إحنا إتقابلنا قبل كدة؟!!!

[SoSo R]

شوفى يا سيتى انا بالنسبة لية بقول الكلمة دى (يااااااا كاننا نعرف بعض من زمان )

للناس اللى بيبقى فى تقارب كتير من الطباع والروح وطريقة الكلام

بيحصل نوع من الالفة كدة من اول دقايق ومبنبقاش مستغربين يعنى يا اختى :lol:

فبنعلق مع بعض علطوووووووووووول ههههههههههههه :lol:

خدى دى علشانك بمناسبة افتتاح الموضوع الجديد :blink:

أزيك يا جميل كل سنة وأنتى طيبة وعام سعيد عليكى وع العيلة..

هو الألفة اللى بتقوليها دى ...بتبقى مع الناس اللى روحها حلوة...

بتحسى إنك تعرفيهم من زمان أو إنكم أصحاب أو قرايب...

بس أنا بحكى أكتر على الشكل...عارفة ممكن تكونى ماأبتدتيش تكلمى حد ولا فتحتى مهاه حوار خالص ومع كدة حاسة ومتأكدة شفته قبل كدة...

أنا الموضوع دة بأه يحصل معايا كتير..

أنا أبتديت أقلق على روحى :lol: ...بيقولوا لى وشك من النوع المألوف :rolleyes:

تحياتى

سوسورانى

[SoSo R]

الموضوع ده بيحصل ليا كتير و لكن كنت بقول لاني بتعرف علي ناس كتيرة اكيد بيحصل ليا لدرجة اني بدات احس اني عندي مشكلة نفسية من كتر ما بحس اني اعرف ناس شبة الناس اللي بقابلها و لكن اكتشفت الحقيقة بعد مدة و هي تفسير منطقي و سهل ..

اللي بشبه عليه ده يا اما انا شوفته فعلا يا اما شوفت واحد شبهه جدا ..

و حكيلكم علي واحد جاري كل اما اشوفه اقعد ابصله و اقول جوايا انا شوفته فين ده مش عارف و بعدين في مرة وقفته و كان ماشي بسيارته جمب البيت و قلت بقولك اية انا اعرفك و بشبه عليك انت منين و شغال فين طيب درست فين .. المهم اني ما عرفتش اوصل لحل لان كل الاجابات غير متطابقة مع ظروفي ..

قلت له مش مشكلة طيب عاوز اتعرف عليك و نقعد مع بعض و نتعرف من جديد .. و فعلا ظبطت موعد و اتقابلنا بعد يجي شهرين او اكثر و احنا بندردش و بنتكلم جت سيرة الرائد (...) و ده كان ظابط في مركز التدريب و كان مرووش شوية له نوادر و قصص و حكايات و لقيته يعرفه و بدأت عيني تلمع و تزيد وتيرة الاسئلة في هذه الحقبة المنيلة في حياتي الشهر و نص بتاعات مركز التدريب في الجيش و طبعا وصلت الحمد لله للي كنت بدور عليه و اكتشفت ان البشمهندس ده طلع زميلي في نفس العنبر في مركز التدريب و قعدنا نفتكر النوادر و الحكايات و القصص و بعد الجيش ايه اللي حصل و كده يعني ...

تحياتي لك سوسراني علي الموضوع حسستيني اني مش لوحدي ههههههههههه و رجعتي لي ثقتي اني مش مريض نفسي بسبب موضوع الشبه ده

أهلا يا أستاذ عمرو...منور

بص حضرتك أنا برضه كنت باشك فى نفسى إن فيه حاجة غلط...

لدرجة جوزى قالى هو أنتى كل ماتشوفى حد تقولى أنا شفته قبل كده؟؟

يعنى تقريبا بيشك فى قوايا العقلية :lol:

فأنت كدة طمنتنى على روحى برضه

أنت عارف المشكلة إيه؟؟؟

الموضوع دة مرهق قوى ...يعنى لما بشوف حد أقعد أعصر فى دماغى...عشان أفتكر شفتو فين وإمتى وإزاى؟؟

والغريب إن ساعات ذاكرتى فى الوجوه بتبقى قوية جدا...وساعات بتبقى منيلة بنيلة :rolleyes:

دة فيه واحدة أول ماشفتها ..كنت لسه واصلة كندا بقالى أسبوع...ومتأكدة إنى أعرفها...بس فين...الله أعلم

وكانت تعرف واحدة أعرفها..

بعد عصير ونشر دماغى كل اللى إفتكرته...مشهد إنى باتفرج على صور خطوبتها وفاكرة الصور ...لأ وكمان لون فستانها فى الخطوبة والبوزات اللى كانت متاخدة...

لكن لا فاكرة إسمها ولا هى متجوزة مين؟؟

ولا بتشتغل إيه؟؟

حاجة كدة زى كأنى فاكرة صورة من حلم والصورة بهتااااانة

المهم بعد أكتر من مرة...كلمتها...قلتلها بصى أنا أعرفك بس مش فاكرة إزاى وفين...وكل اللى فاكراه................إلخ.

طلعت أعرفها من الكليه أكبر منى بكام دفعة وكانت ساكنة فى مدينة نصر برضه..

وآخر مرة شفتها كان من حوالى 12 سنة

شفت بأه الموضوع مرهق إزاى إنك تفتكر بس يستاهل :blink:

تحياتى

سوسورانى

[SoSo R]

فعلا هوه احيانابيكون في اتنين مش شبه بعض شكلا لكن الناس بتؤكد انهم شبه بعض .وده بيكون تشابه في الروح والدم (الشخصيه وطرقه الكلام وكده)

لكن ممكن حد انتي تشوفيه لاول مره وتعتقدي انك شوفتيه فعلا ده بيكون1-اما شوفيه قبل كده من زمان ومش فاكره كان امتى وفين ؟

2-بيكون شبه حد انتي تعرفيه فعلا والتاْلف ده بيكون ناتج عن تشابه شكل الشخصيه دي مع االشخصيه اللي الواحد يعرفها وبيحبها

لكن لو شبه حد الواحد ما بيحبهوش فماعتقدش ان الواحد هايشبه عليه (لاحسن يطلع هوه الشخصيه دي فعلا) :blink:

المتجوزين والناس اللى بتحب بعض بيبقى فيهم الموضوع دة..

تحسى إنهم شبه بعض أو قرايب...تلاقى بيتكلموا بنفس الطريقة..

بيستخدموا نفس المفردات..

من الآخر بيبقوا روحين فى زكيبة :rolleyes:

تحياتى

سوسورانى

[myusername]

هذا الموقف... عموما يحدث للجميع فى مصر ما بين آن و آخر.. و لكن على فترات متباعدة.

اما فى بلاد الفرنجة, فالموضوع بيزيد شوية, و ده لعدة اسباب انثروبولوجية و سيسيولوجية متراكبة. :blink:

الاسباب هى اولا ان المصريين كلهم تقريبا عاداتهم واحدة... اسلوب تفكيرهم واحد, و ردود افعالهم واحدة... طبعا مش شرط تكون واحدة بالظبط يعنى, و لكن متقاربة جدا... و طبعا ده دون الدخول فى التقسيمات بتاعت المجتمع اللى احنا عايشينها: ارياف, متعلمين, حضر, بلا بلا بلا bla bla bla

و عشان كده - تقريبا - اى حد بيسافر برة.. بيعرف المصرى على طول, و حتى تقدر تفرقه عن العرب الاخرين.

سلوكيات المجتمع اللى اتربينا عليها, و اللى مش هنعرف نغيرها الا بعد سنين طويلة من الهجرة.. هى اللى بتفضحنا. السلوكيات دى مش شرط تكون حلوة او وحشة... ممكن تكون كلمة, هرشة, نظرة.. اى حاجة :rolleyes:

يعنى من الاخر... لما بتكونى فى مكان بتتنشأى فى على حد مصرى... و تلاقيه.. بتحسى بألفة فورا بسبب الكلام اللى فوق ده, و زى ما قلت.. بتبقى واضحة اكتر فى الغربة عشان السلوكيات و الحياة المختلفة.

يعنى عشان اكون واضح اكتر: شىء طبيعى ان لما تعيشى فى مجتمع مختلف عنك, و تلاقى حد شبهك فى حاجات كتير, انك تحسى بالالفة و الحنين ناحيته.

طبعا ده بالاضافة ان فيه حاجة اسمها الروح... و هى دى اللى بتساعد اكتر عشان تزود الالفة او تقللها.

تم تعديل 2 يناير 2010 بواسطة myusername

[SoSo R]

هذا الموقف... عموما يحدث للجميع فى مصر ما بين آن و آخر.. و لكن على فترات متباعدة.

اما فى بلاد الفرنجة, فالموضوع بيزيد شوية, و ده لعدة اسباب انثروبولوجية و سيسيولوجية متراكبة. :lol:

الاسباب هى اولا ان المصريين كلهم تقريبا عاداتهم واحدة... اسلوب تفكيرهم واحد, و ردود افعالهم واحدة... طبعا مش شرط تكون واحدة بالظبط يعنى, و لكن متقاربة جدا... و طبعا ده دون الدخول فى التقسيمات بتاعت المجتمع اللى احنا عايشينها: ارياف, متعلمين, حضر, بلا بلا بلا bla bla bla

و عشان كده - تقريبا - اى حد بيسافر برة.. بيعرف المصرى على طول, و حتى تقدر تفرقه عن العرب الاخرين.

سلوكيات المجتمع اللى اتربينا عليها, و اللى مش هنعرف نغيرها الا بعد سنين طويلة من الهجرة.. هى اللى بتفضحنا. السلوكيات دى مش شرط تكون حلوة او وحشة... ممكن تكون كلمة, هرشة, نظرة.. اى حاجة :lol:

يعنى من الاخر... لما بتكونى فى مكان بتتنشأى فى على حد مصرى... و تلاقيه.. بتحسى بألفة فورا بسبب الكلام اللى فوق ده, و زى ما قلت.. بتبقى واضحة اكتر فى الغربة عشان السلوكيات و الحياة المختلفة.

يعنى عشان اكون واضح اكتر: شىء طبيعى ان لما تعيشى فى مجتمع مختلف عنك, و تلاقى حد شبهك فى حاجات كتير, انك تحسى بالالفة و الحنين ناحيته.

طبعا ده بالاضافة ان فيه حاجة اسمها الروح... و هى دى اللى بتساعد اكتر عشان تزود الالفة او تقللها.

أنا موضوع الناس اللى بتشبه عليا ده ملازمنى من أيام ماكنت فى مصر...

ولازم أكون أخت حد أو أقرب لحد...

لما جيت كندا بأه...

ألاقى ناس بتشبه عليا...وبيكلمونى بالأنجليزى...

وبعدين بيطلعوا عرب...

مرة واحدة فلسطينية ...

ومرة سورية..

ويقولولى أنتى أكيد أخت فولانة -مش مدام فولانة المشرفة طبعا- :closedeyes:

ويحلفولى إننا توأم...

واضح إن ليا قرناء بكل الجنسيات...

بادور على حد يكون عنده نفس الحالة

تحياتى

[مغتربة]

بصى يا ستى

موضوع الشبه ده موضوع كبير

بالنسبه ليه

فانا دايما الناس تقولى انتى شبه الممثله فلانه و المغنيه علانه

و الموضوع منحصر فى تلاته

الاولى اعترف ان انا شبهها جدا

لكن الاتنين التانيين مش قوى

كمان انا ليا صديقه عزيزه عليا ( اعز من اختى )

و كنا دايما فى الكليه الاربع سنين يوميا سوا مبنفترقش عن بعض بتاتا كل اصدقائنا كمان مشتركين

بمرور الوقت الناس بقت تقولنا اننا شبه بعض

بس حقيقى احنا مش شبه بعض و لا حاجه بس يمكن الروح

لكن انا اكتشفت بقى ان فى ناس ساعات لما بتكون عايزة تفتح كلام مع حد تقوله انت شبه كذا او انا شوفتك فين قبل كده

و هى لا بتكون بتشبه عليه و لا حاجه بس فتح كلام