نأسف للإزعاج

[Alshiekh]

نأسف للإزعاج

عبارة يستخدمها المتحضرون اذا اضطروا لظروف ضرورية ان يسببوا ازعاج للآخرين.

فمثلا نجد ان شركة تقوم ببعض عمليات اصلاح طريق بسبب عمليات تجديد او لانفجار ماسورة او حدوث هبوط فى جزء من الطريق ،

تراهم يضعون لافتات ارشادية مصحوبة بعبارة " نأسف للإزعاج " ، عندها نتقبل الامر ونتبع ارشاداتهم الى الطريق البديل.

صاحب محل اضطرته ظروف خارجة عن ارادته ان يغلق محله ليوم او يومين ، نراه يكتب اعلان بذلك مذيلا بعبارة " نأسف للإزعاج " ، فإذا ذهبت لشراء شيئ ما من ذلك المحل وقرأت هذه العبارة فلن يسعك الا ان تدعو له ان يكون السبب خيرا وان يعودوا للعمل باسرع مايكون.

أما ان تفتح باب البلكونة فتجد ابتسامة بلهاء ولافتة " آسف للإزعاج " يحملها شخص لاتعرفه جالسا على سور البلكونة وحاطط رجل على رجل ، فليس أمامك الا ان تعاجله بقبضة شدية ترسله الى الشارع هو ولافتته.

أقرأوا معى هذه القصة القصيرة:

أنا

لما نشوف الناس بتوع المحاورات كاتبين ايه النهاردة

يامسهل ، عندى رسالة جديدة ، ياترى من مين

مين؟ انا عمرى ماشفت الاسم ده قبل كده ، لما نشوف يمكن عضوة جديدة ومش عارفة تكتب

لما نقرأ الرسالة

سالامو عليكوم

استاذى الوسيم جدا

أو حاجة " أنا آسفة على الازعاج "

انا معجبة بالتوقيع بتاعك

وياسلام على الساعة ... تحفة ، ولا العلم يادهوتى وهو بيرفرف بيخلى قلبى يرفرف معاه

تعرف ان انا حفيت فى المنتديات لحد مالقيتك " انت اللى كنت بادور عليه "

انا على فاكرة ساكنة جنبك ، فى القارة اللى انت ساكن فيها على طول

وعلشان كده انا حبيت اتعرف عليك علشان اصل انا جديدة ومابعرفش امسك الكى بورد كويس وانا باكتب فقلت انك تعلمنى ازاى الكى بورد بتتمسك ، اصل انت عارف بقى المفاتيح بتلزق فى صوابعى وساعات فيه مفاتيح مابتطلعش الا بالطبل البلدى :old:

وانا عارفة انك مش حاتكسفنى

يافتاح ياعليم يارزاق ياكريم

هى ايه البلاوى اللى بتتحدف على الواحد على الصبح ، هو انا ناقص العالم المتخلفة دى ، لأ وايه آسفة على الازعاج !!!

رديت وقلت

" أيوه ياستى ، بما انك معجبة بالعلم والساعة ، انا ياستى حاتنازل لك عنهم ، وياريت بدل ماتضيعى وقتى ووقتك ، اقرى لك حاجة مفيدة او اكتبى رأيك فى موضوع عجبك ، وآسف على الازعاج "

ردت تانى

الموضوع مش موضوع علم وساعة وولاعة ، الموضوع هو الجملة البليغة اللى انت كتبتها فى الكسيدة بتاعتك الجملة اللى بتقول فيها " ياسلام على حبى وحبك مابنامش الليل من حبك " علشان كده حبيت اتعرف عليك ، وآسفة على الإزعاج

رديت عليها تانى

" ياستى الله لايسيئك ، لو كنت قريتى لى زى مابتقولى كنت مفروض عرفتى ان الكسيدة دى مش بتاعتى ، دى حتة من دويتو بين فريد وشادية لما كانوا مش قابلين بعض فى الفيلم ، وكان مفروض تعرفى انى متجوز وعندى عيال يمكن اكبر منك ، وبلاش شغل العيال المراهقين ده وياريت لو انتى مسجلة فى المنتدى مخصوص علشان تبعتى جوابات بس وتتعرفى ، ياريت تاخديها من قصيره وتورينا عرض قفاكى ، بعد اذنك علشان مراتى حضرت لنا الفطار ، وعلى فكرة أنا ولا وسيم ولا زفت ، وآسف على الإزعاج "

كان هذا مجرد تلخيص لحادث قد يحدث لاعضاء او عضوات ، ولكننى آثرت ان اصيغها بشكل آخر.

مامعنى ان تفتح المحاورات فتقفز اليك شاشة لديك رسالة جديدة فتجدها من عضو/ة لاتعرفه ولم يسبق لك ان قرأت اسمه فى مداخلة وتجده بكل سماجة يقول او تقول لك انا معجب/ة !! ممكن نتعرف !!! اصل انا قريت لك كل اللى بتكتبه .

طيب يا أخى أو يا أختى لما انت قريت لى ماعرفتش او ماعرفتيش انى متجوز/ة ، اهلك ماعلموكش او ماعلموكيش ان التعارف له اصول ، اولها انك لازم تعرف/ى عن الشخص اللى انت عايز تتعرف/ى عليه لما يكون من الجنس الآخر لازم تعرف حالته الاجتماعية ايه قبل ان تحاول ان تقتحم عليه خصوصيته ، ماتعلمتش او ماتعلمتيش يعنى ايه " عيب "

ايه رأيكم فى العضو او العضوة الذى او التى يتصرف بهذا الشكل؟

[SoSo R]

أستاذى الفاضل محمد:

أسفة على الأزعاج

بس حبيت أكون أول واحدة تكتب مداخلة فى الموضوع دة...

يمكن حضرتك مش هتصدقنى لو قلتلك إنى كنت ناوية أفتح موضوع مشابه...بس بعنوان مختلف...

وكنت هاسميه أطرف الرسائل الخاصة...بس كنت محتارة فى وضعه تحت أى باب...

تانى حاحة ماكنتش متأكدة هل دة مخالف لقوانين المنتدى أم لا...

ونظرا لتوارد الخواطر وتشابه الأفكار فبشكر حضرتك على فتح الموضوع دة...

فى أعضاء بتسمح لنفسها إقتحام المساحة الخاصة بينا والمسماة بالبريد الخاص فى هذا المنتدى...

يعنى من أسمها ...البريد الخاص..حاجة خاصة جدا مش مستباحة لكل من هب ودب...

وهؤلاء الأعضاء لا نعرفهم ولا تحاورنا معاهم ولا حتى نعرف أساميهم قبل كدة...يعنى ماخبطناش فيهم من الأساس...

وتلاقى بعد التحية...

يا إما طلبات غريبة...

يا إما أسئلة أغرب...

طيب هو العشم دة جه منين...

دة إحنا عمرنا ما إتقابلنا فى أى موضوع...

وفى ناس بتبعت أسئلة عادية...بس مكسلة تكتبه على العام...مش عارفة يعنى...هربانين من الديانة

ولا خايفين حد يعرفهم...يعنى إيه الخصوصية فى سؤال عادى...ماتحطه وسيب غيرك يستفيد يمكن يكون بيدور فى دماغه نفس السؤال!!!!

على العموم أنا سعيدة جدا بالموضوع دة...لى عودة

عشان أحكى بعض المواقف....

وآسفة على الأزعاج :old:

تحياتى

سوسورانى

تم تعديل 12 نوفمبر 2009 بواسطة SoSoRaNy

[OReX]

يلهوى على الاحراج

انا لسا باعت رسالة اسف على الازعاج دى الاستاذ اسد عشان كورس الانجليزى لينكات التحميل وقعت وقلت انزلة من تانى بشكل اسهل

بس قعت ادور الاول على اى موضوع احط فية طلبى ملقتش

عزرا يا استاذ اسد لم اقصد التطفل والله :$

[MZohairy]

هناك فرق بين

أسف على الإزعاج

و بين

مزعج على الإسفاف

طنش يابوحميد عشان ترتاح

[عبير يونس]

موضوع مهم بصراحة

بالنسبة لي ما بتعبش نفسي بالرد على الناس دي

اللي عايز يتعرف

بأعمل له بلوك أساسا

و لو الرسالة فيها تجاوز بأحولها للإدارة رأسا

بس خلاص

:happy:

[ذهبية]

و الله حضرتك ضيعت وقت ثمين لمجرد انك ترد عليها بصراحة

الناس الىل زى دى مجرد الاهمال اكبر رد عليها و مجرد انى اتعب نفسى و ارد على هذة المهاترات فهو تضيع للوقت

[لولا]

اسف للإزعاج ..

كلمة مستفزة جداااااااا تلاقيها عادة فى آخر الرسالة السافلة اللى توصلك على بريدك الخاص لطلب التعارف بسبب "الإعجاب "!!

ديما بيلح عليا خاطر ليه الشخص دوت ما يكتبش مثلا فى آخر الرسالة

آسف انى قليل الأدب !!

آسف انى مش متربى !!

آسف انى معرفش ابقى بنى آدم محترم !!

آسف انى مش بحترم نفسي ولا الناس !!

آسف اصل انا تاااااااااااااااااافه !!

آسف أصل انا سطحى !!

آسف اصل انا هاااااااااايف !!

آسف أصل دماغى فاضية وعندى فراغ قاااتل بحاول اضيعه فى أذية الناس!!

آسف انى اعمى ومعرفش افرق بين اماكن التعارف وشلل الروشنة على قهوة كتكوت وبين الأماكن الحوارية المحترمه اللى فيها ناس محترمة

مش لا قى وقت لمتابعة فكركم وكتاباتهم لأنى داخل هنا اتسلى شويه واهييييييس شويتين نظرا لأنى تافه !!

وانا عن نفسي أسفه كمان !! ببقى اسفه بعد ما بقرا الرسايل اللى من النوع ده .

أسفه ان بعد يوم مرهق طويل كله مسؤليات ادخل المحاورات الاقى رسالة هايفه فارغه من النوع ده تخلينى احس بكل اشمئزاز الدنيا

من صاحبها ومن الدنيا اللى اتقلب حالها ومن عمى البصر والبصيرة اللى يخلى قلة الأدب توصل لإرسال رسائل ظريفه

لطلب التعرف حتى بمشرفات المكان !!

امال بقية العضوات بيوصلهم ايه ؟؟؟؟؟؟؟؟؟؟؟؟؟

اعذرنى يا استاذ محمد انت شكلك فتحت الموضوع المهم دوت فى وقت وصلتنى فيه رسالة سخيفة فى وقت لا املك فيه طاقة التجاهل

وغض الطرف واضافه صاحبها لقوائم الممنوعين من المراسلة كالسابق .

سؤال للعضوات الفضليات ..

بتوصلكم رسايل من هذا النوع ويتم التغاضى عنها دون تبليغ الإدارة ؟؟

تحياتى

لولا

[أبو محمد]

سؤال للعضوات الفضليات ..

بتوصلكم رسايل من هذا النوع ويتم التغاضى عنها دون تبليغ الإدارة ؟؟

تحياتى

لولا

هدئى من روعك يا "لولا" .. مثل هذه الرسائل تعلمين تماما كيف نتعامل مع أصحابها

لذلك أدعو الله ألا تكون إجابة أخواتنا وبناتنا الفضليات على سؤالك هى "نعم" .. سأصاب بخيبة أمل ، وسأكون حزينا جدا ..

[Alshiekh]

يــــــــــــــــــــــــــــــــــــــــــــــــــَاه

الظاهر أنا فتحت جرح ناس كثيرة عانت منه

عموما هى فرصة علشان اللى مابيعرفش الاصول يعرف اد ايه هو بيضايق الآخرين.

[SoSo R]

مساء الخير...

أحب بس أوضح حاجة...

أنا الرسايل اللى بتجيلى بجد كوميدية...

يعنى فيها طلبات غريبة...وعشان كدة كنت باقول أطرف الرسايل

مش من العينة اللى بتحكى عنها لولا...

لأن دول إتعلقوا قبل كدة...وإتمدوا على رجليهم فى موضوع فتحه الفاضل سى السيد

بس أنا بحكى على رسايل مضحكة بجد....

طيب عشان خاطر لولا تهدى شوية...

ونخفف حدة التوتر...أحكى مثال..

يوم عيد ميلادى جات لى تهنئة فى رسالة خاصة..من عضو/ة...الأسم مش مبين الصراحة...

تمنيات بعيد ميلاد سعيد...ماشى ...

ألف شكر ولو إنى ماعرفش الشخصية خااااااااااالص

بعد يومين 3 رسايل ورا بعض بنفس المضمون.....

لو سمحتى...ونبى..ونبى...ونبى......

ماتكسفينيش وجاوبى على سؤالى...

إيه الحاجة اللى كان نفسك فيها السنة اللى فاتت وما إتحققتش؟؟

وإيه اللى إتحقق wst::

أنا وقعت من الضحك...وبقيت أضرب كف على كف... :lol:

وبقول مين؟؟فين؟؟؟ليه؟؟

هه عجبتكوا الحكاية :happy:

لو أيوة قولى لى و أنا أكمل من هذا الأستايل...فيه لسه

تحياتى

سوسورانى

[لولا]

موضوع مهم بصراحة

بالنسبة لي ما بتعبش نفسي بالرد على الناس دي

اللي عايز يتعرف

بأعمل له بلوك أساسا

:happy:

العزيزه مصريه متغربة..

صباحك سعيد اولا wst::

اعتقد هنا تكمن مشكلة .. اننا نتجاهل طلبات التعارف ونعتقد ان التجاهل موقف وانا عن نفسي لطالما اتبعت هذا الأسلوب

منذ اشتراكى فى المحاورات !!

لكننى فى وقت ما تنبهت ان هواة التعارف والمعجبين يرسلون عادة لعدد من العضوات ولا يكتفون بالمحاولة مع واحده

بالتالى السكوت عن امثال هؤلاء ومجرد تجاهلهم دون تحويل رسائل طلب التعارف للإدارة لإتخاذ اللازم يعتبر تخاذل منا

فى ردع هؤلاء.

كما وضحت هذه الرسائل لا تتوقف عند عضوة واحده ولكنها تتكرر مع اخريات والتلبيغ عنها يعجل بالحل وبالبتر لهؤلاء التافهون من هنا

لأننا حقا لا نتشرف بو جودهم بيننا .

ليتنا نتكاتف لتطهير المكان ن هؤلاء .

تحياتى لك .

لولا

[عبير يونس]

موضوع مهم بصراحة

بالنسبة لي ما بتعبش نفسي بالرد على الناس دي

اللي عايز يتعرف

بأعمل له بلوك أساسا

العزيزه مصريه متغربة..

صباحك سعيد اولا

اعتقد هنا تكمن مشكلة .. اننا نتجاهل طلبات التعارف ونعتقد ان التجاهل موقف وانا عن نفسي لطالما اتبعت هذا الأسلوب

منذ اشتراكى فى المحاورات !!

لكننى فى وقت ما تنبهت ان هواة التعارف والمعجبين يرسلون عادة لعدد من العضوات ولا يكتفون بالمحاولة مع واحده

بالتالى السكوت عن امثال هؤلاء ومجرد تجاهلهم دون تحويل رسائل طلب التعارف للإدارة لإتخاذ اللازم يعتبر تخاذل منا

فى ردع هؤلاء.

كما وضحت هذه الرسائل لا تتوقف عند عضوة واحده ولكنها تتكرر مع اخريات والتلبيغ عنها يعجل بالحل وبالبتر لهؤلاء التافهون من هنا

لأننا حقا لا نتشرف بو جودهم بيننا .

ليتنا نتكاتف لتطهير المكان ن هؤلاء .

تحياتى لك .

لولا

صباحك فل يا لولا

:happy:

الحقيقة في المنتدى هنا جاء لي طلب تعارف واحد بس

و كان عبارة عن "ممكن نتعرف"

عملت له بلوك

بعد ما اديته كلمتين في عضامه

و طبعا ما استنيتش الرد

و ما اتكررش تاني الحمد لله

أما الرسالة اللي قبله فكانت أسفل رسالة شفتها في حياتي

و كنت لسه عضوة جديدة

لسه فاتحة موضوعين تلاتة

و حولتها إلى الإدارة رأسا

و قد آذتني كثيرا

و فعلا إدارتنا الرشيدة

اتخذت الإجراء اللازم

ببتر ذلك العضو مباشرة

و الواقع انه كان بلا مشاركات!!!

و أعتقد إنه سجل مخصوص عشان يرسل الرسالة دي

و أعتقد انه كان مش مصري

:blink:

و أكيد لو اتكرر

حأتخذ نفس الإجراء

:blink:

[عادي]

طب هو ممكن يكون فيه حل

مراقبة الرسائل الخاصة

و يكون احد المشرفين العام متتبع رسائل الاخوة

و المشرفة العام تتبع رسائل الاخوات

و اي تجاوز يوقف العضو بمدة على حسب التجاوزات

و يكون بانر على صدر المنتدى انه الرسائل مراقبة

[Alshiekh]

طب هو ممكن يكون فيه حل

مراقبة الرسائل الخاصة

و يكون احد المشرفين العام متتبع رسائل الاخوة

و المشرفة العام تتبع رسائل الاخوات

و اي تجاوز يوقف العضو بمدة على حسب التجاوزات

و يكون بانر على صدر المنتدى انه الرسائل مراقبة

اسمها " رسائل خاصة " وبالتالى " لا مراقبة للرسائل الخاصة "

لان ذلك ضد العرف والاخلاق والقانون

[عصام]

وضد برمجيات المنتدى .. كمان

يعنى المشرفين العوام لا يستطيعون الاطلاع على الرسائل الشخصية للأعضاء ..

وحقيقة لا أعلم ان كانت تلك الصلاحية متوفرة للأدفايزر أم لا

[عادي]

على كل فيه فتاوي تبيح مراقبة الرسائل الخاصة

اما كيف يكون ذلك فهناك هاك يحمل على السرفر و منه يضاف رقم عضوية المشرف المكلف بالمراقبة

و من لوحة التحكم في البحث عن الاعضاء يمكن اختيار عرض الرسائل

و بعيدا عن الفتاوي و علشان حرية المراسلة خلاص بلاش مراقبة الرسائل

بس كمان يمكن اي شكوى من اي عضو يتلاعب بالرسائل بهذا الشكل يكون عرضة للتوقيف و لو لشهر

حتى لا يرجع لمثل هذه التجاوزات

و لكم حرية التصرف طبعا

هذا فقط رأي و دمتم بخير

تم تعديل 13 نوفمبر 2009 بواسطة عادي

[أبو محمد]

خيار Print screen للرسالة المخالفة وإرسال صورة منها للإدارة دليل قوى لا يمكن إنكاره

ونحن - كإدارة - ملتزمون باحترام خصوصية الرسائل "الخاصة"

ونحن - كأعضاء - ملتزمون باحترام بعضنا البعض .. وباحترام المكان الذى يضمنا

[alsaher]

مش عارف

احيانا هناك أشخاص من الجنسين أعرف مدى إحترامنا المتبادل لبعضنا البعض ، ولكن أتردد ألف مره قبل كتابه رسالة خاصه لهم ، وأفكر هل يحق لي ذلك أو لا

مش عارف الناس دي لمجرد إنها في منتدى وكشخصيات إعتباريه ، لايهمها أن تفقد إحترامها لنفسها !!!!!

معلش أستاذنا العزيز محمد

ربنا يعين

ضريبة الشهرة ياباشا :rolleyes:

[tantrum]

على كل فيه فتاوي تبيح مراقبة الرسائل الخاصة

ا

مراقبة الرسائل الخاصة عمل بشع

لا يمكن تبريره

و كلام أبو محمد فيه تلخيص للمشكلة و الحل

خيار Print screen للرسالة المخالفة وإرسال صورة منها للإدارة دليل قوى لا يمكن إنكاره

ونحن - كإدارة - ملتزمون باحترام خصوصية الرسائل "الخاصة"

ونحن - كأعضاء - ملتزمون باحترام بعضنا البعض .. وباحترام المكان الذى يضمنا

الحل بسيط فلدى المتضرر دليل يظهره للإدارة عند الحاجة و دون التدخل فى الخصوصيات

[أسد]

على كل فيه فتاوي تبيح مراقبة الرسائل الخاصة

اما كيف يكون ذلك فهناك هاك يحمل على السرفر و منه يضاف رقم عضوية المشرف المكلف بالمراقبة

و من لوحة التحكم في البحث عن الاعضاء يمكن اختيار عرض الرسائل

و بعيدا عن الفتاوي و علشان حرية المراسلة خلاص بلاش مراقبة الرسائل

بس كمان يمكن اي شكوى من اي عضو يتلاعب بالرسائل بهذا الشكل يكون عرضة للتوقيف و لو لشهر

حتى لا يرجع لمثل هذه التجاوزات

و لكم حرية التصرف طبعا

هذا فقط رأي و دمتم بخير

لفت نظري أن هناك فتاوى تبيح التلصص على الرسائل الخاصة ..

لا أعلم عنها .. ولا أدري كيف يكون هذا ..

ولكن .. مالفت نظري هو أننا نسأل عن فتوى لأي شئ .. وأصبح هناك من يفتي في أي شئ ..

لا أدري من أي منطلق يحدث هذا .. ولا بأي فقه يباح ذلك