تحبوا تاكلوا ايه بكرة؟؟؟؟؟؟؟؟؟؟

[عبير يونس]

لماضة العسولة جدا

اقولك سر فظيع لا انا و لا جوزي بنطيق القرنبيط دا

اما الجمبري بقى اشجيني باي طريقة له باموووووووووووووووت فيه

ليه بقى كده؟؟

هو في أحلى من القرنبيط في الدنيا؟

طب ده عندي أحلى من الفراخ

زعلتيني يا ريمو

:lol:

[عبير يونس]

مع إني عندي حالة اكتئاب مطبخية

و دي حالة بتصيبني لما تكون المواعين واصلة للسقف حضراتكم

لأن البهاوات الصغار كل شوية جايبين طبق و معلقة و كوباية و يرموا في الحوض

:lol:

و بقدرة قار (على فكرة في كيكة اسمها قدرة قادر :) )

بالأقي المواعين بقت للسقف

ده بيخليني كارهة حياتي كلها

لأن الطبخ عندي مزاج

و ليا طقوس مطبخية قبل القيام بالطبخ أولها لازم المطبخ يبقى فلة

عشان أحس إن أنا جيادا دي لورينتزي

:)

و في الحالة دي بفضل الله بيطلع من تحت إيدي أحلى أكل ممكن تاكلوه في حياتكم

امممممممممم

heavenly

بس ده ما يمنعش ان عندي و لله الحمد و المنة وصفات بالهبل للي عايز

بس ادعو لي ربنا يقدرني أروق المطبخ لأني بجد تعبانة نفسيا اوي

:)

طبعا أنا و زوجي مزاجيين جدا في كل شيء و خصوصا الأكل

بس أحلى حاجة في جوزي أنه مش تقليدي

و بيحب يجرب الأكلات الجديدة و بيشجعني أجرب أطبخها

و لما يكون رايق بيتابع بنفسه وصفات و يكتبهالي و يشرحها لي عشان أعملها

ولادي كمان كده

ماعدا المفعوص اللي قبل الأخير يوسف باشا

ده بقى يعلللل

عايش بالطاقة الشمسية

حياته قائمة على الكيك والحليب

وشوية رز

و بس

لا يمكن يبل ريقي في حاجة جديدة

و دايما يغضب عل الأكل و يتلكك أو ينام و احنا بنحط الأكل ع السفرة

يعني بصراحة الله يكون في عون اللي حتتجوزه

:)

أما الباقيين ولله الحمد من كبار المشجعين لي على الطبخ و التفانين

و خصوصا ابني البكري

مساعدي في الطبخ

بيموت في قناة فتافيت و بيضحي بقنوات الكارتون عشان خاطرها

و يقعد يتابع الوصفات و يكتبهالي عشان أعملها

أمنية حياته يبقى عندنا مطبخ كبير اوي

عشان نقف كلنا فيه و نتفنن

و عشان باتنرفز لما أكون بأطبخ و مستعجلة و بأتخنق لما حد يقف معايا

لأن المطبخ مش واسع و يدوب باتحرك فيه

نيجي بقى للمهم

في دماغي وصفات كتير مش عارفة ابتدي بإيه

cld:

حأقول لكم على أول حاجة جت في بالي

الرز البخاري

المقادير :

- رز طويل الحبة

(مقدارك العادي بس يكون منقوع خمس ساعات قبل ما تبتدي يعني ممكن تنقعيه قبل ما تنامي على طول و تحطيه في التلاجة لو كنتي بتطبخي بدري

أو تنقعيه الفجر عشان تطبخي على السعة 10 أو 11 الصبح)

-كيلو لحم مقطع أو قطع فراخ

- 3-4 جزرات

- 2 بصلة مقطع شرائح بالطول رفيع جدا

-3-4 فصوص توم

-معجون طماطم

- 2-3 حبات طماطم

- بهارات مشكلة

- زيت نباتي

- ملح

:الطريقة

نبشر الجزر و نشوحه في زيت نباتي حتى يدخل في السوى ثم نرفعه من على النار و نطلعه في طبق من غير الزيت

في نفس الزيت اللي شوحنا فيه الجزر نشوح البصل لحد ما يصفر ثم نضع البهارات و قطع اللحم أو الفراخ

و بعد لما تتشوح كويس نكون ضربنا الطماطم في الخلاط و معاها التوم

و نحطهم على اللحم أو الفراخ

و نهدي النار عشان تستوي براحتها

لما تستوي اللحمة حطي الرز المنقوع بعد تصفيته من مية النقع

على اللحم و غطيه بمية مغلية و حطي الملح

و غطيه لحد ما يستوي

لما يستوي و يهدى شوية

اقلبي الحلة في طبق تقديم كبير مستدير

حيبقى الرز تحت و فوقه قطع اللحم

و بألف هنا و شفا

:lol:

[pocy]

بما أنى من السويس واعشق الاكلات البحريه فاليكم هذه الوجبه الدسمه وادعولى بعدها و ايكم حد يدخل من غير ما يدعيلي

اولا اى وجبه سمك تحتوى على سمك فيليه وجمبري -سمك بلطى - شوربه فواكه البحر - أرز صياديه (الرز ببصل)- سلطه خضراء

نبدأ ب طبق السمك الفيليه

المقادير :-

1- كيلو سمك فيليه (يفضل تقطيعه جزل قطع يعنى )

2- بهارات سمك هنديه او بهارات سمك وخلاص

3-كمون -فلفل اسود- ملح -شطه -فصين توم مفروم - ليمون او خل

4- دقيق طبعا

الوصفه :-

ا- يحضر تتبيله السمك بوضع بهارات السمك وباقى البهارات والتوم والليمون او الخل مع بعض فى طبق

2- يوضع السمك الفيليه المقطع فى التتبيله وتترك فى التلاجه لمده ساعتين (نصيحه ياربت تغطى الطبق كويس حتى لا تترك رائحه فى التلاجه )

3-يخرج من التلاجه ويوضع فى الدقيق ويتم قليه فى زيت عميق

ملحوظه نفس الطريقه دى بنعملها للجمبري بس طبعا ينظف الجمبري ويشال منه خط التراب اللى فالظهر ويوضع فى نفس التتبيله ثم فى الدقيق ثم فى الزيت وبالهنا والشفا)

شوربه فواكه البحر

المقادير :-

1- كيس فواكه البحر

2- بصلتين متوسطى الحجم

3- مياه

4- زيت او سمن

5- بهارات

الوصفه :-

1- يتم تقطيع البصل ثم تحمريه فى بعض من الزيت او السمن

2-ثم يوضع ما بداخل كيس فواكه البحر ويقلب كام تقليبه كده

2- ثم نضع المياه ولا ننسي الملح واللكمون والفلفل الاسود

4- يترك على النار حتى يصبح طعمه مالهاش حل ويطفى عليه وبالهنا وبالشفا

(ملحوظه انا بصراحه بضيف عليها كابوريا ودى بقي بعملها ازاى الاول طبعا انضف الكابوريا بانى اشيل الغطاء الخارجى وينظف من الحاجات الصفرا اللى فيه ويقسم الى نصفين ثم اضعه فى ماء وملح واسلقه على النار حتى يأخد اللون البرتقالي وتحس انه اتعمل وبعدين تحطه وانت بتحط كيس فواكه البحر وتكمل الطبخه بيقي طعمه خرافه وادعولى )

الارز الصياديه

المقادير :-

1- ارز بسمتى او مصري على حسب الرغبه (لو ارز بسمتى انقعه فى ميه قبل كده نص ساعه علشان بياخد سوا اكتر من المصري ) ويغسل جيدا طبعا

2- بصل على حسب الكميه والكميه على حسب الاشخاص يعنى الفرد الطبيعى (ههههههه) نص مج زجاج فرنساوى

3- ملح وميه (في ناس بتحط كمون بس انا مش بحطه وبراحتكم طبعا

الوصفه :-

1- يتم تحمير البصل حتى يقترب لونه من الاسود يعنى مش تحرقه لا قبل حرق البصل بشويه ههههه

2- ثم يوضع الرز المغسول مسبقا جيدا على البصل البنى الغامق وبعدين نقلبهم فى بعض ثم نضع الميه ومقدار الماء يكون لو ارز بسمتى يغطى الرز بمقدار عقله ونص من الصبع اما لو كان رز مصري يبقي المقدار للمياه فوق الرز بعقله صباع واحد

3-يترك الرز حتى يتشرب المياه ثم يوطى عليه حتى يستوى ويارب ما يشيط ويفضل تحط الشياطه تحت حله الرز علشان يستوى براحته

سلطه الخضراء (ودى ضروريه جدا لما فيها من فوايد عظيمه وخصوصا لمرضي السكر )

المقادير

1- طماطم - خيار - جرجير -بقدونس -خس -بصل اخضر (لاكله السمك ضرورى)- فلفل اخضر واصفر واحمر للتزين

2-البهارت فلفل اسود- ملح -ليمون او خل بس طبعا يفضل ليمون

الوصفه

يتم تقطيع جميع المقادير وتقليبهم مع بعض ووضع البهارات وتقليبها وبس كده خلاص

طبعا يا جماعه مش تنسوا اوراق بقدونس وتقطيع الفلفل الاخضر والاحمر والاصفر شرايح للتزيين لطبق السمك ومنتصف طبق الرز لكل فرد

وبالهنا والعافيه

[بركة]

الرز البخاري

المقادير :

- رز طويل الحبة

(مقدارك العادي بس يكون منقوع خمس ساعات قبل ما تبتدي يعني ممكن تنقعيه قبل ما تنامي على طول و تحطيه في التلاجة لو كنتي بتطبخي بدري

أو تنقعيه الفجر عشان تطبخي على السعة 10 أو 11 الصبح)

-كيلو لحم مقطع أو قطع فراخ

- 3-4 جزرات

- 2 بصلة مقطع شرائح بالطول رفيع جدا

-3-4 فصوص توم

-معجون طماطم

- 2-3 حبات طماطم

- بهارات مشكلة

- زيت نباتي

- ملح

:الطريقة

نبشر الجزر و نشوحه في زيت نباتي حتى يدخل في السوى ثم نرفعه من على النار و نطلعه في طبق من غير الزيت

في نفس الزيت اللي شوحنا فيه الجزر نشوح البصل لحد ما يصفر ثم نضع البهارات و قطع اللحم أو الفراخ

و بعد لما تتشوح كويس نكون ضربنا الطماطم في الخلاط و معاها التوم

و نحطهم على اللحم أو الفراخ

و نهدي النار عشان تستوي براحتها

لما تستوي اللحمة حطي الرز المنقوع بعد تصفيته من مية النقع

على اللحم و غطيه بمية مغلية و حطي الملح

و غطيه لحد ما يستوي

لما يستوي و يهدى شوية

اقلبي الحلة في طبق تقديم كبير مستدير

حيبقى الرز تحت و فوقه قطع اللحم

و بألف هنا و شفا

:)

إزيك يامصرية يا جميلة

إلا سؤال بسيط إلا هو الجزر اللي شوحناه في الأول نعمل بيه ايه بقى ؟

أصل أنا لاقيته على جنب بيعيط ..

تم تعديل 3 نوفمبر 2009 بواسطة بركة

[عبير يونس]

إزيك يامصرية يا جميلة

إلا سؤال بسيط إلا هو الجزر اللي شوحناه في الأول نعمل بيه ايه بقى ؟

أصل أنا لاقيته على جنب بيعيط ..

يوه

هوة انا ماقولتلكيش يا أوختشي

معلش متأخذنيش

الجزر نحطه في الآخر لما نحط الرز

بيدي لون وطعم يجنن

[OReX]

السلام عليكم

انا بصراحة عندى كام سؤال وقلت بدل ما ادخل بأيدى فاضية ادخل بحاجة تنفع فسمو كدا ونخش على الشغل

بس من الاول محدش يتريق ويقول يا ضينايا يابنى وعيل تايه يا ولاد الحلال وكدا

طريقة عمل صينية البطاطس باللحمة المفرومة

نقشر البطاطس كالعادة ونقطعها مكعبات (لية مكعبات عشان تنجز فى السلق احنا ورنا دوام بليل) نسلقها ومعاها شوية ملح وفية توابل هندية كدا مش عارف فاكر اسمها نحطها معاها

بعد ما خلصت سلق نسيبها تبرد وعلى الكاتشن ماشين ونضربها ضربا مبرحا حتى تستغيث

على النحية التانية من البوتجاز بقى نجيب حلة حلوة كدا ونحط فيها شوية زيت ونحط اللحمة المفرومة وعليها شوية بصل وشوية بقدونس اى حاجة تديلها اى ملامح

بعد ما نخلص على اللحمة المفرومة هنجيب صينية ونحط اللحمه المفرومة وعليها من فوق البطاطس المهروسة وفوق على الوش شوية زيت او سمنة ايهما اقرب للفرن يعنى

بس وتساب فى الفرن لغاية لما تكسف ووشها يحمر ويبان عليها انها بنت ناس

بس وبالهنا والشفا

[OReX]

ينهار ابيض دا محدش رد من ساعة صينية البطاطس شكل الناس جربتها

الحق اهرب ولا اية :rolleyes:

انا كان عندى سؤال بسيط كدا الجمبرى بيتحمر ازاى يا جماعة كالعادة الدقيق بيسيب الجمبرى لوحدة فى الزيت

[pink rose]

طريقة عمل اللازانيا

المقادير طبعا حسب العدد و الكمية اللي هاتعملوها

انا باعملها في صينية مستطيلة في اغلب الاحيان

فا بتاخد نص كيلو لحمة مفرومة

و علبة لازانيا

بشاميل يكون اخف شوية من اللي بنعمله للمكرونة

و كمان باكت صلصلة طماطم

جبنة موتزارلا

الطريقة

نعصج اللحمة المفرومة مع بصل و ملح و فلفل و قرفة و زنجبيل و بهارات مشكلة

و لما تستوي اللحمة نضيف عليها باكت صلصلة الطماطم و نزود شوية مايا عشان نحل الصلصة

نعمل البشاميل و زي ما قولتلكم يكون خفيف شوية عن بشاميل المكرونة

نجيب الصينية و نغطيها بطبقه من البشاميل و بعدين نرص شرائح اللازانيا جنب بعض بالطريقة اللي تلاقوها مناسبة للصينية اللي بتعملوا فيها يعني بالعرض بالطول حسب الصينية ماشي

بعدين نحط طبقة من اللحمة بالصلصة و بعدين طبقة لازانيا تاني و بعدين طبقة لحمة بعدها اخر طبقة تكون من اللازانيا

و بعد كده نصب عليها البشاميل بحيث يغطي الصينية كلها و نرش الجبنة الموتزارلا على الوش

ندخل الصينية فرن يكون متوسط الحرارة بس تتحط على الشبكة في النص يعني

سيبوها تستوي براحتها خالص بقى و عشان تعرفوا انها استوت و لا لسا تجيبوا سكينة و تغرزوها فيها لو لقيتوا شرائح اللازانيا لسا ناشفة يبقى لسا ما استوتش تسيبوها شوية لحد ما تحطوا السكينة تلاقوا الشرائح كلها بقت طرية

تشغلوا الشواية عشان الوش ياخد اللون الدهبي و خلاص

تسيبوها تبرد شوية قبل الاكل

ملحوظة مهمة

شرائح اللازانيا ما تتسلقش تتحط زي ما هي لانها هاتستوي من صلصلة البشاميل و صلصة اللحمة المفرومة

لو حد حابب يحط مشروم مع اللحمة كمان ما فيش اي مشاكل بيديها طعم لطيف

و بالهنا و الشفا

[om marawan]

ياجمااااااعة ارحمونا

ريحة الأكل تجنن وجايبة المحاورات كلها

يعنى رز بخارى وكبسة وكوسة بالباشاميل تسلم لاايادى ياجماعة

بووووووووسى بجد انا اعرف ان أشطر ناس فى اكل البحريات هم اهل السويس .. الله ينور

ريمووو اللازانيا دى هتبقا على رأس قئمة الاسبوع انا باموت فيها ولو ان باقى البيت عندى مش بيحبها اوى :(

انا هافكركم بحاجة ع السريع كده

البطاطس المحشية لحمة مفرومة

طبعا نعصج اللحمة عادى من غير صلصلة ببص وملح وفلفل وشوية بهارات

والبطاطس تكون حجم صغير شوية تتقور بحيث ماتكونش الفتحة كبيرة اوى و تتحط طبعا فى مية وملح على مانخلص

تحشى لحمة مفرومة وتترص فى صينية فرن ونحط تحتها فرشة من البطاطس اللى طلعت فى التقوير مع شوية لحمة مفرومة برضه

وفى طبق نقلب معلقتين مثلا صلصلة فى كوباية او كوب ونص مية وملح وفلفل وبهارات او ممكن مرقة بسيط

وبس على النار من فوق نغطى عليها لحد ماتتشرب معظم الصلصة وبعدين تدخل الفرن

نسيت اقول نحط زيت طبعا فى الصينية الاول :blink:هى اكله سريعة وتتاكل بالرز الابيض البسمتى او العيش

وبالهنا والشفا

[pink rose]

الارز الصياديه

المقادير :-

1- ارز بسمتى او مصري على حسب الرغبه (لو ارز بسمتى انقعه فى ميه قبل كده نص ساعه علشان بياخد سوا اكتر من المصري ) ويغسل جيدا طبعا

2- بصل على حسب الكميه والكميه على حسب الاشخاص يعنى الفرد الطبيعى (ههههههه) نص مج زجاج فرنساوى

3- ملح وميه (في ناس بتحط كمون بس انا مش بحطه وبراحتكم طبعا

الوصفه :-

1- يتم تحمير البصل حتى يقترب لونه من الاسود يعنى مش تحرقه لا قبل حرق البصل بشويه ههههه

2- ثم يوضع الرز المغسول مسبقا جيدا على البصل البنى الغامق وبعدين نقلبهم فى بعض ثم نضع الميه ومقدار الماء يكون لو ارز بسمتى يغطى الرز بمقدار عقله ونص من الصبع اما لو كان رز مصري يبقي المقدار للمياه فوق الرز بعقله صباع واحد

3-يترك الرز حتى يتشرب المياه ثم يوطى عليه حتى يستوى ويارب ما يشيط ويفضل تحط الشياطه تحت حله الرز علشان يستوى براحته

منورة يا بوسي :blink:

انا باحطله كمون و عارفه مؤخرا بقيت احط نص معلقة صغيرة قرفة بتخلي طعمه جميل جدا

بما انك من السويس بقى و من هواة المأكولات البحرية

عاوزاكي تقوليلي طريقة طاجن السبيط لاني بامووووووووووووووووووووووووووت فيه و نفسي اعمله

[pink rose]

السلام عليكم

انا بصراحة عندى كام سؤال وقلت بدل ما ادخل بأيدى فاضية ادخل بحاجة تنفع فسمو كدا ونخش على الشغل

بس من الاول محدش يتريق ويقول يا ضينايا يابنى وعيل تايه يا ولاد الحلال وكدا

طريقة عمل صينية البطاطس باللحمة المفرومة

نقشر البطاطس كالعادة ونقطعها مكعبات (لية مكعبات عشان تنجز فى السلق احنا ورنا دوام بليل) نسلقها ومعاها شوية ملح وفية توابل هندية كدا مش عارف فاكر اسمها نحطها معاها

بعد ما خلصت سلق نسيبها تبرد وعلى الكاتشن ماشين ونضربها ضربا مبرحا حتى تستغيث

على النحية التانية من البوتجاز بقى نجيب حلة حلوة كدا ونحط فيها شوية زيت ونحط اللحمة المفرومة وعليها شوية بصل وشوية بقدونس اى حاجة تديلها اى ملامح

بعد ما نخلص على اللحمة المفرومة هنجيب صينية ونحط اللحمه المفرومة وعليها من فوق البطاطس المهروسة وفوق على الوش شوية زيت او سمنة ايهما اقرب للفرن يعنى

بس وتساب فى الفرن لغاية لما تكسف ووشها يحمر ويبان عليها انها بنت ناس

بس وبالهنا والشفا

طيب سؤال ياOReX

قوام البطاطس و هي مضروبة بيبقى سائل يعني ؟؟؟؟

و بعدين انت بتقول اللحمة المفرومة بتكون تحت لما بتستوي بقى بتتقلب و لا بتفضل زي ما هي؟

[OReX]

طيب سؤال ياOReX

قوام البطاطس و هي مضروبة بيبقى سائل يعني ؟؟؟؟

و بعدين انت بتقول اللحمة المفرومة بتكون تحت لما بتستوي بقى بتتقلب و لا بتفضل زي ما هي؟

لا يا فندم بلاش تجربيها ربنا يخليكى دى بتعمل دماغ ولا سجاير زغالليلوا يا امة بتاعة كتكوت ابو اليل wst::

البطاطس بتبقى مهروسة مش سائل خالص يعنى ممكن حضرتك تعمليها بأيدك بس علشان الانجاز بتتحط فى الكاتشن ماشين عشان تخلص بسرعة

اللحمه المفرومة هيا مستوية من قبل لما حطينها مع شوية زيت وبصل وشوية بقدونس وشوية خضروات اللى يجيى فى ايدك علشان تبقى شكلها حلو جزر بقى بصل اخضر يعنى يديها الوان

بس بتتحط تحت والبطاطس فوق وعليها سمنة زيت زبدة اى حاجة ممكن يتحط اى نوع من الجبن المطبوخة ومش بتتقلب ولا حاجة زى ما هيا تطلع من الفرن تتقطع زى المكرونة بالبشايل اللى عمرها ما اتظبطط معايا

وبالهنا والشفا ان شاء الله

[om marawan]

طيب حاجة تانية سريعة

صدور دجاج مقطعة شرائح متوسطة الحجم

زبادى

توم

ملح وفلفل وزعتر ( زعتر ناشف مش الاخضر بيبقا قريب من شكل الدقة المصرى شوية ) بصراحة جارتى السورية ربنا يكرمها هى اللى جابتهولى

وممكن يستبدل باى نوع اعشاب عطرية تفضلوه

وشوية زيت

بطاطس متقطعة زى مراكب كده

نتبل الفراخ بالزبادى والثوم والملح والفلفل والزعتر

نحمى صينية فرن فيها شوية زيت

نحط الفراخ تاخد لون ع الناحيتين

البطاطس تاخد نفس التتبيلة وتضاف على طول وبرضه تتقلب تاخد لون بسيط

هنلاحظ ان فيه اثار تحمير فى الصينية نضيف المية ونكحت كل اللون ونقلب مع الفراخ والبطاطس

الحقيقة ان بواقى التحمير السريع ده بتدى لون وطعم بس طبعا مايكونش محروق واسود يعنى

بس كده ضفنا المية نغطى الصينية ونسيبها فوق شوية على نار متوسطة ولما تتشرب والبطاطس تقرب م السوا تدخل الفرن على الرف العلوى والفرن مولع عادى تحت مش شواية يعنى

نسيبها يعنى حوالى تلت ساعة هتكون الفراخ استوت والصينية اتحمرت شوية

ياريت تجربوها بالزعتر ده لانه بيمشى اوى مع التوم وزيت الزيتون اللى ممكن نرش منه رشة اخيرة على الصينية

ووتتاكل برضه مع رز او افضل فى ساندويتشات مع شوية خس وزيتون اسود

وبالهنا والشفا

[mrs gehad ahmed]

تحبوا تأكلوا ايه بكرة؟

نفسكم تاكلوا ايه بكرة؟

هانعمل اكل ايه بكرة؟

اسئلة يومية لكل ست بيت بتتكرر دايما بتوجهها لجوزها و اولادها

و بما اني من مش هواة الاكل البايت فالسؤال دا على طول في بالي اعمل ايه بكرة على الغدا :lol:

لاني كل يوم باطبخ الا لو في حاجه طلعت زيادة و باتت لتاني يوم باكلها و انا بصراحة مضطرة يعني مجبر اخاك لا بطل :lol:

ففكرت اننا نفتح التوبيك دا للكل و كل واحدة تقول ناوية تعمل ايه بكرة و طبعا مع الوصفة

و يا سلام لو الرجالة كمان اشتركوا باكلة جت على بالهم او نفسهم فيها

عشان ممكن يكون في اكلة جديدة او اكلة تايهة عن البال

و اهو الكل يفيد و يستفيد :sad:

و طبعا بندق افندي لا حرمنا الله من افكارك النيرة :lol:

ما رأيكم دام فضلكم

السؤااااااااااااااااال الداااااااااااااااااااااائم

ناكل ايه بكره:P

باعتبار ان ولادي لسه صغننين الكبير فيهم سنه و9 شهور :D

انا معاكي ان شاء الله

وبكره ان شاء الله هعمل مكرونه بالبشاميل وكانيلوني

كعشا بقا عشان هنتغدي بكره برا

مزاج جوزي بقا ان ده عشا :))

المكرونه بالبشاميل معروفه

الكانيلوني بعمله بمقاديري

1:1:1

بيض: ك دقيق :ك لبن

وعليهم ذره ملح وفلفل

وباضرربهم ف الكيتشن ماشين 10 ثواني وينفع طبعا بمضرب يدوي عادي

وف طاسه تيفال صغننه بحط نقطتين زيت ( عشان ميلزقشي)

وبيقي الخليط سائل بحط كميه صغننه ( عشان تبقي رفيعه مش تخينه )

وبدورها بسرعه ف الطاسه عشان تتوزع بالتساوي

ثواني وبقلب ع الوش التاني

وبحشيها لحمه مفرومه معصجه وبلفها ((وممكن حشوها اي حاجه تانيه حلوه او حادقه جبنه او مربي او بيض ))

وبرصهم ف صينيه جمب بعض وبرش موزاريلا بعد ما اوزع عليهم صلصه من فوق وبشغل الشوايه لمده دقيقتين

وبالهنا والشفا يا فندم :

الكانيلوني

بالهنا و الشفا يا رب

بصي يا ستي انا باعمل الكانيلوني زيك كده تمام نفس المقادير

بس بازود مع العصاج طماطم مقطعة صغيرة و فلفل اخضر برضه قطع صغيرة و كمان زيتون حلقات و مشروم

(هاتسأليني ليه كل دا هاقولك عشان مريم هانم بنتي في حاجات مش بتاكلها زي الفلفل و المشروم فا باحطهم وسط العصاج كده و ما بتاخدش بالها و تاكل

جربت مرة ازود خضار مشكل بس للاسف اتقفشت و ما رضيتش تاكله و ادبست فيه انا و باباها)

حاجه كمان باحطها و بجد بجد طلعت تحفة جيبت جبنة شيدر المراعي و قطعتها شرائح و حطيتها فوق اللحمة المرصوصة في الكانيلوني و بدل ما الفه لا طبقته عشان الجبنة تسيح جوا و ما تطلعش من الجوانب بجد طلع مالهوش حل

جربي بكرة و قوليلي رأيك ايه و على فكرة الكاميل الصغنن ان شاء الله يحبه كده

انا زيك يا ريمو بضحك علي مازن بالحجات المستخبيه مع العصاج ..بس السوسه ساعات بيكتشف ويطلعهالي ..ال ايه بيقولي مش عليا يا والدتي :)))

انا جربت طريقتك الهايله دي النهارده ..بجد بجد هايله

تسلم الايادي والافكار يا قمر

[احمد ابو شادي]

للرررففففففففففففففعععععععع

[pink rose]

للرفع عشان خاطر عيون لماضة هانم كعب الغزال