بمناسبة أقتراب نزول السيارات الأقتصادية مصر ... ممكن تركب عربية زي دي ؟

[se_ Elsyed]

ماروتي ونانو ..

مواجهة ثنائية بين أرخص سياراتين في مصر

محيط ـ خالد زلط

السيارة سوزوكي ماروتي

شهور قليلة وتبدأ المواجهة الفعلية على أرض مصر بين أرخص سياراتين في العالم، وهما الـ "سوزوكي ماروتي" و"تاتا نانو"، حيث يسعى كلا الطرازين وبقوة لاكتساب ثقة العملاء في الفترة المقبلة، نظرًا لما يتمتعان به من تصميم مبتكر وتكنولوجيا اقتصادية موفرة للوقود .

وينتظر أن تواجه السيارة "ماروتي" التي تتواجد في الأسواق المصرية منذ ما يقرب من 15 عامًا تحديا كبيرًا يتمثل في أن طراز "نانو" الجديد يتمتع بنفس الإمكانيات والموصفات بالإضافة إلى سعره الخرافي الذي يبلغ 25000 .

وتعتبر الـ"سوزوكي" في الفترة الأخيرة هي المفضلة لدى

سوزوكي ماروتي من الخلف

أصحاب الرواتب المتوسطة في مصر، حيث يبلغ سعرها الحالي 38000 فضلا عن صغر حجمها الذي يعطيها ميزة كبيره في شوارع القاهرة، حيث تستطيع الانتظار والسير في أي مكان .

وصنعت الشركة اليابانية هيكل السيارة من مواد خفيفة الوزن، وهو ما يزيل الشعور نسبيًا بضعف المحرك، الذي يتكون من ثلاث اسطوانات بسعة 800 سي سي، لذا فإنه قادر على إحداث قوة 38 حصان، وتسارع من الصفر حتى 100 كم في 30 ثانية .

ويعيب طراز الـ"ماروتي" بأنه ليس مصممًا للمشاوير البعيدة التي يبلغ مداها أكثر من 100 كم يوميًا، كما يعيبها أيضا عدم وجود أي وسيله رفاهية تساعدها على القيادة، مثل مكيف الهواء وهذا تجهيز لم يعد بالإمكان الاستغناء عنه .

تاتا نانو .. أرخص سيارة في العالم

تاتا نانو ارخص سيارة فى العالم

في المقابل، كانت الأسواق المصرية قد استقبلت في الأيام الماضية أرخص سيارة في العالم، وهو طراز جديد من إنتاج شركة تاتا الهندية، وتم تصنيع هيكله بالكامل من الصاج لتحمل أقصى ظروف التشغيل، كما وضع في تصميمه تفادي أضرار المطبات العشوائية، بالإضافة إلى إطارات حديثة معالجة ضد الثقوب .

وزودت تاتا طرازها بمحرك ثنائي الاسطوانات بقوة 33 حصانا سعة 623 سي سي، وهو قادر على بلوغ سرعة قصوى بمقدار 105 كيلومترات في الساعة، أما طول الجسم الخارجي الكلي فيصل إلى 3.1 متر .

تاتا نانو من الداخل

وتمتاز السيارة التي تنتجها شركة حلوان ومحركات الديزل تحت اسم "نانو ايجبت" بقدرة كبيرة على الاستهلاك في الوقود تصل إلى 3 لترات لكل 100 كيلو متر، كما تتحمل درجة حرارة تصل إلى 50 درجة .

ويوجد في "نانو ايجبت" فتحة سقف و"سبويلر" خلفي، بجانب فوانيس شبورة وجهاز كاسيت، أما بالنسبة لمقصورتها فهي تتميز بالاتساع والبساطة، وتتمتع أيضا بنفس مواصفات سيارات "سوزوكي" اليابانية .

ومن عيوب "نانو" أنها تفتقر إلى التركيبات الأوتوماتيكية ونظام إغلاق الأبواب الطارئ، كما تفتقر أيضا الى مكيف الهواء، وغطاء داخلي لصندوق السيارة .

أيديا .. منافس صيني ثالث

السيارة ايديا الصينية

ومن ضمن الطرازات التي لقت رواجًا نسبيا في مصر الفترة الأخيرة، هي السيارة الصينية "أيديا"، وتتوافر بمحرك 4 سلندر ذو حقن الكتروني، كما يرتبط ذلك المحرك بناقل حركة من 5 سرعات .

كما يوجد في السيارة، التي تعد منافس قوى لنانو وسوزوكي، العديد من وسائل الراحة المتميزة مثل تكييف الهواء، وباور ستيرنج، وسنتر لوك، بجانب زجاج كهربائي، وفوانيس شبورة، كذلك راديو كاسيت وريموت كنترول .

وكانت السيارة قد شاركت في معرض "فورميلا الأهرام" الأخير ولقت إعجاب جميع الحاضرين، حيث تتميز بمظهر جذاب يعتمد على فئة الـ"هاتش باك" بالإضافة إلى سعرها المغري الذي يبلغ 38000 .

المصدر

http://www.moheet.com/show_news.aspx?nid=326565&pg=1

[se_ Elsyed]

ولنا عوده لمناقشة الموضوع

[se_ Elsyed]

طبعاً انا كنت باصم بالعشرة إنهم لما قالوا إن السيارة الهندية " نانو " هاتنزل تكسر الدنيا بـ 2000 دولار ..

قلت وأنا مطمئن ... ده عند ماما هناك

إبتسم أنت في بلد يوسف بطرس غالي ..

يعني يا ظالم 11500 ريال ... بقدرة قادر على ما يوصلوا عندنا يبقوا 25000 ج ..... قابلة للزيادة لو أستمر الأقبال عليها مثلما تم للأسف مع التوك توك ... اللي أول ما نزل كان بـ 8000 وهوب وصل دلوقت 18000 ..... !!!!!!!!!!!!

ده بالأضافة يعني ..

أصل

أنا

يعني

متخيل نفسي جوه العربية دي وواحد بتاع ميكروباص .. لأ لأ اعوذ بالله .. بلاش دي .. عيل عنده 8 سنين سايق توك توك كالمعتاد ... وميل عليه ليطبع قُبلة على جبيني ....

بالتأكيد هاتحول لنانو ساندوتش ....

لأ بجد والله

عامةً هي بالتأكيد مناسبة لفئات كثيرة

لكن أقسم بالله أنا متوقع كمية حوادث قتل نفس في القاهرة بالذات ... وهاتفتكروا كلامي ..

الطُرق ما بقتش مستحملة الهوا ايا جماعه

ما بالكم لما العربيات دي تبقى في متناول الجميع .. بجد هانروح فين ؟ ولا هانمشي صفوف فوق بعضنا ؟

وبعدين للأسف برضوا نوع العربية بيدل على صاحبها ..

يعني لو ماشي بمرسيدس وواحد جنبي ماشي بنانو ولا فيمتو دي ... وغلس عليه .. هاستهيفه وأنزل أطرقع له ...

[doha]

وتمتاز السيارة التي تنتجها شركة حلوان ومحركات الديزل تحت اسم "نانو ايجبت" بقدرة كبيرة على الاستهلاك في الوقود تصل إلى 3 لترات لكل 100 كيلو متر

الحته دي مفهمتهاش بصراحه ..ازاي ( بتمتاز ) وازاي ( استهلاك ) الوقود ؟ يمكن قصدهم تمتاز بتوفيرها في استهلاك الوقود بس سقطت سهوا .. الله اعلم ..

عن نفسي ربنا يسامحني .. مظنش ابدا ممكن اشتري عربية زي دي .. اعتقد المشي على الرجلين اكرم للواحد .. صحيح معنديش اشتري عربية افضل بل ويمكن حتى العربية دي تبقى رفاهية بالنسبة لي بس اعتقد فعلا ان المثل القائل الي معهوش ميلزموش هو مثال صحيح .. وعلى راي الراحل احمد زكي في فيلم البيضة والحجر .. فانا ان غلى علي شيء .. تركته ..

اما عن مستقبل الشارع المصري فيما بعد ظهورها فيه .. فمتوقع ان السيارة دي هتعمل زحام ومشاكل اكثر ماهو موجود بس في نفس الوقت مش منطق نمنع الناس الي معندهاش امكانية تجيب سيارة كبيرة من انها تقتني سيارة زي دي طالما انها محتاجها .. الحل يكون باصلاح حال الشارع ووضع القوانين المناسبة مش بمنع طبقه لحساب طبقه تانيه خاصه ان كانت الطبقة الممنوعه هي الاغلبية ..

[عنبو]

على فكره ياجماعه 25 الف بالنسبه لاغبية الشعب المصرى مبلغ يعنى فمعتقدش انها هتمشى قوى الا اذا سعرها رخص عن كده يعنى بقت مثلاً ب 18 الف وفيه ناس هتجيبها وتشغلها زى التك توك ولو ده حصل يبقى العربيه كده سوقها ضاااااااع فى مصر

وانتوا طبعاً عارفين ليه

بس انا من النوع لو هجيب عربيه لازم تبقى حاجه كويسه لاما بلاش منها وخلاص

[sarmar]

الاخ المحترم س السيد

السلام عليكم

طبعا احنا فى مصر عددنا كثير وكثرة هذا العدد جعلت منة شعب مختلف المشارب والامزجة بل والمبادىء ايضا

شعب ظل فترة كبيرة ومازال يعانى من الحرمان والفقر ولاشك ان السيارة منذ زمن طويل وهى تعتبر فى مصر رمزا على يسر الحال ولكنى اعتقد انها اصبحت فى وقتنا او زماننا هذا من الاساسيات حيث اصبحت وسائل المواصلات الجماعية الخاص منها والعام اصبحت مكلفة ومضيعة للوقت بشكل كبير والاهم انها احينا ليست ادمية

والسيارات التى تفضلت مشكورا واطلعتنا عليها فهى سوف تجد لها زبون كبير بمصر وعلى فكرة مصر لايمكن ان اى حد يتوقع فيها شىء لانها كما قلت مختلفة المشارب والتقليد والافكار وحتى المبادىء

لانها مناسبة اى السيارة لاستعمالها داخل المدن الجديدة حيث اتساع الشوارع وقلة الزحام نسبيا وممكن تحتاجها البنات او الاولاد او اى فرد فى الذهاب للجامعة او اى مشاوير داخل المدن وايضا سعرها مناسب للطبقة الفوق متوسطة بس ربنا يستر من عبد القوى ويطلع اغنية فيها جباية الفلوس من جيب المتعوس ومش بس عبد القوى هنلاقى كوادر جديدة تستغل كل شىء فى انها تجمع منك فلوس

ياراجل دة انت بتروح اى مشوار بسيارتك لاى مكان بالقاهرة تجد انك صرفت مش اقل من 50 جنية مصاريف فقط بس بنزين ومواقف انتظار وغيرة

نفسى لالا بحلم ان مصر تكون مش زى دولة اوربية لالا بس مثل اى دولة عربية فيها شىء صح نحترمة جميعا ونمشى علية ويبعد عننا عبد القوى

[raouf]

طبعاً انا كنت باصم بالعشرة إنهم لما قالوا إن السيارة الهندية " نانو " هاتنزل تكسر الدنيا بـ 2000 دولار ..

قلت وأنا مطمئن ... ده عند ماما هناك

إبتسم أنت في بلد يوسف بطرس غالي ..

يعني يا ظالم 11500 ريال ... بقدرة قادر على ما يوصلوا عندنا يبقوا 25000 ج ..... قابلة للزيادة لو أستمر الأقبال عليها مثلما تم للأسف مع التوك توك ... اللي أول ما نزل كان بـ 8000 وهوب وصل دلوقت 18000 ..... !!!!!!!!!!!!

.

راجع حساباتك يا ابو السيد 2000 دولار = 7500 ريال بس = 11000 جنيه بالجمارك = 16000

مش متخيل نفسى بعد الاكسبدشن و الاكاديا اركب النانو بس اقول ربنا يديمها نعمة ويرحمنا من جبابرة الجكومة

على راى واحد صاحبى سعودى بيقولى عاوز 5 سيارات منهم لاولاده يلعبوا فيهم بالجنينة

ثمن الكورولا 2009 فى مصر بيجيب تاهو 2009 فى السعودية و عجبى

[justme]

احب اطمنك يا خي سي السيد

مش هتكون مناسبة ليه

اول حاجة الحجم

يعني واحد زيي مثلا طوله 190 سم ازاي هيقعد في البتاعة دي

وبعدين هنروح بعيد ليه

daewoo matiz

انا جربت اركب في الكرس الوراني ومش هقولك كنا بنتريق على العربية بتاعت صاحبنا هو كان بيتاجر فيها المهم جربنا نتنطط جوة العربية كانت هتتقلب بينا

يعني كفاية مطب واحد وانت ماشي بسرعة وما ادراك ما المطبات اللي في مصر

ولا حتى زلطه ممكن تعمل عمايل معاك

تاني حاجة الوزن

يعني تخيل كده الشعب المصري معروف بالبدانة

طب لو واحد كده ماشاء الله هو والمدام ومعاهم 3 عيال

مش هتنفعهم

ده غير ان من الأخر

زي ما قلت السعر بتاعها مش رخيص

يعني بتمنها ممكن تشتري حته فياة 128 سماوي خمسة ناقلة مستعملة

وعيش حياتك

تم تعديل 14 ديسمبر 2009 بواسطة justme

[miramikhail]

هو الحقيقة أنا عارفة الماروتى وركبتها بس هى مناسبة للسيدات يعنى واحدة بتتحرك كده جوة الحى بتاعها توصل الولاد الدرس تجيبهم من الدرس مش أكتر يعنى عربية نمرة 2 مش العربية الأساسية.

لككن هو فعلا الأمان فى العربيات دية أكيد ملهوش حساب خلاص .

هو بس أنا عايزة أسأل على عربيتان يمكن ناس كتير متعرفهاش و هى الرمسيس هى ظهرت زمان و كانت صناعة مصرية و أختفت و العربية النصر 128 برضة أية أخبارها.

و الشؤال المهم أحنا لية مش بنعمل عربيات مصرى مثلا عن طريق الهيئة العربية للتصنيع تبقى بسعر معقول وأمان معقول

[Simba]

احنا في مصر ما شاء الله السيارة وسيلة ترفيه لكن في اغلب الدول هي وسيلة انتقال والله يسامح اللي كان السبب

من حق اي اسرة يكون عندها سيارة تقضي بيها مشاويرها وتلم فيها عيالها