انواع عقاب الاطفال

[pink rose]

طيب انا هاحكيلكم موقف و ماذا تفعل لو كنت مكاني

من شوية مريم عرفت اننا هانخرج المهم قلعت البنطلون و الدنيا برد و كنا لسا شوية على ما ننزل

المهم بهدوء كده لو سمحتي يا مريم البسي بنطلونك لسا مش هاننزل دلوقتي

طبعا حوارات مش دلوقتي ليه و و امتي المهم

البسي يا مريم بنطلونك طيب يا مامي هالبس بنطلون الخروج لا لسا بدري يا مريم على الخروج البسي بنطلون البيجاما

طب يا مامي البس هدوم بيت غيره مش هاينفع يا مريم الهدوم كلها منشورة البسي دا دلوقتي

طيب يا مامي البس بنداكور لا يا مريم الدنيا برد

طيب يا مامي البس البنداكور تحت بنطلون البيجاما

لا يا مريم ما ينفعش و طبعا نبرة الصوت بدأت تعلى لاني بقالي تلت ساعه باقول البسي البنطلون

المهم قولتلها البسي البنطلون بدل ما اقوم اضربك

تقوم تقولي لو ضربتيني هاضرب فارس (ابن اختي بيبي لسا عنده 5 شهور)

معلش طولت عليكم بس عشان تعرفوا الموقف بالتفصيل الممل

هااااااااااااااااااااا تعملوا ايه لو كنتوا مكاني؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اليـــــــــــــك اقتـــــــــــــراح

1- تطنيشيها بعد اول طلب منها انها تلبس البنطلون - اطلبى منها وطنيشيها لمدة 10 دقائق -

2- تعالى جنبها واتكلمى فى الموبايل ( كدا وكدا :sad: على انك بتكلمى باباها ولو موجود باباها كلمى اى حد من العيلة تعرفه عم او تانت او اى شخص - وقوليله فى التلفون ايه دا انت بجد جبت حاجة حلوة لمريم - بس هى ما لبستش البنطلون ومش بتقول اوكيه يا مامى

3- اقفلى التليفون فورا علشان ما تاخدش التلفون تكلم هى الشخص لانها اكيد حتعرض وجهة نظرها وتشكى للى على التليفون من تصرفاتك معاها واللى هى فى اعتقادها انك انت اللى غلطانة - واطلبى منها للمرة التانية تلبس البنطلون بعد قفل المكالمة .

4- دائما احتفظى فى منزلك بحلويات وخبيها للاوقات دي - وتجيبى اى حلوى وخبيها ورا ظهرك وقوليلها كانك بتلعبى معاها وبهدوء مين الحلوة اللى حتاخد الحاجة الحلوة

بعد كل دول البنت حتكون هديت وفورا حتلبس البنطلون - وواضح انها بتغير من فارس جدا ففهميها انه وحش وبيلبس بامبرز لكن هى شاطرة وجميلة مش بوببا زى فارس هو بوببا وحش - السياسة مع الاطفال بتسرق منهم العند .

اغابي

و الله يا اغابي الفكرة لطيفة

هاجرب لما يحصل موقف تاني و اقولك الاخبار

بس هي مش بتغير من فارس خالص بالعكس بتحبه جدا

هو اللي حصل قبل كده ان خالتها قالتها هي و بنت اختي (اخت فارس) لو عملتوا شقاوة هاضرب فارس هزار يعني

بس كده فا خلاص اي حد هايعمل حاجه يبقى فارس الغلبان هو اللي هاينضرب

[pink rose]

السلام عليكم ورحمة الله وبركاته

تختلف انواع عقاب الطفل ........ باختلاف سنه وطريقة تربيته ونوع الخطأ الذي اقترفه

بمعني

موش هقدر اعاقب طفل عمره سنة بنفس العقاب اللي هعاقب به طفل عمرة خمس سنوات لنفس الخطأ

مشكلة العند وعدم سماع الكلام دي ماجتش من فراغ ياجماعة

العند نتيجة لتصرفات الآباء ................ اما نتيجة للقسوة ............ أو نتيجة للدلع ........... أو للتذبذب في المعاملة

نتكلم عليها بعدين

لكن

فيه طفل تكفيه نظرة عين لائمة ........... ممكن يعيط بسببها ويعرف غلطة ومش هيكرره

وطفل تاني لازم نملص ودانه علشان يفهم

الضرب ممنووووووووووووووع منعاً باتاً لانه بيسبب مشاكل كبيرة جداً للاطفال

العصبية الزايدة مشكلة كبيرة جداً .......... هتسبب مشاكل كتير وهنفقد بيها السيطرة علي الطفل لانه هيتحول لشخص عصبي انفعالي

لازم يكون للطفل كبير يهابه ويحترمه ويخاف انه يزعل منه ( يعني لو قلتله لو بابا عرف انك عملت كذا هيزعل منك اوي ....... زعل بابا هنا في حد ذاته عقاب ............ لانه بيحب بابا - موش بيخاف منه - ولو بابا زعل هتبقي مشكلة بالنسبة للطفل )

ماينفعش اقول للطفل علي حاجة غلط ويجي حد تاني يقوله عليها صح

لازم الطفل يفهم هو بيتعاقب ليه

كفاية اوي اني لما ازعل منه اكشر في وشه وابين اني زعلانة

زي ما فيه اسلوب للعقاب فيه اساليب تانية للثواب .......... لما الطفل يعمل حاجة كويسة لازم يثاب عليها علشان نشجعه

لازم الطفل يكون له قدوة موجودة ادامه ( ماينفعش اقول لابني ماتكلش شيكولاتة علشان الحساسية وانا قاعدة ادامة باكل شيكولاتة واقوله انا ماعنديش حساسية )

الطفل لازم يفهم ان العقاب لمصلحته وان ماما بتحبه علشان كدة خايفة عليه

السن بقي يختلف في ايه

( لاعب ابنك لسبع ,, وادبه لسبع ,,وصاحبه لسبع ,,, ثم اترك له الحبل علي الغارب )

يعني السبع سنوان الأولي .......... العقاب باللعب ....... ازاي ؟؟؟....... يعني انت محروم من اللعب ...... مافيش شيكولاتة ......... مش هتروح عند جدو ........ ممكن اضربه علي ضهر ايدة بالراحة طبعاً ( بالسواك مثلاً اقتداءً بالنبي عليه أفضل الصلاه والسلام )

من سبع سنوات حتي الرابعة عشر ......... يبداْ يتعلم الصح من الغلط ........ وهنا اسلوب العقاب مختلف تماماً ........ الحرمان من المصروف لمدة معينة ......... مافيش خروج ولا فسح ......... مافيش ركوب عجلة ........... مش هتقعد علي الكمبيوتر ..........مش هشتري ليك اللعبة اللي انت عايزها وممنوع من اللعب بتاعتك لمدة معينة

*تكرار الخطاً يستلزم زيادة العقاب

من سن الرابعة عشر وحتي الواحد والعشرون ......... نبدأ نصاحب الطفل ونتقرب منه جداً ( مابقاش طفل اصلاً ) انسي انك كبير وعاقل وخليك صاجبه في سنة ........... بلاش دور الناصح الواعظ دايماً ......... بس فكروا مع بعض في التصرفات

وماتنسوش ............ انكم الكبار وانه هو الصغير ........... يعني لازم يكون فيه مرجعية ليكم ........ وعقاب بتطبقوه عليه ....... بس العقاب هنا هو عارف انه للاصلاح ......... منعاً للتمرد

ان شاء الله نقدر نتناول الموضوع بالتوضيح والتفصيل اكتر من كدة بعدين

ريمو

ماتوصليش بنتك لمرحلة الجدل ........... دايماً احتفظي بنظرة تفهم من خلالها انك متضايقة ....... وتعرف ان بعد النظرة دي لو مانفذتش يبقي مافيش نزول اصلاً

المشكلة بجد

ان جو العقاب دة بيبقي صعب جداً في وجود الأهل وخاصة الجد والجدة .......... لانهم بيدلعوا زيادة عن اللزوم وبيفسدوا اي محاولة للعقاب

كلامك جميل يا رضوى بيعجبني بجد

هاقولك الحق مش هاكدب عليكي انا فعلا عصبية و عارفه ان دا غلط في التعامل مع الاطفال و باحاول قدر الاماكن اني امسك نفسي بس ساعات اعصابي بتفلت مني ... الله المستعان

اهي الكلمة الاخيرة دي بقى درر منك بجد

مريم بتيجي هنا صباح البوظان اللي في الدنيا و من الكبار بابا و ماما و انا طبعا ما اقدرش افتح بؤي

عارفه ليه لان الست لماضة بنتي مش لماضة حبيبتي بتقوم رزعاني كلمة محترمة جدا

مامي ما ينفعش ما تسمعيش كلام مامتك كده غلط جداااااااااا لما طبعا يكون كلام ماما على مزاج الهانم

[HanaaOsama]

السلام عليكم ورحمة الله وبركاته

تختلف انواع عقاب الطفل ........ باختلاف سنه وطريقة تربيته ونوع الخطأ الذي اقترفه

( لاعب ابنك لسبع ,, وادبه لسبع ,,وصاحبه لسبع ,,, ثم اترك له الحبل علي الغارب )

يعني السبع سنوان الأولي .......... العقاب باللعب ....... ازاي ؟؟؟....... يعني انت محروم من اللعب ...... مافيش شيكولاتة ......... مش هتروح عند جدو ........ ممكن اضربه علي ضهر ايدة بالراحة طبعاً ( بالسواك مثلاً اقتداءً بالنبي عليه أفضل الصلاه والسلام )

كلامك جميل يا رضوي

لكن افتكر العقاب لازم يبقي في نفس زمن الخطأ و هي ديه المشكله يعني مثلا مفيش شيكولاته طب ما هي مفيش فعلا شيكولاته دلوقتي

ومش هنعد باقي العمر مش هنجيب قصدي العقاب ده افتكر ملوش تأثير اوي

و برضه مش هنروح لجدو و في نفس وقت الخطأ مفيش فعلا تخطيط فعلي للمرواح لجدو يبقي اكيد الطفل مش هيحس بالعقاب ده في وقته

مش عارفه الكلام ده صح ولا غلط

يعني مثلا الطفل عمل خطأ او عند منه في حاجه او اي شئ يستحق العقاب في نفس اللحظه ايه هو العقاب المناسب ؟

طبعا الضرب الخفيف او حتي الزعيق غلط و لكن اكيد بيحصل في بعض المواقف

موضوع ال bad corner رغم عدم اقتناعي بيه لكن جربته

و برضه جربت اقولها انا زعلانه منك يعني بتيجي تقول اسفه يا ماما متزعليش

بس في حاجه مهمه و كنت قريتها قبل كدا ان الطفل في سن 3 او 4 سنين دايما عايز يتاكد ان مامته و باباه بيحبوه حتي لو عمل حاجات غلط

و فعلا اول ما اعمل لبنتي عقاب او ازعقلها او اقولها انا زعلانه علطول و كل مره لازم تقولي " انت بتحبيني ؟ "

اقولها اه اكيد بحبك لكن زعلانه منك عشان عملتي حاجه غلط لكن بحبك و ده كل مره

قريت ان مينفعش نقول لا انا مش بحبك و انت بنت وحشه و الكلام ده

[pink rose]

السلام عليكم ورحمة الله وبركاته

تختلف انواع عقاب الطفل ........ باختلاف سنه وطريقة تربيته ونوع الخطأ الذي اقترفه

( لاعب ابنك لسبع ,, وادبه لسبع ,,وصاحبه لسبع ,,, ثم اترك له الحبل علي الغارب )

يعني السبع سنوان الأولي .......... العقاب باللعب ....... ازاي ؟؟؟....... يعني انت محروم من اللعب ...... مافيش شيكولاتة ......... مش هتروح عند جدو ........ ممكن اضربه علي ضهر ايدة بالراحة طبعاً ( بالسواك مثلاً اقتداءً بالنبي عليه أفضل الصلاه والسلام )

كلامك جميل يا رضوي

لكن افتكر العقاب لازم يبقي في نفس زمن الخطأ و هي ديه المشكله يعني مثلا مفيش شيكولاته طب ما هي مفيش فعلا شيكولاته دلوقتي

ومش هنعد باقي العمر مش هنجيب قصدي العقاب ده افتكر ملوش تأثير اوي

و برضه مش هنروح لجدو و في نفس وقت الخطأ مفيش فعلا تخطيط فعلي للمرواح لجدو يبقي اكيد الطفل مش هيحس بالعقاب ده في وقته

مش عارفه الكلام ده صح ولا غلط

يعني مثلا الطفل عمل خطأ او عند منه في حاجه او اي شئ يستحق العقاب في نفس اللحظه ايه هو العقاب المناسب ؟

طبعا الضرب الخفيف او حتي الزعيق غلط و لكن اكيد بيحصل في بعض المواقف

موضوع ال bad corner رغم عدم اقتناعي بيه لكن جربته

و برضه جربت اقولها انا زعلانه منك يعني بتيجي تقول اسفه يا ماما متزعليش

بس في حاجه مهمه و كنت قريتها قبل كدا ان الطفل في سن 3 او 4 سنين دايما عايز يتاكد ان مامته و باباه بيحبوه حتي لو عمل حاجات غلط

و فعلا اول ما اعمل لبنتي عقاب او ازعقلها او اقولها انا زعلانه علطول و كل مره لازم تقولي " انت بتحبيني ؟ "

اقولها اه اكيد بحبك لكن زعلانه منك عشان عملتي حاجه غلط لكن بحبك و ده كل مره

قريت ان مينفعش نقول لا انا مش بحبك و انت بنت وحشه و الكلام ده

طبعا لازم تحس انك بتحبيها

لما تسألك قوليها طبعا بحبك عشان انتي بنتي لكن مش بحب الغلط اللي بتعمليه

و لازم تقوليلها مامي بتعاقبك عشان مش عاوزاكي تعملي غلط و مش عاوزاكي تكوني وحشة و عشان مامي بتحبك و بتخاف عليكي

انا دايما باعمل كده مع مريم و دايما في كل وقت باقولها اني اكتر واحدة بحبها في الدنيا و اكتر واحدة بتخاف عليها في الدنيا

دا في اوقات مختلفه باقولها كده مش بس لما تعمل غلط

باحاول دايما ارسخ في مخها الكلام دا وبتكراره هي هاتفهمه و اكيد لما تكبر هاتحسه بنفسها

[pink rose]

انا دايما باعمل كده مع مريم و دايما في كل وقت باقولها اني اكتر واحدة بحبها في الدنيا و اكتر واحدة بتخاف عليها في الدنيا

الجزئية دي في كلامي غلط

المفروض الطفل يحس بحب كل اللي حواليه ليه

بمعنى انه لازم يعرف ان اهله و اصحابه كمان بيحبوه و بيخافوه عليه مش الام و الاب بس

عشان يحس بالتوازن و الثقة و الامان

انا اصلي رحت للدكتورة حنان زين المستشارة الأسرية و هي اللي قالتلي الكلام دا و صححتلي المعلومة

[عبير يونس]

أولا لازم نفرق كويس اوي بين العقاب للتأديب و الانتقام للنفس

يعني بنعاقب الطفل عشان نوصل له إنه عمل غلط

مش علشان نرفزنا و لا عشان حركاته بتحرق دمنا :gadeed:

يعني ميبقاش بنفش غلنا فيهم عشان احنا تعبانين و الا متعكننين و الا دمنا محروق

سواء منهم

أو من مؤثر خارجي

دايما ملاحظة فينا كمصريين الموضوع ده

نطلع همنا في ولادنا

و خصوصا لو حد انتقدهم

و الا قال لنا ان الولاد فيهم كذا و كذا

بيبقى صعبان علينا اوي ان حد شايفهم مش مؤدبين

و ننتقم منهم انهم وصلوا للناس الفكرة دي

طبعا منتهى الانتقام للنفس

احنا مش عايزين حد يقول على ولادنا نص كلمة

لأنه كده بيعيب فينا احنا

و يقولوا ولاد فلان و الا ولاد فلانة مش متربيين

و طبعا بننتقم منهم

من غيظنا من اللي الناس بتقوله

لاننا مش حنقدر ننتقم من الناس طبعا

منهى الضعف

و عدم الثقة

كلنا نجرب كده

و نشوف ايه اللي بيخلينا نعاقب

يعني مثلا

لازم نفرق بين الحوادث و الأفعال المتعمدة

يعني لما طفل يسكب العصير مثلا على السجادة بدون قصد

ده بنسميه حادثة

و معلش يعني

مليون طظ في السجادة

و الا انيش اضرب بنتي و الا ابني علقة موت و الا أصرخ فيه

و لازم نقول على طول

"قدر الله ما شاء فعل"

لأنه ببساطة ممكن كان العصير ده وقع مني انا

ساعتها كان ايه اللي حأعمله مثلا؟؟؟

لو ابني الصغير طلع لي لسانه مثلا

لازم اتجاوز لأسباب كتيرة

أولا عشان أعلمه التسامح و حمل الأذى

و ثانيا عشان ما أعلموش الانتصار للنفس

و ثالثا عشان الموضوع يعدي و ميحسش الطفل ان دي حاجة بتضايق يقوم يعملها و يعاند

بس ممكن طبعا لما يكررها أكسفه

و أقوله

كده برضه ماما

الأفعال المتعمدة بقى

هي اللي فيها الكلام

و طبعا تتنوع أساليب الخطاب مع الطفل حسب عمره

و لابد من استخدام الترغيب أولا

و لمرات عديدة قبل أن نفكر في الترهيب

و ده كمان بيتوقف على شخصية الطفل

لأن كل بني آدم و له مفتاح و طريقة تعامل ممكن ما تناسبش غيره حتى لو اخوه أو أخته اللي متربيين معاه في نفس البيت

قبل كل ده

لازم احنا نسيطر على أنفسنا الأول

و نهدى كويس اوي

عشان نعرف نفكر

عشان نعرف نربي

و لنتذاكر معا

وصية حبيبي و سيدي رسول الله صلى الله عليه وسلم

" لا تغضب"