إنقاص الوزن..... تجربة ناجحة

[se_ Elsyed]

في رأيي يابو الأسود أن الأشخاص الذين لا يريدون أي زيادة في وزنهم ممكن أن لا يحرموا انفسهم من أي ماكولات خاصة وده فيه نوع من انواع الذل بصراحة يعني حرام يبقى قدام الواحد جاتوهات وكيك وبسبوسة أوم علي - يا عيني عليها - ويحرم نفسه لكن وحط تحت الكلمة دي خمس ست خطوط لابد للشخص أن يكون معتدل في أكله ومايحفش ... مع ممارسة بعض الرياضات البسيطة وليكن رياضة المشي مثلاً وبكده يضمن أن جسمه مايضربش .

[se_ Elsyed]

نيجي بقى للكلام العلمية اللي بجد ، فأنا مؤمن بمقولة " ان المرء طبيب نفسه " وقد شخصت حالة ثبات الوزن اللي انا فيها لعدة أسباب :

1- أنا مابفطرش الصبح خالص .. إلا بعد ماوصل الشغل وبأخد أي حاجة خفيفة زي البسكويت مع القهوة ...

2- أنا أسرع واحد في الدنيا في الأكل بمعنى أصح بأزلط مش بأمضغ الأكل ..

3- انا عصبي وطول النهار بأكل في نفسي وزاد الطين بله إن شغلي يستلزم التعامل مع البشر فكل يوم على الأقل باعمل لي 5 أو 6 خناقات ده غير الشتيمة وفي المواسم والأعياد المعدل بيعدي 10 خناقات في اليوم...

4- لا أاكل أي شيء أبداً بين الوجبات مهما كان ....

5- إنف جداً في الاكل ( إنف يعني أليط مش مناخير ) يعني إن ماكنش الأكل اللي قدامي طازج وسخن جداً لا ألمسه ، انا شوفت ناس معايا هنا بيطلعوا الطبيخ من التلاجة وبياكلوه مباشرة !!!!! عملاً بالجملة التى تقول " من مزارعنا رأساً إليك " .. انا ولو باموت من الجوع ماعملهاش ...

6- قعدت فترة أكثر من 10 سنوات لا أكل الأرز نهائياً لسبب بسيط .. وهو إني كنت بأرجع البيت متأخر - أيام الشقاوة - فبلاقيهم أكلوا طبعاً فالطبيخ ممكن يتسخن لكني لا أاكل الأرز إلا وهو لسه مطبوخ ..

دول يمكن الـ 10 أسباب لعدم زيادة الوزن ... انا بيني وبينكم عايز أالف كتاب وأسميه " العقد النفيس في أساليب التخسيس " أو " وصايا س س للي مش عايز يبقى تخين "

[فــيــروز]

على فكره

وجبة الفطار فعلا من الحاجات المهمه جدا جدا

يعنى انا بعد ما رحت للدكتور ووصف لى النظام الغذائى وبدات افطر رحت له بعدها باربع ايام لقيتنى زدت كيلو بحاله وكان التغيير الاساسى اللى حصل عندى هو انى بقيت افطر

دلوقت طبعا رجعت تانى زى خيبتهم ومابقيتش افطر .. ودى مش نصيحه لمن يريد ان ينقص وزنه انه يبطل فطار

بيتهيالى اى وجبه اخرى يمكن التضحيه بها لكن الفطار كلا البتتتتته ..

[Scorpion]

للرفع

[حسام يوسف]

مع احترامى لكل ما قيل فى هذا الموضوع القديم-الجديد

السؤال الذى طرحة الجميع

هو:

لية ناس بتاكل جامد ومش باين عليهم اى زيادة فى الوزن؟

ولية ناس وزنها جامد مع ان اكلتها خفيفة؟

لا ننكر ان كمية الغذاء عامل هام فى تحديد وزن الشخص

ولا ننكر دور ممارسة الرياضة فى نفس الموضوع

لكن كلا من العاملين لا يتحكم وحدة فى تحديد الوزن ان كان زائدا أو أقل من المطلوب او مضبوطا

هناك عامل مهم اسمة

LIPOGENESIS

هذة الكلمة تتكون من مقطعين

LIPO =دهن

GENESIS=تكوين

يعنى عملية تكوين الدهون فى الجسم

هذة العملية نشطة فى بعض الناس

وخاملة فى البعض( المحظوظين)

طيب

لية هنا نشطة

ومع ناس تانية خاملة(زى س س)

هناك جين معين(وهنا يأتى دور الوراثة)هو المسؤول عن تنظيم الانزيمات وكل العناصر التى تعمل فى عملية تكوين الدهن أو الليبوجينيسز

أحيانا يكون هذا الجين معبرا عن نفسة بشكل قوى

فتنشط العملية

وفى بعض الناس يرثون جينا لايعبر عن نفسة

كل واحد وجينة بقى

وهذة النظرية تفسر الجزء الناقص فى دورة الوزن الصحى

الغذاء

ممارسة الرياضة

الوراثة وتأثيرها على الليبوجينيسز

يعنى محدش ييأس

ويقول دةموضوع وراثة

ومفيش فايدة

لا

فية فايدة

وعليك بالرياضةو تنظيم الاكل

لأن دول اللى فى ايدينا

أما الوراثة

والليبوجينيسز

فماباليد حيلة

الابقى لما نوصل للعلاج الجينى

وتروح للدكتور تقولة غيرى الجين الفلانى

بس دة هيبقى للأجيال الجاية

معتقدش اننا هنحصلة

ورحم الله الأفوكاتو وأسكنة فسيح جناتة

تم تعديل 30 يوليو 2008 بواسطة حسام يوسف

[doha]

تجربة الافوكاتوا تستحق الرفع ..

بالمناسبة فيروز وسين سين لو لسه عاوزين تطخنوا اعملوا عكس مااحنا الغلابة القابلين للسمنة بنعمل

بالنسبة لك ياسين سين احتمال تكون بتدخن او بتشيش وفي الحاله دي بطل ده وده هتلاقي نفسك طخنت اوتوماتيك ..

لو مبتعملش اي من المذكور اعلاه يبقى مقدامكش غير تلعب رياضه عشان تزود وزنك طالما ماشاء الله معدل الحرق عالي عندك بالشكل ده

اما بالنسبة لك يافيروز فيبدوا لي والله اعلم انك اصلا مش من هواة الاكل وفي الحاله دي انصحك بعمل كل مامن شأنه ( تكبير معدتك ) وتعويد نفسك على الاكل .. شوف ياستي

اولا خلي زجاجة العصير صديقك .. يعني طول ماانتي قاعده على الكمبيوتر حطي جنبك زجاجه عصير وافضلي اشربي فيها شويه بشويه ..

دخلي اكل على اكل .. يعني متاكليش كتير وتملي معدتك وتقعدي سنة بقى على ماتكلي تاني وانما كل ساعتين كلي حاجه ولو قضمه

ياريت تبطلي لحوم ومقليات ومسبكات وكل الاشياء صعبة الهضم دي .. خليكي في الكيك والمعجنات والنشويات والسكريات وكل مايهضم سريعا سريعا عشان ترجعي تجوعي اسرع

كل يوم الصبح خذي حبة ملتي فيتامينز فمن شأنها فتح النفس

عودي نفسك على المملحات زي المخلل والزيتون والشيبس والانشوجه والحاجات الي تفتح النفس دي

كل ماتاكلي حاجه مالحه شويه وهتلاقي نفسك هفتك على حاجه مسكرة اديها متحرميهاش شوية هتلاقي نفسك راحت تاني للمالح وهكذا هتدخل في دائرة مفرغه هتطلعي منها مكعبرة بعون الله

واشوفك الزيارة الجاية ومتنسيش تسيبي اجرة الكشف وانتي طالعه عند التومرجي

[se_ Elsyed]

بالمناسبة فيروز وسين سين لو لسه عاوزين تطخنوا اعملوا عكس مااحنا الغلابة القابلين للسمنة بنعمل

بالنسبة لك ياسين سين احتمال تكون بتدخن او بتشيش وفي الحاله دي بطل ده وده هتلاقي نفسك طخنت اوتوماتيك ..

لو مبتعملش اي من المذكور اعلاه يبقى مقدامكش غير تلعب رياضه عشان تزود وزنك طالما ماشاء الله معدل الحرق عالي عندك بالشكل ده

ولو عملت ده كله ... تفتكري هاعيش يا دكتورة ؟ :D

لا بادخن ولا بأشيش ... بس ساعات بأبص من شيش البلكونه ...

إنتي عماله ترفعي الجثث المدفونه يا ضُحى .. وأقرا الكلام اللي كنت كاتبه من 35 سنة .. وأبص لروحي فجأة .. الاقيني كبرت فاجأة وأذبهل من المفاجأة وأحس إني واحد تاني ...

خلاص يا ستي .. إحنا عدينا مع اللي عدوا في عصر الأنفتاح ..

أنا ربنا فتحها عليه دلوقت وبقيت وزن خفيف المتوسط ... ووصلت 77 ك وعمال ألم في نفسي وأدور على حاجه تخسسني

فيروز ... طمنيني عليكي .. مش زيدتي لك بتاع تُمن رومي .. قصدي تُمن كيلو ولا لسه سوفيفه ؟

[bentmasria]

الموضوع ده فاكراه اول مرة قريته كنت سمينة وبلعب فى ال 75 كيلو ودلوقتى محتاجاه وزنى بقى 61 كيلو والهيموجلوبين 7.6 وقربت العب فى دائرة المجاعة انا طولى 175 سم يعنى بقيت اشبه الهياكل العظمية

دخلت فى شوية مشاكل صحية كده ربنا يعفى عن الجميع المهم عاوزة اتخن بجد

السؤال الى من نجح فى زيادة وزنه انا محتاجالى ستة سبعة كيلو عندكم حل

دلونى انا بقيت رفيعة قوى وموش قادرة استعيد وزنى بطلت قهوة وباكل اكل صحى واحيانا ارز والسكر مظبوط على طول اعمل ايه

بجد

[pink rose]

الموضوع ده فاكراه اول مرة قريته كنت سمينة وبلعب فى ال 75 كيلو ودلوقتى محتاجاه وزنى بقى 61 كيلو والهيموجلوبين 7.6 وقربت العب فى دائرة المجاعة انا طولى 175 سم يعنى بقيت اشبه الهياكل العظمية

دخلت فى شوية مشاكل صحية كده ربنا يعفى عن الجميع المهم عاوزة اتخن بجد

السؤال الى من نجح فى زيادة وزنه انا محتاجالى ستة سبعة كيلو عندكم حل

دلونى انا بقيت رفيعة قوى وموش قادرة استعيد وزنى بطلت قهوة وباكل اكل صحى واحيانا ارز والسكر مظبوط على طول اعمل ايه

بجد

كلمة احيانا رز دي وجعتلي قلبي و الله :happy:

انا ما اقدرش اعيش من غير رز زي الصينين كده يموتوا لو ما اكلوش رز

المهم عليكي و على العصاير و الحلويات اشي كيك و اشي تورتات و جاتوهات :lol:

هاتلاقي الستة سبعه كيلو جم هوااااااااااااااااا

:lol:

[bentmasria]

السكر والجاتوهات والحبشتكانات ممنوعين علشان السكر انا اصلى عجوزة شوية بس شكرا لاهتمامك يا ريمو ربنا حيدبرها ان شاء الله

[فــيــروز]

ياااااااااااااه .. :lol:

كانت أيّام ..

يا ريتها دامت نعمة الرُفع :P

ه أنا بقيت ولا الكرُنبه :D لأ قصدى يعنى تخنت للدرجه التى تستدعى إنّى أخِس شويه عشان أبقى مظبوطه :) ما هو أصل الموضوع بقاله ست سنين مش معقوله هافضل 51 كيلو متر من ساعتها !! و بعدين الجلوس للمكتب بالساعات حاجه تخلّى الواحد يتخن حتى لو بياكل سندوتشات ميّه ساقعه بس ..

الأخت / بنت مصريه سلامتك ألف سلامه

سهل أوى إن الواحد يتخن على فكره خاصة لو معندوش مشاكل طبيه تمنع اكتسابه وزن إضافى ..

من الحاجات اللىّ كان الدكتور بينصحنى بيها أمّا عرف إنّى بازهق من طول الجلوس للمائده : شُرب شوب مانجو كل يوم !! أو عصير قصب .. دول فتّاكين أكيد .. زى ما قلت من ست سنين :D وجبة الإفطار فعلا مهمّه جدّا و بتساعد فى اكتساب الوزن بسرعه .. العسل بالطحينه .. يا سلام دول بامووووووووت فيهم و مش باشبع منهم خالص .. bv:- هاحاول أفتكر أصل خلاص أنا دلوقت بقيت محتاجه أخِس و لازم أنسى المواضيع اللىّ بتتخن على السيره دى :happy:

[bentmasria]

ميرسى لاهتمامك وردك يا فيروز انا كنت مظبوطة جدا ثم تم سحلى بواسطة الاطباء ولأمراض اللى بتحط فجأة على الواحد المهم بتعدى كلها بس عشان ابقى تمام لازم ازيد شوية والله بفطر بس موش عسل بطحينة قوى اوى ده بفطر ياستى جبنة قريش وزيتون وفول فى الخلاط وعصير برتقال تقريبا اجبارى كل يوم ولان معدتى حجمها تقلص مابقدرش غير اتعشى حاجة مشوية وبس وطبعا ده ما بيتخنش بس انا ببقى شبعانة لما هفطس

ماما عاوزة تسقينى كبده فى كوبايات وانا سورى ما بحبهاش بتقف ف زورى بجد

شوفوا لى اكل ارحم شوية وبيتخن شوية انا كل اللى محتاجاه 5 او 6 كيلو وابقى المرأة الحديدية ههههههههههههههه او زى قبل كم شهر كده

ربنا يخليكى يا فيروز ححاول اجرب وصفتك وربنا يستر هههههه

يسعد ايامكم يارب

[eastsoul]

عايزة تتخني ... عليكي بالحلاوة الطحينية