اراكم بخير

[afiona]

ترجعي بالسلامة بعد أجازة لطيفة بإدن الله...

[هشام عبد الوهاب]

اجازة سعيدة وترجعلنا بالسلامة .

[فــيــروز]

اخوانى الحلوين ;) رجعت من سويعات قليله خالص الى القاهره المدخنه المليئه بالعوادم الحبوبه .. ha)

ورغم انى من هواة كتابة اليوميات و الانطباعات عن الرحلات زى ما طلبت فريده بس الحقيقه حاسه انى زى اللى واكل سد الحنك .. :D

ده تالت مره اروح شرم الشيخ .. جمييييييييييييله من هنا للسنه اللى جايه و تزداد جمالا ولكن .. آه من لكن هذه التى تفسد كل جميل :D

سيبونا من ده دلوقت وخلونى اشرئب شويه من الردود الحلوه الجميله دى

الحقيقه .. ساعة اما كتبت الموضوع كنت محرجه شويتين et:( وقلت يمكن الاقى الاعضاء كاسرين ورايا قله و زملائى المشرفين يلموا القلل من سكات عشان مايجرحوش احاسيسى .. :D ويمكن الاقى الناس بتقول بركه يا جامع المركب اللى تودى .. cbyb: بس حسيت بتانيب ضمير وانى ظلمت الناس الحلوين اما دخلت لقيت ردودكم الحلوه دى .. ده موضوع يستحق احتفظ بيه للايام الصعبه .. ;)

[فــيــروز]

سكوربيون

تخيل النهارده بس واحنا مسافرين عرفت طريق الانترنت كافيه فى الفندق كانت فين . :o . ومش بعيد ابدا لو كنت عرفت طريقها من اول يوم كنت بقيت لاجئه فيها . :P . بس قلت احاول ابعد خالص عن كل ما له صله بالتكنولوجيا و الحاسوب عموما :huh:

الاخ اسامه الكباريتى

اكتر حاجه كانت مقلقانى فى الرحله دى موضوع المواصلات .. الحوادث زادت اوى الفتره الاخيره وانا اما باسافر لوحدى مش بابقى قلقانه زى ما بيكون اسرتى مسارفه معايا .. ماليش اوى فى الجمال عشان باخاف من الارتفاعات :D بس النهارده شفت منظر رائع واحنا راجعين فى طريق السويس لا ترى سوى البحر و خلفه الجبل ساعة الغروب وشخص يركب جمل و يعدو به .. منظر فعلا لا يرى سوى فى الافلام او الكروت .. اييييييييييه دنيا .. B)

يمكن اللى هاقوله مالوش علاقه اوى بردك فى الموضوع .. بس وانا فى الفندق كان التليفزيون فيه قنوات فضائيه كتيره .. ولاول مره اسمع بعينى الناس بره العالم العربى بتوصف العرب و المسلمين ازاى .. وكان فيه قناه اظن المانيه مش متاكده بتنقل الاخبار بطريقه لا تعرف شئ اسمه الحياد او حتى الموضوعيه فى نقل الاخبار لدرجة انى كرهت اشوف عليها اى لقطه .. والحقيقه كنت باسال نفسى هما العرب و المسلمين ازاى بيقدروا يتحملوا يسمعوا ده كل يوم ..

استاذنا الافوكاتو :)

هاسمح لنفسى استعير كلمة الاستاذ اخناتون و اقول لك حضرتك زى العسل

الاخ واحد

كنت اليوم بصدد ارسال رساله خاصه لسيادتكم اقول لك فيها انت مخاصمنى ولا ايه :blink: .. ولا بتبعت تهنينى بالعيد ولا اى حاجه .. mfb: ايوه يا سيدى رحت شرم الشيخ مره واحده ويمكن اروح الغردقه ان شاء الله فى شم النسيم :P ماهى هاصت بقى .. عاوز حاجه من هناك؟ بيبعوا هناك كليم جميل اوى عليه رسوم حلوه وانا باحب الكليم جدا .. اشترى لك كليم عليه جمل صغنن؟

[فــيــروز]

لايت هاوس

لو كنت اعرف انك ممكن تيجى والله كنت قلت لك تيجى معانا .. بس انا عارفه ان الرحلات دى تحتاج ترتيب واستعداد .. تعالى معايا رحلة الغردقه لو الشغل عملها فى شم النسيم و نشمو النسيم سوا

استاذنا العزيز رجب

شكرا جزيلا على ذوقك و رقتك .. وكل سنه و انت طيب

استاذنا الجميل اخناتون

من غير حلفان طبعا كنت بافتكرك هناك و افتكر موضوع الفيروز اللى سرقوه اليهود اللى قلت لى عليه :huh: الحقيقه شرم الشيخ كلها تستحق تتسرق :blink: .. على فكره .. فيه قناه ذاعت فيلم الكارتون "Prince of Egypt" اللى بيحكى قصة سيدنا موسى بس من منظور ان اليهود هما اللى بنوا آثارنا !! الفيلم خرافى ورائع جدا .. لكن لفت نظرى ان شخصية رمسيس فى الفيلم كانت لابسه خاتم فيه حجر ازرق اعتقد انه فيروز !! هو ايه الحكايه بالظبط !! اشمعنى ده يعنى اللى شبطانين فيه !!

مش عارفه موضوع الهودج و المرشيدس المزين بالورد ده مقصود بيه اللى فى بالى يعنى B) طبعا لو كنت تقصد يعنى اللى بالى بالك يبقى يؤسفنى و يحز فى نفسى اقول لك ان الموضوع ده محتاج لشخص انتحارى بيقوم بعمليات خاصه ويا ريت كوماندوز عشان يبقوا اهله مستغنيين عنه .. وعلى راى وردة زمانها "احنا فى زمان يا عالم مافيهش معجزاااااااااات" :)

مدام سلوى

رجعت بالسلامه الحمد لله ولم اطق صبرا على الانتظار لغاية بكره عشان آجى ادحرج التماسى mfb: كل سنه و حضرتك بخير و اسرتك الكريمه فى سعاده وسلام

[فــيــروز]

استاذنا داروين mfb:

لسه بتشد فى شعرك !! يعنى مفيش فايده !! :huh:

على العموم بلاش تفتح العيون علينا وخلى موضوع فلوس الاشراف ده فى ال .. فى السكرته B) .. بس على فكره بقى .. لازم و حتما ومن كل بد تعمل كل جهدك تروح شرم كام يوم .. قبل ما يبقى دخولها للمصريين بتاشيره :blink:

هو انا ممكن اسال سؤال بايخ؟ هو حضرتك بره مصر فين بالظبط !! وزى ما بيقولوا فى الافلام الاجنبيه U have the right to remain silent :)

استاذ مكسوف

لا هاختفى اروح فين يا حسره .. رجعت افضفض معاكو احسن طول الرحله هاطق .. شفت ناس كتير فى الشاليهات ناشرين غسيل و اظن هيحتاجوا مشابك للصبح .. خصوصا ان فيه شاليهات كتير بتتبنى وعاوزين احنا ننزل بالبضاعه بتاعتنا قبل المنافسين

حشيش باشا

يا ترى ايه اخبار الطبيخ .. ولقيت وصفه سهله وصفه هايله تعملها وتاكلها انت وشلة المرح اصحابك !!

الحقيقه يا حشيش انا فعلا كان نفسى نروح طيران بس امى بصت لى باستنكار كانى باقول ياللا نروح كازينو الليل نسكر !! اصلها ماركبتش طياره غير عشان تروح تحج بس .. ورغم انها متفتحة التفكير و الحمد لله بس ساعات يبقى لها افكار محتاجه وقت عشان تقتنع ومن ضمنها ركوب الطياره فى رحله داخليه .. بس اظن بعد العلقه اللى اكلناها الرحله دى هيبقى سهل اقناعها باى شئ بعد كده

[فــيــروز]

استاذ مصرى

على ذكر طابع البوسته انا حزينه اوى على طغيان الرسائل الانترنتيه على رسائل البريد الورقيه .. يا ميت خساره على الايام الحلوه

اما بخصوص نصايح حشيش فماتقلقش .. انا عارفه انه بيقول لى اركب تبع فلاش اير عشان مكتبه فى العتبه "حشيش لخدمات التامين" ومكتبه فى السبتيه "حشيشكو للتعويضات" هيقوموا بالواجب و زياده وهو بيحب يخدم ..

عزيزى جدا س.س.

ازيك يا باشا :blink: انا لسه مارحتش اشوف اخبار الباب اللى سبتهولك امانه ايه .. والله موضوع الاكل و الشيل و الحط ده من اسباب الخلاف الدائم بينى وبين ماما فى السفر .. نفسى مره نسافر من غير شنط .. او بشنط اقل ..

على فكره كلمت الجماعه وبيسلموا عليك خالص خالص .. وان شاء الله تنور شرم فى شهر 8 بس هتكون حر اوى .. اذا كانت حر من دلوقت !!

حجر وإنزاح من على قلبي

عقلى الباطن : يا ترى قصده حجر يعنى حجر كريم اكمن انا فيروز ولا قصده حجر من بتوع حشيش !! ولا يمكن قصده طوبه؟

الاخ اسو

ايوه يا سيدى ارزاق !! وممكن تتنهد و تقول : يدى الحلق للى بلا ودان .. او تمصمص شفايفك و تقول : جتنا نيله فى حظنا الهباب .. وانا اقول الرحله مبصوص فيها ولا ايه

فريده الفريده :huh:

ازيك عامله ايه .. والله النهارده كنتى على بالى وقلت اخلينى كويسه واتصل اهنيكى بالعيد و اسال على فرح و اخواتها ..

الاسعار مولعه !! مممممم حسب هى اسعار ايه .. بس لفت نظرى ان اسعار الرحلات زى السفارى و سانت كاترين و غيرها فيها تفاوت كبير بين الشركات وبعضها .. واعتقد ان مشكلتنا كمصريين ان اى شئ هناك بيتم حسابه الاول بالدولار و بعدين يتحول مصرى وطبعا مع ارتفاع سعر الدولار الحاله بتسوء بالنسبه لنا ..

بخصوص الاسماك يا ستى انا بافكر جديا انى اتعلم الغطس حيث ان مالوش علاقه بالعوم و المره الجايه انزل اتفرج على الاسماك وجها لوجه .. عالم آخر لا نملك ازاءه الا ان نقول سبحان الله

هاحاول اكتب يوميات سريعه ان شاء الله واتمنى يكون فيها ايجابيات .. ماتكونش انتقادات وبس

لكن الواحد لسه في قلبه شوية رحمه برضوا .. وانا وفيروز أخترنا شرم الشيخ واعتقد الأفوكاتو اختار جزر الكناري ... ولانسلوت باينه طالع جمصه  وأبن مصر هايخد بدل الأجازة وهايقضيها في البيت .. 

وهشام عبد الوهاب طالع الاستانه و الاستاذ محمد ابو زيد "هو فين صحيح" رايح طوكيو يشارك فى دوره فى الجودو واخيرا الاستاذ عادل ابو زيد هيروح الاسماعيليه يتابع اخبار المانجه ..

بيبو بيبو

الكلام اللى قلته ده عليا انا !! تعالى يا طنط ام فيروز اتفرجى .. ان شالله يخليك يا بيبو يا ذوق

ثالثا أنا ما قصدتش أى حاجة..انا كنت بافكرها بأشهر كلابجى (قصدى كبابجى واسمه أرزاق) هناك علشان لو ليها فى المشويات!!!

ايوه ليا طبعا بس انا باحب الكباب بتاع ابو شقره وفى قول آخر او شفره .. ممكن تعزمنى عند ارزاق يمكن اغير .. انا الايام دى باطبق مبدا بلدى طنطا وانا احب اعيش اونطه

لانسلوت الفارس الاول

ميرسى جدا على كل حاجه mfb:

السيد المبجل افيونه

احب اولا اعبر عن تقديرى لجنابكم بشان موضوع العجه اللى تفضلت بوصفه لحشيش .. اصل انا احب العجه دى جدا واى حاجه لها علاقه بالطعميه وعشان كده عليت فى نظرى يا أونه وقررت اعيد عرضى بشان وظيفة سكرتير اشراف .. والمرتب شقتين طعميه وشقة فول وطاجن بطاطس بيوريه

هشام عبد الوهاب

رجعت اخيرا الحمد لله كل سنه و انت طيب و عيد سعيد

[Lancelot]

حمد لله ع السلامة .... يا رب تكوني قضيتي وقت لطيف .....

اللي يقرأ ردودك يحس إنك غايبة من سنين .... :blink:

بس بجد المنتدي كان مضلم من غيرك .....

[achnaton]

نورت يا فيروزة المنتدى .. وكل وانت طيبة .. والمرة الجاية أقضى أجازتك فى الواحة البحرية او فى الخرجة .. حتسعدى أكثر .. وربنا يسعدك دائما .. شوفتى الناس قد إيه بتحب الفيروز

اخناتون المنيا

[maksoof]

طيب مش كنتى تقولى إنك راجعة النهارده؟ دا أنا كنت حاجز فرقة حسب الله عشان يستقبلوكى و حسب الله شخصيا كان محضر لك مقطوعة موسيقية تليق بمقام المشرفات!

:blink: :huh:

نهايته.. ما حصلش نصيب المرة دى mfb:

و عموما الف حمدلله بالسلامة ys):

[الأفوكاتو]

الأخت العزيزة فيروز

هذه الجملة:

هاسمح لنفسى استعير كلمة الاستاذ اخناتون و اقول لك حضرتك زى العسل

تذكرتى بنكتة نشرتها آخر ساعة فى أيام آخر حكومة لحزب الوفد برئاسة المرحوم النحاس باشا >قبيل الثورة مباشرة, و لاحظوا حرية الصحافة وقتها).

كان الكاريكاتير من رسم الرسام السياسى الشهير صاروخان, يُصور النحاس باشا موضوعا فى قدرة كبيرة, موضوعة فوق نار مشتعلة, و يقف حولها أفراد من "قبائل نيام نيام" آكلى لحوم البشر.

و أسفل الكاريكاتير, يقول النحاس باشا متزلفا لطباخيه:

إذا كان حبيبك عسل.... ما تلحسوث كله,

ثم يكون رد رئيس القبيلة :

ده انت ملحوس خلقة.

فهل كان هذا فى مخيلتك أنت و الأخ العزيز إخناتون عندما عندما وصفتمونى بأنى زى عسل؟

taz:: taz:: taz::

[achnaton]

صباح الخير يا أستاذنا ..

صاروخان كان بيقصد مجاهل افريقيا السوداء .. حيث كان آكلى لحوم البشر .. وحيث العسل بلونهم .. أسود ..

أما نحن فتقصد " العسل الأبيض " .... وهنـننننننننننننننننننننننناك فرق

كل سنة وانت زايد حلاوة

اخناتون :blink:

تم تعديل 30 يناير 2004 بواسطة achnaton

[الأفوكاتو]

كل سنة , انت طيب, يا أخى إخناتون المنيا, و ألمانيا إن أمكن.

هل تتذكر أيام المظاهرات التى كانت تخرج من المدارس الثانوية أيام الملك؟ و التى كانت تذهب الى المدارس الإبتدائي, و تشجعهم على الإنضمام ال المظاهرات؟ ثم التوجه الى قصر عابدين للعن أبو خاش الملك؟

و رغم الهتافات التى لم يكن لها معنى,و التى منها :

مصر و السودان لنا..... و أمريكا إن أمكنا

و الهتافات التى كان لها معنى, مثل:

أين الغذاء....

أين الكساء...

يا ملك النساء....

فقد كان الشعور الوطنى جارفا, و كان عشق مصر يظهر بوضوح على أوجه الشباب المتظاهر, و كثيرا ما رفض البوليس فض المظاهرات, أو الإعتداء على الطلبة, إلا فى حالات نادرة.

لكن, كان من حق المواطن أن يفتح فمه, و اليوم يتناول طعامه من خلال إنفه.

ما تيجى نعملك ديكتاتور طيب متسامح زى فراعنة زمان؟ :blink: :huh: mfb:

[فــيــروز]

لانس

الحمد لله قضيت وقت لطيف ماقدرش انكر B)

بس كان ممكن يبقى الطف طبعا لولا الكوسه التى تستشرى فى مصر المحروسه كالنار فى الهشيم :P يطلع ايه الهشيم ده؟ يقرب للغشيم؟ :P

مش عارفه هو انا كنت غايبه من سنين ولا ايه بس حاسه ان فيه حاجات كتيره اوى فى المنتدى عاوزه اقراها و ارد عليها و اشارك بحماس عشان انسى الايام اللى فاتت لانى تقريبا ماكنتش قادره انطق او اعبر عن ضيقى مما يحدث عشان خاطر ماما .. :)

ان شاء الله يفضل المنتدى منور بالناس الحلوه اللى فيه يا رب :P

استاذنا الجميل اخناتون :o

الحقيقه حضرتك بتقرا افكارى :o .. انا والله نفسى جدا اروح الواحات بس المشكله فى الاقامه هناك !! وكمان تقريبا محدش بيفكر يعمل رحلات سياحيه الى هناك ولو ان نفسى جدا اروح .. بس حيث ان حضرتك بتقول هاسعد اكتر ان شاء الله اروح فعلا واكيد هتبقى رحلة العمر .. كل سنه و حضرتك طيب .. يا ترى ذبح الخرفان فى المانيا سهل ولا محتاج تصاريح وخلافه؟ :huh:

مكسوف بيه "باعتبار انك هتبقى بيزنس مان كبير بعد بيع المشابك" B)

كنت فاكره انى هارجع يوم الجمعه بس عرفت ان الرجوع يوم الخميس قلت اعملهالكو مفاجاه .. انا كان نفسى جدا الريس حسب الله يسمعنا مقطوعة نازله السلالم يا ماشالله عليها فيروز هانم والشنط فى ايديها mfb: :blink: .. المره الجايه بقى ان شاء الله

استاذنا الافوكاتو :D

النكته دى جباره .. مش ممكن والله يا ميت خساره على حرية الصحافه ونزاهتها

اللى كان فى مخيلتى ان حضرتك زى العسل زى ما قال استاذ اخناتون بالظبط :) حاجه حلوه و جميله وغاليه كمان

[achnaton]

بداية .. سامحينا يا فيروزة المنتدى .. نتبحح شويه فى توبك خاص بك .. وكأننا عندك فى قعده بنشرب شاى .. أو شربات بالعسل بالأبيض .. ممكن برضـــه :huh:

فكرتنى بأيام زمان يا أخى يا افوكاتو المنتدى والله .. لما نجحت فى الإبتدائية واخدت لقب افندى رسميا .. اراد والدى أن يكافأنى .. فوافق على إشتراكى فى رحلة لعاصمة المحروسة .. وهناك نزلنا كل 12 فى غرفة فى لوكاندة فى كلوت بيه .. والأشقياء منا .. وانا منهم طبعا طقت فى دماغنا نركب ترام 4 .. شعلقه فى آخر عربية .. لغاية ما وصلنا قرب ميدان عابدين ونزلنا نتفرج على القصر .. وكان معايا كاميرا بوكس بتاعة جدى الله يرحمه .. وعامل بها " فركيكو " .. وانا بأصور القصر من الميدان .. وهوبلا .. إيد ضخمه على كتفى .. ونزلت لتحت شويه وشالتنى .. وجرى على باب القصر .. الجمل بما حمل .. الكاميرا وانا .. لأنه كانت حاطط عينه فقط على الكاميرا .. وانت جاى تصور مولانا .. مين اللى باعتك .. ومن مكتب لمكتب .. واشرب حاجة ساقعة لغاية ما المدرس المشرف وصل .. ووضح الأمور .. وخدنى على اللوكاندة .. أنا أكتشفت بعدها بأسبوع أن الفلم اللى جوا الكاميرا محروق .. !! عرضوه فى القصر للضوء .. المهم بعد سنوات .. خرجت اتفرج على نفس المكان .. وهو مملوء بالشباب .. يهتفون بالهتافات التى جاءت بمداخلتك

ولما بدأوا يطالبوه بالمغادرة الى أنقره .. " الى أنقره ياابن ........" إشتغلت خراطيم المطافى .. وخرزان العساكر اللى كانو لابسين شورتات كاكى .. كان إسمهم إيه ؟؟

أنا معنديش مانع .. اقبل وظيفة الدكتاتور المتسامح لسبب واحد .. حتى أتمكن من إصدار توجيهاتى بمنع تداول " العسل الأبيض " .. وشوف بقى مين حيسأل عنك ..!!

مع حبى

أخناتون المنيا

:blink:

[فــيــروز]

حضرتك تنور طبعا

الحقيقه الحوار بينك وبين الافوكاتو ممتع جدا

والشاى و القهوه و العناب موجودين

خسارة الصور اللى كانت فى الكاميرا مش كان ممكن تفرجهالنا؟

[الأفوكاتو]

الأخت العزيزة فيروز,

ألف حمد الله بسلامة العودة, و نحمد الله أن الطريق كان سالما.

و أنا فى أشد الأمتنان لكلماتك الرقيقة, و إتاحة الفرصة لى و لأخى العزيز إخناتوت, لتذكر أيام زمان, و نجتر ذكريات جميلة, قضى عليها غباء و جبروت أباطرة العصر الحديث.

عزيزى إخناتون, كان العسكر الذين يرتدون الشورت الأصفر هم من كانوا يسمون

" بلوكات النظام"

كما كان هنا نوع آخر من العسكر, يرتدون ملابس غريبة, وطاسات, و يتمركزون حول الأماكن الهامة فى المدن, أثناء فترة الحرب العالمية الثانية, و يحرسون المخابئ العامة, و كان يُطلق عليهم إسم:

" الجيش المرابط"

و رغم أن من يسمع هذه الأشياء يعتقد أن الحكم كان عسكريا, و فى الواقع, لقد عاصرنا ديمقراطية لم ترى مصر مثلها منذ قيام " خيبة يوليو"

كل عام و أنتم بخير, و أتمنى أن تعود الأيام الحلوة, أيام الرخاءو و الرفاهية و الإستقامة.

[achnaton]

كلك ذوق يا فيروزة المنتدى ..

والنهاردة فى جريدة الوفد فيه تقرير عن رحلة الواحات ..

http://www.alwafd.org/front/detail.php?id=...22&cat=articles

والحقيقة .. هو مبالغ شوية أو حظهم كده مع الجو يومها .. ولكن وصدقينى لقد كنا هناك فى يناير من سنتين .. لم نقابل آى مشاكل إطلاقا .. والفنادق هناك ليست بكثيرة هناك حوالى خمسة .. أفضلها بتاع واحد أسمه " بيتر " يتكلم العربية بطلاقه .. واسعاره مناسبه .. وافضل حاجة تعميلها .. إنك تجمعى عشرة أفراد مثلا وتعملى زيى .. اطلبى من شركة سياحة محترمة ومعروفة تعد لك الرحلة .. وحتلاقى إنك حترتاحى فى الرحلة وعند بيتر ده .. ممكن تطلبى منه يعد لكم برامج يومية بسيارات 4x4 رحلات فى الصحراء المجاورة .. وعندما قمنا بالرحلة اتفقنا مع شركة الكرنك للسياحة وهى احد شركات مصر للطيران وقضيما 6 أيام من القاهرة الى البحرية ليلتين ومنها الى الفرافرة ونمنا فى الواحدة الداخلة ليله ومنها الى الخارجة ليلتين ومن هناك الى الأقصر والطريق جميل جدا ومريح جدا .. والناس فى كل مكان معاملتهم مريحة جدا ..

مع تمنياتى الطيبه ..

اخناتون المنيا

[bibo]

الاخت فيروز

حمد لله على السلامه وكل عام وانتم بخير

الكلام اللى قلته ده عليا انا !!

فى الحقيقه الكلام ده اقل مما تستحقيه

ودى مش مجامله .........انا متابع للمنتدى من زمان جدا (من قبل اشتراك حضرتك فيه)

(مع انى لم اشترك كعضو الا من فتره قصيره جدا)

وصدقينى يا فيروز بمنتهى الامانه لم اصادف مطلقا من الاعضاء مثلك من نواحى محدده هى:

الاهتمام بالرد على الجميع..........الجميع بدون استثناء والتعامل مع الجميع بمنتهى الادب

والذوق والمجامله وعدم التعرض لاحد بالتهكم او الدخول فى منازعات (خناقات يعنى) ك

كما يحدث احيانا او تجاهل احد او السخريه منه

والمبادره بافتراض حسن النيه فى الجميع ولذلك فليس غريبا ان تجدى هذه الكميه من الردود

والاهتمام بسفرك وعودتك ولو لفتره قصيره من معظم الاعضاء قديمهم وجديدهم

وربنا يديم المعروف ويجعله عامر

[فــيــروز]

استاذنا العزيز اخناتون المنيا

خلاص على بركة الله :)

لو قدرت اطلع اجازه تانيه قبل نهاية الشتاء ساحاول باذن الله ان تكون الى الواحات .. الحقيقه عندى امل اروح مكان هادى صامت وبعيد نوعا ما عن الحياه المدنيه التى نعيشها .. صحراء يعنى من الآخر كده .. نفسى جدا اعيش فى الصحرا كام يوم .. شكرا جزيلا على التشجيع ده .. هو ده الكلام :)

الاخ بيبو

الله يسلمك :)

اول مره اعرف انك متابع المنتدى من زمان كده :D !! عجايب :blink:

شكرا جزيلا على اطرائك الذى ارجو ان اكون مستحقه له

حقيقى كلامك يعنى مش عارفه اقول ايه بس .. شكرا جدا وكما قلت : ربنا يديم المعروف

"قلت لهم عاوزين ايموشن لواحد مكسوف وبردو ماعملوش :blink: