دليل القادمين إلى سوريا ..

[Morial]

مــبروووك يا منـال النجاح

يظهر ان سوريا وشها حلو عليكي

الف مبروك - الف مبروك - الف مبروك - الف مبروك

وحاوزع فى كل مكان مبروك علشانك يا منال

اغابي

bv:-

شكرا يا اغابي يا حبيبتي علي قلبك الطيب

والله انا بتمني لك الخير انتي واسرتك من كل قلبي

وربنا يسهلك كل صعب ويوفقك في الهجرةالفيدرال يا رب

[Ahmed Anwer]

السلام عليكم من دمشق

وصلت النهاردة الفجر

نصيحة محدهش يحجز علي السورية فرق السعر بينها و بين مصر للطيران بسيط جدا

و لكن مصر للطيران مباشر لدمشق و السورية بتقف في اللاذقية 45 دقيقة

يالا حصل خير

حاليا نزلت في فندق اسمه الشرق في ساحة الحجاز أمام مكتب مصر للطيران و السورية و محطة القطار القديمة

فندق غرفه واسعه و طلتها جميلة و نظيف و لكن الفرش قديم

و ده حال معظم الفنادق

الليلة ب 50 دولار بدون فطار و مش راضي ينزل

أنا نزلت فيه بس هأدور علي فندق تاني يمكن يكون أرخص و بمستوي معقول

و روحت ريف دمشق و حته اسمها عين فرجيه أو حاجة زي كده ،،، منطقة جميلة أووي

و طلعت جبل قسيون ،، كل ده في يوم واحد عشان الأخ السوري اللي هشتري البضاعة منه بيعمل واجب معايا

جزاه الله خيرا

سؤال بس أخير للجميع عرفت إن لبنان قريبة جدا من دمشق ،،،

حد يعرف لبنان بتشترط فيزا للمصريين و لا لأ ؟؟

عشان بفكر بعد مأخلص شغل اطلع لبنان

سلام مؤقت هأروح أسهر في باب توما بناء علي نصيحة الأخوة

[مازن أطرش]

عزيزي احمد ..لبنان أكيد بتشترط فيزا للمصريين عشان فيها فرص شغل ..وفيها نسبة معقولة من المصريين بيشتغلوا ..ولا اعتقد في اتفاقية متبادلة بين لبنان ومصر للدخول بدون فيزا .. لذلك اعتقد بيشترطوا فيزا ..والله اعلم ل

[mostafamaher]

لالا لبنان فيزا جوه المطار لو سياحه والاقامه ( الهويه يعني ) لو لقيت شغل بتبقا مجانيه .. وبعدين لبنان مش غنيه يعني عشان تشترط فيزا

تم تعديل 30 مايو 2010 بواسطة mostafamaher

[Ahmed Anwer]

أنا رجعت أرض الوطن النهاردة يا جماعة

بخصوص موضوع لبنان حسب استفساراتي من كذا شركة سياحة هناك لازم فيزا للمصريين و تكون واخدها من بلدك كمان

و دي نصيحتي برده لأي حد ياخد معاه فيزا لبنان و فيزا لتركيا لأنه بسهولة و بأسعار رخيصة ممكن يعمل رحلة سياحية بري من دمشق

دي كانت غلطتي لو كنت أعرف كنت خدت فيزا لبنان قبل ما أسافر

المهم بقي ،،

نقلت من فندق الشرق لفندق اسمه المحطة ،، بعد جولة في منطقة البحصه ،،

لقيت الفندق ده غرفة نظيفة و اسعاره رخيصه 1500 ليرة بالفطار و غرفة تأثيثها حديث بس كاستقبال و كده تقريبا يعتبر موتيل مش فندق يعني

بس أنا اللي يهمني الغرفة تكون مريحة و نظيفة و بس و برده في منطقة ساحة الحجاز

أقل من السعر ده بتكون فنادق في الضياع متستحملشي تنزل فيها يعني من 35 ل 50 دولار دي الفنادق المعقولة

مسألتش طبعا عن الفنادق الفاخرة

أيامي في دمشق قضيتها في شغل و روحت جبل قسيون ، عين فيجة ، سوق الحميدية ، المسجد الأموي ، باب توما ، المنطقة القديمة

غير المطاعم و المقاهي علي طريق المطار و في منطقة نص البلد اللي فيها الفندق و مول الشام سيتي سنتر و مناطق تانية كتير مش فاكر اسمها

الصراحة دمشق بالنسبة لينا كمصريين مش هيكون فيها شئ شيق أووي

لأنها شبه القاهرة بالضبط ،، مدينة مفيهاش حاجة غير بشر و مباني و يشبهوا القاهرة فمفهاش جديد

الحمد لله ربنا كرمني بعد ما خلصت شغل ،، لما فشل موضوع لبنان و تركيا ،،لقيت برنامج سياحي في الشركات السياحية اللي في منطقة البحصه

جنب الفنادق اللي بنتكلم عليها

اسمه السواحل السورية ،،،

مش عارف اقولكم أيه ،، تلت أيام كانوا بالرحلة كلها ،،،

روحنا اللاذقية ، طرطوس ، بحيرة بللوران ، منطقة أم الطيور ، غابات الفرلق ، البحيرات السبع ، منطقة راس البسيط ، مدينة كسبه ،

حته تانية كده برده علي الحدود التركية اسمها السمراء تقريبا

الصراحة مش عارف اقولكم علي الانبهار و السعادة اللي كنت فيها بالطبيعة دي

إحنا كمصريين عشان واخد علي السهل المنبسط و الصحاري

لما بنشوف مناظر جبال ، و غابات و مع مياه ،،، بيجيلنا حالة انبهار

و المناطق دي أنا مش قادر أوصف جمالها ،،،، أنا قول ما بصيت علي بحيرة بللوران دي كنت هأعيط اساسا من الجمال

المرشد بيقولنا لما جمال عبد الناصر جه المناطق دي ،،

قال كلمة بيعتزوا بيها جدا ،،،

قال أكيد هيا دي الجنة

تكلفة الرحلة في غرفة مزدوجة 4000 ليرة ( حوالي 500 جنية مصري أو اقل ) في غرفة مزدوجة و 7000 ليرة ( حوالي 840 جنية مصري ) تلت ايام بالانتقالات و بافطار و عشاء و بالفندق

لما تحسبها تلاقيها أزيد بسيط من تكلفة لو قعدت في الفندق في دمشق

لكن فيه مصاريف تانية اثناء الرحلة بس كلها تستاهل

و فيه برامج تانية بالنسبة لسوريا بس مناطق اثرية ،، اعتقد مش هتكون شيقة بالنسبة لينا غير برامج لبنان و تركيا و كلها باسعار متنوعة و معقولة

خدت تاكسي من ساحة الحجاز للمطار و انا مسافر ب 600 ليرة

و ليا عودة للمزيد من الحديث عن سوريا الجميلة

لكن باختصار

الخضرة و الماء و الوجه الحسن

[مازن أطرش]

متشكرين يا استاذ احمد على مجاملاتك الحلوة ...تصدق بالله ..قبل متسافر ..لما سألتني عن المناطق السياحية ..وذكرتلك وقتها ام الطيور وكسب ..كنت ..(وللأسف ) اني مقلتكش انو تاخد فيزا على لبنان ..عشان قريبة جدا من دمشق ..وطبيعتها ساحرة والشوبينج فيها جنان ..بس الله يخزيك يا شيطان ..اللمهم تكون انبسطت ..واسف مرة تانية اني مانبهتكش عشان تاخد فيزا ..ده غلط كبير مني ..

[Ahmed Anwer]

متشكرين يا استاذ احمد على مجاملاتك الحلوة ...تصدق بالله ..قبل متسافر ..لما سألتني عن المناطق السياحية ..وذكرتلك وقتها ام الطيور وكسب ..كنت ..(وللأسف ) اني مقلتكش انو تاخد فيزا على لبنان ..عشان قريبة جدا من دمشق ..وطبيعتها ساحرة والشوبينج فيها جنان ..بس الله يخزيك يا شيطان ..اللمهم تكون انبسطت ..واسف مرة تانية اني مانبهتكش عشان تاخد فيزا ..ده غلط كبير مني ..

لا يا افندم ،،

غلطتك أيه بس ،،

ده الموضوع بتاع حضرتك من أجمل المواضيع اللي لقيتها علي النت بتتكلم عن زيارة سوريا الجميلة

أنا نفسي أكلم أكتر عن رحلتي و عن سوريا بس مش عايز أبوظ موضوعكم اللي بيكلم أساسا عن الهجرة لكندا

عموما هألخص كام نقطة كده ،،

أولا ، نصائح و ايجابيات :_

1- خد معاك فيزا لبنان و تركيا

2- حاسب علي قد ما تقدر بالليرة السورية مش بالدولار عشان تستفيد بفرق العملة

المحلات و الفنادق بيحسبوا الدولار بسعر أقل من سعره الطبيعي

3- مصر للطيران أفضل من السورية بس كسرعة و السعر قريب جدا

4- الستات ممكن يجيبوا تكلفة الرحلة لو عملوا شوبنج كويس في سوق الحميدية للمفارش و المطرزات و المنسوجات السورية ذات السمعة الممتازة في مصر

( بالنسبة ليا كان صعب عشان مبفهمشي في الحاجات دي ، بس المدام بناء علي الهدايا اللي جبتها قالتلي اسعار ممتازة و إن شاء الله هتيجي معايا المرة الجاية )

5- كميات الطعام في المطاعم هناك غير مصر ،، كبيرة أوي ،، يعني طبق السلطة يكفي أربعة مش واحد ،، فاطلب علي قدك

6- البلد بشكل عام رخيصة أو علي الأقل بأسعار مصر ما عدا الأرجيلة و المقاهي ،،، هههههه

بس يعني مش الأسعار الفلكية يعني

7- الأكل تحفة ،،،

8- الأخوة السوريين بيحبوا المصريين جدا جدا ،، و هتحس بده في كل المعاملات و دايما تحس بيتعمل معاك واجب

و أول ما تكلم حد يحاول يعرفك انه متابع ،، يسألك أنتا أهلاوي و لا زملكاوي ،، و غيرها من القفشات المصرية

9- ريتم الحياة بشكل عام و الزحام تحس أنه أهدي و أروق من مصر

10- البلد بشكل عام أمان و مطمئنة و الشعب طيب و أمين في التعامل

ما عادا الأماكن المشبوهة ،، و ده طبيعي و حتي يعني مبتسرقشي بس بتستغل و دي طبيعة المكان نفسه

11- سياحة رخيصة عامة من أول سعر الطيران للإقامة للإنتقالات للمصاريف النثرية

و في نفس الوقت تلاقي سياحة الطبيعة الخلابة ،، سياحة الآثار و الثقافة ،،

ماعادا الصراحة سياحة مش عارف اسميها أيه بس نقول الفخامة و الحداثة

البلد تحسها قديمة شوية أو يد الحداثة موصلتلهاش بشكل قوي يعني مفيش مولات مثلا زي سيتي ستارز عندنا

أو سينمات أو ناطحات سحاب أو شوارع و حدائق و مباني حديثة جدا

12- متحاولشي تتكلم في السياسة ،، الأخوة السوريين أما إنهم غير مهتمين أو إن الكلام في السياسة مش محبذ عندهم

مينفعشي زي عندنا تقول حسني مبارك ،، لازم تقول السيد الرئيس ................. ،،، اللي هتلاقي صوره في كل حته

مش عارف حب و لا إجبار

و يا رب محدشي يبلغ عني و اتمنع من زيارة سوريا ،،،، هههههههه

13 - الصراحة كانوا بيحكوا بمبالغة أوي عن الجمال السوري ،،

بس الواقع أنه فيه حلوين و وحشين ،،،

بس لما واحدة بتبقي حلوة بتكون حلوة بزيادة ،، حلوة صح الصح ،،، مفهاش غلطة

14- من السلبيات ،، الرجالة السوريين ( محدهش يزعل ) بصباصين بطريقة مستفزة علي الستات

يعني حتي مش زينا كمصريين بنبص من تحت لتحت ،،

لأ ده تلاقيه وقف و ممكن يغير اتجاه عشان واحدة جذبت نظره و مع تركيز بدون كسوف

(محدهش يزعل ) هههههههههه

15- مستوي النظافة مش كويس أوي للأسف زي مصر كده

بس كنت بضايق هناك أكتر عشان الطبيعة فعلا جميلة و مذهلة حرام يكون جنبها تلوث كده

16 - أكتر بلد زورتها تشبه مصر ،، و متحسش فيها بغربة إطلاقا ،،

ما عادا تميزها بجمال الطبيعة و جمال الشعب و أخلاقه الأحسن و الحياة الأهدي نسبيا

دي ملاحظات سريعة بس يا رب محدهش يتضايق ،،، ده عشم يعني و الجرح واحد

[مازن أطرش]

شكرا والف شكر اخ احمد.. سواء على مجاملاتك او عن ملاحظاتك..انا بتمنى كل شخص كل اخ مصري ييجي يكتب ملاحظاتو زيك..يعني بكل شفافية . .عشان الواحد يعرف اللي ليه واللي عليه..الف شكر :lol: ...]

تم تعديل 10 يونيو 2010 بواسطة مازن أطرش

[مازن أطرش]

يالله يقا ..مستنين تجربة الأخ جورج :wub: ]

تم تعديل 19 يونيو 2010 بواسطة مازن أطرش

[مازن أطرش]

بالتوفيق للأخ رحالة باشا ..ومستنين حكايتو بعد العودة من سوريا مكللا بالسي اس كيو ..وطبعا انطباعته وملاحظاته عن سوريا ..بكل شفافية

[مازن أطرش]

مبروك للرحالة رحلته الموفقة لسوريا ..الراجل رفع راسنا وكان عند حسن الظن ..يالله بقا مستنين حكاية الرحالة بسوريا .وبالتفصيل ..الممل

[Ahmed Anwer]

معلومة جديدة

شركة الاتحاد العربي للنقل البري ( السوبر جيت )

افتتحت خط بري من القاهرة لدمشق بيطلع كل يوم سبت

جاري الاستفسار عن السعر و مدة الرحلة

طبعا متوقع تكون بالأيام

[الرحالة باشا]

السلام عليكم ورحمة الله وبركاتة أهل التوبيك الكرام

وكمان أحلي سلام و أحلي تحية للأستاذ مازن صاحب التوبيك الجميل

أحب احكي لكم شوية عن رحلتي لبلد الطبيعة سوريا الجميلة

أنا شايف إن سوريا هي بلد الطبيعة والجمال الرباني

بلد الشعب الطيب والمضياف , بلد الهدوء والأمان

أولاً بلد الجمال طبيعي لأنها معروفة بالمناطق الطبيعية زي جبل قسيون والزبداني وبلودان , حتي بعد إذنكم يعني بلد الجمال للجنس اللطيف :sad:

بصراحة أول ملاحظة شوفتها في سوريا هي الأمان : لما وصلنا للفندق ولقيت سواق التاكسي اللي كان حاجز لنا في الدير سايب التاكسي مفتوح وعايز يدخل معانا الدير علشان يوصلنا للمسؤلة عن الحجز لأنه هو اللي حجز فأستغربت وسألته السؤال البديهي اللي بنقوله في مصر , أنت هاتسيب التاكسي كده في الشارع والأبواب مفتوحة كده هايتسرق فلاقيته أبتسم وقالي ماتقلقشي هنا غير مصر وفعلاً صدق لأننا طلعنا من الفندق لقيت كل شي زي ماهوه التاكسي مكانة ماتحركشي , يا خبر والله لو كان في مصر كنا هانقله ربنا يعوض عليك من قبل ما نخرج من الفندق لأنه كان هايلاقية أتبخر وذهب مع الريح

بالنسبة للشعب السوري المضياف فأنا بقول كده عن تجربة , إزاي؟:

أنا رحت أقرب مطعب كويس لدير إبراهيم الخليل , أسمه مصعم النوافير , بصراحة هناك شاب سوري أسمه أحمد ظريف جداً ودايماً مبتسم ووسيم زي كتير من السوريين بصراحة الراجل حقيقي مناسب في المكان المناسب , أول ما عرف إننا مصريين وجداد في البلد و أخد مننا طلباتنا لاقيته جايب طبق بطاطا بالفرن مع فراخ مشوية وقالي دي تحية المطعم لوجودكم عندنا , بصراحة أنا عمري ماشفت حد عمل معايا كده سواء في مصر أو السعودية طبعاً

بالنسبة لأسعار الأكل : فهي معقولة جداً بس اللحوم غالية شوية, يعني أنا طلبت طلبين مشاوي مشكلة ليا أنا ومراتي مع زجاجة ميه وأتنين بيبسي دفعت 850 ليرة =106 جنية مصري , والطلب كان أربع أسياخ فقط, و ده بالنسبة لمصر غالي

المباني بشكل عام : صغيرة وتبدو قديمة نوعاً ما , كلها مباني أربع أدوار تقريبا يعني اللي فاكر إنه هايشوف مدينة حديثة , يعني مباني شاهقة الأرتفاع أو أبراج واجهتها الخارجية من الزجاج يبقي غلطان لكن في رأيي أن ده برده شيئ جميل لأن المباني الشاهقة ضد الطبيعة و أحنا قلنا إن سوريا هي بلد الطبيعة

أيضاً تتميز سوريا بالهدوء وعدم الأزدحام , حتي في أوقات الذروة وخروج الموظفين من أشغالهم فالزحام لايقارن بالقاهرة مثلاً بالرغم من إننا بنتكلم عن دمشق وهي العاصمة فابلتالي المفروض إنها تكون زحمة لكن الحقيقة غير كده

بالنسبة للشراء :.

التجار السوريين بصراحة شاطريين جداً يعني غالباً مش ممكن يسيبك تطلع من عنده من غير ما تشتري بس طبعهم زي المصريين لازم تفاصل معاهم في السعر كتير جداً لأنه بيعلي في السعر قوي , مثلاً مفرش مطرز بالسيرما يقولك أول كلمة إن سعرة 4500 ليرة بعدين تاخده ب 3000 ليرة وياعالم لو كنت أنا شاطر شوية كنت أخذته أقل من كده , فالازم تفاصل مع التاجر فصال كبير يعني تنزل لنص السعر علي الأقل

بالنسبة للأتصالات :.

غالية شوية يعني المكالمة لمدة دقيقة لمصر = 30 وحدة , أنا شحنت في ليلة 400 وحدة بحوالي 330 ليرة خلصوا في مكالمتين لأهالي في مصر للأطمئنان عليهم فقط وإننا بخير وقبل ما أنام كانت ال 400 وحدة بخ

بالنسبة للمواصلات :.

أنصح الكل بأستخدام السرافيس كما نصحنا بها من قبل الأستاذ مازن , بصراحة عنده حق , أجرة السرفيس من جارامانا لباب توما لشخصين 15 ليرة لكن بالتاكسي هاياخد مش اقل من 200 ليرة أو 250 ليرة , الفرق كبير جداً , في نفس الوقت المواصلة دي(السرافيس) محترمة جداً مش زي عندنا في مصر ناس راكبة فوق بعضيها

بالنسبة لدرجات الحرارة :.

الجو روعة بصراحة يعني أنا كنت في سوريا في شهر 6 وفي الوقت ده الجو روعة وكنت بنام من غير تكييف أو حتي مروحة وفي نفس الوقت كنت أسأل أهلي في مصر يقولولي الجو نار نار , وسمعت إن في منطقة في دمشق في عز الصيف تلاقي علي قمة الجبل فيها تلج وأظن إن ده دليل علي مدي روعة الجو هناك

بصراحة لو جاءت لي الفرصة مرة أخري للذهاب لسوريا فسوف أزورها و أنا واثق من متعة الرحلة , ويارب تيجي الفرصة دي تاني

كمان سوريا أصبح ليها معزة خاصة في قلبي لأنه البلد اللي حققت فيها أول و أكبر خطوة لتحقيق حلم حياتي وهو الهجرة لكندا , يعني لازم أعشقها كأنها حبيبتي

أخيراً أتمني للجميع الأستمتاع بوقته وبرحلته لسوريا بلد الجمال الرباني

[مازن أطرش]

الف مبروك للرحالة باشا نجاحه بالمقابلة (طبعا باركت من زمان .بس ببارك من هنا ..عن جديد..) والحمدلله انو سوريا وش الخير على الأخوة الغوالي وشكرا اخ رحالة على انطباعاتك الحلوة ..ويارب كل اللي ييجي ينجح ..مش بس عشان سوريا تكون وش السعد .بس عشان ميروحش تعبه سدى ..

[Ahmed Anwer]

تكلفة السوبر جيت من القاهرة لدمشق

650 جنية

بفرض العودة نفس القيمة يبقي ذهاب و عودة 1300 جنية

و الرحلة بتاخد يوم و نص

طبعا تكلفة في وجهة نظري مش عملية إطلاقا

لما يبقي الطيران ب 1800 جنية

فرق الخمسمائة جنية دوول ممكن تصرفهم اساسا في التلت أيام سفر لدمشق ذهاب و عودة

و البري يوم واحد في الاسبوع السبت ،، الطيران كل يوم

[محمد كيبيك]

كل سنة وانتم بخير يا ترى الاخ رومانى بشاى هيسافر سوريا و افراد اسرتة الكريمة امتى

[محمد حمدى حسن]

السلام عليكم ورحة الله وبركاته

بصراحة أنا عضو جديد معاكم هنا

و أنا مسافر سوريا الأسبوع القادم

أجازة كده فسحة يعنى لمدة يومين تلاته

و بحثت كتير فى النت لكن لاقيت

إن الموضوع ده من اكتر المواضيع اللى توضح كل شئ

عشان كده اشتركت مع إنى ما فهمت إختبارات إيه و مقابلات إيه اللى بيروحوا لها

كان عندى سؤال بقى ما وجدت إجابته

هل فى شركات سياحة معقولة و موجودة فين و أسعارها كام

لان حابب اتفسح بس فى حدود المعقول

أصلى معى اهلى ( زوجتى وابنى )

[Ahmed Anwer]

السلام عليكم ورحة الله وبركاته

بصراحة أنا عضو جديد معاكم هنا

و أنا مسافر سوريا الأسبوع القادم

أجازة كده فسحة يعنى لمدة يومين تلاته

و بحثت كتير فى النت لكن لاقيت

إن الموضوع ده من اكتر المواضيع اللى توضح كل شئ

عشان كده اشتركت مع إنى ما فهمت إختبارات إيه و مقابلات إيه اللى بيروحوا لها

كان عندى سؤال بقى ما وجدت إجابته

هل فى شركات سياحة معقولة و موجودة فين و أسعارها كام

لان حابب اتفسح بس فى حدود المعقول

أصلى معى اهلى ( زوجتى وابنى )

الشركات السياحية في سوريا في منطقة البحصه ،،، اللي فيها الفنادق

هتلاقيهم معلقين ورق ببرامج سياحية كتيرة داخل سوريا و خارج سوريا في لبنان و تركيا

بس تاخد معاك فيز لبنان و تركيا من مصر

و أسعارهم معقولة ،، و بتفاصلهم كمان

من داخل مصر معرفشي

[محمد حمدى حسن]

شكرا على المعلومات

بس أنا جاى من السعودية

و رايح سوريا بس

[Ahmed Anwer]

شكرا على المعلومات

بس أنا جاى من السعودية

و رايح سوريا بس

ما البحصة دي منطقة في وسط البلد بتاع دمشق