كندا... بداية ونهاية

[znaty]

ألف حمد الله على السلامة يا باشمهندس

القهوة نورت :ninja:

الله يسلمك يا بنت بحري :lol: منورة بيكي دايما يا فندم

[znaty]

انا موش فاتح الصفحة دي يا تومي تاني ..بجد هاجيب اللي بطني..انا موش ناقص

يا ايهاب ...هو فيه كدة يعني في الدنيا ؟؟ :ninja:

لا انا مايخلصنيش

قوللى بس انا اشيل الصوره ازاى

طيب دانت حتى ماقولتليش ازاى احط الصور

واللى قاللى الله يكرمه د قناوى

هو السبب اننى بقيت خبير فى وضع الصور

ادعيله بقى

ماهو خلاااص ماعتش ينفع :lol: :lol:

كان زمان وجبر

هو انت اتعلمت البنزين ..وماتعلمتش الفرامل فيييين ؟؟ :wub:

سعادتك بعد ماتعمل المداخلة ليك حد معين كام ساعة هتلاقي متاكتف تحرير

دوس على تحرير وعدل اللي انت عاوزة

الوقتي تتفرج عليها وتتحسر بس wst::

عموما انا كنت باهزر يا بوب بس ...بس انت عارف العقدة اللي عندي يعني

[student]

الحلقة الخامسة

مقتطفات من الرحلة

طبعا بعد ما تقريبا انتهت مرحلة الورق والكروت ..وفي انتظار جني المحصول ولم الكروت ..هاتبدا دماغك تدريجيا تتجه لاكتشاف البلد

1- من الناحية السياحية

2- احنا فين ؟؟..لانك حاتحن بعد لما تقعد كام يوم ماتشوفش ولا تسمع غير اجانب هاتبدا تدور اومال احنا موش باينين ليه ؟:ninja:

3- تبدا تجس نبض الشغل والحياة العملية هناك شكلها ايه بالظبط

هاتستسهل طبعا وخصوصا انك لسة جاي ومعاك فلوس وعاوز تشوف الحاجات الحلوة الاول وتبدا تدور على الاماكن الحلوة والفسح

ودة اللي احنا عملناه وهابدا احكي بنفس التسلسل

ولما نقول فسح ..يبقي شلالات نياجرا

اول يوم بعد ماخلص الورق

فايدة الفنادق النضيفة بصراحة هو تنظيم الرحلات اللي زي دي

سعرها بيبقي معقول وشاملة وجبة فاخرة ودليل سياحي مابيبطلش رغي من اول وسط البلد لغاية الرجوع

كلفتنا حوالي 240 دولار احنا الاتنين

طبعا دة يعتبر رخيص

اتوبيس نضيف موش شايل هم حاجة وغداء فاخر وبروجرام مليان الصراحة من 8 الصبح الى 8 بالليل

ولو هاتحجز الرحلة من فندق خليك في الويك ايند

عندنا بيستغلوا الويك ايند ويضاعفوا الاسعار علشان الناس عايزة تتفسح في اليوم دة

عندهم العكس

اي حاجة بترخص النص في الويك ايند

فلو عاوز تروح مزار او تاجر عربية او تعمل اي حاجة خليك في الويك ايند

المهم ماطولش عليكم المكان ولا الاحلام ..واعتقد انك لو عايش في تورونتو دي نعمة كبيرة انك تاخد عيالك وهما 140 كم بقيت هناك هاتشيل كل هموم الدنيا هناك

الطبيعة ساحرة والهواء في منتهي النقاء يكفي بس انك تعمل كامبنج هناك وتشوي وعيالك يجروا ورا السناجب :lol:) حكاية تانية

قبل ما توصل نياجرا فولز بكام كيلو في مدينة هناك وقفنا عندها ساعة علشان ناخد هناك جولة حرة

بصراحة يا اخوانا ولا شفت ولا هاشوف

تعرف افلام والت ديزني لما تفتح كتاب حكايات مصورة وبعدين الكاميرا تخش جوه الكتاب ويتحول المشهد ان الصور تبدا تتحرك وانت تخش جوا الكتاب ؟؟

اهي المدينة دي كدة

كانها خارجة من عالم الروايات والقصص

اسمها نياجرا اون ذي لايك

تمشي في الشارع وكانك بتحلم من روعة وجمال وهدور المكان وحلاوة المحلات المتزوقة والبيوت القديمة الجميلة وفي منتهي الشياكة

كلها محلات سوفينيرز وتذكارات ومطاعمها في منتهي الروعه واهلها لا يختلفوا عن بقية اهل كندا ..منتهي الادب والبشاشة والحب والابتسامة لا تفارق الوجهة بسبب وبدون سبب

قضينا ساعة في المكان الرائع دة وكانها عشر دقايق

وبعدين على نياجرا عدل

طبعا لا تعليق على مكان الشلالات نفسة اوقع من الصور

بس المزيج بين صوت هدير المياة الرهيب مع رذاذ المية المنعش المنتشر في كل مكان مع ريحة الهوا والشجر وقوس الالوان اللي ملون السما يخليك تقف تتسمر شوية ولا تملك غير انك تقول من قلبك سبحان الله

الصور اكيد موش هاتنقلاك الاحساس دة بس لو خيالك واسع هاتشعر بيه :lol:

نزلنا بالاسانسير اللي جوا الجبل 38 دور علشان نبقي خلف الشلالات بالظبط

اتفرجنا على الشلالات من وراها ..يعني انت وراه المية ..طبعا ملبسينا اكياس بلاستيك علشان مانغرقش من الرذاذ بس مافيش فايدة ..هاتغرق هاتغرق :wub: ..وطبعا صوت الهدير مخليك موش عارف تكلم اللي جنبك

وبعدين روحنا على ساحة المشاهده ومنها هاتشوفو صور بالهبل

وفيه هناك بعد الدش دة حاجتين تعملهم

الاولي : في نفس مبني المطاعم هتلاقي زي مول صغير كدة ممكن تقضي وقتك فيه

التانية وهي الاروع : فيه خلف فنادق نايجرا الشهيرة ..مدينة ترفيهيه تحفةةةةة

هناك هتلاقي كل حاجة

اماكن العاب رائعه للاطفال وملاهي

اماكن ترفيهية للكبار وبيوت اشباح وكهوف وطاويط ورحلة تحت الارض وخزعبلات من دي

ومجموعة من اشهر المطاعم والكافيهات العالمية زي رينفوريست ( موجود منه في سيتي ستار القاهرة في اخر دور وهما 5 او 6 فروع في العالم بس ) وهارد روك كافية الشهير ..ربنا يتوب عليك من هورتونز يا تو

مكان لا يترك بصراحة

بعدها استمتعنا بجولة ليلية بالاتوبيس تحفة بردة

لييه؟

بالليل كل الغابة اللي خلف نياجرا مزوقينها برسومات بالوان معمولة من الانوار الكهربا الملونة مخليين الغابة بالليل كانها فيلم خيال علمي كبير وانت ماشي جواه

حتة كدة تلاقي الاشجار بينها مخلوقات جوراسيك بارك منورة بانوار جميلة واحيانا متحركة زي ديناصور طائر بيهبط علشان يخطف فريسة

ومرة تلاقي مكان كامل معمول باشهر ابطال والت ديزني زي سنو وايت والاقزام وغيرة وغيره

وشوية كانها غابة مشروم عملاقة

ومرة كائنات فضائية

كل دو باين كانوار هادية كدة والغابة كلها مضلمة شكلها رهيب

بس اللي وقف شعر راسي هو رسمة كبيرة

فيها الكعبة والمسجد الحرام وناس بتطوف حوالين الكعبة ؟؟؟!!!!!!!!!!

وجنبها الشمعدان بتاع اليهود

وجنبها شجرة الكريسماس والصليب

التلاتة جنب بعض كهربوني بصراحة ؟؟

ياااه ؟؟ لو اصحاب الاديان السماوية يبقوا كدة ..ربنا واحد وانبيائنا اخوة ؟؟ ونهدي بقة كدة ونعيش مع بعض واحنا بس اللي من حقنا نفخر باننا لا نعبد حجر ولا وثن ؟؟؟

بس بردة حرية الاديان والعبادة في كندا وعدم العنصرية نموذج لا اعتقد ان فيه زيه في العالم ابدا

فيه مثل في كندا قاللي عليه المهندس ياسر

عايز تعبد حجر براحتك ..بس ما لا تقذفني به

والامثلة اللي انا شفتها بردة كفاية

مثلا

وانا في المطار يوم ما كنت راجع

عايز اصلي العشا

رحت اتوضيت وبعدين موش معقولة هاقف في وسطهم واصيح ..هو القبلة منييييييين

فاستنضفت ظابط امن مطار كدة وسالته

ممكن تدلني على اتجاه الشرق لو سمحت

قام قاللي بابتسامة عريضة كدة

انت شكلك عاوز تصلي

قلتله بابتسامة مذهولة بلهاء كدة اه ه ه ه

قاللي وماتصليش في المسجد ليه ؟

قلتله نعم ؟؟ قاللي عندنا هنا مسجد ووصفلي

المهم مشيت في اتجاه الوصف

وبعدين قلت اتاكد لاكون ماشي غلط

فلقيت مجموعة تانية من الموظفين كلهم عرق اوروبي

وقفت سالت وانا مكسوف

ردوا عليا وكاني باسالهم هو باب المطار منين

معروف جدا

والصدمة الكبري اللي قضت عليا ساعتها

المسجد جنب تيم هورتونز !!!!!

يارب توب عليا بقة من تيم هورتونز دة ....دة انا كنت خايف الاقيه فتح فرع في حمام الاوضة في الفندق

دعيت عليه وانا باصلي

وفعلا لقيت مسجد في منتهي الشياكة وسجاد الصلاة المعتاد ورسمة القبلة وفوقيها بالعربي ايه ( شهر رمضان الذي انزل فيه القران )

وجنة كنيسة صغنونة شيك كدة فيها صفوف كراسي وصليب على الحيطة والبينج بتاع القس او الواعظ

حاجة جميلة جدا ترد الروح وتحسسك باحترام الناس دي لعقيدتك وديانتك بدون اي تميز

مثل اخر واتكرر كتير

اكتر من مرة دخلنا مطعم فخم وشيك ..الله يخرب بيوتهم

المهم

ونطلب صنف كدة ..وقبل مانقول الاحتياطات المعتادة ..لا خنزير ..لا خمره ..ماتتعملش على صاج كان معمول عليه خنزير او لحمة بخمور او او

قبل مانتكلم

الاقي الوايتر يقولنا خدوا بالكم انتوا مسلمين ( من حجاب مراتي موش من الجلبية والدقن ) دة بيدخل فيه خمور

حتى ياربي في نايجرا اون ذي لايك اللي اشك ان فيه حد ركعها فيها بردة واخدين بالهم وبيحترمك

الدرس المستفاد من القصة اللي فاتت ...خدوا بالكم ...المسجد جنب توم هورتونز

بعد الجولة دي كانت الشلالات نورت بالوان باضائات جميلة بكل الوان الطيف بسبب انوار مسلطة عليها من فوق الجبل

الرجل خدنا فوق الجبل وودانا في غرفة التحكم باضاءة الشلالات

وقالنا كل واحد يوقع اسمه وبلدة في سجل الزيارات ويخش يلعب ويغير في الوان الشلالات براحته

العبوااااااااااااا

متعه انك تقعد تغير في الزراير وتبص تلاقي شلالات نايجرا بضخامتها ورهبتها وانت بعيد عنها جدا تتلون اخضر وازرق واحمر

حاولت الون عليها علم مصر الاحملر والابيض والاسود

بس دايما بقية الاوان الرزلة كانت بتبوظلي العلم

ماهو انا بردة في احلى اماكن كندا وانا في قمة استمتاعي كنت بادندن وانا ماشي ..حلوة بلادي السمرة بلادي الحرة بلادي

وفي ايام الي بردت فيها مع المطر والويند في اخر يوم كدة قبل ما نسافر كنت بادندن ..حلاوة شمسنا تراراا بتاعة فرقة رضا

اللذيذ بقة ان السواق طلع قالنا في المايك

في حالة انك قلت لاهلك ولاصحابك انك لونت نايجرا وماصدقكش

ادي شهادة من ادارة الشلالات بتقول كدة

وقام مدينا شهادات فاخرة دوبلكس مختومة من ادارة نياجرا بارك عليها اسامينا بتقول اننا نشهد ان السيد فلان الفلاني لون شلالات نياجرا

وعنوانها من فوق بالبنط العريض جدا

انا اضأت نايجارا فواز !!!! وعليها صورة الشلالات متلونة بالليل

تحفةةةة

وكدة انتهت رحلة نايجرا على شخير الراكبين طول السكة واحنا راجعين بما فيهم السواق

المهم

الرحلة التانية

تبع الفندق بردة

جولة حرة في داون تاون مدتها ساعتين بالباص

تمنها 50 دولار للفرد

سواق سكر سويسري الاصل هاجر لكندا سنة 88 وحاليا اصحاب انا وهو

سكر مكرر

علشان ماطولش عليكم احلى الاماكن اللي تتراح في داون تاون:

1- طبعا سي ان تاور :

اركب الصاب واي وانزل في محطة يونيون ..اقرب محطة من بحيرة اونتاريو وتقع في شارع كينج

اطلع منه واسال على شارع فرونت هتلاقية جنبك بخطوتين

امشي في اتجاه الغرب دقائق هتلاقي يافطة كبيرة تخش منها على السي ان

النصيحة ماتروحش في يوم فيه ضباب او مطر علشان تستمتع بالمنظر

تورونتو كلها نمنم من فوق واحلى اتجاه هو اتجاه البحيرة

هاتشوف جزيرة تورونتو الرائعة ..بينها وبين كورنيش تورونتو داون تاون 10 دقائق بالمعدية والطبيعة هناك اكثر من ساحرة

وهاتشوف المطار الصغير بتاع سيتي سنتر اللي بيقرفك في جوجل ايرث كل شوية لما تنزل على تورونتو وانت بتحلم ومستني التاشيرة !! عقبالكم كلكم ان شاء الله

2- شارع كينج دة بيسموه شارع الترفيه

تحديدا كينج ويست

يعني تاخد تقاطع يانج الشهير من كينج وتاخد الاتجاه الغربي من النقطة دي

هتلاقي مليار مطعم من كافة ثقافات العالم ..انجليزي فرنساوي ايطالي هندي صيني يوناني بس مافيش عربي wst::)

هتلاقي كمان اشهر مسرح هناك ..ساوند او ميوزيك ..افتتحته اميرة القلوب ديانا وسمي على اسمها ..مشهور بان بيتعمل فيه دايما اشهر المسرحيات العالمية وروايات الادب العالمي زي الجميلة والوحش .. ولورد اوف رينجز ..وارثر ..ومسرحيات شكسبير

لو انت نظام مسرحيات حزمني يا والخرط دة يبقي المكان دة غير ملائم وانسي اللي انا قلتله

وهتلاقي كمان فيه اقبال جماهيري واخر حفلة الساعة 8 مساءا

هتلاقي كمان المسرح الكوميدي الكندي بيقدم اشهر العروض الكوميدية وعلى فكرة كندا ام الكاميرا الخفية في العالم حاليا

اصلا التمشية في الشارع دة تحفة ومصورلكم حاجات كتيرة منه

3- شارع شيرش ..الشارع دة في كمية كنائس اثرية رهيبة ..ااقل واحدة عمرها 200 سنة وتعتبر تحف فنية لا تعوض

4- لو غاوي متاحف عندك رويال اونتاريو ميوزيم ..وما يتوهش ابدا ..ارك الساب واي وانزل محطة ميوزيام ..بس خلاص

فيه على كل لون ياباتيستا

جميع انواع الحضارات ..صيني هندي فرعوني هنود حمر هود زرق الماو ماو اي حاجة في الدنيا وكمان الانسان البدائي

وجزء للاحياء الطبيعية واحلى واروع جزء فيه في نظري هو الجيولوجيا او الاحجار الطبيعية

اسم السيكشن دة ..كنوز الارض

رااااائع ..نوعيات من الكوبلت والكوارتز والجرانيت والاحجار الكلسية ولا شفت ولا هاشوف

وطريقة العرض بتاعته تحفة ..شاشات كمبيوتر صغيرة تختار شكل الحجر اللي تختاره ويجيبلهم جابوة منين وتركيبه الكيميائي وخواصه واسمه وكله

بس بجد تحفة

لكن المتحف بصفة عامة منظم حلو جدا وواسع لكن مافيهوش اثار قيمة

يعني مومياء واحدة عندنا تمنها يسوي المتحف دة باللي فيه

لكن الفرق ان الموميا عندنا يا عيني بتاعاني من اللي بيعاني منه البشر اللي بره المتحف !!

زحمة ومافيش تنظيم للاسف الشديد

قفلوا علييكي يا حلوة تابوت !!

طبعا فبه متاحف تانية متخصصة زي متحف الفنون ومتحف للسيراميك ومتحف لقشر اللب وخلافة

4- كمان فيه منطقة ورا المتحف طالما انت رحت هناك تعتبر من اروع الاماكن لقضاء فترة بعد الضهر هناك

بجد دة مشوار موش هاتندم عليه

شوبنج ومطاعم بسعر معقول ..وكمان اشهر فروع الماركات العالمية زي بيير كاردان وكارتية وغيره وغيره ..هتلاقي الفرع الرئيسي موش المنتجات قصدي

المنطقة دي تبدا من شارع المتحف وتتجه شمالا الى ان تصل الى تاني اشهر شوارع تورونتو شارع بلور بس غرب

5- احلى احلى سوق شفته في حياتي

مصوره من برة مع الصور

سوق سانت لورنس كاركت

السوق دة علشان تروحة انزل من محطة كينج وامشي في اتجاه شرق يانج

10 دقائق مشي

دة مبني اثري فيه سوق الخضار واللحمة والسمك ومتطلبات البيت على طريقة المحلات البلدي بس من غير 3 بجنيه ياااااااا بصل

ولو اها وحشتني اوي اوي 3 بجنيه يا بصل ..تلاقيها بقت 3 ب 300 جنيه يا بصل الوقت !!!

دة الى جانب مطاعم وكافيهات وتيم زفت كالعادة

شفت خضار وفاكهة ماشفتش في نضافتهم وطريقة تغليفهم والوانهم في الخليج كله ..ولا دبي ولا السعودية ولا البحرين ولا قطر ولا مصر ..لا ..فيه في مصر حاجات حلوة والله بردة بس شخلل جيبك

ومحلات متخصصة جبنه بس

مليار نوع جبنه من كل بلاد العالم

ومحلات متخصصة خمور والعياذ بالله

ومحلات لحمة بالهبل مزوقنها حلو وعاملين جميع انواع الستيك والريش والسوسيس بانواعه والميت رولز و طبعا ماسابوش حاجة الا لما دبحوها ..تيران وعجول وبقر وغنم وخنازير وغزلان ورنة ورومي وفراخ وطيارات بوينج

السمك ما بهرنيش اوي ..كله تونا وسلمون وانواع متحورة من المرجان وسمكه في الخليج اسمها الحمرا ..وطبعا تشكيلة لا بأس بها من الجمبري الضخم والمحار واللوبيستر والكاليماري بس اللي لفت انتباهي

الكابوريا الكنج ..رجلها ما شاء الله طول العيل الصغير كدة

من الاخر

سوق يستحق الزيارة

5- الحي الصيني

انزل محطة الساب واي في سبادينا

واختم باسبورك دخول الصين

صينيين صيننين يعني موش اي كلام

خش بس اي محل وقوله ضفري بيوجعني هايعملولك لبخة شاي مخصوصة لضفرك

بس نصيحتي

مكان لا يستحق الزيارة

6- اهم اهم حتة تروحوها جزيرة تورونتو

جنة من جنات الله في الارض

بس ماتترحش طبعا في الشتا

تنزلوا في محطة يونيون وتاخدوا اتجاه الجنوب لغاية الكورنيش واسال على الفيري دوك

هاتركبوا معدية ب 13 دولار وتبدا المتعه

الصور في الطريق

7- الباركات بالهبل ومنطقة الجامعه من اروع المناطق اللي فيها باركات هناك

انا تعبت !! روستخ شوية يا ولاد

8- نسيت طبعا اهم حته تروحها

ايتون سينتر

مول كبير وظريف وهاتقضي فيه يوم حلو اوي

وكمان فيه فروع شركات التصالات زي روجر وفيدو

من المهم ذكرة

انك من اي مكان في الداون تاون

لو نزلت تحت الارض هتلاقي مدينة تانية مساحتها تقريبا زي مساحة الداون تاون كدة تحت الارض

تمشي شوارع وشوارع تحت الارض في وسط الاف والاف من المحلات والمطاعم والبنوك وحتي مباني حكومية كلها كلها تحت الارض

طبعا تستخدم بشدة في ايام التلج والبرد

ممكن تنزل في محطة مترو وتتطلع بعدها ب خمس او ست محطات ..وتحت فيه يفط موضحه كل حاجة وتمشي فين وترجع منين

لازم تنزلو تتوهو تحت

مكان يستحق الزيارة

على فكرة انا خسيت جدا ورجعت سمباتيك بعد الرحلة دي

وبالعند فيك يا توووووو

البنزين خلص

يتبع ان شاء الله يا اصدقائي

خليتكم بالعافية

السلام عليكم

انا وصلت لحد هنا ...بس حكمل ان شا الله

سرد اكثر من جميل....ربنا يوفقك

[ehabtaher]

بس علشان ما تزعلش

ده الشلال اللى جنب بيت د الشامى فى لندن اونتاريو

بس بعيد شويه

[ehabtaher]

خلاص سامحتنى والا املى لك الصفحه صور

وبعدين ناخد انزار من كابتن تيمو

[ehabtaher]

اخر واحده

بس اعمل ايه

لما بالاقى صوره حلوه ما بستريحش الا لما تشوفوها معايا

[مراد أنور]

حمداً لله على السلامة يا زيزو :ninja:

وأبشر يا عم خيراً بالتطعيم الطبيعى ضد الإنفلونزا :lol:

وكمان بغفران الخطايا والذنوب وإن كنت أظنك قليلها :lol:

وبالنسبة لأستاذ إيهاب :wub:

أهو ال3 صور الأخار دول عوضوا الصورة القرف إللى قبلهم wst::

بالله عليك يا شيخ ماتكررها تانى

ده المشرف كان حيرجع فى المنتدى wst::

أنا مش عشان خاطرى أنا عشان خاطر المشرف wst::

[المصريه]

الاستاذ الفاضل زناتى

مداخله متاخره كثيرا ولكن كان لابد ان اقول لسيادتكم الف حمد الله على السلامه ويارب تكون بدايه موفقه وجميله لشخصك المحترم

وفعلا كما قرات من التعليقات ربنا اكرمك بناس ذو اخلاق عاليه ردا لما تفعله ربنا يوفقك فى بقيه خطواتك وتكون عونا ايضا لكل مصرى يذهب الى كندا

اكمل بقا قراءه تجربتك وبالتوفيق دائما

[kaplan]

حمدالله على السلامة يا باشمهندس زناتي ، معلش هي متأخرة شوية

[ناوية ع الهجرة]

باشمهندس زناتي الف سلامة عليك معلهش متاخرة شوية والله ما كنتش اعرف

اصلي مشغولة شوية اليومين دول

انا عارفة الدور ده رهيب سبحان الله اشد بكتير من اي انفلونزا تانية اصله جاللي في شهر اكتوبر الماضي

وبرضه ما عملتش مسحة بس الاعراض كانت باينة

عموما حمدلله على السلامة واجر وعافيه ان شاء الله و خد بالك لتعدي جيجي

[Dr Remon]

الف حمد لله على سلامتك يا زناتى.. معلش دور و خلص :lol:

[znaty]

اسف على التأخير انا لسه عارف دلوقتى اصل بقالى فتره مبجبيش هنا

حمد لله على سلامتك يا بشمهندس ويارب يتم شفاك على خير

الله يسلمك يا ابو الاعناب ..لا ماتغيبش عنا اتعودنا عليك بجد يا صاحبي :h!!!h:

[znaty]

اخر واحده

بس اعمل ايه

لما بالاقى صوره حلوه ما بستريحش الا لما تشوفوها معايا

حظك حلو ..الصورة فعلا حلوة :h!!!h:

[znaty]

حمداً لله على السلامة يا زيزو

وأبشر يا عم خيراً بالتطعيم الطبيعى ضد الإنفلونزا :coffeenews:

وكمان بغفران الخطايا والذنوب وإن كنت أظنك قليلها :coffeenews:

وبالنسبة لأستاذ إيهاب

أهو ال3 صور الأخار دول عوضوا الصورة القرف إللى قبلهم hpc:!:

بالله عليك يا شيخ ماتكررها تانى :h!!!h:

ده المشرف كان حيرجع فى المنتدى

أنا مش عشان خاطرى أنا عشان خاطر المشرف

شفت اللي حصللي يا ابو المرامير ؟؟الله يسلمك يا صاحبي والحمد لله عدت على خير

[znaty]

الاستاذ الفاضل زناتى

مداخله متاخره كثيرا ولكن كان لابد ان اقول لسيادتكم الف حمد الله على السلامه ويارب تكون بدايه موفقه وجميله لشخصك المحترم

وفعلا كما قرات من التعليقات ربنا اكرمك بناس ذو اخلاق عاليه ردا لما تفعله ربنا يوفقك فى بقيه خطواتك وتكون عونا ايضا لكل مصرى يذهب الى كندا

اكمل بقا قراءه تجربتك وبالتوفيق دائما

جزاكم الله خيرا اختي العزيزة واهتمامك بالتجربة حاجة تفرحني جدا

[znaty]

حمدالله على السلامة يا باشمهندس زناتي ، معلش هي متأخرة شوية

الله يسلمك يا عزيزي ..مافيش تاخير ولا حاجة ..دة حتى كورس العلاج ماخلصش :h!!!h:

شكرا على ذوقك

[znaty]

باشمهندس زناتي الف سلامة عليك معلهش متاخرة شوية والله ما كنتش اعرف

اصلي مشغولة شوية اليومين دول

انا عارفة الدور ده رهيب سبحان الله اشد بكتير من اي انفلونزا تانية اصله جاللي في شهر اكتوبر الماضي

وبرضه ما عملتش مسحة بس الاعراض كانت باينة

عموما حمدلله على السلامة واجر وعافيه ان شاء الله و خد بالك لتعدي جيجي

الله يسلمك يا اخت ناوية :h!!!h: وربنا يستر عليها بس..انا عنيا عليها كل ثانية بس هيا للاسف من النوع اللي مابيشتكيش اصلا ..بيكتم جواه

[znaty]

الف حمد لله على سلامتك يا زناتى.. معلش دور و خلص :coffeenews:

الله يسلمك يا صاحبي ..الحمد لله ..دور وعدي فعلا :h!!!h:

ربنا يسلمنا كلنا يا صديقي

[ehabtaher]

لو حد عايز يقعد فى حته كويسه عند نياجرا فاللز

يقعد فى الهيلتون :h!!!h:

بس ممكن تعمل كامب جنب نياجرا فاللز برضه

ملاحظين حاجه فى صوره نياجرا فاللز القديمه دى

كان الجو متلج جدا لدرجه تجمد المياه فى الشلالات

ولو حد شاف نياجرافالز دلوقتى اكيد حيلاقيها اكتر تدفقا من زمان وكمان مافيش تجمد لسطح المياه

وده معناه

ان ان شاء الله

الجو حيبقى كويس لما نطلع على المعاش بعد عمر طويل اذا ربنا اعطانا العمر

وحيكون احسن من دلوقت

وذلك نظرا لزياده حراره الجو

وانا من راىى ان كندا متشتركش فى معاهده خفض درجه حراره الارض

كده حتبقى كويسه

[ehabtaher]

ان شاء الله كندا حتبقى كده فى الشتاء بعد عمر طويل