فوازير فنيه

[فــيــروز]

صوره من اعمال الوزير الفنان فاروق حسنى اقتبستها من موضوع الاستاذ عادل ابو زيد وقلت نعلق عليها هنا براحتنا عشان مايزعلش :rolleyes:

قلت ندرسها سوا ونفكر يا ترى يا هل ترى الصوره دى ببتعير عن ايه :blink:

واللى هيتوصل للاجابه الاقرب الى المنطق و العقل له هديه صوره من الصور ديه bxg::

ياللا يا شباب ورونا مين بيدوق احسن .. فن يعنى :unsure:

[Lighthouse]

فكرة حلوة يافيروز

صراحة خفت اتبحبح في الرد هناك الاقي الرد بتاعي اخد كتف قانوني وحصل المذهب الفني للفنان اياه

ياللا

ح افكر في الحل واجي بسرعة :rolleyes:

[Lighthouse]

شوفي بقى

الصورة الاولي

من غير تكعيب ولا تدوير على الحل

باختصار ومن غير لف شعر ولا دوران شبرا

هي عبارة عن واحدة بتنشف شعرها بالسيشوار

وقدامها طفلة ضغيرة بتاكل غزل البنات او بتاكل ايس كريم من نوع مابيعلنوش عنه

هاااااا

صح

لايت هاوس جاد الله :rolleyes:

ناقد فني ومتذوق كشري بعد الضهر

[Lighthouse]

الصورة التانية بقى

عبارة عن تحفة معمارية جبارة ومنظر علوي لكوبري علوي

هو كوبري اكتوبر قبل منزل معروف والدنيا زحمة في حر اغسطس

واوعي تقولي غلط

لاني باعدي من هناك كل يوم وحافظة الحتة دي صم بقى وعارفة المطبات مطب مطب

هااااااااا

لايت هاوس

من داخل عنبر الكسور

القصر العيني

آه ياعيني على رجلي المكسورة :rolleyes:

[فــيــروز]

هايله يا لايت :rolleyes:

والله ومصر ولاده يا ناس :blink:

وشكلنا عندنا امل يتخرج جيل جديد من الفنانين الشبان يبقوا وزرا فنانين فى يوم من الايام

على العموم يا لايت تفاءلى خير و استبشرى :unsure:

وعلى بال ما باقى الناس تقول اجاباتهم نقى اللوحه اللى تعجبك و مسمرى الحيطه ووزعى الدعوات عشان اهل الحاره ييجوا يتفرجوا على تدشين اللوحه فى البيت .. لولولولىىى bxg::

[فــيــروز]

انا رايى ان الصوره التانيه منظر جانبى لعمود نور مجذوع وخارج منه السلك وفيه عيل صغير واقف يلعب قصاده .. و.... ربنا يستر بقى

[Lighthouse]

نسيت اقول لك يافيروز

اني لو فزت في المسابقة بتاعتك دي

ح اتبرع بالجايزة لصالح جمعية الفنان الاحمر علشان دعم المسيرة الفنية وخلق جيل رائد من الفنانين الشبان :rolleyes:

فعلا

احمر من كده مافيش :unsure:

[DARWEEN]

بقى كده يالايت تضحكي علينا الأجانب ... سشوار أيه وأيس كريم أيه

هو كان بيرسمها عند الكوافير ...

ولا تقولك كوبري أكتوبر ومطبات

أسمعوا بقى واتعلموا الفن ...

الصوره الأولى ...

دي عباره عن أمتداد الشعور الأتصالي للناس في الزمن الأزرق ..

مماجعلهم يتخطون الحواجز النفسيه الأعلى من أشجار الأرز المغطاه بالجليد

فيتوحد بهم الشعور في النقطه اللابؤريه من الأحساس بأنهيار القيم في المجتمع

مما يدفع بالناس لفقدان المشاعر الفنيه والقيم المتكعبه حول جذور الحقيقه

وطبعا أنا كده أكسب كل الجوايز وأنا مرتاح لأني أراهن أن كان الحكم نفسه حيفهم حاجه

:rolleyes: :unsure: :blink: bxg:: :huh:

[DARWEEN]

الصورة التانيه بقى ...

دي عباره عن الشق في الجدار الأجتماعي الذي يسيل منه أحيانا دم أحمر أو غيرة صفراء أو كوارث سودا ومنيله بهباب ... كذلك نلحظ الفراغ المثلثي الموجود أسفل الصوره والذي يرمز إلى الخواء العاطفي المتأصل في اللاشعور النابع من أحساس العامه بالهوان والكد والمعاناه

لكن مما لاشك فيه ..... أن هذه الصوره

مقلوبه :rolleyes: :unsure: :blink: bxg:: :huh: cr((:

____________________________________________

ترسل قيمة الجائزة بحوالة بنكية بأسم الناقد الفني داروين وأتباعه (مؤسسة زمان يافن )

mfb: mc: mf( :P :P

[se_ Elsyed]

الفن باظ يا رجالة .... وخلاص كل من هب ودب بقى يفتي ويقول رأيه في التحف الفنية لرموز مصر عتيقة ... شوفي يامستر شوف يا ميس أنا لا حاوي ولا باعمل أكروبات وكلها فتوحات من عندنا ربنا... التحليل كالآتي :

1- الصورة الاولانية فعلاً اللي على اليمين ده سشوار ( انا حلاق وافهم في الحاجات دي ) ، واللي على الشمال خالص ده الشطاف بتاع الحمام ، والبتاعه السودا دي دي فعلاً ضفاير بت صغيرة كارته لكن إش يعمل السشوار في الوش العكر ، واللي تحتيها يا إما شجرة أرز التلج مغطيها أو ممكن نمشيها غزل البنات اللي كل ما أنزل روكسي لازم أكله من عند الراجل اللي واقف عند سيما نورماندي .. مش عارف هو شايفني دلوقت ولا لأ ؟.

2- اللوحة التانية : فيها شغل جامد ... العصايا السودا اللي على الجنب في اليمين دي " الغابة بتاعت الجوزه .. فينك يا حشيش " ومتوصلة على الرئتين على طول اللي هما حاجتين وفي وسطهم حاجة صفر .. ومن الواضح أن اللي بيشرب الجوزه ده مدمن قديم ..

وحتة السلك الحمرا اللي تحت عالشمال ده سيخ بتاع ماكينة لحام من الواضح أن الراجل كان بيشرب جوزه في الورشة .. واللي جنبها على اليمين دي نصل السكينة اللي بيقطع بيها الحشيش ، وحتة الحديدة السودا اللي عالشمال خالص دي سلكة اللحام بعد ماخلصت وأترمت ... والباك جراوند بقى بتاع اللوحة عبارة عن حيطة الورشة اللي لسة عالمحارة ......

س س مشرف وفنان سورياني ومبيض محارة ولحام أكسجين وببيع غزل البنات في روكسي بالليل بعد مابقفل الورشة .

[فــيــروز]

استاذ داروين

اختار لك اى لوحه تعجبك و نلفها لك فى ورقة لحمه ويادار ما دخلك شر

عقلى الباطن : مش هاعرف ابق معاه فى الكلام المجعلص اللى قاله ده وفرصه نخلص من لوحه من اللى عاملين ازمه دول

س.س. مبدع الازمنه و الامكنه

الحقيقه استمتعت كتير جدا بالوصف التفصيلى للمباراه اللى اتحفتنا بيه

انا بس ليا اختلاف معاك بخصوص شجرة الارز

دى مش شجره ولا حاجه

الشجره هنا للتعبير عن ان شعر البنت منكوش زى اغصان الشجره للدرجه اللى هتصعب عليك تعمل لها فورمه مناسبه

ومتهيالى البتاع اللى فوق الشجره هو رمز الفوطه اللى الكوافير س.س. حطها على شعر البنت بعد ما حلق لها ظلبطه وخارج بيها لمامتها ترتعد فرائصه رعبا مما ينتظره من مصير مظلم

وده يجرنا للوحه التانيه اللى بتكمل لنا الحكايه الداميه دى

خرج س.س. بالبنت محلوقة الراس كالظلطه

ام البنت شافتها رقعت بالصوت

مالت على س.س. "هى اللى موجود يمين الصوره وانت داخل" و الحته الصفرا دى شعرها بعد ما علمته عن الاسطى زينهم الحلاق منافس س.س. اللدود

البتاعه الحمرا دى بقى س.س. بعد ما الست ادته نوك آوت على يمين خطافيه فى الجول وساح دمه يا حرام fsh::

لو متشوقين تعرفوا باقى الحدوته نجيب باقى الصور من موضوع الاستاذ عادل و نفن .. ها ايه رايكم؟

[Lighthouse]

ايه الحلاوة دي

لا بقى

انتي يافيروز تجيبي باقي الصور

وانا اوريكم النقد اللى على اصله

الحق على اللى ماحبيتش اجعلص المسائل واقعر الالفاظ واسود عيشة المشاهدين للوحايت

مش كفاية علينا الاسعار مسودة عيشتنا

هاتي ياماما اللوحات ونفن بقى بلا هم

:huh: cr((: :P

[ragab2]

الصورة الأولى

من فيلم أبى فوق الشجرة

[عادل أبوزيد]

الأفاضل

غير معقول لم أتوقف عن الضحك لمدة تزيد على العشر دقائق و الدموع تنهمر من عينى

فعلا "مصر ولادة"

[Salwa]

طالما الجائزة لوحة منهم .......

يارب تحليلى يطلع غلط........

الصور دى والله اعلم .....

اخدها الوزير هدية ...ايام شغله فى ايطاليا ....من دار من ديار الحالات النفسية المستعصية

وهى تعبر عن تنفيث للكبت الداخلى ......وهو مايشعر به ولايستطيع التعبير عن احساسه .

فاستلف احساس الناس التى تعامل ...معاملة اطفال ....// وعندهم قصور فى الادراك //

سشوار ...دش....بنطة لحام ..

واكيد قال لنفسه .......رزق الهبل على المجانين ...

وكل ما حقول حاجة ....حايقولوا ..آمين.

لو صح ....الحل..

الجائزة هدية منى .....لمكتبة الاسكندرية العظيمة ...وتوضع تحت بند ...

هؤلاء حكموا مصر..................

سلامى.

[DARWEEN]

طبعا بعد أن أستمعنا وأستمتعنا بتحليل أخونا العبقري س ٍس وده من وجهة نظر الحلاقين وأصحاب صالونات الكوافير

فيمكن من جهة أخرى أن نحلل الصور من وجهة نظر مختلفة

يعني الصورة الثانيه لو حللها واحد بتاع معمار أو مبيض محاره

سيرى أن البيت البني مسنود على البيت البيج اللي هوا في الأساس مشروخ ... وده تطبيق فني للمثل القائل (مسنود على حيطه مايله)

أما من وجهة نظر أي كهربائي ...

فالصورة تدل على أن الصنايعي اللي عملها أيده مش حلوه في الشغل علشان سايب السلوك كلها عريانه والتابلوه الأصفر باين بره الحيطه ولسه العداد ماركبش

أما من وجهة نظر أي طبيب نفسي

فسيرى أن هذا الفنان صاحب اللوحات لايجب أن يترك في الشوارع بعد الآن ويجب وضعه تحت الملاحظه المشدده لأنه خطر على المجتمع

[بنت شعنونة]

برضه مافيييش فايدة؟؟؟

لازم الواحد يقعد صلح وراكم كل حاجا كدا fsh::

الصورة التانية د يااااا شعب

صورة واحد اصللللللع رايح عمل عملية زرع شعر

حتى لو ركزتوا هتلاقوا وش الراجل منكسسسسسر اهو على الشمال وفيه كام شعره في راسه من فوق

وجهاز زرع الشعر داخل على صلعته اهو

افهموها بقىىىىى :D :D :lol:

[linux]

معلهش ... أسمحولي بئة ...

أنا طول عمري معروف بالينكس الرهيف الفنان ...

أنا حاسس أنكم واخدين الموضوع هزار، ده فن جاد و محتاج مناقشة جادة و نقد بناء:

الصورة الأولى:

ها أسميها الأنبعاج اللامحسوس في الأنتروـفارفورم

الصورة بتحكى ملحمة صراع حضارات قبيلة أبو شعلة الأنهزامى، و المتمثلة فى الخيوط البيضاء المتنفسة لأنفاس الصباح المتهدقق علي الشرفات و المشرابيات، مع حالة النفور المتهشتك و المتمثلة في القلة القناوي في وسط الصورة (و لو جاى من ناحية عباس العقاد تبقى علي يسار قفا سواق التكس و انت داخل ع الشرابية).

اما هذا الشيئ الأزرق فهو يمثل دراع أبو رجل مسلوخة.

و اخيرا، البتاع البرتقاني ده هو حالة الفزع المتمثلة في صنع الله أبراهيم و رفضه لجائزة الدولة.

الصورة التانية:

ها أسميها كل ده شعر في مناخيرك يا سلعوة؟

الصورة ببساطة مفرطة تعبير أنعكاسي لعملية أزالة المرارة بالمنظار.

لينكس شرحبيل لينكس

خرج و لم يعد

تم تعديل 8 يناير 2004 بواسطة linux

[هشام عبد الوهاب]

انا قلت اجيبلكم باقى المجموعه والفنان معاهم بالمرة.

[afiona]

طب نضيف الوزير الفنان للتحليل الفنى ولا ده حاجة غير مفهومة لحد دلوقت ومش ممكن نفهمها؟