صباح الورد - أخيرا .. حل مشكلة الزبالة!

[عادل أبوزيد]

أقرأ جريدة الأخبار بإنتظام كجريدة ثانية لأسباب كثيرة أولها أنها جريدة قومية لا تعطى للخبر حقه من التغطية الصحفية المهنية و كثيرا ما لا أستطيع فهم الخب

ما سبق كان إستهلالا لابد منه

فى جريدة الأخبار أقلام لابد أن تقرأها ... و أظننى إكتشفت الكاتب الساخر عبد القادر محمد على و له عمود أظنه أسبوعيا يوم الأربعاء بعنوان "صباح الورد" و فيه مجموعة من الشخصيات الثابتة التى تضارع شخصيات مصطفى حسين.

أنقل لكم اليوم مقاله اليوم بعنوان "أخيرا .. حل مشكلة الزبالة!" و أعترف لكم أن هذا المقال ليس بأى حال أحسن كتابات هذا الكاتب و لكنه أحدثها.

رابط المقال هو http://www.elakhbar.org.eg/akhbar/articleD...=21232&m=10

و هذا هو المقال نقلا من جريدة الأخبار بتاريخ الأربعاء 28 أكتوبر 2009

أخيرا.. حل مشگلة الزبالة!

بقلم :عبدالقادر محمد علي

بعد جولة الملك رمسيس الثاني لتفقد أحوال الزبالة في عاصمة احفاده، دعا روكا الحرامي جلالته لاحتساء كوب من الحلبة الحصا علي قهوة عنتر، ودار الحديث عن الزبالة .

قال روكا لجلالته : البلد فيها ٣ أصناف من الناس يا سيادة الملك . البهوات ربنا يديم عليهم الصحة ويزيدهم من نعيمه . وبتوع الدخل المحدود اللي قلوبهم مليانة غل من البهوات والحكومة. وسكان العشوائيات ربنا ياخدهم ويريحنا منهم .

قال الملك : نتحدث عن الزبالة وليس عن تصنيف فئات المجتمع .

قال روكا : جايلك في الكلام. أصل انا عندي حل للمشكلة سيادتك . الزبالة بتاعة سكان العشوائيات ترجع لهم تاني وعليها بوسة .. نوزعها علي بطاقة التموين وكل حي ياخد حقه .

قال الشيخ : العدل حلو !

قال روكا : نعبي الزبالة في شكاير ونكتب عليها »زبالة تموينية - الوزن الصافي 10 كيلو« . اللي عنده ٤ عيال ياخد ٦ شكاير هو وعياله والمدام .. ومجانا سيادتك . مش ح يدفع غير ٣ جنيه تغليف وجنيه دمغة و٢ جنيه رسم تنمية وجنيه ونص ضريبة ملاهي علي كل شيكارة .

ومافيش إجبار لامؤاخذة. من حق المواطن يوفر فلوس التغليف وياخد زبالته سايبة. بس لازم يجيب معاه حاجة ياخد فيها . لكن برضه ح يدفع التلاتة جنيه بتوع التغليف مع باقي الرسوم . ويطلع من عند البقال علي مكتب التموين يكتب طلب مدموغ برد رسوم التغليف. ويقدم شهادة من البقال انه كان معاه حاجة ياخد فيها. وبعدين يفوت ع الخزنة . ياخد دوره في الطابور ويدفع ٢ جنيه إعانة لجمعية اصدقاء الزبالة . وخمسة جنيه رسم استرداد. وجنيه رسم حفظ. وجنيه رسم بياني . وبعدين يختم الوصل بختم النسر الازرق ويمضيه من المدير . ولما الأيام والشهور والسنين تلف لفتها مسيره ياخد فلوسه علي داير مليم .

قال الشيخ : اللي عند الحكومة ما يضيعش !

قال روكا: لو الايام مالفتش والفلوس مارجعتش برضه هو الكسبان. واخد زبالة تكفيه تنجيد مخدات وخدديات وشلت ومراتب ينام عليها 200 سنة قدام.

سأله الملك : وزبالة ذوي الدخل المحدود ؟

اجاب روكا : بتاع المحدود ماعندهوش زبالة. بيعمل ورق الجرايد ستاير . لا يعرف علب السلامون ولا التونة. بيعمل قشر البطاطس سندوتشات والازاز المكسور مربي وبيزلط البلطي بالشـوك بتاعه .. والجزمة لما تقدم بيعملها نملية . ح تيجي منين الزبالة سيادتك ؟

واضاف روكا يقول للملك : فاضل الزبالة بتاعة البهوات، وكلها خير سيادتك. بولوبيف وقشر موز وفينو وورق متعاص بقلاوة وعضم فراخ وقشر بيض بلدي . نبعتها ببركتها لبتوع المحدود. في كل حارة كوم واحد عشان كله يستفيد .

قال الشيخ : قلبك كبير يا معلم !

قال روكا : قبل الشمس ما تطلع مش ح تلاقي سيادتك ولا فتفوتة زبالة . وكده نبقي ضربنا عصفورين بحجر. بتاع المحدود ياكل الزبالة .. وبعدين الزبالة تاكله علي مهلها وتريحنا من الزن بتاعه .. والحكومة توفر الدعم .

قال الشيخ : وزير زبالة يا سيد المعلمين !

[Amr Radwan]

wst::

فعلا .. حل بسيط و سهل لمشكلة القمامة .. لو كلننا بناخد الامور بسهولة زي روكا الحرامي كانت الزبالة و المشاكل و البلاوي اللي احنا فيها خلصت :)