الحكاية دي صحيحه ؟ نشوف..

[doha]

من يومين كنت بتناقش مع وحده اعرفها فحكت لي عن موقف تعرضت له فكرني بقصة قريتها زمان ..

يحكى ان حلاق في احد الدول الغربية فكر يعمل حاجه تطوع لمجتمعه فقرر ان كل يوم اثنين بدال ماياخذ اجازه هيحلق للناس ببلاش ..

في يوم الاثنين الاول جاله بستاني .. ولما خلص له حلاقه وهم البستاني بدفع الحساب الحلاق اعتذر وقاله لاه انا مباخذش يوم الاثنين فلوس من حد انا بحلق خدمه للمجتمع ..

البستاني شكر الحلاق وانصرف

ثاني يوم الصبح الحلاق بيفتح المحل وجد امام الباب سلة كبيرة من الورد مع بطاقه شكر رقيقة من البستاني ..

الاثنين الي بعده حضر للمحل خباز .. بعد ماحلق وخلص وهم بدفع الحساب الحلاق اعتذر برضه وقاله لاه انا الاثنين بحلق ببلاش خدمه للمجتمع ..

الخباز شكره وانصرف

ثاني يوم الحلاق جاي بيفتح المحل لقي سلة كبيرة امام الباب فيها كمية من الخبز الطازج والمعجنات مع بطاقة شكر رقيقة من الخباز ..

الاثنين التالي حضر للمحل مهندس مصري ..

بعد ماحلق وخلص وهم بدفع الحساب الحلاق اعتذر كما العاده وقاله معليش مش هاخذ حساب انا يوم الاثنين بحلق ببلاش خدمه للمجتمع ..

المصري شكر الحلاق وانصرف ..

ثاني يوم الحلاق ملقيش حاجه عند الباب ..بس الاثنين الي بعده ولما هم الحلاق بفتح باب المحل وجد ايه ؟

وجد المصري باعت ...

جيرانه

وصحابه

وعياله

..............................

طبعا الحكايه دي نصب خالص ومش ممكن تحصل في الحياه العاديه ولا عمر حد فينا تعرض لها .. مش كده ؟ :closedeyes:

[ssmaly]

ردى على الموضوع ده بحكاية حقيقة

اول ما الصيدلية الى بعمل فيها هنا فى الكويت تم افتتاحها كانوا اصحابها عاملين ورقة مكتوب فيها قياس الضغط و قياس السكر مجانى (كانت طريقة بلدى )

ولاحظت ان المصريين عندما يقيسوا السكر يصروا على ان يدفعوا اى مبلغ وانا اقولهم انها مجانى فكانوا بيقولوا علشان نقدر نيجى تانى نقيس بدون احراج (وطبعا ماكنتش باخد منهم )

وكانت بعض الجنسيات الأخرى بيحبوا ان يردوا الخدمة المجانية بأنهم يشتروا اى شىء وممكن جهاز سكر

وبعد فترة لاغيت الموضوع ده

وفى يوم من الايام لاقيت واحد منتظرنى وبقولى انه عايز يقيس السكر قلت له مافيش قياس هنا

قالى انا جارى جاء منذ فترة وقاس السكر مجانا وهو اللى باعتنى!!!!!!

بس ماكنش مصرى الجنسية

كان جنسية عربية من بلاد الشام

[se_ Elsyed]

مانا مش فاهم هي نكته ولا حدوته ولا رواية ؟

أياً كانت فهي مستفزة للغايه

وأعتقد لو شيلنا كلمة مصري وحطينا أي جنسية تانيه .. هايقول نفس كلامي ...

تسمحي لي أحذف الموضوع ده يا اخت ضُحى ؟

ولا عندك معنى وفكره معينه عاوزه توصليها وغحنا مش فاهمينها ؟

[مصري أصيل]

من فتره كانت الشركة عندنا بتعمل معارض سنويه لعرض منتجاتنا و كانت بتعمل هدايا يتم توزيعها علي رواد المعرض مثل أقلام وشنط أوراق و محافظ و ميداليات و أشياء من هذا القبيل كنوع من الدعايا .

و لما بطلنا الحكايه دي بقت ناس معينه من أصحاب البلد تيجي تطلب الهدايا دي بالإسم و بالرغم إنهم مش محتاجين.

تسمحي لي أحذف الموضوع ده يا اخت ضُحى ؟

ولا عندك معنى وفكره معينه عاوزه توصليها وغحنا مش فاهمينها ؟

فكرة الموضوع واضحه و هي إننا الشعب الوحيد الإنتهازي الشعب الوحيد الإستغلالي الشعب الوحيد الجلياط

مع إن الموضوع في موضوعات خفيفه الا إن الموضوع يحرق الدم مش عارف لو كانت موضوعات تقيله كانت بقت ايه ؟؟؟؟

و الأخت صاحبة الموضوع إختارت يوم الإثنين عشان الراجل يخصصه للحلاقه المجانيه مع إن الإثنين أجازة الحلاقين.

[msayed]

لأ ما تحذفش الموضوع يا س س سيبه ونتحاور

إيه يا عم هو إحنا عندنا بطحة مخبيينها ولا إيه

أنا بأجهز مداخلة ياريت ما تحذفش الموضوع

[MoHaMMeD EgYpT]

لا يا سي السيد باشا بلاش تحذف الموضوع و الموضوع في الاول و الاخر هزار :danger:

بس بصراحة الموضوع ناقص :blush2: ناقص عنوان الحلاق علشان انا عاوز اروح له احلق عنده يوم الاثنين انا كمان ولا هما المهندسين احسن مننا :blush2:

[msayed]

فيه نقطة أساسية خاصة بالمصريين وهى أن لو واحد عاوز يحترمهم سوف يجد بكل سهولة ما يحترمهم عليه، ولو واحد عاوز لايحترمهم فسوف يجد مبررات لذلك.

لأننا اكبر الدول العربية فى العدد وبالتالى فلنا جاليات كبيرة فى كل العالم، الجاليات دى فيها المتعلم المثقف وفيها الأمى أو الدون المستوى زى أى شعب.

ولو عديمى اللياقة 0.5% من أى شعب فمعنى ذلك لو جالية مليون سيكون منها خمسة آلاف واحد يعيثون فى الأرض فساداً ويشوهوا سمعة المليون، وخصوصاً لو المليون دول فى حالهم ومش بتوع بروباجنده زينا. وأيضاً لو الطرف الآخر بيتلككلك وعاوز يمسك عليك هفوات ليثبت لنفسه أنه أفضل منك.

وعلى فكرة فيه مننا بيعمل كده مع الشعوب التانية أيضاً وكل الشعوب بتعمل كده مع بعضها.

يعنى أحياناً تجد مصرى فى السعودية واخذ صورة سلبية عن الإخوة السعوديين لا يريد أن يغيرها حتى لو رأى ألف صورة أخرى تعكس صورته هذه فهو خلاص ربط على كده.

سأحكى لك حكاية، كنا خمسة مهندسين مصريين وذهبنا إلى مطعم وطلبنا سندوتشات وداعبنا الراجل إللى بيعمل السندوتشات وكان سورى الجنسية وجنتل جداً، وأثناء ذلك دخل واحد مصرى يظهر من مظهره أنه فوضوى، الراجل سأله أحطلك كاتشب فقال له "حط لى كل السوائل إللى قدامك دى، بطريقة فجة بنظام أى حاجة ببلاش"، الراجل السورى وشه إتقلب وبقى يعامله بقرف والتانى ولا هو حاسس عمال يقولله "ياعم ماتزود الأصفر ده". المهم تعمدت أن أدردش مع الرجل السورى علشان أشوف إيه نتيجة الموقف، ففاجئنى بقوله، باطيب ولا يهمك هنا بيورد علينا كل الأنواع، وماكملش الكلمة جاله واخد من جنسية البلد إللى إحنا فيها "سعودى" طالب شاى بحليب، وطهقه أكثر من عمنا التانى بكثير فنظر لينا وابتسم.

طبعاً ممكن واحد غير أخينا السورى المحترم ده يعتبر إن الراجل بتاع الكاتشب ده هو صورة المصريين ويثبت الصورة فى رأسه وما يخرجهاش مهما شاف من تعامل راقى من أكثر المصريين.

وممكن أنا لو مقاييسى مختلة أثبت صورة السعودى هذه وأجعلها مقياس للسعوديين.

وأيضاً ممكن أثبت صورة العامل السورى المتحضرة وأجعلها صورة للسوريين ولا أرى فيهم أى عيوب.

عاوز تشوف الجنسيات صح أدخل بوفيه مفتوح فى فندق خمس نجوم وسترى كل شيء على المكشوف، سترى أنه لايوجد قاعدة تحكم أى جنسية، ستجد هناك القنوع وهناك المفجوع من كل الجنسيات.

ياريت أنا برضه تبعتلى عنوان الحلاق ...... على الخاص :blush2:

تم تعديل 12 ديسمبر 2009 بواسطة msayed

[doha]

مانا مش فاهم هي نكته ولا حدوته ولا رواية ؟

أياً كانت فهي مستفزة للغايه

وأعتقد لو شيلنا كلمة مصري وحطينا أي جنسية تانيه .. هايقول نفس كلامي ...

تسمحي لي أحذف الموضوع ده يا اخت ضُحى ؟

ولا عندك معنى وفكره معينه عاوزه توصليها وغحنا مش فاهمينها ؟

بالنسبة لهي نكته ولا حدوته ولا رواية هي نكته وصلتني زمان على الايميل وافتكرتها من يومين جراء موقف تعرضت له وحده اعرفها .. عامه انا بتذكر القصة او النكته دي كتير في مواقف بشوفها كتير فحبيت اشوف هو انا بس الي بشوفها ولا انتم معايا فيها ..

بالنسبة لحذف الموضوع لو معظم الاعضاء شايفين انه مسيء مفيش مشكلة احذفه انا معنديش مانع

من فتره كانت الشركة عندنا بتعمل معارض سنويه لعرض منتجاتنا و كانت بتعمل هدايا يتم توزيعها علي رواد المعرض مثل أقلام وشنط أوراق و محافظ و ميداليات و أشياء من هذا القبيل كنوع من الدعايا .

و لما بطلنا الحكايه دي بقت ناس معينه من أصحاب البلد تيجي تطلب الهدايا دي بالإسم و بالرغم إنهم مش محتاجين.

تسمحي لي أحذف الموضوع ده يا اخت ضُحى ؟

ولا عندك معنى وفكره معينه عاوزه توصليها وغحنا مش فاهمينها ؟

فكرة الموضوع واضحه و هي إننا الشعب الوحيد الإنتهازي الشعب الوحيد الإستغلالي الشعب الوحيد الجلياط

مع إن الموضوع في موضوعات خفيفه الا إن الموضوع يحرق الدم مش عارف لو كانت موضوعات تقيله كانت بقت ايه ؟؟؟؟

و الأخت صاحبة الموضوع إختارت يوم الإثنين عشان الراجل يخصصه للحلاقه المجانيه مع إن الإثنين أجازة الحلاقين.

معليش يااستاذ مصري ياريت متجاوبش بالنيابة عني ..

حضرتك لو شايف ان دي فكرة الموضوع فقول انا من رأيي ان فكرة الموضوع كذا .. لكن عن نفسي مشفتش ان دي فكرة الموضوع .. كلامي واضح في بداية الموضوع وهي اني تذكرت القصة نتيجه حوار حصل .. والموضوع في موضوعات خفيفة مش جاده .. وفي نهايته انا بتسائل ياترى الحكايه دي صح ولا غلط .. ياترى احنا كمصريين ثقافة ابو بلاش كتر منه منتشرة عندنا ولا الحكايه مش ظاهرة ولا تدعوا الى القلق ؟

يعني لما بنروح معرض مثلا بيوزع كتيبات .. ياترى كلنا بنلتزم ناخذ الكتيب الي بخصوص الموضوع الي جايين عشانه او يهمنا نعرفه ولا تلاقي كل واحد ماسك ( بقجة ) وعمال يعبي في نشرات مش هيقراها اساسا ؟

لما نروح مطعم بيتزا مثلا ونطلب بنصر ان الراجل يكثر عبوات الكاتشب ولا عادي عندنا طالما مش هناكلها ؟

وقيس على ذلك ..

وعلى فكره انا مسألتش ان كان العرب الباقيين بيعملوا كده ولا لاه لان كلنا في الهم عرب .. انا سألت ومقارنة بالاجانب هل احنا كمصريين عندنا الوجه الحضاري من اننا ناخذ كفايتنا وبس والاهم نرد الذوق بحاجه ذوق زيه ولا نرده باننا نستغله ونطلب زياده ؟؟

واخيرا بشكرك على ملاحظتك ( الذكية ) بخصوص يوم الاثنين .. بس على فكره اولا مش انا الي كتبت القصة وانما هي وصلتني على الايميل على مااذكر كده ( هي القصة كانت بالانجليزي بس الي فكراه انه كان يوم العطلة ) ولو حضرتك لاحظت برضه ان الحلاق مجالوش في اليوم كله غير بستاني واحد وثاني اثنين خباز واحد وده لانه اساسا اجازه والناس فاكره انه قافل .. كونه بيحلق في يوم الاثنين فده مقصود عشان يبقى عدد الي جاي له محدود او يبقى الراجل فعلا عامل حاجه اوفر مش كفايه شغال اجازته لاه وببلاش كمان.. خدمه للمجتمع بقى (( ياريت حد غيري يفتح الموضوع ده كنت ناوية افتحه بس خلاص تراجعت .. هل نحن كمصريين نؤمن بثقافة خدمه المجتمع ؟ ))

على العموم اكتر حاجه بكرها اني اشرح نكته بس معليش مضطره المهم دمك ميكونش محروق ..

شم في دي :ninja:

[عنبو]

كل واحد بيتصرف على حسب تربيته ملهاش علاقه خالص بالشعب

لان الشعب كله مش بيتربى فى مكان واحد وكل مكان فيه الحلو والوحش

الحاجات الى بتجمع كل المصرين خفة الدم والتعليق على المواقف واللهجه والعادات والتقاليد لكن المبادىء فده يختلف من شخص للتانى على حسب عادته

يعنى مينفعش قول الشعب المصرى كله جباااااان ولا ينفع قول كله شجاع كل واحد وعلى حسب ظروفه الى نشأ فيها الى بتختلف من شخص للتانى

وده فى كل الشعوب علشان كده الواحد بياخد من الشخص عادات وتقاليد البلد اكل شرب لبس ...الخ لكن الاخلاق فدى حاجه خاصه بكل واحد

اذا كان الاخوات ممكن تلاقوا واحد طمااااااااع والتانى يكون قنووووووع

شكراً

[اغابي]

لأ ما تحذفش الموضوع يا س س سيبه ونتحاور

إيه يا عم هو إحنا عندنا بطحة مخبيينها ولا إيه

أنا بأجهز مداخلة ياريت ما تحذفش الموضوع

طب ابقي خد جوزي معالك الله يخليك :rolleyes: هههههههههههههههه

طب اقولكم على قصة حقيقي حصلت هنا فى الكويت معايا

كانت معايا جارتى مصرية ارملة وعندها 4 عيال

المهم كانت بتاخد اعانات كتير من لجان الكويت اولا بيدفعولها ايجار الشقة ومرتب ثابت ليها شهريا هى لجان اسلاميه خيرية مشهورة هنا للمساعدة وبصراحة الست تستاهل اليوم كله بتشتغل مطحونة وال4 عيال حمل تقيل فى جميع مراحل التعليم ابتدائي ومتوسط وثانوي واولى جامعة - وكانو بيصرفولها كمان سلع غذائية وتموينية شهريا بكميات كبيره جدا لدرجة كانت توزعوا على الجيران فى العمارة من كتر الكمية اللى عندها - وكانت كل الجيران متعاطفين معاها جدا جدا لظروفها وانها فى عز شبابها كده ومعاها كل المسؤولية ديه

احنا الدور 4 شقق - سكنت شقة جديدة برضوه مصرية وقريبة الست الارملة دي وعرفتنى عليها - المهم قريبتها دي مطلقة وعندها 3 اطفال ورافعة قضة نفقة على جوزها وليها مشاكل معاه هو عايشفى مصر مش فى الكويت بس الاولاد عايشين معاها

المهم يا سادة يا كرام

جات عدت على كل الجيران جارتنا الارملة اللى معاها 4 عيال ديه وطلبت مننا خدمة انسانية جليله ان بكره الساعة 9 صباحا حتمر اللجنة الخيرية وحتخبط على الجيران كلهم اللى هو شقتى وشقة السورية اللى جنبي والدور اللى تحت 4 شقق وما اعرفش جنسياتهم ايه المهم طلبت خدمة انسانية ان اللجنة مكونة من 3 رجال حيسالوا عن الشقة الجديدة اللى ساكنة فيها قريبتها المطلقة دي - ويسالونا هل هذه السيدة متزوجة ؟؟ ام ارملة ؟؟ ام مطلقة ؟؟؟ فاحنا رجاءا نجاوبهم انها ارملة مسكينة ومعاها 3 اطفال محتاسة بيهم - طبعا داه غش فانا فى قرارة نفسي مش عاوزة يبقي قلبي قاسي والموضوع برضوه فيه رحمة وانسانية وخايفة ضميري يتعب لو قلت اه - او لاء

وفضلت محتارة جدا الليلة دي ارد بايه - بس فى الاخر قررت ان الموضوع انساني وبما ان المطلقة محتاجة فلوس يبقي فعلا ظروفها صعبة فقلت انا لو قابلت اللجنة حاقول انها ارملة وخلاص - لكن المفاجأه ان اللجة ما بعتتش حد وصرفتلها المرتب الشهري واجرة الشقة والاعانات كده اهو ولا سالو ولا اى حاجة وعدى الموضوع وحتى تاريخه بيصرف المرتب والاعانات للسيدتين الشابتين ( الارملة والمطلقة على السواء ) وعايشين فى تبات ونبات وعندهم ثوبيان وبنات

وتوتا توتا فرغت الحدوتة اللى هى حصلت فعلا فعلا معايا

[msayed]

كل واحد بيتصرف على حسب تربيته ملهاش علاقه خالص بالشعب

لان الشعب كله مش بيتربى فى مكان واحد وكل مكان فيه الحلو والوحش

الحاجات الى بتجمع كل المصرين خفة الدم والتعليق على المواقف واللهجه والعادات والتقاليد لكن المبادىء فده يختلف من شخص للتانى على حسب عادته

يعنى مينفعش قول الشعب المصرى كله جباااااان ولا ينفع قول كله شجاع كل واحد وعلى حسب ظروفه الى نشأ فيها الى بتختلف من شخص للتانى

وده فى كل الشعوب علشان كده الواحد بياخد من الشخص عادات وتقاليد البلد اكل شرب لبس ...الخ لكن الاخلاق فدى حاجه خاصه بكل واحد

اذا كان الاخوات ممكن تلاقوا واحد طمااااااااع والتانى يكون قنووووووع

شكراً

مختصر مفيد

[الدكتورة أم أحمد]

من آن لآخر تظهر مثل هذه النكت وقد سمعت هذه الحكاية في صورة نكته وكانت جنسية البستاني والخباز من الدول الغربية

وطبعا المصري من مصر

وغيرها كثيييير كالتي يتهم فيها المصري بأنه قذر لا يستحم والغربيين طبعا خلاف ذلك وأخرى تتهم رئيس مصر بأنه مركب رأس حمار

دائما يثور في نفسي تساؤل من الذي يؤلف هذه النكت التي تظهر المصري بصورة قبيحة والغربي بصورة طيبة

هل هو مصري !!!!! له تجارب شخصية غير طيبة في بلده مصر فألف هذه النكت

أم الغرب و اليهود ورجح الاحتمال الثاني أن هذه النكتة أو القصة جاءت للفاضلة ضحى باللغة الإنجليزية

يعرف أبنائي الصغار هذه النكت من أصدقائهم أذكر أن ابني كان يحكي نكته من هذه النكت لخاله المقيم في أحد الدول الغربية( وكان في زيارة لمصر) والتي مفادها قذارة المصري الذي لا يستحم بينما الإنجليزي والفرنسي على ما أتذكر لانج فقال له خاله بل نحن أنظف ألف مرة، منهم الواحد منهم يغسل من الحوض به ماء يتف فيه ويغسل منه وجهه

هذه النكت بالفعل قد تؤثر سلبا في أبناءنا من ناحية احترام أبناء بلدهم وبلدهم مصر وتؤدي إلى عدم الاعتزاز بانتسابهم لمصر وللأسف هذا أصبح مشاهد بدرجة ما

عموما يجب تحذير أبناءنا منها

وألا نعمل على نشرها ولو بحسن نية

تحياتي ضحى

تم تعديل 13 ديسمبر 2009 بواسطة الدكتورة أم أحمد

[msayed]

كثير من الشعوب تنتقد بعض اوضاعها بتأليف نكت بها شيء من المبالغة، أدخل على أى منتدى لأى جنسية عربية وأنظر كيف يؤلفون نكات على أنفسهم، الموضوع قد يكون فيه كثير من المبالغة.

دائماً ما تكون هذه النكات لإنتقاد أوضاع أو صفات قد يتصف بها نسبة قليلة من الشعب، لكن المشكلة تنشأ حين يأتى طرف خارجى يستخدم نفس النكتة ضد الشعب بأكمله.

موقف بسيط وطازج، شركتنا تقدم الشاى والنسكافيه فى بوفيه مجانى، أحد الزملاء الباكستانيين بيعمل الشاى أبو حليب بثلاث أكياس ليبتون، إحنا مش فى دماغنا الموضوع وشايفينه عادى، لكن واحد باكستانى تانى هو إللى إتضايق وتقريباً أحس إنه بيؤثر عليه شخصياً فباع زميله وكلمه أمامنا بالإنجليزية مش بالأوردو وقال له ما معناه "هو علشان ببلاش يعنى"

تم تعديل 14 ديسمبر 2009 بواسطة msayed