سياحة فى تاريخ محاورات المصريين

[honest reader]

إكتشفت إن محاورات المصريين عمرها عشرة سنوات ... كيف ؟ تعالوا معى لهذه السياحة

هناك إختيار لم أعره إهتماما من قبل هذا الإختيار يعطيك قائمة طويلة جدا من الموضوعات الموجودة فى محاورات المصريين منها اليوم وجدت موضوع تاريخه سنة 2001

هذه القائمة عبارة عن عينة عشوائية فيها عنب الشام و بلح اليمن !!! كما لو كنت دخلت دار الكتب مثلا و لخبطت الكتب كلها على بعضها و ولعت فى الفهارس.

سياحة تستحق أن تقوم بتجربتها القراءة وحدها ممتعة و يمكن المشاركة فى هذه الموضوعات الغريبة القديمة أكيد ليها متعتها بس يا ترى لو كتبت فى موضوع قديم المشاركين لا أراهم الآن ماذا ستكون النتيجة.

نسيت أن أضع تذكرة الدخول !! جربوا http://www.egyptiantalks.org/invb/index.ph...;sort_key=click

[doha]

ده مشر رابط .. ده كنز علي بابا ..

بصراحة التجول في الرابط ممتع الى اقصى درجه ..

عاده مابفتح المواضيع النشطه على الساحه ولو مفيش مواضيع كتير تهمني ولو في وقت بقلب في المواضيع القديمه عشوائيا بس غالبا بيكون التقليب ده في قسم بعينه مثلا فكل المواضيع نفس النوع .. اما الرابط الي حضرتك حطيته فيه كل المواضيع في كل الاقسام وبلا رابط مشترك مابينها والاهم ان في من بينها مواضيع قديمه جدا وبالتالي لا هي مطروحه على الساحه ولا في شبيه ليها حتى ..

من الحاجات الي لفتت نظري اختيار الزائرين للمواضيع الي بيتصفحوها .. شكلهم كده جايبينها من محركات البحث لان في منها مواضيع قديمه جدا ..

سبحان الله كل واحد مختار موضوعه ومش في ذهنه اصلا ان في ناس تانيه مختاره مواضيع تانيه ملهاش علاقه وفي نفس الوقت برضه مش عارف او مش مهتم ان في ( آخرين) شايفين اختياراته ومتابعينها في صمت ..

مثلا ..

لقيت زوار كتير فاتحه مواضيع عن الكفيل ونقل الاقامه وماشابه ..

اكثر من زائر فاتح نفس الموضوع وهو

Otv تعرض منذ قليل فيلماً به مشاهد جنسية صريحة

لا تعليق ..

زائر حسسني ان الدنيا لسه بخير وفاتح موضوع

طريقة عمل القرع العسلي ..

زائر تاني فاتح موضوع

عشرون نصيحة للفوز بليلة القدر

سبحان الله الاهتمامات كتير وكل واحد اختار يفتح ايه وكل واحد ( عاش حياته ) في الي اختاره وبرضه كل واحد في الي بص على الي هو بيبص عليه وقيم اختياره واتسجل كل ده وجاء اليوم الي بعضنا اطلع على ماتم تسجيله ولسه هيتعرض ده كله مرة تانيه في يوم تاني ..

يارب يجعل سجلاتنا كلها نظيفه يارب ومفيهاش اي شيء غير الي يشرفنا الخلق كلهم يشوفوه يوم العرض العظيم ..

بشكرك من قلبي على الرابط وبعتذر لو الخواطر اخذتني لبعيد شويه ..

[se_ Elsyed]

أنصحكوا بقراءة موضوعات الفاضل سي السيد ... هههههههههههه

دخلت عالرابط لقيت موضوعات ييجي من 5 سنين العنوان نفسه ظريف ولفت نظري ... دخلت لقيته موضوع انا اللي كاتبه ..

والله يا جماعه لا باحتفظ بموضوعاتي ولا بأعرف أنا كتبت إيه أمبارح

الغريبه إني ساعات أفتح إيميل على الياهو الاقي جروب معينه عاملين كوبي من موضوع معين ساخر وباعتينه للناس وأنا من ضمنهم .. اقرأه وأسمتخ منه قوي .. بس أحس إني أعرفه أو في شيء غريب يربطني بيه .. إلا وبعديها ممكن بحاجات بسيطة الاقي نفس الموضوع عالمحاورات وأنا اللي كاتبه مثلاً سنة 2003

مره بأعاتب واحد لطع إسمه على موضوع ليه وقلت له هنا عالمحاورات طب قول إنه منقول يا راجل عشان نعرف بدل ما تحط إسمك إنت عليه وتنسبه لنفسك .. راح مديني كلمتين في جنابي وساب المحاورات ومشي وكأني جرحت احساسه وأعتديت على حق من حقوقه الفكرية ههههههههههه

شكراً يا أونست ريدر على إثارة هذا الموضوع

[honest reader]

ده مشر رابط .. ده كنز علي بابا ..

فعلا تعبير رشيق ... فعلا كنز على بابا

أحسن حاجة فيه العشوائية يعنى بالضبط لا تعرف كاتب الموضوع أو الموضوع عن إيه

عايز أجرب تجربة أقوم بالرد على موضوع قديم جدا ..... هل قدامى الأعضاء ما زالوا موجودين هل مرور السنوات تؤثر على تفكير الناس

يعنى لو حد كتب و هو عمره عشرين سنه بعد مرور السنوات حيكون رأيه إيه زى الواحد لما يتفرج على ألبوم صور قديمة