يوميات همسه مع فرقه الخامسه

[قلب ابيض]

احبائى واصدقائى

عجزت ان اصوغ كلمات تصف ما اريد ان انقله لكم 00هى تجربه او محاوله ترددت كثيرا ان اعرضها لكم

ولكن من منطلق حبى لكم وسعادتى فى تواجدى معكم قررت ان اتوكل على الله

وان تكونوا اول ضحاياي فى قراءت هذه اليوميات

تحياتى :)

-------------------------------------------------------------------------------------------------------------------

يوميات همسه مع فرقه الخامسه

=================

- يا ماما يا ماماااا 00فين شرابى ؟؟

- فى الدرج عندك

-مامتى حبيبتى عاوزه سندوتش بسطرمه الله يخليك بلاش الفول

- حاضر

-يا امى كل مره اقولك نفس الطلب 00انا مابشربش شاى باللبن 00عاوز عصير

- حاضر

ماماااااا أتأخرنا سيبينى الف السندوتشات انا وكملى لبسك عشان تلحقى توصلينا قبل الطابور

- حااااضر

وبسرعه البرق ارتديت ماتبقى من ملابسى التى كنت ارتديها بطريقه شارل شابلنيه خلال المعركه الصباحيه وماتبقى الا الحذاء اكرمكم الله واثناء التقاطى له شممت0000

رائحه عطر مميزه فواحه وصوت هادىء حنون يقترب منى ويداعب خصلات شعرى من الخلف 00ويقول :

*هاا حبيبتى هاتعوزى حاجه وانا راجع الضهر اجيبها معايا ؟؟

ما كان ردى الا نظره يملؤها الغيظ وصمت تاااام

* اوكى اوكى اقولك سلام انا بقى انت عارفه ياحبى ان طريقى غير طريقكم خالص 00عاوزك بس تدعيلى اخلص من خنقه الطريق بتاعت الصبح دى واوصل فى معادى 00

لااله الا الله

رددت بصوت عالى كانه زفير بعد شهيق طويل :"حسبى الله ونعم الوكيل "

*بتقولى حاجه يا همستى؟؟

- بقول محمد رسول الله يا حبيبى " ابتسامه صفرا بملىء الوجه"

======================================

اخيـــــــــــــــــــــراا000000

وبعد مرور قرابه الساعه من توصيل الابناء لمدارسهم وكأنها دهر بأكمله وصلت مقر عملى الذى هو بالتبعيه استمراريه لحياه السيرك التى احيا بها 00حيث اننى اعمل

مدرسه فى مدرسه بنات كلهن فى سن المراهقه

ولأن يومى يبدأ فجرا وكل المهرجانات والاكروبات الصباحيه وتوابعها تستغرق زمنيا قرابه ساعه ونصف الساعه بالتوقيت الربانى وتقدر بعشر ساعات من التوقيت العفاريتى

المناسب لوصفها 00

فأصل مدرستى قبل الزملاء بحوالى ثلاثون دقيقه او اقل واعتبر هذه الدقائق من اجمل لحظاتى الخاصه حيث اضع سماعات موبيلى اللدود والذى لا يفارقنى لاسباب عديده

لست بصدد لذكرها الان واستمع الى معشوقتى صاحبه الصوت الملائكى فيروز وانا احتسى كوب النسكافيه المحبب الى بيدى واغمض عينى لثوانى وربما تتجاوز

الدقائق خلالها اتخلص من ثوب ماما ميسه وارتدى ثوب ابله همسه

انتبهت على صوت الجرس يعلن بدء اليوم الدراسى

اعاننى الله عليه وعلى نصيبى وقدرى 00بنات فى المدرسه 00ومدرسه فى البيت 0

يتبع00

تم تعديل 6 نوفمبر 2009 بواسطة قلب ابيض

[Damo]

مممممممممم شكلو هيبقى موضوع شيق جدا يا قلب ابيض wst::

انا already مش قدره استنى :)

[Simba]

تسجيل متابعة وانبهار

أحكي يا شهر زاد هااااه وبعدين :happy:

[بركة]

كل الجري ده ........

الله يعينك بجد التقطت انفاسي اول ما شربتي النسكافية

انت فين !!!!!!!!

مستنياكي

تم تعديل 6 نوفمبر 2009 بواسطة بركة

[miramikhail]

أنا حاسة أنى بتفرج على نفسى بس أنا ما بوصلش المدرسة عشان مابسوقش أصلا :lol:

يلا فى أنتظار باقى اليوميات :cry:

[ذهبية]

بيتهايلى ان دى مش يوميات همسة بس دى بتتكلم عن يوميات الست المصرية

كلنا بنعمل زى ما بتحكى تمام

متابعين

ذهبية

[pocy]

ها وبعدين ايه اللى حصل منتظرين اهه

متابعه جدا

[عنبو]

السلام عليكم ورحمة الله وبركاته

وحصرياً على المحاورات فقط وقبل اى حد يوميات همسه وفرقة الخامسه بقلم قلب ابيض

احسن حاجه فى اسلوبك هو المعايشه فى الحدث نفسه

كملى وشكلها هتبقى كوميديا ساااااااخره وهنموووووووووووووت من الضحك واكيد طبعاً هنستفاد ؟؟

[Simba]

هي شهر زاد سكتت عن الكلام المباح ولا ايه :P

لازم يعني ننده للسياف مسرور :lol:

[رضوي]

ربنا يخليكي لينا ياماما

نفس الي كانت بتعمله ايام المدرسة :D

لا ولسة لحد دلوقتي بتعمل كدة كل يوم الصبح بتقوم تصحينا علشان نروح شغلنا وكليتنا وتحضر الفطار وتتأكد اني شربت الشاي بلبن بتاعي وتتاكد ان كلنا نزلنا واثناء دة كله بتكون بتلبس وتجهز نفسها علشان تروح شغلها...................

متبعاكي .............وانتظر التكملة علي احر من الجمر :unsure: :lol:

[قلب ابيض]

حبايبى كل باسمه 00مش هاعدد الاسماء بس بشرف وثقه كلامى ده لكل واحد فيكم على حده

بحبكم

وحبى لكم شجعنى انى اتكلم وابعبع مش عنى بس وعلى فكره الموضوع مش خاااص بشخصى فقط هو زى ما قالت بركه حبيبتى دى الام المصريه وتحياتى يارضوى لانك حاسه بأمك

مش هاطول بس بجد هى يوميات انفس فيها معاكم واجرب نفسى فى هوايه كان نفسى فيها من زماااان بس اللى منعنى عنها هما اللى خلونى افتكره تانى دلوقتى

محتاجه دعمكم وارائكم ومتابعتكم

عنبووووو الضحك الخفى اهم بكتييير من الضحك الواضح 000هارش؟؟؟ :D

شكرا لمتابعتكم

واووووووعوا تغيروا المحطه :D

[قلب ابيض]

( 2 )

بعد عناء يوم طويل مابين المنزل والعمل والمنزل وبعد ان انهكت طاقتى وانتهى كل مالدى من قدره على العطاء لهذا اليوم 000تذكرت فجأه00

- يا خبر ابيض 00انت عارف النهارده ايه ؟؟

*النهارده الاربع !!!

- اه اللى هو موافق ايه ؟؟

*موافق عاشوره00فى ايه يا ميسه؟0مالك انت عاوزه تقولى حاجه؟؟

-لا اا ولا حاجه 00كل سنه وانت طيب

اما اقوم احط البليله عالنار

ذهبت الى غرفه النوم 00متوجهه الى درج الكومودينو الخاض بى او كما يسمونه افراد الكتيبه التى اعيش واتنفس معهم وبهم " ابنائى الاحباء" المغاره حيث اضع به كل

ماهو خاص وخااااص جدا فيظل مبهما مثيرا لفضولهم دائما وكالمعروف كل ماهو ممنوع مرغوب

تناولت البوم صورى 00يااااااه 00عمر مر بسرعه الريح رياح عاصفه ممطره احيانا هادئه منعشه تحمل نسمات ربيعيه كثيرا

هذه صورتى مع زميلاتى فى اول ايام دراستى الجامعيه اتأمل ملابسنا وقتها والتى صارت موضه هذه الايام للشباب والشابات فالمعروف ان الموضه تعيد نفسه كل عدد

معين من السنوات لا اريد ذكره او حسابه حتى لا اضيع جمال لحظه تأمل الذكريات التى وددت ان احياها الان 00

اتذكر اول يوم لدراستى الجامعيه حيث اعددت من ملابسى البسيط الانيق الاقتصادى رفقا بميزانيه والدى الموظف وقتها0

ولاول مره استعمل مساحيق التجميل التى كانت لاتزيد بالنسبه لى عن عنصرين لازلت لا استخدم سواهما حتى الان 00قلم العيون واحمر الشفاه الوردى اللون " النتورال"

وقد لمعت عيناى من فرحه التغيير والانتقال لمرحله جديده واوردت وجنتاى من فرط خجلى لما رآتنى امى وانا استعد للنزول من البيت نظرت الى قائله 00

- " بسم الله ما شاء الله " بقيتى عروسه يا همسه

اتذكر وقع هذه الكلمات على قلبى وليس سمعى 00شعرت كأنى فراشه متألقه لا احد مثلى وبالفعل طرت على كليتى التى طالما حلمت بالالتحاق بها

وهذه صورتى فى حفل التعارف " ويلكم بارتى حاليا" التى اعدها لنا احد الاساتذه لازاله الرهبه عنا من حياه الدراسه الجامعيه وما تحويه من عوالم مختلفه مابين طباع

مختلفه ومواد دراسيه جديده والاهم بالنسبه لى الاختلاط الذى لم اعتاد عليه طيله سنوات دراستى بالمدارس الحكوميه وقتئذ

انتابتنى مشاعر مختلفه ومضطربه ما بين سعادتى بأننى تخلصت من حياه المدرسه والاستيقاظ مبكرا وطابور الصباح " ما كنت اعلم انى ساعود اليه بعد سنوات قليله"

وبين ما هو مجهول لدى من العالم الجامعى وما قد يخفى بداخله فرحه 00خائفه00مضطربه 00اشعر كأنى طفله مسيره لعالم خفى مشتاقه له قدر خوفى منه

وفى اول ايامى رأيته 00شاب وسيم انيق له اطلاله مميزه وصوت رخيم يجبر من يتعامل معه على الانصات بهرت بشخصه من اول وهله

شعرت ان قلبى اهتز بقوه فى مكانه معلنا انه الحب 00

ياله من احساس رائع لاتستطيع الكلمات وصفه يوم تشعر بأنك مسير فى عواطفك00كلها متجهه اتجاه واحد دون سيطره منك عليها تشعر بقوه خفيه تسيطر على وجدانك

وعقلك وصوت بداخلك يناديك ان تقترب 00هاتى هاتى 00ياماما هااااااتى

انتبهت وافقت على صوت شهوده وهى تجذب الالبوم من بين صدرى ويدى فقد ضممته بقوه دون ان ادرى

- عاوزه ايه يا حبيبتى ؟

-عاوزه اتفرج معاكى

طيب لما ناكل البليله نقعد نتفرج سوا

- بليله هاهاهاهاهاهااااااا

هاهاهاهاهاهاهاها "وظلت تضحك الى ان ادمعت عينيها "

- فى ايه يا شهدود؟؟

- اصل البليله اتحرقت وبابا قعد يزعق وينادى على حضرتك وماسمعتيش

خرجت مهروله على الصاله حيث رائحه شواء القمح تملء المكان 00وزوجى الحبيب جالس امام التلفاز مقتضب الوجه رافعا حاجبه الايسر كعادته وقت غضبه وكبت غيظه 00قائلا :

* كل عاشوره وانتى طيبه يا حبيبتى

============================================================

يتبع

تم تعديل 7 نوفمبر 2009 بواسطة قلب ابيض

[قلب ابيض]

لاء لاء لاء يا جماعه 00 ما اتفقناش على كده !!!

انتو معايا ولا ايه ؟

هااا؟ اكمل ولا اتراجع ؟؟

طيب اللى يمر يرمى السلام --------بس

اوك؟

[qenawy]

برمي السلام

[Simba]

كل عاشورا وحضرتك طيبة

انا صعبان علي البليلة جدا :lol:

يعني الذكريات الحلوة ممكن تسبب الاضرار الجسيمة دي :lol:

سيدتي

هل من مزيد

[جيمي]

[bentmasria]

:wub: :wub:

بصى انا واقعة من الضحك اسلوبك يجنن ومنبهرة فعلا ارجوكى كملى انا مستنية على نار يومياتك انا بشوف ربعها بس يعنى على صغير لكن واضح انك عندك مفارقات مذهلة اكملى يا صاحبة اجمل قلب ابيض من فضلك

كلنا مستنيينك

البنت المصرية

ام فرقع لوز

[قلب ابيض]

برمي السلام

اهلا بيك

بس السلام ؟؟؟؟

كل عاشورا وحضرتك طيبة

انا صعبان علي البليلة جدا :sad:

يعني الذكريات الحلوة ممكن تسبب الاضرار الجسيمة دي :blink:

سيدتي

هل من مزيد :wub:

سمبا لك منى كل الود انت اول من شجعنى وجرأنى على النشر

وان كان على البليله وغلاوتك لاعملك احلى بليله على المنتدى

احترامى :wub:

[قلب ابيض]

:wub: :wub:

بصى انا واقعة من الضحك اسلوبك يجنن ومنبهرة فعلا ارجوكى كملى انا مستنية على نار يومياتك انا بشوف ربعها بس يعنى على صغير لكن واضح انك عندك مفارقات مذهلة اكملى يا صاحبة اجمل قلب ابيض من فضلك

كلنا مستنيينك

البنت المصرية

ام فرقع لوز

هلا هلا هلا وغلا باجمل بنت مصريه

بجد سعدت جدا لمرورك على الموضوع المتواضع ده

ويهمنى بالمرتبه الاولى رأيك بجد بس احب ان انوه لكم جميعا --العذر ثم العذر لمحاولاتى المتواضعه جدااا او لسقطاتى التى ربما لا ادرى عنها

بس ادينى بدردش مع حبايبى

وانا مستمتعه بتواصلكم معى

[قلب ابيض]

فى صباح اليوم التالى

==============

أنا لحبيبي و حبيبي إلي يا عصفورة بيضا لا بقى تسألي

لا يعتب حدا و لا يزعل أنا لحبيبي و حبيبي إلى

تسللت الى مسامعى كلمات وصوت فيروز الهادىء الرخيم كما لو كان يريد الا يشعر به غيرى --مصاحبا معه رائحة عطرى المفضل " anis anis "

ماهذا؟ اهو حلم ؟ الا زلت نائمه؟

بالطبع لا فالازلت اشعر بوسادتى التى ادس بها راسى كل يوم بكل ما فيها من هموم ومتاعب واحلام يومى فتحتوينى بحنان لم اشعر به سوى لامى 0

شعرت بما يداعب خصلات شعرى التى تناثرت على وسادتى هنا وهناك كمن يريد ان يوقظنى ولكن برقه واحساس مرهف

فتحت عينى وانا متردده خائفه ان استيقظ ربما كان حلم ولا اريد ان اخرج منه فالطالما اشتقت فى خضم الحياه الى تلك الهمسات واللمسات التى قد تزيح عناء يومى

بأكمله0

* حقك على --ماتزعلشى 00ما اقدرش والنبى والنبى ما اقدرشى " كان صوت زوجى بالطبع المبادر بكلمات اغنيه ليلى مراد"مداعبا انفى بورده حمراء قائلا :*كل سنه

وانتى احلى واغلى حب

- يا سلااام اخيرا افتكرت ؟ بعد ايه؟

* هو انا اقدر انسى ؟؟" غامزا باحدى عينيه فى مكر "

* حد ينسى اليوم اللى سجن نفسه فيه برضاه

اعتدلت من مرقدى متحفزه --

- نعم نعم سجنت نفسك ؟؟

* ايوه -سجنت نفسى فى قفص الماظ ومعايا اجمل ملاك حوريه من الجنه يا نااس ومفتاح القفص مش مع واحد لاء ده مع خمسه !!!

هنا انتفضت من مكانى كمن لدغه عقرب

- هى الساعه كام ؟ العيال صحيوا ولا لسه؟

* يعنى انا عامل لك الجو ده كله وفيروز وورد وعطرعشان اصالحك وبرضه تقولى لى" العيال صحيوا ولا لسه ؟؟"

كاشرا عن انيابه رافعا حاجبه الايسر جاحظ العينين :wub:

ضحكت بصوت مرتفع 00انا شكلى كده برضه؟؟

* طب بصى فى المرايا وقولى اللى قولتيه كده تانى

- سامحنى يا حبيبى --والله انا عارفه انى مقصره فى حقك

بسبب البيت والاولاد والشغل

* هو ده بقى مربط الفرس

- هو ايه؟ وفرس ايه؟

* البيت والاولاد مانقدرش نسيبهم عشان الشغل --لكن نقدر نسيب الشغل عشان البيت والاولاد

- اسيب الشغل ؟ ايه الكلام ده؟

* الاول كان لازم تشتغلى عشان نساعد بعض ونبدأ حياتنا ونكبر سوا والحمد لله كبرنا سوا --وانتى من حقك على انى اريحك بقى من التعب ده بره وجوه

لا انكر اننى كثيرا ماتمنيت ان اتخذ هذا القرار فطيله خمسه عشر عاما من العمل وانا اصارع فى معترك الحياه مابين عملى وما الاقيه من مشاكل خاصه بالطالبات والاداره

والزميلات وبين ابنائى ومراجعه دروسهم ومرضهم ومتابعه شئونهم الخاصه والبيت ومشاغله ومع عدم وجود من يساعد لا خادمه ولا غيرها

كان القرار فى وقته كهديه عيد زواجنا الثامن عشر وحمدت الله ان زوجى هو البادىء بالطلب حتى تكون فى ميزان حسناتى عنده " بس عشان خاطرك انا سيبت الشغل "

هذه العباره لها وقتها اكييييد

اااااه من بنات حوا :wub:

=-==========================================

تم تعديل 9 نوفمبر 2009 بواسطة قلب ابيض