مقابلات مقاطعه كيبك سين وجيم بالفرنسيه مع الترجمه للعربيه

[الرحالة باشا]

علي فكرة نسيت أقول لكم علي نقطة مهمة جداً حصلت معايا

ال CV

طبعاً كلنا عارفين إن مطلوب نبعت مع ملفنا لكيبك CV لكن السي في اللي أنا عملته واللي معظمنا بيعمله اللي أحنا واخدين عليه في مصر يعني معلومات شخصية تتضمن تاريخ الميلاد والجنسية والعمر

لكن المستشارة الحقيقة قالت إن السي في ده ماينفعشي في كيبك و إن في شكل معين للسي في لكيبك ومش المفروض إني أذكر فيه العمر أو الجنسية أو الديانة لأن دي معلومات شخصية مش من حق حد يعرفها ( شوفتم الحقوق في كيبك عاملة إزاي) , فقولتلها أنا أعرف شكل ال سي في ده وأنا طبعته من علي النت و أديتهولها

في الحقيقة في علي موقع الوزارة 4 أمثلة لل CV و أنا طبعتهم و أخدتهم معايا في المقابلة بس كنت فاكر إن فايدتهم إني أعرف المستشار إني أعرف إزاي أكتب CV للبحث عن عمل في كيبك مش علشان ملف كيبك

فيا جماعة أعملوا لو سمحتم سي في زي الموجود علي الوب سايت بتاع الوزارة وخدوه معالكم للمقابلة يمكن تقابلة مستشارة زي كريستين تكون بتعز الورق والفرمات السليمة الرسمية فتكونوا جاهزين ساعتها

واضح كده يا كبو إنها كانت مزوداها في البوظة حبتين , بس أعمل إيه , الست في الأخر أدتني الغالية يبقي لازم أشيلها علي راسي من فوق وأحلف بحياتها , مش كده ولا إييييييييييييييه (جملة فؤاد المهندس المشهورة )

[kareemabdou]

الف مبروووووووووووك يا رحالة باشا الحمد لله ربنا نصرك و ادالك الغالية

و عقبال الفيزا ان شاء الله و بسرعة بتجرى الايام

بصراحة على حسب حكايتك اللى اقدر اقولهولك دى ارادة ربنا فى انك تاخدها و محدش يقدر يقف فى طريقة الحمدلله

الف الف مبروك مرة تانى

انا ليا طلب صغير عايزين نعمل مراجعة او جرد على الاوراق اللى نخدها معانا متنساس التفاصيل الصغيرة لان هى دى اللى انا اقصدها

[محمد كيبيك]

السلام عليكم..

ألف مبروك للرحالة باشا, و مبروك مرة تانية للتقديم عالفيدرال... و حمدالله على سلامة رجوعك لمصر.

بالمناسبة.. انا و زوجتى حصلنا عالسى اس كيو... و الحمدلله نفدت من المقابلة لانى ضعيف فى الفرنساوى و كنت خايف منه.

بالتوفيق مرة تانية.. و ان شاء الله ربنا يوفقك فى حياتك فى كيبيك.

:Dالف مبروك على السى اس كيو عقبال الجميع لما ناخدها كلنا باذن اللة وتكون شهادة ميلاد للكل لبدء حياة جديدة الف مبروك ليك و للمدام وربنا يسهلكوا فى الباقى

[dr gege]

الف مبروك تاني ليك يا رحالة وانا قولتللك احنا البيطريين اجدع ناس هو احنا قليليين

فكلرتك حلوة اوي يا كريم انا معاك يا ريت كل اللي عملو مقابلات يقوللنا الورق اللي طلبوة وانا هجمعة كلة واكتبة علي الموقع واكيد كل مقابلة هيكون فيها حاجة مس موجودة في التانية اهو كلنا نستفيد ونعمل بيهم لستة

[Rock]

يا اخوانا ....

هل في حد...اي حد.... جالة رد من السفارة علي الايميل اللي بعتهولم ؟؟؟

هل في حد جالة ايميل المقابلة ؟؟؟

ربنا يكرم

تم تعديل 25 يونيو 2010 بواسطة rock

[بيبو كندا]

الف الف الف الف مبرووووووووووووووووووووووووووووك

رحاااااااااله باااااااااااااااااشا و عقبال

كل المنتظرين يا رررررررررررب

[samoha]

الف مبروك انا عندى سوال ازاى ادفع فلوس الفدرال شكرا

[dr asar pharma]

حمدلي عالسلامة ياابوحميد....ومبروك مرة تانيه على تقديم الفيدرال يامان :happy:

وياااارب المديكال والفيزا مايتأخروش عليك...خليك تخلص بأه من بلد الكفيل والعيشه المزيكه اللي عايشنها هنا دي mfb:

وعقبالنا كلنا ان شاء الله واحنا متجمعين هناك على المحبة والخير :roseop:

[myusername]

السلام عليكم..

ألف مبروك للرحالة باشا, و مبروك مرة تانية للتقديم عالفيدرال... و حمدالله على سلامة رجوعك لمصر.

بالمناسبة.. انا و زوجتى حصلنا عالسى اس كيو... و الحمدلله نفدت من المقابلة لانى ضعيف فى الفرنساوى و كنت خايف منه.

بالتوفيق مرة تانية.. و ان شاء الله ربنا يوفقك فى حياتك فى كيبيك.

:happy:الف مبروك على السى اس كيو عقبال الجميع لما ناخدها كلنا باذن اللة وتكون شهادة ميلاد للكل لبدء حياة جديدة الف مبروك ليك و للمدام وربنا يسهلكوا فى الباقى

الله يخليك يا محمد... يا رفيق الخدمة الاجتماعية

ان شاء الله مقابلتك تكون قريبا و تكون فى مصر... و ربنا يوفقك للى فيه الخير.

[myusername]

الف مبروك انا عندى سوال ازاى ادفع فلوس الفدرال شكرا

احنا غيرنا الفلوس للدولار الكندى.. و دفعناهم فى الشباك مباشرة فى السفارة و احنا بنقدم ورق الفيدرال.

بتدفع 550 دولار ليك و 550 دولار لزوجتك (لو متجوز) .. و 150 دولار على كل طفل (لو عندك اطفال).

و تقريبا ممكن تدفع بشيك.. الله اعلم.. بس اعتقد انك تغير الفلوس فى اى صرافة, و تدفعها مباشرة احسن.

بالتوفيق باذن الله.

تم تعديل 25 يونيو 2010 بواسطة myusername

[matyos]

الف مبروك رحالة باشا على اغلى csq

انا كان عندى شوية اسئلة

انا لازم اترجم كل الورق اللى معايا للفرنساوى بجانب الورق المترجم اللى بعتة مع الملف

انا زوجتى معاها الشهادة المؤقتة هل لازم اطلع الكرتون

وهل سألت الزوجة كتير لان عندى المدام ضعيفة فى الفرنساوى و كاتبلها التانى

بالنسبة لشهادة الخبرة و التامين اجيب اتنين جداد لان الى انا بعتهم بعتهم من شهر 10/2009 ولا ممكن تمشى الشهادات القديمة

بالنسبة لعروض الشغل هل لازم الاقيها لان انا تخصصى قليل والحقيقة مش لاقى له عروض شغل او معادلة كل اللى لاقيته دراسة فى جامعة خاصة وبعتولى ميل ازاى اقدم فى الجامعة

وهل كانوا بيتكلموا بسرعة ولا بمعدل تقدر تفهم هم بيقولوا ايه لان مشكلتى فى الفرنساوى هى السرعة فى نطقهم للكلمات

واخيرا الف مبروك على csq

أولاً الله يبارك فيك يا ماتيوس وعقبالك إن شاء الله

بالنسبة للترجمة أنا عاوز أقول إن لما يكون معاك جميع مستنداتك و أوراقك الشخصية المتصلة بمهنتك وحالتك الأجتماعية وخبراتك في العمل ومترجمة يكون أفضل , لعل وعسي تتزنق في المقابلة فتكون جاهز و أظن موقف الشهادة الكرتون بيأكد ده

بالنسبة للشهادة التأمينات مفيهاش حاجة جديدة علشان تجيبها من تاني إلا لو في فترة بين لما بعت ورقك وبين المقابلة تكون تلزمك في المقابلة أو هاتضيف لك نقط مثل إن تكون شهادات الخبرة اللي أرسلتها مع ملفك لكيبك في الأول مثلاً نقول 3 سنوات فقط لكن علي لما جاتلك المقابلة عديت عليك كمان سنة فبقيت الخبرة عندك 4 سنوات ودي هاتاخد عليها الدرجة كاملة يبقي في الحالة دي لازم تجيب شهادة خبرة جديدة علشان تضيف الفترة دي وتاخد درجاتها غير كده يبقي مش هاتفرق في الدرجات لكن أنا قلت شهادة الخبرة جديدة ليه لأن أنا في السعودية وجواب الكفيل بإني علي رأس العمل بيبين إني مازلت شغال في نفس المكان ومش هاقدر أجيب شهادة الخبرة اللي بناخدها لما نترك العمل نهائياً لأني مازلت علي رأس العمل

بالنسبة لعروض العمل , كل لما تبقي في تخصص قريب لتخصصك كل ما يكون أفضل ده في حالت لما يكون تركيبة دماغ المستشار زي اللي أنا قابلتها , لكن ناس تانية لما جابت عروض عمل بأعمال أخري صغيرة أعتبوا إن الواحد كده يبقي بيعرف يدور علي شغل وعارف إيه المواقع وعنده الدافعية للعمل والتأقلم والأنماج في المجتمع الكيبكي

بالنسبة لسرعة الكلام فامتخافشي الكلام كان معقول جداً وتركيب الجمل بسيط ومش مكلكع وكمان المستشار بيفضل يوضحلك مقصده من السؤال بطريقة أسهل فأسهل لحد مايوصل لمستواك في اللغة , أمال هوه هايقيم مستواك إزاي ؟ لكن أنا شايف إن الست كانت بتتكلم معايا عادي بدون ما تحاول إنها تتك علي الحروف مثلاً علشان تبين الكلام , لأ عادي جداً ومع ذلك الكلام واضح ومفيش لهجة كيبكواه ولا حاجة الفرنساوي اللي نعرفة بتاع فرنسا العادي

تحت أمرك يا باشا , ربنا يكرمك ويوفقك

شكرا كتير يا دكتور على ردك و يا رب يجيلك الميدكال بسرعه

[matyos]

الف مبروك انا عندى سوال ازاى ادفع فلوس الفدرال شكرا

احنا غيرنا الفلوس للدولار الكندى.. و دفعناهم فى الشباك مباشرة فى السفارة و احنا بنقدم ورق الفيدرال.

بتدفع 550 دولار ليك و 550 دولار لزوجتك (لو متجوز) .. و 150 دولار على كل طفل (لو عندك اطفال).

و تقريبا ممكن تدفع بشيك.. الله اعلم.. بس اعتقد انك تغير الفلوس فى اى صرافة, و تدفعها مباشرة احسن.

بالتوفيق باذن الله.

لو سمحت يا يوسرنيم انت بعت شهادات بالمستوى علشان كده بعتولك csq

[myusername]

الف مبروك انا عندى سوال ازاى ادفع فلوس الفدرال شكرا

احنا غيرنا الفلوس للدولار الكندى.. و دفعناهم فى الشباك مباشرة فى السفارة و احنا بنقدم ورق الفيدرال.

بتدفع 550 دولار ليك و 550 دولار لزوجتك (لو متجوز) .. و 150 دولار على كل طفل (لو عندك اطفال).

و تقريبا ممكن تدفع بشيك.. الله اعلم.. بس اعتقد انك تغير الفلوس فى اى صرافة, و تدفعها مباشرة احسن.

بالتوفيق باذن الله.

لو سمحت يا يوسرنيم انت بعت شهادات بالمستوى علشان كده بعتولك csq

لا انا مبعتش اى شهادات للفرنساوى.. بس احب اوضح حاجة.. ان مراتى هى المقدم الرئيسى, و هى كيميائية... و اتجوزنا بعد ما هى حصلت عالسى اس كيو (حصلت عليها بدون مقابلة).. و بعدين عملنا ابديت.. و استنينا فترة حوالى شهرين و نص تقريبا.. و بعدين وصل لنا السى اس كيو..

بالتوفيق باذن الله...

تم تعديل 25 يونيو 2010 بواسطة myusername

[savaryxxx]

الحمد لله وبفضل ربنا ثم بفضل دعواتكم نجحت و أخدت الغالية ال CSQ

أنا الحمد لله كان عندي حسن ظن بالله تعالي بإن ربنا هاينجحني , مش معقولة كل الناس الحلوة دي تدعيلي وفي الأخر ما أنجحشي

أنا بتشكر لكم جداً جداً جداً ولو إن كلمات الشكر لا تكفي أن أرد الدين ليكم

طبعاً أنتم عارفين إن مقابلتي كانت يوم الأربعاء صباحاً في سوريا 23/6

طبعاً إحنا سافرنا لسوريا من يوم الأحد 20/6 بحيث ندي نفسنا كام يوم قبل المقابلة نتعود علي المكان اللي هنام فيه وكمان نداكر لنا يومين قبل المقابلة , أنتم طبعاً عارفين لما الواحد بينزل أجازة مصر , سلامات وزيارات وحركات , كان الواحد مش عارف يذاكر

المهم وصلنا دير إبراهيم الخليل يوم الأحد بعد ما أتأخرت الطيارة بتاعتنا حوالي ساعتين نتيجة عطل فني لدرجة إنهم نزلونا من الطيارة بشنطنا بعد ما دخلنا الطيارة و قعدنا , بصراحة كانت أول القصيدة !!!!!!!!!!!!!

المهم وصلنا بالسلامة وكان في أنتظارنا في المطار السواق حسن

بصراحة كانت الدير نظيفة جداً والغرفة معقولة جداً وطبعاً مفيش تليفزيون ودي الحاجة اللي شجعتنا علي أننا نستغل كل دقيقة في المداكرة , طبعاً كان لازم برده نزور باب توما وسوق الحميدية والمسجد الأموي ونشتري شوية حاجات كدة علي الماشي وكان لازم برده ناكل بوظة من بكداش اللي في الحميدية , راااااااااائع

طبعاً موقع الدير في حي جارامانا , ش الدير

كل شيئ كان حوالينا , بس إحنا فضلنا ناكل في مطعم أسمة النوافير , بصراحة أكله جميل والناس فيه زي كل السوريين ناس مضيافة و كريمة و حبوبة كتييييير

المهم أنا سمعت كلام حبيبي د علاء فارما لما نصحني أروح السفارة قبلها بيوم أحاول أعرف مين اللي بيعمل مقابلات وبالفعل رحت يوم التلات ودخلت السفارة وأتأكدت من ميعاد مقابلتي وإن كل شيئ تمام ولما كنت أسأل عن أسم مستشارين الهجرة كان الكل يقول ما نعرفشي أسمائهم ( طبعاً) , المهم قابلت شاب سوري كان واقف أمن علي البوابة ولما سألته مين اللي بيعمل المقابلات قالي إنهم تلاتة بس مش فاكر الأسماء فقول أستعبطت و أقول له أنا سمعت إن مسيو سيمون ومدام أن موجودين فارد و قالي مظبوط بس التالتة واحدة ست لكن مايعرفشي أسمها

المهم أنا قول طالما فيهم مدام أن ومسيو سيمون يبقي كده قشطة جداً ويارب نقع تحت إيد واحد فيهم ويبعدنا عن الست التالتة اللي مش عارفنها دي

ورجعنا الفندق و أتغدينا وراجعنا المراجعة النهائية بدون ما نسأل بعضنا أنا ومراتي علشان ما نتوترشي لو غلطنا ونسينا حاجة

المهم تاني يوم قمنا من النوم الساعة 6 ونص ونزلنا من الفندق متوجهين للسفارة الساعة 7 ونص ووصلنا الساعة 8 ص

دخلنا علي طول علي بوابة السفارة الكندية و أخدنا إدن دخول لمكتب كيبك وتوجهنا للمكتب

طبعاً بفضل الزيارة اللي عملناها قبل المقابلة بيوم كان الواحد واخد علي المكان وعارفه كويس وده برده بيشيل الرهبة شوية

المهم كلمنا الأستقبال نعرفهم بوصولنا وقالولنا أنتظروا شوية

وإحنا قاعدين كان جبنا راجل وست يبدوا لبنانيين تقريباً كانوا بيتكلموا فرنساوي لبلب لما عقدونا علي الصبح

المهم قبل معادنا اللي كان 8 ونص لاقيناهم بينادوا علينا الساعة 8 وعشر دقائق تقريباً وقالولنا أتفضلوا علي غرفة رقم 2

طبعاً و أحنا قاعدين في الأستقبال شوفنا غرفتين بباب خشب وشباك زجاج شوفنا من خلاله الفاصل الزجاجي اللي بين مكتب المستشار والكرسيين اللي بنقعد عليهم

المهم دخلنا و أول ما شوفنا المستشارة الناحية التانية قولنا بنجور مدام مع أبتسامة لطيفة وجلسنا قدامها وبدأت تعرفنا بنفسها ( المفاجأة ) أنها الست التالتة

مين حضرتك يا ست الحاجة , طلعت أسمها مدام كرستيان

وصدق اللي قال إن اللي تخاف منه مفيش أحسن منه , المدام طلعت محترمة جداً ومتعاونة جداً جداً

بدأت تعرفنا بنفسها وكانت في لوحة بأسمها علي الشباك شاورت عليها

وقالتلي هناقش طلبكم للهجرة لكيبك

و أول حاجة طلبتها العقد المالي اللي أخدناه من شباك الأستقبال لما زورنا المكتب اليوم السابق وقالولنا أملوه هاتوه معاكم في المقابلة بكرة

ثم بدأت تطلب الباسبورات , ولما قولنالها إننا غيرنا الباسبورات علشان نفصل الأولاد وكمان كان فاضل عليهم أقل من سنة

لما قولنالها كده فطلبت مننا صور للباسبورات الجديدة والحمد لله كانت جاهزة معانا أصل أخوكم كان عامل حساب كل الحركات دي لكن للأسف ما عدا حاجة واحدة كادت أن تدمر المقابلة تدميرا لكن ربنا ستر ( نجيلها بعدين )

المهم طلبت شهادة الميلاد , ثم كارنية النقابة وكمان أديتها مع الكارنية شهادة من النقابة العامة للطب البيطري بالقاهرة بتشهد فيها ببيانات تسجيلي في النقابة وكانت موثقة من الخارجية ومترجمها كمان

المهم نيجي بقه لأول صدمة ليا في المقابلة ( خد بالك يا هرفي علشان أنت بيطري زي فاركز معايا كويس )

مدام كرستيان طلبت شهادة الكلية بيان الدرجات ولما أديتها الشهادات اللي طلعتها من الكلية بالأنجليزي زي ما كلوا بيعمل , لقيت المدام برقت و أعترضت وقالتي نووووووووووو

دي مش شهادة الدبلومة بتاعة الطب البيطري دي شهادة مؤقته ومكتوب فيها أنك خلصت تدريب عملي وكده , أنتي بتقولي إيه يا حاجة يا دي المصيبة , الحاجة كريستيان مش عارفة شهادة التخرج المؤقتة اللي بنعملها في الكلية , وحاولت أشرحلها و أفهمها لكم مخها كان رافض يقتنع واللي كانت ماسكة فيه إنها شهادة مؤقتة وفيها كلمة تدريب عملي

يعني بالعربي كده بالنسبة ليها مفيش شهادة مظبوطة بالمؤهل

أنا لطمت وقلت أنا كده أترفضت , أقنعها إزاي دي بس يارب

المهم أنا برده كنت واخد شوية ورق أحتياطي معايا ومن ضمنهم الشهادة الكرتون وكنت موثقها من الخارجية لكن مش مترجمها ولا حتي صورة منها

المهم رحت مطلعلها الشهادة الكرتون وقلتلها إن دي الشهادة الدائمة و ما بتطلعشي غير مرة واحدة في العمر وبعد التخرج يجي بخمس سنين كده ولا حاجة

المهم أول ماشافتها قالتلي هي دي الدبلومة وهي دي الشهادة المظبوطة لأن التانية دي ماتنفعشي في كيبك وهي دي اللي لازم تاخدها معاك كيبك

المهم طلبت منها نسخها مترجمة قولتلها مش معايا , يادي الواقعة الهباب راحت قايمه تصورها عندها في السكرتارية ورجعت تاني طبعاً كنا أحنا بنسترد أنفسنا اللي أتقطعت من المفاجئة العجيبة دي , لكن الحمد لله ربنا ستر

المهم رجعت تاني وبدأت تطلب باقي الورق وكل شوية تكتب علي الكومبيوتر وتكتب الدرجات في ورقة خارجية زي الجدول كده وقدام كل خانة زي المؤهل العمر وكدة تكتب الدرجة

المهم ما صدقنا خرجنا من المطب الأولاني , إلا ورححنا وقعين في مطب غيرة , إيه بقه ؟

لما طلبت شهادات الخبرة الأصول أديتهالها ورجعتها كلها ليا ماعدا الجواب الأخير اللي جبته من الهباب الكفيل واللي بيقول إني مازلت علي رأس العمل حتي شهر 6 ده لأن أخر جواب جبته كان في 5/ 2009 والجواب الجديد كده هايضيف سنة خبرة جديدة كمان

المهم لما مارجعتهوش وراحت كاتبة عليه تاريخ بدأ الخبرة والنهاية قولتلها هو حضرتك هاتخدي الخطاب قالتي أيوه , قولتلها بس أنا لازم أخدة علشان أحطه في ملف الفيدرال لو أتقبلت النهاردة قالتلي بس أنا لازم أخده فارحت ساكت ومبلم كأني مصدوم مش عارف هاعمل إيه , طبعاً ده كان خطأ كبير مني لكن مش في حق المستشارة ولا المقابلة لكن جل من لايسهو مع أني كنت مجهز حاجات كتير أخدها معايا زي الشهادة الكرتون حتي كارنيه الكلية و أنا في دفعة البكالوريوس لكن أهوه دي اللي حصل ولو كانت قفلت كنت هاديهولها بس ده كان هايأخر تقديمي للفيدرال لحد ما أجيب واحدة تانية من الهباب الكفيل لكن مش مشكلة المهم المستشارة تكون راضية , لكن ربك لما يريد ييسر لعبيده بتلاقي كل الأمور أتحلت بمنتهي اليسر

كل اللي عملته المستشارة إنها قامت تصورها و أدتني الأصل و أكتفت بالصورة بعد ما ختمتها بالختم بتاعها بس طبعاً بعد ما زغرتلي بعينيها مع أبتسامة بسيطة كده كأنها مفروسة علشان كل شوية تقوم تصور ورق

لكن ده خلاها تضيع وقت كتير في الخروج للتصوير وترجع تاني لما خلاها جت علي الأسئلة المهمة بتاعة إيه اللي تعرفوه عن كيبك وقيم المجتمع الكيبكي لكن كانت في اللحظة دي مش باصة ليا ولا لمراتي فقولتلها السؤال ليا ولا لمراتي فقالتلي ليكم أنت الأتنين

فراحت مراتي سابقاني وبدأت ترص شوية في القيم لكن عاوز أقول لكم إن طبعاً من رهبة المقابلة اللي كانت فيها مراتي كانت الأجابات واحد علي عشرة من اللي نعرفة ولما قربت مراتي تخلص اللي فاكراه قولت أكمل أنا , لاقيت المستشارة راحت ناقلة علي السؤال التاني لمراتي وقالتلها وإيه اللي شدكم لكيبك وبدأت مراتي ترص شوية عنواين للكلام اللي حافظينه زي علشان نظام الصحة ونظام التعليم وكيبك ديموقراطية , والله يا جماعة مجرد عناوين

طبعاً السبب الرئيسي اللي خلاها مستعجلة في الأسئلة وكأنها مجرد أسئلة جبر خواطر التأخير اللي حصل علشان تصور الورق لكن عسي ان تكرهوا شيئاً وهو خير لكم

لكن طبعاً لو كان في وقت كنا أتهرسنا في الرد , لكن الحمد لله إحنا كنا مذاكرين كويس وكنا جاهزين للرد بالتفصيل

المهم قالت لمراتي وليه عاوزة تسيبي السعودية , فقالت لها الإجابة المشهورة بإننا ضحايا التمييز العنصري الجنسي في السعودية و إننا لا نستطيع العمل لأن العمل مصرح به فقط لزوجي وكمان ما أقدرشي أسافر لوحدي أو أخرج لوحدي وكمان بقه الحته اللي ظبطت الليلة كلها إنها يا حرام ما تقدرشي تسوق عربية في السعودية , راحت المستشارة مبرقة وقالتلها معقولة مش ممكن و أستغربت جداً ومراتي صعبت عليها جداً , و أنا اللي رايح جاي وطافح الكوتة في الشغل هناك ولا في دماغها

المهم قولتلها إنها كمان علشان تروح السوبر ماركت أو تخرج لازم تخرج معايا فقط ( ماهو أنا لازم أستغل الفرصة و أسوق فيها ههههههه )

المهم سألت مراتي عن العمل و إنها كده ما أشتغلتشي خالص , فقالت مراتي لأ أنا أشتغلت في مصر في الحكومة قبل السفر للسعودية لكن في السعودية أنا ربة منزل (fame de foyer) و أدي شهادة الخبرة , وتدخلت وقولتها بس هيا دلوقتي في أجازة علشان معايا في السعودية , راحت رده وقالتلي نوووووووووو هي بتعمل في المنزل تربي تلات أطفال وبدون راتب طبعاً وهي بتبتسم و أنا أرد عليه و أنا بضحك و أشاور لها بحركة مية مية وقاعدنا نضحك أنا ومراتي وهي كمان ( باين الست دي متحيزة للستات جداً هههههه ) شوفتوا إزاي الرجالة مظلومين في كيبك , إحنا نشتغل ونطفح الكوتة في الشغل والستات تقعد في البيت مرتاحة وفي الأخر تقولك تاعبنة في شغل البيت يا حرام وتربية الأولاد , ظلم كبير والله , إحنا لازم نطالب بحقوقنا من الستات علي فكرة يا جماعة , ماهو ماينفعشي الظلم ده بصراحة ههههههههه

المهم سأتني عارف عن المعادلة بتاعتك إزاي في كيبك قولتلها أيوه و أدي الأيميل بتاع الأوردر فقالتلي لأنك لازم تعملها علشان تشتغل طبيب بيطري في كيبك ودي مهنة مطلوبة هناك قولتلها عارف و أدي الأثبات من موقع employ quebec إن الطب البيطري من المهن الأكثر طلبا في كيبك وكمان أدي أوفرات عمل طبيب بيطري هناك , فقالتلي بس الأفرات دي مش هاتنفعك إلا لما تعمل المعادلة , فقولتلها ما هو أنا هاستغل خبرتي كمندوب مبيعات و أشتغل كده لحد لما أعمل المعادلة فأعترضت جداً , ليه ؟ هاقول لكم , خدبالك يا هرفي علشان أنت بيطري زي

المهم هي أعترضت علشان كانت عاوزاني أبحث عن عروض عمل في مهنتي مثل مساعد بيطري assistant veterinaire ou soins veterinaire وقالتلي أني لازم أبحث عن عمل زي كده قريب من مجالي علشان أكون جاهز بالخبرة لما أخلص المعادلة زكمان قالتلي إحنا مش عاوزين حد من بره كيبك يشتغل مندوب دعاية أو مندوب مبيعات أو كبائع في كيبك لأن في كتيير هناك ممكن يشتغلوها , إحنا عاوزين بيطريين , خدوا بالكم يا جماعة من الحتة دي كويس جداً

المهم أنا كان معايا برده عرض عمل مثل aid et soins veterinaire ووريتهولها قالتلي تمام بس ده عرض عمل واحد لازم يمون كل اللي بتبحث عنه يكون كده مش مندوب مبيعات

قولتلها تمام وكمان مرتبات البيطري في كيبك سيتي أعلي من مونتريال علشان كده هاسيب مونتريال بعد المعادلة و أروح كيبك سيتي, فقالتلي وليه مونتريال من أصله قولتلها علشان فرص العمل ومالها كيبك سيتي أنا من رأيي تنزل علطول علي كيبك سيتي وتشتغل في مجال عملك هناك علطول علشان تكون جاهز لما تخلص المعادلة وبيني وبينكم أنا كنت ها أعمل كده بس أنا قررت ده بعد ما أرسلت الأبليكيشن وكنت كاتب فيه زي معظم الناس مونتريال لكن بعد ما عرفت أن مرتبات البيكري في كيبك سيتي أعلي قررت إنها تكون وجهتي بس مارضيتشي أقول إني غيرت رأيي لاحسن يبان إني ما كنتش جاهز تمام لما بعت الأبليكيشن

المهم كتبت شوية صغيرين علي الكومبيوتر وقالت لنا أحلي خبر أنتم تم أختياركم vous etes selectionne (بالأكسون)

و أدتنا ورقة بيها موقع وزارة الهجرة لكورس فرنش مجاني أون لاين وقالتلنا أستخدموه علشان تحسنوا من لغتكم الفرنسية و أديتنا كتاب أبروندر لو كيبك وكمان بروشور عن الفالير

نسيت أقول لكم إنها كانت مبسوطة من اللغة بتاعتنا وقالتلي أن مستوايا بين السادس أو السابع و أنا كنت كاتب السادس في الابليكيشن وكمان جايب شهادة TEF بس مستوي ال comprehension orale كان A2 وال expression orale كان B1 وكمان لأن مراتي كانت حافظة نفس الكلام اللي بيقوله أبو سمرة ربنا يخليه علي التوبيك وكانت مراتي بتقوله بسرعة فبان عليها إنها بتتكلم فرنساوي كويس و لأني كنت قلقان من مراتي في الفرنساوي لاحسن ما توصلش لمستوي كويس في الفرينش لما كنا بنقدم الأبليكيشن فقلت خلينا في المضمون ونكتب مستواها التاني , لكن نتيجة طلاقتها في ألقاء الإجابات اللي حافظنها المستشارة قالت لها أنت كاتبة ليه مستوي تاني أنتي مستواكي أعلي من كده أنت ممكن سادس أو سابع و حتي تامن ودي كانت مفاجئة بصراحة ليا لأن لو هي أديتنا درجات علي المستوي ده من اللغة يبقي إحنا كده مش محتاجين درجات دافعية منها لأن بكده نبقي جيبنا الدرجة كاملة حسب ما أنا حاسب درجاتنا لما قدمت الملف حسب النظام القديم

و أنا شوفتها بتديني 10 درجات في اللغة

المهم جات تطبع الغالية ال CSQ فقالتلي إن السيستم عطلان وسألتني أنت مسافر أمتي فقولتلها الساعة 5 و لازم أكون في المطار الساعة 3 فقولتلها أنا ممكن أجيلك بعد شوية يكون أتصلح فقالتلي أوكيه تعالي بعد الغدا , وقد كان

ورحت الساعة 1 و أخدت ال CSQ ورجعت مصر بالسلامة يوم الأربعاء

ولأني كنت عشمان في ؤبنا خير إنه ينجحنا فكنت مجهز ورق الفيدرال المطلوب ورحت النهاردة الخميس للسفارة وقدمت الملف و أخدت رقم الملف لكن قالتلي هانراجع الورق ولو في شيئ ناقص هانبعتلك ترسلة بالبريد السريع

والحمد لله , بفضل الله سبحانة وتعالي ثم بفضل دعواتكم ودعوات أصدقاء مخلصين بأعتبرهم أكتر من الأخوات نجحنا وعديت الأمور علي خير بعد المطبات الرهيبة اللي مرينا بيها

المهم : دروس مستفادة من المقابلة :.

1) ترجموا الشهادة الكرتون وخدوها معاكم المقابلة يمكن يقابلكم مستتشار هجرة مخه شمال وما يعترفشي إلا بيها

2) أعملوا عروض عمل في نفس مجال المهنة فقط كا مساعدين علشان يبان مدي رغبتك في العمل في مجالك ومدي أنك فاهم مظبوط هاتعمل إيه

3) خدوا الأصول مترجمة وكمان ترجموا صور منها

4) خدوا صور من كل المستندات والباسبورات لعل وعسي تنطلب منكم

5) خدوا نسخة حديثة من الأبليكيشن لو كان عدي علي تقديم الأبليكيشن الأولاني أكتر من 6 شهور لأن مكتب سوريا طلب مني كده لما بعتلي خطاب المقابلة بالرغم إني عرضته علي مدام كريستيان وقالتلي مش عاوزاه

6) مانسوش تاخدوا ورق العقد المالي من الأستقبال لما تروحوا المقابلة لأنها أول حاجة أنطلبت مني

7) روحوا مكان المقابلة قبلها بيوم علشان تتعودا عليه ويمكن بامرة تعرفوا مين اللي بيعمل المقابلات ويمكن تقابلوا حد عامل مقابلة ويقول لكم إيه الأسئلة اللي بتتسأل

8) أخيراً وده الأهم : أحسنوا الظن بالله أنكم ناجحين علشان تنجحوا بالفعل

و أخيراً دعواتي لكل الأخوة والأخوات اللي عندهم مقابلات بالنجاح وتحقيق حلمهم

وخالص خالص خالص شكري لكل الأصدقاء الطيبين اللي دعوا لي بالنجاح وربنا يقدرنا ونرد جميلكم الكبير ده علينا

أي أستفسار تحت أمركم

الف مليووووووووووووووووووووووووووووووووون مبروووووووووووووووووووك للرحاله باشا

يااااه

انا لسه فاكر لما الرحاله كان بيسأل على حاجه فى الابلكيشن و فايزر على ما اذكر وقتها قاله انت اول ما يشفوك بالشنطه على ضهرك هيقبلوك على طوول

ربنا يكملك المشوار على خير يا رحاله

الميديكال والفيزا

كده تقريبا كل الناس اللى كانت مقدمه معايا الحمد لله نجحت و ينضم الرحاله باشا لبيو باشا و الدكتور حسام يوسف و فايزر و مونتريال الكس و غيرهم

على خير يارب ان شاء الله وادعولى احصلكم

سؤالى للرحاله باشا , حد سألك على شهاده التأمينات ؟؟

انا الحمد لله لسه ممتحن الديلف بى ان و مستوى الفرنساوى بقى كويس

وعاوز اقدم تانى , بس قلقان من شهاده التأمينات

بأذن الله على شهر اكتوبر اللى جاى هيكون معايا 4 سنين خبره

3 سنين بتأمينات من شغل حكومى و سفر للسعوديه

وسنه انتقلت فيها فى مصر ما بين صيدليتين كل واحده تقريبا 6 شهور ودى من غير تأمينات لان المقده كانت اقل من انهم يأمنوا عليا

محتار بصراحه

1- اقدم اول ما اكمل ال 4 سنين خبره بشهاده تأمينات ل 3 سنين وسنه من غير تأمينات واخد الريسك

2- اقدم بخبره 3 سنين بس فى التأمينات و السنه اللى غير من تأمينات مجبش سيرتها - مع ان كنت مقدم قبل كده وبعتها فى الملف القديم

3- استنى لما اكمل ال 4 سنين خبره بالتأمينات يعنى استنى سنه ونص من دلوقتى

محتاااااااااااااااااااار !!

[Pharm]

الف مبروك للرحالة باشا على النجاح والحصول على سى اس كيو

انا كمان نزلت فى فندق الخليل وهو فندق نظيف جداااااا وممتاز وهادى كنت حاسس انى انا قاعد لوحدى دير راهبات بقا قمة فى الهدؤ

دا غير ان حواليه كل الخدمات اللى ممكن تتخيلها من اكل لسوق للاتصالات لنت كافيه لمكوجى كله كله وقريب جدا من السفارة فقط 20 دقيقة

بالنسبة لسى فى انا عامل سى فى كندى باللغة الفرنسية مختلف تمام عن سى فيهات اللى احنا متعودين عليها

مبروك مرة اخرى وتابع يا رحالة وشوف نفسك هتدخل ان بروسيس امتى وادعى ربنا يبعتلنا الميديكال بقاااااااااااااااااااااااااااااا :blush2:

تم تعديل 26 يونيو 2010 بواسطة Pharm

[matyos]

الباشا رحاله باشا ياريت لو تقدر تنزل شكل cv اللى معروف فى كندا لانك بتقول شكله مختلف عن بتاعنا

تانى حاجه انا لقيت عروض عمل فى تخصصى هل اطبعها واخليها معايا ولا اتبقى قديمه لغاية معاد المقابلة فى شهر 9 او 10

ياريت اعرف رأى اصحاب الخبره

[الرحالة باشا]

الف مبروووووووووووك يا رحالة باشا الحمد لله ربنا نصرك و ادالك الغالية

و عقبال الفيزا ان شاء الله و بسرعة بتجرى الايام

بصراحة على حسب حكايتك اللى اقدر اقولهولك دى ارادة ربنا فى انك تاخدها و محدش يقدر يقف فى طريقة الحمدلله

الف الف مبروك مرة تانى

انا ليا طلب صغير عايزين نعمل مراجعة او جرد على الاوراق اللى نخدها معانا متنساس التفاصيل الصغيرة لان هى دى اللى انا اقصدها

الله يبارك فيك يا كريم , طبعاً التوفيق من الله وحده ولا دخل للأنسان في مسألة التوفيق غير إن المطلوب من كل إنسان إنه يعمل اللي عليه ويتوكل علي الله ويدعوه بإن يختار لله الخير وأهم شيئ الرضا بما قسمه الله لك

أنا طبعاً علشان عارف إن أهم شيئ من سرد مقالة أي واحد هي النقاط الجديدة اللي نخلي بالنا منها و الأسئلة الجديدة فده اللي حاولت أني أعمله في نهاية سردي للمقابلة

وأي شيئ جديد أفتكره طبعاً علي طول هاقوله

عقبال الجميع إن شاء الله

[الرحالة باشا]

الف مبروك تاني ليك يا رحالة وانا قولتللك احنا البيطريين اجدع ناس هو احنا قليليين

فكلرتك حلوة اوي يا كريم انا معاك يا ريت كل اللي عملو مقابلات يقوللنا الورق اللي طلبوة وانا هجمعة كلة واكتبة علي الموقع واكيد كل مقابلة هيكون فيها حاجة مس موجودة في التانية اهو كلنا نستفيد ونعمل بيهم لستة

الله يبارك فيكي يا دكتورة

إنما إننا ناس جدعان ده شيئ مش محتاج توضيح , ده من مسلمات الحياة :happy:

[الرحالة باشا]

الف الف الف الف مبرووووووووووووووووووووووووووووك

رحاااااااااله باااااااااااااااااشا و عقبال

كل المنتظرين يا رررررررررررب

الله يبارك فيك يا صامويل , عقبالك وعقبال كل حبايبنا

[الرحالة باشا]

الف مبروك انا عندى سوال ازاى ادفع فلوس الفدرال شكرا

الله يبارك فيك يا سموحة وعقبالك إن شاء الله

طريقتين لدفع الفلوس :.

1) كاش : تاخد معاك الدولارات الكندي المطلوبة منك وتدفعها في الشباك و أنت بتديهم الورق وده اللي أنا عملته

2) شيك من سيتي بنك وده موجود في شارع القصر العيني و أنت في طريقك للسفارة الكندية

تحياتي