هو احنا بنستخبي ليه؟؟؟

[لماضة مصرية جدا]

السلام عليكم و رحمة الله و بركاته

حبايبي الحلوين....

من ساعة ما النت هل علينا و احنا كل واحد فينا بيتفنن في الاسم الحركي بتاعه.... بس بلاحظ ان الناس كتير بتختار اسماء قريبة كتير لشخصياتهم و كمان لاحلامهم

كمان التوقيع الشخصي بيدل كتير ع صاحبه.....و يا سلام بقي ع الصورة و انت داخل علي ايدك اليمين..........و دي طبعا لازم تقولك كتير عن شخصية صاحبها؟؟؟

يمكن انا غلط....

بس هو سؤالي لو فكرنا ان احنا نخش بأسمائنا الحقيقية و صورنا الحقيقية (مع تحفظي) هل هنبقي بنفس العنفوان و الانطلاق و الشقاوة في الافكار؟؟؟

هل بنحب الحياة اللي بنختار ان محدش يعرفنا فيها غير لما نطمن ليه؟

هلي حالة الغموض و العالم الافتراضي اللي بيخلقه النت.... هي اللي بتضمن ليه الاستمرارية.... عشان يوم ما تحب تغير هويتك يبقي بمنتهي السهولة تتقمص اسم حركي جديد و صورة جديدة.... و يكون عندك القدرة ع البدء من جديد ...............و دي مهارة نفتقدها كثيرا في حياتنا الحقيقية؟؟؟

لو كل واحد دخل باسمه الحقيقي و صورته............هل سيكون الموضوع اقل بهجة؟؟؟ اقل حرية؟؟؟ هل بنخاف الناس تحكم علينا من مجرد نظرة عين طلعت في لحظة تجلي خطأ من مصور غير محترف.....هههههههه

وجهة نظر

و رزقي ع الله

[bentmasria]

ازيك يا لماضة مصرية اسمك اصلا ظريف وطريقة طرحك للمواضيع كمان افتكر من كام سنة ناقشنا الموضوع ده وترك الاختيار فى المحاورات لمن يحب ان يفصح لأن الموضوع حرية شخصية فى المقام الأول صح

وفى المقام الثانى غالبا السيدات او الفتيات ما بيحبوش يعلنوا اسمائهم عشان ما يتعرضوش للمضايقات من بعض ضعاف القلوب اللى ممكن يتواجدوا فى اى مكان تمام وده حقهم لانهم داخلين يتناقشوا او يعبروا عن رأى بيحفظوا خصوصيتهم وبيحموا نفسهم

بالنسبة للرجال يمكن موش حعرف أرد قوى الا بشىء واحد احنا اتقابلنا فعلا على ارض الواقع ومعظمنا ان ماكانش كلنا قال اسمه وشفنا وجوه بعض فى لقاءين لا عفوا ثلاثة فى القاهرة وكمان البعض اتقابلوا فى محافظات تانية يعنى موش محتاجين نستخبى ولو جزء منا لأنى بكتب والكتابة ببساطة بتكشف طبيعة البشر وفكرهم والكثير عن سلوكهم ولما شفنا بعض لأول مرة محدش كان مختلف عن فكرتى المسبقة عنه لأن الملامح موش المقياس هنا العقول هى المقاييس الخاصة والشيه صحيحة يا اختى الكريمة

واللقاء حول الخيال لحقيقة حلوة وخلق صداقات كبرت واتطورت وبقينا زى الأهل وأكثر

وجمعنا خير وواسينا بعض فى احزاننا وبقينا اخوان واخوات واكثر حتى واحنا موش عارفين الاسم الثلاثى

هنا محدش بيستخبى عشان يدخل بكره بهوية جديدة ويقول اللى هو عاوزه

يمكن بنختار اسم لكن له مضمون او بيعزز حاجة جوانا

انتى فى مناخ مختلف تماما عن اى منتدى عربى فيه عاشقة القلوب وفتى الشاشة وانا واثقة انك فاهمة قصدى

ها

ايه رأيك فى كلام ماما مانا

مستنية ردك يا قمره

[عنبو]

لو كل واحد دخل باسمه الحقيقي و صورته............هل سيكون الموضوع اقل بهجة؟؟؟

لا هيبقى الموضوع زى الاول ليه ؟؟

لان اساساً برده معظمنا ميعرفش بعض الا عن طريق المحاورات يعنى لو كتب اسمه الحقيقى برده مش هنعرفه ؟؟

هل بنخاف الناس تحكم علينا من مجرد نظرة عين طلعت في لحظة تجلي خطأ من مصور غير محترف

الشخص ممكن لو شاف الصوره يقعد يتخيل طريقة الكلام ولو شاف كلام الشكل يقعد يتخيل شكله ويحاول يركب دول على بعض فى مخيلته

لكن لو الشخص شاف الصوره والكلام فى نفس الوقت يبقى هيبقى الحكم للكلام المعبر عن الصوره وهيبقى مافيش داعى للتخيل

يعنى انا فيه ناس هنا راسم لهم شكل معين لو شفتهم بغير الشكل ده :rolleyes: عادى هقول قدر الله وما شاء فعل

[الباشمهندس ياسر]

انا شايف ان المفروض الناس تدخل ببياناتها الحقيقية انما البنات بيبقى ليها وضع مختلف زة ما قالت ماما نانا

عن نفسي ... داخل بكل بياناتى الصحيحة و بعتبر ده مطلوب

هذا انا

من كتر كلام

[حسام يوسف]

انا داخل زي ما أنا

حطيت بس صورة سلفادور دالي لأني بحب جنونه

وصورتى موجودة عادي فى المنتدي فى موضوع اخر

وماكنتش هقلل من حريتي لو كنت داخل باسمي أو باسم مستعار حركي

تحياتى للموضوع وصاحبته