التليفزيون يذيع كأس الأمم علي القنوات الأرضية ...

[Lancelot]

بعد أن إشتري الجميع أجهزة الديكورد ... و حجز أخرون كراسيهم علي المقاهي و الكوفي شوب و في منازل أصدقائهم و بير السلم في العمارات ..... خرج علينا أهل ماسبيرو بقرار إذاعة المباريات علي القنوات الأرضية ....

و فورا بدأت الإشاعات و التكهنات و التحليلات من أهل الإفتاء في الشارع المصري ...

و لا داعي لذكر سيناريوهات المؤامرة كما يحكيها البوابين في شارعنا ... أنا متأكد إن البوابين عندكم بيحكوا نفس القصة ... يمكن مع شوية تغييرات ....

ما رأيكم أنتم ؟؟؟؟؟؟؟

[Sherief AbdelWahab]

لا أعتقد أنها مؤامرة .. المؤامرة الحقيقية هي أن تصبح كرة القدم و غيرها حكرا على شخص واحد لا تطارده قوانين الاحتكار التي يكن لها كل احتقار.. الشيخ صالح كامل الذي جمع الملايين على حساب المصريين و التليفزيون المصري..

خلص الكلام

[Lancelot]

مؤامرة في إن الشركة تستطيع أن تبيع حقوق البث مرتين ..... مرة عن طريق أجهزة الديكودر الخاصة بها و الإشتراك في قنواتها و ده علي حس تصريحات ماسبيرو اللي بتقول إن التليفزيون مش هيذيع البطولة ... و مرة أخري عن طريق بيع حقوق البث للتليفزيون ....

و بكده تبقي الشركة ضربت عصفورين بحجر واحد ... و التليفزيون عمل اللي عليه و قدر يذيع البطولة ...

حد عنده تعليق ؟؟؟؟

[se_ Elsyed]

هدي نفسك يا عمور ... هات يابني شوب لمون هنا ...

الموضوع وما فيه يا سيدي الفاضل إن التليفزيون المصري إستطاع أن يضرب صالح كامل ضربت معلم .. إزاي .. قولي إزاي ؟

أقول لك إزاي ... التليفزيون جاب عقد الإحتكار اللي بين المعلم صالح وبين الشركة الفرنسية اللي واخده حق إذاعة المباريات مباشرة من الإتحاد الأفريقي ووجدوا فيه ثغرة خطيرة .. حيث ينص العقد على ان المعلم صالح أبو كامل يحتكر إذاعة البطولة باللغة العربية والإنجليزية .. فقالوا شكراً طب إحنا هانذيع للشعب المصري الحبيب باللغة الفرنسية ..

فبكده إدوا مهموز محترم للمعلم أبو كامل ... ودفعوا للشركة الفرنسية مليون دولار فقط لحق العرض على القنوات الأرضية .. بعد ما كانوا عارضين 20 مليون على المعلم وكان عمال يتبغدد علينا ... اهو طلع نقبه على شونة ...

وده يثبت إن الإنسان عندما يكتشف حقيقة إن المخ اللي ربنا خالقه لنا في دماغنا ممكن نستفيد منه في التفكير بجانب عمله سندوتشات مخ بالبيض .. ساعتها ممكن يسوي الهوايل ..

بس بصراحة انا مستغرب .. هل لسه فيه حد في مصر ماعندوش دش ورسيفر باتنين كامه على الأقل بالإضافة إلى إنه مش مشترك في الأوربت والـ ART ؟

أي أي عيني ... حرام عليكوا انا داخل على بطولة مهمة .....

هذا وقد تم تركيب جهاز سمع تعويضي للمدعو س س لكي يسمع بها ماتشات البطولة ... وتم تدمير الكشافين الموجودين لديه وجاري البحث عن كشافات تايواني في أي مستشفى عيون خارج مصر ..

[Masrawy Abroad]

الحقيقة يا معلم إس إس اللي اكتشف ثغرة العقد دي في الأساس كانت المغرب. فبعد مفاوضات عسيرة ورفض المغرب دفغ حتى نص المبلغ اللي احنا عرضناه على الحاج صالح وتهديدهم بالانسحاب من البطولة قبل بدئها بأيام...توصل اخواننا المغاربة وهم الصراحة عالم أذكياء إلى تلك الثغرة في العقد والتي تمنح الحق في البث مع الشركة الثانية باللغة الفرنسية بمبلغ تافه بالمقارنة بالـ 20 مليون اللي احنا عرضناها. وانكشفت طبعا الحكاية ونشرها موقع ايلاف من عدة ايام واكيد احنا مشينا وراهم واستغلتها ايضا الجزائر.

[Lancelot]

فقالوا شكراً طب إحنا هانذيع للشعب المصري الحبيب باللغة الفرنسية ..

و أنا أقول هو الراجل المذيع عنده برد و لا إيه ..... أتاري يا أخويا الراجل ده قال إيه بيتكلم فرنساوي ...... بسم الله ما شاء الله ....

لا جامدة من التليفزيون .... كده الواحد لازم يعتذر عن الصوت اللي راح هدر .... (هأكلم هشام عبد الوهاب يشوف طريقة للي عايز يرجع في كلامه و يغير صوته :unsure: :lol: )

الحقيقة يا معلم إس إس اللي اكتشف ثغرة العقد دي في الأساس كانت المغرب.

و بعدين بقي ... إنتوا هتحولونا ليه .... يعني بتوع التليفزيون طلعوا أي كلام برضه .... كده أنا عايز أغير صوتي تاني و أختار "تخبط إداري في التليفزيون مما أدي إلي مصرع المشاهدين" ...

:lol: smk: rs: stnd::

[فــيــروز]

سؤال

هو ليه احتكار عرض المباريات بنعتبره فى مصر جريمه يعاقب عليها صالح كامل؟

اصل فى رمضان اللى فات كانوا استضافوه فى برنامج فى الراديو

وسالوه على موضوع الاحتكار

قام جاوب بكل بساطه وقال : مفروض نتعلم ندفع تمن الحاجات اللى بنحبها !!

وبعيدا عن الوضع الاقتصادى المنهار فى مصر المحروسه !! حسيت ان كلامه منطقى بردو ومش بطال

[هشام عبد الوهاب]

طيب ماكنوا ذاعوها باللغة الهندية ودفعوا 500 جنية وخلصنا ... fsh:: :unsure:

اكيد الشيخ صالح دلوقتى راكبه عفريت فرنساوى ... صباح البونجور يا عم الشيخ .... :lol:

[CoDeR]

أحسن ..

يا رب دايما يا شيخ صالح ..

تخيلوا أن ده راجل بيخنق شعب بحاله ..

بس يا جماعه متنسوش ان التليفزيون بتاعنا برضه قدر يلاعب صالح كامل ده كويس ..

يعني في بطولات أفريقيا للأنديه .. عرفنا نطلع منه بالماتش اللي بيتذاع علي أرضنا .. هو أنا صحيح مش عارف الموضوع ده متعملش ليه في البطوله العربيه .. بس أهو برضه عرفنا نطلع منه بحاجه ..

في حاجه أسمها أتحاد الأذاعه و التليفزيون العربي .. المفروض يكون ليهم موقف جامد مع صالح .. عشان منبقاش في نفس الموقف قبل كل بطوله ..

و تقبلوا تحياتي ..

[KWA]

بسم الله الرحمن الرحيم

السلام عليكم ورحمة الله وبركاته

اعتقد ان موضوع كله بيزنس في بيزنس بين الشركه الفرنسيه و الحاج صالح و التليفزيون سواء في مصر او المغرب او الجزائر....و السبب بسيط ان التعاقد تم بين ART والشركه الفرنسيه من فتره طويله و بيانات التعاقد و بنوده معروفه و حتي ايام قليله كانت هناك مفاوضات مع ART لأذاعه المباريات و كما اعلنت الصحف ان المفاوضات فشلت ....ثم في اللحظات الأخيره يتم الأعلان عن اذاعه المباريات بعد بيع الكميات الكافيه من الديكودر الخاص ب..ART و تحقيق الربح المطلوب في نظير اذاعه المباريات....و انا لا اقتنع بحكايه اكتشاف ثغره في العقد بين ART و الشركه الفرنسيه ...و بعدين موضوع احتكار البث التليفزيوني موضوع بيزنس و موجود في امريكا و دول امريكا الجنوبيه....

[se_ Elsyed]

سؤال

هو ليه احتكار عرض المباريات بنعتبره فى مصر جريمه يعاقب عليها صالح كامل؟

اصل فى رمضان اللى فات كانوا استضافوه فى برنامج فى الراديو

وسالوه على موضوع الاحتكار

قام جاوب بكل بساطه وقال : مفروض نتعلم ندفع تمن الحاجات اللى بنحبها !!

وبعيدا عن الوضع الاقتصادى المنهار فى مصر المحروسه !! حسيت ان كلامه منطقى بردو ومش بطال

منطقي أيه يا ست فيروز ...

الناس في وطننا العربي مش لاقية تأكل العيش .. نقوم نعمل زي الست ماري منيب ولا ماري أنطوانيت ونقولهم كولوا جاتوه

ونقول أيه للناس اللي في ريف مصر ويعدوا بالملايين .. أقول له روح إشتري ريسيفر ودش وإشترك عند المعلم صالح أبو كامل بـ 60 ج شهرياً والحد الأدنى للإشتراك 6 شهور ...

تعرفي بالرغم من إن غالبية السعوديين والمقيميين قادرين مادياً إلا إن صالح كامل عامل زي إبليس هنا كل ما تيجي سيرته ياخد شتيمه ماخدهاش حرامي سرق شباشب الناس وهي بتصلي .. لأ والشتيمة دي جت بعد علقة جامدة كمان ..

لسه بدري علينا يا فيروز لنطبق مبدأ

Pay to Watch

[فــيــروز]

But u pay to talk in the mobile

مش كده ولا ايه يا زعيم !!

ناس كتير جدا فى مصر تنفق الكثير على المنظره الكدابه و الفشخره التى لا داعى لها

وحيث انهم دفيعه قوى كده يبقى يدفعوا من اجل ما يمتعهم !!

ثم عفوا يعنى اذا كانت الحكومه المصريه لم تهتم بان مواطنيها منهم الكثيرون جدا تحت خط الفقر عاوز الشيخ صالح يشيل همهم بمناسبة ايه !! هو كان خلفهم ونسيهم !!

وزى ما قال الاخ KWA مبدا الاحتكار موجود فى كل مكان ومش بدعه وحتى هذا الاحتكار موجود فى خدمة الموبيل ولم يفكر احد ان يتذمر او يرميها انها شيطان اعظم كما نفعل مع صالح كامل !! المشكله فى رايى المتواضع ان ما نستطيع ان ناخذه دون وجه حق ناخذه ونرجع الامر الى استغلال مقدم الخدمه و نصفه بالشيطان و اللص الى آخره بينما من لا نستطيع ان نكح معاهم نرضخ لهم ولا يفكر احد انهم شياطين او لصوص !! وعجبى

[ابو يوسف]

الشيخ صالح كامل رجل أعمال ... لا يفهم الا لغة الفلوس ... تتحرق الكورة على اللى بيحبوها ... المهم الابيج اللى ممكن يطلع من وراها ...

و التليفزيون المصرى ما عوش ... و اللى ماعوش ما يلزموش !!!

لماذا تصدمنا هذه الحقائق ؟؟؟

ح نقول المواطن غلبان و مطحون و مفروم و مقهور !!!

ح يقولوا طيب ما يموت أحسن ..!!!

احنا عاوزين المواطن الجامد الدفيع الى بيفيد و يستفيد .. و الغاوى بنقط بطاقيته !!!

أبو بلاش خلص

و بعدين كتر خير الشيخ صالح انه افتكركوا بحتة فرنساوى ...

مش أحسن من مافيش ؟؟؟

افهموا البيزنس بقى !!!