أكتبها في السيرة الذاتية ولا لا

[عماد حمدي]

انا بصراحة محتار جدا وعايز أخد رأيكم

هل أكتب في السي في اني كنت موجود في السعودية قبل كدا ولا لا ؟؟ خاصة انها فتره صغيرة 7 او 8 شهور

طيب لو كتبتها وسألوني انته نزلت تاني مصر لية ؟؟ أقولهم اية ؟؟

هل اقول الحقيقة ان الكفيل ابن ترابتاتي تيتيت ولا فيه إجابة محدده تتقال ؟؟

طيب وبعدين انتم شايفين اني لو كتبتها تكون نقطة في صالحي ولا لأ ؟؟

معلشي حيران اوي

تم تعديل 16 ديسمبر 2009 بواسطة EMAD HAMDY

[عماد حمدي]

للرفع

[doha]

رايي الخاص .. متجيبش سيرة نهائيا ..

فترة ثمان شهور ولا حتى سنة مش الخبرة الكبيرة الي تخليك تغامر وتحطها في السي في وتعرض نفسك انه يسالك وليه تركت العمل فتسرد قصتك بالكامل والي مهما كنت متحيز لنفسك فيها ومهما كنت متصور ان الطرف الآخر هيتعاطف معاك لما يسمعها الا انها تحذير قوي لاي صاحب عمل يوظفك مستقبلا من انه ممكن يكون مكان كفيلك السابق وياخذ العلقة اياها ..

من الاساسيات الي كانوا بيدرسوها لنا زمان ان لو بتمضي اوقات قصيرة في عملك وتتركه وتشوف غيره فمتكتبش المدد في السي في نهائيا لان دي مؤشر قوي انك من النوع الي مش بيتمسك بشغله وبالتالي فصاحب العمل الجديد ممكن يتخوف من تعيينك على اساس انك هتتعين النهرده وتسيبه بعد بكرا فمابالك لو القصة منتهية بخناقة وتسفير وماشابه ..

بقترح انك تضم فترة الخبرة دي لخبرتك في مصر لو عندك سنة خبرة في مصر قوله سنة وثمان شهور وكفى الله المؤمنين القتال ..

[عماد حمدي]

دايما كدا يا Doha بتحرجينا بذوئك ميرسي علي ردك

ومنتظر باقي الأراء

بس هل ممكن صاحب العمل الجديد يعرف انه انا كنت موجود قبل كدة في السعودية ؟؟ مثلا لما يجي يطلعلي الإقامة او أكدة ولا مش هتبان ؟ لاني خايف اني اخبي عليهم هنا ولقدر الله يعرفوا لما أسافر يبقي منظري ميكي ماوس خالص

شكرا

تم تعديل 18 ديسمبر 2009 بواسطة EMAD HAMDY

[MZohairy]

بكل تأكيد لأ

[doha]

دايما كدا يا Doha بتحرجينا بذوئك ميرسي علي ردك

ومنتظر باقي الأراء

بس هل ممكن صاحب العمل الجديد يعرف انه انا كنت موجود قبل كدة في السعودية ؟؟ مثلا لما يجي يطلعلي الإقامة او أكدة ولا مش هتبان ؟ لاني خايف اني اخبي عليهم هنا ولقدر الله يعرفوا لما أسافر يبقي منظري ميكي ماوس خالص

شكرا

فرق انك تخبي عليهم وفرق انك متقولش ..

يعني ان سالوك جيت قبل كده حاول تهرب من الاجابة بطريقة دبلوماسية .. وده يكون انك ترد على السؤال بسؤال تاني .. زي مثلا تفرق في ايه هو الي سافر قبل كده اكفأ مثلا ؟ طيب ايه رايكم اني اعرف واحد .. الخ وتفتح قصة تتوه الموضوع ..

اما لو الحوا في السؤال وزنقوك قول ايوه سافرت بس متعتبرش سفرة .. قول انك من البداية كنت طالع تستطلع الوضع ايه وانك جاي وعارف انها شغله مؤقته وخلصت وقتها ورجعت .. وقول برضه انك مش حاططها في السي في لان ملهاش اهمية اوي كخبرة بمفردها وانما الي يهم اجمالي خبرتك ايه .. يعني متبقاش زي الي على راسه بطحه وتحسسهم انك مخبيها قصد وانما عادي ..

ده اذا سألوك اصلا ..

وغالبا لا هيسألوا ولا يعبروا الا لو انت اديتهم انطباع انك عامل عمله .. اصل ده مش زواج وانت سبق لك فيه سوابق ومينفعش تخبي ده عمل وان مجبتش سيرته متفرقش كتير ..

الخلاصة ..

ان حد سالك متكذبش ابدا ولكن حاول تهرب من السؤال وان انزنقت اوي قول الحقيقة وانك تركت الشغل بس رجاء متجيبش الذنب على صاحب العمل ولا على نفسك يعني حاول تكون دبلوماسي لان توقع ان الكفيل الجديد يتصل بالقديم يسال عليك وده اضعف الايمان فمتسبش في الراجل وتطلع نفسك ملاك عشان مينصدمش الجديد لو القديم قاله العكس ..

وان محدش سالك خلاص يبقى هم الي مسالوش

وفي النهايه متكتبش في السي في غير شيء صحيح فعلا اما الي ممكن يسيء لك فمتكذبش ولكن متحطوش من اساسه وحاول متشيرش له في المقابلة الشخصية ..

[عماد حمدي]

شكرا شكرا شكرا علي جهودك معايا وربنا يكرمك يارب

بس معلشي نسيتي بردة تردي علي النقطة دي

هل لو حصل نصيب وسافرت ممكن يعرفوا اني كنت موجود قبل كدا او لا مثلا لما بيجي يطلعوا ليا الاقامة ولا مش هتبان

مهمة اوي النقطة دي بالنسبة ليا

وشكرا مرة تانية

[doha]

شكرا شكرا شكرا علي جهودك معايا وربنا يكرمك يارب

بس معلشي نسيتي بردة تردي علي النقطة دي

هل لو حصل نصيب وسافرت ممكن يعرفوا اني كنت موجود قبل كدا او لا مثلا لما بيجي يطلعوا ليا الاقامة ولا مش هتبان

مهمة اوي النقطة دي بالنسبة ليا

وشكرا مرة تانية

بصراحة معنديش فكرة

الجوازات اكيد بيعرفوا انك كنت هنا قبل كده بس هل الكفيل الجديد لما يجي يرسل لك تاشيرة هيحتك بيهم ويعرف ولا ميعرفش دي برضه مقدرش افتيك فيها ان شاء الله حد يكون عنده فكره ويقولك الخبر اليقين ..

[عماد حمدي]

شكرا ومنتظر رد باقي الأعضاء

[رعد]

السلام عليكم استاذ عماد

السلام عليكم اخواني الاعضاء,

رائي انك تكتبها عادي لانة اكيد هيطلب شهادات الخبرة بتاعتك من تاريخ التخرج حتي يوم التعيين الجديد وبالتالي لما يعرف دلوقت احسن ما يعرف بعدين

دي حاجة

الحاجة التانية انة مش عيب انك تكون خرجت نهائي فدة مش معناه انك وحش لان الطرف التاني هو اللي ممكن يكون وحش او العكس فاهم قصدي؟؟

ودة هيدي للكفيل (الجديد)فرصة انة يفكر شوية في شوية حاجات منها مثلا سيبتة لية؟ تقول لة انت موقفك ووضعك لان لو السبب موجود عندة مش هياخدك وبالتالي انت هتتفادي تكرار المشكلة فاهم قصدي؟

ثانيا هيعرف انك لك خبرة في السفر وطريقة الحياه والمصارييف وبالتالي هيتكلم كلام منطقي في الراتب مش هيقول لك راتب تعبان لشخص لسة جديد ولا كلامي مش منطقي؟؟

والدليل علي كلامي انك مش شرط انك انت الوحش هو:-

لو حدث طلاق بين شخص وزوجتة! هل هذة نهاية العالم للطرفين؟؟

لالالالالالالالالا

كل منهم ممكن يتزوج من جديد ويستمر ولكنة يفكر بمنطقية اكثر وشروط ادق واوضح من المرة الاولي لتفادي المشكلة القديمة صح ولا غلط؟؟

ثانيا هل معني ان الزوجين انفصلا ان المراه سيئة مثلا او الرجل سئ؟؟ لالا كل منهم يحاول تبرير موقفة فاهل الزوج يرون الزوجة سيئة والعكس .... اظن كلامي واضح.

انه يوجد شخص سئ وليس بالضرورة انة انت ولكن طريقة التجميع بين الشخص دة والثاني هي اللتي وجدت المشاكل ولو كمل كل طرف في طريق اخر واناس اخرون سينجح.

وعن تجربة شخصية قلت لكفيلي الحالي في المقابلة الشخصية اني كنت خروج وعودة وساغير جوازي واسافر معك قال لي هتسي القديم لية فشرحت لة بكل موضوعية نقاط الضعف اللي عندة ومش عاجباني قال لي من حقك بس انا فعلا عندي منها نقطتين (( وطبعا مكنش قايل لي عليهم من الاول وانما قالهم لما عرف اني بسيب عشانهم او بيزعلوني )) شفت بقي؟

المهم حاولنا نوصل لحل وسط واتمسك بية لاني عرفت طبيعة البلد وساتجاوب في العمل من تاني يوم بعكس شخص جديد لسة هيروح وكل ما يشوف عربية حلوة يقف يشوف ماركتها اية وكل ما يشوف خيمة سودا يشوف غرابة شكلها والحاجات دي وتعجبة الكبسة ويتصل باهلة عشان يوصف لهم مكوناتها وازاي ان اللحمة والرز بيدخلوا مع بعض في علاقة محدش يقدر يفصلهم والحاجات دي ههههههههههههه

المهم اقصد انت بتكون متعود علي المجتمع وعارف اية اللي هتشوفة في الغربة.

وخللي نيتك دايما الصدق لانة اذا كان الكذب ينجي فالصدق اولي.

وربنا يوفقك ان شاء الله

اخوك م / عادل

[هيشو]

متجيبش سيرتها طبعا

1- لأن ذكر مكان انت روحت فية و سيبتة علي طول وحش ففي السي في بتاعتك حتى لو هما اللي وحشيين و ده وارد و ممكن يسألك سيبتهم لية و لو قولت انهم وحشيين برضو غلط لأن ميستحسنش انك تشتم في مكان قديم كنت فية

2- السعودي بيبقي عاوز واحد اعمي مجاش البلد قبل كدة لكن يخاف من اللي جه قبل كدة و بيعرف انة مدقدق و فاهم نظام البلد فخليه يفتكرك اعمي مش فاهم حاجة

[رعد]

طيب ما هو دة اللي بقولة يا استاذ هيشو

متخليش السعودي يعتبرة اعمي ويسفرة علي وضع سئ لان اللي بيطلب دة بيكون سعودي من الناشئين خلية يلاقي الفرصة المحترمة مع سعودي جامد وعقد محترم وكفيل لا يهتم بالامور النفسية والشخصية الصغيرة دي وللعلم الكفيل اللي واثق من نفسة ومن شركتة ومن وضعة ميهموش ان الشخص هيسيبة ولا لا؟ لانة عارف وضع شغلة ومزاياه ووضع الشغل برة.

يحضرني قصة لصديق من ايام الجامعة يعمل في جدة

وانا بعمل عمرة وبزورة لقيت معاه الاقامة وفي شنطتة جواز سفرة فلما سالتة هو سايبكوا كدة قال لي كفيلي قال لنا اللي مش عاوزني انا همسكة بالقوة لية؟؟

ولاننا في وضع محترم معاه مش هنلاقية برة احنا اللي ما سكين فية.. هذا للعلم وشكرا

اخوك م / عادل

[عماد حمدي]

ثانيا هيعرف انك لك خبرة في السفر وطريقة الحياه والمصارييف وبالتالي هيتكلم كلام منطقي في الراتب مش هيقول لك راتب تعبان لشخص لسة جديد ولا كلامي مش منطقي؟؟

أيو دي بقا النقطة اللي أقصدها بالظبط واللي دفعتني اني أطرح الموضوع دا , بس أغلب الناس هنا بيقولوا لأ فأنا ممكن أوصلة بطريقة أو بأخري أني فاهم وضع البلد وووو ولو سألني انته عرفت منين او سافرت قبل كدة ممكن أقولة انا ليا أصدقاء هناك والنت علية كل حاجة , وبرده لو حسيت انة راجل جينتل كدا وبيفهم هقولة ان الإتفاق اللي اتفقتة في مصر روحت لقيتة اتغير جزئيا ً وكليا فقدمت استقالة ورجعت ... بس برده مش هكتبها !!!

الأخ هيشو بقا

بالنسبة للنقطة الأولي فدي أنا حافظها أوي وعارف تبعيتها ياعني طبعا الكل عارف الكفيف القديم عمل معايا اية بس دائما ً لو عرفم اني جيت قبل كدا همدح فية وهجيب اللوم علي الطرف الثالث وهو المكتب اللي طلعت من عنده ودي حقيقة علي فكرة لانه رسملي حياه وردية خالص

بالنسبة بقا للنقطة التانية فبكل أسف مبعرفش أعمل عبيط وأعمي وشغل المكر ,, كفيلي القديم دائما ً كان يستفزني بكلمة ( أنا أبيك مثل الريموت كنترول أقول يمين تروح يمين شمال تروح شمال ) بالله عليك تقبلها علي نفسك .. أه انا ممكن اللي يقولي عليه اعملة ودا حقة طبعا ً مفيش خلاف بس الطريقة اللي بيطلب بيها بالنسبة ليا تفرق علشان كدة رميتة الفلوس في خلقتة ( سوري ) ورفضت عروضة وسيبتة ونزلت مصر تاني وبينت ليه انه مش فارق معايا ولا سعودية ولا مصر ولا حتي اليابان ..

دا مش تنطيط بس اللي أعرفة انتة كموظف ملزم بواجبات وعلي الوجه الأخر لك حقوق ... مينفعش طول الوقت تدي ومتلاقيش حاجة وتيجي علي مشكلة صغير عملتها ينسي ليك كل الحلو اللي عملتة ويفتكرلك الوحش دا بالظبط ( علاقة الزوج والزوجة ) ...

وشاكر لكل آرائكم وأنا فكر وأخدت القرار وعلي بركة الله مش هكتبها ..

شكرا مرة تانية

[هيشو]

بالتوفيق ياباشا

و اديك سمعت كلامنا و مش هتكتبها