وبعدين في المخدماتيه عائشة عبد الهادي ؟

[se_ Elsyed]

أقسم بالله لو الست دي بتنفذ مخططات يهودية لأذلالنا .. ما كانتش عملت كده ....

فبعد هوجه تصدير خادمات للسعودية والدنيا اتقلبت عليها لإنها أنسانه مش محترمه وما تعرفش يعني ايه كرامه

آه بمناسبة الكرامة

لم أُعلق عما حدث في المؤتمر الاخير للحزن الوطني واللي كدبت عينيه وقلت لأ لأ ... انا شوفت غلط أو النضاره مغبشه ومش شايف

فبعد أنتهاء الجلسة الختامية ... جريت عيشه المخدماتيه وراء سوزان مبارك .. وأتكلمت معاها شويه .. وفجآه راحت موطيه على إديها بايساها ...

آه والله

خدوا الدليل أهو

http://www.youtube.com/watch?v=DpUXdyvutmE

أتفهم واحد يبوس إيد واحده ست كنوع من الاتيكيت يعني

لكن وزيرة تبوس ايد مرات الريس ليه ؟.

طبعاً عيشه سمعت عن التغيير الوزاري الوشيك ... فقالت لسوزان : احب على ايدك يا ستو هانم .. انا عندي عيال عاوزه اربيهم ... والنبي سيبيني شويه في الوزارة لحد ما أجهزهم واجيب لكل عيل فيلا في بورتو مارينا

المهم

خرجت علينا عيشه المخدماتيه بفكرة .. تصدير عاملات في الكويت

طبعاً مش هايبقوا عاملات شحن وتفريغ ... لإننا عارفين العاملات بيعملوا فين

أنا عاوز أفهم ...

يعني هي خلصت تشغيل الشباب والرجالة .... وبقى عندها وقت فراغ .. فقالت بدل ما أقعد اعمل شيرز ولا بلوفر لجوزي .. أما اقوم أشغل الحريم والفتيات في بلاد بره ؟

وبعدين إذا كانت المرآة هي شغلها الشاغل .. ليه ما فكرتش في حملة المؤهلات العليا ولا الممرضات مثلاً

بجد شيء قذر ومقزز

[hamoudi]

آه بمناسبة الكرامة

لم أُعلق عما حدث في المؤتمر الاخير للحزن الوطني واللي كدبت عينيه وقلت لأ لأ ... انا شوفت غلط أو النضاره مغبشه ومش شايف

فبعد أنتهاء الجلسة الختامية ... جريت عيشه المخدماتيه وراء سوزان مبارك .. وأتكلمت معاها شويه .. وفجآه راحت موطيه على إديها بايساها ...

آه والله

خدوا الدليل أهو

http://www.youtube.com/watch?v=DpUXdyvutmE

لكن وزيرة تبوس ايد مرات الريس ليه ؟.

بجد شيء قذر ومقزز

الاخ الفاضل se elsayed

يبدو انك حتى الان لم تدرك انها عزبه

ولتسمح لي ان اكون مرشدك لاوضح لك كيف تدار العزب

العزبه لها مالك ( مايطلقون عليه صاحب العزبه علشان كده ممكن واحد يقول لواحد هي عزبة ابوك اى مكان يستطيع ان يفعل فيه مايحلو له وفقا لقوانينه الخاصه ) ويعمل لديه افقر الفلاحين بالسخره

وكلما زاد الفلاح من تقبيل الايادي ومسح الجوخ يصبح من المقربين وتزداد سطوته ومسئولياته ولكنها تزداد على اقرانه السابقين وفي نفس الوقت يزداد ذله الى مالك العزبه حتى يحتفظ بمكانته التى حصل عليها ضد اقرانه

ياترى ممكن نضيف مسابقه صغيره بعد التعريفات السابقه

حد يقدر يحل اللغز ويرد على 3 اسئله

الاول

من هي العزبه هنا؟؟

الثاني

من مالك العزبه؟؟

الثالث

من هو الفلاح الحقير( مع كامل احترامي للمهنه فانا اتكلم عن اشخاص معينين ) اللذي قبل بمسح الجوخ في مقابل ان يجور على اقرانه ( على فكره هو مش فلاح واحد دول اكثر من فلاح )؟؟

اما عن الجوايز هي الذهاب الى العزبه اياها

والحياه بها

تم تعديل 29 نوفمبر 2009 بواسطة hamoudi

[الباشمهندس ياسر]

اللمخدماتيه غالبا بيبقوا ناس محترمين

الازمة بقي ف القوادين

تخيل يا عمنا ... البنات اللي طالعة الخليج دي لوحدها ... رايحها تحفظهم القرءان

حاجة منتهي الوساخة و بلد ما بقاش فيها حد بيفهم ف الاصول

[esocial]

الكرامة فوق كل شىء اذا كانت شخصية فى مثل حجمها تبوس ايد وتهين نفسها بالطريقة السيئة دى علشان تكون من المقربين يبقى الناس العادية تعمل ايه بصراحة احنا كمان اتهانا .

[اميره]

ايه الاهانه وقلة الاحترام دى

بجد اهانه ليها كشخص فى هذا المستوى رغم ان بستغرب ازاى واحده معها اعداديه وتكون وزيره يعنى البلد خلاص مفيهاش اصحاب تعليم عالى

وايضا اهانه لينا كشعب مستسلم لما يحدث بيه اخرس عن الافعال الغريبه وراضى بالأمر الواقع ولا حتى بيعترض

ايه الى حصل للشعب ده اين الكرامه ليه ساكتين عن حقوقنا وهى بسيطه جدا

يعنى من ابسط الحقوق لما تشغلو شخص فى منصب مهم زى ده شغلو حد على الاقل متعلم

احنا مش بنطلب منكم ان احنا نختاره مع ان ده من حقنا

لكن متنازلين عنه بس تحترمو نا بقا شويه حرام الضغط والافترى ده

لاحول ولا قوة الا بالله

[ذهبية]

يعنى انتم وجعتوا دماغنا بكرامة المصرى و نجيب حقنا محدش بدوس كرامتنا دة احنا هنعمل و نعمل

فى الاخر نشغل بناتنا خادمات فى الدول العربية بعد ما كنا بنبعت مدرسين و اطباء و مهندسين و استاذة جامعة

الان بنصدر خادمات عيب عيب قوىىىىىى

[Mercedes]

السلام عليكم و رحمة الله و بركاته

و كل عام و أنتم بخير بمناسبة عيد الأضحى المبارك

أنا كان عندى رأى بسيط و هو أن احنا كمصريين و أغلبنا متعلمين و معانا شهادات عالية أننا نرسل ايميلات الى مجلس الوزراء للمطالبة بعزل هده الوزيرة من منصبها لأن ما فعلته هو تصرف مشين فيه أقصى درجات النفاق و التزلف و الرياء و الحقارة

و مش معقول أن الوزيرة دى بتبوس ايد سوزان مبارك عشان تجيب علاوة للموظفين و العمال , دى أكيد عملت كدة للحصول على مصلحة شخصية ليها و كمان مصلحة غير شرعية

و بالتالى أنا بدعو السادة اللى فى المنتدى أن أى حد يفتح جروب على الفيس بوك للمطالبة باقالة الوزيرة لان انا مابعرفش افتح جروبات على الفيس بوك

بس مبدئيا لازم نحرص كلنا على ايصال أصواتنا الى مجلس الوزراء سواء بالايميل أو بالفاكسات او بالرسايل العادية و أن الموضوع دة يكون من كل الناس المصريين اللى جوة مصر و اللى بره مصر

هما أكيد مش هيشيلوا الوزيرة ولا حاجة بس عشان تكون عبرة ليها و لكل الوزراء المنافقين التانيين أنهم ياخدوا بالهم من تصرفاتهم شويه , على الأقل أمامنا لأننا مش شويه عيال برياله و مش هناخد بالنا , اللى حصل دة فيه استخفاف بال 80 مليون اللى شافوا اللقطة دى , لكن فى الضلمة بعيد عننا هما حررين يعملوا مع بعض اللى هم عاوزينه!!!!!!!!!!!!! ;)

http://www.egypt.gov.eg/arabic/guide/directory.aspx

الموقع دة فيه اللى هو المفروض بيانات الاتصال يرئاسة الوزراء

و ياريت ناخد الموضوع بجد و نتعب بس فى أن كل واحد فينا يرسل ايميل مرة واحدة كل يوم سبت عشان بتوع رئاسة الوزرا يصحوا يوم الاحد يلاقوا كم هائل من الايميلات فى خلقتهم على غيار الريق الصبح - يا ساتر يا رب

و الله ولى التوفيق

[ssmaly]

فاقد الشىء لا يعطيه

الفضائيات وجعت دمغنا عن الكرامة المصرية المهدرة فى الخرطوم وعايزين حقنا من الجزائر والحكومة فيها وزيرة بلا كرامة!!!!!

لاتستبعدوا ان يكون هناك وزاراء غيرها بيوسوا الأقدام علشان مصلحة شخصية وممكن تكون اقدام الصهاينة الأعداء

المشكلة من يبوس الايدى يحافظ على مكانه ويصبح مسنود ويطالب الاخرون (اللى اقل منه )ان يبوسوا يده وقدمه كمان

شوفوا كام مليون واحد عمال يبوس الايادى

بوس ايد الكبير --يرضى عنك وبيك يطير

يبوس ايدك الصغير --وتصبح انت الكبير

هل كل كبير --كان ببوس الأيداى خبير؟؟؟؟؟

وعجبى!!!!!

[اغابي]

يا جماعة انا مش مصدقة

طب ممكن فيه بينهم ود معين اصلها مشنكلة ايديها فى ايد سوزان مبارك

وبعدين لا كده ما يصحش انا اسمع عن الوزيرة دي انها كويسة وبتوفر فرص شغل كتير

بس برضوه اى وزير باشارة من اى فرد فى عائلة الرئيس ممكن يرجع راعى غنم فى ليلة

طب ممكن تكون خايفة بس كده غلط انا دماغى وقفت مش قادرة اصدق حاجة زي كده

دا امير الكويت وامير السعودية فى قرارات صارمة منعو منعا باتا اللى يسلم عليهم يبوس ايديهم من اى حد سواء الشعب او الوزراء

وقال امير السعودية لا يجوز الانحناء وتقبيل الايدي الا للوالدين فقط والانحناء والسجود لله عز وجل وعندهم حق واهم امراء وبيفكرو ازاى واحنا المفروض دولة وانتخابات ونختارهم احنا مش نبوس على الايادي داه هما يبوسو على ايدينا علشان ننتخبهم

سيبونى افكر في الفيديو واخد راى جوزى واديلكم وجه نظرنا لحسن دماغى شتت منى - -مش مصدقة المنظر الجديد داه .

:hearts: :unsure: :blush2:

[mromar]

والله انا بصراحة متضايق جدا من الموضوع ده

أحنا مش نقصيين سوء سمعة كفاية علينا اللي أحنا فيه من المهانة في الخليج مش ناقصة خادمات مصريات كمان يخلونا مططيين راسنا هنا في الخليج

أظن دلوقتي عرفتو السبب ليه أحنا متهنيين من كل العرب لأ والناس بتتهم الجزائريين أنهم بيتريقو علينا هو مش أحنا اللي جيبينه لنفسينا ونرجع نقول العرب نسيو مين مصر

ربنا يرحنا من عصر إذلال كرامة المصريين اللي مش هينتهي ده

[se_ Elsyed]

يا جماعة انا مش مصدقة

طب ممكن فيه بينهم ود معين اصلها مشنكلة ايديها فى ايد سوزان مبارك

يا مدام أغابي ...

هاتي لي مثل حضرتك شوفتيه أو سمعتي عنه في ألف ليلة وليلة حتى عن أمرأتان بينهما ود وواحده قبلت إيد الأخرى في أي مناسبة ؟

إلا لو كانت مريضه مثلاً على فراش الموت وصديقتها باست إيديها عشان تقول لها " إن شالله العدوين واللي يكرهوكي ... هاتسيبينا لمين يا فوزيه ؟ "

وهل الود ده يسمح لصديقتها سوزان إنها تقبل إيدها ؟

يعني ممكن نلاقي ماما سوزان تمسك إيد عيشه ولا تيته امل عثمان وتبوسها ؟

إيه البلد الغريبة دي ؟

يا مدام أغابي

امثال الست عيشة المخدماتية هم نتاج تربية العسكر من 60 سنة ...

إنتي عارفه إن الست دي من ايام عبد الناصر ؟

أه والله ما عرفش كانت عضوه في الأتحاد الأشتراكي الوحودي التقدمي وشوية حاجات كده فوق بعض ...

يعني عندها كل المقومات المطلوبة عشان تكون وزيرة .... ومنها :

1- الجهل التام

2- الولاء التام الذي يصل إلى تقبيل الأيادي وأشياء أخرى ...

3- تكبير الدماغ عالاخر مهما حصل ...

يا ست الكل دي ما نطقتش بكلمة عن ما يحدث للناس بتوعنا في الجزائر واللي يقدروا بالألاف وبيعملوا في شركات محترمه هناك

ولما الجزائر هددت إنها مش هاتمنح تصاريح عمل للمصريين ... هزت طولها وعرضها وطلعت قالت : بكره الموضوع يهدا والأمور ترجع كمان كانت ...

اللي عاوز أعرفه ....

وهارجع للسؤال تاني : حد سمعها بتتكلم عن فتح أسواق عمل للعمالة المدربة مثلاً ؟

وليه مركزه على الخادمات بس ؟

يخرب بيت كده

[dawn walker]

استغفر الله العظيم

الملكية انتهت منذ 60 عاما

[capitshino]

مقال رائع للاستاذ علاء الاسوانى بخصوص هذا الموضوع

-------------------------------------------

فن إرضاء الرئيس

لم أكن لأصدق هذه الواقعة لولا أن شاهدتها بنفسى على شريط تسجيل لقناة المحور:

أثناء مؤتمر الحزب الوطنى الأخير.. وصلت السيدة سوزان مبارك الى القاعة، يحيط بها أفراد الحراسة، وهرع الوزراء والمسئولون لتحيتها ثم اقتربت منها عائشة عبدالهادى وزيرة القوى العاملة وأخذت تلاحقها، كانت الوزيرة عائشة تتحدث فى موضوع بدا أنه لا يحظى باهتمام السيدة سوزان لكنها ظلت تنصت للوزيرة وعلى وجهها ابتسامة مهذبة.

ثم فجأة، أمام الحاضرين وعدسات المصورين وكاميرات التليفزيون، انحنت الوزيرة عائشة عبدالهادى على يد السيدة سوزان مبارك وأخذت تقبلها. بدا المشهد غريبا للغاية..

إن تقبيل الرجل ليد المرأة عادة فرنسية غير منتشرة فى مصر.. المصريون قد يقبلون يد الأم أو الأب تعبيرا عن الاحترام العميق وفيما عدا ذلك، فإن تقبيل الأيدى يعتبر فى بلادنا أمرا منافيا للكرامة وعزة النفس..

فى عام 1950 كان حزب الوفد قد أنهكه وجوده خارج السلطة لعدة أعوام، وعندما تولى الوفد تشكيل الحكومة الجديدة التقى زعيم الوفد مصطفى النحاس بالملك فاروق وانحنى ليقبل يده وكان ذلك تصرفا مشينا ظل يلاحق مصطفى النحاس حتى وفاته. ما الذى يدفع وزيرة فى الدولة إلى الانحناء وتقبيل الأيدى؟.

الحق أن عائشة عبدالهادى لم تحلم يوما بتولى الوزارة لسبب بسيط أنها لم تكمل تعليمها الأساسى، أى أنها فشلت فى الحصول على الشهادة الإعدادية ونجحت فى أن تكون وزيرة.. فى بلد يضم عشرات الآلاف من حملة الدكتوراه..

إن الوزيرة عائشة تدرك أن توليها للوزارة لا يعود الى كفاءتها أو قدرتها على العمل وإنما يرجع فقط الى رضا الرئيس وأسرته عنها، ومن أجل الاحتفاظ بالرضا الرئاسى فإنها على أتم استعداد لأن تفعل أى شىء بما فى ذلك تقبيل أيدى الرئيس وقرينته وولديه.. السؤال: هل يمكن أن نتوقع من الوزيرة عائشة أن تدافع عن كرامة المصريين وحقوقهم كما يقتضى منصبها كوزيرة للقوى العاملة؟. الإجابة بالنفى القاطع، إن آلاف المصريين الذين يعملون فى دول الخليج يتعرضون لنهب مستحقاتهم على يد الكفيل، ويعانون من المعاملة السيئة المهينة وكثيرا ما يتم حبسهم وجلدهم ظلما.. وهم ينتظرون من حكومة بلادهم أن تدافع عن حقوقهم لكن السيدة عائشة، التى تقبل الأيدى، لا تفعل لهم شيئا..

بل على العكس، فقد أعلنت عائشة عبدالهادى منذ عامين أنها تعاقدت مع السلطات السعودية من أجل توريد آلاف الخادمات المصريات ليعملن فى بيوت السعوديين.. وقد أصابت هذه الصفقة الشاذة المصريين بالصدمة،

أولا لأن فى مصر مئات الآلاف من حملة المؤهلات العليا الذين هم أولى بالتعاقد على العمل فى الخليج .. ثانيا لأن إرسال المصريات للعمل كخادمات يتنافى مع أبسط قواعد الكرامة الوطنية ويعرضهن إلى المهانة والإذلال والاعتداءات الجنسية..

ثالثا: لأن مصريات كثيرات من هؤلاء يحملن مؤهلات متوسطة وعالية لكنهن اضطررن تحت ضغط الفقر والبطالة إلى الموافقة على العمل كخادمات.. رابعا: لأن السلطات السعودية التى تتشدد فى كل ما يخص الدين وتشترط وجود رجل محرم مع السيدات فى رحلات الحج والعمرة،

فعلت العكس هذه المرة وطلبت أن تذهب الخادمات المصريات الى السعودية وحدهن بدون مرافق. وقد دافعت الوزيرة عائشة عن صفقة الخادمات التى عقدتها وقالت إن الخدمة فى البيوت لا تعيب أحدا ونصحت معارضيها بأن يتخلصوا من الحساسيات التى لا معنى لها..

وأذكر أن مثقفا مصريا هو الدكتور إيمان يحيى قرر آنذاك أن يرد على الوزيرة بطريقة عملية ومبتكرة.. فقام بنشر الإعلان التالى فى الصفحة الأولى من جريدة الكرامة.. «مطلوب خادمة سعودية مقيمة لأسرة مصرية ميسورة.. مرتب مجز»..

ثم ترك رقم تليفونه للاتصال.. وعلى مدى أسابيع، انهالت عليه اللعنات والشتائم من عشرات السعوديين الذين اعتبروا الإعلان مهينا لبلادهم.. وقد اضطرت عائشة الى التراجع عن إرسال الخادمات الى السعودية تحت ضغط الرأى العام.. لكنها عادت وأعلنت فى الشهر الماضى أنها عقدت اتفاقا جديدا لإرسال الخادمات المصريات الى الكويت هذه المرة..

ولا أفهم ما سر إصرار بعض المسئولين فى الخليج على استقدام الخادمات من مصر بدلا من الأطباء والمهندسين والمهنيين المصريين الأكفاء الذين يعود إليهم الفضل فى النهضة التى يشهدها الخليج الآن؟..

هل يحقق استعمال المصريين كخدم لذة معينة لدى بعض الخليجيين؟ ولا أفهم أيضا سر ولع هذه الوزيرة الغريبة بتوريد الخادمات لبلاد الخليج؟.. لكنى أفهم أن فاقد الشىء لا يعطيه وأن من تسمح لنفسها بتقبيل أيدى الناس على الملأ لا يمكن أن تدافع عن كرامة أحد..

إن واقعة تقبيل الوزيرة عائشة ليد السيدة سوزان مبارك تعكس علاقة الوزراء وكبار المسئولين بالرئيس مبارك وأسرته.. فى نفس التسجيل الذى شاهدته لقناة المحور، يظهر الدكتور على الدين هلال، مسئول الإعلام فى الحزب الوطنى وأستاذ العلوم السياسية وقد وقع فى ورطة طريفة..

فقد شاء حظه أن يجد نفسه واقفا فى طريق السيدة سوزان مبارك، فارتبك بشدة ولم يدر ماذا يفعل: فهو يخشى أن يفسر إعطاء ظهره للسيدة الأولى وكأنه استهانة بمكانتها فتكون العاقبة وخيمة، كما أنه لا يستطيع أن يغامر بالتوجه إليها والحديث معها مادامت لم تطلب منه ذلك.. ولو أنه قرر الابتعاد فجأة عن مسار السيدة سوزان قد يبدو ذلك أيضا تصرفا لا يليق..

ماذا يفعل إذن؟ بدا المسئول الكبير مضطربا ومشتت الذهن وظل يتأرجح فى مكانه حتى جاء إليه ضابط حراسة وأزاحه بعيدا حتى تتقدم السيدة سوزان مبارك فى طريقها، هذا الخضوع التام للرئيس وأسرته سمة مشتركة للوزراء جميعا فى مصر.

ولعلنا نذكر فى العام الماضى كيف قام جمال مبارك بتوبيخ وزير التعليم العالى هانى هلال على الملأ فى احتفال للجامعة الأمريكية ومنعه من الجلوس بجواره على المنصة ثم أشار إليه بيده أن ينصرف فورا، لم يغضب الوزير هانى هلال آنذاك لتوبيخه علنا وإنما أصابه الجزع فقط لأن جمال مبارك غاضب عليه..

فى الدول الديمقراطية، يصل الوزير الى منصبه بواسطة انتخابات نزيهة، وهو يدين بالفضل للناخبين ويبذل كل جهده لكى يحتفظ بثقتهم وأصواتهم.

وإذا اختلف الوزير هناك مع رئيس الدولة فإنه يقدم استقالته فورا لأنه يعلم أنه سيعود الى منصبه إذا فاز فى الانتخابات المقبلة.. أما فى النظام الاستبدادى فإن رأى الناس لا يهم الوزير إطلاقا، لأنه يتولى الوزارة ليس بسبب كفاءته أو عمله وإنما بفضل ولائه للرئيس.

وبالتالى فإن مستقبله السياسى كله معلق بكلمة واحدة من سيادة الرئيس. لن تجد فى مصر أبدا وزيرا يناقش الرئيس مبارك فيما يقوله أو يختلف معه أو حتى يتحفظ على كلمة واحدة قالها. كلهم يمجدون الرئيس ويشيدون بعبقريته وإنجازاته العظيمة التى لا نراها نحن المصريين ولا نشعر بها، (لأنها ببساطة غير موجودة).. رأيت من سنوات مسئولا اقتصاديا بارزا فى الدولة يؤكد على شاشة التليفزيون أن الرئيس مبارك بالرغم من كونه لم يدرس الاقتصاد إلا أن سيادته يتميز «بالإلهام الاقتصادى» الذى يجعله يتوصل الى أفكار اقتصادية جبارة ومبهرة تستعصى على أساتذة الاقتصاد أنفسهم(!).

إن طريقة تولى المناصب فى مصر تستبعد تلقائيا أصحاب الكفاءات والشخصيات القيادية والذين يتمتعون بعزة النفس ويحرصون على كرامتهم.. بينما تمنح المناصب عادة للفاشلين والأتباع والمنافقين والمتعاونين مع أجهزة الأمن.. وقد أدى ذلك الى تدهور الأحوال فى مصر حتى وصلت الى الحضيض فى معظم المجالات.

إن اللحظة التى انحنت فيها عائشة عبدالهادى لتقبل يد السيدة سوزان مبارك، تحمل فى معناها التفسير الكامل لضياع حقوق المصريين داخل الوطن وخارجه. عندما يتم إصلاح ديمقراطى حقيقى، سوف تأتى الانتخابات بمسئولين أكفاء ومحترمين لا يقبلون الأيدى ولا ينافقون الرئيس وأسرته، عندئذ فقط سوف تنهض مصر.

-------------------------------------------------

منقول الشروق المصرية http://www.shorouknews.com/Columns/Column.aspx?id=158410

[الباشمهندس ياسر]

وليه مركزه على الخادمات بس ؟

يخرب بيت كده

سقف التفكير بتاعها كده يا صاحبي

الدماغ مش واصلة لاكتر من كده

[om marawan]

طيب خلينا نقول انها بتعتبرها زى والدتها

أعتقد لو نشرنا الخبر بالتبرير ده مش هتقعد الوزيرة فى مكانها يومين :rolleyes:

مجرد اقتراح

[mandoo]

الوزيرة دى مؤهلها واطى ... بس هى ست مكافحة ... وحصلت على الثانوية من منازلهم وبكده يبقى مؤهلها متوسط .... وعلشان هى ست عنيدة ومكافحة دخلت الجامعة وحصلت على مؤهل عالى .... ولكونها من أصحاب المهارات الخاصة حصلت على الماجستير ..... وناوية تدخل على الدكتوراه ... وبعدين مش كل واحد فينا كان بيبوس إيد أمه وأبوه وناس مننا كتيييييير كانت بتبوس رجليهم كمان .... وبعدين سوزان مبارك مش برده أم المصريييين ... يبقى عادى لما الست عيشة تبوس إيديها وتبوس التراب اللى بتمشى عليه ... أصل الست عيشة محرومة من عاطفة الأمومة وعاوزة تدخل الجنة ... مش عارف إحنا ليه الحقد مالى قلوبنا ... بطلوا نفسنه بقى وبلاش غيره ... ياساتر دنتوا شعب غرييييب :rolleyes:

[ابو حودة]

طيب خلينا نقول انها بتعتبرها زى والدتها

أعتقد لو نشرنا الخبر بالتبرير ده مش هتقعد الوزيرة فى مكانها يومين :rolleyes:

مجرد اقتراح

اقتراح خبيث جدا

صحيح كيد نسا

[السويفي]

السلام عليكم:

عرفتوا ليه ان مصدقتش الهوجه الاعلاميه والحكوميه عن الدفاع عن كرامه المصرين .....وان الامر لا يعدو سوى مكسب سياسي في تهيج الناس

وكل ذلك مكتوب في تحليل ما حدث في كل الصحف الاجنبيه ....