فبتلاقى الطفل بيعرف لغه ويعرف كمبيوتر وتلاقيه عفريت وطبعاً فى حين والدته يمكن يدوب تعرف اسماء الحاجات دى

وطبعاً مع الوقت الاطفال دول بيكبروا بس للاسف انهم بيظلوا صغرين فى نظر الاب والام ومع اختلاف الثقافات والظروف الى كل واحد اتربى فيها يعنى الظروف الى اتربى فيها الاب والام مختلفه تماماً عن الظروف الى تربى فيها ابنائهم

ينتج عنها اختلاف فى الميول والحكم على الاشياء ومن هنا يبدأ الصدام

ومن هو الصح هل الابناء ام الاباء ؟

سبب فتح الموضوع ده انى مره بسأل واحد صاحبى بيقوله انت ليه مبتعلمش ولادك فى مدارس انترناشيونال ؟؟ قلى كان ليا واحد صاحبى بنته كان بيعلمها فى مدراس انترناشيونال وبعدين البنت لما كبرت حصل تصادم بينها وبين مامتها فى اسلوب التفكير ؟؟ طبعاً النبت اكثر ثقافه من مامتها وطبعاً مامتها مكنتش بتعرف تكلمها نظراً لاختلاف الثقافات واختلاف الميول ؟

ومن هنا قلت اخرى تجريبى لغات وخلاص ؟؟

وقالى طيب اذا كان بيكونوا مدارس عاديه وبيحصل اختلاف فى وجهات النظر فمابلك بقى لما يبقى فيه جااااااب كبيره جداً فى التعليم ؟؟

ودى كانت وجهة نظره ؟؟

ايه رأيكم وقلى على فكره معظم الامهات بيكونوا منهوكين فى عمل البيت وبينسوا خالص موضوع الثقافه وطبعاً الاولاد ثقافتهم بتعلى وفى الاخر بيحصل الصدام ؟؟

تم تعديل 28 أكتوبر 2009 بواسطة محمد العنبى

[se_ Elsyed]

تعمل ايه لما تلاقى ابنك بقى اكثر ثقافه منك ؟؟

أفرح جداً طبعاً

ودموعي تنزل واقول : والله وعرفت تخلف يا سين سين :winner:

الصدام الفكري لازم لازم يحصل

كمبيوتر ونت ويوتيوب بقى وحركات من دي

وزي ما حلصل معانا بيننا وبين أباءنا لازم يحصل بيننا وبين أولادنا

لكن مع الفرق

والدي ووالدتي كانوا طيبين زي معظم أهالينا

يعني على سبيل المثال لا الحصر

كنت أحط مجلة ميكي جوه الكتاب وأفضل أذاكر فيها وماما تدخل بالسندوتشات وتعيط لأني هاري نفسي مذاكرة .... وتدعيلي .... وأنا اقول في سري ... أنا مجرم قوي إيه اللي أنا باعمله ده ... أنا لازم افوق لنفسي .. بس بعد ما أضرب المجلد ده هابقى أفوق .. هههههه

عُمر بقى بدأ يبقى مثقف وسوري ... صايع ...

لكن على مين ...

أصل اللي عملناه في الناس صعب يطلع علينا ... وممكن يلف ويدور على مامته عشان طيبه ..

لكن العبد لله .. صعب ...

لإنه إذا كان عيل فأنا أعيل منه

أو بالبلدي مبروم على مبروم ما يرولش ...

ونكمل بعدين عشان مشغول

[doha]

لو ده حصل فهو شيء يسعدني بكل تاكيد مش العكس ..

حتى لو ( ثبت ) مستوى اولادي وخليتهم محلك سر عشان ميتفوقوش علي فانا مش هقدر ( اثبت ) مستوى العالم من حولنا وهتكون المحصلة ان الدنيا كلها بتطور وتطلع قدام وانا واولادي بس الي هنفضل ( ورا ) .

من وجهة نظري ان الواحد يعلم اولاده في احسن وافضل تعليم ربنا يقدره عليه ولو اضطر انه ( ييجي ) على نفسه في امور تانيه وفي نفس الوقت ميكونش سايبهم كده مع نفسهم بدون مايزرع فيهم انه في الاول والآخر هو الاب او الام وهو القدوة الي لازم يجي عندها الابن ( ويقف ) مينفعش يتعدى عليه او يتخطاه ..

الي بيعاني من ان بنته او ابنه تثقف في مدارس انترناشونال بعدين ( اتنطط ) عليه او بقى مش عارف يتعامل معاه فدي مشكلته هو الي معرفش يزرع ويربي من البدايه صح مش مشكلة المدرسة ابدا ..

التربية مسؤولية كبيرة وكيبرة جدا وللاسف مش كل الناس قدها وبالتالي فطبيعي جدا نشوف انحرافات في التطبيق لنظرية صحيحه مش هيغير من صحتها خطأ البعض في تنفيذها .. طالما وعندك اهتمام ورغبه في ان عيالك يكونوا ماشيين ( صح ) وطالما بتتعب وتبذل مجهود ومش بتكتفي بس بالنوايا الحسنة فكون على ثقة باذن الله انهم هيكونوا ( صح ) ويمكن افضل مما تمنيت كمان ..

ربنا يبلغنا جميعا في ابنائنا يارب ويجعلنا فيهم كل قرة عين ..

[عبير يونس]

كالعادة يا كيميائي يا روش بتتحفنا بمواضيع في الجون

الموضوع ده فعلا مهم جدا

و ده بالنسبة لي كأم ما بيخوفنيش

لأني مش واقفة محلك سر

أنا بأطور نفسي باستمرار

و يكفيني فخر و الحمد و المنة لله طبعا

أن أولادي ما بيثقوش في اي معلومة الا لما يعرضوها عليا أولا

:D

ده مش غرور

لكن لأني باحترم نفسي مع ولادي

همة كمان بيحترموني

يعني الحمد لله ربيتهم ان مفيش حد بيعرف كل حاجة في الدنيا

و فوق كل ذي علم عليم

و كتير لو سألوني عن حاجة معرفهاش

ما باتكسفش أقول معرفش

بس الموضوع ما بيخلصش على كده

بنبحث مع بعض في الموضوع اللي سألوني فيه

و طبعا ربنا يخليلنا الأستاذ جوجل مش حارمنا من حاجة

أصل الولاد بيكبروا بسرعة

و كل جيل أسرع من اللي قبله

بحكم عصر السرعة اللي احنا عايشين فيه

و الآباء اللي بيفهموا ولادهم انهم يعرفوا كل حاجة بينكشفوا بسرعة

و بيبقى شكلهم وحش اوي

و مش بعيد يفقدوا ثقة ابنائهم بالمرة

كنت زمان قرأت أن الأبناء لما بيكبروا و يبدأوا الشباب

بيحسوا ان آباءهم ما بيعرفوش حاجة

و بعد فورة الشباب الأولى و لما يبدأوا في النضج

تقريبا في الثلاثينات من العمر

بيرجعوا تاني يحسوا أن آباءهم يعرفوا كل حاجة و يبدأوا يلجأوا لهم تاني

ده بيحصل في كل الأجيال

عن نفسي كنت دايما حاسة ان بابا و ماما عارفين كل حاجة

برغم تمرد بسيط يعني

لابد منه

لكن دلوقت

كل كلامهم بيرن في وداني

و نصايحهم كنوز لا تعوض

كانوا فعلا ناس متفتحين و متطورين باستمرار

و كانوا بينزلوا لمستواي

و يرفعوني لمستواهم

و مواكبين للعصر

برغم انني كنت الابنة الصغرى

و كان في فرق كبير في السن بيني و بينهم يتجاوز 35 سنة!!

لكن كانوا صحابي

و أعز أصحابي كمان

خصوصا والدي الله يرحمه

كان ما يطلق عليه الصديق الصدوق

كتير باتمنى أشوفه بس عشان أحكي له على الأحداث الكتير اللي مرت في حياتي و اتناقش معاه فيه

بس بأرجع و اقول

ده هو عايش جوايا

و حافظاه

و متخيلة كل ردود فعله على كل الأحداث دي

جميل اوي لما تبقى العلاقة قوية و متينة بين الاباء و أولادهم

ربنا يكرمنا جميعا في أولادنا

و يجوزك يا عنبي بزوجة صالحة

و يرزقك بالذرية الصالحة

آمين آمين آمين

تحياتي

:D

[miramikhail]

أنا بصراحة مع الرأى اللى بيقول أننا نعلم أولادنا أعلى تعليم نقدر علية حتى لو جينا على نفسنا شوية.

بس ليا رأى فى التعليم الأنترناشونال وده عن تجربة أنا أبنى خد ثانوية عامة من مدرسة أجنبية من العادين يعنى و هى الحقيقة مدرسة من القدام اللى ليهم أسم لكن مش بتوع دلوقتى اللى ب9 ولا عشرة ولا كده وهو كان نحمد ربنا شاطر بس طبعا مجابش هندسة عين شمس و جت شبرا بس قلت أفضل أدخلة الأكاديمية العربية للعلوم و التكنولوجيا (تبع جامعة الدول العربية) عشان أحسن فى المستوى (طبعا لو كان حصل عين شمس كنت دخلتها له نعصب بقى لجامعتى) و الحقيقة ماش الحمد لله وبيقولى أن الولاد اللى معاه من الأميريكان مستواهم أقل منه بكتير فى الرياضة.

أما بنتى فكانت فى نفس مدرستة و هى أصغر منة و مش شاطرة ولما أخدت الأعدادية السنة اللى فاتت كان مجموعها قليل وخفت بصراحة ما تمشيش فى ثانوى عام و كل الناس نصحونى أدخلها أميريكان . فدخلتها أمريكان فى مدرسة من العادين مش بتوع التجمع الخامس بس طبعا المصاريف أربع أضعاف مصاريف مدرستها الأولنية و كمان اللى لاحظته أنها لما أمتحنت عشان تدخل جابت نمر كويسة :D و لحد دلوقتى كل النمر اللى جاية أعلى من المدرسة الأولنية و ده لادروس ولا حاجة يعنى فعلا زى ما الكل نصحنى أنه أسهل بكتير من الثانوى العام بتاعنا المشكلة اللى مزعلانى أنهم معندهمش طابور ولا بيحيوا العلم و بيدرسوا التاريخ بتاعنا كدة كماده زى التربية القومية لكن بتدرس تاريخ العالم و طبعا بوجه نظرهم هما يعنى لو الطفل أتربى من وهو صغير على كده مش حيعرف تاريخة ولا حيكون عند أنتماء ولا حاسس بالمجتمع المصرى بالبلدى حيبقى متغرب فى بلده و حاسس أنه أعلى من ناس كلهم

[جيمي]

ابنك ثقافته اكبر منك .... وبيحترمك .... يبقي يا هناك ويا سعدك

ابنك ثقافته اكبر منك او اقل ..... ولا يحترمك ...... يبقي هتشوف ايام سوده

اللى بيشتكي من ان ابنته اكثر منه ثقافه .....وانه مابيعرفش يكلمها .... اكيد كان فى يوم من الايام كانت البنت دي طفله -او على الاقل طفله فى نظره - وكانت اكيد بتقولو دي ايه يا بابا؟ ودي ايه ؟ وستين ده ايه ؟ فى اليوم ..... صدقني يا عنبي لو افتكر هوه كان بيرد عليها ازاي .... اكيد هيكتشف ان التقصير ابتدي منه ............ يعني الحوار والصداقه اكيد ماكنتش موجوده من الاول يا عنبي....

بس ده مايمنعش ان كل اب او ام يطوروا نفسهم علشان يقدرو يستوعبو افكار اولادهم فى السريع ..... لان الجيل الجديدمش طالبه معاه خنقه خااالص :D

[Damo]

موضوع جميل. ماكونتش وخده بالي ان الموضوع ده في كل الاسر مش عندي بس

انا كتير بحس بفرق الثقافه بيني و بين مامتي وبابايا خصوصا ان في ..,.. ضخمة في التعليم من الالف الى الياء. بس مش بيحصل صدام زايد قوي... ساعات لما يحصل لبس بيبقى غصب عننا و بنصلحوا (و كل واحد بيبقى معتقد انو واخد التاني على اد عقله )

لكن في النهاية بابايا كل شويه يقولي ازاي هو مبسوط من المستوى اللي انا وصلتلوا و فخور بنفسوا انو قدر يوصلني لحاجه هو كان نفسو يوصلها لكن ظروفه مش سعدته و انو خلاص عايش حياته خلالي الخ الخ الخ كلام الاباء ده بقى :D

و ساعات كمان يسئلوني على حاجات نفسهم يعرفوها و انا بقولهم حاجات ببقى نفسي اشاركها معاهم.

بس فا اللي انا شايفاه انو its not that bad :D

[أبو عمر المصري]

ابني ثقافته اكتر مني ؟ طبعا هاكون سعيد ومبسوط ..

بس هي مش كده بالظبط يا اخ عنبي

نقدر نقول انه قادر على استخدام ادوات العصر بطريقه افضل مني .. وممكن تكون لغته الأنجليزيه افضل مني ؟؟ ممكن طبعا ولكن الثقافه دي مسألة تراكم قرائات وخبرات ومشاهدات حياتيه أكيد هاينطبق عليها المثل اللى بيقول اكبرمنك بيوم يعرف أكتر منك بسنه

وطبعا ده شئ طبيعي .. تتذكر انت في مرحله عمريه معينه كنت بتحس انك تعرف حاجات مابيعرفهاش أبوك ؟؟

انا مريت بمرحله كده .. ولكن دون تكبر على ابويه وكنت باحس بأنه سعيد وانا قاعد قدامه باتكلم في موضوع او باقول رأيي في قضيه سياسيه مثلا او اجتماعيه ممكن يأيدني او يصحح حته معينه ف كلامي وطبعا انا الى آخر ايامه كنت باستشيره في أمور كتيير واديله وضعه ومكانته المعهوده

يعني باختصار ده شئ طبيعي وامتداد طبيعي للأجيال ( امتداد طبيعي للحاجه السأعه )

النهارده مثلا

الواد عمر بيقول لى تعرف يابابا تستب برنامج معرفش ايه عشان الكمبيوتر يقبل فيلم ناقله بالبلوتوث من كمبيوتر تاني بالموبايل وعايز ينزله ويشغله

قلت له لا والله ياعمر يابني بعد شويهة اتصالات مع اصحابه لقيته مستب البرنامج ومشغل الفيلم :D

قلت له يابن الأييييييه :D عملتها ازاااي أشرحلى :)

وبدا يشرح بسرعه وهو مستعجل الواد بينفض لي :)

بس ده اللى قال لنا عليه سيدنا على كرم الله وجهه ( ربوا اولادكم بطريقه غير طريقتكم لأنهم خلقوا لجيل غير جيلكم ) او بهذا المعنى

عالعموم ده شئ طبيعي وصحي وكلنا نسعد بيه

ندعو لهم جميعا بالتوفيق وربنا يحميهم جميعا

[Damo]

انا موفقاك يا ابو عمر و فعلا مواقف مشابهه بتحصل يوميا

بس ده اللى قال لنا عليه سيدنا على كرم الله وجهه ( ربوا اولادكم بطريقه غير طريقتكم لأنهم خلقوا لجيل غير جيلكم ) او بهذا المعنى

عالعموم ده شئ طبيعي وصحي وكلنا نسعد بيه

ندعو لهم جميعا بالتوفيق وربنا يحميهم جميعا

و تصحيح صغير لمقولة سيدنا علي: (ربوا اولادكم بطريقه غير طريقتكم لأنهم خلقوا لزمن غير زمانكم)

[Simba]

اكيد اي حد يتمني ان ابنه يكون اكثر منه علم وثقافة لكن المشكلة اللي بجد في نوع الثقافة دي وتاثيرها علي حياته ممكن تخلق شخصية متحررة جدا باسم الليبرالية ولا المسميات التانية الغريبة اللي صدعونا بيهاا كل شوية حتي الملحدين بيدعوا انهم لهم نظرة فلسفية في الكون

[عنبو]

شكراً لكل الاعضاء الى شاركوا فى هذا الموضوع

بس احياناً مبتقدرش تسيطر على الموضوع

لما تلاقى ابنك كل قرأئته للادب الاجنبى وكل القصص الى بيقراها للاجانب ولم تقعد معاه تلاقيه يقولك دمعرفش مين قال كذا وانت طبعاً تقوله الى انت قولت عليه ده زى الامام الشافعى عندنا كده ؟؟

ناهيك زى لما قالت الاخت miramikhail

أنهم معندهمش طابور ولا بيحيوا العلم و بيدرسوا التاريخ بتاعنا كدة كماده زى التربية القومية لكن بتدرس تاريخ العالم و طبعا بوجه نظرهم هما يعنى لو الطفل أتربى من وهو صغير على كده مش حيعرف تاريخة ولا حيكون عند أنتماء ولا حاسس بالمجتمع المصرى بالبلدى حيبقى متغرب فى بلده و حاسس أنه أعلى من ناس كلهم

المسألة ليست بمسألة ان ابنك يكون بيعرف اكتر منك فى الكمبيوتر ولا ازاى يستخدم اى جهاز المسألة ان ابنك ثقافته تكون متجهه الى اتجاه تاااااااانى خالص غير الى انت فيه وده بسبب طبعاً الحاجات الى بيهتم بيها من قرأه وافلام و............الخ

[somayasaleh]

الانسان الوحيد اللي نفسك يكون احسن منك في الدنيا ده....هو ابنك او بنتك

انا عن نفسي الحمد لله اولادي كلهم مدارس انترناشيونال....وفعلا فرق في التعليم والثقافة والتفكير عن اقاربهم اللي في سنهم وفي مدارس لغات عادية

وفعلا الاكسنت في اللغة عندهم ما شاء الله ممتازة واحسن مني بكتير....وكتير بيصححوا لي وانا بتكلم انجلش .....بس علي مين...بقول لهم انتم الاكسنت بتاعتكم اميركان

بس انا الاكسنت بتاعتي بيور انكلش....طبعا ناخدها هزار وضحك

وزي ما الاخوة والاخوات ما قالوا....ان احنا لازم نقدم لاولادنا افضل تعليم...لو فيه امكانية طبعا.....

واكيد فيه صراع ثقافات بين الاجيال ....زي مثلا احنا اكتر ثقافة واطلاع ،انفتاح عن اهلنا بمراحل....بس لا يمكن نتمنظر عليهم بما اكرمنا الله به من علم.....

بالنسبة لاولادنا ....لازم ننبهم الي ان ده فضل من ربنا انه قدرنا ودخلناهم احسن مدارس....فبالتالي لا يجب ان يتمنظروا بعلمهم وثقافتهم علي اقاربهم الاخرين وبالتالي علي ابويهم

بل يجب ان نعلمهم دائما ان الابوين لهما احترامهما وان ربنا وصي بهم .

وبعدين الابوين قدوة لاولادهم.....يعني لو شافوا اننا بنسخر من اهلنا لانهم اقل منا ثقافة ....يبقي لازم ح يسخروا منا في يوم من الايام....المهم التربية في البيت

وحضرتك يا استاذ محمد لسه علي البر....يعني عندك امكانية اختيار..... زوجة صالحة.. متدينة...مثقفة .....تستطيع ان تربي لك اولادك ان شاء الله تربية صحيحة وتغرس فيهم   القيم والاخلاق الحسنة

وكمان تساعدهم في الدروس الصعبة

نيجي بقي لنقطة تانيه....لو الزوجة مش مثقفة او متعلمة بشكل جيد.......يبقي ما فيش غير انها تحاول تقرأ اكتر وتعرف الدنيا وصلت لفين....وده طبعا بمساعدة زوجها اولا ،،،، واولادها ثانيا

وبعدين الثقافة مش بالتعليم اصلا....ده بالقراءة والاطلاع....وعندنا اكبر مثال ...الاستاذ العقاد...اكبر مفكريين العصر الماضي وهو ماخدش حتي ابتدائية

يعني ...خلاصة القول ....اللي عايز يثقف نفسه ....وعنده الرغبة في التحسن....الدنيا مفتوحة قدامه......والنت فيها كل الثقافة القديمة والحديثة والمستقبلية كمان

بس فين اللي عايزة تتعب نفسها وتقرأ وتتطلع علي الدنيا ماشية ازاي وفين....هو ده السؤال؟؟؟؟؟؟؟؟؟؟؟؟؟؟؟؟؟؟

[أبو عمر المصري]

شكراً لكل الاعضاء الى شاركوا فى هذا الموضوع

بس احياناً مبتقدرش تسيطر على الموضوع

لما تلاقى ابنك كل قرأئته للادب الاجنبى وكل القصص الى بيقراها للاجانب ولم تقعد معاه تلاقيه يقولك دمعرفش مين قال كذا وانت طبعاً تقوله الى انت قولت عليه ده زى الامام الشافعى عندنا كده ؟؟

ناهيك زى لما قالت الاخت miramikhail

أنهم معندهمش طابور ولا بيحيوا العلم و بيدرسوا التاريخ بتاعنا كدة كماده زى التربية القومية لكن بتدرس تاريخ العالم و طبعا بوجه نظرهم هما يعنى لو الطفل أتربى من وهو صغير على كده مش حيعرف تاريخة ولا حيكون عند أنتماء ولا حاسس بالمجتمع المصرى بالبلدى حيبقى متغرب فى بلده و حاسس أنه أعلى من ناس كلهم

المسألة ليست بمسألة ان ابنك يكون بيعرف اكتر منك فى الكمبيوتر ولا ازاى يستخدم اى جهاز المسألة ان ابنك ثقافته تكون متجهه الى اتجاه تاااااااانى خالص غير الى انت فيه وده بسبب طبعاً الحاجات الى بيهتم بيها من قرأه وافلام و............الخ

على فكره الموضوع مش سئ جدا زي ما حضرتك متصور وعن تجربتي الشخصيه مع أولادي بالمدارس الأنترناشيونال لا طبعا مصريتهم وانتمائهم وحبهم للبرامج المصريه مثلا وللثقافه المصريه لم يتغير بجوار ثقافتهم الأنترناشيوناليه نعم هو جزء من مناهجهم في الأدب الأنجليزي بس برضه فيه منهج لغه عربيه وقواعد ونحو ونصوص وبلاغه وأدب لازم يكونوا عارفين ده وعارفين ده

نقطه مهمه جدا كمان لازم تاخدها في أعتبارك أولادك على حسب ما انت بتربيهم .. يعني من الصغر لازم تغرس فيهم القيم والمبادئ والدين ودي أشياء ماينفعش نعيش من غيرها ولا نتنازل عنها ونحترمها لازم كمان يكونوا عارفين الصح والغلط وفي نفس الوقت يكونوا عارفين لغة عصرهم لأنه عصرهم مش عصرك انت .. وفي هذه الحاله ماتخافش على أبنك لأن الأساس بيكون صح والبرمجه اللى انت برمجته عليها بتكون هي المرجع بتاعه عندما تأخذه دوامة الحياه

ربنا يحفظ أولادنا ويحميهم من كل سوء

[ذهبية]

و الله يا عنبى المووضع لة ابعاد كتيرة جدا مش مسالة احترام الوالدين لان نادرااا مابتلاقى النقطة دى فى اولاد متربية كويس

و لو حصلت بيكون العيب على الام و الاب اللى معرفوش يربوا اولادهم سواء بقا هما فى مدارش عاليا او قليلة او حكومية الرك على التربية فى البيت مش التعليم فى المدرسة

انا شايفة ان الموضوع اكبر بكتير من كدة فى الحياة الخاصة للاولاد مش علاقتهم باباءهم و دة عاصرتة من ناس اقارب ليا

وصلوا الى اعلى المراكز و تخرجوا من الجامعة الامريكية و اصبحوا دكاترة فيها و اصبحت البنت من سن 16 سنة تجوب كل بلاد العالم

و حصلت على شهادات لم تحصل عليها اى بنت فى منطقة الشرق الاوسط تعال انظر للحياة الخاصة و التعاملات اصبحت امريكيا

قالبا و تفكيرا و مضمونا لم تستمر فى زواجها اكتر من عام لسبب بسيط ان زوجها لم يستطيع ان يتعامل مع شخصية عملية

معملية كل تفكيرها فى البيزنس

و الاولاد لم يتزوجوا حتى الان بعد ان وصلوا الى الثلاثينات يتزوجوا لية ؟؟؟ ما كل واحد لة حياتة الخاصة و النهاية الثلاثة بدون زواج الان

علاقاتهم بالام و الاب رائعة لكن افكارهم و معتقداتهم هدمت حياتهم لا يصادقوا الا الاجانب و عندما اتحدث معهم لا انكر انى

انبهر بهذة الادمغة العالية جدا فى التفكير فى البيزنس و الاقتصاد و الاعمال

لكن فى الحياة الخاصة و طريقة التعامل ارى انى امام نموذج اروبى لا يتناسب ابداااااااااا معنا

ارى بعض الدموع فى عيون الاب و هو حزين على اولادة و هو يقول لى هل

ذنبى انى دخلتهم الجامعة الامريكية و سفرتهم بلاد العالم ليحصلوا على اعلى الشهادات علشان يتعمل لهم غسيل مخ

يا عنبى مووضع نظرة الابناء الى الاباء دة تربية من الضغر لا بتتغير بالتعليمو لا بالسفر و لا باى شىء لو حصل فيها شرخ يبقى اكيد فية شرخ فى التربية من الاول

الفكرة لو التعليم العالى دة بدل ما يكون سلاح لابنى يحارب بية الزمن و يعلى لفوق الاقية السلاح دة بيجرحة هو و بيغسل مخة و بلاقى ابنى شخصية تانية خالص لا انا عارف ارجعة تانى و لا انا عارف اتماشى معاة

ذهبية

[miramikhail]

ذنبى انى دخلتهم الجامعة الامريكية و سفرتهم بلاد العالم ليحصلوا على اعلى الشهادات علشان يتعمل لهم غسيل مخ

هى دية بالظبط النقطة اللى الواحد بيبقى خايف منها و أفتكر كان دار حديث بينى و بين بنتى و أبنى من فترة عشان هما كانوا بيقولوا يعنى لو معانا فلوس أكتر كانو داخلوا مدارس من العليا أوى زى المدرسة الأمريكية فالحقيقة كان ردى ساعتها أن لو معايا مصاريف المدرسة الأمريكية مش حندخلها لكم برضة لنفس النقطة لأن لما يبقى طفل صغير لسة بيتربى و بيقعد على الأقل ست سبع ساعات فى مدرسة بيتعلم و يعيش حياتة و وحيفضل ليا أية ده بيرجع تقريبا على النوم و بيتربى على قيم مختلفة مش مقبولة عندى أطلاقا و موضوع البيت يربى ده صعب جدا لأن المدارس دية بتأخد تقريبا اليوم كله و الأجازات ما بتزدش عن شهر و نصف حاجة كده أنا كنت زمان أعرف وبنتين قرايب واحده صحبتى فيها.

و أنا هنا بتكلم على المدارس الأنترناشونال بالكامل مش المصرى بس بتدرس منهج الIG ولا الأمريكان

[اغابي]

انت بتقول فيها طب ايه رايكم بقي ان

ابني عمره 8 سنين وعارف برامج بيحملها من الكمبيوتر انا ما اعرفش زيه - فعادي لانى انا وهو اصحاب جدا احيانا باتعلم منه

داه غير انه بيسبقنى فى مستويات صعبة جدا فى الجيمز

اما ابنى التاني اللى عمره 4 سنين ممتااز بيلعب جيمز صعبه وانا بخاف عليه لانها مش مستوي تفكيره هو صغير لسة على كده

زيت لعبه جاتا دي مثال بس فيه العاب تاني كتير عاوزة تخطيط مش فى سنه خالص لدرجة اللى بتحتاج باص وورد بيخلى اخو يساعده فى كتابة الباص وورد وهو زي القرد يلعب

تحياتي

[عبير يونس]

انت بتقول فيها طب ايه رايكم بقي ان

ابني عمره 8 سنين وعارف برامج بيحملها من الكمبيوتر انا ما اعرفش زيه - فعادي لانى انا وهو اصحاب جدا احيانا باتعلم منه

داه غير انه بيسبقنى فى مستويات صعبة جدا فى الجيمز

اما ابنى التاني اللى عمره 4 سنين ممتااز بيلعب جيمز صعبه وانا بخاف عليه لانها مش مستوي تفكيره هو صغير لسة على كده

زيت لعبه جاتا دي مثال بس فيه العاب تاني كتير عاوزة تخطيط مش فى سنه خالص لدرجة اللى بتحتاج باص وورد بيخلى اخو يساعده فى كتابة الباص وورد وهو زي القرد يلعب

تحياتي

بسم الله ما شاء الله

اللهم احفظهم و بارك فيهم و احفظ عليهم عقولهم

آمين

[maksoof]

طبعا دى حاجة تفرح

بصراحة .. دى تبقى مصيبة سودة لو ثقافة أولادى تبقى أقل من ثقافتى :sad:

[اغابي]

بسم الله ما شاء الله

اللهم احفظهم و بارك فيهم و احفظ عليهم عقولهم

آمين

اشكرك يا اختى المصرية

بصراحة كل مشاركاتك وكلماتك الطيبة بتسعدني جدا

لدرجة بقيت ادور على مشاركاتك واتابعها حتى لو ردك للاخرين ومش ليا بس

بارك الله فيك ربنا يحافظ على اولادنا ويحميهم امين

تقبلى تحياتي :unsure:

[عبير يونس]

بسم الله ما شاء الله

اللهم احفظهم و بارك فيهم و احفظ عليهم عقولهم

آمين

اشكرك يا اختى المصرية

بصراحة كل مشاركاتك وكلماتك الطيبة بتسعدني جدا

لدرجة بقيت ادور على مشاركاتك واتابعها حتى لو ردك للاخرين ومش ليا بس

بارك الله فيك ربنا يحافظ على اولادنا ويحميهم امين

تقبلى تحياتي :hearts:

ربنا يكرمك يا أختي الغالية

و يديم المعروف

:unsure:

آمين