مقابلات مقاطعه كيبك سين وجيم بالفرنسيه مع الترجمه للعربيه

[myusername]

والله انا بعتقد سهولة او صعوبة المقابلة تتوقف على معطيات طالب الهجرة .. wst:: .يعني الممتحن عندو انطباع اولي وفقا لمعطيات طالب الهجرة ...يعني الظاهر تخصصك المطلوب يا اخت منال و الشهادتين الل معاكي ...وجرأتك بالتقديم على الهجرة لوحدك رغم كونك ست بمجتمع شرقي (وده يعتبر متوافقا مع قيم المجتمع الكندي ..) كل ده خلى المقابلة روتينية ..وتحصيل حاصل ..والعكس صحيح يعني في ناس بيكون الانطباع الأولي للمتحن انهم راسبين الا اذا ابدوا مقدرات كبيرة باللغة ومعرفة كبيرة بالمجتمع الكندي ) ..بس طبعا كل واحد يعمل :blink: اللي عليه عشان مايسبش للقضا حجة .. :sad:

كلام سليم مئة فى المئة... تستحق التحية و التقدير عليه... bv:-

شفتى كلام الناس اللى بتفهم :wub:

[Morial]

ليه كدة يا جماعة تبوظوا فرحتي وتتخانقوا والله انا زعلت جدا

اولا مذاكرة كندا دي حاجة مفيهاش نقاش اصلا

مذاكرة كل صغيرة وكبيرة

ده انا بقولكم كنت حافظة النشيد الوطني وانا في السعودية

انا عارفة حاجات والله العظيم احمد بهاء اللي في كيبيك بقاله 3 سنين مايعرفهاش

طبعا مذاكرة كيبيك من الاساسيات اللي مفيهاش نقاش وكوني انا متسألتش في الحاجات دي فده مش مقياس وكل مقابلة وليها ظروفها وكمان كل ممتحن ودماغة وبعدين الست كانت بتسبني وتخرج تقعدلها بالعشر دقايق برة وكررتها 3 مرات ربنا بيسبب الاسباب

بس هي لو كانت سألت أنا كنت جاهزة والواحد ميسبش حاجة للظروف

تم تعديل 24 مايو 2010 بواسطة Morial

[Morial]

انا مستغربة اوي يا يوزر

خلاف بينك وبين حد تاني انا دخلي بيه ايه ?

وليه تدخلني طرف في خلافاتك

ثم يا سيدي لو مش عايز تعرفني انت حر

ومش من حقك مع احترامي ليك انك تحلف عليا

احنا اصدقاء بس ده مش يديك الحق تكلمني بالطريقة دي

ولو تسمح تبقي تاخد بالك بعد كدة

[romany beshay]

اختى العزيزة منال الف الف مليون مبروك والله كنت واثق من نجاحك لانك تعبتى جدا فى المذكرة وعملتى اللى عليكى ربنا يوفقك وعقبالنا جميعا

[Morial]

wst:: الف مبروك ليكى يا منال او ام محمد انا عارف انت تعبتى اد اية وصدقينى يا منال انا كنت بدعيلك من يوم الجمعة اللى فات يوم ما سافرت لحد النهاردة انا لسة جاى من مشوار بعد ما رجعت البيت اول حاجة عملتها ان فتحت الكمبيوتر قبل ما اشرب بق مية علشان اطمن عليكى والحمد للة انى اطمنت الف مبروك وباذن نجاحك يكون وش السعد على الرحالة باشا وعلى الباقى باذن اللة

اخي العزيز جدا محمد كيبيك

الف شكر ويارب اباركلك قريب

وارد شوية من تعبك معايا

وانا مش ناسية ولا هنسي تعبك معايا ابدا

[وليد نور]

قلولتهالك من يومين ومصدقتنيش وعلى فكرة خبر نجاحك انا حطيتة عالمنتدى اليوم من غير ما اقرأ نجاحك

الحاسه السااااابعه

مبروك يا اخت مناال هات لى معاكى وانتى جاية شويه حلويات سوريه مشكله

[myusername]

قال رسول الله صلى الله عليه و سلم : أنا زعيم ببيت في ربض الجنة لمن ترك المراء وإن كان محقا، وببيت في وسط الجنة لمن ترك الكذب وإن كان مازحاً، وببيت في أعلى الجنة لمن حسَّن خُلُقَه.

صدق رسول الله صلى الله عليه وسلم

فأما الزبد فيذهب جفاء وأما ما ينفع الناس فيمكث في الأرض. صدق الله العظيم.

اتمنى لكم التوفيق كلكم باذن الله... اللى مدخلش المقابلة يا رب ينجح.. و اللى نجح.. يا رب ياخد التأشيرة و ربنا ييسر له الحال.

السلام عليكم و رحمة الله و بركاته.

[alaafrench m]

اسف عالتاخير فى التهنئة

مليون مليون مبروك يا اخت منال وعقبال الفيزا

وان الله لا يضيع اجر من احسن عملا

[erene]

لو سمحتوا ممكن لو حد من اهل المنتدى عمل تحديد مستوى فى المركز الثقافى الفرنسى

شفهى وتحريرى علشان يتقدم للسفارة

يقولى شكل الامتحان اية يساعدنى اعمل اية علشان اعملة وانجح فية ان شاء الله

لو سمحتوا عايزة اعرف اسئلة امتحان تحديد المستوى شكلها اية

[dr asar pharma]

بداية بنشكرك يامنال على سردك الجميل للتفاصيل والاحداث الجميلة ليوم تاريخي في حياتك كهذا ويارب يجعل ايامك كلها فرح وهنا وسعاده .

وكلامك عين العقل انك ذاكرتي على اد ماربنا قدرك لان اكيد ماحدش فينا عارف رايح المقابلة هيمتحن مع مين وهيتسأل في ايه فلازم نكون راحين وداخلين واحنا كلنا ثقه بربنا سبحانه وتعالى وبأنفسنا عشان نقدر نوصل للي احنا عاوزينه ونحصل على الغالية CSQ وطبعا دي كلها اسباب ولكن التوفيق بيد ربنا سبحانه وتعالى .

ونا شايف ان ابوسمرة كلامة مظبوط بالنسبة للاستعداد والمذاكرة والاعداد الجيد عشان توضح الامور للناس وعشان الكل يستفيد وعشان الناس تكسر الرهبة اللي عندهم في المقابلات وعشان يطمئنهم

وبالنسبة لابوسمرة هو كلمني ووضحلي اللي حصل هنا والاشكالات اللي بعض الزملاء بيدخلوا يختلقوها هنا من غير اي معنى لذلك...

وبناء على ذلك ابوسمرة قالي انه مش داخل المنتدى لفترة ان لم يكن للابد لحين تنقية المنتدى .

وبالنسبة للزميل مايوزر نطلب منه الهدوء قليلا لانه بصراحه كنت شايف اسلوبه يميل للغضاضه وبدون اي داعي لذلك...وأجده يختلق المشاكل مع الزملاء واحد تلو الاخر...الان مع زميل فاضل مثل ابوسمرة وبصراحة نعتب عليك في ذلك لان انسان فاضل مثل ابوسمرة تعب كثيرا معانا جميعا وكتر خيره على مجهوده الرائع هذا ويشهد له الجميع بذلك ولم يتأخر عن احد منا يوما في اي استفسار او مساعده ومنذ كم يوم مع المسيو .

وشكرا للجميع

[mostafamaher]

:blink: هو ايه اللي حصل ؟؟!!

وبعدين يامنال فين بقيت المقابله .. مش موجود الا الجزء الاول بس

[mostafamaher]

بصراحه ابو سمره من الناس الخدومه هنا جدا جدا ... ياريت لو في حاجه زعلته زي منا قريت .. ميزعلش عشان بجد احنا محتاجينه

[malekmalooka]

يا استاذ ابو سمره حضرتك اصلا اللي عملت التوبيك ده و كل اللي مقدمين على الهجرة بيشاركوا فية للاستفادة من خبرات حضرتك و خاصة اللي لسة مقبلين على المرحلة دي و محتجين مساعدة فمينفعش حضرتك تخذلنا كلنا لخلاف مع احد الاعضاء وتتخلى عن التوبيك بتاعك

[Pharm]

الف الف الف مبروك يا مناك ربنا فعى مش بيضيع تعب حد

بسرعه تعالى احجزى فى طابور الميديكال

بالتوفيق ويارب تكونى رحلتك سعيدة

[اغابي]

مــــــــــــــــبروك يا منــــــــــال - انت ما تعرفيـــــش اصلى رابطـــــة نجمــــــى بنجمـــــك bv:-

اتفائلت اوى - واول ما عرفت بخبر نجاحك رغم احساسي كان بيقولى انك حتنجحي - انا اســــعد واحدة فى العـــــالم نهــــــــارده

المهم فضلت اتنطط فى مكانى زى الاطفال - لدرجة خبطت فى فيشة الكمبيوتر راح فصل وقفل منى من غير ما اقصد bv:-

مبرووووول يا مانوووو يا حبيبتى - الف الف مبرووك - وعقبالى bv:-

اغابي

bv:-

تم تعديل 25 مايو 2010 بواسطة اغابي

[محمد كيبيك]

bv:-بخصوص مدام ان كنت عايز احكى ان السنة اللى فاتت فى شهر سبتمبر كان فى ميشن هنا فى مصر ومن ضمن الناس اللى عندهم مقابلات كان فى واحد من الاسماعيلية مستواة كان الثانى حاول انة ياجل مامكنش لانة كان ماجل كذا مرة رهيب يونس كان مبوز ملفة راح لعصام كان فاقد الامل فية دخل المقابلة وكانت مع مدام ان وعلى الرغم من كل دة نجح bv:-

[Morial]

يارب كل اللي مستنيين المقابلة ينجحوا ويكون نصيبهم مع مدام أن السكرة

سألتني انتي درستي كليتين ليه ?

وأنا قولتلها علي فكرة انا عندي شهادتين ثانوية عامة كمان وكنت بطلعهم لكن هي قالتلي لاء مفيش داعي مش عايزة اشوفهم

بعد كدة سألتني هي الدراسة في كلية التمريض اربع سنين

قولتها ايوة بالأضافة لسنة الامتياز واللي انا قضيتها في مستشفي القصر العيني

سألتني وكلية الاداب كام سنة

قولتلها اربعة بردة

كتبت علي الكمبيوتر وقعدت تحسب وده خلاني اعتقد انها حسبتلي درجات علي الاتنين

يعني ممكن تكون زودتني درجة او اتنين علي الليسانس

بعد كدة قالتلي انتي سبتي السعودية لية ?

قولتلها اولا وجودي في السعودية كان بهدف اني اجمع مبلغ من المال علشان يساعدني في الهجرة لأن انا عندي الرغبة والنية للهجرة من وقت طويل لكن كان ينقصني المال ومعني كدة ان اقامتي في السعودية كانت بشكل مؤقت وكمان انا مقدرش استمر هناك لأن السعوديين لا يسمحون لأمرأة بدون زوج ان تحضر اطفالها وتعيش بمفردها خارج حدود المستشفي وكمان قيم المجتمع السعودي ماتناسبنيش لأن انا واحدة تعتقد كثيرا في حرية الفرد في اختيار نمط واسلوب حياته وعلي العكس من ذلك نجد ان حقوق المرأة الاساسية غير موجودة في السعودية وده اللي انا مقدرش اتحمله

قالتلي طيب هاتي بيان الدرجات بتاع الكليتين

اديتهولها

شهادات الخبرة اديتهالها

وفجأة بصت في الشهادة بتاعة السعودية وبرقت وقلبت وشها وقالتلي كأنها بتشخط فيا

مدام اهي مش الصورة اللي في شهادة البكالوريوس هي نفسها اللي في شهادة الخبرة اللي انتي وخداها من السعودية بعد تخرجك يجي بعشر سنين اذاي ده

قولتلها عادي مفيش مشكلة هما في السعودية لم يشترطوا ان الصورة تكون حديثة والصولر الحديثة اللي كانت معايا كلها بدون ما اغطي شعري وهما بيشترطوا ان اي صورة لازم الست تغطي راسها علشان كدة اضطريت اديهم صورة قديمة لأني في الصورة دي كنت مغطية راسي

ابتسمت واقتنعت وهديت

والله يسامحه بقي الموظف السعودي اللي اضطرني احط صورة قديمة لأن الصور الجديدة مش عاجبه حضرته

بعد كده قالتلي انت بتتكلمي انجليزي

قولتلها طبعا ده انا حتي دراستي الجامعية في كلية التمريض كلها بالانجليزى

قالتلي الكتب بالانجليزي ماشي لكن كمان المدرسين بيتكلموا انجليزي في المحاضرات

قولتلها طبعا بالاضافة لان وجودي في السعودية حسن لغتي الانجليزية لان انا هناك كنت بتعامل مع جنسيات مختلفة مابين هنود وفلبينيين وباكستانيين وبعض الاوروبيين

وشها كان مبسوط

وبعدين سألتني بتحبي الافلام الانجليزية

قولتلها انا بعشق السينما الامريكية

قالتلي ايه نوعية الافلام اللي بتحبيها

قولتلها افلام الرعب

وبعد ما افرج علي فيلم رعب مااعرفش انام واضطر افتح نور البيت كله

فطست من الضحك

وقالتلي ايه اخر فيلم شوفتيه

قولتيلها saw

قالتلي ماعرفوش

طيب وابنك بيحب افلام الرعب زيك

قولتيلها لاء هو غاوي افلام اكشن

ضحكت كأنها كانت متوقعة الاجابة دي

كل الجزء اللي فات بتاع السينما كان بالانجليزي

رحت انا قالبه فرنساوي تاني وقولتيلها في الحقيقة يا مدام انا نسيت الانجليزي بسبب دراستي للفرنساوي

ابتسمت وقالتلي اكيد

[Morial]

أغابي حبيبتي

وحشاني جدا

انا فرحانه اوي علشان خلاص خلصت من المذاكرة ووجع الدماغ

وهقدر افضي وادخل نون النسوة والمواضيع اللذيذة اللي علي البانر

انا كنت قدمت طلب للادارة انهم يوقفوا عضويتي لمدة شهرين علشان اقدر اذاكر فرنساوي بضمير لأن المحاورات كانت بتاخد من وقتي كتير

والحمد لله هما استجابوا لطلبي

وكنت دايما اوعد نفسي اني زي ما حرمت نفسي من المحاورات

ارجع الجأ فيها بس بعد النجاح

يعني هههههههههههههههه خدنا الاجازة وطظ في الدراسة

تم تعديل 25 مايو 2010 بواسطة Morial

[Morial]

قلولتهالك من يومين ومصدقتنيش وعلى فكرة خبر نجاحك انا حطيتة عالمنتدى اليوم من غير ما اقرأ نجاحك

الحاسه السااااابعه

مبروك يا اخت مناال هات لى معاكى وانتى جاية شويه حلويات سوريه مشكله

عقبال ما اباركلك علي الفيزا يارب

واذا كان علي الحلويات

غالي والطلب رخيص

[Morial]

لو سمحتوا ممكن لو حد من اهل المنتدى عمل تحديد مستوى فى المركز الثقافى الفرنسى

شفهى وتحريرى علشان يتقدم للسفارة

يقولى شكل الامتحان اية يساعدنى اعمل اية علشان اعملة وانجح فية ان شاء الله

لو سمحتوا عايزة اعرف اسئلة امتحان تحديد المستوى شكلها اية

ميرسي يا مسيو علاء ويارب اباركلك في القريب العاجل

وانت هتنجح بعون الله

وانا عارفة