حكومة انقاذ وطنية

[CoDeR]

أولا : السلام عليكم يا جماعه ..

أنا يمكن عضو جديد و مش معروف منكم .. و لكن أسمحولي أشارك في النقاش معاكم ..

ثانيا : أتفضلوا .. ادي اللينك بتاع الحمله الشعبيه لترشيح عمرو موسي رئيسا للجمهوريه ..

عنوان الأستفتاء ..

ثالثا : أسمحولي أعبر عن رأيي ..

الحقيقه يا جماعه أن الفكره مش في شخص عمرو موسي تحديدا .. الفكره في التغيير .. و التغيير هو المبدأ اللي أحنا عايزين نوصله .

و نظرا لأن مفيش حد علي الساحه دلوقتي ممكن نختاره .. و الموجود هو الوجوه القديمه .. يبقي نختار أحسن الوحشين .. و أهو تبقي فتره أنتقاليه حتي يتم التغيير الكامل ..

و بعدين في رأيي الشخصي أن جمال مبارك ليس بهذا السوء .. بل علي العكس . فهو شخص متعلم و مثقف و شاب .. شرب السياسه بحكم نشأته و تقضيته للعشرين سنه اللي فاتوا من عمره في قصر الرئاسه .. و لكن أختياري لجمال مبارك فيه مشكله واحده فقط . و هي أني اتمني ان جمال مبارك يكون في وسط مجموعه من المرشحين و ساعتها انا ممكن أنتخبه و أديله صوتي في نظام انتخابات ديمقراطي .. اما مسأله فرضه علي الحكم فهي ديه المشكله ..

و ختاما تقبلوا فائق أحترامي ..

[Mohammad Abouzied]

كلام معقول فعلا ولكن احنا مش عوزين لا جمال مبارك ولا عمرو موسى

واعتقد ان سبعين مليون فيهم ناس كويسين ممكن يرشحو انفسهم بس نبدأ الاول بتغير اليات اختيار رئيس الجمهورية وبالتالي لازم نغير الدستور تغيير شامل ويكون زي دساتير البلاد المتحضرة وتسحب السلطات المطلقة لرئيس الجمهورية وبعدها احنا حرين ممكن نختار اي واحد ومش مشكلة لو كان جمال او عمرو موسى لان اصبح ممكن نغيره او على الاقل هو يكون عارف انه لو مش هايمشي بما يرضي الله ممكن يتغيير وبارادة الشعب

[DARWEEN]

بعدين في رأيي الشخصي أن جمال مبارك ليس بهذا السوء .. بل علي العكس . فهو شخص متعلم و مثقف و شاب .. شرب السياسه بحكم نشأته و تقضيته للعشرين سنه اللي فاتوا من عمره في قصر الرئاسه

شوف أهو علشان دي بالذات يبقى كلامك عن التغيير كله مالوش معنى دي واحده

التانيه أن مبدأ الأبن بعد الأب في حد ذاته خطير جدا جدا .. يعني أنا ممكن أتفق معاك أنه جمال أجدع ناس بس مايجيش بعد أبوه ولا بالأنتخاب ... ياراجل دول لما بيعملوا مناقصه ولا مزاد يقولك ممنوع على أقارب العاملين حتى الدرجة التالته فما بالك بالأبن خصوصا أن البيعه مصر كلها

[se_ Elsyed]

أولاً اود ان أرحب بك زميلاً جديداً يا اخ كودير ( يعني أيه دي ؟ )

الحقيقه يا جماعه أن الفكره مش في شخص عمرو موسي تحديدا .. الفكره في التغيير .. و التغيير هو المبدأ اللي أحنا عايزين نوصله .

يا اخي فليسقط التغيير إذا كان للأسوء او لمجرد التغيير ، وبعدين يا عم كودو عمرو موسى عنده حوالي 73 ستة هو راخر ... فمش ناقصة هي حفريات ..

و نظرا لأن مفيش حد علي الساحه دلوقتي ممكن نختاره

يا فرحتك فينا يا صفوت يا شريف ... أهو هو ده الهدف الرئيسي لإعلام أي دولة فاشية أنه يعمل سبوت لايت على الشخصيات المقددة ( مقدده يعني قديمة وناشفة بلغة الفلاحين ) الموجودة على الساحة والتى مللنا من النظر إليها والتى لم يعد لديها أي جديد ولا قديم ... حتى يصلوا بالشعب انه - ولا بلاش خلينا ماسكين لساننا - إنه يمصص في شفايفة ويقعدوا على المصطبة قدام البيت و يقولوا :

- اللي نعرفه أحسن من اللي مانعرفوش .

- وانا اللي يحكمني أقول له يا عمي

- واهو الموجودين سرقوا كتير وشبعوا وهما أحسن من غيرهم اللي هاييجي ولسه هايسرق من أول وجديد ...... وهكذا

يا عزيزي مصر 70 مليون وبها رجال يهدوا الجبال - حقيقة - ولكن للأسف فقد تم وضع انظمة ديكتاتورية للقضاء على نبوغ او ظهور أي مواهب قيادية .

و بعدين في رأيي الشخصي أن جمال مبارك ليس بهذا السوء .. بل علي العكس . فهو شخص متعلم و مثقف و شاب .. شرب السياسه بحكم نشأته و تقضيته للعشرين سنه اللي فاتوا من عمره في قصر الرئاسه ..

لا بهذا السوء وزيادة ... وبعدين بلاش الله يخليك حكاية شرب السياسة دي اللي بتفكرني بشربة الخروع ، وبعدين طب ما هو س س اللي قدامك ده شاب برضوا ومتعلم ومثقف الحمد لله وعندي 32 سنة وهو عنده 38 دلوقت ... ليه مانفعش انا رئيس جمهورية ؟... ولا علشان أبويا ماكنش رئيس وماكنتش ساكن في العروبة ؟

أنا باتكلم جد مش تهريج !!!!

وبعدين هو علشان عايش في القصر يبقى ينفع رئيس جمهورية ..؟ طب ما عم عبده الطباخ عايش هو كمان في القصر من ييجي عشرين سنة وعم إبراهيم الجنايني كمان ... فهل حد فيهم ينفع رئيس جمهورية ؟

اما مسأله فرضه علي الحكم فهي ديه المشكله ..

كده الله ينور عليك

وأوعى تاخد كلامي على انه هجوم شخصي عليك ، ولكنه هجواً على أفكار انتشرت لدى الشعب المصري المستكين .

[CoDeR]

الصديق العزيز س س ..

شكرا ليك يا عمنا .. و ( Coder - كودر ) يعني الشخص اللي بيكتب الكود بتاع لغات البرمجه .. يعني المبرمج ..

و للأسف فعلا .. الأعلام دلوقتي مسلط علي عدد من الشخصيات بتدور بينهم دائره الحياه السياسيه .. يعني كل اللي بيحصل أنهم بياخدوا مناصب بعض .. و مفيش فرصه لظهور دماء جديده ..

و أنا عارف أن مصر فيها الرجال و الكفاءات الكبيره في كل المجالات و ليس السياسيه فقط ..

و لكن خلينا نناقش الموضوع بموضوعيه شويه ..

عشان نوصل للصوره اللي الاستاذ محمود أبو زيد قال عليها .. تفتكر ازاي ؟؟

ما هو التغيير الضخم ده مش هيحصل بين يوم و ليله ..

يبقي من الأحسن أني أمشي خطوات و لو بسيطه أوي في طريق التغيير .. لحد ما أقدر و يبقي عندي من الوعي ما يكفي و أوصل للتغير الشامل و للصوره اللي رسمها الأستاذ محمود ..

يعني المطلوب اننا نبدأ بخطوه .. و الخطوه هتجر خطوه ..

و لو كانت الخطوه الأولي ممكن تكون عن طريق عمرو موسي فا ليه لا ؟؟

و بعدين في نقطه جمال مبارك .. ديه نقطه خلافيه ..

بس أحنا متفقين في شيء أساسي .. أنه حتي لو جمال مبارك مسك الحكم .. يبقي يمسكه عن طريق أنتخابات حقيقيه و يكون في فرصه للأختيار .. و ساعتها أنا اديله صوتي و أنت تدي صوتك لأي حد تاني .. زي أي أنتخابات محترمه ..

و صدقني .. أنا - شخصيا gsm:: - معنديش أعتراض علي ترشيحك للمنصب .. بس انت ايه خبراتك و مؤهلاتك السياسيه اللي هتخلي الناس تختارك ؟؟ ايه انتمائاتك و ميولك السياسيه ؟؟ مارست العمل الحزبي ؟؟ و فين ؟؟ و أيه خططك و برامجك .. أي شخص عايز يدخل الأنتخابات لازم يكون عنده رد و أجابات لكل ما سبق .. و لا أي حد يتقدم ؟؟

و تقبل تحياتي ..

[se_ Elsyed]

- معنديش أعتراض علي ترشيحك للمنصب .. بس انت ايه براتك و مؤهلاتك السياسيه اللي هتخلي الناس تختارك ؟؟ ايه انتمائاتك و ميولك السياسيه ؟؟ مارست العمل الحزبي ؟؟ و فين ؟؟ و أيه خططك و برامجك .. أي شخص عايز يدخل الأنتخابات لازم يكون عنده رد و أجابات لكل ما سبق .. و لا أي حد يتقدم ؟؟

يا سلام ... وإشمعنى انا اللي يتعملي كشف هيئة ..؟

يعني كل الموجودين على الساحة دول إيه خبراتهم السياسية والحزبية والملوخية ؟...

طب ماهو ريجان كان ممثل ... وبوش الإبن جزماتي ... واهم اخر فل و14 ..

يا عزيزي المشكلة في وجود كوادر سياسية مؤهلة ولديها الخبرة على تسيير امور الدولة مهما تغيرت أسماء الرؤساء وهذا ما يحدث في الدول الكبرى المتسيدة للعالم ... فيروح بوش ييجي عبد الفتاح مابتفرقش .. طالما هناك سياسية واضحة وخطوط عريضة لا يستطيع الحاكم نفسه تجاوزها ...

و أيه خططك و برامجك

خطتي : 4 3 3 ... يعني خطه هجومية بحتة .. يعني املى خط النص وأهاجم بـ 3 لعيبة ..... طب اتحدى إذا سألت أسمه أيه ده نفسه أيه خططك انه يجاوبك .... اتحدى !!!!

اما برنامجي فهيكون فيجول بيسك ...

يا عم خليها على الله ....

شوف يا كودو ..... لو الشخص كان أمين مع نفسه ولديه نية الإصلاح وخدمة البلد بضمير .. صدقني الخبرات والبرامج والحاجات دي كلها ستكتسب مع مرور الوقت بالإضافة للنقطة اللي ذكرتها وهي وجود بطانة صالحة من حوله ترشده وتدله على الطريق السليم ...

زي كوندلزاريس كده وكولن باول ودونالد دوك قصدي رامسفيلد ...