عُمرك إتخانقت قبل كده ولا فكرت تشيل سلاح ؟

[se_ Elsyed]

هذه ليس دعوى للعُنف

ولكنها نقاش حول طُرق الدفاع عن النفس عند التعرض لأي موقف إعتداء

ما دفعني لإثارة هذا الموضوع هو حادث بشع تعرض له أحد المقيمين هنا بالرياض وهو سوري الجنسية الأسبوع الماضي ... وللأسف كان جنب بيتي بالضبط وعرفت ذلك من الجرائد وكمان كل ما أعدي من هناك كنت الاقي سيارة مرسيدس مركونه ومتدغدغه ... وكانت حاجه تقطع القلب

الراجل ماشي بعربيته وعشان الجو كويس كان فاتح الشبابيك ... وزوجته بجانبه وفي الخلف بنته الرضيعه ... وواقف في إشارة مرور .. جت عربية جنبه يركبها 4 عيال زبالة .. نزل منهم واحد خطفة شنطة اليد الخاص بزوجته والتي كانت تضعها أمامها وفروا هاربين بسيارتهم ... فقام الرجل بمطاردتهم مسافة طويلة لحد ما حصلهم عند أحد الفنادق بالرياض والفندق ده جنب بيتي على طول ... العيال طبعاً قلبهم ميت .. فضلوا يخبطوا عربيته بعربيتهم لحد ما لزقوه في سور الفندق وهشموا سيارته .. ومن قوة الأرتطام البنت لا حول ولا قوة إلا بالله طارت من الكرسي الخلفي للخارج من شباك السيارة إلى الشارع ... وماتت في الحال من قوة الأرتطام ... والرجل وزوجته أُصيبوا بكسور والعيال فروا هاربين ... وتم نقل الأم والأب إلى المستشفى العسكري بالرياض ولما فاقوا عرفوا بالمصيبة وإن رضيعتهم أنتقلت إلى جوار الله

والله يا جماعه أنا قلبي أتقطع من صورة البنت ... قمر قمر قمر ... ربنا يصبر أهلها ... ويبدلهم خيراً منها ..

تعليقي بقى على الموضوع هو

- الراجل غلطان من ساسه لراسه ، لإن وجود الأولاد مع الواحد بيفرض عليه أن يتعقل أكثر وأكثر قبل أن يُقدم على اي مغامرة ... بمعنى .. لو أنا لوحدي وحصل موقف زي ده هاطارد العيال دي ولو فيها موتي .. لكن معايا زوجه وأطفال .. هايبقى كده باعرضهم للخطر ..

- أولاً المطارده نفسها شيء في غاية الخطورة لأني ممكن أصيب حد مالوش ذنب والواحد ساعتها بيبقى في حالة سرعه والطريق مش لك لواحدك ...

- ثانياً : الكُترة تغلب الشجاعة .. يعني لو حصلت الأوباش دول ونزلوا الأربعه .. تفتكروا شخص بمفرده وأعزل يقدر يقف أمام هذا العدد مهما كان إلا لو كان معاه اي سلاح إن شالله لو عصايا ؟

- ثالثاً : بالأضافة إلى إن الواحد لو أشتبك معاهم هايبقى بيفكر في إيه ولا إيه ؟ يعني في الأشتباك معهم ولا في زوجته واولاده اللي ممكن حد يؤذيهم في هذا الموقف ؟...

- من حوالي 8 شهور كدت أن أُصاب بأزمة قلبية والله .. هذه حقيقة ... قاعد في الشغل في أمان الله .. لقيت مكالمة من واحد بيقول لي .. إنتي فلان الفلاني ؟ قلت له أيوه .. قال لي معاك الظابط فلان . إنت تعرف فلان ؟ قلت له يا نهار إسود .. ده أخو المدام .. قال لي طب إلحق أحسن أُصيب إصابات جامده في مشاجرة .. ووصف لي المكان .. فانطلقت مسرعاً مع مجموعة من أصدقائي قابلتهم في موقف سيارات الشركة وعرضوا ييجوا معايا .. روحت لقيت الراجل غرقان في دمه والشرطة جنبه ... وعرفت سريعاً إنه كان ماشي بسيارته .. في عز الضهر وعلى كوبري . وجه عيل مسرع زنق عليه ... راح صاحبنا محصله ورد الله الموقف ... نزل الولد من العربية يعتيد على نسيبي .. نسيبي مسكه نفضه بصراحه وتجمع المارة .. وقربوا من الولد ده لقوه سكران طينه وفي حاله غير طبيعية ...

خلص الموقف على كده ؟

لأ .. نسيبي عربيته أتأثرت من الصدمة والأكصدام دخل في العجل اللي قدام .. فوقف على جنب بعد نزلة الكوبري يشوف ايه اللي حصل .. أتاري الولد التاني مشي بعربيته وراح جاب ناس تانيه ورجع . وأستفردوا بالزبون وجم معاهم مفاتيح تغيير كاوتش العربية وطبعاً هو بمفرده وما معهوش حاجه .. وطحنوه وكاد ان يموت فعلاً لأنهم كانوا سكرانين برضوا وبيضربوا ضرب موت .. لحد ما ربنا أنقذه منهم وفروا هاربين ... والشرطة كالمعتاد لم تستدل عليهم .. ونلقنا الأخ للمستشفى وأتخيط وأتجبس وكانت حالته زفت ...

أنا هنا لا ادعو للهجوم .. على قدر دعوتي للدفاع عن النفس بكل الطُرق الممكنة خصوصاً لو الواحد في سيارته وبالتأكيد بنتعرض لمواقف سخيفة على الطريق ...

لكن برضوا أدعو للتعقل ومحاولة تكبير المخ في مواقف كثيرة والأمور بتعدي .. دون التفريط في الكرامة طبعاً .. يعين ما يجيش واحد جاي مندفع وهايضربني وأقول حصل خير وأهي علقه وتعدي .. او يكون معايا عائلتي ويحدث نفس الموقف .. والله لما يكون اللي قدامي معاه مدفع حتى .. الواحد لازم يدافع بكل ما آوتي من قوة كرد فعل طبيعي ...

لكن على الطرقات موضوع عربية بتنزق عالواحد .. عادي ممكن نعديها .. ما هو حتى لو غصب عني ساعات بأعمل كده ومافيش حد في سواقته بيبقى كامل 100 % ولو كل موقف سخيف حصل في السواقه يبقى ما حدش هايخلص والناس هاتميش تدبح في بعضها في الشوارع ..

- فضبط النفس مطلوب وتحكيم العقل مطلوب .. ومحاولة وزن الأمور مطلوب جداً جداً ...

وفوق ده كله بقى النصيب والقدر ...

يعني الواحد ممكن يعمل كل حاجه ممكنه ويتعقل لكن الظروف تحكم بعكش ذلك ....

أنا عن نفسي بعد حادثة نسيبي ... وبالصدفة نزلت بعدها بشهرين أجازتي السنوية ... الموقف إتعاد أمام عيني مره أخرى ..

فكنت من هنا شاحن شوية مستلزمات لشقتي والشحن أتأخر لما كنت هافرقع من الغيظ ..

المهم كنت في موقف مشغول فيه ومش فاضي .. كان الكلام ده مساءً ولقيت أخويا بيتصل بيه وبيقول لي ممكن تيجي ؟ عربية الشحن وصلت وتعالى إستلمها وشوف في حاجه ناقصة ولا لأ .. فقلت له عطل الناس ربع ساعه وأنا هاجيلك بسرعه وفعلاً أخدت الطريق طاير .. ولسه بأدخل الشارع لقيت هرج ومرج وأخويا هدومه غرقانه دم ...

انا شوفت كده وعقلي طار وأصبت بالجنون بجد ... المهم عرفت إن عربية الشحن يادوب راكنه أمام شارعنا والناس بينزلوا الكراتين لحد البيت وإذ بواحد فاتح محل كاوتش على ناضية الشارع جاي يشتبك مع السائق والعمال لإنهم معطلين حاله.. فقال له : يا إخي إحنا مش قدام محلك ... وكمان إحنا ضيوف من محافظة أخرى جايين 10 دقايق نسلم الحاجه ونمشي على طول والموضوع مش هاياخد وقت لإن أساساً مشاغل تاينه .. راح شاتيمهم بقلى أدب .... اخويا جاي من بعيد شاف الموقف فبيقول له عيب كده إحنا جيران .. وبنسيبك براحتك تشتغل وحتى ما بندخلش الشارع بعربياتنا وإنت عارف كده وقلنا بياكل عيش وبدل ما أركن عربيتي قدام بيتي وهذا حقي .. لأ إنتي يا عم خلي العربيات بتاعتك تلاقي مكان .. بدون لازمه راح شاتم أخويا كمان ...

أخويا بقى .. ما شاء الله .. إتنين في تلاته ... وجسم رياضي ... وأساساً قضى فترة في سلاح الصاعقة ... والأخ ميشلان بتاع الكاويتش ما فيهوش زقه ... لكن يعلم الله .. أخويا لديه طولة بال .. أنا شخصياً باتنقط منه وعُمري ما شوفته بيستخدم قوته ضد أحد لثقته في نفسه وتفادياً إنه يؤذي أحد ... والظاهر إن في ناس الشيطان بيصور لها إن الصبر والأدب وطولة الباب هو ضعف وبالتالي بتتمادى في أستفزاز اللي أمامها .. وفعلاً الرجل الكاوتش تمادى في قلة ادبه وأخويا ماسك نفسه .. لحد ما شتمه بأمه – أمي أنا كمان –

هنا خلاص .. كتب شهادة وفاته بإيده .. فأخويا مسكه نفضه زي الواحد ما بينفض سجاده كده وأصبح الراجل التاني بدون معالم وهدوم أخويا أتغرقت دم منه ... فراح يجيب سلاح من المحل .. واخويا كمان راح جاب شومه زي بتاعت عاشور الناجي كده وقال له يالا ورينا نفسك .. لحد ما جم الناس وحجزوا ..والموضوع هدي شويه ..

في دخلتي أنا بالعربية بعد الموضوع ما خلص بدقائق وأنا مش فاهم في إيه .. واول شيء تبادر لذهني إن اخويا إتخانق مع الناس بتوع الشحن ... وكل ما اسأل حد في إيه ؟ يقولوا لي مافيش حاجه .. أخوك جاله هبووط وأغم عليه ... !!!!!!! طب واللي اغم عليه هدومه تتغرق دم .. المهم خدت واحد من اللي شغالين معانا وسألته فقال لي بإختصار على الحكاية وقال لي إن الواد بتاع الكاوتش شتم أخوك بأمه ... أنا بقى سمعت كده وروحت في خبر كان ولم أدري بنفسي إلا وأنا بأخلع هدومي – مش عارف ليه – وبأهجم على ما تبقى من الواد التاني وحواليه بقى مشاهد مؤثرات صوتيه ... أمي بتصرخ ومراتي وأخواتي البنات عايشين في دور كورال الأطفال وبيرددوا وراها ... وكانت ليلة سودا على دماغ الرجل المطاط ...

بس بجد مش بإيد الواحد والله ..

المهم تاني يوم باتكلم مع أخويا .. وبأقول له : إنت جبت شومة عاشور الناجي إسم الله عليه إسم الله عليه منين يا معلم ؟ ..

فقال لي والله أنا شاري إتنين للديكور بس .. تاخد واحده ؟

فقلت له طبعاً ... أنا محتاجها معايا كمان .. لإن فتوة العطوف شايف نفسه شويه ... فأهخليها معايا إحتياطي في العربية في السعودية ... ربما الشيطان يوز سعيد أبو الروس فتوة العطوف ويعمل لي كمين هو ورجالته .. فالواحد يبقى عامل حسابه ..

وسميت الشومه دي بقى " الحاجه زُهره " على إسم الشومه اللي كانت عند عبد الفتاح القُصري في فيلم " سي عُمر "

شوفوا ظريفة وحبوبه قد إيه ؟

بس إيه .. اللي بياخد منها خبطه ما بياخدش اختها ...

وحاططها تحت الكرسي في العربية على طول

بس السؤال بقى ... لو الموقف حصل بعيد عن العربية .... هاعمل إيه ؟

تفتكروا أشتري حته " بريتا " أنجليزي وأخليها في جيبي تحسباً يعني ؟

لإن بصراحه ماليش في المطاوي والسنج وشغل الشبيحه ده ... أنا عاوز حاجه خفيفة وسريعه وتخلص على طول عشان بأبقى مستعجل ومش عاوز الخناقة تاخد وقت طويل

[om marawan]

ياسلاااااام والله انا مبهورة

ادى الاسلحة ولا بلاااااااااش مش يقولك كزلك ومطاوى وسيوف

لا حاجة تفرح بصحييح

طبعا انا للاسف ماباشتبكش بالايدى خالص ومؤخرا بقيت مابتخانقش اصلا مش عشان بقيت مسالمة لكن اهو زهق

لكن بالاحظ ان ابومروان فعلا فى مواقف الطريق والحاجات دى بيتفادى انه يحتد مع اى حد واحنا موجودين

ماعرفش من ورانا بيعمل ايه :lol:

لكن انا ليا بس طلب صغير ياريت بس اى خناقة تسمحلنا نستعير الحاجة زهرة نتصور جنبها بس ونحط صورتنا جنبها ع الفيس بوك

وربنا يخليهالك و ماتحتاجش لها ابدا

[rewsha]

هوه فعلا العقل ...او التعقل مطلوب جدا في المواقف الي زي كده

والمفروض الواحد يفكر كويس قبل ما بعمل اي حاجه يشوف عاقبتها ونتيجتها ايه قبل ما يعملها وما يتهورش

لان التهور اخرته وحشه جدا

انا عن نفسي مش مع فكرة الاشتباك خالص لان لازم هايبقى في خساير

لكن الامر ما يمنعش ان كل واحد فينا (قصدي فيكم )الرجاله يعني .يحتفظ( بالحاجه زهره) معاه برضواحتسابا لاي طاريْ في الطريق ماحدش يضمن الظروف

ممكن يطلع عليه حراميه وله حاجه يقوم يدافع عن نفسه او يهوشهم حتى

عن نفسي ....زوجي عامل زيك كده ياحاج س س

وحاطت معاه الحاجه زهره ..بس مش عارفه هوه مسميها ايه بقى :lol:

بس هابقى اشور عليه بموضوه الحته الربريتا دي .....هيه اسرع برضو

حضرتك عارف الزمن اللي عايشين فيه ده عاوز السرعه في كل حاجه هاقول له يشتري اتنين

واحده ليه....وواحده ....لا ....لا ...مش ليه ....والتانيه احطياطي

او يمسك الاتنين في ايديه الاتنين ويعمل زي افلام الكاوبوي

[أحمد سيف]

ايه رأيك في الحته ال TASER C2 دي

http://www.itaser.com/accessories.html

حاجه محترمه وبييجي منها كذا لون وجراب جلد وممكن تشغل عليها mp3 كمان

[justme]

على فكرة انا اخويا قبل ما يسافر كان بشيل جوه العربية عجرة (شومة بلغة القطريين)

المهم لما سألته ليه

قالي ان الطريق الصحراوي بتاع الزقازيق القاهرة مليان بالليل قطاع طرق وبتوع مخدرات وخلافه وعرفت كمان ان واحد قريبي عقيد في الجيش سدوا عليه الطريق وكان معاه عيالله وعرف يخلع منهم بصعوبة

المهم في الموضوع

الجري نص المجدعة

وفي احيان بيكون هو المجدعة

ده في حالة وجود اسرتك او حد تخاف عليه ومهما كان قوة السلاح اللي معاك فانت فرد واحد

والمشكلة ان اذا كان معاك السلاح هل هتعرف تستخدموا وقت الحاجة؟؟؟؟؟؟؟؟

[انسان مخنوق]

انا بقى عمرى ما اتخانقت قبل كده فى حياتى مع انى سريع الغضب لكن ماعنديش ثقة فى نفسى ( جبان يعنى )

من كام شهر واحد شتمنى قمت مزعقله وشتمه المشكلة انى ساعة ما بزعق وانفعل بضطرب جدا ووبدأ ريقى ينشف وجسمى يرتجف المهم الراجل راح جاب سكينة وفتحها عليا اخوكم ساعتها ركبه باظت وربنا ستر ان كان فيه ناس حجزوا

شوفتوا جبن اكتر من كده

السبب فى كده امى ربنا يديها الصحة وابويا

كانوا بيخافوا عليا ويقولولى من صغرى اوعى تتخانق لان العيال هاتضربك وانت ضعيف ( ايحاءات سلبية دمرتنى من صغرى )

مع انى جسمى زى اى حد فى زمايلى

الموضوع ده عاملى عقدة شخصية وبندم انى ماتعلمتش البلطجة والضرب والدفاع عن النفس وانا صغير

فعلا مهم جدا يا جماعة تعلموا اولادكم لانه بجد عدم الثقة فى النفس ده حاجة وحشة جدا جدا

المهم انى فى نهاية الامر اكتشفت انالموضوع تطور عندى لمرض اسمه الرهاب الاجتماعى وده اصعب مرض نفسى يمر بيه حد فى حياته

لغاية ما بقيت ساعات بتمنى انى اتخانق مع اى حد وانضرب علشان اعرف الضرب ده حاجة تخوف ولا لا لانى عمرى ما انضربت ونفسى اثبت نفسى انى على الاقل هاتحمل الضرب

واللى بيقتلنى دلوقتى من جوه ان اخويا عمره 18 سنة بدأ يفقد الثقة بنفسه بسبب ابويا مع انه كان لما يتخانق فى الشارع مع اى طفل فى عمره يغلبه وساعات كان يضرب اتنين سوا لغاية عمر 12 سنة

الان بجد لما بشوفه وهو ماشى خجلان بفتكر نفسى وبموت من جوه مليون مرة .... ساعات اقوم من نومى اتصل بيه واكلمه والاقيه بيكلمنى وهو مستحى لانه بيحترمنى جدا وبيخاف منى ( تخيلوا )

ساعات بتمنى انه يبقى بجح ويزعقلى

خايف الواد ده يطلع مايعرفش ياخد حقة فى الدنيا زى اخوه

مش عارف انا كتبت كده ليه بس بجد ماصدقت شوفت التوبيك ولقيت نفسى بكتب اللى جوايا

[sherifhfm]

انا بقى عمرى ما اتخانقت قبل كده فى حياتى مع انى سريع الغضب لكن ماعنديش ثقة فى نفسى ( جبان يعنى )

من كام شهر واحد شتمنى قمت مزعقله وشتمه المشكلة انى ساعة ما بزعق وانفعل بضطرب جدا ووبدأ ريقى ينشف وجسمى يرتجف المهم الراجل راح جاب سكينة وفتحها عليا اخوكم ساعتها ركبه باظت وربنا ستر ان كان فيه ناس حجزوا

شوفتوا جبن اكتر من كده

السبب فى كده امى ربنا يديها الصحة وابويا

كانوا بيخافوا عليا ويقولولى من صغرى اوعى تتخانق لان العيال هاتضربك وانت ضعيف ( ايحاءات سلبية دمرتنى من صغرى )

مع انى جسمى زى اى حد فى زمايلى

الموضوع ده عاملى عقدة شخصية وبندم انى ماتعلمتش البلطجة والضرب والدفاع عن النفس وانا صغير

فعلا مهم جدا يا جماعة تعلموا اولادكم لانه بجد عدم الثقة فى النفس ده حاجة وحشة جدا جدا

المهم انى فى نهاية الامر اكتشفت انالموضوع تطور عندى لمرض اسمه الرهاب الاجتماعى وده اصعب مرض نفسى يمر بيه حد فى حياته

لغاية ما بقيت ساعات بتمنى انى اتخانق مع اى حد وانضرب علشان اعرف الضرب ده حاجة تخوف ولا لا لانى عمرى ما انضربت ونفسى اثبت نفسى انى على الاقل هاتحمل الضرب

واللى بيقتلنى دلوقتى من جوه ان اخويا عمره 18 سنة بدأ يفقد الثقة بنفسه بسبب ابويا مع انه كان لما يتخانق فى الشارع مع اى طفل فى عمره يغلبه وساعات كان يضرب اتنين سوا لغاية عمر 12 سنة

الان بجد لما بشوفه وهو ماشى خجلان بفتكر نفسى وبموت من جوه مليون مرة .... ساعات اقوم من نومى اتصل بيه واكلمه والاقيه بيكلمنى وهو مستحى لانه بيحترمنى جدا وبيخاف منى ( تخيلوا )

ساعات بتمنى انه يبقى بجح ويزعقلى

خايف الواد ده يطلع مايعرفش ياخد حقة فى الدنيا زى اخوه

مش عارف انا كتبت كده ليه بس بجد ماصدقت شوفت التوبيك ولقيت نفسى بكتب اللى جوايا

يا اخى هون على نفسك شويه الخناق ملوش علاقة بالشجاعة خالص وعاوز اقلك كمان حاجه ان مش من الشجاعة انك تقف امام واحد بيهددك بسكينه ومش شجاعه ابدا منه ان يستخدم سلاح ضدك دى اسمها بلطجه وقلت ادب

بالنسبه لموضوع الضرب لا متقلقش اوى موضوع مش صعب خالص انا كنت فى المرحلة الاعدادية واتلم عليا حوالى خمس عماليق بقيت عامل زى الكورة وسطهم والحمد لله لسه عايش واتجوزت وخلفت عادى يعنى كل الناس بتضرب محدش بيضرب على طول

وزى ما الاستاذ سى السيد قالها حكمه مفروض الواحد يوازن الموقف لو ممكن يعدى خلاص وبلاش بهدله على الفاضيه والمليانه طالما الموضوع لا يمس الكرامة او لن يفتح الطريق الى اهانات اخرى والتعقل مطلوب خاصة لو معاك اسرتك علشان مصبهمش ضرر

عموما علشان تطمن الخناق بهدله سواء لو انته ضارب او مضروب

متشلش الموضوع ده فى دماغك ومتدخلش خناقه ابدا لمجرد الحناق ابدا ليس فى هذا اى شجاعه على الاطلاق ولا تدخل خناقة ممكن تطلع منها لا قدر الله واخد لقب مرحوم

تحياتى

[sherifhfm]

ايه رأيك في الحته ال TASER C2 دي

http://www.itaser.com/accessories.html

حاجه محترمه وبييجي منها كذا لون وجراب جلد وممكن تشغل عليها mp3 كمان :blush2:

لمؤاخذه يا كنج - بمناسبة موضوع الخناق - هوه ايه ده علشان صاحبك ملوش فى تقنيات الخناق الحديثة اخرة الحاجه زهرة بتاعة الاستاذ سى السيد

انا بسبه على البتاع ده هوه ده صاعق

[دموع فى الاحداق]

والله شكل الحاجه زهرة دى يرعب لوحدة شكلها ولا حجت ولا صلت ركعتين حتى ههه

اولا بالنسبه للحادث الى راحت ضحيته البنت الصغيرة دى ربنا يرحمها ويصبر اهلها بس باباها كان غلطان لانو مكنش مستعد لخناق ومعاه مراته وبنته ودول كانو ولاد كتير كان مفروض يفكر بالعقل ياخد رقم العربيه اى حاجة يعنى غير انو يعرض حياته وحياه عيلته للخطر بس هو ساعه القدر بيعمى البصر بقى وكل شىء مكتوب

اما بالنسبه للحاجه والله مش وحش ان يكون مع كل حد حاجة يدافع بيها عن نفسه خصوصا ان فى موضوه التثبيت يطلع عليك حد شارب ولا نايم ويقولك طلع الى معاك انا بصراحه لو بعد الشر حصلى انا هديله من غير ميقول وبعدين اختفى انا لسه هتلمض معاه ههه

بس المهم ان مستخدمهاش كدة عالفاضى والمليان لان اكيد مش مهايتها هتكون كويسه يعنى يكون معاك الحاجة دى بس تعرف امتى بالظبط تستخدمها مش كل كلمتين بقى

احكيلكم على موقف بقى حصل معايا كنت فى مصلحه حكوميه ومقلكوش بقى طلعت ونزلت ولفيت لف واستنيت وصورت ورق وخسيت تلاته كيلو وربع فى تلات ساعات وبعدين يجى عمو الامور الموظف يقولى تعالى بكرة لالالا بكرة مسافر تعالى بعد بكرة ؟؟؟؟؟؟؟؟؟؟؟؟نعم ربنا (ياخد؟)يخلى حضرتك بس خلص الورقه دى عشان الحق بس بعد بكرة بعيد وانا مستعجله ابدن نيفر انا تعبان دلوقت المهم مش كدة وبس دا بيخلص ورق الناس التانيه هعمل ايه مفيش غير حسبى الله ونعم الوكيل

انا قلتلها من هنا والله فى سرى بصوت واطى خالث :danger: ودا خرج من المكتب بقى انتى يبنتى بتحسبنى فى مين

هههههههههههههههه معرفش ايه حصلى اساسا قلتله فى حضرتك ههههههههههههههههههههههههههههههه

ودا يحلف يمين طلاق تلاته ما نا دخله المكتب بتاعه تانى ونا احلف زيه بالظبط انى هدخل ودا شغلك ونتا هتخلصه هى خناقه امورة كدة تحس فك مفترى وحد صوتو مش طالع اصلا بس بتلمض طبعا كل الى وافقين ايه يبنتى ان كان لك عند البوبى حاجة قولو يا دوج ونا بجد كنت مدايقه عندك وقت ودا شغل عايز ايه ؟؟؟؟؟؟؟؟؟؟؟؟؟؟؟؟؟؟

بس فى الاخر طبعن حد اخد الورق يعملو وكلو غلطنى وقال انتى الغلطانه مفروض مكنتش تعملى كدة انا عارفا انو مش ظريف ان حد يشتم حد زى ماقولت كدة بس اعمل ايه اتغظتتتتتتتتتتتتتتتتتتتتتتتتتتتتتتتت ومحبش حد يعمل فيها انو بتاع وهو اصلا بيفك الخط برجل دجاجه حوله هههههههههههههههههههههههههه

يلا حسبى الله ونعم الوكيل مش هجبها البر انا هههههههههههههههههه :blush2: قصدى سلامو عليكم

[ذهبية]

و الله يا سى السيد انا كل ما اسمع كلمة خناقة افتكر امى الله يرحمها امى كانت جميلة جدا جدا و كانت فى نفس الوقت جدعة و

شجاعة و صحتها قوية جدا جدا جدا يمكن علشان كدة كانت طول عمرها محسودة

المهم هى الىل كانت طول عمرها تدافع عن بابا لعلمك بقى ههههههههه و كل اخواتها الصبيان و هى كانت اضغر منهم

المهم كنا واحنا ضغيرين فى الجزائر اة و الله طول عمرهم بيكرهوا مصر معرفش لية قامت واحدة جزائرية و الله العظيم هذا حصل

قالت لماما يا مصرين يا اللى بتاكلوا الفول زى الحيوانات يا نهار اسود و منيل دى غلطت فى مين فى المصريين كلهم و لمين لامى

كانوا نهارها اسود و مقلقش حصل اية بقى واحنا كنا عيال ضغيرة كدة

ماما قالت لها احنا بناكل فول انا هافرجك بقى الفول بيعمل اية ؟؟؟؟؟؟؟؟ظ تعالى بقى ومقلكش فجاة لاقيت امى فطستها راحت

ضرخت على قريبتها جم اتتين كام يعنى بقوا تلاتة على امى لوحدها

والله العظيم راحت امى عملت لهم شنكلة كدة و الله التلاتة بلا استثاء على الارض و راحت امى قعدت عليهم كلهم ههههههههه

هما يصوتواااا احنا عمالين نصقف لامى

المهم الخبر لف البلد واحدة مصرية ضربت تلاتة جزائرين لحد ما وصل ببابا فى الشغل رجع البيت فبيحكى لماما بيقولها تصدقى واحدة مصرية ضربت تلاتة و قعدت عليهم

ضحكنا و قولنا لة

دى ماما هههههههههه

و فضلت امى طول حياتها محدش يعرف يتكلم معاها تلت التلاتة كام بس فى الحق و كانت بتقف جنب المظلوم

و كان الواحد حاسس انة لة ظهر بجد الله يرحمها بجد

عارف كانت بتعلمنا حركات ازاى نعملها نوقف اللى قدامنا و ندافع عن نفسنا و انا معلمة عيالى كدة علشان مش عايزاهم ضعفاء

لان انت مش عارف اللى قدامك دة جايلك بنية اية

كانت دايما تقولى الذوق يجيب الذوق و قلة الادب تجيب قلة ادب خليك دايما محترم علشان الناس تحترمك لكن لو حد قليل الادب يتربى بس لما تكون قدها وعامل حسابك وحامى ظهرك و لالا

لكم تحياتى

ذهبية

[justme]

بس ماشاء الله

الحاجة ظهرة دي شكلها من الأخر

انا بقول مينفعش تكون لوحدها كده

لازم تجيب اخوها معاها

الحج عنكب

من الفيلم برضه

المهم ما علينا

الدنيا بتتطور ودلوقتي الجديد صاعق على شكل موبايل علشان محدش ياخد باله وكمان فيه ضوء مبهر علشان يعمي اللي قدامك

شوفو الرابط ده

http://www.youtube.com/watch?v=vbgq9nx_PAI...feature=related

[عاشق الترحال]

أنت تعرف أن أغبى شئ فعلا أنك تتخانق ومراتك أو خطيبتك أو حد من أسرتك معاك ممكن لو الموضوع تطور تبقى العواقب وخيمه.

أنا طول عمري ( جئر ) مش عارف ليه هل لأني قصير شويه والقصيرين الجآره مالكاهم ؟ ههههههه

بس بصراحه يمكن كنت بحب الخناق طول عمري لحد أول سنتين تلاته فى الجامعه يمكن لأني نشأت فى منطقه شعبيه شويتين فى المنصوره وكنت بشوف المشاجرات أمام عيني واللي الدم بيسيل فيها للركب زي مبيقولوا , أنا مهما وصفت عن أشياء شاهدتها بعيني مش هتتخيل لدرجه أن ممكن أوصفهالك بالمشاهد اللي شفتها في فيلم ابراهيم الأبيض بس الفرق انها أمام عينك.

فيه مثل بيقول ( العيله اللي مفيها ش صايع حقها ضايع ) والحمد لله عندي فرع فى العائله مقلكش حاجه آخر ألاجه معلمين عالجد وبيتعملهم ألف حساب .

فالموضوع ده كان بيعطي الواحد ثقه زائده يمكن علشان لو اللى هتخانق معاه عرف مين ورايا بيرجع عن اللي في دماغه وفي أسوء الحالات ولقيتني ممكن أتكلكع ههههههه عارف أن حقي هيجيني تالت ومتلت.

المصيبه بل الداهيه الكبيره اللي عاوز ألفت انتباهكم ليها أن سعادتك طول ما معاك سلاح ( بيوزك عالشر ) يعني أنت لو شايل سلاح أيا كان نوعه وماشي في حالك بتلاقيك عامل زي اللي ( بيحكوا له على منخيره ) تلاقيك عاوز تتخانق مع دبان وشك وبسبب وبدون سبب زي ميكون شيطان فى السلاح ده عاوزك تعمل مصيبه

طول عمري بحب أقتني السلاح بس مبحبش أشيل سلاح معايا بس والله أفتكر موقف حصل أن عيل ملوش لزمه وأنا فى الجامعه من منطقه جنبنا حب يعمل فيها دكر وانا فى منطقته وفتح عليا سلاح وقلتله حاضر ومشيت مع ان الناس اللي كانت واقفه معاه كانوا بيسكتوه علشان عارفين قرايبي رحت البيت وأقاري وأصحابي عرفوا وكنا متأخر بالليل واجتماع انعقد عندي فى البيت وكل واحد بفكره اللي يقول اخطفه واللي يقول مش عارف ايه وكل شويه وانا قاعد فى الشقه فى الدور الأرضي الشباك حد يخبط عليه ويقولي خد دي خليها عندك لبكره لحد ما حسيت ان عندي ترسانه سلاح ابيض فى البيت وآخر المتمه واحد صاحبي من منطقة الواد ده راح جابه وجالي البيت يعتذر لي ونتصالح وخلص الموضوع يعني مش مستاهله

من سنه تالته فى الكليه وليومنا هذا وأنا مبقيتش أكره شئ فى حياتي زي مابكره موضوع الخناق ده لأنك ببساطه ممكن مستقبلك كله يضيع فى لحظه شر !!!! يبقى ليه وعلى ايه ؟؟؟

لو شئ مستاهل هنقول ماشي انما فيه سفاسف الأمور دي ممكن تتحل بكلمه طيبه أو بكظمة غيظ أو بحسن تصرف .

وعارفين والله سكة ربنا بتجنب البني آدم بلاوي كتير ,, يا ما كان فيه ناس للصياعه والبلطجه عنوان وربنا هداهم واتقلبوا 180 درجه

ربنا يجنبنا كلنا المشاكل ويحفظنا ويهدينا ويصبر العائله المسكينه اللي بنتهم ماتت دي .

بس ولا مؤاخذه عاوز اعرف العيال دي اتعمل فيها ايه ؟

[عاشق الترحال]

ايه رأيك في الحته ال TASER C2 دي

http://www.itaser.com/accessories.html

حاجه محترمه وبييجي منها كذا لون وجراب جلد وممكن تشغل عليها mp3 كمان :rolleyes:

لمؤاخذه يا كنج - بمناسبة موضوع الخناق - هوه ايه ده علشان صاحبك ملوش فى تقنيات الخناق الحديثة اخرة الحاجه زهرة بتاعة الاستاذ سى السيد

انا بسبه على البتاع ده هوه ده صاعق

بصراحه حاجه بنت ناس خالص تخلص الموضوع في لحظه سكتم بكتم ولا من شاف ولا من دري ولا دم ولا جروح تك وهيا التك.

من زمان وانا عاوز أشتري واحده بس بقول لنفسي بلااااااش ( اللهم إخزيك يا شيطان )

[لماضة مصرية جدا]

السلام عليكم و رحمة الله و بركاته

حبايبي المتخانقين....... و يارب ما تطلعوا مضروبين

الموضوع جامد جدا......وااااااااااااااااااااااااو الحاجة زهرة و بونيات و خناقات ...... آي آي

هو ده اللي انا كنت بدور عليه من زمان......(ده لو كنت دعكت الفانوس مكنتش طلعتلي كل الحكايات دي)

ثوفوا بقي يا ولاد....بما اني مكتوبة في بطاقة الرقم القومي أنثي...... و عندي اخواتي اكبر مني ربنا يخليهوملي (قولوا آمين) فكان دوري استراتيجي جدا....

أنا أحب أزق.... وهما يعملوا الواجب

تحضرني الذاكرة ان في فترة بتاعت جاكي شان.... و حموقة باتشان و الليلة دي.... كانت لسه طالعة حاجة اسمها الفرمنش.... عبارة عن حتتين خشب و بينهم سلسلة حديد.... المهم اخويا الكبير وقتها ربنا يحميه لشبابه.... راح جاب الفرمنش ده و لمينا العيال بتوع العمارة كلهم.... و قرب قرب و اتفرج

و طبعا هو مكنش اصلا لسه متحكم فيه....المفروض بيلفه كده بطريقة معينة من ورا ضهره..... وهوووووووووب يجيبه لقدام (طب ما هو كان قدام م الاول.... بس عشان يلخبط العدو.... عليهم حركات الصينين دول)

المهم العيال اترصوا و انا لميت حق الفرجة... وده طلع الطالعة ..... هااااااااااااااااااااااااااااااااااا............................. هوووووووووووووووووووووووووووووووو

دش

طبعا آخد وش الواد اللي قدامه وو عينه بظت لقودام.... و أخويا الفرمنش اصابه في الموجنص اللي ع الناحية الشمال....

ايه ايام

انا بقي احب جدا جدا اتفرج ع الخناقات و حلم حياتي اني انول شرف وقفة البلكونة و امسك بايدي الكريمة جردل ميه و اكب ع الناس

بقولوكوا ايه......بما ان القعدة.....احلويت و فيها اسلحة بمبي.... و تركواز و ملبن كده

حد شاف خناقة حريمي......؟؟؟

فوتكم بعافية

هروح اقف في البلكونة ..... يمكن ربنا يكرمنا بخناقة.....يا فتااااااااااااااح يا عليم يا رزاق يا كريم

وسع يا عم خلينا نرش

[عاشق الترحال]

السلام عليكم و رحمة الله و بركاته

حبايبي المتخانقين....... و يارب ما تطلعوا مضروبين

الموضوع جامد جدا......وااااااااااااااااااااااااو الحاجة زهرة و بونيات و خناقات ...... آي آي

هو ده اللي انا كنت بدور عليه من زمان......(ده لو كنت دعكت الفانوس مكنتش طلعتلي كل الحكايات دي)

ثوفوا بقي يا ولاد....بما اني مكتوبة في بطاقة الرقم القومي أنثي...... و عندي اخواتي اكبر مني ربنا يخليهوملي (قولوا آمين) فكان دوري استراتيجي جدا....

أنا أحب أزق.... وهما يعملوا الواجب

تحضرني الذاكرة ان في فترة بتاعت جاكي شان.... و حموقة باتشان و الليلة دي.... كانت لسه طالعة حاجة اسمها الفرمنش.... عبارة عن حتتين خشب و بينهم سلسلة حديد.... المهم اخويا الكبير وقتها ربنا يحميه لشبابه.... راح جاب الفرمنش ده و لمينا العيال بتوع العمارة كلهم.... و قرب قرب و اتفرج

و طبعا هو مكنش اصلا لسه متحكم فيه....المفروض بيلفه كده بطريقة معينة من ورا ضهره..... وهوووووووووب يجيبه لقدام (طب ما هو كان قدام م الاول.... بس عشان يلخبط العدو.... عليهم حركات الصينين دول)

المهم العيال اترصوا و انا لميت حق الفرجة... وده طلع الطالعة ..... هااااااااااااااااااااااااااااااااااا............................. هوووووووووووووووووووووووووووووووو

دش

طبعا آخد وش الواد اللي قدامه وو عينه بظت لقودام.... و أخويا الفرمنش اصابه في الموجنص اللي ع الناحية الشمال....

ايه ايام

انا بقي احب جدا جدا اتفرج ع الخناقات و حلم حياتي اني انول شرف وقفة البلكونة و امسك بايدي الكريمة جردل ميه و اكب ع الناس

بقولوكوا ايه......بما ان القعدة.....احلويت و فيها اسلحة بمبي.... و تركواز و ملبن كده

حد شاف خناقة حريمي......؟؟؟

فوتكم بعافية

هروح اقف في البلكونة ..... يمكن ربنا يكرمنا بخناقة.....يا فتااااااااااااااح يا عليم يا رزاق يا كريم

وسع يا عم خلينا نرش

اتفرجي عالرابط ده فيه شكله حريمي بس حاجه تايوان مش أصلي اصلي

http://videohat.masrawy.com/view_video.php?viewkey=8d76fb89189853a5503b

[se_ Elsyed]

شكراً لإخواتي الفتوات ... ونعمه الفتونه ... ونعم الرجولة ..

--------

بمناسبة الفتونة والخناقات ...

لا أعتقد بالمره إن الفتونه مرتبطه بالعضلات ....

ده ممكن يكون العكس ..

ممكن واحد يكون جسمه جامد وفِرع - بكسر الفاء - ومع ذلك بيخاف من الجوافه ..

على العكس بقى .. شوفت عيال سفاريت والواحد لو نفخ فيهم يهدهم .. لكن بصراحه قلب ميت .. وعزيمة تخليه يفوت في الحديد

[miramikhail]

هو الحقيقة الموضوع ده فعلا بيشغل بالى كتير على أبنى بالذات يمكن البنت طبعى بترجع بدرى و مع أصحبها و لو حتتأخر حد يروح يجبها لكن الولد ديما بيتأخر و غالبا بيرجع لوحده مش مع أصحابه و أحنا الحته هادية جدا و بالذات فى الشتا و قت المدارس فالواحد بيبقى قلقان عليه أحسن حد من البلطجية يطلعوا عليه و هو مش حيسيب حد يأخد منه حاجة يعنى حتبقى خناقة و طبعا مش معقول حقولة شيل مطوة معاك مثلا لكن حقيقى الموضوع ده فعلا شغلنى. بالنسبة

لبنتى ساعات بترجع كانت السنة اللى فاتت مع أصحبها بتاكسى (طبعا فى عز الظهر)و الحقيقة كنت ما برضاش بس قالت لى مش معقول أقعد مستنياكى ساعة لكن البنات كانوا بيخلوا معاهم أزازت برفان وده عشان يرشوة فى عين أى حد يضيقهم و طبعا كان فية واحده منهم معاه سلف دفنس بنتى قالتلى ده بيجى من برة لكن البرفان ممكن يقوم بالمهمه. :lol: ده طبعا معلومات كده على الماشى بتعلمها من بنتى أنا على أيامى كان كبيرى أزعق فى حد ولا أقول أية قلت الأدب دية ومرة وحدة و أنا صغيرة بتاعة 10-12 سنة كده ضربت ولد كان رزل عليا مع أنة أكبر منى كان و طبعا أكبر منى حجما وده كان أيام الصابو الخشب الموضة و قتها ودية المرة الوحيدة اللى ضربت حد بس الحقيقة أتقى شر الحليم إذ غضب

[alsaher]

بصراحه موضوع الخناقات ده موضوع محير

لأنك أحيانا بتبقى مؤمن بمبدأ مثلا إنه خناق إيه وأنا ما أشيلش سلاح

وهو انا بلطجي ؟؟؟

لكن تكتشف إن الدنيا كده ، ولازم تعمل كده إذا كنت من النوع اللي بيموت قهر لو حد داسلك على طرف

بالنسبة لي فعلا عندي زي الحاجه زهره تماما

ولما كان معايا عربيه مش بأمشي إلا بحاجة معايا

يمكن في صغري كنت مسالم ومش ممكن أدخل في خناقه لكن الحياة غيرت لأنه فعلا لازم الواحد يدافع عن نفسه

وزي ما بيقولو لكل حادث حديث ، فمش معقول حد جاي شاريلي شر أنصحه وأتكلم معاه بعقل متفتح

وأنا في ثانوية عامة ، كنت قضيتها عند والدي في السعودية

وحصلت مشكله

أنا وأصدقاء ومجموعه من قبيله معينه ، إستخدمت فيها زي الحاجه زهرة لكن فيها كهربا دفاع عن نفسي

وإتفتح محضر بالموضوع وتصادرت مني

بعدها بقيت مع الحاجة زهرة حاف :)

وربنا مايجيب مشاكل

[justme]

يعني من الاخر الواد او البت لازم يطلع ميطلعش من البيت الا بعد الاتي

1- دروس في لعبة قتالية يفضل الكونغ فو

2- اسلحة خفيفة (جنزير مطواة شومه سنجه ) زي اللمبي وهو رايح الامتحان

3- يفضل انه يتعلم ازاي يخبي اداه حاده مثل الشفرة في بقه علشان الطوارئ

4- ياسلام بقى لو يخرج ومعاه حد من اصحابة او قرايبه علشان يبقا معاه عزوة

5- ومننساش كورس مركز في مصطلحات الخناقات واللذي منه علشان يعرف يثبت اللي قدامه

6- يفضل التدريب على الأماكن الأكثر ايلاما حتى يستطيع تحقيق نتائج بسرعة

واخيرا نظرية الحل الأخير وهي التدريب على الجري مسرعا في حالة فشل كل ذلك

ولا حول ولا قوة الا بالله

[justme]

ومننساش مرحلة التدريب ونزوده بخريطة للاماكن اللي ممكن يروحها لوحدة وكمان نعملها تصنيف من ناحية الخطورة

على فكرة

اللي احنا فيه ده بجد مش سهل

انا يمكن بهزر بس بجد شوفو ايه اكبر اقبال دلوقتي في الاندية غير لعب الكورة

دا حتى البنات بتتدرب كاراتيه

والاولاد طبعا الجيم علشان ينفخ العضلات