إلحقوني يا اسيادي مش عارف أذاكر لولادي

[se_ Elsyed]

ياااااااااه

يييييييييه

يووووووووووووه

ده الموضوع عويص وواعر جوي يابوي

بجد كنت فاكر العملية سهله ... لكن رجلنا جت في الخيه واللي كان كان ...

فها نحن ذا دخلنا مرحلة المطبات الصعبة في التعليم بالمدارس الانترناشونال ..

كنت بأحسب العملية شوية انجليزي على حصيلة كلمات .. وأهي أتعشت والعملية تمشي

الحج عمر أفندي إبننا وصل سنة تالته أبتدائي ... ولحد السنة اللي فاتت ما كانش بيقدر يبمبك معايا في الانجليزي بالذات ...

السنة دي بقى عملت عملية انسحاب تكتيكي وبقيت كل ما أشوفه ماشي في حته في الشقه .. اعمل نفسي مش واخد بالي وأمشي من شارع تاني عشان عيني ما تجيش في عينه ... أو يتحداني ويراهنني على تسميع كلمات أنجليزي زي ما كنت باعمل فيه لحد السنة اللي فاتت وكنت بأكسبه وبأشطب على مصروفه .... فخوفت يخلص فيه السنة دي ويفلسني ؟؟؟

الغريب بقى مش في أنا .. فانا مشغول ودماغي فيها مليون حاجه ومنها مذاكرة الماجستير .. المشكلة في الجوهرة المصونه ... واللؤلؤه المكنونة ... حرمنا هانم أفندم .. فهي في الأنجليزي والألماني ما شاء الله عليها ...

لكن بعيد عنكم .. جالها هوسهوس وبقت تمشي تكلم نفسها ........ وساعات بألاحظها بتقف تنظم المرور في الصالة ..

أنا باتكلم جد ..

ما بقتش قادرة على المذاكرة لعُمر لصعوبة المنهج ...

وكله كوم ... والساينس والسوشيل كوم تاني

الست يا عيني كانت ثانوي أدبي ودخلت تربية أنجليزي وألماني ... فملعوماتها عن المصطلحات العلمية بسيطة برضوا مع دراستها لشعر وأدب انجليزي وحركات ...

فلقيتها من كام يوم جايه بتوريني كام درس ساينس ( علوم بلغة العرب ) بصراحه ... أنا حسيت إني ما درستش حاجه في كتاب المطالعة الرشيدة

يا نهار مش فايت

الجهاز الهضمي والدورة الدموية ونمو النبات وانواع الغابات و و و و و و الخ ...

يوووووووووووووووه

وكتاب الله لحد دلوقت ما أعرف معاني الحاجات دي

أولاً : أنا ما درستهاش طبعاً في ثانوي .. حتى لو كنت علمي .. صباح الخير يا مصر .. ما هي دراستنا كانت بالعربي ..

ثانياً : تخيلوا إن احنا في الجامعه درسنا انجليزي سنتين بس وكانت في منتهى التفاهه ....

وبعد كده اتوقف نمونا

اللهم الا من شوية أجتهاد ذاتي .. انا الحمد لله محب للغات المتاحه واللي بأحتاجها في العمل ... فتعمقت في دراسة الأنجليزي والاهم من ذلك هو التطبيق اللي فرق كتير معايا

وتعتبر اللغه الانجليزية هي اللغة الاولى هنا في الخليج

لكن تظل لغة التعامل بعيده كل البُعد عن المصطلحات المتعمقة في مادة ما ...

أنا بقى زي أي راجل ... بصراحه ...

بينفض ويكبر

يعني رامي موضوع المذاكرة على المودام .. ويادوب بأشتغل مشرف اجتماعي وممول وأب روحي للجميع .. أرعاهم وأشملهم بحناني وحبي ودمي ودموعي وأبتساماتي ...

من الاخر .. مش فاضي لوجع القلب ...

لكن شئت أم أبيت .. وقع من قرعتي مذاكرة اللغة الفرنسية للأولاد عُمر وعلي ...

وبرضوا جينا لمفترق الطرق

يا جدعان أنا مخلص ثانوي سنة 89 ..... وهما 3 سنين عُمي درست فيهم فرنساوي .. واللغة الفرنسية لغه غبيه أساساً وعامله زي السبرتو .. ولو ما كانتش تراجعها على طول .. يبقى مش هاتلاقي حاجه في القزازة ..

بصراحة مش زي الأنجليزي اللي محاصرك في كل مكان .. ولو إنت كفتجي لازم بتلقط كلمتين انجليزي من هنا ولا هناك ...

جيت بقى .. السنة دي لقيت الموضوع دخل في الغميق .. فلا بقيت عارف معاني كلمات كتيره ...ولا كمان طريقة النطق السليمة ...

بس بيني وبينكم أنشكحت لما بقيتهم في كتاب الفرنساوي عاملين حساب الغلابه اللي عاوزين ياكلوا عيش زي حالاتي .. وبقوا في دروس كتير قوي يكتبوا معاني الكلمات الفرنسية دي بالأنجليزي ..

قلت الحمد لله .. يا رب يا بتاع الغلابه

وانا عندي مبدأ بصراحه وهو رفض مبدأ الدروس الخصوصية والكلام الفاضي ده في مثل هذه السنة المبكرة ..

وكنت مستغرب أو مش انا

أخواتي في مصر مستغربين وبيقولوا : معقوله ؟

إبنك وصل لسنة تالته وما بياخدش دروس ؟

يا حلاوه !!!!!!!!!!!!

والله العظيم كنت من أيام في مصر ولقيت بنت أخويا في سنة 4 بتاخد درسين في مادة الرياضيات .. الحساب يعني ...... درسين عند أستاذين مختلفين

إيه المسخره دي ؟

الطفل يشغل دماغه أمتى ويذاكر امتى ويلعب امتى وينام أمتى ؟

ولما يبدأ ياخد دروس من دلوقت .. يبقى لما يوصل ثانوي يعمل أيه .؟

اي نجيب حد دوبلير ندخله الامتحان بداله

أعلم تماماً إن مثل تلك المناهج التي اخترناها لاولادنا هي تحدي

وتحدي كبير كمان

لكن ربنا يعيننا

وأعمل تماماً إن مافيش حاجه أسمها

اهو انا عملت اللي عليه ودخلت الواد مدرسة بالشيء الفلاني ... وكتر خير الدنيا

عفواً

هذا منتهى الفشل

فدور الأُسرة والبيت لا يقل عن دور المدرسة

خصوصاً في تلك المرحلة الحرجة وهي مرحلة الأبتدائي والأعدادي

اما في ثانوي وحيث ان المناهج بتبقى أكثر تخصصاً .. فمش مطلوب من الأب والأم إنهم يعرفوا هندسة فراغيه ولا حساب مثلثات .. إلخ

لكن على الاقل يكون للأب والام تواجد بجانب أطفالهم يوجهوهم يشرحوا لهم حاجه .. كده يعني

ولنا عوده وسمعونا صلاة النبي

[ذهبية]

تصدق بالله يا سى السيد انا لسة شدة شعرى و بيتهايلى الجيران سامعينى صوتى من الصبح بسبب مذاكرة العيال

الاحلى بقى يا سى السيد انى لما بنكسف كدة من نفسى و اتصل بجيرانى اللى هما كمان اصدقائى

وابقى مكسوفة و انا باقول لهم طبعا سامعينى صوتى لانى باذاكر للعيال يردوا يقولوا و حياتك ما سامعين حاجة لاننا فى ذات الوقت

احنا كمان بنضرخ علشان كدة محدش سامع حد :sad:

نهيك بقى على الصبيان و موتهم فى لعب الكورة وكل خمس دقايق ما يكملوها على بعض الا لما الاقى الكورة تنزل و هاتك يا لعب لما يشوفنى اجى يجروا و يعملوا نفسهم بيذاكروا

سالتهم بقى لية كدة انت مش فى شهادة لانى ابنى فى 6 ابتدائى رد عليا رد احرجنى بجد و معرفتش ارد علية

قالى يعنى العب امتى هو مش من حقى العب طول النهار مذاكرة وواجب و دروس مش عارف العب يا نااااااااااااااااس

اعذرة و الله و اسيبة بمجرد ما امسك الكتب و اشوف حجم التعقيدات و المناهج ارجع تانى اصوووووووووووت و اقول لعب اية و هباب ايةةةةةةةةةةةة

وهكذا يا سى السيد

انا ولادى فى اللغات و بنذاكر طبعا السينس و لا كلية طب و طبعا اضطريت انى اذاكر انا الاول و بعدين اذاكر للعيال وكذلك الانجليزى

و باجيب حضرتك كل الكتب الخارجية و مذاكرات المدرسين واطلع على الاسئلة بتيجى ازاى علشان اعرف الاجزاء المهمة الى فيها لعب

و ذكاء

و طبعا باستعين بالانسر علشان اعرف الاجابات النموذجية و فعلا الكتب الخارجية كويسة جدااااااااو بيكون معها سى دى علشان طريقة النطق بالذات فى الجهاز الهضمى و القلب وجميع اجزاء الجسم وفعلا فدنى جدا السى دى الى مع الكتاب الخارجى فى طريقة نطق الاعضاء زى البلعوم و المرىء و الباقى

يعنى حضرتك بتعمل نفسك بتذاكر للعيال لكن الحقيقة احنا الى بنذاكر

مع انى بادى دروس بالشىء الفلانى لكن لازم البيت المدرس الخصوصى دة للتهديد بس علشان يقعد و يفتح الكتاب

وادى احنا و هما فى دوامة ما بتنتهىىىى

[أسد]

بصره..

إبني كمان في السنة الثالثة ..

وعاديك ..

لكن أنا كما تعلم ..

مليش دعوة بالحاجات دي .. أنا بالكتير أقدر أشوفهم ..

من حسن حظي إني معنديش وقت إطلاقاً ..

لكن في بعض الأوقات .. يختلف الولد مع أمه على تفسير أحد النقاط .. وفي تلك اللحظة قد يحتاجون إلى قرار تحكيمي ..

الحمد لله .. الأوضاع تحت السيطرة حتى الآن .. زوجتي حسب علمي كانت شاطرة (دحيحة) أيام الدراسة .. فبالتالي .. عندها استعداد إنها تتابع بشكل كويس حتى الآن ..

وأراها تحضر الدروس قبل مذاكرتها للباشا ..

فيه حاجة تانية كمان بتعملها زوجتي .. وهي فكرة أراها ممتازة جداً ... أنها بتشتري نسخة كتب مستعملة .. محلول فيها كل التمارين والأسئلة .. وبتنشن على حد شاطر تشتري منه الكتب دي .. وبالتالي .. فيكون عندها مرجع مؤكد للإجابات الصحيحة ..

هذا غير النسخة اللي بتكون مع ابني في المدرسة ..

لكن أعتقد مع تقدم مراحل التعليم .. وحسب المقدمات التي أراها الآن في المناهج .. أعتقد أن القادم سيكونصعب جداً ..

امبارح كنت باشوف الأخبار .. وكان فيه خبر عن قمة كوبنهاجن .. قعد يتكلم معي في الموضوع ومسألة ارتفاع درجة حرارة الأرض وأسبابها ... الخ ..

اتضح انهم بيدرسوا الكلام ده في العلوم ..

[sarmar]

نتم ياجماعة الخير من كلامكم حاسس انكم عايشين معايا وبتشوفوا كل اللى بيحصل فى بيتى

بس انا كنت مكبر دماغى وكان تسكن بجوارنا بالرياض سيدة محترمة جدا وتعطى دروس خصوصية للبنات وكانت الشهادة للة كانت ممتازة ودة كان باين من مستوى بنتى لانى كنت انا اولال اللى عليا مهمة التدريس بالبيت وكنت اشرح لبنتى الدرس وتانى يوم اسألها او اراجع معاها اذا نطقت الحيطة هيا تنطق

طبعا كنت بتعصب عليها واعنفها بشدة والموضوع دة كان مضايقنى جدا وشاغل بالى يعنى تعب بالبيت ومافيش فايدة الى ان نصحنى احد الاقارب بان يقوم حد تانى بعمل المذاكرة هذة وربنا وفقنا الى هذة السيدة الفاضلة اللة يمسيها بكل خير واصبحت بنتى من الحضيض لقمم الهملايا ومشاركة وخطابات تفوق وشكر من المدرسة وحاجات ممتازة

هذا العام فوجئنا ان هذة الاستاذة انتقلت بعيد عننا جدا وصعب انى اقوم بتوصيل البنت ليها كل يوم مرتين وكان من الطبيعى انى اعود مرة اخرى لتادية واجبات التدريس الى بنتى بس اقتصرت المواد معى الى الرياضيات والعلوم والست والدتها تعطيها باقى المواد بس الى الان والامور ماشية كويسة وحاسس ان الفضل ختى هذة اللحظة يرجع الى الله سبحانة وتعالى ثم الى السيدة التى تركتنا ونقلت بعيد عننا لان تاثيرها فى مدى استيعاب البنت اختلف كثير عن االاول والله اسال ان يوفق جميع ابناؤنا وينجحهم

[HanaaOsama]

انا بنتي داخله kg1 السنه الي جايه ان شاء الله و كنت هدخلها انترناشونال او لغات

بعد الموضوع ده بفكر بلاش wst::

ولا ايه رأيكم

[hOuSsAm]

انا بنتي داخله kg1 السنه الي جايه ان شاء الله و كنت هدخلها انترناشونال او لغات

بعد الموضوع ده بفكر بلاش wst::

ولا ايه رأيكم

الله يستر عرضك بلاش

دخليها انترناشونال

متخليهاش تتعذب زى مجيلى بيتعذب على ميلاقى شغلانة معقولة

دلوقتى والمستقبل محتاجين ناس تكون ليها مهارات معينة يادوب يعرفوا يلحقوها فى مدارس الانترناشونال

انا يفندم خريج 2006 والحمد لله من اول يوم اتخرجت فيه بشتغل ولكن من يوم ماتخرجت لحد النهاردة وانا مداوم عالمذاكرة عشان اعرف احط ليا مكان فى سوق العمل بجد من يوم متخرجت وانا بذاكر فى حجات المفروض الناس بتوع الجامعة الامريكية والالمانية درسوها من زمان ولو عايزين يطوروا بيذاكروا حجات اعلى

يعنى هما متقدمين عليا باربع سنين عالاقل

عشان كدة بنصح اى حد يستثمر فى ولاده عشان ميعانوش المعاناة اللى بنعانيها دلوقتى ويعالم ايامهم هتبقى عاملة ازاى

[om marawan]

ولنا عوده وسمعونا صلاة النبي

اللهم صلى وسلم وبارك عليه

كان ياما كان زمان واحنا صغيرين حاجة غريبة زى الاساطير

قااااال كنا بنذاكر لوحدنا !!!!

مع ان والدتى تربية وتعليم

لكن ده كان مبدأها

نذاكر لوحدنا وتتابع هى معانا ومع المدرسين

لكن نقعد ونشرح ونسأل ...دى فكرة مش واردة

والحمد لله كلنا جبنا مجايع عالية وكنا دايما متفوقين

طبعا الوضع حاليا اتغير تماما طيب وايه السبب ؟؟؟ هل المناهج ؟؟؟؟؟ هل المدرسين ؟؟؟

طب حتى المدارس الخاصة مابيشرحوش ؟؟؟

طيب لو قلنا المشكلة فى الحكومة

طب ماهو حتى المغتربين بيشتكوا نفس الشكوى

يمكن الوضع فى مصر دراسيا أصعب

بس برضه نفس الفكرة

مافيش شك ان الوضع اتغير والدراسة بقت أصعب بكتييييير

انا مادخلتش حضانة أصلا النهارده ابنى فى كى جى 2 أخد فى شهرين بس كتابة حوالى خمسين كلمة غير الجمل والجمع والطرح

بس احقاقا للحق مدرسته ممتازة ماشاء الله عليها ونادرا ماباحتاج أذاكر معاه حاجة

طبعا لسه التقل جاى بس حتى بالكم الكبير على طفل برضه مدرسة الفصل ومجهودها واضح جدا مع مروان وده بيفكرنى بموقف من كام سنة

والد صديقة ليا اختها جت فى يوم وجابت درجات ضعيفة فى مادة والمدرسة باعتة لولى الامر ارجو المتابعة

راح الأب باعت للمدرسة خطاب شديد اللهجة وقالها ايه اللى حضرتك مقصرة فيه يخللى بنتى درجتها بالشكل ده !!

معناه انه بيحمل المدرسة اللى دى شغلتها وظيفة المتابعة اللى المدارس رمتها هى والشرح على الاهل

وياريتهم يرموا وظيفة الامتحانات ونمتحن احنا عيالنا بالمرة ونطلعهم الأوائل

انا بنتي داخله kg1 السنه الي جايه ان شاء الله و كنت هدخلها انترناشونال او لغات

بعد الموضوع ده بفكر بلاش

ولا ايه رأيكم

انا كمان من رأي الاستاذ حسام

فعلا اللغة اصبحت عامل مهم جدااااا حضرتك اهتمى باللغة العربية كلغة فى حد ذاتها عشان القرأن

لكن الدراسة فى اللغات بتفرق كتييييير فى سوق العمل

[قطرة ندى]

الدروس هى اللى اتغيرت انا عندى رابعة ابتدائى وسادسة والحاجات اللى فى الكتب كنا بناخدها فى اعدادى

كنت عايزة اسال عن كتاب السيدة خديجة بتاع سادسة هل حد لاحظ انه مليان اخطاء

بالنسبة للمذاكرة للاولاد وعلى الاخص اللى ولادهم فى انترناشونال

رايى ان ماينفعش الا يا دروس خصوصية يا حد من الوالدين متفرغ تماما عشان يذاكر معاهم ويعتبر نفسه طالب زيه زي ابنه...انا بتكلم جد

[rewsha]

بالنسبة للمذاكرة للاولاد وعلى الاخص اللى ولادهم فى انترناشونال

رايى ان ماينفعش الا يا دروس خصوصية يا حد من الوالدين متفرغ تماما عشان يذاكر معاهم ويعتبر نفسه طالب زيه زي ابنه...انا بتكلم جد

بصراحه :حضرتك بالكلام ده....قولتي المفيد .

كان ياما كان زمان واحنا صغيرين حاجة غريبة زى الاساطير

قااااال كنا بنذاكر لوحدنا !!!!

هوه فعلا كنا كلنا زمان بنذاكر لوحدينا ...لان المدرسه كانت مدرسه والمدرسين كانوا مدرسين وماكانش في حاجه اسمها دروس خصوصيه الا(للبليد)

والمناهج كانت اسهل من كده

كمان نقطه مهمه جدا ....ماكانش في المغريات اللي بتضيع الوقت زي دلوقتي

الدش وقنواته ....(الكارتون طبعا )....وباقي القنوات لو الطفل كبير شويه

البلاي ستيشن ...(بنتي امبارح قاعده ساعتين مش عارفه اقومها من قدام البلاي ستيشن )وقومتها بالعافيه

الكمبيوتر .....و.....و......الخ

فدلوقتي بقى في حاجات كتير يشغلوا بيها نفسهم ...زمان كان محور حياتنا هوه المذاكره وبس ...لان ماكانش في حاجه تانيه غيرها

[sarmar]

فعلا انا ماعمرى اخد درس وماكان اصلا فية دروس خصوصية بس كانو بيعملوا حاجة اسمها مجموعات تقوية فى المدارس وكما تفضلتم كانت للبلدا الميح

بس تعالوا لجوهر هام جدا فى العملية التعليمية وهو الاهل اى والدى التلميذ على الرغم اننا كاولياء امور اكثر وعيا وثقافة من اهلنا الى اننى ارى ان تعامل اباؤنا وامهاتنا معنا ونحن صغار بالمدارس تختلف كثير عن معاملاتنا احنا لاولادنا

حيث اصبحنا اكثر رفقا ونعومة وتدليل وتلبية الطلبات كانها اوامر عسكرية او اكثر مما ادى الى ضياع هيبة الوالدين والمدرسين عند الابناء مما كان لة توابع كثيرة على تاثيرنا فيهم

يعنى من الاخير لانلوم الاولاد بل نلوم انفسنا ( بس واللة احنا بنموت فيهم ومش قصدنا انة يحصل كدة )

[Tafshan]

ياااااااااه

يييييييييه

يووووووووووووه

وسمعونا صلاة النبي

عليه الصلاة و السلام ..

دوست ع الوجيعه يا ولد العم :lol:

الموضوع ده انا يأست منه تماماً ..

جمانه في جريد فور عقبال عمر كده يا رب .. و طبعاً مطلعه ##!!$$@@

الموضوع عدى بقى السينس و الانجلش و بقى عندى مشكله في العربي و الدين (فين الوش اللى بيضرب راسه في الحيطه ؟؟ )

اقولك على السيستم اللى ريحنى الثلاث سينين اللى فاتو :

بص يا سيدي .. اولاً انا لاحظت ان العيال من جيل ولادنا عندهم مشكله في الاحساس بالقيمه .. يعنى عايز كذا و كذا و كذا و مش مهم بقى ليه لازمه و لا لأ .. المهم يجي ..

فعملت طريقه ظريفه :

قلت لها من جريد وان : الماده اللى ح تجيجيبى فيها تين اوفر تين ليكى عندى تين درهامز .. ماشى يا عم الحاج ؟ يعنى نين اوفر تين مافيش تين درهمز و لا غيره .. و في نفس الوقت وقفت بقى موضوع اللعب و الحاجات و المحتجات .. عاوزه كذا .. ماشى .. حوشى و جيبيه :)

الموضوع مشى حلاوه و الحمد لله .. البنت في الثلاث سينين ما شاء الله من الاوائل .. بس طبعاً مش مجهودها لوحدها .. امها طبعاً كانت الضحية .. لكن الموضوع ده سهل كثير عليها لأنها بقت حاسه بالمسئوليه و كمان ربطت بين احتياجاتها و مجهودها .. طيب عظيم ... فين المشكله ؟؟

المشكله بقى ان في جربد فور جمانه بقت تمام في الانجليزي .. و زفت في العربي .. ما فيش اى عربي .. و اللطيف ان بنتى المدرس بتاعها بيقولى انها ميه ميه .. و دى مشكله اكبر : مش عارف اقنعها انها زفت مسيح في العربي .. طبعاً احنا بقى ما بيعيش لناش جيران .. شهر في الثانى و نلاقيهم عازلوا مش عارف ليه wst::

من يومين عملت اعتصام و وقفه احتجاجيه و جبتهم قدام بعض ، و قلت للبنت : طالما ماما هى اللى بتشرح .. خلاص .. يبقى ادى الفلوس اللى بدفعهم للمدرسه دول لماما و تقعدى في البيت .. طبعاً بنتى عارفه انى طاقق و ممكن اعملها فقلقت اقعدها في البيت بجد .. و ابتدينا المفاوضات على انها ترحمنا شويه و تبقى تسأل المدرسين على الحاجه اللى مش فاهماها رحمةً بمامتها ..

عموماً انا شايف ان احنا الاهالى لينا عامل في الموضوع .. على ايامنا ما كانش فيه حل غير اننا نسأل المدرس لأن ما فيش ماما ح تشرح في البيت .. طبعاً بيبقى صعب علينا اننا "ننفض" للعيال و نسيبهم عشان بنبقى قلقانين لحسن هم كمان "ينفضوا" و يبقوا فشله في التعليم .. و ده ليه علاقه بينا برضوا كجيل من الاباء و الامهات عرفنا قيمة التعليم غالباً على كبر و عرفنا قد ايه شوية مجهود في التعليم كانوا ممكن يفرقوا كثير في حياتنا .. ما علينا ..

طبعاً الدروس الخصوصيه مش الحل .. بس هل فعلاً ولادنا مش بيأخذوا دروس خصوصيه ؟؟ ما هم بيأخذوا دروس لكن مجانيه من امهم او من ابوهم .. لكن بصراحه انا غلب حمارى ..

ما انكرش ان التعلين صعب ,, يعنى انا بقيت بدفع بالمية درهم في الاسبوع كويزات على امتحانات على دكتاشن على ستار بوينتس لكن الحقيقه ان مامتها هى اللى المفروض تأخذهم .. و على كده ببوس ايدي شعر و دقن على جمانه و بقول الحمد لله عرفت اربي .. يعنى القرد التانى( آدم بك ) اللى لسه ما دخلش مدارس و الحمد لله ما اعتقدش اني ح اعرف اربيه على الاطلاق من قصيره كده و ح اخليه يلعب كوره بلا تعليم بلا وجع دماغ ..

ما علينا ..

[se_ Elsyed]

أتفق مع الأخوة اللي أفادوا إن الأستثمار في تعليم الأولاد أفضل من الأستثمار في الذهب والعقارات ...

أنا عن نفسي لن أحاول ان اترك لأولادي مال أو عقار يعني لن أُركز على ذلك ويكون شغلي الشاغل ..

فالعلم والعلم وحده هو من يستطيع من خلاله أن يحقق ذلك بنفسه ..

أي نعم سأساعدهم بكل تأكيد ..

لكن عندما يساعدون أنفسهم أولاً ...

الموضوع تحدي

وتحدي كبير كمان ...

انا بنتي داخله kg1 السنه الي جايه ان شاء الله و كنت هدخلها انترناشونال او لغات

بعد الموضوع ده بفكر بلاش

ولا ايه رأيكم

يعني إيه يا مدام هناء ...؟؟؟؟

هاتجوزيها وتقعديها في البيت ؟

التعليم العربي لم يعد كافياً .. وزي قلته بدون لغه وكمبيوتر

كمان نقطه مهمه جدا ....ماكانش في المغريات اللي بتضيع الوقت زي دلوقتي

الدش وقنواته ....(الكارتون طبعا )....وباقي القنوات لو الطفل كبير شويه

البلاي ستيشن ...(بنتي امبارح قاعده ساعتين مش عارفه اقومها من قدام البلاي ستيشن )وقومتها بالعافيه

الكمبيوتر .....و.....و......الخ

يا مدام روشه كلنا نقع في هذا الفخ وتلك الاخطاء القاتلة

بإننا كأباء وأمهات ... بنكبر الجمجمه ونلهي العيل في أي حاجه لحد ما دماغه تتلحس .. ونرجع نقول الواد قاعد طول اليوم قدام البلاي ستيشن أو الكارتون

طب البديل إيه ؟

القراءة أو ممارسة أي هوايه في المنزل حتى

وتنظيم مشاهدة التليفزيون الألعاب الألكترونية بشدة وبدون تهاون .

ولا أتفق مع ما أوردته أختنا ام مروان

والد صديقة ليا اختها جت فى يوم وجابت درجات ضعيفة فى مادة والمدرسة باعتة لولى الامر ارجو المتابعة

راح الأب باعت للمدرسة خطاب شديد اللهجة وقالها ايه اللى حضرتك مقصرة فيه يخللى بنتى درجتها بالشكل ده !!

يا أم مروان المدرسة مش هاتعين مراقبة على الطلبة 24 ساعه وتقولهم أعملوا واجباتكم وذاكروا او أكتبوا بخط كويس او تعالوا نراجع مع بعض ...

ده دور الأسرة

وطالما أرتضينا لنفسنا سكة مدارس اللغات او الأنترناشونال يبقى لا نكون قدها .. يا يفتح الله

وبرضوا الدروس الخصوصية في سن مُبكر في منتهى الخطورة وبتخلي الطفل عامل زي اللي بياكل أكل مهضوم قبل كده بدون أي مجهود منه

----------

بصره..

إبني كمان في السنة الثالثة ..

وعاديك ..

يعني إنت تشوف ورقي .. وترجع تقولي بصره ؟؟؟؟

مانت جاري يا جدع إنت وعارفين بعض هههههههه

لكن أعتقد مع تقدم مراحل التعليم .. وحسب المقدمات التي أراها الآن في المناهج .. أعتقد أن القادم سيكونصعب جداً

هأ أو أو

بيقولك يابو أدهم من السن الجاية .. رابعه يعني .. هايعتمدوا في معظم المواد على " الريسيرش " يعني باللغه العربية أبحاث يقوم بها الطالب ويستعين بالأنترنت فيها ... وأديها ما ترحمهاش ...

العام الماضي في سنة تانية يعني .. كنا في إجتماع أولياء أمور .. وغاظني قوي إن الولد بيدرس مادة التربية الأسلامية بالانجليزي من الألف إلى الياء

فقلت للأستاذ ليه التماحيك دي ... ما تدرسوها بالعربي ؟

فقال لي : هل يُغضبك أن يكون إبنك متمكن من دينه بحيث يقدر يترجم ده للغه اجنبية ويقدر يشرح دينه لغير المسلمين الناطقين باللغه الأنجليزية ؟

فكسفني بصراحه وكنت مبسوط إن الواحد يخلي أبناءه امامهم هدف أسمى واعلى من اي تعليم دنيوي ..

وبعدين الراجل راح قالب وشه وبشرني .. وقال لي : حضرتك من سنة رابعه عينك ما هاتشوف الا النور والتربية الأسلامية هاتبقى مادة تقيلة ...

قلت له ربنا يبشرك بالخير

بأفكر أخلي الواد يقعد في البيت وكفاية عليه شهادة سنة تالته ..

---------

لا أُخفي عليكم ....

بعد ما مشينا إحنا كأباء في التعليم بالزق واللكلكه والترهيب والترغيب واللي كنت بأسمي المرحلة دي

self education

حيث إن اهالينا معظمهم ما هماش خريجي جامعه ..

يعني كنا بنعتمد على نفسنا في كل حاجه

لدرجة إني والله لحد ما خلصت ثانوية عامة .. أكتشفت في الجامعة إن كان في حاجه إسمها مستوى روفيع في الثانوي والواحد كان ممكن يحسن مجموعه ..

أصلها وقفت معايا بالظبط على درجة ونص وكنت هاموت وادخل ألسن ..

لكن نصيب بقى

المهم

خلصت جامعه وقلت أدرس كمبيوتر بطريقة مكثفة وعلمية ... وكانت امله أيامها بجد

الكلام ده في 94

المهم كان معايا دكاترة جامعه ومعيدين وموظفين وطلبة بس دول كان عددهم قليل

وكنا حوالي 30 واحد

والدراسة باللغه الأنجليزية اللي أُجيدها الحمد لله

لكن الجامعة رأفت بحال ناس كتيرة وقالوا في الأختبارات اللي عاوز يجاوب بالعربي يجاوب

المهم

كان معانا خريجي مدارس لغات ..

اعتقد المدارس الأنترناشونال حديثة العهد بمصر

لما كنا بنقعد سوا وبأشوف مستواهم في تحدث اللغة الانجليزة وكتباتها كمان ..

كنت بأحس إني عجلاتي .. او كبيري قوي كهربائي سيليسيون ..

من ساعتها صممت إني مش هاخلي إبني يطلع عجلاتي زيي ...

الكلام ده من 16 سنة اهو

ما بالنا في العصر اللي إحنا فيه اللي بقت الأرض فيه بتتكلم أنجليش وماحدش بقى يجيب سيرة اللغة في أي عمل لإنها بقت من البديهيات ... وكمان التعامل مع الكمبيوتر ..

يعني بكره مثلاً ممكن المعايير تتغير ونلاقي الناس تقول : هو أبنك ما يعرفش غير أنجليزي بس ؟؟ يعني لا ألماني ولا فرنساوي ؟ أوعى تقول لي إنه ما بيتكلمش صيني كمان تبقى مصيبة .

--------------

وأخيراً : أحب أوجه خالص التحية لربات البيوت وزوجاتنا اللي مستحملين بلاوي بصراحه ....

انا زوجتي عندها 29 سنة .. ومن مذاكرة العيال بقى شكلها يدي على 29 ونص ( آه يا عم أحسن ممكن تقر الكلام ده وأكتب 40 مثلاً .. تقول لي : 40 مين يا عُمرررررررررر )

وسمعني يا عم اغنية ست الحناين يا حنانا إنت

[se_ Elsyed]

[المشكله بقى ان في جربد فور جمانه بقت تمام في الانجليزي .. و زفت في العربي .. ما فيش اى عربي ..

اللي مطمنني يا طفطش إن الحمد لله المدرسة بتاعت عُمر وعلي العربي فيها كويس .. وبيكتبوا كمان بالتشكيل

الحمد لله وإلا كانت هاتبقى مصيبة

بس تعرف بأضحك إمتى ؟

عُمر بيه ما يعرفش معظم الأرقام بالعربي

الله يرحم أبوه

يعني لو قلت له .. خمسين ...

يقول لي آه اللي هي فيفتين زي كده 15

يا نهار مش فايت

يا بني لأ

ديكيها فيفتين ... إنما داهييت فيفتي

موضوع البونص والحاجات دي هو اللي مخترعه .. وبيجمع كل 5 مواد وياخد عليهم 100 ريال ...

بس ساعات بأحمرق وأقول له مش لاعب ..

أو اخدهم منه تاني تحت بند " ضريبة ابويه "

[essamalshaaer]

والله والله .... ده الي حصل معايا

فعلا بقيت انا بذاكر كمان قبل ما أذاكر له

ولما تقف معايا كلمة .... افتح قامووس الموبايل وترجمها

بس المشكلة هو في جريد 1 ولقيت المنهج عنده في كلمات اكثر من الي خدتها في الثانوية العامة

بس مش عارف هل ده خطأ مننا .... إننا دخلنا ولادنا انتر ناشيونال وحنا مستوانا ضعيف كمصريين

يمكن الجنسيات التانية معندهاش المشكلة دي لأنهم بيستخدموه في حياتهم

وده الي خلاني فكرت اخصص جزء من تعامله في البيت بالإنجليزي .... بسبب انه في المدرسة

كل تعامله وكلامه مع الكل بالإنجليزي .... فأكيد بيرجع البيت يلاقي عربي وممكن تكون دي المشكلة

المناهج ..... وما ادراك المناهج .... بقيت انا ووالدته في البيت تخصصات انا في حاجة وهي متخصصة في حاجة تانية

بجد الموضوع صعب شوية مع أن الواحد بيستعين بصديق بس الله المستعان ..... وربنا يوفقهم كلهم

[ozoozo]

[..

أو اخدهم منه تاني تحت بند " ضريبة ابويه "

ده منتهي الظلم انك تاخدهم منه تاني

المفروض يقدملك اقرار الاول عشان يبقي الموضوع قانوني

انت ماتعلمتش حاجه ابدا من عم بطرس

[doha]

من فترة في بالي موضوع قريب اوي من الموضوع ده عن مصادر التعليم البديل لابناءنا بخلاف المدرسة ..

على كل حال معنديش كتير اضيفه على ماقالوه الزملاء فواضح انها تقريبا مشكلة كل بيت وان كنت الحمد لله لسه محسيتش بيها لان بنتي كيجي ثري بس فعلا لفت نظري ان البنت بتدرس الحاجات ( الي عارفينها احنا ) فيبدوا والله اعلم ان الجاي هيبقى جديد علي وعليها ..

في بس معلومه صغيره ممكن تفيدكم للي بيلاقوا صعوبه في الترجمه ..

جوجل بقدم خدمه الترجمه بشكل رائع جدا من العربي للانجليزي وبالعكس والاهم من الانجليزي للانجليزي كمان .. ده فوق ان في كلمات كتير بينطقها لك ويحطها في جمل وشرح عشان يعرفك معناها بالظبط ..

ممكن يترجم كلمه وحده او نص كامل من عدة كلمات والترجمة على فكره بتطلع مظبوطه لحد كبير خاصه وهو بيربط الكلمات ببعضها يعني لو كلهم لها اكثر من معنى بيختار اقرب معنى للكلمات الي حواليها ويحطه ..

الخدمه هتلاقوها من ضمن خدمات كتير في آي جوجل ..

وللي مش عارف الآي جوجل اكتب ف الجوجل كلمة ترجمه جوجل وعيش حياتك ..

[se_ Elsyed]

في بس معلومه صغيره ممكن تفيدكم للي بيلاقوا صعوبه في الترجمه ..

جوجل بقدم خدمه الترجمه بشكل رائع جدا من العربي للانجليزي وبالعكس والاهم من الانجليزي للانجليزي كمان .. ده فوق ان في كلمات كتير بينطقها لك ويحطها في جمل وشرح عشان يعرفك معناها بالظبط ..

ممكن يترجم كلمه وحده او نص كامل من عدة كلمات والترجمة على فكره بتطلع مظبوطه لحد كبير خاصه وهو بيربط الكلمات ببعضها يعني لو كلهم لها اكثر من معنى بيختار اقرب معنى للكلمات الي حواليها ويحطه ..

الخدمه هتلاقوها من ضمن خدمات كتير في آي جوجل ..

وللي مش عارف الآي جوجل اكتب ف الجوجل كلمة ترجمه جوجل وعيش حياتك ..

لا أعتقد إن هناك الكثيرون يعانون من مذاكرة اللغة الأنجليزية للاولاد .. قواعد وكلمات وخلافه

المشكلة في مواد غلسه زي الساينس والسوشيال .. إلخ

دي لا ينفع معها جوجل ولا بيل جيتس نفسه ...

-----------------

لكن تصدقوا إني بأستفيد كثيراً لما بأتكعبل في كتب أولادي ...

الواحد بصراحة سيظل لأخر عُمره يتعلم ومش عيب أبداً

[doha]

في بس معلومه صغيره ممكن تفيدكم للي بيلاقوا صعوبه في الترجمه ..

جوجل بقدم خدمه الترجمه بشكل رائع جدا من العربي للانجليزي وبالعكس والاهم من الانجليزي للانجليزي كمان .. ده فوق ان في كلمات كتير بينطقها لك ويحطها في جمل وشرح عشان يعرفك معناها بالظبط ..

ممكن يترجم كلمه وحده او نص كامل من عدة كلمات والترجمة على فكره بتطلع مظبوطه لحد كبير خاصه وهو بيربط الكلمات ببعضها يعني لو كلهم لها اكثر من معنى بيختار اقرب معنى للكلمات الي حواليها ويحطه ..

الخدمه هتلاقوها من ضمن خدمات كتير في آي جوجل ..

وللي مش عارف الآي جوجل اكتب ف الجوجل كلمة ترجمه جوجل وعيش حياتك ..

لا أعتقد إن هناك الكثيرون يعانون من مذاكرة اللغة الأنجليزية للاولاد .. قواعد وكلمات وخلافه

المشكلة في مواد غلسه زي الساينس والسوشيال .. إلخ

دي لا ينفع معها جوجل ولا بيل جيتس نفسه ...

-----------------

لكن تصدقوا إني بأستفيد كثيراً لما بأتكعبل في كتب أولادي ...

الواحد بصراحة سيظل لأخر عُمره يتعلم ومش عيب أبداً

مهو دي حلاوته .. الآي جوجل بيترجم مصطلحات مش انجليزي عادي ..

يعني عن نفسي بحتاجه كتير جدا لو بذاكر بالانجليزي في برمجه او ماشابه فمابالك لو هتدور على مصطلح ساينس او سوشيال .. بنصح بيه بقوة بصراحة مش عارفه الواحد الاول كان عايش من غيره ازاي ..

[قطرة ندى]

طب ياريت طالما كل اللى شاركوا معانا ولادهم نفس الاعمار تقريبا ...فياريت نساعد بعض ...ممكن نفتح صفحة مخصوص للموضوع ده

[أسد]

هأ أو أو

بيقولك يابو أدهم من السن الجاية .. رابعه يعني .. هايعتمدوا في معظم المواد على " الريسيرش " يعني باللغه العربية أبحاث يقوم بها الطالب ويستعين بالأنترنت فيها ... وأديها ما ترحمهاش ...

في مدرسة أدهم الكلام ده بيحصل من السنة دي ..

والمسألة مش بس كده .. ده بيطلبوا منهم قراءة قصة .. وتحليلها .. يعني مثلاً .. تلاقي أدهم باشا بيقولي يادادي أنا عايز أروح مكتبة جرير .. أقوله ليه سعادتك ؟؟

يقولك لأنه عندي بروجيكت (مشروع) .. وعايز أشتري استوري (كصة) ..

آخده وأروح مكتبة جرير .. يقوم يقعد يدور لغاية مايلاقي القصة اللي على مزاجه ..

وبعدين .. يبتدي يقرأها . وبعدين .. يعمل لها أناليسيس (تحليل) .. وبعدين يعرف الكاراكتارز (الشخصيات) والسايت (المكان اللي بتدور فيه القصة) والبروبلم (الحبكة الدرامية) وبعدين البروبلم سولفينج (حل المشكلة والوصول للنهاية لاسعيدة) وبعدين يكتب الحاجات دي .. ويقعد يرسمهم .. ويقصهم .. ويلزقهم ..

هييييييييييييييييييييييييييييييييييييييييييه

شغلانة طويلة جداً ...

بس زي ماقلت ..

أنا مليش دعوة .. أنا فقطط ممول .. ومستشار .. وحكم بينه وبين أمه في حالة الإختلاف ..

لكن بصراحة .. هناك فرق غير عادي بين الجيل ده .. وبيننا لما كنا في نفس عمرهم ..

لا وجه للمقارنة ..