تعرضت للسرقة و متردد فى إبلاغ الشرطة إشفاقا على المشتبه بهم

[عادل أبوزيد]

تعرضت شقتى - فى حالة تجديد شامل - إلى السرقة و تم سرقة ثمان خلاطات حمام ماركة جروهى ، الشقة لم تكن مغلقة و أشتبه أو أتهم أحدا

ما سبق كان إستهلالا لابد منه

ينتابنى شعور شديد بالقهر و فى ظنى أن ذلك شعورا عاديا لمن يتعرض للسرقة أيا كان حجم السرقة فيكفى الشعور بعدم الأمانز

فى حالتى هذه حارس العقار معى منذ تقريبا عشرين سنة و كان دائما مثال الأمانة و أستأمنه على مبالغ بالألوف يقوم بتوصيلها لمن أريد ، و لكنه أيضا يتسم بقدر كبير من الغباء ......

كنت إنتويت تناسى الموضوع على إعتبار أننى بصدد إستبدال عدد من هذه الخلاطات .... و لكنها "كبرت فى دماغى" كيف يتعرض بيتى للسرقة مع وجود حارس للعقار ليس عليه أى أعباء غير الحراسة !!

حارس العقار يقول أن سباكا من الجيرة قضى فى الشقة بعض الوقت على مدى يومين بغرض أخذ قياسات حيث أن المقاول كلفه بعمل تعديلات فى الصرف الصحى و لم يتم الإتفاق و حارس العقار (بركات) يشك فى هذا السباك (الشيمى)

السياك أتعامل معه لسنوات طويلة !!

إبلاغ الشرطة قد يؤدى إلى التوصل للسارق الذى لابد أن يكون سباكا لأن خلع هذه الخلاطات ليس بالأمر السهل و يأخذ تقريبا ساعة زمن.

لخلع الخلاط الواحد

القيمة المادية للمسروقات غير ذات أهمية - رغم أنها تصل للآلاف - و لكنى فكرت فى ضرورة أن يلقى السارق جزاءه و نويت أن أبلغ الشرطة غدا

زوجتى اليوم إعترضت على أساس أن الشرطة بطبيعتها لها ممارسات غير إنسانية فى التوصل للحقيقة و خاصة فى حالتنا و التى ستؤدى إلى التحقيق المكثف مع حارس العقار و السباك و ربما السباكين فى المنطقة و قد بل الأرجح أنهم سيتعرضون لممارسات غير إنسانية من جانب الشرطة.

حقى أنا يمكننى التنازل عنه بسهولة حتى بينى و بين نفسى و لكن حق المجتمع فى القبض على السارق سيضيع.

ليتنى أسمع آرائكم

[ozoozo]

احد زملاءي في مصر سرقت شقته وقت الفطار في رمضان

كان معزوم بره

ورجع وجد الشقه مسروق منها مشغولات ذهبيه و2 لاب توب بقيمه 30 الف جنيه

اتصل بالنجده قالولو مش شغلنا روح القسم

ولما راح القسم قالولو سيب مواصفات المسروقات ولو وصلنا لحاجه هانبقي نبعتلك

ولا البحث الجناءي جه عاين الشقه ولا حد رفع البصمات زي الافلام ولا حد جه عاين اصلا

اعتقد استاذ عادل اذا ذهبت لقسم الشرطه دون واسطه

قد تتعرض للسخريه من جانب الضباط (يعني الباشا الظابط هايهز طوله ويحقق في سرقه شويه حنفيات )ت

انا فقط اتقمص شخصيه الضابط واعلم تماما انها خلاطات غاليه الثمن

تم تعديل 26 ديسمبر 2009 بواسطة ozoozo

[doha]

الصراحه يااستاذ عادل انا مش مشفقة على الحرامي الي هياخذ نصيبه في القسم انا مشفقة عليكم لما تكتشفوا حقيقة ماسيحدث ..

سيدي الفاضل مصر مفيهاش شرطه تحميك هم وظيفتهم يحموا ناس تانيين خالص .. وان كنت حضرتك مشفق على ماسيتعرض له من بهدلة في القسم فصدقني حتى لو انضرب ضرب موت فدول مش بياثر فيهم لانهم متربيين على كده الواحد بيهرش بسكينه ..

لو حضرتك عاوز حقك وحق المجتمع شوف لك واسطه كبيرة تذهب لها مباشرة بشكوتك .

ملاحظة اخيرة : متبينش اوي للبواب انك مديله الامان ومستثنيه تماما من دائرة الشك لان في الامور الي زي دي الكل متهم ولا تستبعد ابدا يكون البواب ـ برغم العشرة ـ اول المتهمين ..

[rewsha]

[quote name='ozoozo'

اعتقد استاذ عادل اذا ذهبت لقسم الشرطه دون واسطه

قد تتعرض للسخريه من جانب الضباط (يعني الباشا الظابط هايهز طوله ويحقق في سرقه شويه حنفيات )ت

انا فقط اتقمص شخصيه الضابط واعلم تماما انها خلاطات غاليه الثمن

[/quote

]

:lol: فعلا كلامك كله صح .

طب احنا بيتنا اتعرض للسرقه برضو واحنا مسافرين السعوديه والحرامي فضل مقيم فيه حوالي شهر .يربط الحاجات ويظبطها .وزميله يجي له بالليل يقوم مناولهاله من البلكونه

وهكذا ...لمدة 30 يوم .واللي شايف خايف يبلغ .ولما واحد اتجراْ وبلغ (اختي اللي كانت مقيمه المحله الكبرى وجت هيه بلغت الشرطه

وكان في واسطه كمان .

والشرطه هاجمت البيت واقتحمته وقبضوا على الحرامي متلبس

كل اللي حصل انه اخد حبس 6 شهور فقط (بعد ما قشقش الشقق كلها )شقه بابا واخواتي كمان

ولما الشرطه رجعت بعض السروقات (بعد ما الحرامي قال على مكانها في القسم)

الحاجات دي اتوزعت على الضباط والعساكر لان كان فيها برفانات غاليه وكتير واللي رجع لنا مثلا كان ازازتين برفان :lol:

وكاسيت مش بتاعنا اصلا

انا اسفه اني مش باشجع على ان حضرتك تبلغ .لكن فعلا لو مافيش واسطه وكبيره .مش هايحصل اي حاجه

وحضرك كمان اللي هاتدفع رشاوي علشان حد يتحرك بس .

تم تعديل 26 ديسمبر 2009 بواسطة rewsha

[alsaher]

الفاضل الأستاذ عادل

أختلف مع الأخوة في ما كون أن القسم لن يتعامل مع الحاله

ربما سمعت الكثير كغيري عن ذلك

لكن تجربتي قبل عامين تقريبا من خلال سرقه الشقه في أثناء إفطار رمضان وأنا معزوم خارج المنزل كانت غير ذلك

صحيح أن الأمر تطلب إجراءات طويله وجلوس في القسم طيلة بقية اليوم

إلا أنه تم إرسال فريق بحث جنائي وعاين المكان ورفع بصمات من على البلكونه التي تم دخول الشقه منها

إلا أنه في حالتي لم يكن لدي أي مشتبه به

رغم إلحاح الضابط علي لأتهم أحدا لكي يكمل إجراءاته

ولم يكن في الموضوع أي واسطه

وبالنسبة للبهدله في التحقيق

سوف تكون على من تتهمه إن حصل ذلك

خالص تحياتي وربنا يعين ويعوض

[Folana]

السلام عليكم ورحمة الله....

هذه ليست المرة الاولى التى تتعرض فيها للسرقة أستاذى الفاضل.........وهذا معناه أن القائم على حراسة المنزل لا يقوم بواجبه كما يجب....

وفى حالتنا هذه...ترك السباك فى الشقة على مدى يومين دون ان يشرف عليه..او يعنى يتمم على الشقة بعدها...وده اقل واجب كان مفروض يقوم به....

لا أتهمه طبعا ولكنى اضع خط تحت اهماله ولا مبالاته...ومش مفروض ان الموضوع يمر مرور الكرام...

لابد من عمل بلاغ فى القسم.....اما عن الخوف من معاملة الشرطة للمشتبه فيهم...فكل واحد ياخد جزاءه على قدر فعله....

دول ثمان خلاطات حضرتك...يعنى اللى فكهم كان مرتاح ومطمئن جدا ان مافيش رقابة عليه....

وفى حالة عدم البلاغ حيكون وارد جدا ان السرقة تتكرر مرة ومرات...ماهو مافيش خوف ولا قلق......وطبعا لا يخفى على حضرتك ان اللص بيحوم دايما حول مكان الجريمة لمتابعة الموقف خصوصا اذا كان من نفس المنطقة....

واهو بالمرة عم بركات ينتبه شويه ويعرف اللى له واللى عليه.....

والسباك اللى حضرتك بتتعامل معاه من سنوات....لا تجعل هذه السنوات تشفع له ....الناس بتتغير....بين يوم وليلة....لا اتهمه ايضا.....ولكن حضرتك مش حتخسر حاجة لو بلغت وعرفت من السارق ...من باب قطع الشك باليقين وانك ماتظلمش حد منهم لو كان الحرامى وارد الخارج مثلا....

خارج نطاق المنطقة والمعرفة يعنى.... :lol:

كان الله فى العون......وان شاء الله الحقيقة تبان ويرد لك ضالتك...

خالص مودتى واحترامى

:lol:

[عصام]

زوجتى اليوم إعترضت على أساس أن الشرطة بطبيعتها لها ممارسات غير إنسانية فى التوصل للحقيقة

إنطلاقا من خبرتى فى موقف مماثل منذ سنوات ..

أحب أقول لحضرتك إطمن تماما ..

الشرطة فى الغالب لا تتحرك إلا فى حوادث القتل .. وتلك كانت إفادة من داخل قسم الشرطة ..

وجربت الواسطة (لواء فى أمن الدولة) وفشلت كل المحاولات لتحريك التحقيق أو البحث ..

الشرطة فى المواقف دى is a complete failure

واللص حر طليق منذ 7 سنوات .. والمسروقات اللى وصلت قيمتها لأكتر من 60 ألف جنيه (وقتها) لم تعد ..

وماقبضوش حتى على البواب ..

ملحوظة: لما قلت للضابط فى سياق السؤال عن المسروقات "تخيل لو حرامى دخل شقتك وقضى فيها ليلة كاملة ممكن ياخد ايه؟" رد عليا وقال "مافيش حرامى يقدر يدخل شقتى" :lol:

لله الأمر من قبل ومن بعد وتحيا وزارة الداخلية

[se_ Elsyed]

إيه الأحباط ده كله ؟

حتى أستاذ عادل اللي بيعلمني الإيجابية ومواطنون لا متفرجون .. طلع بيخاف على الحرامي اللي مش معروف ؟؟؟؟؟؟؟؟؟؟؟

من إمتى ممكن نشفق على الحرامي مهما كان ؟

الحارس تقاعس واخطأ.. يبقى يتعاقب

السباك مشكوك فيه يبقى يتحقق معاه بالطريقة المتبعه في الشرطة ولو طلع مدان يبقى ياخد عقابه

------------

اما الأخوه اللي بيكسروا المجاديف ويقولوا يا عم الشرطة مش هاتعمل حاجه ودول ما بيتحركوش الا في القتل ومش عارف ايه ..

فهذه منتهى السلبية ..

بمنتهى البساطة خد مع سعادتك محامي مش هايتكلف 200 ج ...واعملوا محضر وخدوا رقمه ... وخلي المحامي يتابعه .. ولو ما حصلش حاجه في غضون أيام ... يبقى الواحد يتوجه لمديرية الامن ويعمل شكوى في قسم الشرطة اللي عمل فيه المحضر ويشتكي تقاعسهم ..

أنا مش جاي من المريخ يا جماعه ولا بتكلم من برج عاجي

انا عارف حقوقي وموقفي سليم وانا المجني عليه مش الجاني يبقى انا اللي اخاف ؟؟؟؟؟؟ ...

لو مديرية الأمن ما عملتش حاجه ... فيه الفضائيات أتصل ببرامج التوك شو مره وأتنين وتلاته ..

وابعث للجرايد في بريد القراء وأثير مشكلتي

اومال سوري يعني ايه الفرق بيننا وبين الشخص البسيط الذي لم يتلقى اي قدر من التعليم او قليل الحيلة

أنا كتبت موضوع من اسبوعين تلاته عن سرقة كابل الأسانسير في العمارة اللي ساكن فيها .. لان البواب كيول ونايم ومآنتخ طول اليوم .. بالله عليكم شخص زي ده نتعاطف معه طالما مش محافظ على أكل عيشه ..

صاحب العمارة ما رضيش يبهدله وخصم ثمن الكابل عليه

------------------

وانا أقرأ الموضوع ده .. تخيلت إني بأقرأ موضوع عن الأنتخابات أي أنتخابات

يا عم هاتروح ليه ما هي متزورة متزروة

يا سيدي دي بلدهم

يا عم قول يا بساط واللي خدته القرعه تاخده ام الشعور

[om marawan]

سيدى الفاضل

اتمنى ان حضرتك تكون بلغت فعلا عن السرقة حتى ولو كان المسروق بضع جنيهات

واحترم جدا اراء الزملاء فى انه ممكن الشرطة ماتعملش واجبها واحترم جداا رأى زوجة حضرتك الفاضلة فى خوفها من ممارسات الظباط

لان والدتى كان لها نفس الموقف لما اكتشفنا فى يوم بان شخص فى حسابات مستشفى ما كان فيها والدى رحمه الله سرقنا مرتين :lol:

لكن حضرتك انا باتكلم من منطلق ان كل شخص فينا يعمل واجبه

يعنى واجبى انى أبلغ عن السرقة لان الضرب على يد السارق من حدود الله و دى خطوة مهمة فى حق المجتمع اللى بكرة هيتسرق بدوره

صدقنى حضرتك لو بلغنا من زمااااااان عن كل مرتشى وحرامى بدون ماناخد اى اعذار على حد او نخاف من قطع عيشه كان الوضع اتغير

وعلى هذا باقول ان دورى انى ابلغ ...... يبقا يفضل اقوم بيه مهما كان المبلغ او السرقة تافهة لانه حقى وحق المجتمع عليا

ودور الشرطة انها تحقق .....ربنا يكرمهم ويقوموا بيه

اما ان شخص يتظلم فده وااااااارد مهما كانت الشرطة "حقانية " ...... يعنى كل واحد بياخد نصيبه وربنا سبحانه اللى بيده رفع الظلم ان وقع او منع وقوعه

ربنا بس يعين حضرتك فى قعدة القسم وياريت تحكيلنا عن التجربة لو تمت

وصدقنى حضرتك حتى لو كانت لا قدر الله بدون فوايد فعلى الاقل حضرتك حاولت

وان شاء الله ما ضع حق وراءه مطالب ( بكسر اللام)

[عصام]

... يبقى الواحد يتوجه لمديرية الامن ويعمل شكوى في قسم الشرطة اللي عمل فيه المحضر ويشتكي تقاعسهم ..

توجهت يافندم ...

وقابلت مدير أمن الجيزة وقتها (عبد الوهاب خليل أعتقد) .. تخيل؟ الراس الكبيرة اهوه

وبعتنى - بعد ما شربت اللمون - لرئيس قسم مكافحة سرقة المساكن .. اللى بعتنى لظابط اللى بعتنى لأمين شرطة اللى ادانى كارت للظابط اللى فى القسم اللى لما دخل له الكارت قاللى مش موجود ..

بس ياخسارة وقتها ما كانش فيه فضائيات

[shody]

أولا لازم تبلغ مش هقولك أن الشرطة هتهتم ببلاغك لا فدر الله لا طبعا ده مش هيحصل لكن فيه 3 سيناريوهات ممكن تحصل

أول حاجة وده احتمال 90% إنه مش هيهتموا ومش هيجبولك حاجة يبفى إنت ما خصرتش غير ال 10 جنية اللى إديتها للأمين عشان يكتبلك المحضر

ثانى احتمال إن يكون الحرامى سرق حد من المهمين وإهتموا ولقوا حاجتك معاهم والحكاية ديه حصلت مع ناس أعرفهم

ثالث إحتمال انهم بيبقوا فيه فترة بيبقوا عايزين يقفلوا محاضر هبقبضوا على واحد من اللهم عارفينهم هيجبوك ويقلولك أتعرف على الحاجات بناعتك هتقلوهم مافيش هيقلولك مش مشكلة خذ الخلاط ده بس قول انك خذت حاجة يبقى أنت برضه كسبت الخلاط

وعلى فكرة أنا عندى واحد فى الشغل أتسرق بيته اللى عاين بيته أمين شرطة (طبعا لا فيه رفع بصمات ولا حاجة ) وعمل شكوى فى مديرية الأمن وبرضه ما حصلش حاجة

أنا بتكلم عن أسكندرية الفساد فى الأقسام بقى رهيب والأمن بقى سياسى فقط لا غير

[justme]

الموضوع بتاع السرقة ده خطير ولازم مش يتساب لأن ده هيطمع السارق في انه يعيد المحاولة ولو مش معاك مع حد تاني وتبقى انت السبب

انا عارف انها ممكن تكون محاولة فاشلة بس زي ما قالوا اذا الظابط حط الموضوع في دماغه هيجيبه هيجيبه

والدليل قصة حكاها ليا ظابط شرطة قالي ان قريب وزير الداخلية كان نازل الشرقية زيارة لحد قريبه المهم ركن العربية وساب فيها المحفظة العامرة بالخيرات رجع ملقاهاش

الدنيا اتقلبت خلال ساعة كانت موجودة بكامل محتوياتها

طبعا ده قريب الوزير

وظابط تاني كان عنده مخزن واتسرق وللعلم ده كان ظابط مباحث ومقدرش يرجع الحاجة

وواحد تالت رجع لقا الحاجة بتاعته متربطه وواحد كل يوم ييجي بالليل وياخد حبه وهكذا جاب قرايبه من البلد استنوه فوق العمارة لغاية اما دخل ومسكوه وخطفوه عدة ايام لغاية اما بعتهم لحد جاب المسروقات كلها بس المثال ده عن شريعة الغاب

باختصار واجبك البلاغ والحاجة رجوعها من عدمه ده نصيب

تحياتي

[MaYousof]

أنا رأيي إن حضرتك لازم تبلغ الشرطة عشان ده مش حق حضرتك بس, ده حق كل واحد شريف في مصر

حضرتك لو رحت الشرطة عملت محضر "واتهمت" حد بالإسم والحد ده كان فعلا هو السارق والمسروقات كانت لسة عنده فبإذن الله حق حضرتك وحق الشرفاء هيرجع

الشرطة بتشتغل, صحيح هي مش بتقيم الدنيا وتقعدها ولا يرتاح لضميرها بال لحد ماتمسك الحرامي, وصحيح معدل كفاءه الشرطة في مصر اقل بمراحل من الواجب عليها تجاه شعب مصر المفدى

بس بشكل أو بآخر بتشتغل, ولو فيه اتهام في المحضر, وماكانش كيدي ففي معظم الاحوال الحاجات بترجع

وفيه مناطق معينة في القاهرة, من غير ماتتهم حد الحاجات بترجع

حضرتك لازم تبلغ الشرطة عشان حق الشرفاء يرجع لإن اللي قعد 8 ساعات يسرق لازم يتعاقب حتى لو كان اخويا

دعونا نتذكر "لو أن فاطمة بنت محمد سرقت لقطعت يدها"

مرة من سنين قرأت مقال جميل في صحيفة من الصحف المصرية عنوانه "معلهش"

مفاد المقال إن معلهش دي هي اللي جايبنا ورا

الفرد السيء يغلط فيجي المطيباتية ويحوشوا ويقولوا معلهش معلهش

وده طبعا ظلم للفرد الصالح, يعني شعب معلهش شعب ظالم, ظلم الصالحين, فلازم يقف ورا في طابور الشعوب

[عصام أبوالفتح]

أنا رأيى من رأى س س

لكن من الافضل الاول ان حضرتك تواجه البواب والسباك وتقعد معاهم وتقولهم انك كنت مأتمنهم على بيتك ومحتوياته ، وانه حسب معلوماتك مفيش حد غيرهم دخل الشقة ، وان هما المشتبه فيهم لوبلغت البوليس ، وانك مش هاتسيب حقك ، لكنك مستعد متبلغش البوليس لو الحاجة رجعت وانك هاتسامح المجرم ومش عايز تشوف وشه تانى ، ردود فعل كل واحد منهم المفروض تكشف حقيقته ، وغالبا اللى بيعيط وصوته بيعلى هو المجرم او بيكون له علاقة بالموضوع .

اذا حضرتك احترت فى ردود فعلهم ولم يتضح لك الامر وهما لم يساعداك باى معلومات اضافيه .. بلغ البوليس مع محامى وامشى فى الاجراءات .. لانهم بالفعل لا يستحقوا هذه الشفقة .. ولا يستحق المجرم ايا كان سكوتك.

[عنبو]

بلغ ياستاذ عادل واتوكل على الله وخد معاك محامى وهو هيقوم بالليله كلها

لا ضاااااااع حق وراءه مطالب

[أسد]

منذ سنوات حدث لي واقعة مشابهة ..

كنت أشطب شقة لي ..

وجاء لصوص .. وسرقوا كل أجهزة السباكة .. لم يكن هناك خلاطات راكبة.. ولكنهم سرقوا الأحواض والتواليت وحتى البانيو .. وسرقوا كل الكهرباء اللي كانت راكبة .. لدرجة إن الأسلاك اللي كانت ماشية في الجدران اتسرقت

رحت عملت محضر في القسم ..

أرسل معي أمين شركة ومخبر للمعاينة ...

وبعدين رجعت القسم .. قالولي .. اللي سرق الحاجات دي .. حد من اللي شغالين في الشقة .. أو في العمارة .. على اعتبار ان العمارة كان فيها أكثر من شقة بتتشطب في نفس الوقت ..

طلبوا مني أن أتهم أحد .. قلت لهم أنا لا أتهم أي شخص .. ولكنكم يمكنكم التعامل مع أي شخص تشتبهون فيه .. وتستجوبونه كما يتراءى لكم ..

هذا هو شغلكم ..

بعد شهر .. إتصلوا بي .. وقالوا لي أنهم مسكوا الحرامي .. وهو سباك من نفس المنطقة .. وكان سرق أكثر من شقة في العمارة .. ومسكوه في حالة تلبس ..

لكن الحاجات التي قد سرقت مني لم تعود لي أصلاً .. فقد كانت قد بيعت بالكامل .. والحرامي صرف الفلوس أكيد على المخدرات مثلاً ..

وعليه العوض

نسيت أقولكم ..

هذه الواقعة منذ عشرون عاماً ...

كانت في عام 1990

رأيي .. هو أن تبادر طبعاً بالإبلاغ عن السرقة ...

لا أعتقد أن الأمر بهذا السوء . إلا أنه في أحيان كثيرة لا تتمكن الشرطة المصرية من القبض على السارق .. كما أنهم قد لا يتعاملون بالجدية الكاملة في مثل تلك الحوادث على اعتبار أنهم قد يعتبروا أنك كنت مهملاً في الحفاظ على أغراضك..

ملاحظة أخيرة ..

أعيش في السعودية منذ سنوات طويلة ..

الوضع في مثل تلك الحالات مشابه تقريباً .. أو تماماً ... بل الأكثر من ذلك أنهم فيما ندر يقبضون على سارقي الشقق .. وتكون بالصدفة ..

ولكن .. للحق .. توجد رقابة منظورة وغير منظورة على أسواق السكراب .. أو الخردة .. والأغراض المستعملة ..

ومن خلال تلك الرقابة .. يتم القبض على كثير من المتهمين ..

في مصر .. يستطيع أي شخص أن يبيع أي شئ مسروق في أماكن كثيرة دون رقابة ..

[HanaaOsama]

والله يا استاذ عادل المفروض زي الاخوه ما قالوا ان الواحد لازم يبلغ بس بصراحة زمنا ده بقت في حاجات كتير معكوسه

انا اتعرضت لموقف برضة شبيه ,,,

السيده الي كانت بتيجي تنضفلي البيت من سنوات " اعتزلت :closedeyes: " اضطريت اشوف غيرها و شوف واحده كانت بتيجي لجيران اختي و قالوا كويسه المهم

بدأت الاحظ ان من فتره لاخري مثلا لو في فلوس متشاله و نجي بعد فتره نعدها عشان نجيب حاجة مثلا نلاقيهم ناقصين ورقة " ميتين جنية " نقول هما مش كانوا كذا ؟ .....

برضه نقول يمكن كنا عاديين غلط او صرفناهم و نسينا او اي حاجة لان الي بينقص ورقة واحده مش كلهم ,,,, يعني المهم انا مشكتش ابدا في الست ديه هي بالنسبة ليا كانت كويسه و شكلها ابن حلال و لما اتكرر الموضوع ( علي فترات متباعده )

بصراحة كنت هتجنن مفيش حد بيدخل البيت و هي حتي كمان لما بتيجي مش بسابها لوحدها في مكان لكن دلوفتي لما افتكر ممكن كنت ارد عل تلفون او ادخل البنت الحمام كدا يعني

المهم انا مشفتهاش ابدا بتاخد حاجة لكن الي خلاني اشك فيها ودتها يوم شقة حماتي

و كانت جماتي قبل لما تيجي هيا علطول حطت 50 جنية في شنطة علي المكتبة و بعد ما هيا دخلت الاوضة الي فيها المكتبة علطول حماتي ملقتش الخمسين جتية و لما وجهتها قالت ليها فتشيني و فتحت الكيس بتاعها !!!! كان صعب طبعا تفتشها ,,,,

طبعا مجبنهاش تاني لكن زوجي كان مصمم يبلغ البوليس عشان اكيد هيا الي اخدت الفلوس قبل كدا من عندنا

و قال مش هنسيب الحرامي يفلت بس انا الي مرضيتش

اكيد انا غلطانه انا عارفة لكن هنستفيد بايه لو بلغنا لا هي هيثبت عليها حاجة و بعدين ديه ست ممكن شوية " كهن " كدا و احنا تبقي احنا الي عملنا و سوينا فيها

و خفت الصراحة علي يناتي ترجع تتنتقم و لا حاجة تستني بنتي في الشارع مثلا و حصوصا بنتي كانت بتحبها و دلوقتي كم الجرائم الي في التلفزيون الي من النوعية ديه اد ايه

يمكن اكون انا خوافة جبتين لكن محبتش اخاطر بحاجة مش هتفدني و مش مهم هي اخدت كام لكن لو عملت حاجة لاولادي هعمل ايه

زوجي الصراحة مكنش موافق و قال دلوقتي احنا الي نخاف بدل الحرامي ما هو الي يخاف ,,,,

تم تعديل 27 ديسمبر 2009 بواسطة HanaaOsama

[SnipeR]

استاذ عادل الغالي

واحشني كتير الصراحة

انا لسه متعرض لقصة غريبه

عربيتي اتسرقت من تحت البيت في المعادي

العربية مستحيل تدور غير بمفتاحها الاصلي لانه كمبيوتر

العربية كانت مركونة قدام العمارة وقدامنا منظمة دولية كبيرة عليها تأمين من مباحث المعادي وامن الدولة سوا

ده غير اللي كان جوة العربية

كاميرات المنظمة صورت السرقة واتضح ان الحرامي كان قريب صاحب ورشة ميكانيكا كنت بعمل عنده العربية ونسخ المفتاح كمبيوتر في المهندسين دون علم صاحب الورشة

كده بقي في عربية مسروقة محددة الاوصاف والمعالم وحرامي معروف اهو

ازيدك من الشعر بيت؟

العربية كان فيها جي بي اس

عملت تتبع للجي بي اس وطلعت مركونة في مزرعة في منطقة اسمها كفر العلو قبل الصف

وصورت مكان المزرعة بجوجل

ووديت كل ده للمباحث اللي النيابة طلبت منها سرعة التحريات في الواقعة

قعدت كتير؟

60 يوم \

رئيس النيابة قاللي انا مش مهم يجيبو الجاني لانو اكيد هربان وهم مش فاضيين

المهم يبعتلي التحريات احيله للمحاكمة متهم هارب

!!!!!!!!!!!!!!!!

طب والعربية؟

قاللي مهو لما ييجي هتيجي معاه العربيةwst::

رحت المرور عشان ارفع ملف العربية من المرور لانها مسروقة

الاخ الباشمهندس الدكتور حاضابط الللي هناك قاللي لازم تجيبلي جواب ن مباحث السيارات

رحت قابلت رئيس قسم مكافحة سرقات السيارات في مديره امن حلوان

قاللي دي مش عندي

ليه بس؟

قاللي عشان انت اتهمت حد محدد ..كده مبقتش سرقة سيارة بقت خلافات شخصية

انا يجيلي محضر السرقة من غير اسماء وانا ادور ع العربية !!!!!!!!!!!!!

اروح اجيب الجواب منين؟

قالولي من القسم

رحت القسم قالولي بتاع المرور مش فاهم حاجة والضابط بتاع المكافحة بردو مش فاهم

خد المحضر صورة وارفقة في ملف العربية

المهم

عاوز اجيب العربية من مكمنها اللي مدفونه فيه

قالولي ايه بقي؟

لازم تبقي في المعادي

طالما في دايرة قسم تاني احنا نبعت اشاره

بعتو اشاره لقسم حلوان

رحت انا قسم حلوان

قابلت رئيس المباحث شاب لطيف جدا واعتقد هو الوحيد اللي فاهم في وسط اللي اقبلتهم

قاللي ده شغل المعادي..حتي لو نزلت نفذت الضبط في الاخر دخ مجهودهم هم واهم اللي المفروض يعملوه

بدون تطويل ممل قاللي انزل لمكان العربية واعمل محضر نجده انك واقف قدام عربيتك وانا ابعتلك قوه

وقد كان

نزلت المزرعة اللطيفة وانا وطقم اصدقاء

دخلناها بطريقة ما ..لقيت العربية ..قعدت جواها واتصلت بالنجدة جت لمت المزرعة وصاحبها وعربيتين تانيين كانو مسروقين جوه

الدرس المستفاد :متعتمدتش اوي عالشرطة في هكذا قصص

احتراماتي

[عصام]

ياخوانا الـ job description بتاع الداخلية فى مصر مختلف عن أى مكان تانى ..

بس نقول ايه ..

اللى إيده فى الميه