محاكمة جاك شيراك ... وموضوع الخروج الآمن للرئيس

[se_ Elsyed]

هي دي نقط الخلاف

والتي تجعل دولة متقدمة ومحترمة جداً

ودولة اخرى متخلفه جداً وغير محترمة

دولة بتحاكم رئيسها بتهمة الفساد والرشوى مهما كان اسمه

ودول اخرى يروج إعلامها العفِن لفكرة " الخروج الآمن للرئيس "

يعني بالبلدي

يبقى عندنا .. لا مؤخذه يعني وأسف في اللفظ - شيء إسمه " رئيس سابق "

ياااااااااه

حاجه تقيلة وخيالية قوي

رئيس سابق ؟

طب تيجي إزاي ؟؟؟؟؟

يعني لا تشريفة ولا افتتاح محطات مجاري ... ولا طريق يقف 5 ايام عشان سيادته هايمر مرور الكرام بعد اسبوع من الطريق ده ... ولا الريس راح والريس جه والريس نط من الشباك .... ولا مام سوزان ... طب والمكتبات ؟ والهلال الاحمر ... والأيام السودا ؟

طب تيجي إزاي ؟؟؟

لأ لأ أعوذ بالله من الشيطان الرجيم .... إيه الأفكار الوحشه دي ... دي حاجه كده زي المستحيلات العشرة

فمن أجل ترسيخ هذه الأفكار والمصطلحات يا سادة

أصبحنا نقرأ الأن عن فكرة

الخروج الآمن

يعني أبقى رئيس سابق وييجي بعدي حد

بس ما يسحلنيش

ولا يعلق ولادي من رموشهم على باب زويلة

ولا يسألني من أنا .. قصدي من اين لك هذه الهُبر يا معلم .. ولا يقول لولادي تلت التلاته كام ولا جبت ده منين يا توتو

وده استمراراً لمبدأ إدارة الأبعديات والتكيات

لأن اللي بعده هايبرطع يمين وشمال عشان ضامن ان ماحدش هايحاسبه

----------

آه صحيح

كل سنة وانتم طيبين الرؤية بانت يا ولاد

مش رؤية رمضان .. ليه بدري لكن رؤية هلال جمال

واصبح اللعب عالمكشوف

والاستربتيز السياسي بقى علني

فقرأنا بالأمس تصريحات لنظيف يتحدث فيها عن عدم أستبعاد ترشيح جمال مبارك علانية ً

واليوم : حسام بدراوي يُصرح بإن الحزب لا يمانع من ترشيح جمال مبارك رئيساً لجمهورية مصر العالمية من ضمن 40 اسم من اعضاء أمانة الحزب ومنهم

علي الدين هلال ....... هههههههههههههههههه ... زغزغيني يا فانله أصلي ماليش نفس أضحك ... علي الدين هلال بتاع صفر المونديال الفاشل اللي ما بيعرفش يتكلم كلمتين على بعض

و

و

مين تاني

والله قرفان أكتب الأسم

محمد كمال.... ده مش بتاع اللبن اللي عالناصية

محمد كمال للي ما يعرفهوش أستاذا إعلام ... وهو مهندس حملة الترشيح لمبارك

وبيفكرني بمحمد الصغير او محمد عشوب أخصائي المكياج .... وهو اللي أقترح على مبارك النيو لوك اللي ظهر به في الحملة الاخرانية وقصة الشعر الليس اللي عاملها ... أو الورنيش الاسود اللي بيدهن بيه شعره وكمان القلم اللي ماسكه والقميص الابيض والحركات دي

محمد كمال يا ولاد هايبقى مُرشح ؟؟؟؟؟

لك الله يا مصر

كل ده تهجيص وما يدخلش ذمتي بتعريفه

لأن جمال هو الشخص الوحيد اللي بتنطبق عليه المادة 76 بتاعت أبوه

وكله بالأنون

فبالقانون هايرشحوه

وبالقانون هايكسبوه

يعني من الاخر عشان ما نرطش ونرغي كتير

خروج آمن

دخول مُريح

ثمن الديمقراطية غالي يا سادة

عايز ديمقراطية وعايز حال بلدك ينصلح ... يبقى أقعد بينك وبين نفسك وأسألها : إنت مستعد تدفع الثمن مع غيرك ولا لأ ؟

لأ ... يبقى أقعد جنب الحيطه وأستنى دورك في المدبحه

أيوه ... يبقى شارك .. في مظاهرة .. في منتدى وأستعد تتقفش في أي وقت وتتحط في السجن بتمهة العيب في الذات الرئاسية .... او اي ثمن أخر في سبيل الحرية

[pink rose]

في برومو حلقة لمرتضى منصور مع عمرو الليثي

عمرو بيقوله ممكن ترشح نفسك لرئاسة الجمهورية

مرتضى رد بمنتهى التلقائية هو في حد برضه في البلد ممكن يرشح نفسه قدام جمال مبارك (بيقولها بتريقة طبعا)