إنقاص الوزن..... تجربة ناجحة

[الأفوكاتو]

إنقاص الوزن...... تجربة ناجحة.

البعض منكم قد يتذكر أنى كتبت فى الماضى عن نوعين من أنظمة إنقاص الوزن،

الأولى: Scarsdale

" أسكارسديل," و التى تستمر لمدة أسبوعين فقط, ثم يجب إيقافها لمدة أسبوعين على الأقل, ثم إعادة إتباعها.( إذا رغبت فيها, و هى بالإنجليزية, راسلنى عن طريق الرسائل الخاصة)

الثانية: Food Combining

, وهو نظام تقسيم المواد الغذائية الى اقسام " فوود كومبينينج" , الذى يقسم الطعم الى مجموعات كالآتى:

1- مواد بروتينية

2- مواد نشوية و سكرية

3- مواد دهنية

4- خضروات و فواكه

و المواد البروتينية توجد فى :

1- اللحوم

2- السمك

3- الدواجن, مثل الدجاج و الوز, و البط

4- فى البيض

5- فى البقول( التى قد تحتوى أيضا على معض امواد النشوية)

6- اللوز و البندق و عين الجمل( المكسرات)

و المواد النشوية و السكرية تتواجد فى :

1- الخبز

2- السكر

3- الماكاررونة

4- البطاطس

5- الموز

6- البطاطا

7- البلح الرطب

8- الدقيق

9- العسل الأسود

و المواد الدهنية هى:

1- الزيوت

2- المسلى ( السمنة البلدى) و الصناعية

3- الزبدة

4- الدهون الموجودة فى جيميع أنواع اللحوم

و الفواكه و الخضروات تتضمن:

جميع الخضروات و الفواكه , التى يحتوى بعضها نشويات, و سكريات, و كثير من الفيتامينات, إذا أكلتها بدون طبخ.

و قد ظهرت بعض الكتب التى شرحت هذه الأنظمة, و قد قرأتها أنا و زوجتى الطبيبة, و جربنا سكارسديل, الذى أدى الى نتائج باهرة, و لكن عيبه أنه يتطلب أكل معين لكل يوم من أيام الأسبوع, ثم يتكرر أثناء الأسبوع الثانى.

كما جربنا النظام الثانى, أى الذى يقسم الطعام الى أقسام كما أشرت أعلاه.

و حينما جربنا النظام الثانى, حققنا نتائج جيدة, و لكن النظام كان معقدا بعض الشيئ, الى أن إضطررنا الى تخفيض وزننا بعد الأعياد, و العام الجديد, و عديد من الدعوات لأصدقائنا لتناول المشويات التى تخصصت فيها بعد تقاعدى.

و أخير توصلنا الى وصفة سهلة سريعة المفعول و ليست مُكلفة.

لمن لا يعرف شيئا عن نظام تقسيم الطعام الى مجموعات, Food Combining

اليكم شرح مبسط:

1- يجب عدم الجمع بين طعام بروتينى, و طعام نشوى

2- يمكن تناول الخضروات الغير نشوية , بأى مقدار و مع أى طعام بروتينى

3- ممكن تناول جميع الخضروات مع أى طعام نشوى

4- يمكن تناول الفواكه كوجبة مستقلة أى وقت. ( أو بين الوجبات)

و تسهيلا للممارسة, و ضعنا نظامنا الخاص وهو:

1- الأفطار يوميا..... فواكه من أى نوع, مع زبادى

2- الوجبة الثانية أو الثالثة:

3- قطعة لحم, أو سمك, أو فراخ, أو بيض اومليت, أو بقوليات, مثل العدس, أو الفول, مع أى خضار غير نشوى, أو أى سلطات, أو كليهما

4- الوجبة الثانية أو الثالثة: أى طعام نشوى, مثل الماكرونة, او البطاطس, أو الأرز, مع أى خضروات, أو سلطات, أو كليهما.

بعد إتباع هذا النظام السهل, الذى يتيح قدر كبير من المرونة, تمكنا من إنقاص الوزن بمعدل نصف كيلوجرام على الأقل فى الإسبوع ( و أحيانا كيلوجرام كامل فى الأسبوع)

, و قد تخلصنا, بدون أية مضاعفات, من 10 كيلوجرامات فى خلال ثلاثة أشهر فقط, و لم نحس بأننا حرمنا أنفسنا من أى طعام, كما أننا لم ننقص كثيرا من كميات الطعام المستهلك.

كل ذلك تم تحت الإشراف الطبى الدقيق, الذى تولته زوجتى

صدقونى..... أن هذا الرجيم يستحق التجربة.

[فــيــروز]

مفيش طيب حاجه تخلى الواحد يتخن من غير ما ياكل :P

حاجه بالعكس يعنى للتتخين "مش التدخين" قصدى للتسمين تسمين ايه دى مش بيقولوها على البنى آدمين يا فيروز اصحى امال :angry: عاوزه حاجه تخلينى اتخن من غير ماكل عشان مفيش وقت للاكل

[الأفوكاتو]

سوف أسأل زوجتى الطبيبة, و لكن الى أن يتم ذلك, أعتقد أن كثرة الغيظ تساعد على الإنفجار , و الإنفجار يكون عادة مسبوقا بزيادة فى الحجم.

و هذا يسمى" التسمين الحكومى"

:angry:

[ســيد مرزوق]

أنا جربت الريجيم الكيميائي السريع للدكتور أسامة حمدي من حوالي سنة تقريبا وخسيت 15 كيلو في أربع أسابيع بدون ممارسة رياضة , وبدون هبوط أو غثيان أو حرمان ملحوظ .... يعني باختصار لم أشعر بمشاكل سوى الحرمان من الأرز والخبز ( فيما عدا قطعة توست واحدة كل كام يوم حسب الجدول , وقد ثبت وزني لمدة طويلة بعدها ,,, وهذه الأيام أكرر الريجيم للمرة الثانية وغدا آخر يوم إن شاء الله في الأسبوع الرابع والأخير , وقد نقص وزني - بدون رياضة أيضا - عشرة كيلو بالتمام والكمال - مع بعض التجاوزات الصغيرة جدا في الجدول .

وسوف أقوم بنقل نص هذا الريجيم إن شاء الله إذا رغبتم في ذلك , لتعم الفائدة ولكني أنصح بالطبع بمراجعة ومتابعة طبية قبل وأثناء وبعد الريجيم للإطمئنان . علما بأن هناك أكثر من نوع لنفس الريجيم حسب الحالة الصحية للشخص .

ومن مميزات هذا الريجيم أنه حل عدة مشاكل في الجهاز الهضمي والتنفسي كنت أعاني منها سلفا , وذلك بشكل تلقائي بعد إنتظام مواعيد ونوعية ما آكله وتناسب كمياته مع النوعيات أيضا .

فعلى من يرغب من الأخوة والأخوات الأفاضل في الحصول على نص الريجيم بجميع أنواعه فهناك حلان , أولهما شراء الكتاب المحتوي على كل الريجيمات ( أو الأرجمة ) وهو من تأليف وإعداد الدكتور أسامة حمدي - وإسم الكتاب : الريجيم الكيميائي السريع - ريجيم 2000

ولسة شايف ملاحظة في الكتاب عن حقوق الطبع والنشر فبالتالي لن اقدر ان انشر اي نص منه ورجاء المعذرة ومحاولة شراء الكتاب فهو متوفر في المكتبات العربية على ما اعتقد .

الدكتور مصري مقيم في السعودية على ما يبدو .

أنسوا الحل التاني .... عشان حقوق النشر ....

[sos]

[ســيد مرزوق]

يا سلام عليك يا sos

أنا مش عارف أشكرك إزاي بالنيابة عن كل الأخوة السمان والأخوات السمينات الذين لم أستطع أن أقدم لهم هذا الريجيم الرائع لأني قرأت في بطن غلاف الكتاب موضوع حقوق النشر ولازم بإذن المؤلف فلم أشأ أن أقدم شيئا بدون أذن صاحبه , أما وكون الموضوع منشور بهذه الطريقة فمعناه أنه موافق وجزاه الله خيرا .

وصدقوني أنا من مؤيدي هذا الريجيم بشدة .... ببساطة .. لأني جربته بنفسي مرتين وأتى بنتيجة طيبة للغاية كما ذكرت آنفا .

أرجو من الأخوة الذين لا يعانون من أمراض الضغط أو السكر أو القلب أن يجربوا هذا النظام ويلتزموا بحذافيره تماما , ويدعون للدكتور , ثم للأخ العزيز sos , ثم للعبد لله .. لو أمكن . :rolleyes:

[الأفوكاتو]

رد سريع على سؤال الأخت فيروز, ثم تعليق سريع على الأخ إس أو إس:

الزميلة الفاضلة فيروز,

عرضت سؤالك عن زيادة الوزن ( أو السمنة) على زوجتى المؤهلة طبيا للإجابة على هذا السؤال, و كان ذلك فى حضور زائر مصرى و السيدة حرمه.

و نتيجة لذلك حصلت لك على ردين على سؤالك:

رد إنجليزى

و رد مصرى,

و اليك الردان:

1- الرد الإنجليزى: ترى زوجتى أنك إنسانة محظوظة لأنك ( كما يبدوا من السؤال) نحيفو, و كان الأحرى بك أن تحمدى الله على هذه النعمة.

و بعد هذه الخمسة حسد( حصوة فى عين الحسود) ترى زوجتى أن السمنة, أو زيادة الوزن يمكن تحقيقها بطرق صحية, و طرق غير صحية, و ضارة.

الطرق الصحية هى أن تقومى ببعض الرياضة الجسمانية المتوسطة المجهود, ثم الإلتزام بروتين أكل يتضمن كثير من الخضروات و البروتينيات, مع تركيز المجهود على الأعضاء التى يراد زيادة وزنها. مثل الجرى و المشى لزيادة حجم الساق مثلا.

الطرق الغير صحية, هى تعاطى بعض الهرمونات التى يمكن أن تزيد الوزن, و يمكن إختيار هرمونات لزيادة أجزاء معينة من الجسم لا داعى لذكرها.

كما يمكن زيادة أكل بعض الأطعمة التى تسبب السمن, مثل الدهون, و النشويات, و لا تتطلب هذه الطريقة كمية كبيرة من هذه الأطعمة, فالعبرة بالنوعو و ليس بالكمية.

و لكن كلا هاتين الوسيلتين الغير صحيتين لهما أضرار شديدة, و تنصح زوجتى بالإبتعاد عنهاو و الإقناع بالطريقة الصحية, أو الرضا بما قسم الله لك.

2- الرد المصرى:

نصحت زوجة صديقىو وهى من الوزن الأكثر من المتوسط الطريقة الغير صحية الثانية, أى طريقة أكل بعض الطعام المشهور فى فشكلة الجسم.

و من هذه الأطعمة:

1- الفطير المشلتت, و يدخل فى هذه الفصيلة البيتزا, و الكنافةو و القطايفو و كل ما هو مملوء بالنشويات و السكر و الدهون( أعداء الصحة)

2- المُغات, الذى تتناوله الأمهات اللاتى يرضعن أطفال, وهو مصنوع من بذور الحلبة.

3- المفتقة, و هى نوع من المربى المصنوعة من الحلبة أيضا, و هى تحتوى على مكسرات, سكر, و جوز الهند.

و لكن إتباع النصائح التى تدعوا الى أكل خليط من السكريات, و الدهنيات, حتى بكميات قليلة, على حساب أكل صحى متوازن, يتطلب معرفة طبيب متمكن فى علاج حالات تصلب الشرايين, و الأمراض القلبية , و أمراض المفاصل.

و تقبلى التحية.

الى الأخ إس أو إس:

عيوب بعض الوصفات أنها تحدد ماذا ناكل كل يوم, بترتيب ممل, و قد تمكنت سيادتك من الإلتزام بذلك, و لكن البعض يتضجر من هذا, فيهرب من الرجيم.

لذلك,و بالتعاون مع زوجتى الطبيبة, تمكنا من الهرب من هذا الفخ, و ذلك بإعمال النظام الكيماوى, و لكن بإعطاء الحرية فى إختيار الطعام اليومى طبقا للتركيبة الكيماوية التى شرحتها فى مداخلتى الأولى, أى جعلنا الرجيم مرنا, بحيث لا نحس بقيد أو حرمان.

شكرا لكل من شاركو و أتمنى لكم نقص( أو زيادة) الوزن كما ترغبون.

[فــيــروز]

جزيل الشكر لحضرتك و لزوجتك الفاضله على الاهتمام بالرد على سؤالى

الحقيقه انا سالت السؤال ده مش لانى نحيفه :) بالفعل كنت نحيفه و التزمت بنظام غذائى مع طبيب و ربنا فتح عليا وبقيت ارى "بضمه على الالف" بالعين المجرده وعلى راى المثل هذا من فضل ربى :P

المشكله انى الحقيقه ماقدرتش افضل للابد امشى على النظام و زهقت :rolleyes: وللاسف الشديد بطلت افطر "ودى كانت اهم حاجه فى النظام القديم" و بالتالى بقيت شويه اكون فى حاله صحيه كويسه و شويه لا .. وهو ده سبب اهتمامى بالموضوع انى باحس انه انا مفروض حتى لو مش عندى صبر اقعد فتره طويله على مائدة الطعام ابقى آكل حاجه صحيه و مغذيه بس بسرعه تعمل تاثير و دمتم .. فيا ترى فيه مثل هذا الاختراع؟

الدكتور كان نصحنى بمكمل غذائى يتحط على اللبن و طعمه الحقيقه لذيذ و جميل وفيه فيتامينات كتير كما هو مكتوب على العلبه .. يا ترى ده كويس و افضل ماشيه عليه كمساعده يعنى ولا وحش؟ هو اسمه سوستاجن "والنبى محدش يضحك :blink: "

[الأفوكاتو]

عزيزتى الأخت فيروز,

سألت لك طبيبى المقيم( زوجتى) عن السوستاجن, و أفادت بأنه يستعمل عادة لمساعدة كبار السن الذين يحتاجون الى عناصر إضافية فى الطعام, حيث أن أغلبهم لا يأكلون كثيرا.

و فهمت منها أنه لا ضرر فى تعاطى هذه المادة إذا كانت موصوفة بمعرفة طبيب درس حالة الشخص المُعالج.

و لكنها تنصح بتناول أطعمة صحية, مثل كثير من الخضراوات و الفواكه الطازجة, و اللحوم البضاء, و السمك,

و الإقلال من الدهون , و أكل مقدار معقول من البقول, كمصدر بديل للبروتين الحيوانى.

كذلك أكل المكسرات, إذا تواجدت, فهى مصدر جيد للبروتين النباتى

و الإقلال من شرب الشاى الأسود و القهوة مفيد ايضا.

بالشفاء إنشاء الله.

[فــيــروز]

ربنا يبارك لنا فيك يا اخ افوكاتو و يبارك لك فى زوجتك يا رب

فيروز wlch::

[bibo]

فيروز كتبت

وعلى راى المثل هذا من فضل ربى

الاخت الفاضله "هذا من فضل ربى" جزء من آيه قرآنيه

لذا لزم التنويه ...........وشكرا

[se_ Elsyed]

أنا جاي اعترف يأخواننا بكل صراحة ..

حد هنا بيؤمن بتناسخ الأرواح ؟ ... اهو نفس الكلام اللي قالته أختي المشرفة الخضرة فيروز ينطبق على حالتي تماماً ... وجربت السوست اللي بتقول عليها دي " سوستاجين " بس ده كان قبل ما أتجوز لدرجة أنه حسسني إن انا عيل لسه ماطفتمش وروحت راميه وماكملتش ..

- اخدت هرمونات تحت إشراف أطباء طبعاً وجسمي بقى عامل زي المنخل من كتر الحقن ... وعملت تحاليل غدة درقية وغدة فوق الكلوية والغدة اللي تحت بير السلم .. والحمد لله سليم مافيش حاجة .

- العجيب في الأمر أن بقى لي حوالي 5 سنين والميزان اللي في الحمام مابيتحركش سنتيمتر واحد وكأن الجاذبية الأرضيه جت عند العبد لله وتلاشت ..

- روحت للدكتور بتاعي من سنة وقولت له شوفلك حل عايز أتخنلي 5 ك بأي طريقة .. الراجل والله العظيم كان هايعيط وكان ناقص يقوم يخبطني سماعتين على دماغي .. ولقيته عمال يصرخ ويقولي حرام عليك .. ماتعرفش انت دكتور شاطر يخليني أخس ... آه والله العظيم ..

- المهم بعض الخبثاء خدعوني وقالولي أتجوز يا واد يا س س وهاتتخن .. قولت لهم لأ انا راجل عندي شخصية وأرفض إني أرضع الأطفال يبقى أزاي هأتخن ؟.. قالولي بس جرب .. وجربت بالفعل وتزوجت من أجل زيادة الوزن ... وبعدين ولا الهوا .... آه لو أعرف مين اللي زقني ..

- جربت الكلام الل قاله عمنا الأفوكاتو وفتحت خط ملاحي بين القاهرة والرياض لإستيراد المفتقة ..... ولا الدموع مافيش حتى زيادة فيمتو كيلو ..

- وبما إن طبيعة عملي تستلزم حضور حفلات ولقاءات في فنادق ومطاعم بشكل مستمر وأخرها أول أمبارح حضرت حفلة بناء على دعوة من سفيرسينغافورة بمناسبة اليوم الوطني ... وكلت كمية سيفود وحلويات بأفترا ( ماهو ببلاش ) .... وكأن الحاجات دي بتروح على مكان سري غير جسمي ...

- بس يبني وبينكم أخيراً أستسلمت وحمدت ربنا على ثبات الوزن ... والحمد لله الواحد بيشوف شباب في العشرينات والتلاتينيات يعملوا 120 ك قايم على رأي حشيش ومنظرهم بيصعب على الواحد ..

بس أنا أفرق عن فيروز بإني أشغل حيز من الفراغ لا بأس به يعني وزني حوالي 65 ك ( قايم برضوا ) وطولي 173 سم ( من غير كعب عالي ) lol

- بس تعرفوا هي تتوقف على قابلية الأجسام للتخن ... عندي واحد زميلي هنا أقسم بالله العظيم زي الناس اللي بنسمع عنهم في الأساطيرالإغريقية من فصيلة الديناصورات التى لم تنقرض... تعرفوا لما بنروح ناكل في KFCعلى سبيل المثال أوبن بوفيه بيعمل معدل قد أيه ....

والله العظيم 23 قطعة دجاج غير الرز والخبز وسلطة الكرنب المشهورين بيها والبيبسي يعني لو عملنا لهم إعادة تجميع يطلعوا 4 فرخات .. مرة كنا معزومين أيام العزوبية في رمضان عند واحد صاحبنا الواد ده أكل 3 ك لحمة وفرختين لوحده في سيمفونية عزف منفرد ده غير التحابيش اللي حواليهم ، ماشاء الله رب العالمين بيرفع قزازة البيبسي ام 2.25 لتر مابتنزلش إلا فاضية ... مره شرب 2 لتر حليب جمل في بوء واحد - اللي أجدع واحد فينا مابيطيقش ياخد شفطة منه لأنه تقيل وأستغفر الله العظيم تحس أنه زفر - ، من مآثره أيضاً أنه خلص على نص كرتونة بيض ني .. يكسر البيضة وهوب على النفق عدل ....

ومع كده الديناصور ده وزنه لا يزيد عن 75 ك وطوله مثلي بالظبط .... فقلوللي بقى يا متعلمين يا بتوع المدارس الأكل اللي يكفي بلد ده بيروح فين ؟

للاجابة على هذا السؤال نرجو الإتصال على زيرو 900 خمس أو ست ستات ..

[Salwa]

طريقة سهلة جدا جدا لزيادة الوزن ......

اكل الحاجات الممنوعة بالنسبة للى عاوز يقلل من وزنه ..

بمعنى ...

الاكثار من اكل الفواكه الاستوائية .....المانجو..الكيوى...الأناناس..الموز.

استعمال الزبدة بدلا من زيت الزيتون.

اكل اللحوم محمرة او مقلية وكذلك الاسماك .....والبطاطس المقلية والشيبس...

يجب ان تحتوى الوجبة على نشويات ...خبز..ارز..مكرونة../// لو عاوزين 70 طريقة لعمل المكرونة ...سهل اقولكم عليها ///.

وفيه حاجة مهمة جدا .....دى اكيدة ...

طريقة تناول افطارك .....تؤثر بالزيادة او النقصان فى تحديد الوزن ..

يعنى لو كل يوم الافطار يكون مثلا قهوة او شاى بالحليب...ومعاه كرواسون ...او باتيه ..او قطعة كيك .......زبدة ومربى .........لابد يزيد الوزن .

مثلا تناول البيض ..يكون مقلى ..مش مسلوق ........وهكذا..

حظ سعيد ...لمن يريد زيادة او تخفيض الوزن .

سلامى.

[se_ Elsyed]

طريقة سهلة جدا جدا لزيادة الوزن ......

اكل الحاجات الممنوعة بالنسبة للى عاوز يقلل من وزنه ..

بمعنى ...

الاكثار من اكل الفواكه الاستوائية .....المانجو..الكيوى...الأناناس..الموز.

استعمال الزبدة بدلا من زيت الزيتون.

اكل اللحوم محمرة او مقلية وكذلك الاسماك .....والبطاطس المقلية والشيبس...

يجب ان تحتوى الوجبة على نشويات ...خبز..ارز..مكرونة../// لو عاوزين 70 طريقة لعمل المكرونة ...سهل اقولكم عليها ///.

وفيه حاجة مهمة جدا .....دى اكيدة ...

طريقة تناول افطارك .....تؤثر بالزيادة او النقصان فى تحديد الوزن ..

يعنى لو كل يوم  الافطار يكون مثلا قهوة او شاى بالحليب...ومعاه كرواسون ...او باتيه ..او قطعة كيك .......زبدة ومربى .........لابد يزيد الوزن .

مثلا تناول البيض ..يكون مقلى ..مش مسلوق ........وهكذا..

حظ سعيد ...لمن يريد زيادة او تخفيض الوزن .

سلامى.

معليش يا مدام سلوى ماتعمليش حسابي انا طبعاً بره الموضوع ده أنا Hopless Case

مكرونة مش مكرونة والله مابتفرق معانا .... أنا ثابت وماشي على العهد ..

يالله ربنا معاكي يا فيروز

[الأفوكاتو]

الأخت الفاضلة سلوى,

طريقة زيادة الوزن التى إقترحتيها هى الطريقة التى إقترحتها زوجة صديقى المصرى, و المشار اليها فى بداية الموضوع.

هذه الطريقة, على المدى البعيد تستلزم معرفة طبيب قلب شاطر, و اسعاره معقولة, ترقبا لما سيحدث فى المستقبل.

أما بالنسبة لمن لا يزيد وزنهم مهما أكلوا, فهذا يرجع الى عامل وراثى, يساعد على حرق الأطعمة بدون زيادة فى الورزن( كفاءة الميتابوليزم)

و يعمد البعض الى إستعمال هرمونات التسميين, و لكن ذلك يتطلب أيضا معرفة حانوتى طيب و رخيص.

أدام الله عليكم الصحة و العافية, و احمدوا الله على ما أنتم عليه.

[ســيد مرزوق]

حرام عليك يا سي السيد

أنا فضلت أضحك بصوت عالي ومتواصل لما قرأت مداخلتك الظريفة جدا جدا

ويظهر إني كنت محتاج الشوية الضحك دول فعلا

أنا ضحكت أكتر لما تخيلتك حسب وصفك .. لأني كنت متصور إنك تخين زيي ... عشان أسامينا زي بعض قلت يبقى أكيد زي حالاتي ...

علما بأن أخيك العبد لله تخين شوية وباعمل اللالي عشان أخس وأبقى 70-80 كيلو بس عشان لو حبيت أتجوز كمان ألاقي واحدة توافق عليا :)

والحمد لله موضوع الريجيم الكيميائي ماشي معايا كويس وشغال

بيني وبينك .... إحمد ربنا وأشكر فضله على وزنك ده .... وما تنخورش على موضوع التخن أحسن ماتندم بعدين زي غيرك .

أشكرك على ظرفك . wlch::

[Salwa]

مساء الخير...

ياجماعة انا اقصد ...

ان الواحد يعمل عملية ...لخبطة ...لنظام حياته ..

يعنى اللى متعود على الأكل الصحى ...عاوز يزيد وزنه شويه ...

يمشى على النظام التانى مرتين فى الاسبوع ....وهكذا..

لكن ..فطير مشلتت ومفتقة ؟؟..ده أكيد بعدها فيه حجز للمستشفى ..

لكن مرة او مرتين بيتزا ...مش مشكلة .

خصوصا بالنسبة للشباب .....

عامل السن له دخل كبير وتأثير انواع الطعام على كبار السن غير تأثيره على الشباب.

طيب ايه رأيكم فى موضوع الابر الصينية ؟؟

يعنى انا اعرف ان عن طريق تنبيه بعض الاعصاب فى مكان ما عن طريق الاذن ...ممكن يساعد على ..منع التدخين ...السمنة ..النحافة ...علاج الاكتئاب ...علاج الضغط..

وازالة المياه الزائدة من الجسم / تساعد على التبول /..

وبالنسبة للسمنة والنحافة .......تستعمل ابر لمدة عشر دقائق ..مرة كل اسبوع .

مع تناول اكل صحى 100 % .........نى..مسلوق..مشوى .

وهذه غير الابر الصينية التى توضع فى كل الجسد ...هذه توضع فقط فى اعلى الاذن.

قصدى دى طريقة اكيدة ........وبرضه عن تجربة .

حظ سعيد ..

سلامى.

[فــيــروز]

س.س. طالع لى حتى فى الخسسان يا ربى :blink: مش كان كفايه عليا الاشراف :angry:

شوف بقى انا ساعة اما رحت للدكتور من سنتين كده كان وزنى 51 كجم و طولى 167 سم :o

الدكتور بص لى بفزع كده وقال لى انتى عامله كده ليه :rolleyes:

ومسك ايدى يقلب فيهم عشان يشوف راحة اليد لقاها بيضااااااا وشفتى من جوه !! ولا بتوع الصومال ياجدع :) قال ايه ده مشروع انيميا !! mf( لازم نعمل تحاليل الاول نتاكد ان الرفع ده مش مرضى وانما سببه قلة الاكل بس .. و الحمد لله طلع مفيش حاجه ..

وطبعا حط لى برنامج غذائى فيه كل حاجه قيلت هنا تقريبا بس هو مين اللى ياكل كل ده .. الموضوع بردو محتاج تمرين يا جماعه .. و الحمد لله عملت تقدم اذهل الدكتور نفسه وكان فرحان بيا قوى قوى وصارحنى فى الآخر انه الاول كان فاقد الامل انى اتخن عشان زى ما قلتم هنا فيه ناس مهما تاكل مش بتتخن عشان طبيعة جسمهم كده .. انا مشكلتى انى بازهق من القعده على الترابيزه عشان انا اكل ببطء "مش عارفه ليه" يعنى عشان كده كان طلبى حاجه تتاكل فى السريع .. بس الحمد لله على كل شئ كما قال اخونا الافوكاتو

الاخ بيبو شكرا على التوضيح الف شكر

[se_ Elsyed]

ان الواحد يعمل عملية ...لخبطة ...لنظام حياته ..

يعنى اللى متعود على الأكل الصحى ...عاوز يزيد وزنه شويه ...

يمشى على النظام التانى مرتين فى الاسبوع ....وهكذا..

مدام سلوى بأدبها المعهود مكسوفة تقول إن اللي عايز يتخن لازم " يرمرم " ودي حقيقة ، ولأني ماتعودتش أرمرم ولي نظام خاص في الأكل علشان كده مابأتخنش والمره الوحيده اللي لخبطت النظام لما كان نسيبي شغال في مصنع شكولاته فاتح جديد في السعودية وكان عمال يجرب فيه الانواع اللي بينتجوها جديد ... وتصوروا إني اكتشفت بعد كده أن كان فيه بعض الشكولاته اللي بيجيبهالي وانا بالهطها بكل طفاسة إكسبيرد .... والله العظيم زي مابقولكم كده ... وقالي كمان على حقيقة تانية مفجعة وهي مع إنهم مصنع فرنسي مشهور جداً وانواعه خطيرة ولذيذة - إسأل مجرب - إلا إن الواد قال لي إنهم بيستخدموا حليب بودرة وزبدة منتهية الصلاحية برضوا .. بل بالعكس متعاقدين مع موردين متخصصين في البضاعة المضروبة دي ..

ومع ده كله زدت ييجي 4 ك في خلال شهرين ....

فنصيحتي لأي حد عايز يتخن ... عليك وعلى الإكسبيرد ....

[أسد]

موضوع زيادة الوزن ونقصه ده موضوع معقد جداً ...

أعتقد انه له علاقة بالجينات الوراثية ...

تجربتي مع زيادة ونقصان الوزن لي فيها صولات وجولات ...

زمان .. وأنا طالب .. وحتى وصل عمري إلى 28 سنة ... كنت آكل زي الأسد ... كميات كبيرة .. لدرجة اني كنت تقريباً زي صديقك يا سي السيد ... وكان وزني لا يتحرك ولا يزيد ولا جرام ..

وفجأة أخذ وزني في الزيادة المضطردة .. وبدأت أزيد في الوزن على مدار ثلاثة أعوام بمعدل كيلو شهرياً ... فوصل وزني 120 كيلو ... وأنا طولي 175سم. يعني أصبحت تخين قوي ...

وعملت ريجيم قاسي .. ابتكرته أنا ... كنت وقتها مدخن .... فكنت أآكل وجبة واحدة يومياً ... كانت العشاء فقط ... وكنت باكل أي حاجة لحد ما أشبع ... لكن طول النهار لا أكل أي شي ... ومنعت السكر نهائياً ..

ونجحت الخطة ... ونزل وزني الي أن أصبح 80 كيلو في خلال سنة تقريباً ...

بعد كده استمر وزني كويس يتراوح بين 80 - 85 إلى أن زاد فجأة ... وأصبح 110 كيلو مرة أخرى ....

فزرت طبيب .. عمل لي برنامج غذائي .... استمريت عليه لمدة 5 شهور ... انخفض وزني إلى 83 كيلو ....

وحالياً ... مستمر على نظام غذائي صارم حتى لا يزيد وزني ... لأن حالتي أصبحت صعبة جداً ...

يعني لو أكلت لقمة زيادة ... وزني يزيد مباشرة ....

في رمضان زاد وزني 8 كيلو ... اضطريت بعد رمضان أعمل ريجيم قاسي علشان أنزل تاني ...

وهكذا .... هذه هي تجربتي المؤلمة مع زيادة الوزن ...

لكن طبعاً السن ... وعدم ممارسة الرياضة ... وطبيعة العمل عامل مؤثر جداً في الموضوع ده