ياترى ؟....بتقول لابنك .ما تعيطش

[rewsha]

لو انت بتقول لابنك ...ما تعيطش يا حبيبي :blink: ....انت راجل

والراجل مش بيعيط

;)

تبقى انت كده ....صح وله غلط؟

رغم ان لو عندك بنت في نفس السن ولاقيتها بتعيط ...ها تسبها وتطبطب عليها وتقول لها ...معلش . :smart:

[Damo]

انا مش خبيرة في تربية الاطفال ولا حاجه بس انا بصراحة بقترح يبقى في طريقة تانيه عشان الاطفال ديما الprocessing بتعهم غير الكبار و صعب توقع الاستنتاجات بتعتهم. فا ممكن مثلا بدل 'مش تعيط ينتا راجل' تتناقشوا بخصوص المشكلة و تستنجوا في الاخر ان الحل انو يعمل كذا كذا كذا مش يعيط لأن العياط مش هيعمل كذا كذا كذا...

لكن لما تدخل في دماغه معلومة الرجاله مش بتعيط و خلاص كده هو مش اتعلم معلومة او skill جديدة

ارجو اني اكون ساعدت رغم خبرتي المعدومه :smart:

تم تعديل 29 أكتوبر 2009 بواسطة Damo

[pink rose]

بصي يا روشة انا ربنا لسا ما كرمنيش بولد

بس ان ربنا اراد و حصل ابدا مش هاقوله الكلمة دي يعني ايه الراجل ما يعيطش و البنت هي اللي تتقهر على شبابها و هاتك يا عياط

اولا كده غلط من ناحيتين هانخلي الطفل البرئ دا يجمد قلبه و ما يعرفش يعبر عن اللي جواه و يكتم في نفسه ليه كده

اي طفل صغير من حقه يعبر عن مشاعره و ينفس عنها بالعياط في الامور اللي تستاهل يعني

لو ولد وقع و رجله بتوجعه مثلا اقوله عيب الراجل ما يعيطش يا سلام و العكس لو بنت بقى اسيبها تتفلق لا طبعا

انا اصلا باقول لمريم دايما لما الاقيها بتعيط على اي و كل حاجة كده ما فيش داعي للعياط و نتكلم في اللي مزعلها لو حاجه عبيطة من بتاعت العيال بافهمها انها مش كل حاجه تعيط عليها كده لان الشطار مش بيعيطوا كده عمال على بطال

لكن لو حاجه جامدة باقعد اهديها من غير ما اقول ما تعيطيش

حد فاهم حاجه

الساعه 4 و شكلي هيست خالص :smart:

[Alshiekh]

لو انت بتقول لابنك ...ما تعيطش يا حبيبي :blink: ....انت راجل

والراجل مش بيعيط

;)

تبقى انت كده ....صح وله غلط؟

رغم ان لو عندك بنت في نفس السن ولاقيتها بتعيط ...ها تسبها وتطبطب عليها وتقول لها ...معلش . :smart:

بيعيط ليه؟ او بتعيط ليه؟

اصل العياط انواع

عياط علشان تنفذوا له رغبته وتجيبوا له اللى هو عايزه

عياط علشان وقع او اتكعبل

فياترى ايه سبب العياط علشان نعرف نرد

[HanaaOsama]

السلام عليكم انا بصراحة معنديش اولاد عندي بنتين الكبيره 3 سنين لكن الموضوع خلاني اسالكم سوال محيرني انا مش عارفه ايه هي انواع " العقاب " المناسبه للسن ده ! يا ريت تقولولي كل واحد بيعاقب اولاده ازاي لان الزعيق بيخلي الواحد يخرج عن شعوره و كتره اكيد غلط

[pocy]

بصراحه انا ابنى لسه صغير يعنى سنه وشهرين فاستحاله اقوله متعيطشلان عادة عياطه بيكون لاسباب الجوع او العطش او الوقوع وقليل جدا لما يزن على حاجه انامش عايزه اديهاله ودى طبعا بحاول الهيه فى حاجه تانيه وربنا يكرم وميطلعش زنان وعيوطه لما يكبر شويه

[rewsha]

بالنسبه لنوع العياط اللي اقصده ....هوه لما يقع يتخبط يتاْلم من موقف

لكن العياط بتاع انه شبطان في حاجه وعاوزني انفذ له رغبه ده ...ما قصدهوش .

انا اقصد العياط النابع من داخل الطفل ...مشاعر واحاسيس يعني ...تعبير عن ضيق ...زعل ...الم

اما بالنسبه لكلامك يا ريمو

متهياْلي هوه ده عين العقل .لان الطفل (الطفل الولد يعني) لازم ينفث عن اللي جواه من ضيق او الم او زعل بالعياط .لاْنه في الاخر ..بني اْدم برضو

لكن لاحظت دايما ان الام تقول لابنها ...ما تعيطش يا حبيبي ...انت راجل

طب والراجل ده مابيحسش زي الناس يعني؟

اما بالنسبه بقه لعياط الزن وتنفيذ الرغبات .

فلو انا قدرت اوصل له ان الزن والعياط مش هايجيب نتيجه ومش هايفرق ومش هايخليني انفذ له رغبته .يبقى انا كده انجزت انجاز كبييير جدا معاه

وده حصل بالفعل معايا في تربيه بناتي

اكتشفت ان الطفل اذكى مننا وعارف انه لما بيزن ويعيط ويوجع لنا دماغنا علشان نسكته اوتوماتيك بنعمل له اللي هوه عاوزه منعا لوجه الدماغ

لكن في مره قلت .ياانا....... يا انت

وحاولت افهم بنتي ان العياط مش هايجيب نتيجه واحاول اقنعها ان الحاجه اللي شبطانه فيها مش هاتتنفذ ...وما فيش فايده

قمت سيبتها تعيط وتزن ..وكل شويه تعلى صوتها ...تعلى صوتها ...تعلى صوتها

وانا باعمل زي اعلان احمد مكي .....هادي .....هادي .....هادي

وفي الاخر انتصرت

ولاقيتها سكتت لوحدها

واتعودت بعد كده ان الزن .....ما فيش منه فايده ومش هايوصل لحاجه

لكن انا لما ساْلت السؤال بتاع ما تعيطش ..انت راجل .........ساْلته علشان كنت باقراْ موضوع (فوائد البكاء).وقلت اشمعنى نحرم ابننا الولد من الفوائد دي

وقل اشوف راْيكم .وكل واحد بيعمل ايه .

[عبير يونس]

انا بقى مع العياط للجميع

رجل و امرأة و طفل

العياط ده حاجة ضرورية جدا لأي إنسان

و كبت العياط خطر جدا على الصحة النفسية

ده بالنسبة للعياط اللي هو تعبير عن المشاعر

اما عياط الزن

فأنا بأعاند فيه

و لا يمكن أنفذ أي طلب لولد و لا بنت و هو بيزن

و بافهمهم

طول ما انت بتزن مفيش حاجة

بس ده لو كنت لوحدي مع اللي بيزن

لكن لو باباه اتدخل

مبيقدرش يتحمل و بيعمل لهم اللي عاوزينه

و دي لوحدها مشكلة عايزة توبيك منفصل

تحياتي

[miramikhail]

هو الحقيقة نقطة أن الولد مايعيطش لأنة ولد بتتغرس فيهم ماتعرفش أزاى من باباهم من اللى حواليهم مع أن الموضوع ده حاجة سئ جدا

يعنى حديكم مثل ممكن توصل لأية أنا أبنى كان فى أول أعدادى و هو بيعدى الشارع و بيمد رجلة عربية خبطت رجلة مش حقو لكم حالتى أما كلمنى المهم رحت و خدته مستشفى (خاصة) و الدكتور فى الطوارئ قالة أقف كده قادر راح واقف على رجلة راح الدكتور قالى دية كادمة مش محتاجة أشعة و عملها جبس خفيف لأن الولد كان صابح عند أمتحان فقلت له مش حيقدر يريح حتى و لو كدمة المهم بعد ما فكين الجبس بعد أسبوعين و كنت بالصدفة رايحة لدكتور عظام يعنى لركبى و قلت أعمل كشف لأبنى كمان عشان رجلة لسة ورمة شوية و بتوجعة شوية يعنى لما بيقف كتير (ده على حسب تعبيرة) تخيل لما عمل أشعة أكتشفت أن الرجل لسة مشروخة يعنى وقف عليها و هى مشروخة و لما قلتلة لية ياحبيبى مقلتش للدكتور فى الأول أنك مش قادر تقف عليها قلى هى كانت واجعمى لكن ممكن أقف عليها - حتى مجرد أن يقول أن حاجة وجعاه مش بيقول ده عشان الراجل لازم يستحمل (طبعا زى ما تسعين فى المية من الناس بيقولوا قدامة و هو طفل و ألا يبقى....) أما بنتى فحدث ولا حرج لو دبوس شكها تبقى حكاية ولازم نشوف أنتى بيوتك وبلاستر و حاجات كده (طبعا أنا مزودها يعنى )بس فعلا النقيض وده برضة لأنها بنت و المفروض تبقى رقيقة و ما تستحملش .

وعلى فكرة أنا شخصيا مش كده (معرفش لية هى كده)

تم تعديل 29 أكتوبر 2009 بواسطة miramikhail

[bentmasria]

الدنيا شوية مختلفة من سن للتانى يعنى وابنى عمره سنة واتعور حيبكى وبعدين حضن وابتسامة بيهدوه

وهو 3 سنين كان بيتكلم وبيعبر وبيقول بتوجعنى وبقوله خلينى انظفهالك ونحط بلاستر والهيه شوية وييجى يخلينى ابوس الواوا على رأى السيدة هيفاء بس مع التحذير اللطيف انه ينتبه علشان ما يتعورش تانى

كبرنا شوية

خمس سنين ورحنا المدرسة وبنتخانق بييجى راسه مخبوطة واسأله يقوللى صاحبى فولان زقنى طيب وانت عملتله ايه زقيته طيب تستاهل ونضحك ونقول ان اللعب بهدوء لكن الاطفال وخاصة الاولاد مابيعرفوش الهدوء قوى

ولو الاصابة منزلية نتيجة شقاوة منزلية وانا نبهت عليها قبل كده يبقى يعيط ويتعالج والصوت يحتد فى اشارة واضحة انه قد تم التنبيه مرة وانت تستاهل علشان ما بتسمعش الكلام ولازم تعتذر لانك غلطت ومحدش بيموت من العياط

دخلنا سنة اولى

بشوف عليه كدمات كتير

وآثار معارك حربية ضارية وخرابيش واسأل والرد انا واصحابى كنا بنلعب وغالبا الميس ذنبتنا وحتعمل كده تانى ابدا يا مامى انا راقبته مرة فى البريك بتاع المدرسة واكتشفت ان المهذب اللى فى البيت شقى بس بطل يعيط او يشتكى من اصحابه لانهم عصابة منظمة اما بقى لو القطة خربشته فى البيت مامى الحقينى عاوز بلاستر ومن غير ما أقوله ما تعيطش يترمى فى حضنى شوية ويبصلى انا راجل خلاص موش حعيط بس النصيحة موش منى بسيبه يبكى لو عاوز لان البكاء فعلا بيخلق نفس صافية وهادية وبضمه لو محتاج وبتمنى لو كانوا اهلى زمان قاللولى عيطى موش انتى جامدة وما تعيطيش هو انتى لسه صغيرة

فهمتوا قصدى

قدرة الطفل على الاحتمال بتتحدد من قدرتنا على ابداء المساندة

وهو اللى بيحدد عاوز ايه وازاى

ولو عيط بزيادة يبقى نفسه فى حضن كبير وده حقه لانه برضه طفل مهما كبر

ربنا يسعدكم ويفرحنا باولادنا يارب