كندا... بداية ونهاية

[ehabtaher]

كله يلبس تقيل

[ehabtaher]

مع الاحترام لصاحب الصوره (صعيدى فى مونتريال)

بس لازم اجيبها

every one start packing

[Dr Remon]

مع الاحترام لصاحب الصوره (صعيدى فى مونتريال)

بس لازم اجيبها

every one start packing

هاهاهاهاهاهااه.... ملعوبة.. :lol:

[اسكندرانيةكنداوية]

حمد الله على السلامة يا بشمهندس إيهاب نورت المنتدى بوجودك و بصورك الرائعة يللا هل من مزيد شعلل المنافسة و متعونا بالصور

[صيدلى كندى]

صور ممتازة وربنا يبارك ويهنى اللى وصل وعقبال المنتظرين جميعا وانا منهم ان شاء الله فى انتظار المزيد من حرب الصور وكمان الخواطر والانطباعات والمميزات والعيوب ..........اصل احنا جدعان اوى وما بننسوش حاجة ..........اسكندرانى بقى

[ehabtaher]

الله يخليك يا ريمون

انا شخصيا عند الصوره احسن من مقاله صفحتين

وممكن الموقع ده يكون مرجع عن السياحه فى كندا

واللى بيحببنا فيها

[Dr Remon]

الله يخليك يا ريمون

انا شخصيا عند الصوره احسن من مقاله صفحتين

وممكن الموقع ده يكون مرجع عن السياحه فى كندا

واللى بيحببنا فيها

انا شايف ان الحكومة الكندية المفروض تدفع فلوس للناس الي بتعملهم دعاية بالصور هنا lmo:

دة يمكن هما معندهمش صور بالحلاوة (او بالمربة) دى لبلدهم :lol: :lol: :sad:

[znaty]

يفني صاحب الخط ........ويبقي ابد الدهر ما خطت يداه

فلا تخط بيمينك شيئا ..الا ما يسعدك يوم القيامة ان تراه

اخواني الاعزاء

اتفسحنا

ولعبنا

واتفرجنا

نتكلم في الجد بأة

الحلقة السادسة

انطباعات

كنت ناوي اقسمها ايجابية وسلبية ..بس بصراحة ..وبعد تفكير..قررت اسيبها مجرد انطباعات ..وانتوا بقة ..كل واحد يشوفها من وجهة نظره هو

كمان احب اوضح انها مجرد انطباعات ..شخصية ..قاصرة ..ممكن صح وممكن غلط ..ونتيجة تجربة تكاد لا تذكر ..مجرد 14 يوم لا اكثر ..وطبعا دي موش مدة كافية ..حتى ليا ..اني اتاكد اذا كانت انطباعاتي ثابتة والا ممكن تتغير

بسم الله:

النظام

طبعا انتوا موش محتاجين مني دليل ولا كلام ولا انا هاضيف جديد عالموضوع دة ..الموضوع باين موش محتاج دليل ..بس الملاحظ جدا في الموضوع دة انك بمجرد قعدتك هناك شوية ..خلاص بتتطبع وبتتعلم النظام بشكل مبالغ فيه

مثلا السلالم الكهربا ..هناك وانت على السلم الكهربا لو هاتقف عليه وتنتظر يوصل ..لازم تقف يمين وتسيب الشمال للناس المستعجلة ..حاجة تنقط يعني ..ولو وقفت في النص والا شمال انت انتهكت قواعد اللياقة والادب بشكل يخللي شكلك وحش جدا ..فكروني فيلم احمد حلمي زكي شان لما كان بيقلب نور للحرامي وهو نازل من عالسلم

المهم لما رجعت السعودية لقيت نفسي بلاوعي لازم اخد يمين على السلم علشان المقابل

-المرور فظيع ..القانون يطبق بالحرف بلا تهاون .. تسيب مسافة ثابته بينك وبين اللي قدامك جوة البلد وعلى الطريق بتتساب بالمللي

كل حاجة بطابور ..متهيالي جوة البت بيخشوا الحمام بالطوابير بردة ..وبدون زحام كل واحد واقف في مكانه وبهدوء

علشان تعدي الشارع لازم من عند الاشارة وتنتظرها ..مافيش حاجة اسمها تعدي من النص دي مطلقا

في النهاية هاترجع من هناك منظم جدا وبشكل هايدشك شخصيا

احترام الانسان

موش قصدي بالموضوع احترام الاديان او العقائد ..الموضوع دة مفروغ منه واتكلمت عنه قبل كدة ..بالدليل والبرهان ..وترونتو بالذات علشان هيا اللي شفتها هي مثال نموذجي للمساواة وعدم العنصرية من أي نوع

بس انا قصدي ان الانسان غالي اوي هناك وليه قيمته ..مجرد الشك في أي حاجة ممكن تأثر على سلامة الانسان هناك تبقي جريمة فيدرالية ..مجرد اتصالك بالشرطة او شكواك من أي حاجة الاستجابة فورية

مع الوقت ..هايتربي جواك وجوا ولادك احساس بقيمة حقك ..وهاتتعلم انك تطالب بيه بمنتهي الثقة والقوة ..هتلاقي نفسك اساسا ماتقدرش تفرط في حقوقك بعد كدة ..حتى لو كان شعارك في الحياة الطيب احسن

البشاشة والود

الابتسامة هناك تقدر جدا ..والناس بتساعدك وبتعرض المساعده بشكل غير عادي

اذكر مثلا انه مافيش مرة وقفت على ناصية وفتحت الخريطة علشان ادور على عنوان او احدد اتجاه ..الا لما فجأة اتزرع جنبي واحد يقوللي نفس الكلمة ..شكلك بتدور على عنوان ..ممكن اساعدك ؟؟بابتسامة عريضة

وكل الطبقات ..الحركة دي عرضها عليا من اول ناس شكلهم موظفين ذو شان ولغاية ستات عواجيز واخيرا واحد بينضف الشارع

الابتسامة هناك موش يفلوس ..والود عالي جدا ..مع ان احترام خصوصيات الغير وزي مايقولوا يور برايفيت اريا محترمة تماما ..بس زي ماتحس كدة كانك الناس بتتلكك علشان تنتهك هذة الخصوصة وندردش شوية بقى ؟؟

انتوا تعرفوا ان لغاية دلوقتي موظفة البنك بتعتلنا ايميلات تسال علينا ؟؟امبارح بعتت ايميل تحكيلنا عن التلج وتقولنا انتوا فلتوا بجلدكم ؟؟ تحس كدة كانهم ناس نفسها تتصاحب وتتكلم ..بس دة طبعا يتوقف على الاصول ..دي كانت فلبينية الاصل ..ممكن ناس تانية من اصول بيضا ماتلاقيش منها الود دة

الدقة البالغة

الحكومة هناك وكذلك جميع المؤسسات تقريبا بتبدا تعاملك بثقة كبيرة ..يعني أي حاجة هاتقولها اثناء تعاملك معاهم مصدق تماما ..كانه دستور ..بس لو تضاربت أي معلومات بتقولها او غيرت كلامك لاي سبب من الاسباب ..تتحول الثقة دي الى شك رهيب مبالغ فيه

قصدي انك ممكن بحكم العادة يعني ..تقول كلام عايم او لا تتحري الدقة فيه ..باعتبار مثلا ان الصورة موش واضحة حاليا او بمنتهي البساطة ( ماخدتش بالك ) ..لا ...مافيش الكلام دة هناك

ماشيين بمبدا ( وما يلفظ من قول الا لديه رقيب عتيد ) ..علم نفسك الدقة البالغة في كل حاجة ..الكلمة ..المواعيد ..الموقف ..ماتسيبش حاجة للظروف ..لما يتقالك 8.30 تبقي 8.30 والا هتلاقي نفسك وحدك اللي متاخر وهايتبصلك باستهجان شديد

تعرفوا ان من ضمن الحاجات اللي بتتاخد في الاعتبار عدد المرات اللي غيرت فيها سكنك ؟؟طب ليه بتتنقل كتير ؟؟ انت بتاع مشاكل ؟؟ تعرف انك لا يحق لك باي حال من الاحوال فسخ أي عقد مهما كان بسيط ..حتى عقد مع شركة موبايل او حتى اهيف من كدة ؟؟العقد هناك دستور ...والدستور في كندا مقدس

لذلك اللي بيفكر في لعبة انه ممكن ياخد الجنسية وهو في الخليج والا في بلده دي لا انصح بيها مطلقا ..خصوصا بعد الاخوة اللبنانيين ما اتفضحوا في حرب 2006

اول ما بيروت اتضربت ..جري مئات الالاف من اللبنانيين الكنديين اللي عايشين في بيروت جريوا على سفارة كندا وقالوا احنا رعايا كنديين رجعونا كندا

ياولاد الذينااااا؟؟

لا ومابنشوفش وشوش اهاليكم الا لو واحدة بتولد والا حد بتعالج ؟ وعلى حساب الدولة ؟؟يعني على حساب دافعي الضرائب اللي عايشين هناك؟

منتهي قلة الادب يعني

من ساعتها والحكومة الكندية في قمة الشك من أي حد وبتشدد جدا في كل اجرائتها وبتتحقق مرة وانين وتلاتة

الخلاصة :تحروا الدقة الدقة الدقة وطبعا الصدق

بلد غالية غالية غالية

انا موش هاتكلم عن تحويل العملة من ريال او جنية الى دولار ودي اللي هاتقسم وسطك طبعا بالذات لو انت بتعمل لاندنج وراجع

يعني لما تشتري ازازة ماية بدولارين ونص يعني 10 ريال تقريبا يعني 15 جنيه دة يبقي استهبال يعني

بس هانقول لا ..دولار يعني جنيه او ريال ..قيس على البلد نفسها مع متوسط الدخل والحياة هناك

من الناحية دي ..كندا بلد مستغلة بجميع المقاييس ..الهوا اللي بتتنفسه هناك بفلوس

ازازة المياة اللي بتشتريها من السعودية بريال واحد او من مصر بجنيه ونص باين ..بتشتريها من كندا ب 2.5 دولار وبعدين الطع ضريبة

البيببسي ابو ريال في السعودية هناك ب 2.75 والطع ضريبة وخلافه

الباركينج اللي في السعودية بترمي العربية في أي حتة وتمشي هناك النص ساعة تبدا في المناطق الغير مزدحمة ب دولارين وتنتهي في الداون تاون ل 6 دولار وبالليلة لغاية الصبح توصل 12 دولار

وياويلك يا سواد ليلك لو عملت تيكت باركينج ب ساعة ومصلحتك خدت ساعة وربع وشافك شرطة ؟؟

المواصلات غالية موت بجميع انواعها ..صاب واي واتوبيس والتاكسي خراب بيوت وانتهائا بعربيتك ما بين تامين وبنزين تقريبا بدولار وصيانة يا قلبي لا تحزن

المشتروات نفسها ..كل حاجة عليها ضريبة قاصمة للظهر ..وانت بتشتري دماغك مابتحسبش الضريبة ..تيجي تحاسب تجيلك سكتة قلبية لما تفاجئ بقيمة الفاتورة بعد الضرائب

تتكلم بفلوس ..تستقبل بفلوس ..تهرش بفلوس ..تركن بفلوس ..تطلع بفلوس ...وعليها ضرائب كمان

احب اوضح اني هنا موش بقارن بين كندا وبين أي بلد ..انا بس باقر حقائق

تعرفوا؟؟

وانا بادور على البروفيشنال انجنير اللي بتدي التراخيص للمهندسين ..رحت بالخطا لجمعية تانية خاصة بالمهندسين

المهم السكرتارية اللي هناك فجاة كدة بدات تدردش معانا ..من اصول هندية وعاشت عمرها كله تقريبا في ابو ظبي

المهم سالتنا انتوا لسة جداد ..قلنالها بقالنا 12 يوم هنا وراجعين تاني السعودية

قالتلني يبقي قدامكم 3 سنين حد اقصي وتيجوا هنا

قلتلها اه

قالتلي حوشوا كل مليم هناك ..هاتحتاجوه اوي اوي هنا ..كل مليم هاتصرفوه بره كندا هاتندموا عليه جوا كندا وخصوصا في فترة البحث عن عمل اللي في الغالب لن تقل عن 6 شهور الى سنة

لما تيجوا هنا ..هاتعرفوا انكم في كندا عايشين في حلقة مفرغة من الفواتير الفواتير ثم الفواتير ..ضرائب وفواتير

انت فاكرين يعني ان التعليم المجاني دة والعلاج المجاني دة ( طبعا الكشف بس الدوا على حساب سعادتك طبعا ) وقروض الويل فاير والاو ساب وغيره ببلاش ؟

ماهو هايجيبوه من الضرائب طبعا

يعني اللي هاتاخدة باليمين هاتدفعة بالشمال سعادتك

انا حسبت قيمة الضرائب اللي انات دفعتها للحكومة الكندية في اسبوعين بس لقيتها بتاع - 800 دولارالى 1000 دولار ..تصدقوا دي ؟؟

قلنالها ربنا يطمنك ياختي .زقلتلها طب وجيتوا هنا ليه يعني ؟؟قالتلي علشان الباسبور طبعا

انتوا كمان عندكم مبارك ؟؟ ( في عقلي طبعا )

الخلاصة

كنا فاكرين ان الشهر هناك ممكن يكلف لاسرة مستقرة وفي سكن متوسط بحوالي 1000 دولار شهريا والاسرة مكونة من 2 الى 3 هاتبقي اجمالي التكلفة في حدود 2500 دولار شهريا

بس من غير ماطول عليكم

اعمل حسابك لو اسرتك 3 علشان تعيش كويس انك هاتصرف من 3500 الى اربعة على اقل تقدير شهريا ..واحسب كمان بقة مدي صعوبة الحصول على عمل في مجالك في خلال سنة علشان تعرف تعمل حسابك في خلال ايامك الحالية وفترة ال 3 سنين المهلة المتاحة للحفاظ على البي ار

كندا بلد جد موش لعب

بصوا يا اخوانا ..الانطباع دة خدتوا من مقابلاتي مع ناس كتير قابلتهم هناك ..عرب وغير عرب ..خدتها كمان حتى من وشوش الناس في الصاب اوي ساعة الراش ساعة خروجهم من العمل او مرواحهم الصباح

دلع الخليج خلاااااص بح

هناك شغل بجد والمنافسة ناااار ..مابين صينيين وايطاليين واوروبيين وكوريين وهنود وغيره وغيره

أي دلع او تهاون يبقي فايرد على طول ...الشغل هناك تعب بجد واستمرارية تطوير نفسك

وطبعا لما تتعب هتلاقي ..بس المهم تلاقي الفرصة وتلاقي اللي يثق فيك اصلا ويشغلك

ودة يرجعنا تاني لموضوع الثقة بس دة هانتكلم عنه في نقطة لوحدها علشان هيا فعلا مهمة

حاجات مقابل حاجات

صحيح ان في كندا حاجات حلوة كتير بنكتسبها ..واخلاق عالية جدا نفتقدها في بلادنا حاليا

بس للاسف قصادها بنفقد حاجات مهمة اوي كتير

مثلا

اكيد اكيد مستواك الديني وعلاقتك بربنا بتنزل اوي اوي هناك

طبيعي اني اسمع ناس هاتقول ليه يعني ؟؟مارب هنا رب هناك والمهم هو قلبك .زوفيه مساجد ومراكز اسلامية كتير

انا هاشرحلك

صحيح المساجد والمراكز الإسلامية هناك كتير ..بس تسمح تقوللي هاتلاقي وقت منين تروح هناك ؟؟يادوبك صلاة العيد دة لو عرفت

هاتروح تصللي الجمعه ازاي وانت في الشغل خصوصا لو كان شغلك تاف وبعيد أي مركز اسلامي ومواعيده لا تسمح لك بالتوجه للصلاة ؟

ياتري كام صلاة جماعة هاتقدر تحافظ عليها

تقدر تقوللي هاتعرف تغض بصرك هناك ازاي بسهولة ؟؟ عارف ان هناك التحرش يبدا من النظر وممكن تتحاكم فيها ..بس النظرة اللي بيحاسب عليها رب العالمين موش النظرة اللي بيحاسب عليها القانون الكندي ..ااقل بكتيييير

انا شفت منظرين واحد في ايتون سنتر وواحد في الصاب واي ..في 14 يوم بس وكنا شتا كمان :lol: بين بوي وجيرل فريندز..لو ربع اللي شفته دة حصل في مصر ..فيها سنة الى 3 سنين سجن فعل فاضح في الطريق العام

وذنب ورا ذنب ورا ذنب القلوب تتلون وتبعد شوية شوية ( كلا بل ران على قلوبهم بما كانوا يكسبون ) والعياذ بالله

انا موش باقول الكلام ده علشان اعقدكم والا اقول ماتهاجروش لاااااااااااا ياريت تفهموا بين السطور

لازم تنتبه وتحارب علشان تحافظ على دينك ودين عيالك واهلك زي مابتحارب علشان اكل عيشك هناك ان لم يكن اكتر

قابلت ناس كتير هناك اشتكت جدا من النقطة دي

تعرفوا ؟

فيه مسجد جنبنا في السعودية ..فيه مؤذن عقدني في حياتي ..صوته بشع ..كنت دايما باقول لما اسمعه يا ابني اللي مسكك الميكرفون دة ظلمك وظلمنا

لما سمعته اول ماوصلت البيت جسمي اتكهرب وكنت خلاص هادمع ..كانني سامع كروان ..يااااه ..دة انت واحشني اوي اوي ..والا احلى لما تسمعها من كل حتة وكل مكان في نفس الوقت

اول صلاة جمعه صليتها بعد مارجعت اتكهربت لما وقفنا صف وبدانا نصلي بعد الخطبة

الله اكبر الله اكبر جميلة اوي ..بس موش هاتحس بيها الا لما تروح هناك

انا للاسف ..واشهد الله انها موش مجاهرة بالمعصية بس انا بالفت انتباهكم ..ياما كنت باصلي الاربع صلوات مع بعض مرة واحدة ..والصبح مرة واحدة ..بعد ماكانت معظم الصلوات في المسجد ..

موش عارف جايز علشان كنت موش مستقر في عمل او بيت وباصلي قصر ..جايز الوضع يفرق لما تستقر هناك وتنظم حياتك؟؟؟

موش عارف؟؟؟

بس زي ماقلتلكم في الاول ..دي مجرد انطباعات

نفس الكلام بالنسبة لاخوانا المسيحيين

المسيحيين عندنا ناس ملتزمة بدينها موش علمانيين زي معظم الغرب ( موش وقت مناقشة المعني الصريح للعلمانية الوقت ..انتوا فاهميين قصدي !!)

المسيحي المصري ملتزم بدينه لا يقبل بمنطق البوي فريند ولا الجيرل الفريند ولا السخرية من الغيبيات زي الجنة والنار ويوم الحساب والكلام دة

واكيد اننا كلنا بنتشارك نفس المخاوف على ولادنا وتربيتهم في وسط المجتمعات الغربية المتحررة من كل العقائد والاصول اللي اتربينا عليها في بلادنا

الخلاصة في النقطة دي تاني

انا موش باكرهكم في الهجرة لا ..وجودنا هناك برده مهم اوي اوي اوي ..مين اللي يوضح للغرب الاسلام الصحيح والسلوك المعتدل العاقل غيرنا ؟؟مين اللي ممكن ياثر على الراي العام الغربي بالايجاب ناحية العرب والمسلمين هناك غير تجمع كبير متعاون مترابط ومعتدل وفاهم دينه المتسامح المتعايش اللي بيحترم جميع الاديان والاعراق

من غيرنا مافيش غير وجهة نظر التكفيريين والقاعدة والامتزمتين واعمالهم المشينة اللي هاتوسعها وتاكدها الاعلام الصهيوني هناك طبعا

بس دة جرس انذار لا اكثر ..خد بالك من دينك ..وممكن اوي بس بكثيير من الاهتمام والحرص

فذكر فان الذكري تنفع المؤمنين

كندا عايزة بلان

بصوا يا اخوانا

كلمة حكمة سمعتها من اخونا سامح هناك ..واكدهالنا مرارا وتكرار قبل كدة اخونا المهندس ياسر

كندا عاوزة بلان

معناها

هاتخش كندا بصردك كدة ..هاتتلب هاتتلب

اربع حاجات لازم يكونوا معاك قبل ماتفكر تاخد قرار الانتقال والاستقرار هناك

قبل ماتقفل عليك الحنفية في الخليج او في مصر او في أي مكان عمل ليك وتبدا تفتح البلاعة في كندا

1- فلوس ( موش ااقل من 40 الى 50 الف دولار )

2- نيتورك ( معارف وعلاقات )

3- تاهيل علمي كندي او تغيير كارير بالكامل

4- لغة انجليزية فلوينت في الاربع مهارات بشكل اكبر بكتير من اللعب بتاع الايلتس دة

نبدا بقة نحلل النقط دي ونفهم

1- الفلوس احنا ناقشناها قبل كدة وشرحتلكم البلد دي غالية قد ايه ...بعض الناس بتقولك ماشي ممكن تعتمد على الكاجوال وورك لغاية ماتخلص دراستك او معادلتك

ماشي .زبس خد في بالك ان حتى الكاجوال وورك بيطلب في احيان كتيرة جدا خبرة كندية

تعرفوا حتى تيم هورتونز بتاع الكوفي والدونات عاوز خبرة كندية ..وطبعا لغة ..وعارفين بيدي كام ؟؟ 9.75 دولار في الساعة

ومعظم الكاجوال وورك دة اسعارة مابين 10 الى 12 دولار في الساعة يعني 80 في اليوم يعني 400 في الاسبوع يعني 1600 في الشهر يعني مايكلش عيش

دة لو فرضنا انهم هايشغلوك فول تايم موش بارت تايم

ودة لو فرضنا انك نفسيا هاتقدر تتكيف مع التحول الرهيب في حياتك من مدير او مهندس او طبيب او صيدلي الى بياع سوبر ماركت او واحد بينضف ازاز في محل

مع التاكيد ان الوظائف دي هناك لا ينظر اليها باحتقار ابدا وان كل الناس بتعاملك باحترام شديد وفعلا موش هاتشعر باي نوع من الاهانه ابدا ..دي ناس محترمة وفعلا بلاد محترمة ..بس دي حاجة نفسية جواك انت

طبعا انت ممكن تعتمد على اعانة الاطفال كمان في اقصي حالاتها 350 دولار للطفل بس ماتنساش انها بتتاخر علبال ما تتصرف وكمان ماتنساش مصاريفك بتكتر كل ماعيلتك بتكبر

كمان من الخطط الحلوة هناك انك تضرب عصفورين بحجر واحد

بعد ماتحدد اتجاهك ..سواء معادلة ..او تغيير كارير محتاج كورس سنة او ماشابه ..او انك تختار وظيفة في مجالك بس درجة اقل وبالتالي معادلة اسهل زي د تهامي او م ياسر

أي حالة من دول كدة كدة هاتحتاج دراسة هناك

يبقي تختار كورس يضمن لك قرض الاو ساب انه يدفعلك تمن الكورس وجزء من مصاريف الحياة هناك

لان بعض الكورسات لا يتتضمنها قرض الاو ساب

خدوا بالكم ان قرض الاو ساب غير قرض الويل فاير

واللي بياخد ده مايخدش التاني

بالطريقة دي ممكن قرض الاوساب يوفرلك 1000 دولار في الشهر بس كمان هايلزمك بمذاكرة

شوف بقي انت ينطبق عليك ايه من دول وجمع بأه

يعني اوساب 1000

ومثلا قول اعانة اطفال 1000

يبقي انت عايزلك كمان 2000 على اقصي تقدير علشان تامن نفسك

يبقي دول اللي مفروض تاخدهم معاك و انت مسافر 2000 في سنة تبقي 24 الف

خد بقي في الاعتبار لو ماعندكش اعانة اطفال ا واو ساب يبقي في الحالة دي لازم تجيب معاك المبلغ كله

وهكذا

بدل ماتتبهدل وتتعب نفسيا وتخش في مرحلة الاكتئاب اللي ممكن لا قدر الله تشلك وتشل تفكيرك وتبقي بداية النهاية

2- النقطة التانية ..موضوع الثقة اللي اتكلمنا عنه ..مافيش حد هناك بيشغل حد من غير خبرة كندية او على الاقل ريفرنس ..الريفرنس دة هو ا ب الشغل هناك

ودة اللي قاله المهندس ياسر مليون مرة قبل كدة ..مين اللي هايكون رفرينس لينا غيرنا ؟؟ انك ماكناش احنا ضهر بعض ونساعد بعض مين اللي هايساعدنا ؟؟؟ الصيني والا الهندي والا الطلياني ؟؟ ولا حد

اتعلم ماتبطلش تساعد المصريين قد ماتقدر ..بكره هو هايساعدك ويساعد غيرك وهكذا ..حتى لو مريت بعناصر وحشة ..دة برده عادي ومتوقع

اشمعني احنا الوحاد هناك اللي بنشيل هم الرفرينس يعني ؟؟واحنا اللي في رباط الا يوم الدين ؟؟

طبعا لازم تكون دائرة علاقاتك متنوعة ومن كل الجنسيات موش مصريين بس ..بس عائليا ..خليك في المصريين والعرب

استغل مكان دراستك ..اماكن تاهيل المهاجرين الجدد ..الحي اللي انت ساكن فيه لتكوين علاقات قد ماتقدر

3- التاهيل العلمي الكندي

زي مانتوا عارفين ..علشان تشتغل في وظيفة ملائمة لازم مؤهل علمي كندي وخبرة كندية وريفرينس

مهما كان معاك من شهادات ومهما وصلت من مراكز ..ببساطة اونطة

لازم مؤهل من هناك

كدة بقي عندك 3 خطط

معادلة ودي كل واحد ونصيبة ومهنتة زي مانتوا عارفين

او انك تعمل زي المهندس ياسر مثلا وقتنع بمنهة حاسب كميات او بلانر بدلا من انك تخش في سكة طويلة خصوصا لو كانت معادلتك صعبة زي حالتنا وفي النهاية هاتشتغل براتب كويس يضمنك حياة كريمة

او انك تغير كارير خالص بالذات لو كانت مهنتك صعب تتعادل او تلاقي بيها فرصة عمل هناك زي المحامي والا مدرس جغرافيا مثلا !!!! ..ممكن تلاقي حاجة بسيطة ومرغوبة زي الاي تي او الاوراكل او مثلا رسام اوتوكاد

4- اخيرا اللغة : مع انك موش هتلاقي صعوبة في التواصل والتعامل مع الناس مهما كانت مستوي لغتك

بس اسال نفسك

أي شغلانة لازم ليها انترفيو

ايه بقي اللي يخللي واحد صاحب عمل يشغل واحد بيتهته وبيعبر عن نفسة بلغة الاشارة طالما فيه عشرين الف بديل بيتكلموا بسهولة وطلاقة

لازم تعرف تعبر عن نفسك ومهاراتك بطلاقة طبعا علشان تعدي في انترفيو

بالرغم من ان كل اللي ذكرته ده من اساسيات الشغل هناك

بس فيه نماذج كتيرة نجحت انها تلاقي شغل بدون المرور بكل العقبات دي

فيه بعض اصحاب العمل بيكتفي من انه يتاكد بس انك تعرف تنجز الشغل المطلوب منك ببراعه ..وخلاص

دي فرصة وضربة حظ

ولازم لها كفاءة منك اولا ..ثانيا واحد صاحب عمل يديك اول فرصة

وبمجرد الحصول على عمل محترم هناك ..خلاص ..مشاكلك في كندا اتحلت خلاص

بس طبعا انت لازم تجهز نفسك على الورست كايس ..اسوأ الحالات

كدة اعتقد ان معظم الانطباعات قلتها ..والله من وراء القصد

تتبقي حلقة وجهة النظر

اشوفكم على خير

[myusername]

مثلا السلالم الكهربا ..هناك وانت على السلم الكهربا لو هاتقف عليه وتنتظر يوصل ..لازم تقف يمين وتسيب الشمال للناس المستعجلة ..حاجة تنقط يعني ..ولو وقفت في النص والا شمال انت انتهكت قواعد اللياقة والادب بشكل يخللي شكلك وحش جدا ..فكروني فيلم احمد حلمي زكي شان لما كان بيقلب نور للحرامي وهو نازل من عالسلم

المهم لما رجعت السعودية لقيت نفسي بلاوعي لازم اخد يمين على السلم علشان المقابل

السلام عليكم,

الظاهر كده ان الحوار ده منتشر فى كل دول العالم... لان و انا فى اسبانيا و فرنسا, كان نفس الحوار ده بيحصل بالظبط... فى سلالم الكهربا بتاعت المترو و المولات و كله

صف تلاقيه رايق... و صف تلاقى ناس كلها بتجرى بسرعة.

بالنسبة لموضوع الثقة... انهم بيثقوا فى كلام الواحد.. و دى سمعتها من ناس كتير هنا فى المنتدى.. زى الزعيم الشامى, طيب انا عايز اعرف... هو ده نفس النظام فى سفارة كندا؟ ولا عشان السفارة هنا فى مصر... فبيعاملوا الواحد بعدم ثقة؟ ولا عشان انتا مقيم.. عشان كده المعاملة مختلفة؟

تم تعديل 18 ديسمبر 2009 بواسطة myusername

[moheltohamy]

صباح الفل عليك يا زناتي...

حلقة قلق الأخرانية دي الصراحة... بس ليّا عليها شوية ملاحظات...

بصفة عامة...

إنطباعاتك اللي أخدتها دي يا زناتي ، صدقني ما ينفعش تعممها ، بمعنى إن فيه ناس كتير شافوا الحياة في كندا بصورة مختلفة تماماً! التجربة الشخصية تبقى هيّه المعيار اللي كل واحد بيشوف البلد من خلاله. وخلينا نتفق على حاجة... اللي اتبهدل في البلد ، وشال زلط على ما عرف يتأقلم عمره ما هيشوف البلد زي اللي اشتغل في تخصصه أو لقى فرصة شغل مريحة. اللي راح هناك وقعد بين 4 حيطان هناك عمره ما هيكون زي اللي راح ولقى أصحاب يعرفهم ، وناس يونسوا وحدته ، ويدلّوه على أي حاجة يسال عليها. اللي عنده مرونة فكر وطباع مش هيشوفها زي متحجر التفكير وصاحب عين السخط مش هيشوف غير المساويا!

بالنسبة للشوبنج...

أصبر بس لمّا موضوعي يكمل ، وهتلاقي فيه أي حاجة بتفكر فيها. بس أحب أقول لك إن مقياسك للمصاريف هنا ما ينفعش برضه يتعمم ، لا مقياسك ولا مقياسي بكل أسف. إحنا الاتنين يا زناتي جايين البلد دي فترة مؤقتة ؛ تورستس! إنتا جاي هنا تتفسّح وتتدلّع ، وتروح مطاعم أستاذة ، مش جاي عشان تعيش حياة جد... إنتا جاي بلاد نضيفة تعيش فيها يومين حلوين. أنا في مرة صرفت في شهر إقامة في البلد (من غير فلوس الطيران) حوالي 11 ألف دولار ، ومرة 8 تلاف دولار! ده مش المقياس يا زناتي خالص! لو أسرة من 2 عاوزين يعيشوا بشوية التزام واتزان في المصاريف ، ومش هيعيشوا وحش بأي حال من الأحوال (وكلامي على تورونتو) هيكفيهم 2000 دولار عشان يعيشوا كويس ، هتكفيهم جداً ، والمعلومة دي لسّه جايبهالك سخنة من الموبايل للتوبيك بتاعك وش!

مثال البيبسي كان اللي قلت عليه ده على سبيل المثال... أنا عمري ما شفته الصراحة! أنا لسّه جايبها امبارح وانا طالع الشقة (في يانج آند إجلنتون) من الماكنة اللي تحت في مدخل العمارة ، والعلبة بدولار وده الاستاندارد هنا (هيه الصراحة غلطت وإداتني علبة إضافيه ببلاش ، هاسيها يعني؟! :lol: )

ويوم السبت اللي فات في الكورس بتاع الـ ITLS كانت الماكنة هناك داخل المبنى بتاعهم بتبيع العلبة بنص دولار...

وقبل رمضان اللي فات بيومين كنت مع الواد ديبو في نو فريلز وكان فيه عرض هناك الباكتة فيها 25 كان (بالحجم العادي 350 مل) وسعرها 5 دولار ، يعني العلبة واقفة عليّا بـ 20 سنت! يعني لا تقوللي مصر ولا سعودية ولا بطيخ!

كل الكلام ده باجمّعه في توبيك الشوبنج عندي... بس انتا اللي بتستعجلني!

مثال تاني... صابونتين Dove سعرهم 1.5 دولار ، في حين صابونة Aveeno (نظام الطبيعة والهجص ده) بـ 6 دولار! كابل الـ USB عشان البرينتر (وده قلته في موضوعي اللي مش عاوز تعتبه) من فيوتشر شوب بـ 30 دولار (Plus taxes) جابهولي الواد ديبو من وول مارت بدولار!

إزازة الخل الأبيض الطبيعي الـ 500 مل بدولار ، وإزازة خل تانية مزاجي قاللي أشتريها (خل بلسميك بالليمون) 250 مل بـ 11 دولار!

الخضار والمشتروات والبقالة (المعلبات والمكيّسات لو جاز التعبير) تشتريهم من مترو (دومينيون سابقاً) بسعر ، وتلاقيهم (همّا همّا بنفس الماركات والأحجام وكل حاجة) في نو فريلز بسعر تاني خالص!

شاي لبتون فتلة 100 باكيت بـ 3 دولار وكسر ، وشاي تاني أورجانيك بالهجايص 20 باكيت بـ 8 دولار!

لابتوب تشتريه بـ 2500 دولار ، وممكن تلاقي مقارب ليه على kijiji أو craigslist مستعمل (استعمال طبيب) بـ 500 دولار!

إيجار عربية يكلفني شهرياً 2500 دولار ، في حين إني ممكن أشتري عربية زي الفل بـ 1000 دولار وعليها ضمان كمان! وممكن تعيش ع المواصلات العامة بـ 110 دولار شهرياً.

إيجار بيت في يانج آند إجلنتون 1100 دولار للـ ون بدروم أو 1500 لو فيها فاسيليتيز كتير ، وممكن شقة أوضتين في الضواحي بـ 800 دولار!

وقيس على كده كل حاجة...

وأكررهالك تاني... ممكن جداً أسرة من 2 (زيي وزيك) تعيش مرتاحة جداً (مع بعض التعقل في المصاريف ، وننسى الضياع اللي احنا فيه ده) بـ 2000 دولار. وساكن في مكان حلو ومش ناقصك أي حاجة ذات قيمة.

أقول لك كلمة قالتهالي هند قبل كده... لو معاك فلوس هتعيش في البلد دي عيشة لا تتخيلها... الجملة دي سامح عدّل لي عليها: إنتا مش محتاج فلوس كتير عشان تعيش عيشة حلوة في البلد دي.

كل اللي محتاجه يا زناتي... شوية جدية.

وتحياتي لك على موضوعك الأكثر من رائع :lol:

[أكسيلانس]

:lol:

ألاخ ألمناضل / زناتي

تحياتي لك علي كامل مجهمداتك في هذا المنتدي ,, أنا أوفقك ألرأي في كل ما عرضته من أراء ,, و رغم أني مررت بمثل ما تفضلت به من تجارب و مشاعر بالاحباط من وجودك في وظيفه أدني مما تستحق الي أخره و كان هذا في فرنسا و هولندا ,, لكن أود أن أضيف شئ أخر مما رأيت و عايشت مع زملائي ,, و كان هذا في زمن العزوبيه ,, فقد رأيت أن أكثر ما تعثرو فيه هو تألف زوجاتهم مع المجتمع ,, كلنا نعرف أن النساء أكثر منا تمسكا بأسرهن و أرتباطهم العائلي قد يكون أقوي من الرجل الذي تعود علي السفر و السعي للرزق في كل مكان ,, و لقد شاهدت مشاكل كثيره تحدث نتيجه ان ألزوجات بعد أن تنتهي فتره الانبهار بالشكل و المظهر العام لتلك المدنيه و الانفتاح مقارنة بمجتمعاتنا الشرقيه ,, فتبدأ الزوجه بلأنطاء داخل المنزل ثم الالحاح علي زياره الاهل بمصر لاهون سبب .. و تفاصيل أخري كثيره لا أريد أن أطيل فيها حتي لا أتعرض للتنكيل من أخواتي المشاركات ,, و للعلم أنا لا أهاجم أحدا و لكن هذا ما يحدث حتي و نحن نعيش في نفس البلد ,, :lol:

و خلاصة القول أني رأيت أن الناجحين كلهم ,, كانوا أزواج علي قدر عالي جدا من التوافق الفكري ,, و الاصرار و المؤازره ,, و هو عنصر لمن لم يجرب ألغربه هو كل النجاح في نظري ,, ,و لو كان هناك شك في أن وراء كل عظيم أمرأه ,, فأنا أأكد لكم أنه لو لم يكن وراء كل مغترب أو مهاجره أمرأه مؤأزره صابره , مقتنعه و ليست مجبره ,, أذا لم يكن له هذا ( لآ تتتتتتتتتتتتتتتتهاجررر)

:lol:

[dreamy]

السلام عليكم اخواني واخواتي....

اولا احب ان ابارك للاخ زناتي رحلة اللاندنج وعقبال الاستقرار...

احب ايضا ان اشكر جميع العمالقة في هذا المنتدي من دون ذكر اسماء حتى لا انسي احد ومواضيعهم وتفانيهم من دون انتظار مقابل...ادعو الله ان يجعله في ميزان حسناتهم وأن يجزيهم عنا خير الجزاء.....

أخ زناتي حبيت اوضح بس من واقع تجربتنا في كندا في كالجاري بعض النقاط بخصوص تكاليف المعيشة...عند وصولنا الي كندا كان بحوزتنا المبلغ المطلوب لاسرة من ثلاثة افراد وهو 16600 الف دولار...صرفنا معظمه في الايام الاولي على مقدم الايجار لمدة ثلاثة اشهر ..تأثيث المنزل...شراء سيارة وصيانتها ومستلزمات الشتاء لها...الموتيل...التكاسي والمواصلات..البنك وفتح الحساب ووديعة الكرديت كارد..خطوط الموبايل والسيكوريتي ديبوسيت لها..في الايام الاولي كانت معدل مصروفنا عالي لاننا كنا ننضطر للاكل خارج المنزل...والتكاسي وغيره..ولكن الان بعد الاستقرار ...اقول انه يمكن لاسرة من 3 افراد ان تعيش حياة اعتبرها كريمة جدا في كالجاري بمبلغ 2000 دولار قي الشهرأو حتى اقل وفقا لتدبير الاسرة والزوجة بشكل خاص.....

توجد المحلات الرخيصة التي يمكن ان تشتري منها البيبسي الفاميلي سايز بدولار واحد..."محلات السوبر ستور"..وكما تكرم مشرفنا الاخ تهامي جزاه الله الف خير بالتوضيح.....كل المواد الاستهلاكية يمكن شراؤها باسعار تعتبر ارخص من الخليج من محلات معينة "the real canadian wholesale" & Super Store>

الملابس يمكن الحصول عليها من محلات ممتازة بتخفيضات حتى 50% خلال العروض الخاصة في الويكند.

السيارة تكلفنا الان مبلغ 120 دولار شهريا للبترول و 130 للتامين..اتوقع ان ينخفض التامين بعد حصول زوجي على الرخصة الكندية وان يقل استهلاك البترول بعد انتظامه في الدراسة في يناير للنصف او اقل.

احب ايضا ان اوضح انه في حالة اعتبارك من ذوي الدخل المنخفض...فانه يوجد العديد من الخدمات التي يمكنك الاستفادة منها...السكن المخفض..تامين صحي يغطي الادوية والدينتال والاوبتيكال ...الحصول على كارت الترانزيت بسعر مخفض...حتى الضرائب التي تدفعها هنالك مبلغ مالي يدفع تقريبا كل ثلاثة اشهر لتعويض ذوي الدخل المنخفض عن هذه الضرائب..ايضا ستحصل على المبلغ الاقصي للجايلد بينيفت وفي حالة الحاجة القصوى سوف تدفع لك الحكومة الفرق بين مدخولك ومنصرفاتك..

اتفق معك بضرورة وجود بلان...والحمد لله في حال رغبت في اكمال الدراسة او تغيير المجال فكل الموارد متوافرة هنا وستحصل على مساعدة الحكومة...

اتفق معك ايضا في ضرورة اجادة اللغة الانجليزية حتى في حال البحث عن كاجوال جوبس...بالنسبة للنيتورك فهي ضرورية ولكن في حالتنا وصلنا كالجاري ونحن لا نعرف فيها احد والحمد لله...اعتقد ان امورنا سارت بشكل جيد لحد كبير..اهم ما تحتاجه في كندا هو اولا التوفيق من الله...ثم الجدية والمثابرة و

التسلح باكبر قدر من المعلومات....

بالنسبة للقرب او البعد من الله...فعلا لم يستطع زوجي ان يصلي صلاة الجمعة في المسجد عدة مرات منذ وصولنا الى هنا...ولكن بشكل ما..اصبحنا نشعر بقرب اكثر من الله...هو يصلي الان جماعة في مكان عمله مع زملائه المسلمين ....ووفي البيت نصلي الصلاة جماعة اذا حضر الوقت وكان هو في البيت...وخلاف ذلك الكثير من الاشياء الاخري...

في الاخير كلمة حق اقولها في حق هذا البلد...انا فعلا احب كندا...لاحساس الامان الذي منحتنا له....يكفي ان تعلم فقط اخي انه مهما حصل لك هنا..مادمت صادق وجاد...فان حكومتك لن تتخلى عنك...انا لست مصرية ولكن اعتقد انه لا توجد حكومة في وطننا العربي يمكن ان تشعر بالامان معها في الوقت الحالي..هنا في كندا...ان احتجت للعلاج...حكومتك ستدفع لك...للتعليم..موجود...حتى الغذاء والطعام..موجود لمن لا يستطيع...تكفي الابتسامة التي تراها في وجوه الجميع....تكفي كلمة" ويلكم تو كندا..يور نيو هوم" التي سمعناها الاف المرات منذ وصولنا"....الحمد لله كثيرا الذي هدانا للتفكير في هذا البلد....

[Pharmaher]

بصراحة حلقة مليانة معلومات و زبد من الاخر

تسلم ايدك و جزاك الله عنا خير

انا اتفق مع الدكتور التهامي على ان موضوع المصاريف ده يتبع لكل شخص و بيدور على ايه و بيشتري ازاي

يعني فعلا الواحد ممكن يصرف 6000 دولار بالشهر و واحد تاني يصرف 4000 بنفس ذات الحاجات

بس ده لا يمنع ان البلد اكيد مكلفة بالذات في اول فترة ولحد ما تعرف من اين تؤكل الكتف

خصوصا ان الشغل ح يبقى اولموست صعب في اول فترة لغاية ما الواحد يظبط اموره شوية

اكيد نصيحتك ان الواحد يجهز خطة واضحة لاول سنة مهمة جدا و انا عامل حسابي فعلا على كدة

بس المهم ربنا ييسرها و يكون معانا كلنا

احب فعلا اعيد نقطة ان احنا نوقف مع بعض لاننا فعلا محتاجين ندعم بعض هناك

ما لناش الا بعض و الا ح نتعب كتير

وربنا يقدرنا زي مااستفدنا من خبرات غيرنا نقدر نفيد الاخرين

والشكر موصول للدكتور تهامي برضه على موضوع الشوبينج الظاهر ان الهاند اوفر الجاي دسم و مليان

[dcfarouk]

بجد موضوع تحفه

انا مبسوط جدا اني بشارك معاكوا

بجد يادكتور تهامي انت عقدتني من التصوير بجد صور احترافيه وطبعا كمان الصور بتاعه المهندس ايهاب بجد حلوه اوي

ياريت حضراتكوت تعرفونا انواع الكاميرات الجباره ديه طبعا جزء كبير علي المصور بس يمكن نقرب شويه من الاحتراف ده وياريت اسعار الكاميرات ديه يعني اجيبها من مصر ولا لما اوصل باذن الله

وليه استفسار بخصوص قرض الاوساب وقرض الويل فير ايه همه بالظبط وكمان هل دول علي مستوي كندا كلها ولا بعض الاماكي فقط وهل دول غير منحه الدراسه اللي بتاخد عليها فلوس لما تدرس لغه انجليزيه مثلا وهل موضوع فلوس مع الدراسه موجود في كل كندا لان مدام مييو قالت انه موجود في البرتا ومش عارف الوضع في باقي الولايات

وعلي فكره عاوز اذكر حاجه من قرأتي المتواضعه انا لاحظت فعلا الاسعار في كالجاري بتاعه الاقامه ارخص من تورنتو مش عارف ازاي بس لما دخلت علي كريج ليست لقيت الايجار بتاع room mate في كالجاري ارخص من تورنتو والله اعلم وهل انا لو عشت في room mate هل ده بيمنع اني اخد الهيلس انشورنس علي اساس ان الايجار مش باسمي ولا ايه الحل وكمان موضوع البي ار هلي ممكن اعمله علي عنواني فيhomestay او room mate ولا لازم اكون صاحب المكان

بالنسبه لموضوع الولد والجيرل فرند اللي زكره مهندس زناتي كنت عاوز اعقب

اعتقد انه من الحريه الشخصيه انك تبلغ الشرطه عنهم لانه كده همه بيجبروك تشوف حاجه انت مش عاوز تشوفها يعني لو انا مش بحب اشوف افلام رعب انت مش هتفرجني بالعافيه وهمه هنا بيعملوا فلم ...و انا مش عاوز اشوفه ولا اسمعه يبقي انا حر ولازم ده ميحصلش

ياريت تعقيب الاخوه

وشكرا

تم تعديل 18 ديسمبر 2009 بواسطة dcfarouk

[أكسيلانس]

:aslam:

ألاخت دريمي

تحية خالصه لك علي حسن توضيحك للامور ,, و خصوصا في كالجاري التي لا يعرف عنها الكثير ,, و جزاك الله الف خير علي طمأنتك لنا ,, أما بخصوص أنطباع أخي زناتي ,, فرأي د/ تهامي سليم و عن تجربه أن من يزور مكان م يسكنن في فندق أو مكان مؤقت تكون مصاريفه غاليه مقارنة بأهل البلد ,, بعدين بالبلدي يا أكسيلانسات , شوف أخوانا ألاسكندرنيه مثلا بصرف كام للآسره من 5 أشخاص في الشهر مهما عمل _ مقارنة بواحد رايح يصيف في أسكندريه ( متفكرونيش ,, و النبي ) طبعا الوضع تماما مختلف ,, و الحاله الوحيده ألي شفتها بالعكس - بحكم عملي بالفنادق - هو لما هما كأجانب ييجوا مصر - يقولك دا أنتم عيشين ببلاش- أنا شخصيا أعرف أسر هنا في الغردقه من سويسرا و أنجلترا ولادهم زملاء أولادي في المدرسه - عيشين في مصر علي المعاش بتعم هناك و بيحوشوا منه كتير جدا - و كمان مأجرين بيتوهم هناك ولاد اللذينه !!!!

فعلا الرؤيه بتختلف ,, و زي ما قلتلكم الررك علي الستتتتتتتتتتتتتتتتتت يا أكسيلانسات

:waf:

[myusername]

بالنسبه لموضوع الولد والجيرل فرند اللي زكره مهندس زناتي كنت عاوز اعقب

اعتقد انه من الحريه الشخصيه انك تبلغ الشرطه عنهم لانه كده همه بيجبروك تشوف حاجه انت مش عاوز تشوفها يعني لو انا مش بحب اشوف افلام رعب انت مش هتفرجني بالعافيه وهمه هنا بيعملوا فلم ...و انا مش عاوز اشوفه ولا اسمعه يبقي انا حر ولازم ده ميحصلش

ياريت تعقيب الاخوه

وشكرا

السلام عليكم... حضرتك فى كندا ولا فى مصر؟ لو لسه مروحتش كندا... يبقى الحمدلله انك قلت الكلام ده من دلوقتى.

لا طبعا مش من حقك انك تخترق خصوصيتهم و تبص عليهم اصلا... مش تقولى كمان تبلغ البوليس. انا طبعا بتكلم من وجهة نظرهم.

و انا فى بلاد الفرنجة... كانوا شغالين طول الوقت... و احلى حاجة عجبتنى ان هناك كل واحد فى حاله.. و محدش بيهتم.

يعنى ممكن يبقى فيه جنبك مدعكة فى المترو او الاتوبيس... و انتا قاعد ولا كأن فيه حاجة بتحصل

[dcfarouk]

سؤال خاص للمهندس ايهاب

انت تعرف واحد في البرتا اسمه محمد السيد

[qenawy]

By qenawy8, shot with K610i at 2008-09-11

[qenawy]

بداية ونهاية

اربع الاف دولار في الشهر؟

انزل بالتتر يا زناتي

By qenawy8, shot with K610i at 2009-03-29

[qenawy]

الصورتين من انتاج موبايلي

حقوق الميكروباس محفوظة