حقى فى تعويض أخويه

[اميره]

الى جعلنى اكتب الموضوع ده هى حكايه حصلت لناس جيراننا وهى :

كان فى شاب من أسره متوسطة الحال وكان دائما الكل يلاحظ تفرقة الام فى المعامله بين الشاب ده والاخ الاكبر يعنى الحب والدلع والاهتمام كله بأبنها الكبير وكان لايعمل وهى التى تصرف عليه

أما الشاب الاصغر ده كان شقيان وبالبلدى كده طافح الكوته ولا أحد بيسأل فيه أكل ولا لأ

ومن شدة المعامله السيئه والإهانه ترك المنزل وأجر غرفه صغيره فى بيت مش بعيد عنهم وفتح فيه مشروع صغير عشان يقدر يعيش من خلاله

وكان لما بيجوع بيروح البيت عشان يأكل ياخد أكل جاهز ويطلب من اخواته البنات يحضروه يقولو له طيب ماتعمل لنفسك وفى نفس الوقت ينادى أخوهم الكبير لأخته تعالى أكوى لى القميص عشان اخرج وترد تقول له حاضر

حس الشاب ده بالتفرقه وعدم الحب حتى من اقرب الناس ليه وكان لما يشتكى لأمه تقول له ياخى سيبنا فى حالنا منك لله وتدعى عليه

والله وكان بيبكى ذى الاطفال ويشتكى للناس يقول لهم أنا مظلوم والله كان يقطع القلب

وفى يوم كان مسافر يزور صديق له تعبان بالمستشفى وخبطته عربيه وانتقل الى رحمة الله

وساعتها مش قادره أوصف لكم شعور أمه وهى حاسه بالذنب تجاهه ألم وحسره وبتتمنى يرجع لو ثانيه تبوس رجله فيها وتقول له سامحنى .

وبعدين رفعت الاسره قضيه على صاحب العربيه الى خبطته وطلع له تعويض 150 الف جنيه

ولكن الام اتغيرت كتير بعد ابنها دا ما مات والحزن و الاحساس بالذنب حيقتلها فعلاً .

وقررت تعمل بالتعويض الى طلع له جامع تبنى له مسجد بأسمه صدقه ليه عشان تكفر ولو لجزء بسيط عن تقصيرها معاه .

ولكن إبنها الكبير بقا الى كانت بتفضلو على ابنها الى مات مش عاجبه حكاية انها تبنى له مسجد وعايز ياخد الفلوس يعمل بيها مشروع لانه عاطل ومش بينفع فى اى شغل .

وهى رفضت وقالت يحرم علينا مليم واحد من فلوسه حرام عليك دا عاش طول عمره محروم

فقام يضربها ويهينها عشان يأخد الفلوس .

السؤال بقا هل هو من حقه ان يأخذ جزء من الفلوس دى ولا المفروض تكون صدقه للمتوفى

[cypher]

هنا الام بتتكلم من وجهة نظر انهم ظلموة وبتحاول تكفر عن جزء من ذنبها ناحيتة وده شئ كويس .

ومن الناحية التانية الاخ بيتكلم من وجهة نظر ان الحي ابقى من الميت . واكيد طمع وشاف فرصة انه يغير حياتة لما الفلوس جت . وكان ممكن يقسموا البلد نصين ويعملوا صدقة جارية على روح المرحوم والتاني يعمل مشروع صغير وخلاص.

لكن لما توصل لانة

فقام يضربها ويهينها عشان يأخد الفلوس .

يبقى الاخ ده عايز الضرب بالنار .... وبيتهيألي انه لو عمل مشاريع الدنيا كلها عمرة ما هيفلح في اي حاجة . وميستهلش اي حاجة

[OReX]

السلام عليكم

لا حول ولا قوة الا بالله اسئل الله ان يرحمه ويتجاوز عنه

نرجع الى سؤالك اختى الكريمة هل يحق له ان يأخذ من هذا التعويض ؟

تلك مسئله فقهيه اختى لان السؤال هل يعتبر التعويض من الميراث ام لا

نقلت فتوى ولكن برجاء لا يتم الاخذ بها الا بعد استشارة متخصص فى الفتوى التى تتعلق بالميراث

http://www.islamic-fatwa.com/index.p...fatwa&id=10169

مسار الفهرس:

فهرس الفتاوى » الأحوال الشخصية » الميراث * هل يدخل تعويض المتوفى في الميراث؟

رقم الفتوى

10169

المفتي

أ.د. أحمد الحجي الكردي

خبير في الموسوعة الفقهية، وعضو هيئة الإفتاء في دولة الكويت

تاريخ النشر

2007-01-24

عنوان الفتوى

هل يدخل تعويض المتوفى في الميراث؟

السؤال

السلام عليكم ورحمة الله وبركاته

يوجد ملاحظة، نرجوا أخدها بعين الاعتبار.

لقد توفي والدنا وليس لنا أخ ذكر، نحن أختين، ودخل معنا في التركة شقيق والدنا، ويوجد دين على والدنا في المملكة العربية السعودية، ويوحد لدينا وقف بالمملكة العربية السعودية، ولكن عمنا لا يدخل معنا في هذا الوقف، وكان والدنا قد كتب رسالة إلى الدائن أن يخصم نصف دخل الوقف حتى خلاص الدين، وقد تم خلاصها.

الآن يوجد تعويض لوالدنا، فهل يتحمل معنا عمنا الدين من حصته من التركة؟

ملاحظة: (تم سداد الدين بعد وفاة والدنا).

أفيدونا أفادكم الله.

والسلام عليكم ورحمة الله وبركاته.

الفتوى

بسم الله الرحمن الرحيم

الحمد لله رب العالمين، والصلاة والسلام على سيدنا محمد خاتم الأنبياء والمرسلين، وعلى آله وأصحابه أجمعين، والتابعين، ومن تبع هداهم بإحسان إلى يوم الدين، وبعد:

فما دام والدكم في حياته قد وفى الدين من الوقف -كما ذكرتم- فلم يبق عليه دين.

ولذلك تكون التركة لكم ولعمكم حسب الأنصبة الشرعية.

أما التعويض: فهل يكون من التركة، أم يكون لكم وحدكم؟

هذا المرجع فيه إلى الجهة التي منحت التعويض، فإن قالت هو لوالدكم يكون تركة عنه لكل ورثته بما فيهم عمكم، وإن قالوا هو منحة لكم، فلا حصة لعمكم فيه.

والله تعالى أعلم.

تم تعديل 4 نوفمبر 2009 بواسطة OReX

[moheltohamy]

أميرة...

بغض النظر عن إن الأخ ده إنسان حقير بكل معاني الكلمة ، لو كان كما وصلنا من كلامك ، وبنفس السواد ده.

لكن رأيي - والله أعلم بحكم الشرع - إن التعويض ده من حق جميع الورثة الشرعيين. وحتى وإن كان الأخ ده ما يستاهلش ياخد خمسة ساغ منهم ، لكن أعتقد إن من حقه ياخد نصيبه الشرعي ، أو حقه في الميراث من أخوه!

ومن حق من يريد البر بالأخ أو الإبن المتوفي التبرع بنصيبه ليكون صدقة جارية على روحه.

وربنا هو المجازي للكل.

وده رأيي.

[doha]

بغض النظر عن موقف الابن الجاحد الي بيضرب امه عشان ياخذ فلوس التعويض فانا لي راي متواضع في حكاية الصدقة الجارية .

اعتقد والله اعلم ان بناء مسجد بالتعويض فكرة مش صائبة ابدا لان المساجد مفيش اكتر منها لكن ان يتعمل شيء ذو نفع مباشر للناس ووهب ثوابه للميت هيكون افضل..

يعني بقترح في حالة زي حالة الام دي انها تدي جزء من المبلغ للابن العاق يفتح بيه مشروع .. واهو لو المشروع نفع توصيه يترحم على اخيه الميت ويستغفر له كل مايتذكره او كل مايشوف ربح من وراء مشروعه ده .. وبرضه لو لاقدر الله خسر اهو هيفضل في رقبته كل مايفتكر اخوه هيدعي له وانه ضيع الفلوس الي كان زمانها دلوقت ثوابها واصل له ..

بقية المبلغ توجه لعمل خير تاني مثلا .. في اطفال كتير بتموت خاصه من ابناء الطبقة المعدمه لان مش متوافر لهم ايجار الحضانات الي بيحطوا فيها المواليد .. الحضانة بتكلف تقريبا من 100 الى 200 جنيه في الحالات العادية لليوم الواحد وممكن توصل 500 او اكتر في بعض الحالات التانيه الاكثر حرجا ..

طبعا الناس دي بتبقى شايفه عيالها بتموت قدام عينيها ومعندهاش تنقذها والمستشفيات الحكومية مكتظة بالاعداد الي فيها لدرجة اني شفت بعيني طفل حديث ولاده برا الحضانة ( ويتنج ليست ) مستني الحضانة تفضى عشان يدخل وياعالم عمره كان فيه بقية ولا لاه ..

فاقتراحي هو ان كان الانسان قادر يشتري جهاز حضانة كامل ( هو بعشرات الالاف سعره بس للي قادر السعر ده مش مشكلة ) بينما لو مش قادر وعاوز يعمل صدقة جارية فمفيهاش حاجه ابدا لو يتفق مع مستشفى او طبيب يكون ثقة انه يرشح له حاله او اثنين من الاطفال المعدمين يعالجهم على حسابه .. يدفع لهم ايجار اسبوع في الحضانة مثلا وده هيكلف كام الف بس لكن هيحيي نفس وتخيل النفس دي هتكبر قدام عين اهلها وهم بيدعوا لرجل الخير الي نجاها بامر الله وبرضه لسه هتكبر وتتجوز وتخلف وتجيب ذرية تعبد ربنا وكل ده في ميزان حسنات الي دفع باذن الله ..

اعتقد حاجه زي كده اولى بكتير من بناء مسجد الا لو كان المسجد هيبنى في مكان نائي مفيهوش مساجد خالص ...

برضه في مشروعات تانيه زي تزويج حد فقير معدم واعفافه ..

شفت برضه مرة حاجه غريبة اوي .. ميكروباص مكتوب عليه مشروع صدقة جارية لتوصيل مرضى الفشل الكلوي لجلسات الغسيل مجانا ..

لو فكرنا في اي حد فقير ومعدم هنلاقي حاجات كتير متوقف عليها حياته ومبالغها بالنسبة للبعض ضئيلة جدا لكن بالنسبة للمعدم ده ممكن تكون مشكلة المشاكل . . اعتقد اي قرش ينحط في حاجه زي كده مش خساره ابدا وثوابه ممتد باذن الله طول مالي انعمل فيه الخير عايش بل وربما في ذريته من بعده ..

[OReX]

بسم الله ما شاء الله

افكار رائعة للصدقة جزاكى الله كل خير