مقابلات مقاطعه كيبك سين وجيم بالفرنسيه مع الترجمه للعربيه

[mohamed allaam]

الف مبروك يارحاله وعقبال الفيزا ان شاء الله :sad:

منتظرين التفاصيل

[اغابي]

ددددول بقى لدكتورنا اللى منورنا دايما اوى جدا خالص د/ ابو سمرة

انا عارفة ان الورد بتاعى يا د/ ابو سمرة بيجبلك حساسية :lol:

دووووول لدكتورنا الرحالة باشا بمناسبة النجاح الساحق اللى حيحكوهولنا بالتفصيل لاحق اول ما يرجع بالسلامة

roseop:

دوووول - بس كدا خلاص - على راى شعبولة عبد الرحيم واييييييييييه :lol:

اغابي

[بيبو كندا]

بشــــــــــــــــــــــــــــــــــــــــرى هامه جدا

لكل المنتظرين موعد المقابلات

ده موقع مقابلات كيبك و نزل فيه ميشن الفاهرة من 29/08/2010 الى 07/10/2010

يعنى انتظروا ميل المقابلة من الان

http://www.immigration-quebec.gouv.qc.ca/p...urs-lieu-en.pdf

[توتا عماد]

بشــــــــــــــــــــــــــــــــــــــــرى هامه جدا

لكل المنتظرين موعد المقابلات

ده موقع مقابلات كيبك و نزل فيه ميشن الفاهرة من 29/08/2010 الى 07/10/2010

يعنى انتظروا ميل المقابلة من الان

http://www.immigration-quebec.gouv.qc.ca/p...urs-lieu-en.pdf

يا جماعة ياريت نطمن بعض لو حد جاله ميعاد انترفيو ، انا كده اتوترت اكتر

[توتا عماد]

بشــــــــــــــــــــــــــــــــــــــــرى هامه جدا

لكل المنتظرين موعد المقابلات

ده موقع مقابلات كيبك و نزل فيه ميشن الفاهرة من 29/08/2010 الى 07/10/2010

يعنى انتظروا ميل المقابلة من الان

http://www.immigration-quebec.gouv.qc.ca/p...urs-lieu-en.pdf

يا جماعة ياريت نطمن بعض لو حد جاله ميعاد انترفيو ، انا كده اتوترت اكتر

يا جماعة فى اكتر من ميشن فى سوريا وده من اول 11/7 وينتهوا فى سوريا 30/9/2010

يا ترى الناس دول اتبعتلهم جوابات الانترفيو ولا لسه

يعنى هتكون انترفيوهاتنا فى مصر بس ولا احتمال كمان يكون فى سوريا

[اغابي]

بشــــــــــــــــــــــــــــــــــــــــرى هامه جدا

لكل المنتظرين موعد المقابلات

ده موقع مقابلات كيبك و نزل فيه ميشن الفاهرة من 29/08/2010 الى 07/10/2010

يعنى انتظروا ميل المقابلة من الان

http://www.immigration-quebec.gouv.qc.ca/p...urs-lieu-en.pdf

مش فاهمة حاجة ؟؟؟؟؟؟؟؟؟؟؟؟؟؟؟؟؟؟ حـــد يشـــــرح لي ........

اغابي

[Pharm]

يا اخت اعابى كدا ميشن مصر اتحدد يعنى ناس تجهز نفسها للمقابلات وكمان فيه ميشن فى سوريا يعنى ناس تشد حيلها بقا

فينك يا ابو سمرة يا عثل ورينا الهمة الشباب دا كله عاوزينه ياخد CSQ

[محمد كيبيك]

كنت فى الاول فرحان ان اخيرا نزلت مواعيد ميشن 9 لكن دلوقتى انا قلقان وزاد قلقى لما قريت ان فى مقابلات هتكون فى سوريا انا من رايى ان احنا من دلوقتى نراسل السفارة الكندية فى سوريا ونطلب ان مقابلاتنا تبقى هنا فى مصر كفاية الموقف اللى حصل مع pharm فى مطار القاهرة لما اسمة تطابق مع اسم واحد هارب من تنفيذ احكام ولما وصل pharm دمشق حبيب السواق خلى بية

[dr gege]

يلا يا جماعة كل الناس اللي متوقعة ومتاكدة انها هتمتحن عايزين مزاكرة نار ونسمع اخبار كويسة عنهم قريب

[malekmalooka]

يا جماعه لو سمحتم حد يفهمني ايه اللي مكتوب في السايت ده لانه مكتوب فيه ان الناس اللي بعتوا من مصر مش في الميشن ده

http://www.immigration-quebec.gouv.qc.ca/f...eaux.html#damas

[توتا عماد]

يا جماعه لو سمحتم حد يفهمني ايه اللي مكتوب في السايت ده لانه مكتوب فيه ان الناس اللي بعتوا من مصر مش في الميشن ده

http://www.immigration-quebec.gouv.qc.ca/f...eaux.html#damas

انتى قصدك يا ملوكة ايه بالظبط الجملة دى

Aucune entrevue

pour ces pays

actuellement1 et 2 ولا ايه

[malekmalooka]

يا جماعه لو سمحتم حد يفهمني ايه اللي مكتوب في السايت ده لانه مكتوب فيه ان الناس اللي بعتوا من مصر مش في الميشن ده

http://www.immigration-quebec.gouv.qc.ca/f...eaux.html#damas

انتى قصدك يا ملوكة ايه بالظبط الجملة دى

Aucune entrevue

pour ces pays

actuellement1 et 2 ولا ايه

ايو يا توتا

[توتا عماد]

يا جماعه لو سمحتم حد يفهمني ايه اللي مكتوب في السايت ده لانه مكتوب فيه ان الناس اللي بعتوا من مصر مش في الميشن ده

http://www.immigration-quebec.gouv.qc.ca/f...eaux.html#damas

انتى قصدك يا ملوكة ايه بالظبط الجملة دى

Aucune entrevue

pour ces pays

actuellement1 et 2 ولا ايه

انا بصراحة مش فاهمة؟؟؟؟؟؟؟؟؟؟؟؟؟ لو حد عارف حاجة يقول

[bermawy]

جاءنا البيااااان التالي.......

حصول الرحالة باشا على احلى واغلى CSQ من الاراض السورية عن استحقاق وجدارة

الفين تلاته مليووون مبروووك ياغالي....وآدي احلى زغروته وبارتي لعيونك يابرنس :110: :110: :110:

:unsure: wst:: :yahoo: bnd5::

منتظرين رجعتك بالسلامة ياابوسمير ودخلتك البهية علينا والايفاء بالتفاصيل

وعقبال المديكال والفيزا

:blink: :sad: wst::

السلام عليكم ورحمة الله وبركاته

الف مبروك للرجالة باشا وعقبال الجميع ان شاء الله

[صيدلى كندى]

:110: :yahoo: bnd5:: :blink: :sad: wst:: :unsure: wst::

الف مليوووون مبروووووووووووك يا رحالة باشا ههههههه والله فرحتنا بعد ما الواحد كان هيجيله كبت والله تستاهلها ويارب علطووووووول موفق وتوصلنا بالسلامه يا غالى

......وطالما انته قاعدفى مصر يبقى اكتبلى تليفونك عالخاص عشان نتشرف بمعرفتك يا غالى....

[Rock]

كنت فى الاول فرحان ان اخيرا نزلت مواعيد ميشن 9 لكن دلوقتى انا قلقان وزاد قلقى لما قريت ان فى مقابلات هتكون فى سوريا انا من رايى ان احنا من دلوقتى نراسل السفارة الكندية فى سوريا ونطلب ان مقابلاتنا تبقى هنا فى مصر كفاية الموقف اللى حصل مع pharm فى مطار القاهرة لما اسمة تطابق مع اسم واحد هارب من تنفيذ احكام ولما وصل pharm دمشق حبيب السواق خلى بية

حلو الكلام بس ازيك بقي لما نلاقي نفسنا محدوفين علي ميشن تاني بعيد ,,,,بصراحة انا فكرت في نفس الفكرة ,,,بس كفايانا بقي انتظار......و لا انت رأي حضرتك اية و رأي اخوانا اية :unsure:

انا شايف انة لو كنا علي ميشن سوريا (لا قدر اللة).....يبقي نتأكد الاول من شرطة تنفيذ الاحكام :ninja:

[dr alaa pharma]

اخوانى الاحباء يدعوكم حبيب الملايين الرحاله باشا الى عشاء فاخر على انغام رحلته مع السى اس كيو

من الاراضى السوريه الشقيقه بعد دقائق معدوده من الان و الدعوة عامه

ادخل برجلك اليمين يا بطل :unsure:

[الرحالة باشا]

الحمد لله وبفضل ربنا ثم بفضل دعواتكم نجحت و أخدت الغالية ال CSQ

أنا الحمد لله كان عندي حسن ظن بالله تعالي بإن ربنا هاينجحني , مش معقولة كل الناس الحلوة دي تدعيلي وفي الأخر ما أنجحشي

أنا بتشكر لكم جداً جداً جداً ولو إن كلمات الشكر لا تكفي أن أرد الدين ليكم

طبعاً أنتم عارفين إن مقابلتي كانت يوم الأربعاء صباحاً في سوريا 23/6

طبعاً إحنا سافرنا لسوريا من يوم الأحد 20/6 بحيث ندي نفسنا كام يوم قبل المقابلة نتعود علي المكان اللي هنام فيه وكمان نداكر لنا يومين قبل المقابلة , أنتم طبعاً عارفين لما الواحد بينزل أجازة مصر , سلامات وزيارات وحركات , كان الواحد مش عارف يذاكر

المهم وصلنا دير إبراهيم الخليل يوم الأحد بعد ما أتأخرت الطيارة بتاعتنا حوالي ساعتين نتيجة عطل فني لدرجة إنهم نزلونا من الطيارة بشنطنا بعد ما دخلنا الطيارة و قعدنا , بصراحة كانت أول القصيدة !!!!!!!!!!!!!

المهم وصلنا بالسلامة وكان في أنتظارنا في المطار السواق حسن

بصراحة كانت الدير نظيفة جداً والغرفة معقولة جداً وطبعاً مفيش تليفزيون ودي الحاجة اللي شجعتنا علي أننا نستغل كل دقيقة في المداكرة , طبعاً كان لازم برده نزور باب توما وسوق الحميدية والمسجد الأموي ونشتري شوية حاجات كدة علي الماشي وكان لازم برده ناكل بوظة من بكداش اللي في الحميدية , راااااااااائع

طبعاً موقع الدير في حي جارامانا , ش الدير

كل شيئ كان حوالينا , بس إحنا فضلنا ناكل في مطعم أسمة النوافير , بصراحة أكله جميل والناس فيه زي كل السوريين ناس مضيافة و كريمة و حبوبة كتييييير

المهم أنا سمعت كلام حبيبي د علاء فارما لما نصحني أروح السفارة قبلها بيوم أحاول أعرف مين اللي بيعمل مقابلات وبالفعل رحت يوم التلات ودخلت السفارة وأتأكدت من ميعاد مقابلتي وإن كل شيئ تمام ولما كنت أسأل عن أسم مستشارين الهجرة كان الكل يقول ما نعرفشي أسمائهم ( طبعاً) , المهم قابلت شاب سوري كان واقف أمن علي البوابة ولما سألته مين اللي بيعمل المقابلات قالي إنهم تلاتة بس مش فاكر الأسماء فقول أستعبطت و أقول له أنا سمعت إن مسيو سيمون ومدام أن موجودين فارد و قالي مظبوط بس التالتة واحدة ست لكن مايعرفشي أسمها

المهم أنا قول طالما فيهم مدام أن ومسيو سيمون يبقي كده قشطة جداً ويارب نقع تحت إيد واحد فيهم ويبعدنا عن الست التالتة اللي مش عارفنها دي

ورجعنا الفندق و أتغدينا وراجعنا المراجعة النهائية بدون ما نسأل بعضنا أنا ومراتي علشان ما نتوترشي لو غلطنا ونسينا حاجة

المهم تاني يوم قمنا من النوم الساعة 6 ونص ونزلنا من الفندق متوجهين للسفارة الساعة 7 ونص ووصلنا الساعة 8 ص

دخلنا علي طول علي بوابة السفارة الكندية و أخدنا إدن دخول لمكتب كيبك وتوجهنا للمكتب

طبعاً بفضل الزيارة اللي عملناها قبل المقابلة بيوم كان الواحد واخد علي المكان وعارفه كويس وده برده بيشيل الرهبة شوية

المهم كلمنا الأستقبال نعرفهم بوصولنا وقالولنا أنتظروا شوية

وإحنا قاعدين كان جبنا راجل وست يبدوا لبنانيين تقريباً كانوا بيتكلموا فرنساوي لبلب لما عقدونا علي الصبح

المهم قبل معادنا اللي كان 8 ونص لاقيناهم بينادوا علينا الساعة 8 وعشر دقائق تقريباً وقالولنا أتفضلوا علي غرفة رقم 2

طبعاً و أحنا قاعدين في الأستقبال شوفنا غرفتين بباب خشب وشباك زجاج شوفنا من خلاله الفاصل الزجاجي اللي بين مكتب المستشار والكرسيين اللي بنقعد عليهم

المهم دخلنا و أول ما شوفنا المستشارة الناحية التانية قولنا بنجور مدام مع أبتسامة لطيفة وجلسنا قدامها وبدأت تعرفنا بنفسها ( المفاجأة ) أنها الست التالتة

مين حضرتك يا ست الحاجة , طلعت أسمها مدام كرستيان

وصدق اللي قال إن اللي تخاف منه مفيش أحسن منه , المدام طلعت محترمة جداً ومتعاونة جداً جداً

بدأت تعرفنا بنفسها وكانت في لوحة بأسمها علي الشباك شاورت عليها

وقالتلي هناقش طلبكم للهجرة لكيبك

و أول حاجة طلبتها العقد المالي اللي أخدناه من شباك الأستقبال لما زورنا المكتب اليوم السابق وقالولنا أملوه هاتوه معاكم في المقابلة بكرة

ثم بدأت تطلب الباسبورات , ولما قولنالها إننا غيرنا الباسبورات علشان نفصل الأولاد وكمان كان فاضل عليهم أقل من سنة

لما قولنالها كده فطلبت مننا صور للباسبورات الجديدة والحمد لله كانت جاهزة معانا أصل أخوكم كان عامل حساب كل الحركات دي لكن للأسف ما عدا حاجة واحدة كادت أن تدمر المقابلة تدميرا لكن ربنا ستر ( نجيلها بعدين )

المهم طلبت شهادة الميلاد , ثم كارنية النقابة وكمان أديتها مع الكارنية شهادة من النقابة العامة للطب البيطري بالقاهرة بتشهد فيها ببيانات تسجيلي في النقابة وكانت موثقة من الخارجية ومترجمها كمان

المهم نيجي بقه لأول صدمة ليا في المقابلة ( خد بالك يا هرفي علشان أنت بيطري زي فاركز معايا كويس )

مدام كرستيان طلبت شهادة الكلية بيان الدرجات ولما أديتها الشهادات اللي طلعتها من الكلية بالأنجليزي زي ما كلوا بيعمل , لقيت المدام برقت و أعترضت وقالتي نووووووووووو

دي مش شهادة الدبلومة بتاعة الطب البيطري دي شهادة مؤقته ومكتوب فيها أنك خلصت تدريب عملي وكده , أنتي بتقولي إيه يا حاجة يا دي المصيبة , الحاجة كريستيان مش عارفة شهادة التخرج المؤقتة اللي بنعملها في الكلية , وحاولت أشرحلها و أفهمها لكم مخها كان رافض يقتنع واللي كانت ماسكة فيه إنها شهادة مؤقتة وفيها كلمة تدريب عملي

يعني بالعربي كده بالنسبة ليها مفيش شهادة مظبوطة بالمؤهل

أنا لطمت وقلت أنا كده أترفضت , أقنعها إزاي دي بس يارب

المهم أنا برده كنت واخد شوية ورق أحتياطي معايا ومن ضمنهم الشهادة الكرتون وكنت موثقها من الخارجية لكن مش مترجمها ولا حتي صورة منها

المهم رحت مطلعلها الشهادة الكرتون وقلتلها إن دي الشهادة الدائمة و ما بتطلعشي غير مرة واحدة في العمر وبعد التخرج يجي بخمس سنين كده ولا حاجة

المهم أول ماشافتها قالتلي هي دي الدبلومة وهي دي الشهادة المظبوطة لأن التانية دي ماتنفعشي في كيبك وهي دي اللي لازم تاخدها معاك كيبك

المهم طلبت منها نسخها مترجمة قولتلها مش معايا , يادي الواقعة الهباب راحت قايمه تصورها عندها في السكرتارية ورجعت تاني طبعاً كنا أحنا بنسترد أنفسنا اللي أتقطعت من المفاجئة العجيبة دي , لكن الحمد لله ربنا ستر

المهم رجعت تاني وبدأت تطلب باقي الورق وكل شوية تكتب علي الكومبيوتر وتكتب الدرجات في ورقة خارجية زي الجدول كده وقدام كل خانة زي المؤهل العمر وكدة تكتب الدرجة

المهم ما صدقنا خرجنا من المطب الأولاني , إلا ورححنا وقعين في مطب غيرة , إيه بقه ؟

لما طلبت شهادات الخبرة الأصول أديتهالها ورجعتها كلها ليا ماعدا الجواب الأخير اللي جبته من الهباب الكفيل واللي بيقول إني مازلت علي رأس العمل حتي شهر 6 ده لأن أخر جواب جبته كان في 5/ 2009 والجواب الجديد كده هايضيف سنة خبرة جديدة كمان

المهم لما مارجعتهوش وراحت كاتبة عليه تاريخ بدأ الخبرة والنهاية قولتلها هو حضرتك هاتخدي الخطاب قالتي أيوه , قولتلها بس أنا لازم أخدة علشان أحطه في ملف الفيدرال لو أتقبلت النهاردة قالتلي بس أنا لازم أخده فارحت ساكت ومبلم كأني مصدوم مش عارف هاعمل إيه , طبعاً ده كان خطأ كبير مني لكن مش في حق المستشارة ولا المقابلة لكن جل من لايسهو مع أني كنت مجهز حاجات كتير أخدها معايا زي الشهادة الكرتون حتي كارنيه الكلية و أنا في دفعة البكالوريوس لكن أهوه دي اللي حصل ولو كانت قفلت كنت هاديهولها بس ده كان هايأخر تقديمي للفيدرال لحد ما أجيب واحدة تانية من الهباب الكفيل لكن مش مشكلة المهم المستشارة تكون راضية , لكن ربك لما يريد ييسر لعبيده بتلاقي كل الأمور أتحلت بمنتهي اليسر

كل اللي عملته المستشارة إنها قامت تصورها و أدتني الأصل و أكتفت بالصورة بعد ما ختمتها بالختم بتاعها بس طبعاً بعد ما زغرتلي بعينيها مع أبتسامة بسيطة كده كأنها مفروسة علشان كل شوية تقوم تصور ورق

لكن ده خلاها تضيع وقت كتير في الخروج للتصوير وترجع تاني لما خلاها جت علي الأسئلة المهمة بتاعة إيه اللي تعرفوه عن كيبك وقيم المجتمع الكيبكي لكن كانت في اللحظة دي مش باصة ليا ولا لمراتي فقولتلها السؤال ليا ولا لمراتي فقالتلي ليكم أنت الأتنين

فراحت مراتي سابقاني وبدأت ترص شوية في القيم لكن عاوز أقول لكم إن طبعاً من رهبة المقابلة اللي كانت فيها مراتي كانت الأجابات واحد علي عشرة من اللي نعرفة ولما قربت مراتي تخلص اللي فاكراه قولت أكمل أنا , لاقيت المستشارة راحت ناقلة علي السؤال التاني لمراتي وقالتلها وإيه اللي شدكم لكيبك وبدأت مراتي ترص شوية عنواين للكلام اللي حافظينه زي علشان نظام الصحة ونظام التعليم وكيبك ديموقراطية , والله يا جماعة مجرد عناوين

طبعاً السبب الرئيسي اللي خلاها مستعجلة في الأسئلة وكأنها مجرد أسئلة جبر خواطر التأخير اللي حصل علشان تصور الورق لكن عسي ان تكرهوا شيئاً وهو خير لكم

لكن طبعاً لو كان في وقت كنا أتهرسنا في الرد , لكن الحمد لله إحنا كنا مذاكرين كويس وكنا جاهزين للرد بالتفصيل

المهم قالت لمراتي وليه عاوزة تسيبي السعودية , فقالت لها الإجابة المشهورة بإننا ضحايا التمييز العنصري الجنسي في السعودية و إننا لا نستطيع العمل لأن العمل مصرح به فقط لزوجي وكمان ما أقدرشي أسافر لوحدي أو أخرج لوحدي وكمان بقه الحته اللي ظبطت الليلة كلها إنها يا حرام ما تقدرشي تسوق عربية في السعودية , راحت المستشارة مبرقة وقالتلها معقولة مش ممكن و أستغربت جداً ومراتي صعبت عليها جداً , و أنا اللي رايح جاي وطافح الكوتة في الشغل هناك ولا في دماغها

المهم قولتلها إنها كمان علشان تروح السوبر ماركت أو تخرج لازم تخرج معايا فقط ( ماهو أنا لازم أستغل الفرصة و أسوق فيها ههههههه )

المهم سألت مراتي عن العمل و إنها كده ما أشتغلتشي خالص , فقالت مراتي لأ أنا أشتغلت في مصر في الحكومة قبل السفر للسعودية لكن في السعودية أنا ربة منزل (fame de foyer) و أدي شهادة الخبرة , وتدخلت وقولتها بس هيا دلوقتي في أجازة علشان معايا في السعودية , راحت رده وقالتلي نوووووووووو هي بتعمل في المنزل تربي تلات أطفال وبدون راتب طبعاً وهي بتبتسم و أنا أرد عليه و أنا بضحك و أشاور لها بحركة مية مية وقاعدنا نضحك أنا ومراتي وهي كمان ( باين الست دي متحيزة للستات جداً هههههه ) شوفتوا إزاي الرجالة مظلومين في كيبك , إحنا نشتغل ونطفح الكوتة في الشغل والستات تقعد في البيت مرتاحة وفي الأخر تقولك تاعبنة في شغل البيت يا حرام وتربية الأولاد , ظلم كبير والله , إحنا لازم نطالب بحقوقنا من الستات علي فكرة يا جماعة , ماهو ماينفعشي الظلم ده بصراحة ههههههههه

المهم سأتني عارف عن المعادلة بتاعتك إزاي في كيبك قولتلها أيوه و أدي الأيميل بتاع الأوردر فقالتلي لأنك لازم تعملها علشان تشتغل طبيب بيطري في كيبك ودي مهنة مطلوبة هناك قولتلها عارف و أدي الأثبات من موقع employ quebec إن الطب البيطري من المهن الأكثر طلبا في كيبك وكمان أدي أوفرات عمل طبيب بيطري هناك , فقالتلي بس الأفرات دي مش هاتنفعك إلا لما تعمل المعادلة , فقولتلها ما هو أنا هاستغل خبرتي كمندوب مبيعات و أشتغل كده لحد لما أعمل المعادلة فأعترضت جداً , ليه ؟ هاقول لكم , خدبالك يا هرفي علشان أنت بيطري زي

المهم هي أعترضت علشان كانت عاوزاني أبحث عن عروض عمل في مهنتي مثل مساعد بيطري assistant veterinaire ou soins veterinaire وقالتلي أني لازم أبحث عن عمل زي كده قريب من مجالي علشان أكون جاهز بالخبرة لما أخلص المعادلة زكمان قالتلي إحنا مش عاوزين حد من بره كيبك يشتغل مندوب دعاية أو مندوب مبيعات أو كبائع في كيبك لأن في كتيير هناك ممكن يشتغلوها , إحنا عاوزين بيطريين , خدوا بالكم يا جماعة من الحتة دي كويس جداً

المهم أنا كان معايا برده عرض عمل مثل aid et soins veterinaire ووريتهولها قالتلي تمام بس ده عرض عمل واحد لازم يمون كل اللي بتبحث عنه يكون كده مش مندوب مبيعات

قولتلها تمام وكمان مرتبات البيطري في كيبك سيتي أعلي من مونتريال علشان كده هاسيب مونتريال بعد المعادلة و أروح كيبك سيتي, فقالتلي وليه مونتريال من أصله قولتلها علشان فرص العمل ومالها كيبك سيتي أنا من رأيي تنزل علطول علي كيبك سيتي وتشتغل في مجال عملك هناك علطول علشان تكون جاهز لما تخلص المعادلة وبيني وبينكم أنا كنت ها أعمل كده بس أنا قررت ده بعد ما أرسلت الأبليكيشن وكنت كاتب فيه زي معظم الناس مونتريال لكن بعد ما عرفت أن مرتبات البيكري في كيبك سيتي أعلي قررت إنها تكون وجهتي بس مارضيتشي أقول إني غيرت رأيي لاحسن يبان إني ما كنتش جاهز تمام لما بعت الأبليكيشن

المهم كتبت شوية صغيرين علي الكومبيوتر وقالت لنا أحلي خبر أنتم تم أختياركم vous etes selectionne (بالأكسون)

و أدتنا ورقة بيها موقع وزارة الهجرة لكورس فرنش مجاني أون لاين وقالتلنا أستخدموه علشان تحسنوا من لغتكم الفرنسية و أديتنا كتاب أبروندر لو كيبك وكمان بروشور عن الفالير

نسيت أقول لكم إنها كانت مبسوطة من اللغة بتاعتنا وقالتلي أن مستوايا بين السادس أو السابع و أنا كنت كاتب السادس في الابليكيشن وكمان جايب شهادة TEF بس مستوي ال comprehension orale كان A2 وال expression orale كان B1 وكمان لأن مراتي كانت حافظة نفس الكلام اللي بيقوله أبو سمرة ربنا يخليه علي التوبيك وكانت مراتي بتقوله بسرعة فبان عليها إنها بتتكلم فرنساوي كويس و لأني كنت قلقان من مراتي في الفرنساوي لاحسن ما توصلش لمستوي كويس في الفرينش لما كنا بنقدم الأبليكيشن فقلت خلينا في المضمون ونكتب مستواها التاني , لكن نتيجة طلاقتها في ألقاء الإجابات اللي حافظنها المستشارة قالت لها أنت كاتبة ليه مستوي تاني أنتي مستواكي أعلي من كده أنت ممكن سادس أو سابع و حتي تامن ودي كانت مفاجئة بصراحة ليا لأن لو هي أديتنا درجات علي المستوي ده من اللغة يبقي إحنا كده مش محتاجين درجات دافعية منها لأن بكده نبقي جيبنا الدرجة كاملة حسب ما أنا حاسب درجاتنا لما قدمت الملف حسب النظام القديم

و أنا شوفتها بتديني 10 درجات في اللغة

المهم جات تطبع الغالية ال CSQ فقالتلي إن السيستم عطلان وسألتني أنت مسافر أمتي فقولتلها الساعة 5 و لازم أكون في المطار الساعة 3 فقولتلها أنا ممكن أجيلك بعد شوية يكون أتصلح فقالتلي أوكيه تعالي بعد الغدا , وقد كان

ورحت الساعة 1 و أخدت ال CSQ ورجعت مصر بالسلامة يوم الأربعاء

ولأني كنت عشمان في ؤبنا خير إنه ينجحنا فكنت مجهز ورق الفيدرال المطلوب ورحت النهاردة الخميس للسفارة وقدمت الملف و أخدت رقم الملف لكن قالتلي هانراجع الورق ولو في شيئ ناقص هانبعتلك ترسلة بالبريد السريع

والحمد لله , بفضل الله سبحانة وتعالي ثم بفضل دعواتكم ودعوات أصدقاء مخلصين بأعتبرهم أكتر من الأخوات نجحنا وعديت الأمور علي خير بعد المطبات الرهيبة اللي مرينا بيها

المهم : دروس مستفادة من المقابلة :.

1) ترجموا الشهادة الكرتون وخدوها معاكم المقابلة يمكن يقابلكم مستتشار هجرة مخه شمال وما يعترفشي إلا بيها

2) أعملوا عروض عمل في نفس مجال المهنة فقط كا مساعدين علشان يبان مدي رغبتك في العمل في مجالك ومدي أنك فاهم مظبوط هاتعمل إيه

3) خدوا الأصول مترجمة وكمان ترجموا صور منها

4) خدوا صور من كل المستندات والباسبورات لعل وعسي تنطلب منكم

5) خدوا نسخة حديثة من الأبليكيشن لو كان عدي علي تقديم الأبليكيشن الأولاني أكتر من 6 شهور لأن مكتب سوريا طلب مني كده لما بعتلي خطاب المقابلة بالرغم إني عرضته علي مدام كريستيان وقالتلي مش عاوزاه

6) مانسوش تاخدوا ورق العقد المالي من الأستقبال لما تروحوا المقابلة لأنها أول حاجة أنطلبت مني

7) روحوا مكان المقابلة قبلها بيوم علشان تتعودا عليه ويمكن بامرة تعرفوا مين اللي بيعمل المقابلات ويمكن تقابلوا حد عامل مقابلة ويقول لكم إيه الأسئلة اللي بتتسأل

8) أخيراً وده الأهم : أحسنوا الظن بالله أنكم ناجحين علشان تنجحوا بالفعل

و أخيراً دعواتي لكل الأخوة والأخوات اللي عندهم مقابلات بالنجاح وتحقيق حلمهم

وخالص خالص خالص شكري لكل الأصدقاء الطيبين اللي دعوا لي بالنجاح وربنا يقدرنا ونرد جميلكم الكبير ده علينا

أي أستفسار تحت أمركم

تم تعديل 24 يونيو 2010 بواسطة الرحالة باشا

[malekmalooka]

الف مبروك لحضرتك يا رحاله باشا والله حضرتك خليتنا كلنا نتفائل واستفدنا معلومات كتير من مقابله حضرتك حاجات كانت مش هنفكر فيها خالص ربنا يكرمك وعقبال الفيزا قريبا ان شاء الله

[الرحالة باشا]

خالص شكري لجميع الاصدقاء

malekmalooka , matys ,rock,mostafa maher,romany beshay, AQlaa french,mohamed Allaam, pharm,dr. gege, bermawy,محمد كيبك,أغابي,توتا عماد,هيرفي,محتاجة مساعدة, حبيب قلبي د/ محمد عسر , الصديق المخلص د /علاء فارما, أستاذنا الكبير الكبو د/ أبو سمرة,الأمين الشنقيطي, أ. مازن أطرش و أهل سوريا الكرام قوي والطيبين قوي وش السعد عليا ,صيدلي كندي,وليد نور

أشكركم من كل قلبي وجزاكم الله خيراً جميعاً