# أسئلة مخيفة جدا...وأفكار محيرة ...ممكن أجد لها إجابة #

[zika]

هل الدين ضد إعمال العقل ؟

و هل إعمال العقل ممكن بدون شك ؟

و هل الشك ممكن مع وجود قناعات مسبقة ؟

مجرد أسئلة أظنها تخدم الموضوع و أعتذر لو لم تكن كذلك .

[doha]

فكرتني بنفسي ياابو ريم مرة مريت بتساؤل مشابه ..

كنت في رمضان الماضي بقرأ القرآن.. وفجأه تذكرت قوله تعالى (( وَأَمَّا الَّذِينَ سُعِدُواْ فَفِي الْجَنَّةِ خَالِدِينَ فِيهَا مَا دَامَتِ السَّمَاوَاتُ وَالأَرْضُ إِلاَّ مَا شَاء رَبُّكَ عَطَاء غَيْرَ مَجْذُوذٍ )) هود 108

مكانتش هي ابدا الآية الي كنت بقرأها .. ومعرفش ايه خلاها قفزت الى ذهني .. وايه برضه ( وسوس ) لي وقتها بان ايه ده .. ربنا سبحانه بيقول اننا هنخلد باذن الله في الجنة ( مادامت السماوات والارض ) هل معنى كده ان الخلود ده مش مطلق ؟ يعني طول ماالسماء والارض موجودين احنا موجودين وبعدها ولو ربنا سبحانه شاء وفنى السماوات والارض دي لاي سبب يراه هنفنى احنا كمان وخلاص على كده ؟

فجأه لقيت نفسي بفكر اكتر .. هو مش ابليس قال لآدم (( هل ادلك على شجرة الخلد وملك لايبلى)) ؟؟

هل معنى كده ان ابونا آدم ادرك الحقيقة دي واننا فانيين فانيين فكان نفسه في شيء يخلده ويخليه يعيش على طول فخلود بلا موت ؟

اخذتني الخواطر اكتر وقعدت افكر .. يااه معقول ؟ ملك ربنا سبحانه كبير اوي وواسع والسماوات والارض ومابينهما ومافيهما لا شيء بجانب ملكه سبحانه .. يعني احنا برضه لا شيء ..

وظننت اني اكتشفت باننا كآدمين شيء تافه جدا .. واحنا الي كنا فاكرين الكون بيدور عشانا .. وان معنى كده هتقوم القيامه ونتحاسب وكل واحد فينا ياخذ جزائه ويقعد له شويه في الجنة ثواب او شويه في النار عقاب بعدين ( نفنى ) ويجي ناس غيرنا مثلا او دنيا تانيه وتستمر الحياه لكن احنا هنكون خلاص بقينا ( عدم ) ..

افزعتني الفكرة .. بلا لا ابالغ لو قلت بان عيني دمعت .. معقوله ؟؟

وشعرت برغبه عارمه في التشبث بالحياه وان مينفعش كده واحنا حاجه كبيرة ولازم نعيش ونفضل لما بعد الموت وخالدين لابد الآبدين ..

كان الشعور بشع والتفكير مجرد التفكير اننا خلاص بعد الجنة مش هنبقى موجودين وهتستمر الحياه برغم كل شيء وهتيجي مخلوقات تانيه وثالثه ومليون واحنا مجرد شيء .. شعره ظهرت على شاشة العرض فتم ازالتها ليستمر الفيلم والى يوم الغد .. لا ظهورها اثر في الاحداث ولا ازالتها استرعى انتباه احد ..

وفجاه شيء ما هداني .. قالي اذا كان محمد عليه الصلاة والسلام بشر زينا .. وهو حبيب الرحمن .. فان كنا كبشر هنفنى يبقى هيجرى عليه ماهيجرى علينا ..

اراحني هذا الخاطر ايما راحه .. قلت خلاص ان كان عليه الصلاه والسلام هيفنى نفنى معاه ايه المشكلة .. وان كان ربنا سبحانه هيرضى لحبيبه الفناء يبقى احنا راضيين بيه مفيهاش حاجه يبقى هو الخير ..

لما فكرت كده زالت من نفسي الخواطر المزعجه فجأه .. وزال الشعور شديد السوء الي شعرت بيه ..

سالت نفسي .. ياترى انا ايه خلاني افكر كده ..

رجعت للآيات الي كنت بقرأها لم اجد اي شيء فيها له علاقه بالجنة او النار او بني آدم ..

كل ماكان مضايقني هو سيطرة الشعور علي من اننا كآدميين لا شيء واننا حاجه كده هتروح بدون ثمن ..تذكرت ان ربنا سبحانه وتعالى قال (( ولقد كرمنا بني آدم )) وتذكرت ايضا ان مين الي كان معترض على المقوله دي ومين الي كان بيقول انا خير منه ؟؟

اكتشفت ان وجهة النظر من اننا لا شيء واننا سنعود لالاشيء دي وجهة نظر الشيطان .. هو الي نفسه كده وهو الي شايف اننا كده .. لكن الواقع ان خالق الكون كله اصطفانا وكرمنا فلازم احنا كما نبقى عارفين ومدركين الحقيقة دي ..

وتنبهت اني تركت القراءة من يمكن ربع ساعه وركزت في خواطر لا هتودي ولا هتجيب ..

عرفت انه صوت الشيطان الي كان بيكلمني وانا للاسف استمعت له ( وركزت ) معاه ..

هو ساءه اني بقرأ قرآن وساءه اني بعمل شيء مفيد فقرر يشغل عقلي بما لايفيد عشان يصرفني عن الي هيعود علي بفائده ..

بل وتنبهت لما هو اهم ..

ربنا سبحانه مقالش لآدم ان في فناء .. الشيطان هو الي قاله هدلك على شجره تخلدك .. اذا الشيطان هو من وسوس له من البدايه انه خارج من الجنة او انه هيفنى وبالتالي ابحث لنفسك عن مايخلدك ويعطيك الملك .. وكان نتيجه استماع آدم لوسوسه الشيطان دي وتصديقه انه فعلا محتاج لما يضمن له الخلود ايه ؟؟؟

وعرفت انها نفس الحيلة القديمه بيكررها معايا .. فابتسمت في سخرية وقلت له اخسأ يالعين ..مش هتمشيها علي المرة دي ..

خلاصة كل ماسبق

انا لا اشك ولا للحظة في ايمان حضرتك ولا تدينك او ماشابه ده اذا جاز لي محاسبتك اساسا على شيء زي ده .. ولكن الي متاكده منه ان الشيطان لا يدخل الا البيت العمران .. فطبيعي جدا لما يلاقي حد ايمانه كويس وبيشغل عقله انه يقعد يلهيك في اسئلة مش هتعود عليك اجاباتها بشيء .

ممكن تكون وجيهة وممكن تكون منطقية لكن الاسترسال في التفكير فيها مش هيخدمك بقدر مايهخدم ( واضع الاسئلة ) الي عاوز يلهيك ..

كنا ازاي قبل ماننشأ .. ايه المشكلة ..

جربت تخضع لحقنة بنج ؟

بتاخذ الحقنة وفجأه يقولك اصحى فات ثلاث او اربع ساعات وخلصنا ..

كنا فين طول الاربع ساعات دول ؟؟

ولا عمرك هتعرف

كانها جزء انقص من حياتك ولا هتدرى بيه ..

اما لو خيرونا مابين 100 سنة في النار او نفنى ونرتاح .. هقولك سؤال تاني سابق على السؤال ده ..

تعرف من اكثر الايات القرآنية الي ممكن تسبب للواحد قشعريرة ايه ؟

قوله تعالى (( سنفرغ لكم ايها الثقلان ))

وهي الآية الي بتقول انه سبحانه يوم القيامه هيفضي نفسه ( ويتفرغ ) لنا يحاسبنا بقى على الي عملناه ..

متخيل الجبار مالك الملك خالق كل شيء جاي بيقولك ها ياابو ريم .. عملت ايه .. ها ياست ضحى وريني اعمالك .. يالله ..

متفرغ لنا ولسؤالنا .. وانت متخيل بقى سبحانه بجلاله وعظمته لما هيفرغ نفسه هيبقى الوضع ايه وهيكون سؤاله لنا شكله ايه ..

اعتقد اننا جميعا المحسن قبل المسيء هنتمنى في لحظات زي دي ان ربنا يحولنا تراب ولا اننا نتحاسب مهما كانت نتيجه الحساب ده ..

وعشان كده ياريت ندعيها من دلوقت ان يارب ادخلنا الجنة بلا حساب فاننا نقف امام الجبار نتحاسب على كل ثانيه ودقيقة من حياتنا عملنا فيها ايه فاحنا عبيد مساكين اضعف بكتير من اننا نقف امام خالقنا وقفة زي دي او نتحاسب حساب دقيق بالشكل ده ..

وتقولي مية سنة يابو ريم ..

ربنا يهون علينا الحساب بس يارب او يعفينا منه وهو كريم وقادر على ذلك ..

يارب لا تكتب علينا لحظة في النار لا احنا ولا احد من ابائنا او ذرياتنا او ازواجنا ابدا ياكريم ..

تم تعديل 16 ديسمبر 2009 بواسطة doha

[SoSo R]

مساء الخير أستاذى الكريم أبو ريم:

أعذرنى لم أقرأ الردود كلها...وخصوصا حسيت الضرب هيبتدى. :lol:

أرجو أن يكون ردى مازال فى سياق السؤال المطروح والذى أستفزنى لأجيب عليه...

ولكن دعنى أولا أجيب على سؤالك..أو أبدأ مناقشته التجريدية معك -كما طلبت- بسؤال من جانبى...

لماذا نخشى أن نتلاشى...أو علام نخشى؟؟؟

هل نخشى على ماضينا..

أم إرثنا؟؟

أم ذريتنا..

أم أسماؤنا ألا يعود ذكرها ..وتردد صداها فى الفضاء؟؟

وبالطبع إنه ليس خوف من المجهول...لأننا أفترضنا النهاية...فرضية مؤقتة..

أعتقد أنها الأخيرة ...نحن نخشى من توقف ذكرنا فى الكون..

نخشى أن ننتهى من الكون دون ترك بصمة..

دون ترك أراء..

إنطباعات..

مشاعر..أشخاصا أحبونا أو مازالوا يحبوننا..

دعنى أشارك معك مشاعر خاصة جدا بى...

كثيرا ما أتخيل يوم وفاتى وتأبينى...

وأتفاعل مع هذا الحدث..

وأتخيل ردة فعل كل من يحبوننى ويحملون لى مشاعر المودة..

كم سيكون حزنهم وكمدهم..

وأجدنى أشفق عليهم من الألم الذى سيتسببه لهم فراقى وبعدى عنهم...

وأجد نفسى أتفاعل مع هذا المشهد بدموع حقيقية...ليس خوفا من الموت...ولكنها شفقة على من أحب من مشاعر الحزن التى ستنتابهم..

عن الوحدة المدقعة...التى سأتركها بعدى...

عن أشياء كثيرة لا يتسع الحديث لها الآن...

تخيل ...

لو أنه عند وفاتى....سأتلاشى...

ولن يتبقى منى أى أثر...

أعتقد أنه لشىء محزن جدا...

لا أعلم إن كانت مداخلتى مازالت فى سياق السؤال..

ولكنى هكذا شعرته وأستعوبته...

وهذا ردى...ولا أرجو أن يكون ردا مشحونا بكثير من العواطف التى لا محل لها هنا...

دمت بخير

تحياتى

سوسورانى

[Abu Reem]

أولا أشكركم جميعا جدا جدا

ما شاء الله إلتزام بعدم اقتباسات متكررة وتركيز في الكلام والمداخلات السابقة ، ولكن تظل هناك مداخلات طويلة متشعبة ( سامعاني ياأخت ضحى ) ........ ما شاء الله أول طلعة ومع بسم الله ....طاخ......عشرتاشر سطر ..... :lol:

ولكن بصراحة انت قلت كلام كتير ، وهناك أشياء في كلامك كنت سأطرح عنها أسئلة فيما بعد....راجعلك

كل المداخلات السابقة ، بها نقاط سأتوقف عندها ...لأن بها كلام هام جدا ....ولاحظوا مثلا مشاركة الأخ أو الأخت Zika وهي أول مشاركة

وهي على قدر صغرها في الحجم ولكن بها أسئلة هامة...لابد أن نفكر فيها أو على الأقل نضعها في الاعتبار عند حوارنا------------------------------------------------------------------------------------------------------------

مبدئياً

طيب ما أنتم طلعتم جميعا ......لاسعين .....أيو كده ...كل ده كان مستخبي ...وقاعدين ساكتين...وعاملين نفسكوا ..مش واخدين بالكم

لازم يعني الواحد....يشخط فيكم .....

إذن لما هيه الحياة مرة واحدة هانعيشها ...وليس أمامنا إلا فرصة واحدة............عمركم ما حطينم احتمال أن يكون كل ما أمنت به أو تربيت ونشأت عليه ..ممكن يكون خطأ....ولو كل واحد فينا قال ....

((( أتريد أن تنهانا عما كان يفعله أبائنا ...)) اليس بهذا نكون مثل السابقين الذين اعترضوا مثلا على الرسل ورسالاتهم حيث أنهم متمسكون بما نشأوا عليه ووجدوا عليه أبائهم ...يعني لو كانت المسألة كده ..ماكانش حد أمن بالرسل ..ومنهم رسولنا محمد عليه الصلاة السلام ومكانش فيه مسلم ولا مسيحي ولا يهودي...

المهم..........من السؤالين اللي في الأول .....اللي كنت حاططهم علشان نسخن بهم ونشط تفكيرنا شوية

ومن مداخلاتكم وجدت أنه وجب الآن أن تسأل نفسك سؤال قبل أن ترد على ما سبق أو ما سيأتي

ألسنا كمسلمين نقول...عندما نتكلم عن باقي الملل والديانات ، لماذا لم يطلعوا على القرآن ..ولماذا لم يتعرفوا على دين الإسلام..إذن هم المخطيئن ...ويستاهلوا اللي يجرا لهم

- طيب سؤال صغنون كده ...هل ..تبحرت ...واطلعت بدقة وبتفصيل ..على..الديانات الاخرى..وعلى تفسيرهم لعقيدتهم التي يؤمنون بها ولماذا يؤمنون بها ويتمسكوا بها رغم أنها في وجهة نظرك...غير منطقية ولا مقنعة.....إذن مليارات على خطأ وأنت بس اللي فاهم الصح..رغم أنهم قد يكون أكثر تقدنا وعلما منك....؟؟؟؟؟

هه مين درس وإطلع بالتفصيل ....فقط خلقنا مسلمين ....ولكن هل بحثنا بدقة...في الديانات الأخرى وناقشنها باستفاضة.. طيب واللي درسوا بدقة واطلعوا كام في المائة من المسلمين .....5 % طيب والباقي هل هم غير مطالبين بذلك؟

سؤال منيل بنيلة.... .

تم تعديل 16 ديسمبر 2009 بواسطة Abu Reem

[Abu Reem]

[quote name=Abu Reem' post='543390' date='Dec 15 2009, 10:14 PM'

وكنت بقول إن روحى دى كانت روح حد تانى وحلت فى جسدى وبالتالى ممكن روحى تحل فى جسد تانى وتبقى انسان تانى .. وده ممكن يفسر إن ساعات نقابل ناس يتهيألنا إننا شفناهم .. وساعات نمر بموقف يتهيألنا إننا مرينا بنفس الموقف فى وقت ما

شفت بقى أنا كان دماغى متمخول ازاى ؟

أنا مش حاجاوب السؤال التانى قبل ما تقول لى : برضه السؤال التانى ده مطلوب نجاوب عليه دون الرجوع إلى عقيدتنا .. أم أن هذا الشرط كان يتعلق بالسؤال الأول فقط ؟

ولا متمخول ولا حاجة تناسخ الأراوح ده وان القطة اللي قدامي دي ممكن تكون الحاجة أم كوثر اللي ماتت السنة اللي فاتت ودي روحها :lol: دي حاجت كنا بنفكر فيها واحنا لسه بنلبس المريلة بتاعة المدرسة...

لسه يابو محمد ...أدخل في المهم بسرعة ومتخافش ..بس واحدة واحدة...السنة أدامنا طويلة .....

أما السؤال الثاني : أيوه عاوز إجابة من غير أي خلفيات ...فقط عاوز أعرف الأراء الشخصية لو كان هذا الخيار متاح..وذلك لأن إجابته ممكن توصلنا ....لأشياء أخرى..

تم تعديل 16 ديسمبر 2009 بواسطة Abu Reem

[doha]

- طيب سؤال صغنون كده ...هل ..تبحرت ...واطلعت بدقة وبتفصيل ..على..الديانات الاخرى..وعلى تفسيرهم لعقيدتهم التي يؤمنون بها ولماذا يؤمنون بها ويتمسكوا بها رغم أنها في وجهة نظرك...غير منطقية ولا مقنعة.....إذن مليارات على خطأ وأنت بس اللي فاهم الصح..رغم أنهم قد يكون أكثر تقدنا وعلما منك....؟؟؟؟؟

ايوه .. ويشهد الله .. حصل ..

كنت بفكر ان مش معقول الناس الي مش مؤمنه بالاسلام دي كلها مقرأتش القرآن مثلا او مش عارفه حقيقته .. لاه اكيد عارفين عنه اشياء حقيقية بس في نفس الوقت حافظين معاها ( ردود ) او قناعات مغلوطه متخليش للاشياء دي فعاليه .. اضف على كل ده جهلهم بالاشياء الباقية فيه فبالتالي الناس دي ممكن لها بعض العذر في عدم ايمانها بما نؤمن احنا بيه ..

جيت مرة قلت خلاص ان كنت بعيب على الناس دي انها مدورتش بنفسها و سابت غيرها يفكر لهم ويقرر ان الاسلام ده دين مش كويس وان الي هم عليه هو الصح فيبقى من باب اولى اعيب على نفسي مهو انا تبنيت الاسلام لي دين واخذت فكرة قالها الآخرون بان الاديان التانيه غلط او فيها وفيها من غير مااكتشف بنفسي ..

قلت سهله .. تاهت ولقيناها ..

اجيب الكتاب بتاعهم وهو مترجم ومتوافر يعني مش هيحتاج مني مجهود او حد يشرح لي المقصود منه .. اقراه بحيادية تامه .. بدون محاولة مني لاقناع نفسي بيه بالعافيه او بالغصب .. وفي نفس الوقت بدون تحامل زائد عليه او ماشابه .. حياد تام

قرأت .. وفهمت الاوت لاين او الخطوط العريضة لدينهم .. لا انكر ياابوريم .. في اجزاء كنت بقرأها من ( الكتاب المقدس ) مكانش امامي غير التصديق ( الاجزاء ) دي فعلا كلام الله .. كلام رباني واضح .. مستحيل يكون غير من اله ..

وفي ( اجزاء ) تانيه .. اسمح لي .. ************************

في النهاية خلصت الى ان ( اجمل ) ماعندهم هو ذاته ماعندنا .. والحمدلله مفيش عندنا ما ( افزعني ) وجوده هناك ..

سكت ؟ لاه ..

مش يمكن انا مقتنعه بكتابنا عشان ( قالوا لي ) كده وهو مش مقنع زي مالتانيين ( بيقولوا ) ؟

رجعت قرأت القرآن تاني بس مش بعين المسلم لاه .. بعين الباحث عن الحقيقة ..

وبرضه بنفس النظرة .. اني بقرأ كلام عادي يمكن يكون من عند ربنا يمكن يكون من عند بني آدم .. بنفس نظرة الغير مسلمين .. وقلت اشوف هيطلع معايا ايه ..

طبعا مش محتاج اقولك النتيجه الي خلصت لها فالحمد لله والمنة مازلت على اسلامي ولم ازدد الا تمسكا بيه .. لكني استفدت جدا من التجربة دي سواء بقراءة كتب الآخرين او باعاده قراءة كتابي بعين الحياد وبدون التاثر باي افكار مسبقة او شروح شرحها غيري اني بقيت اكثر فهما للاسلام ووصلت فيه لرؤيا اكثر وضوحا معتقدش كانت هتتوافر لي لو اني معملتش كده ..

ده مع تاكيدي في النهاية على احترامي التام للآخرين ولكل من هو مقتنع بدينه وبصحة مافيه ايا كان هذا الدين .. وبالتأكيد رايي الخاص جدا لايعيب في اديانهم كما ان ارائهم الخاصه لا تعيب في ديني .. وفي النهايه مقدرش اقول غير ربنا يهدينا جميعا للحق ويثبتنا عليه ..

تم تعديل 17 ديسمبر 2009 بواسطة أبو محمد
حذف عبارة مسيئة إلى معتقدات الغير

[tantrum]

هه مين درس وإطلع بالتفصيل ....فقط خلقنا مسلمين ....ولكن هل بحثنا بدقة...في الديانات الأخرى وناقشنها باستفاضة.. طيب واللي درسوا بدقة واطلعوا كام في المائة من المسلمين .....5 % طيب والباقي هل هم غير مطالبين بذلك؟

سؤال منيل بنيلة.... .

ليس من الضرورى البحث بدقة و التبحر فى الديانات الأخرى

مقارنة أصول العقيدة تكفى كبداية.

و بالمقارنة يتضح أيهما أكثر قبولا للعقل و القلب و أيهما أشمل.

[الجدار]

فكرة الحياة بعد الموت وان ممكن نكون كلنا اتخدعنا وأن وأن وأن من الفرضيات دي جت في دماغ الواحد كتير

وبالأمانة لما بفكر فيها بيجيلي إكتئاب وإنقباض ان الواحد مش حيقابل ربه ولا حيشوف رسوله ولا حيقعد يتفرج على تاريخ الأرض والناس اللي كانوا زمان

مش عارف دايماً كان عندي فضول ان لو ربنا أكرمني ودخلت الجنة اني أبقى قاعد كده وأطلب اني اتفرج على الحرب العالمية التانية

أو ابقى مع الطيار اللي ألقى القنبلة الذرية على هيروشيما

أو احضر مراسم تحنيط من أيام الفراعنة

ما علينا المهم بصراحة بعقلي القاصر مش قادر أوصل لنتيجة مقنعة

وحنقول زي سيدنا علي ان الدين لو كان بالعقل كان المسح على الجورب يكون من تحت مش من فوق

ده ما يمنعش اننا نفكر وانا شايف ان التفكير في المواضيع دي حاجه صحية

بس خليني أسأل سؤال

بفرض جدلي بحت

وربنا يسامحنا على الكلام ده

ان مافيش إله ومافيش رسالات واحنا عايشين نعمل اللي إحنا عايزينه

تعتقد انك كنت حتكون نفس الشخص اللي انت عليه دلوقتي؟؟ ولا كنت حتكون شخص تاني؟؟

يعني حتشرب خمره أو حتسرق أو حتزني أو حتقتل ؟؟

اكيد لازم يبقى في قوى عظمى الإنسان يبقى عارف انها حتحاسبة حتى لو ماحاسبتهوش القوانين الوضعية

وإلا دي مابقيتش حياة

ولو وصلت أن في إله أكيد حتكون المسألة أتحلت ولا إيه؟؟

مش عارف عرفت أوصل اللي في دماغي ولا ايه

تم تعديل 16 ديسمبر 2009 بواسطة الجدار

[Abu Reem]

وعلشان العدل لازم يستمر ودي صفة من صفاته جل وعلى

يبقى لازم انه يورينا عظمة ابداعه فينا بأنا يرجعنا من نفس اصلنا وبمكن ده والله اعلم هيكون رد على الكافرين وسؤالهم

أئذا متنا وكنا ترابا وعظاما أئنا لمبعوثون

كويس كلامك ،،، والعبارة اللي اقتبستها من حديثك ، لو افترضنا تنحية الأية التي انت استشهدت بها

يبقى مفهوم هذه الأية ومنطقيتها هو الإجابة الأكثر قرباً من المنطقية

- بمعنى ان حتى لو هناك أناس لم يعرفوا القرآن ، فأكيد لو تناقشوا عن ماذا سيحدث لنا بعد الموت ، ولو كان عندهم شيء من العقل السليم ممكن يفكروا ويتوصلوا مبدئيا أن مش معقول هنكون اتخلقنا في هذا الكون الدقيق ، لكي نعيش كام سنة ثم نموت ونفنى

لأن المنطق والعقل سيرفض أننا خلقنا لنسعى ونشقى في الحياة ونجتهد ثم نموت بعد أن نكون مثلا مهدنا الطريق لذريتنا ولمن سيأتي من بعدنا ...وبعد كده نموت ونفنى ...وتستمر الحياة من بعدنا

ولكن بعد أن أوصلنا الحديث إلى أن لحياتنا فائدة وأهداف إلا أن التساؤل الذي تفرع من هذه الجزئية يطرح نفسه على تفكير ...أي إنسان بلا دين.....ويقول ...( طبعا هنا أنا بأتخيل حوار من ملحد مثلا ) وهو يقول

(( إذن أتينا للحياة لهدف ، أو لأهداف وهي تيسير الحياة لمن بعدنا..وهكذا..ولكن لماذا لا أموت وأفنى ، وهذا لن يتعارض من أننا قمنا بأهدافنا وعمرنا الحياة...وليس من المهم مصيرنا بعد الموت ....فلن نشعر بالظلم مثلا لو تلاشينا ولم ندخل الجنة ..لأننا لن نكون موجودين لكي نشعر بظلم .....ولو لم ندخل النار..فخير وبركة ))

طبعا هنا سيأتي التساؤل الذي سيثار من هذه الجزئية وهو ....طيب وماذا عن الظالمين...يفعلون ما يشاءون ويتساوى الجميع

!!!!؟؟؟

تم تعديل 16 ديسمبر 2009 بواسطة Abu Reem

[sarmar]

لسلام عليكم ورحمة اللة وبركاتة

قرات ماسبق من مشاركات من الاخوة والاخوات ورجعتونى سنين طويلة عندما كنت صغيرا ربما فى الاعدادى او اقل وكنت اذهب مع والدى دائما للمسجد فى صلاة الجمعة واذا تخلفت عن حضور الصلاة حتى اذا هو لم يذهب لسبب او لاخر كان يعاقبنى اشد العقاب

وذات مرة استمعت لخطاب الامام وكدت ان افهم ان من اسباب تعذيب الكفار انهم لايعقلون وانهم كالحمير يحمل ولايعرف مايحمل

وذهبت الى والدى اسالة لماذا نحن مسلمون لانى خايف ان نكون مثل الحمار تعرضت لسيل من التوبيخ واننى لست ابنا لة واننى كفرت وووووو

ردة الفعل هذة وجدتها عند ابى بل وانتابنى خوف ان اتوجه بها الى غيرة فابى سوف يستر كفرى الذى اتهمنى بة اما غيرة فلن يرحمنى

وبدأ يدخل فى عقلى اللة ومن هو واسئلة كثيرة جدا جدا

ولكن مع نمو ادراكى وتفكيرى لحظة بلحظة وجدتنى اشعر بارتياح عندما اذهب لصلاة الفجر بالمسجد فسالت نفسى لماذا هذا الارتياح بل اصلا لماذا جئنا الى الدنيا وايضا سيل من الاسئلة تكاد تحطمنى

لكن ماستخلصت مما سبق ان هناك حدود لادراكى وليس حرام ان اعمل العقل فى كل شىء ولكنى لقصر علمى وفهمى كانسان هناك اشياء كثيرة سوف يستعصى عليا فهمها او ربما افهما خطأ واذهب بمفهى لموارد الهلاك

منها اننا عبيد جميعنا عبيد لاارى شىء خلقنا لة الا لنكون جزء من الكون ترك لة الخيار فى العبودية على الرغم من ان اللة خلقنا من العدم بمعنى ان نظرية الخلق قد اكتملت بنا ( من لاشىء )

وقد اتاح اللة كما نعلم الفرص العديدة لتكون مطيع لة وتعترف بوحدانيتة وقد

وكما اورد السادة المشاركين او كما عرفت بعد ذلك اننا جميعا خلقنا فى ذات الوقت ولكن ردا على الاخ الذى يقول مافائدة ااننى كنت موجود ولم اشعر او اتيقن بذلك

ولعدم قدرتنا على ادراك ذلك فقد كانت مرحلة الوجود اولال اى قبل التواجد فى الارض كانت لنا طبيعة مختلفة لانحتاج فيها لأحاسيس او مشاعر او تفكير او جسد يصح ويسقم او طعام او تكاثر او 000 الخ

وجاء الوقت المحدد لتواجدنا بالدنيا كل حسب ماكان قد تم تقديرة ومرحلة التواجد بالدنيا تحتاج لجسم او جسد مع الروح الموجودة من قبل وتواجدنا لادنيا هو محور ماسبق وماسوف يلحق بنا

وهذة الفترة تختلف ايضا من انسان لاخر وبعدها لن تحتاج هذا الجسد وتعود كما ككنت من ذى قبل قبل تواجدنا بالدنيا او الارض وسوف يتم التخلص من هذا الجسد نهائيا الا فيما ندر لننتقل الى حياة اخرى تختلف عن المرحلتين السابقتين وانا اعتقد ان كل انسان روحة مستقلة بة

ثم نمر بالمرحلة التى هى بين الموت و البعث ثم نتحول مرة اخرى بطبيعة جسمية مختلفة جدا لوادرك واحساس ومشاعر وعقل وتفكير يختلف كلى وجزئى عن ماكنا علية بالدنيا لان هذة المرحلة التى هى الاخيرة لها طبيعة مختلفة كلى وجزئى ايضا عنا ما قد سبق ومررنا علية حتى تستقر الاوضاع لكن تعالى معى اخى الكريم نتطلع عن المراحل الثلاث روح او بمنطوقنا نحن البشر الان ( روح ) كنت فيها عابرا او ضيفا ضيف فهل يهمك ان تترك لنفسك ذكرى او تخليد فى مكان انت فية ضبف

وحتى مرحلة الدنيا نحن فيها غرباء وضيوف والافيد لنا ان نرى ماهو المطلوب منا فيها لان هذة المرحلة ليست لنا كما واحب ان اعرف شىء وهو انة لاخلود ولا وذكرى ولا بقاء الا لمن خلق كل هذة الاشياء

هذة المراحل التى نمر بها وحتما سنمر بها منذ بداية الخلق الى اليوم الاخير وان كانت تستغرق من الزمن بحساب الوقت العديد من ملايين السنين وفيها ماهو قد تم فعلا او مازل او حدث وانتهى ولكن الجميع ينتظر اليوم الذى نخلق فية مرة اخرى للحساب وفى كل هذا الانفعال والانشغال باحدث تمر علينا وتستغرقنا الا ان اللة سبحانة وتعالى يرى مايحدث وماهو الان وماسوف يكون لانة ليس عندة زمن كما نحن نشعر بة بل كل هذة الملايين من السنين وما بعدها هو بقدرتة الخارقة يعرفها ويراها كما نحن نرى شاشة الكمبيوتر الان ويستطيع ايضا ان يجرى تعديل وتعيير فى اى حدث وفى اى زمن حتى مافات وانقضى

[مغتربة]

بالنسبه للسؤال الاول

قد اكون انا الوحيده التى تسبح ضد التيار

و لكنها حقيقه تفكيرى

حقا فكره التلاشى لا ترعبنى اطلاقا بالعكس لفتره طويله من حياتى كانت هى امنيتى

و كنت اقول فى نفسى لما يجب ان تكون اما جنه او نار

و لماذا ليس هناك اختيار ثالث لمن لا يريد ايا منهما

وبالتالى اجابتى على سؤالك الثانى تلقائيا ستكون اننى ساختار التلاشى ( لانه كان مطلبى من البدايه )

اما بالنسبه للسؤال الثالث فنعم عند مرحله معينه تمرد عقلى على معتقدى و حثنى على البحث ربما كنت على خطا

لكن الامر لا يحتاج منك البحث فى كل الديانات الارضيه لان هذا قد يستهلك عمرك كله دون استعراضها كلها

و لكن هناك بعض المسلمات المنطقيه التى توفر عليك البحث

بحيث تضيق لك عمليه البحث عن كل ما لا يتوافق معها

و هذا ما فعلت

و بعدها بحثت فى المتبقى برويه شديده

حتى وصلت الى قناعه عقليه قبل قلبيه لصحه ما انا عليه

و اعتبرت نفسى مسلمه باختيارى و ليس بالمولد

و هو ما احمد الله عليه كثيرا

ها فين السؤال الرابع يا الله بسرعه الى بعده

[justme]

طب خلينا نشوف قوانين الكون يمكن نعرف نستنبط حاجة

كل شيء بميزان وقالوا ان لكل فعل رد فعل مساو له في المقدار ومضاد في الاتجاه

ربنا خلق الأرض في نظام حيوي طبيعي دقيق لكن لما الانسان ظلم بدأ الفساد في البر والبحر يدق ابوابنا وفي اية بتقول كده مش هاستشهد بيها علشان الموضوع لكن هي تساوي ما يحدث الأن

طيب الانسان ظلم البيئة فكان الرد واضح

ماذا عن ظلمه لأخيه لكي يستقيم ميزان عدل الكون لابد ان ترد المظلمة

وبما أن الاف قتلوا وظلموا فإن مظلمتهم انتهت

فهذا معناه اختلال الكون

ولكن الحقيق ان اقل اختلال في المعادلة قد يؤدي للفناء

ولكن الفناء لم يحدث اذن نحن لم ندرك المعادلة كاملة

وبالتالي هذا معناه وجود حساب دقيق

فسبحان الله القدير

وارجع واحذر من خطورة هذا الموضع

وياريت نقرأ اغاثة اللهفان فستتعجب من مدى تشابه بعض اسئلتك

ومتنساش ان الأولين سألوا هذه الأسئلة واكتر منها

وهناك ما هو اشد

[عنبو]

كان مره فيه واحد ربنا رزقه باثنين من الاولاد

والراجل ده لما ربنا توفاه ترك لكل واحد من اولاده مبلغ مليون جينه

وبعدين جه واحد بعد وقاة والدهم قال لهم ان فلوس ابوكم دى كلها حرام وان انتوا لازم تتركوها وتبدوأ من الاول تااااااااااااانى

طبعاً الاخين اندهشوا وقالوا خلاص احنا عندنا احتمالين لاما الراجل ده كلامه صح لاما لا

يبقى هنعمل الى يمليه علينا ضميرنا وهو ان احنا قبل لما ناخد جاجه من فلوس ابونا نتأكد الاول ان الفلوس ده مصدرها حلال

وبالفعل بدأوا يبحثوا لحد لما توصلوا ان الفلوس بتعت ابوهم حلال ميه بالميه وان الراجل ده كلام كان كله كدب

وقالوا خلاص بقى نضرب بكلام الراجل ده عرض الحائط وناخد الفلوس

وبعدين واحد من الاخوه قال لا انا مش عاوز فلوووووووس ابويا انا عاوز اتمرمط علشان اكون نفسى

والاخ التانى قاله يابنى تتمرمط ليه متاخد الفلوس نصيبك الى هو حلال ميه يالميه وتبدأ به مشروع وتكبر وتكبر غيرك معاك وسيب الفرصه دى لواحد ميكنش فى نفس ظروفنا قاااااااال لا انا غااااااااااااوى تعب قله خلاص انت حر

الخلاصه كل واحد من حقه يبحث عن الحقيقه لحد لما يثبت انها حقيقه ولكن بعد ذلك مينفعش ان اسقط حقيقه انا توصلت لها انها حقيقه

يعنى انا فى الاول لفيت على كل الاديان وعلى كل العقائد لحد الحمد لله لما تأكدت ان الدين الى انا مولد عليه هو الدين الصحيح يبقى واجب عليا بعد كده ان انفذ بقى الكلام الى فى الدين ده والا هكون عامل زى الاخ التانى الى رفض ياخد الفلوس وكان غاوى تعب

وفيه برده واحد كان بيعامل ابوه وحش وبعدين لما الناس سألوه انت ليه بتعامل ابوك وحش قالهم اصل انا شاكك انى مش ابنه وان انا ابنه بس بالتبنى

كل الناس قالوا يابنى ده ابوك ولو عاوز تتأكد تعالى نعمل تحاليل DNA ونشوف وبعد التحاليل لقيوا فعلاً انه ابنه

طيب ينفع بعد كل الاثبات دى يجى يقول لا هو مش ابويا ؟؟

شكراً

[Abu Reem]

وبالتالى اجابتى على سؤالك الثانى تلقائيا ستكون اننى ساختار التلاشى ( لانه كان مطلبى من البدايه )

اما بالنسبه للسؤال الثالث فنعم عند مرحله معينه تمرد عقلى على معتقدى و حثنى على البحث ربما كنت على خطا

لكن الامر لا يحتاج منك البحث فى كل الديانات الارضيه لان هذا قد يستهلك عمرك كله دون استعراضها كلها

ها فين السؤال الرابع يا الله بسرعه الى بعده

خلاص نفضتي لنا كلنا في دقيقتين <_< وعاوز السؤال الرابع وانت بـتأكلي الساندوتش <_<

ببساطة كدة لا يهمك فكرة التلاشي الى الأبد ....أشهد أنك جبارة ...ده أنا بعيط لما الفكرة دي تسيطر عليا

كده ببساطة مفيس أفكار ، ولا ذكريات ، ولا أولاد، ولا أحباب ، ولا طموح ، ولا تطلع لأخبار سارة

ما علينا ......راجع لك تاني ، وبعدين إحنا لسه لم نصل للسؤال الثالث ،، الأسئلة الماضية كانت متفرعة من الثاني

--- عاوزين بس نتكلم وننتهي بسرعة من موضوع الاطلاع على كافة الأديان على الأقل الكتب الثلاثة ،

الجميع ما شاء الله بيقول أنه قرأ وتمحص ، طيب الديانات الثانية...حد فيهم قرأ تفسير القرأن ...,وايه ياترى الذي لم يجده مقنعاً

نفسي الإخوة المسحيين يشتركوا معانا ، بدون حرج ، وده دور الاخوة المشرفين ، ياريت يكلموهم

ونفسي أخونا الفاضل اسكوربيون ، يشارك معانا ...فهو صريح ..ويتكلم ببساطة دون تعصب أو لف ودوران

تم تعديل 16 ديسمبر 2009 بواسطة Abu Reem

[Abu Reem]

مش عارف دايماً كان عندي فضول ان لو ربنا أكرمني ودخلت الجنة اني أبقى قاعد كده وأطلب اني اتفرج على الحرب العالمية التانية

أو ابقى مع الطيار اللي ألقى القنبلة الذرية على هيروشيما

أو احضر مراسم تحنيط من أيام الفراعنة

-----------------------------------------------------------------------------------

بفرض جدلي بحت

وربنا يسامحنا على الكلام ده

ان مافيش إله ومافيش رسالات واحنا عايشين نعمل اللي إحنا عايزينه

تعتقد انك كنت حتكون نفس الشخص اللي انت عليه دلوقتي؟؟ ولا كنت حتكون شخص تاني؟؟

يعني حتشرب خمره أو حتسرق أو حتزني أو حتقتل ؟؟

اكيد لازم يبقى في قوى عظمى الإنسان يبقى عارف انها حتحاسبة حتى لو ماحاسبتهوش القوانين الوضعية

وإلا دي مابقيتش حياة

ولو وصلت أن في إله أكيد حتكون المسألة أتحلت ولا إيه؟؟

مش عارف عرفت أوصل اللي في دماغي ولا ايه

أيوه كده لقينا واحد كمان هينضم لفريق اللاسعـيـن

عفارت عليك ياعم الجدار ( عفارت بالتاء مش بالميم )

بأه انت عاوز تشوف قنبلة هيروشيما وهية بتترمي ، وكمان التحنيط...... <_< شرير أنت قوي

أنا نفسي أعرف ( مين اللي فتن علينا في حرب 67 - وأموت وأعرف مين اللي فجر البرجين بتوع التجارة )

ويظل تساؤلك في أخر الفقرة المقتبسة وجيها جدا

أيوه كده ......كل ده كان مستخبي جوانا....ولسه ده إحنا هنسمع بلاوي <_< .............

[مغتربة]

وبالتالى اجابتى على سؤالك الثانى تلقائيا ستكون اننى ساختار التلاشى ( لانه كان مطلبى من البدايه )

اما بالنسبه للسؤال الثالث فنعم عند مرحله معينه تمرد عقلى على معتقدى و حثنى على البحث ربما كنت على خطا

لكن الامر لا يحتاج منك البحث فى كل الديانات الارضيه لان هذا قد يستهلك عمرك كله دون استعراضها كلها

ها فين السؤال الرابع يا الله بسرعه الى بعده

خلاص نفضتي لنا كلنا في دقيقتين <_< وعاوز السؤال الرابع وانت بـتأكلي الساندوتش <_<

ببساطة كدة لا يهمك فكرة التلاشي الى الأبد ....أشهد أنك جبارة ...ده أنا بعيط لما الفكرة دي تسيطر عليا

كده ببساطة مفيس أفكار ، ولا ذكريات ، ولا أولاد، ولا أحباب ، ولا طموح ، ولا تطلع لأخبار سارة

ما علينا ......راجع لك تاني ، وبعدين إحنا لسه لم نصل للسؤال الثالث ،، الأسئلة الماضية كانت متفرعة من الثاني

--- عاوزين بس نتكلم وننتهي بسرعة من موضوع الاطلاع على كافة الأديان على الأقل الكتب الثلاثة ،

الجميع ما شاء الله بيقول أنه قرأ وتمحص ، طيب الديانات الثانية...حد فيهم قرأ تفسير القرأن ...,وايه ياترى الذي لم يجده مقنعاً

نفسي الإخوة المسحيين يشتركوا معانا ، بدون حرج ، وده دور الاخوة المشرفين ، ياريت يكلموهم

ونفسي أخونا الفاضل اسكوربيون ، يشارك معانا ...فهو صريح ..ويتكلم ببساطة دون تعصب أو لف ودوران

هنا تكمن دهشه الحياة الانهائيه اخى الفاضل

فما يمثل للبعض اسوء الافكار و ارعبها على الاطلاق يكون للبعض الاخر هو اقصى امانيه و منتهى رغباته

بس ايه رايك فى التكثيف ده

احنا نحب نجيب من الاخر

و اى خدمه

[Alshiekh]

لست ادرى لماذا ظن البعض اننا نتناقش حول الايمان بالله وبوجود الخالق واننا نحاول اثبات ذلك

مايقوله بعض الاخوة لاثبات قوة ايمانهم يقوله كل معتنقى الاديان ولديهم مايدعم موقفهم ايضا.

بالامس كانت هناك احتفالية " هندوسية " وبدأ كل من له سؤال بخصوص الديانة الهندوسية يسأل.

كان هناك سؤال عن " الفئران " وتقديسها ، وقام بالاجابة الراهب - وهو بالمناسبة استاذ طبيب بالجامعة - وفسر معتقده بطريقة هو مقتنع بها وبالطبع كل اتباع ذلك المذهب وهو يعتبر ان الفئر ماهو الا رمز للرب الذى يزور كل البيوت ، والبيت الذى لايزوره الرب هو بيت غير مبارك !

أجاب عن سؤال آخر عن تناسخ الارواح ، ويؤمن كما يؤمن الآخرون بان الروح يعاد ولادتها مرات عديدة الى ان تصبح بمثابة ربا فى النهاية !

======================================

عموما الفرضيات التى يتسائل عنها ابو ريم والتى بالتأكيد ساورت العديد منا ، وماتعنيه بالنسبة لى هو " أنا أفكر *** إذن أنا موجود "

وللحديث بقية

[أحمد سيف]

الجميع ما شاء الله بيقول أنه قرأ وتمحص ، طيب الديانات الثانية...حد فيهم قرأ تفسير القرأن ...,وايه ياترى الذي لم يجده مقنعاً

هناك فارق كبير بين أن تقرأ القرآن أو تفسيره وانت مقتنع بأنه كتاب سماوي من عند الله وبين أن تقرأه وأنت مقتنع أنه كلام بشري وأن الإسلام دين "مفبرك"

خلال نقاشي مع صاحبي الملحد كان مقتنعا طبعا أن الإسلام ليس دينا سماويا وأن القرآن مختلق ... وحاول أن يأتي بأدلة كثيرة من القرآن تثبت "التناقض" الموجود فيه على حد قوله... بمعنى أنه لابد أنه قرأ القرآن وتمعن فيه بهدف إثبات التناقض الذي يدعيه ... إذا فليس كل من سيقرأ القرآن سيقتنع به بدليل أنه تمت دراسته بواسطة آلاف المستشرقين ولم يؤمنوا به.

[justme]

طيب حته في السريع على ما تقرج واكون مركز

بخصوص تناسخ الأرواح

اذا افترضنا ان كل كائن يحمل روحا واحدة

وان الروح بتخش دورة كده وتتحول وتبقى في حاجة تانية

طيب الأرواح دي جت منين

ماهي حاجة مستحيلة ان كل الأرواح دي جت بالصدفة

وبعدين الأرواح دي عددها بيزيد لأن الكائنات بتزيد

طب مصدر الزيادة دي ايه

كمان حاجة تانيةموضوع ربوبية كائن

مفهوم إله يعني ايه

خلود بلا موت

قدرة مطلقة

حكم مطلق

لأنه لو حد عنده قدرة المعارضة فدي نقيصة لا تصح بها الربوبية

والارواح دي هتبقى كلها آلهة

وحاجة تانية طيب اشمعنى كمان هي بس اللي تكون اله

طيب ايه اللي زانقهم على اللي هما فيه

وبعدين احنا فينا الشرير والطيب

يعني الارواح دي مختلفة

واحنا مشفناش اختلال

يبقى كمان نقطة مهمة

موضوع التأله ده في مشكلة

اشمعنى الأرواح بس بتبقى آله

ومشفنهاش ليه في حاجات تانية

وحاجة اخيرة

بخصوص الطوائف الدينية

مش معنى انك دكتور يعني انك مثقف او فاهم كويس او عندك قدرات عالية في التفكير المنطقي

والا كان الاطبا مثلا هم العباقرة ولكن كل يوم يفجئنا واحد في تخصص مختلف بحاجة تنغير تفكير الارض

طيب ده معناه ان الناس الغلابة حتى عندنا من السهل اقناعهم بفكرة يكونوا متشددين ليها

والسؤال هنا كام مسلم بيبغير ويروح ديانة تانية

وكام غير مسلم بيروح للاسلام

لما تحسبوها هتعرفوا اجابة سؤال هو احنا صح ولا همه

ومتانسوش ان من اشد اعداء الاسلام من تحول لكن مشفناش من اشد المسلمين تحول للهندوسية مثلا

تم تعديل 16 ديسمبر 2009 بواسطة justme

[Abu Reem]

الجميع ما شاء الله بيقول أنه قرأ وتمحص ، طيب الديانات الثانية...حد فيهم قرأ تفسير القرأن ...,وايه ياترى الذي لم يجده مقنعاً

هناك فارق كبير بين أن تقرأ القرآن أو تفسيره وانت مقتنع بأنه كتاب سماوي من عند الله وبين أن تقرأه وأنت مقتنع أنه كلام بشري وأن الإسلام دين "مفبرك"

خلال نقاشي مع صاحبي الملحد كان مقتنعا طبعا أن الإسلام ليس دينا سماويا وأن القرآن مختلق ... وحاول أن يأتي بأدلة كثيرة من القرآن تثبت "التناقض" الموجود فيه على حد قوله... بمعنى أنه لابد أنه قرأ القرآن وتمعن فيه بهدف إثبات التناقض الذي يدعيه ... إذا فليس كل من سيقرأ القرآن سيقتنع به بدليل أنه تمت دراسته بواسطة آلاف المستشرقين ولم يؤمنوا به.

محدش يقدر يقول انه من المفروض ان تؤمن الناس أو تقتنع بكتاب سماوي معين ، وبالطبع أنا لما ذكرت المثال أعلاه أعلم انه من المفروض أن من سيقوم بالبحث عن الحقيقة لابد ان يقرأ ويطلع ويبحث في الكتب والشرائع والتفاسير المختلفة على الأقل لأكثر الديانات شيوعا وهي الاسلام والمسيحية واليهودية

وبالتالي عندما سيقرأ مثلا عن الاسلام لابد ان يقرأ بدايةً وهو على الحياد ( يعني لا مع ولا ضد ) وبعد ان يقرأ ويبحث ويقارن ويفكر بالتأكيد ستتولد عنده فكرة عن هذا الدين سواء ايجابية او سلبية أو تظل فكرة محايدة .

أما المستشرقين فلا يمكن القياس عليهم لأنهم كانوا يبحثون ويدرسون بهدف إثبات ان القرأن ليس من الله ولكنه من البشر ، وبالتالي هم بحثوا الأمر من البداية ولهم هدف وقناعة معينة ...وبالتالي عنصر الحياد غير موجود...إذن فأهدافهم مشبوهه والقياس عليهم غير سليم.

لذلك لابد ان يكون الكلام عن عامة الناس وبعد ذلك ليس من الضروري اقتناع الجميع ...المهم هو هل تحركت بداخلهم تساؤلات ، هل شعروا بداخلهم بإرتياح لما قرأوه ، هل شعروا بأن ما قرأوه هو الأقرب والأفضل أكثر مما هو موجود في الديانات الأخرى التي تم المقارنة معها .....يعني ليس بالضرورة أن يكون الديانة (أ ) هي الأفضل إذن الديانة ( ب) ،( ج) هم الأسوأ ..أو هم ديانات خاطئة ومزيفة تماما ..بل الذي يهم هنا هو أنه عندما اقارن قد أجد الثلاثة أديان جيدة ولكن أحدهم الأكثر ملائمة للبشرية والأكثر شمولا والأقل تضارب او الأقل في التناقض.