يا ترى عندي أنفلونزا خنازير ولا أنفلونزا كتاكيت ؟

[se_ Elsyed]

عادي يعني ...

ما كل الناس بيجيلها أنفلونزا

ما بتفرقش بقى اول الشتا أو اخرها لكن الكل بيقع تحت مقصلة البرد او الانفلونزا

خصوصاً وإن الجو في الرياض فجآه قلب .. وبقى برد جداً ... وشويه مطر على خفيف كده

دي تجربتي الشخصية

- رابع يوم العيد .... ذهبت إلى مكه بسيارتي أنا وأخويا .. صد رد كده ... لإن زوج أخوتي جاي من اوروبا يحج وقولنا عيب قوي الراجل ييجي عندنا وما نروحش نسلم عليه ... بالرغم من إن المسافه بيننا وبين مكه 850 ك وبالرغم من قسوة الطقس هذه الايام وما اخبيش عليكو ... كنت خايف جداً من الطريق خصوصاً بعد كارثة تسونامي جده والمآسى والخساير اللي حصلت وقلت لو في حاجه حصلت هارجع تاني ومش هاكمل ...

المهم الحمد لله تحركنا في الصباح وقطعنا الطريق في 7 ساعات ... ووصلنا على العصر كده وإذ بالطرق الموصلة للحرم مغلقه تماماً وزحام رهيب لإن الناس كلها خلاص راجعه من منى وهاتستقر في مكه لحين الرجوع إلى اوطناهم

والحمد لله كنت عامل حسابي ولم أخلع كمامه الوجه طوال السويعات التي قضيتها هناك ...

الغريب بقى إن كل الناس ولا في دماغها بالرغم من حلالات الكحه والارهاق والبرد اللي إنت شايف الناس فيها من حواليك بعد أنقضاء موسم الحج

المهم قعدت حوالي 5 ساعات وعدت مره ثانية

الحمد لله وصلنا بالسلامه والأمور تمام

تاني يوم يا أفاضل حسيت بهجمه انفلونزية شرسه .. لدرجة إني كنت شامم ريحة الأنفلونزا في مناخيري

لم أنزعج الحمد لله لأنها لم تكن مصحوبه بحرارة أو كحه أو ما إلى ذلك

صداع رهيب بس

وتكسير في جسمي

فحرصت برضوا على أرتداء الكمامه في البيت .. وعلى المكوث في غرفه بمفردي - عزل يعني هههه -

وعلى اخذ البنادول وأي برشام للبرد .. وعلى أحتساء المشروبات الساخنه اليانسون بقى والحاجات دي .. وكمان الطعام المسلوق الخفيف ... والراحه طبعاً

وقلت لو تطورت الحاله .. يبقى يومين كده وهاروح المستشفى

لكن الحمد لله ... التزمت الراحة لمدة 3 أيام ... والموضوع عدى على خير

-----------

ياريت بقى أسمع تجربة حد جاله خنزير أصلي يعني من المتوصي عليه :)

لأ بجد والله ... ملاحظ إن الناس بتتكسف او بتقول لأ يا عم أسكت أحسن بدل ما الناس يتتريقوا عليه ..

طب ليه ؟

هي دي حاجة تكسف أو تخجل ؟

[لولا]

انفلونزا كتاكيت طبعا مفيش كلام .. مش كل الحجاج مطعمين اجبارى ضد انفلونزا الخنازير :)

يارب بس متكونش عديت حد من الحجاج يا ابو الأسيان :P

حمدالله على السلامة :blink:

---

اجابه للسؤال بقى

ملاحظ إن الناس بتتكسف او بتقول لأ يا عم أسكت أحسن بدل ما الناس يتتريقوا عليه ..

طب ليه ؟

هي دي حاجة تكسف أو تخجل ؟

بص يا سيدى هى المشكله مش حرج وكسوف

المشكله زى ما انا شايفه ان فى ناس عندها وسواس عالى جداااااااااااا

بتتعامل مع المريض واهله بطريقه مستفزه فعلا.

يعنى عندى فى الشغل وحده بنتها جاتلها الإنفلونزا دى تقريبا مقالتش لحد رغم ان البنت خفت وبقت زى الفل

والسبب كان ان عندنا زميلة تانيه فى المكتب شكاكه جدا ولو جتلها كحة او برد حتقول د عدوى انفلونزا الخنازير جابتها الزميلة الأولى للمكتب

الإحتياط ساعات كتير فى موضوع العدوى بيوصل لحد مزعج ومهين للطرف المريض واللى كان مريض واهل المريض .

[بركة]

ألف سلامة ليك يا سي السيد و حمدلله على السلامة من مكة

مش كل الحجاج أخدوا التطعيم

ولا انفلوانزا خنازير ولا غيره :blink:

خللي الطابق مستووووور

وربنا يسلمنا جميعا

وبالنسبة لانفلوانزا الخنازير انا كل اللي اعرفهم جاتلهم الخنازير وكله عدى وبسلام والحمدلله

هي راحة ومخفضات حرارة ويانسون و مشروبات سخنة كتير وربنا بيكرم في يومين تلاتة بالكتير بيقوموا زي الفل

دا حتى دكتورة الاطفال بتاعة ولادي جات لابنها وعلى ما دوروا على تاميفلو صلاحيته سارية كان ربنا شفا ابنها

بالمخفضات ومضاد حيوي و الراحة واليانسون ..

وربنا يسلّم الكل يارب :)

[أسد]

شوف ياسي السيد ..

منذ شهر ونصف بالتمام والكمال .. حدثت في منزلي العامر إصابتين بأنفلونزا الخنازير ..

إبني وعمره 8 سنوات .. والعبد لله ..

الأعراض كانت عبارة عن رشح .. كحه .. بس رخمة شوية .. وحرارة مرتفعة جداً .. بتوصل 40 ..

الحمد لله .. من أول يوم ظهرت الأعراض .. وكانت الأعراض أشد على إبني .. ذهبت به للطبيب .. عملنا تحليل .. طلع إيجابي ..

بدأت تظهر علي الأعراض .. بدأنا أنا وهو العلاج فوراً بالتاميفلو ..

ومضاد حيوي .. وخافض حرارة ... باراسيتمول .. ولكن كان إبني بياخد بعض الأوقات تحاميل فولتارين لأن حرارته كانت ترتفع لدرجة كبيرة ..

البداية كانت الأحد عصراً .. يوم الثلاثاء مساءً .. كانت الأعراض إختفت تماماً من كلينا .. أكملنا العلاج .. وكله أصبح تمام ..

من في المنزل .. أخذوا جميعاً تاميفلو بناء على نصيحة الطبيب .. باعتباهم مخالطين للحالة ..

العدوى جاءت من أحد مصدرين ..

الأول أنني كنت في ألمانيا وكنت قد عدت قبل ظهور الأعراض بتسعة أيام .. وهذا إحتمال ضعيف

الثاني .. جاءت من أصدقاء إبني .. أو أحدهم .. لأنه كان في حفل عيد ميلاد أحد أصدقاؤه من الجيران .. وكل من كان في هذا الحفل كان قد أصيب ..كلهم بدون إستثناء .. وكان المجمع الذي أسكن فيه عبارة عن بؤرة مركزة للمرض ..

بعد أسبوع كان كل شئ تمام والحمد لله ..

النصائح ..

عدم الفزع .. هذا أولاً ..

الإهتمام بالراحة وشرب السوائل ..

البدء ف تعاطي الدواء فوراً ..

المتابعة مع الطبيب ..

الإنتباه الشديد من الكحه .. والغنتباه لعدم حدوث إلتهاب رئوي .. والمتابعة الطبية ..

وحمد لله على السلامة

[hazemtara]

الفاضل سي السيد بغض النظر عن نوع الأنفلونزا هل هى خنازير ولا كتاكيت ولا بتاعت السنة الجاية وعلينا خير (انفلونزا الكلاب ) ،،،،،والخير كتير يعنى،،،، :lol:

كل أنواع الأنفلونزا بغض النظر عن نوعها أهم حاجة فيها الراحة التامة فى البيت وأخذ سوئل دافئة والعلاج المناسب من أدوية مُخفضة للحرارة زى الباراسيتامول مع الحرص على تناول البرتقال والليمون وان يظل الإنسان فى البيت بمعزل عن الأخرين حتى لا يُسبب إنتقال العدوى إليهم وخلاص؟؟؟!!!!

بعض الدراسات الحديثة تُشكك فى جدوى علاج tamflue فى السيطرة على أنفلونزا الخنازيرولهذا لا يجب التعامل مع الأنفلونزا كما ذكرت سابقاً ،،الراحة التامة فى البيت وأخذ السوائل الدافئة وعلاج بسيط ومُتابعة ومُراجعة الطبيب فى حال لا قدر الله إرتفعت الحرارة بشدة.

حيث أنة من السهولة جداً على فيروس الأنفلونزا أن يتحور لنوع أخر أو سُلالة جديدة ولهذا فى أوقات كثيرة يكون اللقاح أو العلاج عديم الفائدة.

[بنت الاصول]

سؤال هام

ليه حالات الوفيات كترت اوى

ليه الستات بالتحديد اكثر عرضة للوفاة

محدش يقولى امراض مزمنة ومعرفش ايه

ده كلام وزير الصحة عشان يسكت بيه الناس

بس بجد سؤالى ده محيرنى

قبل ما تظهر حالات الوفيت دى كلها

كان فى اصابات كتيرة اوى بالفلونزا الخنازير وبيخفو عادى جدا

ليه دلوقتى بقى المرض ده مميت

انا من الناس اللى مصابة اصلا بالوسواس القهرى الفظييييييييع

كنت متفقة مع جوزى اننا نجيب طفل تانى

ودلوقتى تراجعت عن فكرتى تماما خوفا من المرض

لانى سمعت ان الحوامل بيموتو

الله المستعان

انا بعمل المستحيل عشان احمى بنتى واحمى نفسى من الفلونزا الخنازير

وربنا يتولانا برحمته