لماذا لم نصل لكأس العالم؟

[حسام يوسف]

بداية أعتذر للسادة المشرفين انى عملت موضوع مستقل تانى عن ماتش مصر والغجاجر أو الهماجر

لكن انا عايز تصويت كل واحد مننا يقول رأيه

عشان ماننساش فى هوجة الهمج واللى عملوه اننا فقدنا تذكرة الوصول للمونديال

وأطلب ضم الموضوع بشكل تلقائي للموضوع الأصلي

صوتوا

وصوتوا

لم نصل لكأس العالم رغم أننا أبطال أفريقيا دورتين متتاليتين

رغم أننا هزمنا الأفيال

وقهرنا الأسود

وروضنا كل الغابة الأفريقية

الا اننا انهزمنا

ويافرحة

خدها الهمج وطاروا

التصويت متعدد

يعنى ممكن تختار اكتر من سبب فى رأيك

حتى لاننسي

من السبب فى غياب فرحتنا؟

تم تعديل 21 نوفمبر 2009 بواسطة حسام يوسف

[tantrum]

الإعلام لم يناقش ذلك

لذلك لن تجد الكثير ممن يهتم بذلك

[doha]

الإعلام لم يناقش ذلك

لذلك لن تجد الكثير ممن يهتم بذلك

يانهار ابيااااض .. وجون وجون وجووووون

في كام خيار ناقص يادكتور ..

فين الاختيار بتاع عشان المنتخب لعيبه ومدرب لعبوا حلو بس كسبهم الي بيلعب احسن منهم ..

ولا عشان بنطبطب عليهم ونجيب العيب على جمهور الخصم او حتى صاحب الارض لما ننغلب ..

ولا عشان اللعيبة شبعانه ومبيتحركوش غير لما يكون الحافز المادي اقوى من الي قبله ..

ولا عشان احنا مش فالحين في حاجه فليه دي الي هنفلح فيها ..

**********************

**********************

تم تعديل 21 نوفمبر 2009 بواسطة أبو محمد
تم حذف عبارة غير لائقة نربأ "بسيدة" محترمة أن تكتبها فى منتدى محترم

[حسام يوسف]

الإعلام لم يناقش ذلك

لذلك لن تجد الكثير ممن يهتم بذلك

يانهار ابيااااض .. وجون وجون وجووووون

في كام خيار ناقص يادكتور ..

فين الاختيار بتاع عشان المنتخب لعيبه ومدرب لعبوا حلو بس كسبهم الي بيلعب احسن منهم ..

ولا عشان بنطبطب عليهم ونجيب العيب على جمهور الخصم او حتى صاحب الارض لما ننغلب ..

ولا عشان اللعيبة شبعانه ومبيتحركوش غير لما يكون الحافز المادي اقوى من الي قبله ..

ولا عشان احنا مش فالحين في حاجه فليه دي الي هنفلح فيها ..

********************

********************

مادام اللاعبين كسبهم بتوع الجزائر اللى أحسن منهم

يبقى العيب فى لاعيبتنا ومدربهم

وبالتالى الاختيارين موجودين

عيب مدرب

وعيب لاعبين

والسلام عليكم

تم تعديل 21 نوفمبر 2009 بواسطة أبو محمد
حذف عبارة غير لائقة من الاقتباس لحذفها من الأصل

[أبو محمد]

فريق الجزائر ليس أفضل من فريق مصر .. ولكن مدرب الجزائر كان أفضل من مدرب مصر

أم محمد مالهاش فى الكورة خاااالص .. بتسألنى قرب انتهاء المباراة : هم ولادنا مش عارفين يجيبو جون ليه ؟ ..

قلتلها أصل الجزائريين متكتلين فى نص الملعب .....

قالتلى بمنتهى العفوية "السياسية" وبابتسامة من يتذكر شيئا : طيب ما دام الجزائريين متوقعين اولادنا من الشمال .. يبقى لازم اولادنا يهجموا من الشرق أو من الغرب

الكابتن حسن شحاتة كان مع المتفرجين أغلب فترات المباراة .. ينفعل مع كل هجمة لنا وكل هجمة علينا .. لم يكن متفرغا لدراسة ما يجرى فى الملعب وتغيير أسلوب اللعب فى الوقت المناسب

عادتى إنى أفرح أو ازعل بتاع ربع ساعة بالكتير بعد الماتش حسب النتيجة .. تعليق ام محمد خلانى ما ازعلش ولا خمس دقايق لأننا تذكرنا أيام الجامعة سنة 67 .. نزلنا مشوار كانت فيه شوارع اسكندرية بتفكرنى بأيام الستينات .. فاضية ورايقة .. وكنا خلاص نسينا الماتش .. وفجأة ونحن فى زيارة أقاربنا سمعنا المطرب محمد فؤاد فى برنامج القاهرة اليوم يصف ما يحدث .. وبدأت الأحزان :closedeyes:

سامحك الله يا ابو على

[شرف الدين]

بصراحة لم نصل لكأس العالم لأن منظومة الكرة في مصر لا تستحق أن تصل لكأس العالم..

الشعب المصري يستحق الفرحة ..

هذا الجيل من اللاعبين يستحق

ولكن هل منظومة الكرة في مصر تستحق

عصام الحضري عندما ترك الأهلي وذهب لسيون في سويسرا ... هل النادي الذي لم يسمع عنه أحد من قبل ...

هل خرج أحد إلى عصام ليعقله ويقول له .. مستواك هينزل مع النادي ده ؟؟

تاه الموضوع بين الأهلي والحضري ثم سافر الحضري ولعب في سيون وتدهور مستواه بدرجة هائلة لم نفق منها إلا بعد تعادل أول في القاهرة مع زامبيا .. وهزيمة ثانية في الجزائر .. كان للحضري دور كبير في حدوثهما ...

تم الانحياز إلى الاسماعيلي في قضية حسني عبد ربه .. وللأسف يا ليته حتى ظل في الإسماعيلي .. بل من أجل الطبطبة على الجميع تم ترك حسني ليذهب إلى أهلي دبي ... وذهب حسني ولم يعد.

منظومة الكرة في مصر لا تستحق ...

من كان يستحق هو الشعب المصري الطيب .. وهذا الجيل الذي نادرا ما يتكرر من اللاعبين

[مصري أصيل]

فيه سبب حضرتك نسيت تكتبه في الإختيارات و هو ان الكوره مكسب و خساره و كتير جداً شفنا فرق كبيره بتنهزم من فرق صغيره و فريق بيلعب سيء جداً بيكسب فريق بيلعب حلو جداً و عمل كل حاجه في الكوره و الكوره مش عايزه تخش جون.

قلت لكل المقربين مني بأننا سنفوز في المباراه الأولي بفارق هدفين و سنخسر في المباراه الثانيه بس ما كانش حد مصدقني

قلت ايضاً لكل من شاهد المباراه معي بضرورة احراز مصر لهدف قبل الجزائر لانها لو احرزت هدف عمرنا ما هنعوضه و لو فضلنا نلعب عشر سنين لأن الحظ في المباراه الأولي لن يتكرر و يجب الضغط عليهم من أول دقيقه حتي يتحقق هذا و لكن الاعبين سمعوا كلام بعض النقاد بعدم استعجال الفوز و ان الفوز جاي جاي و للأسف حدث نفس السيناريو الذي توقعته تماماً.

لا شك أن هناك خطأ في التشكيل من وجهة نظري المتواضعه و هو أن يلعب أحمد فتحي في اليمين و يلعب حسني عبد ربه في مكانه من أول المباراه بس مش عارف ليه هوه مصمم علي المحمدي بالشكل ده مع أني شايف انه لو جاب اي لعيب من الشارع هيلعب احسن منه يكفي أنه كان نقطة الضعف الظاهره جداً في المباراه الأخيره و جميع مباريات المنتخب الأخيره. بس كنا بندي حسن شحاته العذر لما بيلعبه أيام هوجة الإصابات بس بعد ما الكل رجع من الاصابه ايه حكمته في ان اللعيب ده يلعب بعد إكتمال التشكيل مش عارف؟

اكيد في أخطاء أخري في التشكيل و لكن ده اللي حاضرني دلوقتي.

أنا شايف حضرتك مش عاجبك أبداً حسن شحاته بس أحنا جربنا مدربين أجانب كتير جداً و لم يستطع أي مدرب أجنبي للمنتخب تحقيق نتائج كما حققها المدرب المصري طيب النهارده لو حسن شحاته مشي من البديل من وجهة نظرك. أنا فعلاً عايز أعرف مش بدافع عن حسن شحاته علي فكره.

تقبل تحياتي

[أبو محمد]

أنا شايف حضرتك مش عاجبك أبداً حسن شحاته بس أحنا جربنا مدربين أجانب كتير جداً و لم يستطع أي مدرب أجنبي للمنتخب تحقيق نتائج كما حققها المدرب المصري طيب النهارده لو حسن شحاته مشي من البديل من وجهة نظرك. أنا فعلاً عايز أعرف مش بدافع عن حسن شحاته علي فكره.

أنا لا أصدق أن الحظ بيمشى مع حسن شحاتة منذ توليه المسؤولية .. لا يمكن تحقيق النتائج التى حققها بالحظ وحده ..

أريد أن أوضح أننى حملته المسؤولية فى المباراة الأخيرة .. دا حتى ام محمد كانت عارفة اللى لازم يتعمل أمام هذا التكتل :lol: .. يبدو إن حسن شحاتة فوجئ بأنه لم يكن يلعب فى استاد القاهرة

[اغابي]

الكورة عمرها ما تزعلنا وكلنا عارفين انها لما نفوز او نخسر داه مش جديد علينا

لكن ان يروح اطفال مثال ابن محمد فؤاد يبقي قاعد على رجل ابوه وفجأه يتكسر زجاج الاتوبيس على راس الولد

ايه نفسية الاطفال اللى كانو فى الحادث داه - لو المصريين عارفين ان الموضوع بالشكل داه ما كنش واحد اخد ابنه معاه طفل يشجع

المشكلة الجزائر من زمان وهى دي طريقتها دوووووول بربر

الله يحمى مصر

[مصري أصيل]

أنا شايف حضرتك مش عاجبك أبداً حسن شحاته بس أحنا جربنا مدربين أجانب كتير جداً و لم يستطع أي مدرب أجنبي للمنتخب تحقيق نتائج كما حققها المدرب المصري طيب النهارده لو حسن شحاته مشي من البديل من وجهة نظرك. أنا فعلاً عايز أعرف مش بدافع عن حسن شحاته علي فكره.

أنا لا أصدق أن الحظ بيمشى مع حسن شحاتة منذ توليه المسؤولية .. لا يمكن تحقيق النتائج التى حققها بالحظ وحده ..

أريد أن أوضح أننى حملته المسؤولية فى المباراة الأخيرة .. دا حتى ام محمد كانت عارفة اللى لازم يتعمل أمام هذا التكتل .. يبدو إن حسن شحاتة فوجئ بأنه لم يكن يلعب فى استاد القاهرة

الفاضل أبو محمد ...

عندما تكلمت عن الحظ لم أكن أقصد أن حسن شحاته يكسب بالحظ و لكني قصدت فقط مباراة مصر و الجزائر في مصر و أن في المباراه الأخيره كان علينا أن نقوم بإحراز هدف لأن الجزائر لو أحرزت هدف فسيكون من الصعب تعويضه و ذلك كما فعلنا نحن معهم في 89 بالكربون أحرزنا فيهم هدف حسام حسن ثم دافعنا حتي آخر دقيقه .. و أن الحظ لن يساعدنا كما ساعدنا في المباره الأولي فقد كان الفريق الجزائري متكتل دفاعياً و بالرغم من ذلك أحرزنا هدفين هدف منهم من دربكه دفاعيه و الهدف الثاني لعماد متعب كان مصحوباً بالتوفيق بنسبة 99% .... و لو تلاحظ أن الفريق المصري حاول سحب الفريق الجزائري الي منتصف الملعب كثيراً و لكن اللاعبون الجزائريون كانوا مدربين بشكل جيد و من المباراه الأولي علي عدم تمكين الفريق المصري من ذلك .

فمن وجهة نظري أنه لا يستطيع فريق مهما بلغت قوته أن يتغلب علي فريق جميع أفراده يلعبون في منطقة ال 18 بتكتل دفاعي رهيب و حتي لو حاول الفريق المهاجم التسديد من خارج منطقة الجزاء فستصطدم الكره بأجساد المدافعين . و حتي لو فتحوا اللعب علي الأجناب فهو لن يفيد فالكرات العاليه يأخذها جميعاً المدافعين الجزائريين و الكرات الأرضية تحتاج لسرعة عاليه جداً في النقل غير موجوده في لاعبينا و خصوصاً المحمدي بيه و اننا بجميع الأحوال و مع هذا التكتل الدفاعي لن نستطيع أن نحرز فيهم هدف من كوره ملعوبه و لكن سيكون للحظ الدور الأكبر لإحراز هدف مع فريق متكتل دفاعياً . فإذا تكلمنا عن الحظ فقد يأتي أو لا يأتي . فكان ينبغي الا ننزل الي أرض الملعب في الشوط الأول مع هذا الكم من التراخي بل محاولة أحراز هدف قبل الجزائر كي لا يحدث هذا السيناريو المتوقع بالنسبة لي علي الأقل.

علي فكره يا أبو محمد الناس بتنتقد المدرب في جميع الأحوال و خصوصاً في حالة الخساره . فعندما لعبنا المباراه الأولي بمهاجم واحد صريح لدرجة أنه عندما أخرج عمرو زكي أشرك مكانه متعب إنتقده الجميع و قالوا أنه لعب بمهاجم واحد صريح في مباراة حياه أو موت و عندما لعب بأثنين مهاجمين صريحين و هم عمرو زكي و متعب برضه إنتقدناه و قلنا أنه إتغر و فكر المباراه سهله و نازل بأتنين مهاجمين . و أن سؤالي الأن إذا حسن شحاته مش عاجب الناس مين البديل ؟

تم تعديل 22 نوفمبر 2009 بواسطة مصري أصيل

[president]

انا شايف احنا اتغلبنا عشان ماكنش فيه توفيق فى الماتش ده.

لعبنا كان أفضل منهم بكتير . حد يتوقع ان ابو تريكه تيجيله شوطه على ال 18 ويشوطها جنب القائم ولا كورة متعب ولا كورة حسنى عبد ربه .

حتى عمر زكى جاتله كوره مظبطتش على راسه .

الجون اللى هم جابوه لو عاد الشوطه دى ميت مره عمره ماهيجيب جون .

امكانيات لعيبة الجزائر أقل من لعيبتنا بكتير . ولولا التعثر فى البدايه امام زامبيا لكان الحال مختلف تماما .

عندك حق ان حسن شحاته عليه حركات نص كم زى اصراره على المحمدى مثلا .

بس فى رأى السبب الرئيسى توفيق ربنا مكانش معانا .

أقوللك على حاجه يأخ حسام . فى ماتش 14 نوفمبر وبعد مامتعب جاب الجون والفرح الهيستيرى اللى فرحناه . ولما ضاعت كورة بركات .

اصحابى كلهم كانو فرحانين وانا كنت مدايق أوى عشان بركات ضيع الكوره . واصحابى بيطمنونى ان احنا ان شاء الله هنكسب فى السودان

رديت عليهم ساعتها وقولتلهم " انا حاسس ان ربنا هيختبرنا فى الماتش الجاى " .

وفعلا الحمد لله على كل شئ . الحمد لله قدر الله وماشاء فعل . وان شاء الله بنفس اللعيبه وحسن شحاته وقبلهم توفيق ربنا

هنكسب بطولة افريقيا الجايه .

تحياتى

[hanzalah]

أنا شايف ان حسن شحاته طالما تثائب في بداية المباراة يبقى فأل خير كبير !!!! وهذا حدث في مباراة الجزائر في أول كادر يظهر فيه !!!

المدرب الذي يجلس على الدكه يتابع المباراة بيكون حاجه من اتنين يا إما عنده ثقه جامده اوي ومستصغر المنافس

يا إما معندوش حاجه يقدمها فعلا .. و لاحتى نصيحه للاعب لا ينفذ ماتم الاتفاق عليه !!!

بصراحة

لياقة لاعبي الجزائر كانت افضل في هذه المباراة من لاعبينا

من يراجع المباراة يجد ان هناك miss-pass من احمد حسن يوازي تقريبا 90%

ابو تركيه خارج الفورمه في مباراة العودة في استاد القاهرة وفي المباراة الاخيرة بشكل واضح .. بيلعب وخايف على رجليه !!

التحام لاعبي الجزائر قوي جداً واحنا اجسام لاعبينا لا تساعدهم على ذلك

كل الكرات العالية من الاجناب من نصيب لاعبي الجزائر ومع ذلك تجد إصرار عجيب على تكرار ذلك من جانب لاعبينا

[وطني حر]

فيه سبب تاني حضرتك نسيت تكتبه في الإختيارات و هو

الاحداث اللي حصلت بعد المبارات

[الحازم حسن]

أيها المصريون .... شكراً

شكراً لأن القدر وضعنا في طريقكم

شكراً لأنكم انقذتونا من حالة غرق رياضي وصلت لـ 20 سنة ويوم

شكراً يا أسياد أفريقيا .. يا قاهري البرازيل وايطاليا .. يا قاهري دروجبا وايتو وبوفون لكن كل ده مايكلش معانا .. لو كنتوا ابطال العالم حتى مش ابطال افريقيا بس .. انتوا بالنسبة لنا فرخة بكشك

تعرفوا انه في تصفيات افريقيا خسرنا من الكونغو 3-. في الجزائر ورابح ماجر بكي في الاستديو التحليلي وقام وقال مش لاعب

تعرفوا اننا مكناش هنصعد أصلاً للتصفيات النهائية حتى آخر خمس دقايق وكانت السنغال هتصعد بدلنا

ونقسم لكم بالله .. لو كنا بنصفى مع كينيا وغينيا وزيزينيا مكناش هنصعد ولا نحلم باننا نصعد

نحمد الله ان طوق النجاة وصل وهي مصر الشقيقة .. صاحبة وقفات الجدعنة وقت الازمات

وعلى فكرة احنا ممكن نقبل الهزيمة من طوب الأرض لكن منكم لأ

نقول ايه ولا ايه .. هموماً قصدي عموماً

أيها المصريون شكراً

رسالة من الجزائر إلى المنتخب المصري