كندا... بداية ونهاية

[ehabtaher]

ماهو تلاقي الزناتى زعلان علشان اصحابه هناك سابوه للبنانى ياخد منه 100 دولار علشان يبعتله ال بى ار بدل ما حد يعطيه عنوان بيته علشان يبعتو عليه البى ار

ةتلاقيه ساعتها بيقول من اولها اهو سابونى للبنانى يبيع ويشترى فيا

معلهش احنا بنهدى النفوس يعنى

طب والله العظيم مانا سايبك بأة يا دكتور ايهاب ؟؟؟ :blush2:

انت تاني ؟؟ موش قلتلك في التليفون بتلعب في عداد عمرك ؟؟

اسمحلي يا دكتور بوب اوضح للناس اللي وضحتهولك في التليفون

حضرتك حكيت الموضوع ده قبل كده... الظاهر ان الدكتور بينسى :h!!!h:

لا :sofa:

اصله ماكانش يعرف اللي عملوه الشباب هناك ..هو بس عرف موضوع طارق بس :lol:

وبعدين يا اخى ايه المشكله بانسى مش انا عجزت وبقيت عظمه كبيره (السن برضه له حكم)

[znaty]

بورسعيد ..بدون تعليق

دة الشروق اللي باحكيلكم عليه

المعدية والنورس ..5 سنين في الكلية باركبها كل يوم وانا رايح الجامعه وجاي منها ..والنورس دة يشهد على الذكريات

الحتة دي يااااما اصطادنا منها سمك ..دي طرطوفة الحاجز الشرقي لقناة السويس ..اسمها حجر سعيد ..راجل من ضهر راجل روح هناك في الشتا :h!!!h:

[ehabtaher]

ماهو تلاقي الزناتى زعلان علشان اصحابه هناك سابوه للبنانى ياخد منه 100 دولار علشان يبعتله ال بى ار بدل ما حد يعطيه عنوان بيته علشان يبعتو عليه البى ار

ةتلاقيه ساعتها بيقول من اولها اهو سابونى للبنانى يبيع ويشترى فيا

معلهش احنا بنهدى النفوس يعنى

طب والله العظيم مانا سايبك بأة يا دكتور ايهاب ؟؟؟ :blush2:

انت تاني ؟؟ موش قلتلك في التليفون بتلعب في عداد عمرك ؟؟

اسمحلي يا دكتور بوب اوضح للناس اللي وضحتهولك في التليفون

يا اخوانا انا كنت مستقر على عنوان طارق لغاية قبل معاد الطيارة بساعتين بس لغاية ماعرفنا المشكلة اللي في العنوان الجديد

وحكيتلكم طارق عمل ايه لدرجة انه كان هايكنسل الايجار الجديد بسببي ..وزوجته اتصلت بزوجة وكيل الشقة وبهدلتها بسبب الموضوع دة وكانوا ناويين يخبوا عليا

المهم

انا ماكانش عندي وقت

اتصلت بصديقي ( موش عاوز اقول اسمه هنا سامحوني ) الراجل اتصل بكندا من تليفونةمليون مرة واتحمل حرج كبير جدا لغاية ما جاب عنوان

قبل ما يتصل بيا ..وبعد مكالمة طارق بعشر دقايق ..اتصل طارق بيا وقاللي خلاص اتصرفت وانا قلتله اوكي واتصلت بالمحامي

بعدها بدقيقة كان اتصال صاحبي وقاللي انا خلاص جبتلك عنوان قلتله سامحني انا اتصرفت

قاللي لا يمكن وزعل مني جدا وقاللي وايه اللي يخليك تدفع فلوس يعني ؟؟

قلتله انا اديت كلمة للراجل خلاص وبعدين كدة كدة هاينفعني بعدين وبعدين دول كلهم 100 دولار في الشهر موش قضية

ولما رحت كندا ..قسما بالله العظيم ..مافي واحد من اللي قلت اسمائهم ..دة غير اصحابي اللي هناك ..الا ما عرض عليا بقوة وباصرار وبحلفان كمان اني اغير العنوان عليه بس انا رفضت بسبب اني موش ناقص لعب في البي ار

كمان انا السوشيال عملته على اللبناني واديته كلمة واتفقت معاه فخلاص الموضوع موش مستاهل

طب تعرفوا ان عنوان مراسلات البنك ونقابة المهندسين على واحد من اصحابي موش المحامي ؟؟بس موش عاوز اقول اسمه ليبقي بريدة بريد الاهرام :sofa:

خليك في حالك بقي احسنلك يا بوب وربي عيالك وكل لقمة عيش :h!!!h:

انا بس بافكرك زى ما ربنا وقفلك ولاد الحلال والاصحاب اللى لسه فاكر ذكرياتهم فى مصر

وقفلك برضه ولاد الحلال اللى خليتك تحكى عنهم فى القهوه دى

بس علشان تعرف ان الذكريات بالناس اللى فيها مش بالاماكن اللى اترسمت الذكريات فيها

[znaty]

كورنيش بورسعيد ساعة الغروب

هنا قاعدة تمثال ديليسبس ..اللي دمره شعب بورسعيد بعد 56 ..هنا كان المفروض يتحط تمثال الحرية بتاع امريكا كهدية للهيئة لانها كانت تحت ادارة فرنسا ..بس تم تغيير الهدية لنيويورك ..احسن ..كانوا هايهدوه ازاي يعني البورسعيدية ؟؟ :h!!!h:

الفنار القديييييم اهو في النص ..خش على الويكيبديا ..وصدق او لا تصدق ..هتلاقي ان دة اقدم مبني خرسانة مسلحة على وجه الارض ..خش اتاكد بنفسك

مرسي المعدية ومدخل مدينة بورفؤاد ..على فكرة المسجد اللي على اليمين دة هو اول حاجة بتشوفه المراكب اللي جاية مصر من البحر ..ماذنته

بحرنا واحلى سمك

قناة السويس ..صورة ارشيفية

الله عليكي يا بلدي ..احلى غروب في الدنيا

[znaty]

حي بورفؤاد الساحر

بذمتكم ..في كدة حلاوة في الدنيا ؟؟ :h!!!h:

معلش يا اخوانا ..ماقدرش ماحبهاش

[ehabtaher]

انا باحب مصر جدا

بس علشان الناس اللى فيها الاصحاب اللى باروح معاهم الجامع واللى باروح معاهم رحله جميله

واللى لما كنت اتزنق فى فلوس يمد ايده فى جيبه يسلفنى

اللى لما عملت عمليه جه قعد جنبى فى المستشفى

واللى قعد يتصل من بره كندا مليون مره علشان يحل مشكله واحد صاحبه فى الغربه

هما دوال الاصحاب اللى بندور عليهم سواء فى مصر او فى كندا او فى المريخ

وربنا يجمعنا على خير

ايوه انا باحب مصر

بس مش حكومه مصر والا اخلاق الناس فى مصر دلوقت (مش كلهم علشان التعميم حياخدنا فى الرجلين)

بس اقولك لو عشت فى كندا وعرفت اشتغل فيها شغلانه كويسه وربيت الاولاد كويس

ليه لا انى احب كندا كمان

الحب للمكان اللى اتربيت فيه ايوه لكن للمكان اللى ربىيت اولادك فيه برضه

انا ابويا من القليوبيه وامى من الاسكندريه وانا مولود فى البحيره وكل عيل من عيالى مولود فى حته شكل

المسأله نسبيه

لكن كندا فاتحه ذراعها ليك دلوقت وبتقولك انا ممكن اساعدك بس انت كمان تساعدنى

مش احسن من البلد اللى بتقولك روح شوف حالك فى الخليج انت حمل زائد عليا

مش احسن من البلد اللى بتقولك خليك اشتغل هنا وخد فلوس لكن لو مش حا تعرف تشتغل حا نرميك ونجيب غيرك

[ehabtaher]

وبعدين فى موضوع الصور ده

مانا لو فتحت فيه مش حا تخلص معايا

انا مصور مصر كلها حلوها ومرها

وكنت باخد جوايز ايام الكليه

يعنى

بس عايز اقولك حاجه

الحاجه انت ممكن تشوفها حلوه من عينك انت لكن من عين واحد تانى يقدر يطلع لك القطط الفطسانه فيها

يعنى انا باحب الاسماعيليه اكتر من بورسعيد ايه رايك بقى

[znaty]

ارحمني يا ايهاب ابوس ايدك شوية :blush2:

حانتحر يابني هو انت ماوراكش غيري

ياعم والله كندا فله ..انا موش باقارن والا باقول وحشة يا سيدي ماتخرجنيش من المود ياعم ضيعت الحجريييييييييييين :sofa:

انا موش عاوز التوبيك من الاخر خناقة هنا بين كندا ومصر والحاجات دي والله ..دي مجرد ..انطباعات ..بس

باهزر ماتزعلش :h!!!h:

[Dr Remon]

عزيزى المهندس زناتى... تحية و تقدير لكل مجهودك و ارائك و ملاحظاتك و ..و...و..و مهما قلت مش هاوفيك حقك

احب اقول لحضرتك كلمة جميلة للبابا شنودة "مصر ليست وطن نعيش فية و لكنها وطن يعيش فينا"

دة معناة انك ممكن تروح اى حتة فى الدنيا و مصر معاك جوة جوة قلبك. انا سافرت امريكا كتير و كل مرة بروح هناك احس انة ايوة الدنيا احسن شوية بس مش للدرجة الى تخلينى افكر اسيب بلدى... لكن بمجرد رجوعى مصر و فى نفس اليوم بفهم انا لية فكرت فى السفر.

للاسف فعلا بلدنا حلوة قوى من بعيد.. لغاية ما يجى يوم اسود تفكر تخلص ورقة من الحكومة.. او تجدد رخصة..او حتى تسوق عربيتك!!

ساعتها بتفهم انت سافرت لية

[ehabtaher]

هنالك تأمين صحي اضافي يمكن طلبه للاطفال وذوي الاحتياجات الخاصة و النساء الحوامل ومحدودي الدخل والاشخاص المصابين بامراض مزمنة تتطلب صرف ادوية بصورة مستمرة...تقدمت بالطلب قبل ثلاثة اسابيع نظرا لظروف حملي واستلمت الكارت قبل يومين لي ولطفلي مع رسالة من وزارة الصحة هنا تتطلب مني ان اوافيهم بمعلومات المولود الجديد فور الولادة لتتم اضافته...التامين يغطي الادوية والدينتال والاوبتيكال ورسوم سيارة الاسعاف..

يمكن التقديم من هنا:

http://www.employment.alberta.ca/FCH/2085.html#3

يالا ياعم انشالله مح حوش

هنا كمان فيه تامين اضافى للمصابين بامراض مزمنه

او حوامل

اتجدعن انت بس

ربنا يحفظنا ويحفظك من الامراض المزمنه والغير مزمنه

[OReX]

باشمهندس زناتى

خالص تقديرى لفكر وتحليل حضرتك

كنت كل يوم بستنى حلقة الانطباعات وطلعت رائعة وخاصة اخر مداخلة لحضرتك

كل التقدير والتحية

:flr1: smk: :)

[znaty]

عزيزى المهندس زناتى... تحية و تقدير لكل مجهودك و ارائك و ملاحظاتك و ..و...و..و مهما قلت مش هاوفيك حقك

احب اقول لحضرتك كلمة جميلة للبابا شنودة "مصر ليست وطن نعيش فية و لكنها وطن يعيش فينا"

دة معناة انك ممكن تروح اى حتة فى الدنيا و مصر معاك جوة جوة قلبك. انا سافرت امريكا كتير و كل مرة بروح هناك احس انة ايوة الدنيا احسن شوية بس مش للدرجة الى تخلينى افكر اسيب بلدى... لكن بمجرد رجوعى مصر و فى نفس اليوم بفهم انا لية فكرت فى السفر.

للاسف فعلا بلدنا حلوة قوى من بعيد.. لغاية ما يجى يوم اسود تفكر تخلص ورقة من الحكومة.. او تجدد رخصة..او حتى تسوق عربيتك!!

ساعتها بتفهم انت سافرت لية

اخي العزيز دكتور ريمون

كلمة البابا شنودة هيا بالظبط اللي كنت باحاول خلال الحلقتين اللي فاتوا اني اوصله لاخوانا هنا

كلمة حكيمة وانت نقلتها في الوقت المناسب تماما

اتفق معاك ومعاكم ان الوضع صعب جدا في مصر ومن سيئ لاسوأ وانا قلت كدة ولذلك انا برده بره ؟؟؟؟

وقلت مرارا ان كندا من افضل الاماكن اللي ممكن تستقر فيها ..وانا اؤيدك تماما لو قررت تعيش هناك علي طول انا فاهم

بس كل اللي طلبته ..هو كلمة البابا ...خد مصر معاك

اما عني فانا فكري خاص بيا وممكن يكون موش مناسب لناس كتير زي د تهامي و م ايهاب سالم و د هشام و م ياسر ودة يا اخوانا طبيعي جدا

كل واحد وليه ظروفة

وعلى راي اخويا المهندس ياسر ..اذا ماكنتش قادر ارجع اعيش في مصر ..يبقي هاجيبها هنا معايا :flr1:

تحياتي لك اخي ريمون smk:

[safaalabana]

الله يخليك يا زناتى يا خويا ارحمنا ...ارحمنا ....كفايه ...كفايه ...ياريتك ما عملت اللاندنج قبلينا ...خلاص الله يجزاك الف خير ......

مش قولتلكم بدايه ونهايه دى ما ريحتنيش من الاول

المشكله ان احنا بنثق فى رأيك وعارفين ان كل هدفك مصلحة الناس ...بس الرحمه حلوه

ياعنى انطباعاتك دى ضحكتنا وبكتنا ...

اللهم ارزقنا الخير حيث كان ...اللهم اختر لنا ولا تخيرنا ...

[اسكندرانيةكنداوية]

ياه ياه ياه ياباشمهندس كل مرة تتفوق عل نفسك رائع بل أكثر من رائع أشكرك على التفاصيل و الحيادية و صدق المشاعر و القدرة على التعبير و أشكر كل واحد عبر عن رأيه و مشاعره فى المداخلات إنتوا فعلا وصفتوا و لمستوا مشاعر و عبرتوا عن مشاعر كتر أنا عشتها و عاصرتها بما إنى بالخليج من فترة و يمكن فى أول مداخلاتىبالمنتدى قلت المنتدى ده بالناس اللى فيه أثبت لى إن الدنيا لسة فيها ناس بالجمال دة حقيقى أشكركم

و تأييداً لبعض الأراء

أنا بحب مصر جدا و باشتاق لها جدا طول مأنا بعيد و باستنى معاد الأجازة السنوية بفارغ الصبر وبعد ما أوصل بكام يوم أستنى اليوم اللى حتخلص فيه الأجازة بفارغ الصبر

أؤيد بشدة التواجد بالخليج يوفر المال ويقوى الوازع الينى ولكن يفقدك الكثير من مباهج الحياة يعنى بالعربى كدة مش بتعيش حياتك

بالنسبة للتعليم بالخليج أنا أختلف شوية مع م/ زناتى لأن فرصة تعليم الأولاد بالمدارس الإنترناشيونال أكبر و مستوى التعليم فيها عالى أنا أولادى نزلوا مصر سنة ونص و هما فى إبتدائى إتعقدوا دروس خصوصية و نسيوا شوية اللغة اللى إتعلموها مع إنهم كانوا فى مدارس خاصة لغات

باستقر فى كندا مبدئيا أه لغاية سن المعاش لو ربنا مد فى عمرى بعدها بأنزل أعيش فى دفئ مصر

لما خططت للهجرة كان لمستقبل الأولاد و كان هدفى أوصل هناك و هم فى مرحلة الثانوى لتأصيل الدين فى نشأتهم و قد كان و الحمدلله بس ربنا يتمها بالستر و هم على علم و يقين إن كندا للمستقبل بس لو بدأ الدين بالتراجع كرسى بالكلوب و إرجعوا بلدكم مش حنخسر الأخرة علشان كندا

و طبعا يا باشمهندس زناتى ما أقدرش أفوت تعليق عل صور بورسعيد أنا شوفت الأماكن دى و حا قولك حاجة يابورسعيدى أنا قضيت عيد الفطر اللى فات فى بور سعيد و أكلت كاساتا من عند سلسبيل و مشيت فى التجارى و الحميدى صحيح ما عادوش زى الأول لكن هى طقوس عندى و ركبت المعدية وأكلت أحلى سمك بورى و كابوريا و جمبرى مشوى وطبعا ما بانساش السمك الجوابى أنا بأعشق بورسعيد

طولت بالمداخلة تحياتى لك و لمدام جيجى

[znaty]

الله يخليك يا زناتى يا خويا ارحمنا ...ارحمنا ....كفايه ...كفايه ...ياريتك ما عملت اللاندنج قبلينا ...خلاص الله يجزاك الف خير ......

مش قولتلكم بدايه ونهايه دى ما ريحتنيش من الاول

المشكله ان احنا بنثق فى رأيك وعارفين ان كل هدفك مصلحة الناس ...بس الرحمه حلوه

ياعنى انطباعاتك دى ضحكتنا وبكتنا ...

اللهم ارزقنا الخير حيث كان ...اللهم اختر لنا ولا تخيرنا ...

لا حول ولا قوة الا بالله

لتاني مرة اندم اني نقلت الصورة بواقعية وحيادية في يوم واحد

اختي العزيزة دكتورة صفاء

انا عارف انك عاوزة واحد يطمنك ويقولك كندا دي فل الفل والدنيا ربيع وبلاد العالم اللي غيرها كلها مزبلة والا الامام يا روميل

انا فاهم

بس قوليلي

ايه بس في كل كلامي اللي فات اللي خوفك وقلقك القلق دة كله ؟؟قوليلي بالله عليكي؟؟

ماينفعش يا دكتورة اضحك عليكوا وعلى نفسي واقول دي الارض الكاملة اللي مافيهاش عيب ؟؟

اذا كنت يا اختي العزيزة بتدوري على حاجة زي كدة في الدنيا يبقي موش هتلاقيها ..دي في الجنة بس ..واوراق هجرتها كلنا عارفنها كويس

لكن كل اللي انا عملته اني ذكرت مزايا وعيوب بمنتهي الواقعية والحيادية من وجهة نظري انا

ووضحت في الاول بس ياريت تاخدي بالك ..انها انطباعات اتكونت في 14 يوم تحتمل الخطأ زي ماتحتمل الصواب

وماعرفش لو رجعت هناك تاني واستقريت الانطباعات دي هاتتغير والا لا

كل دة انا ذكرته ..ممكن اعرف ماقريتهوش ليه ؟؟

عينيكي بتدور على حاجات معينة ..وانا ماقدرش اقعد اهلل واكبر لكندا بغض النظر عن بقية الانطباعات

انا نقلت بيتين شعر في اول الانطباعات يحملوا تماما اللي انا قاصده من المذكرات دي

للمرة المليون

كندا زي اي بلد فيها الحلو وفيها الوحش

وقلت انها بلد مناسبة جدا للاستقرار بس اعمل حسابك على كثير من الجد والاجتهاد والتعب في الاول ودة طبيعي

وعايزة تخطيط ودراسة جدوي ومنافع وخسائر ولازم كل دة يكون في بالك

ماينفعش تحطي راسك في الرمل وتسمعي الحلو بس يبقي بنضحك على بعض

ياما ناس نجحت في كندا علشان عرفوا هما عايزين منها ايه وخططولها صح

وياما ناس فشلت علشان ماحسبوهاش صح ودخلوا بصدرهم

فكرتيني بفيلم فؤاد المهندس لما حطلهم حبوب الصراحة في النيل

ماعلينا

انا اسف يا دكتورة لو كنت خيبت املك او عقدتك بدون قصد

مع اني حتى هذه اللحظة

موش فاهم ايه اللي انا كتبته عقدك وخوفك كل دة ؟؟؟ بالله عليكي قوليلي فين دة ؟؟

ربنا يعملك اللي فيه الخيرة يا اختي الفاضلة

على فكرة ..بورسعيد فاتحه هجرة ..شاوري عقلك وقوليلي ..انا السفير ولا مؤاخذة

الرسوم بسيطة جدا

هاتي 50 الف دولار بورسعيدي وهانديكي عشة في زرزارة

روقي بقة انا في عرضك :flr1: :wub:

تم تعديل 19 ديسمبر 2009 بواسطة znaty

[أكسيلانس]

:flr1:

ألتعليق ده من عمنا صلاح جاهين

ألحقيقه الكلام في حب الوطن و حب السفر و حب الحياه و حب المغامره , كله يعتمد علي طاقات بشر مين يستحمل أه لحد أمتي ,, و الكلام كتير و السميعه أكتر أههههههههه ,, world

لكن يعجبني كلام عمنا صلاح جاهين ,, جرب و عرف و أتغرب من غير ما يتغرب ,, و أتفق و أختلف , قال ,,

لولا اختلاف الرأي يا محـــــترم

لولا الزلطتين ما لوقود انضرم

و لولا فرعين ليف سوا مخاليف

كان بيننا حبل الود كيف اتبرم ؟

عجبي

و أدي رأيه في ألأختيارات الي قدمنا ,, و رأي أن كل واحد منا بيهرب و يجري الي المكتوب له و هو مفكر أن هرب منه,,

لا تجبر الانسان و لا تخـــــــــيره

يكفيه ما فيه من عقل بيحيــــــره

اللي النهارده بيطلبه و يشتهــــيه

هو اللي بكره ح يشتهي يغيـــــره

عجبي !!

أما في حب ألوطن ,, ياسيدي عليه عاش و مات بسبب موته في حب مصر ( شاعر الثوره )

قالوا ابن آدم روح و بدنه كفـــــــــــن

قالوا لأ بدن . قالوا لأ ده روح في بدن

رفرف فؤادي مع الرايات في الهــــــوا

أنا قلت لأ روح في بدن في وطــــــــن

عجبي

و كمان عن حال العباد و الرزق , مين الي قال أن الرزق و راحة البال مربوطه بالأرض ,, رزقك و سعادتك مربوطه برقبتك منين مترح تروح وراك ,, صدقني ,, عامل زي ألي بيهرب من ظله

و أسمع دي لعمنا برده

علي بعد مليون ميل من أرضنا

من الفراغ الكوني بصيت أنا

لا شفت فرق بين جبال و بحور

و لا شفت فرق ما بين عذاب أو هنا

عجبي

ومش عاوز أطول أكتر من كده في ألكلام ,, لكن عندي كلام ياما ,, أخوكم في ألاصل محامي يعني صنيعي كلام ,, و العيازو بالله

smk:

[the world]

م /زناتى

الف شكر على المجهود المبذول جزاك اللة خير.

عندى كلمة للسادة الاعضاء :

كل واحد من السادة الاعضاء اصحاب الموضوعات هم فقط يعبرو ا عن وجهة نظرهم فقط وكل واحد من القراء يستفيد كيفما يراها هو شخصيا دون اللوم على صاحب الموضوع مهما قال فهى اخيرا وجهة نظرة.

وايضا الكثير من المشاركات السلبية تحبط صاحب الموضوع بعد ان يكون بذل مجهود جبار , فارجوا من كل الاعضاء مزيد من تشجيع اصحاب الموضوعات للمزيد من المشاركات

:flr1:

[ehabtaher]

[ehabtaher]

ودى علشان خاطر بتوع كيبيك

تعيش كندا حره مستقله موحده

الخريف جميل برضه

والشتاء وما ادراك ما الشتاء

[ehabtaher]

لو زهقت من التلج روح صيف فى هاواى

مانت معاك الباسبور الكندى