بلاغ هروب , بلاك ليست , ... كلمات كتير بنسمعها ومش عارفين معناها

[elhag]

هو الكفيل يقدر يبلغ عنك هروب ؟ او يحطك بلاك ليست بعد ما تسافر ولا وانت جوه المملكه بس ؟؟

ولو يقدر ياريت تفهمونا ازاي ؟؟

ويعني ايه اصلا وعلي اي اساس اني بعد ما خرجت م البلد سواء نهائي

او خروج وعوده ومرجعتش

ازاي بعد ما خرجت يقدر يبلغ عني وهيقول ايه ؟؟؟ وعلي اي اساس

ومده البلاغ دي اد ايه

ياريت بجد حد من الساده الافاضل ذوي الخبره يشرحلنا ويفهنا الموضوع ده

بالنسبه للنهائي

وايضا بالنسبه للي واخد خروج وعوده وتاشبرته انتهت ومقدرش يرجع

وعلي اي اساس يتم المنع من دخول البلاد

[doha]

لو مسافر خروج وعوده ممكن يحطك بلاك ليست عادي على اساس انك سافرت ومرجعتش

هتقول ازاي هدخل المملكه وانا متبلغ عني هقولك عادي ممكن لحظة مادخلت مكانش في بلاغ عنك ولكن تم التبليغ بعد كده

اصلا ممكن يبلغ عنك وانت داخل المملكه ومش هتعرف عمرك غير في اول احتكاك لاي سبب مع الجوازات فيكتشفوا انك على الكمبيوتر مبلغ عنك ..

لو واخد خروج نهائي فمش من حقه يبلغ عنك هروب ولكن من حقه يمنعك من العوده لمده سنتين اذا ماتم تمضيتك على ذلك قبل المغادره .

قانونا لو الكفيل شايف ان طبيعه عملك اتاحت لك الاطلاع على اسرار ممكن تفيد المنافسين لو رجعت وعملت عند احدهم من حقه يمضيك قبل سفرك على ورقة بانه ممانع من عودتك قبل سنتين وفي الحاله دي يمنع دخولك المملكه لو حاولت الرجوع عند كفيل آخر قبل انقضاء العامين على خروجك النهائي .. لو ممضيتش على اي اوراق من النوع ده واخذت خروج نهائي فمن حقك ترجع عادي جدا ولا يستطيع انه يبلغ عنك هروب او ماشابه ..

بالنسبة للخروج وعوده ومقدرتش ترجع فامامك حالتين .. اما انك تراسل الكفيل عشان يرجعك هو نفسه على كفالته او انك تشوف كفيل تاني

وفي حاله شفت كفيل تاني فانت وحظك . لو الاولاني مبلغ عنك هروب ( عشان يقدر يجيب بديل ليك لازم يبلغ انك هربان ) مش هتقدر تدخل في الحاله دي لكن لو الراجل مطنش او مش محتاج فيز تانيه فمش فارقه معاه عدم عودتك او انت اصلا مش جاي على كفالته من البدايه وانما ناقل داخلي فمش خسران شيء لو مشيت في كل الاحوال دي تقدر ترجع على كفيل تاني عادي

وعلى فكره وعلى حد علمي فحتى لو انت ناقل داخلي وده مش كفيلك الاصلي وحب ( يغلس ) عليك ويبلغ فيك هروب فده من حقه ويقدر يعملها ..

[elhag]

اولا شكرا علي الاهتمام والرد يا استاذه ضحي

ثانيا يعني ايه يبلغ عني بعد ما سافرت ؟؟؟؟ وايه نوع البلاغ ده ؟؟ وهل ده بلاغ امني يقدر فعلا يمنعني من العوده علي كفيل تاني ؟؟؟ مثلا لو انا واخد خروج وعوده ومرجعتلوش

يعني اقصد لو الواحد واخد خروج وعوده عادي خالص وبدون اي مشاكل ومرجعش وحب بعد فتره يرجع علي كفيل جديد ايه المشكله بقي وهيبلغ عني علي اساس ايه برده

واصلا للي واخد خروج وعوده ومرجعش عندنا ف المؤسسه بيتعمله ورقه كده اسمها خرج ولم يعد وبيتكتب فيها اسامي الناس دي هو ده بقي يبقي بلااغ هروب ولا ده اجراء روتيني عشان يحفظ حقه ف الفيزا ويطلعوله واحده غيرها ولا ايه ؟؟؟

[doha]

اولا شكرا علي الاهتمام والرد يا استاذه ضحي

ثانيا يعني ايه يبلغ عني بعد ما سافرت ؟؟؟؟ وايه نوع البلاغ ده ؟؟ وهل ده بلاغ امني يقدر فعلا يمنعني من العوده علي كفيل تاني ؟؟؟ مثلا لو انا واخد خروج وعوده ومرجعتلوش

يعني اقصد لو الواحد واخد خروج وعوده عادي خالص وبدون اي مشاكل ومرجعش وحب بعد فتره يرجع علي كفيل جديد ايه المشكله بقي وهيبلغ عني علي اساس ايه برده

واصلا للي واخد خروج وعوده ومرجعش عندنا ف المؤسسه بيتعمله ورقه كده اسمها خرج ولم يعد وبيتكتب فيها اسامي الناس دي هو ده بقي يبقي بلااغ هروب ولا ده اجراء روتيني عشان يحفظ حقه ف الفيزا ويطلعوله واحده غيرها ولا ايه ؟؟؟

بلاغ الهروب اسمه بس الي يخض كده لاننا كمصريين مرتبط في اذهانا ان البلاغ ده حاجه بتتعمل في قسم الشرطه وبنبلغ فيها عن شخص ارتكب جريمه ومطلوب محاسبته ..

القصة مش كده بالظبط ..

الحكايه ومافيها ان مش كل سعودي من حقه يستقدم حد اجنبي ويدخله يشتغل في البلد .. بعض السعوديين فقط والي منطبق عليها شروط معينه هي الي مسموح لها تجيب افراد وباعداد محدوده وفقا لكل حالة بشكل منفرد ..

السعودي الي بيجيب اجنبي ويدخله البلد عشان يشتغل معاه بيطلق عليه مسمى كفيل للاجنبي ده

وبما ان التصاريح بالاستقدام ( الي بنسميها فيزا ) محدوده لكل كفيل .. فهو مش مسموح له يجيب حد جديد بخلاف الي جابهم ودخلهم البلد فعلا وطالما ان الي جابهم دول مازالوا موجودين في السعوديه ..

طيب يعمل ايه الكفيل الي خرج من عنده احد العاملين ومرجعش ؟ هو دلوقت محتاج يجيب حد يساعده بدال الي مشي وفي نفس الوقت الجوازات مش هتسمح له باستقدام او ادخال حد جديد للبلد لانه استنفذ العدد المسموح فعلا .. طبعا الجوازات بتعمل كده عشان تضمن ان عدد الاجانب في البلد ميزيدش عن النسبه المسموح بيها بحيث متضرش بمصالح اهل البلد الاصلين من تسكين وظائف واستهلاك موارد وغيرها .. طبعا النسبة دي هم لهم حساباتهم في تحديدها واكيد مش موضوعنا ..

فالحل الوحيد المتاح امام الكفيل عشان يقدر يدخل اجنبي جديد للبلد انه يقدم بلاغ الى الجوازات يقول فيه ياجماعه الاجنبي الي انا جبته مشي ومرجعش وخلاص مكانه فاضي فاسمحوا لي باستقدام او ادخال اجنبي جديد ..

في الحاله دي وجود الاجنبي القديم اصبح غير شرعي لان مكانه خلاص اعطي للكفيل مرة اخرى عشان يحط فيه واحد جديد خالص ..

لحد هنا مفيش مشكلة خالص ..

المشكلة ان بعض الكفلاء من ضعاف النفوس بيستغل الوضع ده الي الهدف منه اساسا حفظ حقوق الكفيل في الاضرار بحقوق المكفول ..

يعني بيستغله كورقة ضغط على مكفوله وفي نفس الوقت ممكن يستغله كعقاب او انتقام من الاجنبي لاي سبب يشوفه الكفيل ..

اذا هو مش بلاغ امني ولا ممكن يسبب سجنك او تغريمك على حد علمي لكن الهدف منه فقط اعلام السلطات المختصة ان مكانك هنا لم يعد موجود واقامتك غير شرعية وبالتالي يستوجب ترحيلك الى بلدك الاصلي ..

[elhag]

الله ينور عليكي يا استاذه

بس بكده للي سافر ومرجعش يبقي البلاغ ده عباره عن اجراء روتيني لضمان حق الكفيل وتعويضه بتاشيره اخري

ولا يضر المكفول ف شيء

وبكده لو حبيت ارجع تاني مش هيبقي فيه مشكله صح ولا ايه ؟؟؟؟

[doha]

الله ينور عليكي يا استاذه

بس بكده للي سافر ومرجعش يبقي البلاغ ده عباره عن اجراء روتيني لضمان حق الكفيل وتعويضه بتاشيره اخري

ولا يضر المكفول ف شيء

وبكده لو حبيت ارجع تاني مش هيبقي فيه مشكله صح ولا ايه ؟؟؟؟

لاه ممكن يضرك لان انت تعتبر ( على ذمه الكفيل ) وتماما كما لا يسمح لامراة بالجمع بين زوجين فلايسمح لك بالجمع بين كفيلين .( فينك ياحاجة نادين تطالبي بحقوق المكفولين)

لانه هو في بلاغه بيقول ياجماعه فلان الي جاي ده انا خلاص مش عاوزه عاوز اجيب غيره فان عترتم فيه رجعوه مطرح ماجاء

هذا على حد علمى وبناء على حاله شفتها فعلا لسائق بيعمل عند عائلة اعرفهم وكانت العائلة مسافرة عادي سفرة داخليه ومعرفش ايه سبب احتكاكها بالجوازات في المطار فتم اكتشاف بلاغ الهروب الي على السائق من كفيله القديم .. وطبعا طالب فيه الترحيل للسائق ..

الي فكراه من القصة دي ان صدر تعميم باسم السائق في جميع مديريات الجوازات ان فلان ده ( بلاك ليست ) عبد آبق يعني فينبغي الحذر من التعامل معاه

تم تعديل 24 ديسمبر 2009 بواسطة doha

[elhag]

معلش محتاج توضيح وهل كلام حضرتك ده قانوني ولا ده رايك الخاص ؟؟؟

[doha]

معلش محتاج توضيح وهل كلام حضرتك ده قانوني ولا ده رايك الخاص ؟؟؟

ايه الي قانوني ؟ انك تجمع بين كفيلين ؟ بالتاكيد قانونا مينفعش طبعا ..

على كل حال ده الي اعرفه كشخص عادي عايش في الدنيا بيقرأ القانون من وقت للتاني ( مش كمتخصص وانما من باب الاطلاع ) وبشوف حالات من وقت للتاني ( صدفة مش تعمد ) وبناء عليه تكونت معرفتي بالاوضاع هنا وهي مش راي ولا هي تخصص وبناء عليه فمتاخذش بكلامي مائة في المائة ومفيهاش حاجه برضه لو سألت بنفسك المتخصصين في الامور دي سواء في مكتب العمل هنا او وزارة العمل في مصر وهم اكيد يدلوك اكتر مني وان شاء الله يعطوك الخبر اليقين ..

[elhag]

انا اقصد ازاي يعني اجمع بين كفيلين مينفعش طبعا

انا دلوقتي مثلا كنت واخد خروج وعوده من كفيلي ومقدرتش ارجع ف معادي

وحبيت بعدها بفتره ارجع تاني علي كفيل تاني بفيزا جديده ايه المشكله بقي وهو بكده ابقي جمعت بين كفيلين ؟؟

[doha]

انا اقصد ازاي يعني اجمع بين كفيلين مينفعش طبعا

انا دلوقتي مثلا كنت واخد خروج وعوده من كفيلي ومقدرتش ارجع ف معادي

وحبيت بعدها بفتره ارجع تاني علي كفيل تاني بفيزا جديده ايه المشكله بقي وهو بكده ابقي جمعت بين كفيلين ؟؟

مهو لو كفيلك الاولاني من ساعه ماحضرتك فوت معاد العوده ومرجعتش رمى عليك اليمين قصدي رمى طوبتك ونسي الموضوع يبقى كده خلاص انت مش في ذمته ويقدر اي كفيل تاني يكتب عليك قصدي يبعت لك تاشيرة ..

لكن المشكلة بقى لو دخلت واتضح ان كفيلك لسه باقي على العشرة ومتمسك بيك وراح اثبت ده ببلاغ هروب .. في الحاله دي للاسف هتبقى جامع بين اثنين لانك اصلا هتكون لسه على ذمه الاولاني وفي الحاله دي برضه القانون صريح وهتترحل لو ان كفيلك مدخلك بلاك ليست يعني معلم عليك من الآخر ..

ده كل الي عندي بخصوص الموضوع ده وياريت لو حد عنده معلومات تانيه اوضح او اكثر دقة يفيد بيها ..

[elhag]

ياريت والله ومنتظرين الافاده من اخوانا اصحاب الخبره والمعلومه

والف شكر ليكي علي اهتمامك يا استاذه ضحي